Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Biblia Lɛ Hãa Wɔnáa Hiɛnɔkamɔ Kɛhã Wɔsɛɛ

Biblia Lɛ Hãa Wɔnáa Hiɛnɔkamɔ Kɛhã Wɔsɛɛ

ŊƆƆ lɛ akɛ, onyiɛ gbɛ ko ni nɔ ewo duŋ nɔ gbɛkɛ ko. Eyɛ mli akɛ hulu lɛ enyɔ shi jeeŋmɔ moŋ, shi osheee gbeyei, ejaakɛ ohiɛ tɔɔtsi ko ni kpɛɔ waa. Kɛ́ okɛ tɔɔtsi nɛɛ tsɔɔ shikpɔŋ yɛ ohiɛ lɛ, onaa nɔ fɛɛ nɔ ni yɔɔ ohiɛ nɔŋŋ lɛ faŋŋ. Ni kɛ́ owó nɔ kɛtsɔɔ gbɛ lɛ nɔ lɛ, onaa nibii ni yɔɔ ohiɛgbɛ yɛ shɔŋŋ lɛ faŋŋ.

Wɔbaanyɛ wɔkɛ Biblia lɛ ato tɔɔtsi nɛɛ he. Bɔ ni tɔɔtsi lɛ hãa wɔnaa nibii ni yɔɔ wɔhiɛ nɔŋŋ lɛ, nakai nɔŋŋ Nyɔŋmɔ Wiemɔ lɛ baanyɛ aye abua wɔ ni—wɔtsu naagbai ni wɔ fɛɛ wɔkɛkpeɔ daa gbi yɛ jeŋ fɔŋ nɛɛ mli lɛ ahe nii. Wɔna enɛ faŋŋ yɛ saji ni tsɔ hiɛ lɛ amli. Shi jeee no pɛ Biblia lɛ feɔ ehãa wɔ. Ehãa wɔnaa nɔ ni baaba wɔsɛɛ hu, ni no yeɔ ebuaa wɔ koni wɔfee nibii ni baahã wɔsɛɛ lɛ, wɔná miishɛɛ ni wɔtsui anyɔ wɔmli. (Lala 119:105) Yɛ mɛɛ gbɛ nɔ?

Hã wɔkwɛ nibii enyɔ ni Biblia lɛ feɔ ehãa wɔ koni wɔná hiɛnɔkamɔ kɛhã wɔsɛɛ: 1 Eyeɔ ebuaa wɔ ni wɔna nɔ hewɔ ni wɔyɔɔ shihilɛ mli, ni 2 etsɔɔ wɔ bɔ ni wɔbaafee wɔkɛ wɔ-Bɔlɔ lɛ abɔ naanyo kɛya naanɔ.

1 EYEƆ EBUAA WƆ NI WƆNA NƆ HEWƆ NI WƆYƆƆ SHIHILƐ MLI

Biblia mli ŋaawoi lɛ anɔ bɛ. Amɛbaanyɛ amɛye amɛbua wɔ ni wɔtsu wɔnaagbai lɛ ahe nii. Shi jeee wɔ pɛ wɔnaagbai lɛ ahe nii Biblia lɛ yeɔ ebuaa wɔ ni wɔnyɛɔ wɔtsuɔ. Anɔkwa, Biblia lɛ woɔ wɔ hewalɛ ni wɔsusu mɛi krokomɛi hu ahe, moŋ fe ni wɔkɛ wɔjwɛŋmɔ baama nibii ni wɔbaaná he sɛɛ lɛ pɛ anɔ. Ja wɔfee nakai dani wɔtsui baanyɔ wɔmli yɛ shihilɛ mli.

Akɛ nɔkwɛmɔnɔ lɛ, susumɔ Biblia mli shishitoo mla nɛɛ he okwɛ: “Nɔhãmɔ hãa mɔ náa miishɛɛ fe hemɔ.” (Bɔfoi 20:35) Kɛ́ oye obua mɔ ko ni shika loo nibii krokomɛi ahe miihia lɛ lɛ, te onuɔ he ohãa  tɛŋŋ? Ni kɛ́ oto otsui shi obo onaanyo ko toi be ni egbaa bo etsuiŋ saji fɛɛ lɛ, no hu te onuɔ he ohãa tɛŋŋ? Ŋwanejee ko bɛ he akɛ, otsui nyɔɔ omli akɛ ohã mɔ ko mii eshɛ ehe, aloo jeee nakai?

Kɛ́ wɔfee mɛi ejurɔ ni wɔkpaaa nɔ ko gbɛ lɛ, wɔmii shɛɔ wɔhe waa. Wolo ko wie akɛ: “Kɛ́ ofee nɔ ko ohã mɔ ko loo ohã mɔ ko nɔ ko lɛ, bɔ fɛɛ bɔ ni fee lɛ, obaaná nɔ ni fe nɔ ni ofee ohã mɔ lɛ loo okɛhã lɛ lɛ, shi ja ofee ejurɔ lɛ ni okpaaa gbɛ akɛ abaato bo najiaŋ.” Kɛ̃lɛ, kɛ́ wɔfee mɛi ejurɔ, titri lɛ mɛi ni nyɛŋ ato wɔ najiaŋ lɛ, atoɔ wɔ najiaŋ kɛ̃. Ejurɔ ni wɔfeɔ mɛi krokomɛi lɛ hãa wɔkɛ Yehowa, ni ji mɔ ni bɔ wɔ lɛ, feɔ ekome kɛtsuɔ nii. Yehowa naa ejurɔ ni wɔfeɔ mɛi lɛ akɛ nɔ ko ni wɔkɛmiifa lɛ. (Abɛi 19:17) Ehiɛ sɔɔ nibii fɛɛ ni wɔfeɔ wɔhãa mɛi ni bɛ yelikɛbualɔ ko lɛ, ni ewo shi akɛ, ebaajwere wɔ kɛ naanɔ wala yɛ Paradeiso, yɛ shikpɔŋ lɛ nɔ. Enɛ ji hiɛnɔkamɔ ko ni nɔ bɛ kwraa!​—Lala 37:29; Luka 14:12-14. *

Nɔ ni fe fɛɛ lɛ, Biblia lɛ hãa wɔnaa akɛ, kɛ́ wɔjá Yehowa, anɔkwa Nyɔŋmɔ lɛ, wɔbaaná miishɛɛ waa yɛ shihilɛ mli. E-Wiemɔ lɛ hãa wɔleɔ akɛ, esa akɛ wɔjie eyi, wɔkɛ woo ahã lɛ, ni wɔbo lɛ toi. (Jajelɔ 12:13; Kpojiemɔ 4:11) Kɛ́ wɔfee nakai lɛ, Yehowa, mɔ ni bɔ wɔ lɛ, náa miishɛɛ. Ekɛɔ wɔ akɛ: “Hã ohiɛ akã shi, ni ohã mitsui anya.” (Abɛi 27:11) Enɛ ji nɔ ko ni sa kadimɔ waa diɛŋtsɛ. Bo lɛ susumɔ he okwɛ: Kɛ́ wɔdamɔ shishitoo mlai ni yɔɔ Biblia lɛ mli lɛ anɔ wɔkpɛ wɔyiŋ yɛ hiɛshikamɔ mli lɛ, wɔhãa wɔ-Tsɛ ni yɔɔ ŋwɛi ni sumɔɔ wɔ lɛ, tsui nyaa. Mɛni hewɔ? Ejaakɛ esusuɔ wɔhe, ni eesumɔ ni wɔkɛ egbɛtsɔɔmɔi lɛ atsu nii koni wɔná he sɛɛ. (Yesaia 48:17, 18) Anɔkwa, yiŋtoo titri hewɔ ni wɔyɔɔ shihilɛ mli ji, ni wɔjá Jeŋ Muu Fɛɛ Nɔyelɔ lɛ, ni wɔhi shi yɛ gbɛ ni baahã etsui anya lɛ nɔ.

2 ETSƆƆ WƆ BƆ NI WƆBAAFEE WƆKƐ WƆ-BƆLƆ LƐ ABƆ NAANYO

Biblia lɛ tsɔɔ wɔ bɔ ni wɔbaafee wɔkɛ wɔ-Bɔlɔ lɛ abɔ naanyo. Ŋmalɛ lɛ woɔ wɔ hewalɛ akɛ: “Nyɛtsia nyɛbɛŋkɛa Nyɔŋmɔ, ni ebaatsi ebɛŋkɛ nyɛ.” (Yakobo 4:8) Ekolɛ bei komɛi lɛ, wɔbaanu he akɛ wɔnyɛŋ wɔkɛ wɔ-Bɔlɔ lɛ, ni ji ofe lɛ, abɔ naanyo. Shi Biblia lɛ hãa wɔnáa nɔmimaa akɛ, kɛ́ ‘wɔtao Nyɔŋmɔ sɛɛ gbɛ’ lɛ, ‘wɔbaana lɛ lɛɛlɛŋ,’ ejaakɛ, “ekɛ wɔteŋ mɔ fɛɛ mɔ teŋ jekɛɛɛ.” (Bɔfoi 17:27) Kɛ́ wɔbo ŋaa ni Biblia lɛ woɔ wɔ lɛ toi ni wɔkɛ Nyɔŋmɔ bɔ naanyo lɛ, wɔbaaná he sɛɛ wɔsɛɛ. Yɛ mɛɛ gbɛ nɔ?

Wɔteŋ mɔ ko mɔ ko nyɛŋ ajo wɔhenyɛlɔ ni fe fɛɛ, ni ji gbele lɛ naa foi, ekɔɔɔ he eko mɔdɛŋ ni wɔbaabɔ. (1 Korintobii 15:26) Shi Nyɔŋmɔ yɛ kɛmiiya naanɔ. Egboŋ kɔkɔɔkɔ, ni eesumɔ ni enanemɛi lɛ hu ahi shi kɛya naanɔ. Biblia lɛ wie akɛ: “Oyi aná wala kɛya naanɔ.” Sane kuku ni mli kã shi faŋŋ nɛɛ hãa wɔnaa nɔ ni Yehowa sumɔɔ ni mɛi ni taoɔ esɛɛ gbɛ lɛ anine ashɛ nɔ.​—Lala 22:26.

Te obaafee tɛŋŋ okɛ Nyɔŋmɔ abɔ naanyo kɛya naanɔ lɛ? Yaa nɔ okase ehe nii yɛ e-Wiemɔ ni ji Biblia lɛ mli. (Yohane 17:3; 2 Timoteo 3:16) Bi lɛ ni eye ebua bo ni onu Ŋmalɛ lɛ shishi. Biblia lɛ hãa wɔleɔ akɛ, kɛ́ wɔjɛ wɔtsuiŋ ‘wɔtee nɔ wɔbi Nyɔŋmɔ’ ni ehã wɔná hiɛshikamɔ lɛ, ebaahã wɔná. * (Yakobo 1:5) Bɔɔ mɔdɛŋ ni okɛ nibii ni okaseɔ lɛ atsu nii koni Nyɔŋmɔ Wiemɔ lɛ afee “kane kɛhã [onane]” kɛ “la hu yɛ [ogbɛ] nɔ,” kɛjɛ bianɛ kɛmiiya naanɔ.​—Lala 119:105.

^ kk. 8 Kɛ́ ootao ole shi ni Nyɔŋmɔ ewo akɛ ebaahã adesai ahi shi kɛya naanɔ yɛ Paradeiso lɛ he saji babaoo lɛ, kwɛmɔ wolo ni ji, Mɛni Wɔbaanyɛ Wɔkase Kɛjɛ Biblia Lɛ Mli? ni Yehowa Odasefoi fee lɛ yitso 3 lɛ.

^ kk. 13 Yehowa Odasefoi kɛ mɛi kaseɔ Biblia lɛ ni amɛheee nɔ ko, ni enɛ baanyɛ aye abua bo ni onu Ŋmalɛ lɛ shishi jogbaŋŋ. Kɛ́ ootao ole enɛ he saji babaoo lɛ, ofainɛ kwɛmɔ vidio ni ji, Mɛni Yaa Nɔ yɛ Biblia Nikasemɔ Feemɔ Mli? Obaanyɛ ona vidio nɛɛ kɛ́ otee jw.org/gaa lɛ nɔ ni okwɛ WOJI KƐ NIBII > VIDIOI > WƆSAFOŊ KPEEI KƐ WƆSHIƐMƆ NITSUMƆ LƐ.

Nyɔŋmɔ yɛ kɛmiiya naanɔ, ni eesumɔ ni enanemɛi lɛ hu ahi shi kɛya naanɔ