Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Nyɔŋmɔ Kɛ Kristo He Anɔkwale Lɛ

Nyɔŋmɔ Kɛ Kristo He Anɔkwale Lɛ

Adesai jáa nyɔŋmɔi pii moŋ, shi anɔkwa Nyɔŋmɔ kome pɛ yɔɔ. (Yohane 17:3) Lɛ ji “Ofe lɛ,” nibii fɛɛ a-Bɔlɔ kɛ wala fɛɛ Jɛɛhe lɛ. Lɛ pɛ esa akɛ wɔjá.​—Daniel 7:18; Kpojiemɔ 4:11.

Namɔ Ji Nyɔŋmɔ?

Nyɔŋmɔ gbɛ́i lɛ je kpo yɛ ŋmalɛ lɛ mli AAAFEE SHII 7,000

YEHOWA ji Nyɔŋmɔ gbɛ́i

NUŊTSƆ, NYƆŊMƆ, TSƐ​—Ji Yehowa gbɛnaa gbɛ́ii lɛ ekomɛi

Te Atsɛɔ Nyɔŋmɔ Tɛŋŋ? Nyɔŋmɔ diɛŋtsɛ wie akɛ: “Miji Yehowa. Migbɛ́i ji no.” (Yesaia 42:8) Nyɔŋmɔ gbɛ́i lɛ je kpo yɛ Biblia lɛ mli aaafee shii 7,000 sɔŋŋ. Shi akɛ gbɛnaa gbɛ́i tamɔ “Nuŋtsɔ” eye gbɛ́i nɛɛ najiaŋ yɛ Biblia shishitsɔɔmɔi pii amli, ni enɛ esaaa. Nyɔŋmɔ miisumɔ ni otsɔ enaanyo, no hewɔ lɛ, ekɛɛ ‘obo otsɛ egbɛ́i lɛ.’​—Lala 105:1.

Yehowa Gbɛnaa Gbɛ́ii Lɛ. Biblia lɛ kɛ gbɛnaa gbɛ́ii tamɔ “Nyɔŋmɔ,” “Ofe,” “Bɔlɔ,” “Tsɛ,” kɛ “Nuŋtsɔ” tsɛɔ Yehowa. Aŋmala sɔlemɔi pii yɛ Biblia lɛ mli ni mɛi ni sɔleɔ lɛ kɛ Nyɔŋmɔ gbɛ́i ni ji Yehowa lɛ, kɛ gbɛnaa gbɛ́i ko ni sa fɛɛ tsɛ Yehowa.​—Daniel 9:4.

 Bɔ Ni Nyɔŋmɔ Yɔɔ. Nyɔŋmɔ lɛ, mumɔ ni, ni wɔnyɛŋ wɔna lɛ. (Yohane 4:24) Biblia lɛ kɛɔ akɛ, “gbɔmɔ ko enako Nyɔŋmɔ pɛŋ.” (Yohane 1:18) Ni Biblia lɛ hãa wɔleɔ bɔ ni enuɔ he ehãa. Mɛi anifeemɔ baanyɛ ahã ewerɛ aho ehe, loo ‘ená miishɛɛ.’​—Abɛi 11:20; Lala 78:40, 41.

Nyɔŋmɔ Sui Ni Nɔ Bɛ Lɛ. Nyɔŋmɔ kwɛɛɛ mɛi ahiɛiaŋ, ekɔɔɔ he eko maŋ nɔ amɛjɛ loo mɛi ni amɛji. (Bɔfoi 10:34, 35) Agbɛnɛ hu, eji “mɔbɔnalɔ kɛ musuŋtsɔlɔ, ní mli fuuu mra ni esuɔmɔ ni tsakeee kɛ enɔkwale fa babaoo.” (2 Mose 34:6, 7) Shi, Nyɔŋmɔ sui lɛ ateŋ ejwɛ komɛi sa kadimɔ waa.

Hewalɛ. Akɛni eji “Nyɔŋmɔ Ofe” hewɔ lɛ, husu bɛ hewalɛ ni eyɔɔ lɛ he, ni ebaanyɛ etsu eshiwoi fɛɛ ahe nii.​—1 Mose 17:1.

Hiɛshikamɔ. Nyɔŋmɔ hiɛ kã shi fe mɔ fɛɛ mɔ. Enɛ ji nɔ ni Biblia lɛ tsɔɔ kɛ́ ekɛɛ, “ekome too pɛ ji hiɛshikalɔ lɛ.”​—Romabii 16:27.

Jalɛsaneyeli. Nyɔŋmɔ feɔ nɔ ni ja be fɛɛ be. Enifeemɔi fɛɛ “eye emuu,” ni “efeee nɔ ko ni ejaaa.”​—5 Mose 32:4.

Suɔmɔ. Biblia lɛ kɛɔ akɛ, “Nyɔŋmɔ lɛ, suɔmɔ ji lɛ.” (1 Yohane 4:8) Jeee akɛ Nyɔŋmɔ jieɔ suɔmɔ kpo kɛkɛ​—suɔmɔ ji su ni kadiɔ lɛ. Esuɔmɔ ni nɔ bɛ lɛ jeɔ kpo yɛ nɔ fɛɛ nɔ ni efeɔ lɛ mli, ni wɔnáa he sɛɛ yɛ gbɛi pii anɔ.

Naanyo Ni Nyɔŋmɔ Kɛ Adesai Bɔɔ. Nyɔŋmɔ ji wɔ-Tsɛ ni yɔɔ ŋwɛi ni sumɔɔ wɔ lɛ. (Mateo 6:9) Kɛ́ wɔhe enɔ wɔye lɛ, wɔbaanyɛ wɔtsɔmɔ enanemɛi. (Lala 25:14) Anɔkwa, Nyɔŋmɔ kɛɛ otsi obɛŋkɛ lɛ yɛ sɔlemɔ mli, ni ‘oshɛrɛ nibii ni hãa oyeɔ otsui lɛ fɛɛ oshwie enɔ, ejaakɛ ejwɛŋɔ ohe.’​—1 Petro 5:7; Yakobo 4:8.

Mɛɛ Srɔto Yɔɔ Nyɔŋmɔ Kɛ Kristo Teŋ?

Jeee Yesu Ji Nyɔŋmɔ. Esoro Yesu kwraa​—lɛ pɛ ji mɔ ni Nyɔŋmɔ diɛŋtsɛ bɔ lɛ tɛ̃ɛ. No hewɔ Biblia lɛ tsɛɔ lɛ Nyɔŋmɔ Bi lɛ. (Yohane 1:14) Be ni Yehowa bɔ Yesu sɛɛ lɛ, ekɛ ekromɔbi nɛɛ tsu nii akɛ “ŋaalɔ kpanaa” kɛbɔ nibii kɛ mɛi krokomɛi fɛɛ.​—Abɛi 8:30, 31; Kolosebii 1:15, 16.

 Yesu Kristo ekɛɛɛ akɛ lɛ ji Nyɔŋmɔ. Moŋ lɛ, ewie akɛ: “Najiaŋdamɔlɔ ni jɛ [Nyɔŋmɔ ŋɔɔ] ji mi, ni nakai mɔ lɛ tsu mi.” (Yohane 7:29) Ekɛɛ ekaselɔi lɛ ateŋ mɔ kome akɛ, Yehowa ji “mi-Tsɛ kɛ nyɛ hu nyɛ-Tsɛ,” kɛ “mi-Nyɔŋmɔ kɛ nyɛ hu nyɛ-Nyɔŋmɔ.” (Yohane 20:17) Yesu gbele sɛɛ lɛ, Yehowa tee lɛ shi kɛtee ŋwɛi ni ehã lɛ hegbɛ kpele yɛ E-ninejurɔ nɔ.​—Mateo 28:18; Bɔfoi 2:32, 33.

Yesu Kristo Baanyɛ Awa Bo Ni Otsi Obɛŋkɛ Nyɔŋmɔ

Yesu ba shikpɔŋ lɛ nɔ koni ebatsɔɔ wɔ e-Tsɛ lɛ he nii. Yehowa diɛŋtsɛ wie yɛ Yesu he akɛ: “Mɔ nɛ ji mi-Bi ni misumɔɔ lɛ lɛ. Nyɛboa lɛ toi.” (Marko 9:7) Mɔ ko bɛ ni le Nyɔŋmɔ jogbaŋŋ fe Yesu. Ewie akɛ: “Mɔ ko mɔ ko leee mɔ ni Tsɛ lɛ ji, ja Bi lɛ pɛ, kɛ mɔ fɛɛ mɔ ni Bi lɛ sumɔɔ akɛ ejie lɛ kpo etsɔɔ lɛ lɛ.”​—Luka 10:22.

Yesu jie Nyɔŋmɔ sui lɛ akpo jogbaŋŋ kɛmɔ shi. Yesu kase e-Tsɛ ni ejie esui lɛ akpo jogbaŋŋ aahu akɛ, enyɛ ekɛɛ akɛ: “Mɔ fɛɛ mɔ ni ena mi lɛ ena Tsɛ lɛ hu.” (Yohane 14:9) Yesu jie e-Tsɛ lɛ suɔmɔ lɛ kpo yɛ ewiemɔi kɛ enifeemɔi amli, ni no gbala mɛi kɛbɛŋkɛ Nyɔŋmɔ. Ekɛɛ akɛ: “Miji gbɛ lɛ kɛ anɔkwale lɛ kɛ wala lɛ. Mɔ ko mɔ ko baaa Tsɛ lɛ ŋɔɔ akɛ ja etsɔ minɔ.” (Yohane 14:6) Ewie hu akɛ: “Anɔkwa jálɔi lɛ baajá Tsɛ lɛ kɛ mumɔ kɛ anɔkwale, ejaakɛ, anɔkwa, Tsɛ lɛ miitao mɛi ni tamɔ nɛkɛ ni amɛjá lɛ.” (Yohane 4:23) Miishɛɛ sane! Yehowa miitao mɛi ni tamɔ bo ni miitao amɛle anɔkwale ni kɔɔ ehe lɛ.