Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

2 Eyeɔ Ebuaa Bo Ni Otsu Naagbai Ahe Nii

2 Eyeɔ Ebuaa Bo Ni Otsu Naagbai Ahe Nii

Naagbai ni wɔkɛkpeɔ lɛ ekomɛi asɛɛ tsɛɔ, bei komɛi po lɛ, amɛheɔ afii abɔ dani anyɛɔ atsuɔ amɛhe nii. Ekolɛ amɛbaahe shi yɛ wɔshihilɛ mli dani wɔbaayɔse po. Ani ŋaawoo ni yɔɔ Biblia lɛ mli lɛ baanyɛ awa wɔ ni wɔtsu naagbai ni tamɔ nakai lɛ ahe nii? Susumɔ naagbai nɛɛ ekomɛi ahe okwɛ.

TSUI NI AYEƆ FE NINE

Yoo ko ni atsɛɔ lɛ Rosie lɛ wie akɛ, “Misusu akɛ shihilɛi komɛi ni mikɛkpeɔ lɛ amli baawo wu kwraa fe bɔ ni eji amrɔ nɛɛ, ni enɛ hã miye mitsui waa be fɛɛ be.” Mɛɛ Biblia mli ŋmalɛi ye ebua lɛ? Ekome ji Mateo 6:34: “Nyɛkayea nyɛtsui yɛ wɔ́ he kɔkɔɔkɔ, ejaakɛ wɔ́ hu kɛ lɛ diɛŋtsɛ etsuiyelii baaba. Gbi fɛɛ gbi kɛ emli naagbai.” Amrɔ nɛɛ, Rosie kɛɛ Yesu wiemɔi nɛɛ ye ebua lɛ ni ekpa etsui yeli yɛ nɔ ni baaba wɔ́ lɛ he. Ekɛfata he akɛ, “Naagbai ni miyɔɔ lɛ fa momo, no hewɔ lɛ, mikɛ naagbai ni bako kɛ naagbai ni ekolɛ amɛbaŋ po lɛ fataŋ nɔ ni miyɔɔ lɛ ahe.”

Yoo ko ni atsɛɔ lɛ Yasmine lɛ ye etsui waa diɛŋtsɛ. Ewie akɛ: “Mifóɔ gbii pii yɛ otsi mli, ni bei komɛi po lɛ, kɛ́ je na lɛ, minyɛɛɛ mawɔ. Minu he akɛ susumɔi ni ejaaa ni mináa lɛ ehã mimiishɛɛ fɛɛ miitã.” Mɛɛ ŋmalɛ ye ebua lɛ? Ekɛɛ 1 Petro 5:7 lɛ ji nɔ ni ye ebua lɛ, jɛmɛ kɛɔ akɛ: “[Nyɛshɛrɛa] nibii ni hãa nyɛyeɔ nyɛtsui lɛ fɛɛ [nyɛshwiea Nyɔŋmɔ nɔ] . . . , ejaakɛ ejwɛŋɔ nyɛhe.” Yasmine wie akɛ: “Be ni be shwie mli lɛ, mitee nɔ misɔle mihã Yehowa, ni ebo misɔlemɔi lɛ toi. Minu he tamɔ nɔ ni awo jatsu ko ni tsii yɛ minɔ. Kɛ́ eyɛ mli aahu lɛ, susumɔi ni  ejaaa lɛ baa mijwɛŋmɔ mli, shi amrɔ nɛɛ mile bɔ ni matsu susumɔi nɛɛ ahe nii mahã.”

BE NI ATSIƆ AWOƆ BE MLI

Oblayoo ko ni atsɛɔ lɛ Isabella lɛ wie akɛ: “Efeɔ mi akɛ, akɛ su nɛɛ fɔɔ mɔ, ejaakɛ nakai mipapa hu yɔɔ. Mitaa shi ni mifeee nɔ ko, mikwɛɔ TV, loo mifeɔ nibii krokomɛi ni he ehiaaa, ni mitsiɔ nibii komɛi ni he hiaa ni esa akɛ mafee lɛ moŋ mitoɔ. Su nɛɛ ehiii, ejaakɛ ehãa etɔɔ bo, ni ehãaa otsu nibii ni esa akɛ otsu lɛ jogbaŋŋ.” Shishitoo mla ni yɔɔ 2 Timoteo 2:15 lɛ ji nɔ ni ye ebua lɛ, jɛmɛ kɛɔ akɛ: “Bɔɔ mɔdɛŋ fɛɛ ni ooonyɛ ni okɛ ohe ahã Nyɔŋmɔ akɛ mɔ ni Nyɔŋmɔ náa ehe miishɛɛ, nitsulɔ ni hiɛ gbooo yɛ nɔ ko ni etsu he.” Isabella wie akɛ, “Misumɔɔɔ matsi be mawo be mli, koni minitsumɔ lɛ akawo Yehowa hiɛgbele.” Isabella etsake waa.

Nakai nɔŋŋ eba lɛ yɛ yoo ko ni atsɛɔ lɛ Kelsey lɛ gbɛfaŋ. Ewie akɛ: “Kɛ́ miyɛ nɔ ko ni mafee lɛ, mitsiɔ mitoɔ aahu kɛyashiɔ be lɛ fɛɛ tãa. Enɛ hãa mifóɔ, minyɛɛɛ mawɔ, ni mitsui yeɔ. Su nɛɛ waaa mi kwraa.” Ŋmalɛ ni yɔɔ Abɛi 13:16 lɛ ji nɔ ni ye ebua Kelsey. Jɛmɛ kaneɔ akɛ: “Mɔ ni hiɛ tɛ̃ lɛ, ekɛ nilee tsuɔ nii, shi buulu jieɔ lɛ diɛŋtsɛ ebuulufeemɔ kpo.” Ejwɛŋ ŋmalɛ nɛɛ nɔ, ni ekase nii yɛ mli. Ewie akɛ: “Ehi akɛ obaato nibii ahe gbɛjianɔ jogbaŋŋ kɛtsɔ hiɛ. Amrɔ nɛɛ, miyɛ wolo ko yɛ mikpɔ̃lɔ lɛ nɔ ni miŋmalaa nitsumɔi fɛɛ ni miyɔɔ tsumɔ lɛ yɛ mli. Enɛ hãa mitoɔ nibii ni matsu lɛ ahe gbɛjianɔ, ni mimɛɛɛ ni be lɛ fɛɛ atã dani matsu nibii nɛɛ.”

SHOOFEEMƆ

Yoo ko ni atsɛɔ lɛ Kirsten lɛ wie akɛ: “Miwu shi mi kɛ bii ejwɛ ni darako.” Mɛɛ Biblia mli shishitoo mla ye ebua lɛ? No ji Abɛi 17:17 lɛ. Jɛmɛ kɛɛ: “Naanyo kpakpa sumɔɔ mɔ yɛ bei fɛɛ mli, ni ebatsɔɔ nyɛmi yɛ haomɔ beiaŋ.” Kirsten tao yelikɛbuamɔ kɛjɛ mɛi ni ekɛ amɛ fɛɛ sɔmɔɔ Yehowa lɛ adɛŋ. Ani amɛye amɛbua lɛ? Ewie akɛ: “Minanemɛi lɛ wa mi yɛ gbɛi srɔtoi pii anɔ! Amɛteŋ mɛi komɛi yayeɔ jara ni amɛhéɔ fɔfɔii hu, ni amɛbashiɔ yɛ mishinaa lɛ shi. Mɛi baye amɛbua mi kɛ mibii lɛ be ni wɔfãa kɛjɛɔ shĩa kome mli kɛyaa ekroko mli lɛ, ni amɛfee nakai shii etɛ sɔŋŋ. Mɔ kome wa mi ni miná nitsumɔ. Minanemɛi lɛ shiii mi kwraa.”

Delphine ni wɔtsĩ etã kɛtsɔ hiɛ lɛ hu he fee shoo. Ewie akɛ, be ni ekɛ naagbai lɛ kpe lɛ, enu he akɛ nibii miiya lɛ jogbaŋŋ kɛmiihã mɔ fɛɛ mɔ, ja lɛ pɛ. Ekɛfata he akɛ: “Mihe fee shoo waa.” Ŋmalɛ ko ni wa lɛ waa ji Lala 68:6 lɛ. Jɛmɛ kɛɛ: “Nyɔŋmɔ hãa mɛi ni bɛ mɔ ko lɛ shĩa koni amɛhi mli.” Ewie akɛ: “Mile akɛ jeee shĩa diɛŋtsɛ ni wɔbaaná amrɔ nɛɛ he ŋmalɛ nɛɛ wieɔ lɛ. Moŋ lɛ, mibana akɛ, Yehowa hãa wɔnáa nanemɛi kpakpai ni sumɔɔ lɛ, ni nanemɛi nɛɛ kpɛtɛɔ wɔ gbagbalii; enɛ bafeɔ tamɔ shĩa ko ni yɔɔ shweshweeshwe ni Nyɔŋmɔ kɛhã wɔ. Shi mile akɛ ja mibɛŋkɛ Yehowa dani manyɛ mabɛŋkɛ mɛi krokomɛi. No hewɔ lɛ, Lala 37:4 lɛ ye ebua mi ni mifee nakai. Jɛmɛ kɛɛ: ‘Omii ashɛ ohe waa yɛ Yehowa hewɔ, ni ebaahã bo nibii ni otsui taoɔ lɛ.’”

Ewie akɛ: “Mina akɛ esa akɛ matsi mabɛŋkɛ Yehowa waa. Lɛ ji Naanyo ni fe fɛɛ ni manyɛ mikɛbɔ. Kɛkɛ ni miŋmala nibii komɛi ni manyɛ mikɛ mɛi krokomɛi afee ekome kɛfee, koni no ahã mikɛ mɛi ni sumɔɔ Yehowa lɛ abɔ. Mibɔ mɔdɛŋ akɛ mana sui kpakpai ni mɛi krokomɛi yɔɔ lɛ, ní mikɛ amɛ ahi shi tamɔ nɔ ni amɛtɔ̃ɔɔ.”

Anɔkwa, mɛi ni sɔmɔɔ Nyɔŋmɔ lɛ hu tɔ̃ɔ. Yehowa Odasefoi kɛ naagbai ni mɔ fɛɛ mɔ kɛkpeɔ lɛ eko kpeɔ. Shi Biblia mli tsɔsemɔ ni amɛnine shɛɔ nɔ lɛ tsirɛɔ amɛ ni amɛyeɔ amɛbuaa mɛi be fɛɛ be ni amɛbaaná hegbɛ lɛ. Ehi akɛ wɔkɛ mɛi ni tamɔ nakai baabɔ naanyo. Shi naagbai komɛi yɛ ni anyɛŋ amɛhe nii atsu ŋmɛnɛ, tamɔ helai ni tsamɔ wa kɛ suɔlɔ ko gbele nɛkɛ. Ani Biblia mli shishitoo mlai baanyɛ aye abua wɔ kɛkpee naagbai nɛɛ hu anaa?

Kɛ́ okɛ Biblia mli gbɛtsɔɔmɔi tsu nii lɛ, obaaná nanemɛi ni baaye abua bo