Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) SEPTEMBER 2016

Bɔ ni Wɔnáa Yehowa Gbɛtsɔɔmɔ he Sɛɛ Ŋmɛnɛ

Bɔ ni Wɔnáa Yehowa Gbɛtsɔɔmɔ he Sɛɛ Ŋmɛnɛ

EKPƐ YIŊ NI JA—POLAND

“BE NI abaptisi mi lɛ, no mli lɛ miye afii 15. Nyɔji ekpaa sɛɛ lɛ, mibɔi sɔɔmɔ akɛ gbɛgbalɔi awalɔ, ni mifee nakai afi kome. No sɛɛ lɛ, mibatsɔ daa gbɛgbalɔ. Be ni migbe sɛkɛndre skul naa lɛ, mibi ni ahã mayasɔmɔ yɛ he ko ni shiɛlɔi ahe miihia yɛ. He ni kpokpaa nɔkwɛlɔ lɛ kɛɛ mi akɛ masɔmɔ yɛ ji mimaŋ lɛ mli, he ni miyɔɔ lɛ nɔŋŋ. Sane lɛ dɔ mi, ejaakɛ no mli lɛ, mikɛ minaa yɔɔ, ni jeee Yehowa Odasefonyo ji lɛ. No hewɔ lɛ, kulɛ miitao mafã mashi lɛ ni mayahi maŋ kroko nɔ. Shi mikɛ sane lɛ wo mihe diŋŋ, ni mihãaa nɔkwɛlɔ lɛ ana akɛ nɔ ni ewie lɛ egba minaa. Anɔkwa, miyasusu he, tsɛ mináaa he miishɛɛ. Mikɛɛ mɔ ni mito akɛ mikɛ lɛ baaya lɛ akɛ: ‘Efeɔ mi akɛ miifee minii tamɔ Yona. Shi Yona tee Ninive kɛ̃, no hewɔ lɛ, mi hu masɔmɔ yɛ he ni akɛɛ misɔmɔ yɛ lɛ.’

“Mikɛ afii ejwɛ esɔmɔ akɛ gbɛgbalɔ yɛ mimaŋ lɛ mli, ni miina akɛ, nilee yɛ mli waa akɛ mibo gbɛtsɔɔmɔ ni akɛhã mi lɛ toi. Asomoaŋ, nɔ ni gbaa minaa ji jwɛŋmɔ ni ejaaa ni mihiɛ lɛ. Amrɔ nɛɛ miyɛ miishɛɛ waa. Be ko lɛ, mikɛ mɛi 24 sɔŋŋ kase nii yɛ nyɔɔŋ kome pɛ mli! Yehowa duromɔ naa lɛ, mikɛ minaa lɛ, ni kulɛ esumɔɔɔ Yehowa Odasefoi asane lɛ po bɔi Biblia lɛ kasemɔ.”

EWO YIBII KPAKPAI—FIJI

Ehe bahia ni yoo ko ni akɛ lɛ kaseɔ Biblia lɛ yɛ Fiji lɛ akpɛ eyiŋ kɛji ebaaya Odasefoi akpee wulu ko ni afeɔ lɛ aloo ebaaya ewu lɛ wekunyo ko fɔmɔ gbijurɔyeli shishi. Ewu lɛ kpɛlɛ nɔ akɛ ebaanyɛ eya kpee lɛ, ni yoo lɛ hã ele akɛ kɛ́ akpa lɛ, ebaaba fɔmɔ gbijurɔyeli lɛ shishi. Shi be ni akpa kpee lɛ ni ebashɛ shĩa lɛ, esusu sane lɛ he ni ena akɛ, kɛ́ eyaaa nifeemɔ lɛ shishi kwraa lɛ, no moŋ hi, ejaakɛ kɛ́ etee lɛ, ekolɛ ebaayafee nɔ ko ni baafite wekukpaa ni yɔɔ ekɛ Yehowa teŋ lɛ. No hewɔ lɛ, eyaaa.

Be ni ewu lɛ tee gbijurɔyeli lɛ shishi lɛ, ekɛɛ ewekumɛi lɛ akɛ, ekɛɛ eŋa lɛ akɛ, kɛ́ ekpa lɛ eba. Shi ewekumɛi lɛ kɛɛ lɛ akɛ, “Yehowa Odasefoi yeee fɔmɔ gbii juji, no hewɔ lɛ ebaŋ!” *

Yiŋ ni yoo lɛ kpɛ lɛ sa ewu lɛ hiɛ waa. Ewu lɛ ná miishɛɛ akɛ edamɔ ehenilee kɛ nibii ni ekase lɛ anɔ ekpɛ eyiŋ. Yoo nɛɛ anɔkwayeli lɛ hewɔ lɛ, sɛɛ mli lɛ, ená hegbɛ eye ewu lɛ kɛ mɛi krokomɛi odase. Mɛni jɛ mli kɛba? Nuu lɛ kpɛlɛ ni akɛ lɛ bɔi Biblia lɛ kasemɔ, ni ekɛ eŋa lɛ bɔi asafoŋ kpeei yaa.

^ kk. 7 Kwɛmɔ “Sanebimɔi ni Jɛ Kanelɔi Adɛŋ” ni je kpo yɛ December 15, 2001 Buu-Mɔɔ lɛ mli lɛ.