Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

“Nyɔŋmɔ wiemɔ lɛ hiɛ kã”

Sanebimɔi ni Jɛ Kanelɔi Adɛŋ

Sanebimɔi ni Jɛ Kanelɔi Adɛŋ

Hebribii 4:12 lɛ kɛɔ akɛ, “Nyɔŋmɔ wiemɔ lɛ hiɛ kã ni eyɛ hewalɛ.” Mɛni ji “Nyɔŋmɔ wiemɔ” nɛɛ?

Nibii ni bɔfo Paulo wie dani ewie wiemɔi nɛɛ, kɛ nibii ni ewie yɛ no sɛɛ lɛ hãa wɔnaa akɛ, Nyɔŋmɔ wiemɔ ni etsĩ tã lɛ kɔɔ nibii ni Nyɔŋmɔ ewie akɛ eto eyiŋ akɛ ebaafee lɛ ahe. Aŋmala ekomɛi yɛ Biblia lɛ mli.

Bei pii lɛ, atsɛɔ Hebribii 4:12 lɛ yisɛɛ yɛ wɔwoji lɛ amli kɛtsɔɔ akɛ, Biblia lɛ nyɛɔ etsakeɔ mɛi ashihilɛ, ni tɔmɔ ko kwraa bɛ he akɛ akɛbaatsu nii yɛ nɛkɛ gbɛ nɔ. Kɛ̃lɛ, kɛ́ wɔkwɛ nɔ ni Paulo wie dani eshɛ kuku 12 lɛ, kɛ nɔ ni ewie yɛ no sɛɛ lɛ, ehãa wɔnaa akɛ, jeee Biblia lɛ pɛ he ŋmalɛ nɛɛ kɔɔ. Be ni Paulo wie wiemɔi nɛɛ lɛ, no mli lɛ, aŋmala Nyɔŋmɔ yiŋtoi babaoo ahe sane yɛ ŋmalɛi krɔŋkrɔŋi lɛ amli, ni ewo Kristofoi ni yɔɔ Yudea lɛ hewalɛ ni amɛfee nibii ni kɛ yiŋtoi nɛɛ kpãa gbee. Paulo tsĩ nɔ ni ba Israelbii ni Yehowa kpɔ̃ kɛje Ejipt lɛ anɔ lɛ tã ni ekɛtsɔɔ sane nɛɛ mli. Nyɔŋmɔ wo Israelbii lɛ shi akɛ, ekɛ amɛ baaya “shikpɔŋ ni fufɔ kɛ wo hoɔ yɛ nɔ lɛ nɔ,” koni amɛná anɔkwa hejɔɔmɔ.​—2 Mose 3:8; 5 Mose 12:9, 10.

Shiwoo nɛɛ fata nibii ni Nyɔŋmɔ eto eyiŋ akɛ ebaafee lɛ ahe. Shi akɛni Israelbii lɛ kpiliŋ amɛtsui ni amɛheee Nyɔŋmɔ nɔ amɛyeee hewɔ lɛ, amɛteŋ mɛi babaoo boteee hejɔɔmɔ nɛɛ mli. (4 Mose 14:30; Yosh. 14:6-10) Kɛ̃lɛ, Paulo wie akɛ, ‘Nyɔŋmɔ hejɔɔmɔ lɛ mlibotemɔ he shiwoo yɛ lolo.’ (Heb. 3:16-19; 4:1) Eyɛ faŋŋ akɛ, sɛɛkpee “shiwoo” nɛɛ hu fata Nyɔŋmɔ yiŋtoi ni ehã adesai ele lɛ ahe. Taakɛ eji yɛ Kristofoi ni hi Yudea lɛ agbɛfaŋ lɛ, wɔ hu wɔbaanyɛ wɔkane yiŋtoo nɛɛ he sane ni wɔfee nibii ni tsɔɔ akɛ wɔmiisumɔ ni eba mli. Paulo tsɛ 1 Mose 2:2 lɛ kɛ Lala 95:11 lɛ fãi komɛi ayisɛɛ kɛtsɔɔ faŋŋ akɛ, shiwoo nɛɛ damɔ nibii ni awie yɛ Ŋmalɛi lɛ amli lɛ anɔ.

Eŋɔɔ wɔnaa waa akɛ ‘Nyɔŋmɔ hejɔɔmɔ lɛ mlibotemɔ he shiwoo yɛ lolo.’ Wɔle akɛ, jeee Mose Mla lɛ toi ni wɔbaabo, ejurɔ ni wɔbaafee mɛi, loo nitsumɔi kpakpai krokomɛi ni wɔbaatsu lɛ ni baahã wɔbote Nyɔŋmɔ hejɔɔmɔ lɛ mli; Nyɔŋmɔ hejɔɔmɔ lɛ, hemɔkɛyeli nɔ atsɔɔ aboteɔ mli. Enɛ hewɔ lɛ, wɔkɛ miishɛɛ feɔ nibii ni kɛ Nyɔŋmɔ yiŋtoo lɛ kpãa gbee, ni wɔbaaya nɔ wɔfee nakai daa. Wɔyɛ nɔmimaa akɛ, taakɛ Biblia lɛ ewie lɛ, kɛji akɛ wɔtee nɔ wɔfee nakai lɛ, wɔbaanyɛ wɔbote Nyɔŋmɔ hejɔɔmɔ lɛ mli. Ŋmɛnɛ lɛ, mɛi akpei abɔ ni yɔɔ je lɛŋ hei srɔtoi ebɔi Biblia lɛ kasemɔ bɔ ni afee ni amɛle nibii ni Nyɔŋmɔ eto eyiŋ akɛ ebaafee. Enɛ etsirɛ amɛteŋ mɛi babaoo ni amɛfee tsakemɔi yɛ amɛshihilɛ mli, amɛhe Nyɔŋmɔ nɔ amɛye, ni amɛhã abaptisi amɛ. Tsakemɔi ni amɛfee lɛ, kɛ yiŋ srɔtoi ni amɛkpɛ lɛ hãa wɔnaa faŋŋ akɛ, “Nyɔŋmɔ wiemɔ lɛ hiɛ kã ni eyɛ hewalɛ.” Nibii ni Nyɔŋmɔ eto eyiŋ akɛ ebaafee ni ewie he yɛ Biblia lɛ mli lɛ ená wɔnɔ hewalɛ momo, ni ebaaya nɔ ená wɔnɔ hewalɛ.