Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Nilee Ni Yɔɔ Biblia Tsɔɔmɔi Amli Lɛ Be Hooo

Nilee Ni Yɔɔ Biblia Tsɔɔmɔi Amli Lɛ Be Hooo

FEEMƆ SHIHILƐ NƐƐ HE MFONIRI OKWƐ: Ooshara shi yɛ he ko ni akɛ blema nibii toɔ. Nibii nɛɛ pii ahe egbulɔ, amɛhe ekwa, ni amɛhe eye hu. Ekomɛi hu ahe ekumɔ waa. Shi ekome ko yɛ mli ni he efeko nɔ ko nɔ ko; samai bibii ni aye yɛ he lɛ yɛ bɔ ni amɛyɔɔ lɛ nɔŋŋ. Kɛkɛ ni obi mɔ ni kɛ bo sharaa shi yɛ jɛmɛ lɛ akɛ, “Ani ekrokomɛi lɛ etsɛ kwraa fe enɛ?” Ni ekɛɛ, “Dabi, no etsɛ fe amɛteŋ babaoo, ni efiteko pɛŋ.” Ni obi lɛ akɛ, “Ani akɛyato he ko?” Kɛkɛ ni ekɛɛ, “Dabi, no ji nɔ ni ekpee kɔɔyɔɔ kɛ nugbɔnɛmɔ naa fe fɛɛ. Ni mɛi pii eka akɛ amɛbaafite lɛ.” Ekolɛ onaa baakpɛ ohe ni obaabi akɛ, ‘Mɛni akɛfee?’

Biblia lɛ tamɔ nakai blema nii ni etsɛ waa shi ehe efeko nɔ ko nɔ ko lɛ. Eji wolo ni etsɛ waa​—etsɛ fe woji babaoo. Ayɛ woji krokomɛi hu ni etsɛ. Shi tamɔ bɔ ni blema nibii komɛi ahe kumɔɔ lɛ, nakai nɔŋŋ blema woji pii efite waa akɛni amɛtsɛ lɛ hewɔ. Akɛ nɔkwɛmɔnɔ lɛ, nibii ni woji nɛɛ wieɔ yɛ jeŋ shikpamɔ he lɛ kɛ nibii ni akpa shi ana ŋmɛnɛ lɛ kpãaa gbee. Bei pii lɛ, ŋaa ni amɛwoɔ yɛ helatsamɔ he lɛ yɛ oshãra. Ni blema woji pii yɛ ni eshwɛ amɛfãi komɛi kɛkɛ; amɛfãi komɛi elaaje loo amɛfite kwraa.

Shi esoro Biblia lɛ kwraa. Aje Biblia lɛ ŋmaa shishi nɔ ni fe afii 3,500 ni eho nɛ moŋ, shi eyɛ bɔ ni eyɔɔ lɛ nɔŋŋ. Ate shi awo lɛ shii abɔ yɛ afii ohai abɔ ni eho lɛ amli​—no ji ashã, agu ekɛ nitsumɔ, ni agbe he guɔ​—shi emli wiemɔi lɛ tsakeko. Ni ŋmɛnɛ lɛ, atee hiɛ yɛ nɔ fɛɛ nɔ mli moŋ, shi Biblia lɛ be hoko kwraa, ejaakɛ ewieɔ nibii pii ni kɔɔ wɔsɛɛ he.​—Kwɛmɔ akrabatsa ni yitso ji, “Ani Ebe Eho Aloo Ewieɔ Wɔsɛɛ Nibii Po Ahe?

 JEŊBA HE MLAI NI HE HIAA WƆ ŊMƐNƐ

Ekolɛ obaabi ohe akɛ, ‘Ani Biblia tsɔɔmɔi ahe yɛ sɛɛnamɔ kwraa ŋmɛnɛ?’ Bɔ ni afee ni oná hetoo lɛ, bi ohe akɛ: ‘Mɛɛ naagbai wuji adesai kɛkpeɔ ŋmɛnɛ? Amɛteŋ mɛni kɛ mɛni suɔ wɔtsui fe fɛɛ?’ Ekolɛ obaakɛɛ tawuu, mujiwoo, awuiyeli, loo juu kɛ fɔ̃. Agbɛnɛ lɛ, hã wɔkwɛ Biblia mli shishitoo mlai komɛi, ni obi ohe akɛ, ‘Kɛ́ mɛi hi shi yɛ jeŋba he mlai nɛɛ anaa lɛ, ani je lɛŋ shihilɛ ehiŋ fe bɔ ni eji amrɔ nɛɛ?’

TOIŊJƆLƐ SƐƐ TIUMƆ

“Mɛi ni sumɔɔ toiŋjɔlɛ lɛ yɛ miishɛɛ, ejaakɛ abaatsɛ amɛ Nyɔŋmɔ bii.” (Mateo 5:9) “Kɛ́ ebaahi lɛ, nyɛgbɛfaŋ lɛ, nyɛfea bɔ fɛɛ bɔ ni nyɛaanyɛ koni toiŋjɔlɛ ahi nyɛ kɛ mɛi fɛɛ ateŋ.”​—Romabii 12:18.

MƆBƆNALƐ, TƆMƆI NI AKƐKEƆ

“Mɛi ni naa mɔbɔ lɛ yɛ miishɛɛ, ejaakɛ abaana amɛ mɔbɔ.” (Mateo 5:7) “Kɛ́ mɔ ko yɛ sane yɛ mɔ ko he po lɛ, nyɛyaa nɔ nyɛnáa tsui nyɛhãa nyɛhe ni nyɛkɛkea nyɛhe tswaa. Bɔ ni Yehowa * kɛke nyɛ tswaa lɛ, nyɛ hu nyɛfea nakai nɔŋŋ.”​—Kolosebii 3:13.

GBƆMƐI SRƆTOI FƐƐ AFEE EKOME

“Gbɔmɔ kome mli [Nyɔŋmɔ jɛ] efee gbɔmɛi ajeŋmaji fɛɛ koni amɛhi shikpɔŋ muu lɛ fɛɛ nɔ.” (Bɔfoi 17:26) “Nyɔŋmɔ kwɛɛɛ mɛi ahiɛiaŋ, shi moŋ, yɛ jeŋmaŋ fɛɛ jeŋmaŋ mli lɛ, mɔ ni sheɔ lɛ gbeyei ni efeɔ nɔ ni ja lɛ, lɛ ji mɔ ni enáa ehe miishɛɛ.”​—Bɔfoi 10:34, 35.

BULƐ KƐHÃ SHIKPƆŊ LƐ

“Yehowa Nyɔŋmɔ kɛ gbɔmɔ lɛ yawo Eden abɔɔ lɛ mli koni etsu mli nii ní ekwɛ nɔ.” (1 Mose 2:15) Nyɔŋmɔ baafite “mɛi ni fiteɔ shikpɔŋ lɛ.”​—Kpojiemɔ 11:18.

NYƐƐ KƐHÃ AMIMYELI KƐ JEŊBA SHA

“Nyɛhiɛ ahia nyɛhe nɔ yɛ amimyeli srɔtoi fɛɛ he, ejaakɛ kɛji gbɔmɔ ená nii babaoo ni eteke nɔ po lɛ, jeee nibii ni eyɔɔ lɛ hãa lɛ wala.” (Luka 12:15) “Ajwamaŋbɔɔ kɛ muji nii srɔtoi fɛɛ kɛ amimyeli lɛ, akatsĩ tã po yɛ nyɛteŋ, ejaakɛ enɛ esaaa mɛi krɔŋkrɔŋi.”​—Efesobii 5:3.

ANƆKWAYELI, NII NI ATSUƆ WAA

“Wɔmiisumɔ ni wɔye anɔkwa yɛ nibii fɛɛ ni wɔfeɔ lɛ amli.” (Hebribii 13:18) “Julɔ lɛ ekaju dɔŋŋ; shi moŋ, etsu nii waa.”​—Efesobii 4:28.

ESA AKƐ WƆYE WƆBUA MƐI NI EHIA AMƐ LƐ

“Nyɛshɛjea mɛi ni ehao lɛ amii, nyɛyea nyɛbuaa mɛi ni he waaa lɛ, nyɛtoa nyɛtsui shi nyɛhãa mɛi fɛɛ.” (1 Tesalonikabii 5:14) Esa akɛ “akwɛ awusãi kɛ yei okulafoi yɛ amɛmanehulu lɛ mli.”​—Yakobo 1:27.

Biblia lɛ ewieee jeŋba he mlai nɛɛ ahe kɛkɛ. Shi moŋ, ewoɔ wɔ hewalɛ ni wɔsumɔ mlai nɛɛ, ni wɔkɛtsu nii yɛ wɔdaa gbi shihilɛ mli. Kɛji mɛi pii kɛ jeŋba he mlai ni wɔwie nɛɛ tsu nii lɛ, ani naagbai ni suɔ adesai atsui lɛ anɔ gbɔŋ kwraa? Belɛ, Biblia mli shishitoo mlai ahe yɛ sɛɛnamɔ ŋmɛnɛ fe bei fɛɛ ni eho! Shi mɛɛ gbɛ nɔ obaanyɛ oná Biblia tsɔɔmɔi ahe sɛɛ amrɔ nɛɛ?

 BƆ NI OBAANÁ BIBLIA TSƆƆMƆI AHE SƐƐ AMRƆ NƐƐ

Hiɛshikalɔ ni fe fɛɛ ni ehi shikpɔŋ lɛ nɔ pɛŋ lɛ wie akɛ: “Abuɔ hiɛshikamɔ bem yɛ enitsumɔi lɛ anaa.” (Mateo 11:19, shishigbɛ niŋmai) Ani okɛ lɛ kpãaa gbee? Nɔ ni tsɔɔ akɛ nilee yɛ wiemɔ ko mli ji nɔ ni jɛɔ mli kɛbaa kɛ́ akɛtsu nii. No hewɔ lɛ, ekolɛ obaakɛɛ akɛ: ‘Kɛ́ Biblia lɛ he yɛ sɛɛnamɔ lɛɛlɛŋ lɛ, belɛ esa akɛ kɛji mikɛtsu nii lɛ, ewo yibii kpakpai. Ni esa kɛ ewa mi ni manyɛ makpee naagbai ni mikɛkpeɔ bianɛ lɛ anaa.’ Naa nɔkwɛmɔnɔ ko.

No mli lɛ, nɔ fɛɛ nɔ miiya nɔ jogbaŋŋ kɛmiihã yoo ko ni atsɛɔ lɛ Delphine. * Shi trukaa lɛ, ekɛ jaramɔ shihilɛi srɔtoi kpe. Ebiyoo ni eye aaafee afii 15 lɛ gbo. Egbãla fite. Ni ekɛ shika he naagbai bɔi kpee. Ewie akɛ: “Jeŋ shihilɛ je mitsine, ejaakɛ mibiyoo egbo, mibɛ wu, ni mibɛ shĩa. Minu he akɛ mibɛ nɔ ko mli dɔŋŋ, ni abuuu mi, minijiaŋ je wui, ni mihiɛnɔkamɔ fɛɛ tã.”

Delphine na faŋŋ akɛ wiemɔi nɛɛ ji anɔkwale akɛ: “Wɔwala afii lɛ, afii 70 ni, ni kɛ́ wɔyɛ gbɔmɔtsoŋ hewalɛ lɛ, afii 80. Shi amɛmli eyi kɛ haomɔ kɛ awerɛho; amɛhoɔ kɛyaa oya, ni wɔfilikiɔ kɛyaa.”​—Lala 90:10.

Biblia lɛ ye ebua Delphine yɛ ejaramɔ shihilɛ lɛ mli. Ni ená he sɛɛ waa diɛŋtsɛ. Wɔbaana yɛ saji etɛ  ni nyiɛ sɛɛ lɛ amli akɛ, Biblia lɛ eye ebua mɛi babaoo ni kɛ emli ŋaawoi lɛ tsu nii lɛ waa, ni amɛnyɛ amɛtsu amɛnaagbai lɛ ahe nii. Amɛna akɛ Biblia lɛ tamɔ nakai blema nii ni wɔwie he yɛ sane nɛɛ shishijee gbɛ lɛ. Etamɔɔɔ woji babaoo ni be hoɔ ni anyɛɛɛ akɛ amɛmli wiemɔi atsu nii dɔŋŋ lɛ. Ani esoro nɔ ni akɛfee Biblia lɛ hewɔ ni etamɔɔɔ woji nɛɛ? Ani eeenyɛ efee akɛ Nyɔŋmɔ wiemɔi ji nɔ ni yɔɔ mli, shi jeee gbɔmɛi awiemɔi?​—1 Tesalonikabii 2:13.

Ekolɛ bo hu ona akɛ wɔwala sɛɛ etsɛɛɛ, ni emli eyi kɛ naagbai. Kɛ́ naagbai miisu otsui lɛ, nɛgbɛ otaoɔ miishɛjemɔ, yelikɛbuamɔ, kɛ ŋaawoo kpakpa yɛ?

Hã wɔkwɛ gbɛi titrii etɛ komɛi anɔ ni Biblia lɛ baanyɛ aye abua bo yɛ oshihilɛ mli. Ebaanyɛ etsɔɔ bo bɔ ni ooofee

  1. otsi ohe kɛje naagbai ahe.

  2. otsu shihilɛi ni jaraa ahe nii.

  3. okpee shihilɛi ni onyɛŋ amɛhe nɔ ko ofee lɛ anaa.

Saji ni nyiɛ sɛɛ lɛ baawie otii etɛ nɛɛ ahe.

^ kk. 10 Yehowa ji Nyɔŋmɔ gbɛ́i taakɛ ejeɔ kpo yɛ Biblia lɛ mli lɛ.​—Lala 83:18.

^ kk. 24 Atsake gbɛ́ii ni yɔɔ sane nɛɛ kɛ etɛ ni nyiɛ sɛɛ lɛ amli lɛ ekomɛi.