Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Yosef Ni Jɛ Arimatia Kpɛ Yiŋ Ni Ja

Yosef Ni Jɛ Arimatia Kpɛ Yiŋ Ni Ja

YESU egbo, ni esa akɛ afu lɛ. Shi namɔ baaya Roma amralo Pontio Pilato hiɛ ni eyabi ni ahã lɛ hegbɛ nɛɛ? Mɔ fɛɛ mɔ le akɛ Pilato sane wa waa diɛŋtsɛ. Kɛ̃lɛ, esa akɛ mɔ ko aya kɛ̃, kɛjeee nakai lɛ, Yesu náŋ fuu kpakpa. Naagbee lɛ, Yosef ni jɛ Arimatia lɛ fee ekãa ni etee. Nyɔŋmɔ pɛ le he ni ená nakai ekãa lɛ kɛjɛ! Miishɛɛ sane ji akɛ, bɔ ni esusu akɛ Pilato baagbala sane lɛ mli ehã lɛ eyabaaa lɛ nakai kwraa. Amralo lɛ bi asraafoiatsɛ lɛ kɛji Yesu egbo, ni be ni ahã ele akɛ egbo lɛ, ekpɛlɛ Yosef nibimɔ lɛ nɔ. Yosef kɛ oyaiyeli yi gbɛ akɛ eeya he ni asɛŋ e-Nuŋtsɔ lɛ yɛ lɛ. Ewerɛ eho ehe waa, shi kɛ́ hooo kwraa lɛ, ená hegbɛ ni etaoɔ lɛ.​—Mar. 15:42-45.

  • Namɔ ji Yosef ni jɛ Arimatia lɛ?

  • Nɛgbɛ ele Yesu yɛ?

  • Ni mɛni hewɔ esa akɛ osusu esane lɛ he waa lɛ?

 SANHEDRIN LƐ MLI NYO JI LƐ

Yɛ Marko Sanekpakpa lɛ mli lɛ, awie akɛ Yosef ji “Ajinafoi Akuu lɛ mli nyo ni abuɔ lɛ waa.” Ajinafoi Akuu ni awieɔ he yɛ biɛ lɛ ji Sanhedrin lɛ, ni ji mɛi ni yeɔ sane yɛ Yudafoi asaneyelihe wulu lɛ. Sanhedrin lɛ yɛ hegbɛ ni ewoɔ mla yɛ bɔ ni Yudafoi lɛ ahi shi amɛhã kɛ bɔ ni amɛjá Nyɔŋmɔ amɛhã lɛ he. (Mar. 15:1, 43) No hewɔ lɛ, Yosef fata emaŋbii lɛ ahiɛnyiɛlɔi lɛ ahe, ni eeenyɛ efee akɛ, enɛ hewɔ ená hegbɛ ekɛ Roma amralo lɛ yawie lɛ. Ebɛ naakpɛɛ hu akɛ Yosef ji niiatsɛ.​—Mat. 27:57.

Ani obaafee ekãa ni ohã ale akɛ Yesu ji o-Maŋtsɛ?

Sanhedrin lɛ sumɔɔɔ Yesu sane kwraa, ni amɛji mɛi ni tsɔ ŋaa ni agbe lɛ. Shi Biblia lɛ wie akɛ Yosef ji “gbɔmɔ kpakpa kɛ jalɔ.” (Luka 23:50) Eye anɔkwa, eba ejeŋ jogbaŋŋ, ni emia ehiɛ ebo Nyɔŋmɔ mlai lɛ atoi. Efeee enii tamɔ Sanhedrin lɛ mli bii lɛ ateŋ mɛi babaoo. Biblia lɛ wie hu akɛ, “eemɛ Nyɔŋmɔ Maŋtsɛyeli lɛ,” ni enɛ hãa wɔnaa nɔ hewɔ ni ebatsɔ Yesu kaselɔ lɛ. (Mar. 15:43; Mat. 27:57) Enyaa anɔkwale he, ni esumɔɔ ni aye jalɛsane, ni eeenyɛ efee akɛ enɛ hewɔ ebo sane ni Yesu shiɛ lɛ toi lɛ.

EJIEEE EHE SHI

Yohane 19:38 lɛ kɛɔ akɛ, Yosef “ji Yesu kaselɔ, shi Yudafoi lɛ agbeyeishemɔ hewɔ lɛ, ejieee ehe shi.” Mɛni hewɔ Yosef she Yudafoi lɛ gbeyei lɛ? Yudafoi lɛ sumɔɔɔ Yesu sane kwraa, ni amɛtswa amɛfai shi akɛ mɔ fɛɛ mɔ ni baawie akɛ eheɔ Yesu nɔ eyeɔ lɛ, amɛbaashwie lɛ kɛjɛ kpeehe lɛ. (Yoh. 7:45-49; 9:22) Kɛ́ ashwie mɔ ko kɛjɛ kpeehe lɛ, Yudafoi lɛ nyaŋeɔ lɛ, amɛkpoɔ lɛ kwraa, ni amɛkɛ lɛ efeee nɔ ko nɔ ko dɔŋŋ. Enɛɛmɛi fɛɛ ahewɔ Yosef she gbeyei akɛ ebaajie ehe shi akɛ Yesu kaselɔ lɛ. Ele akɛ kɛ́ efee nakai lɛ, gbɛhe ni eyɔɔ lɛ kɛ bulɛ ni mɛi yɔɔ kɛhã lɛ lɛ baaŋmɛɛ lɛ.

Shi jeee Yosef pɛ she gbeyei akɛ ebaajie ehe shi akɛ Yesu kaselɔ. Sanhedrin lɛ mli nyo kroko ni atsɛɔ lɛ Nikodemo lɛ hu nu he nakai. Anɔkwa, Yohane 12:42 lɛ hãa wɔleɔ akɛ, “nɔyelɔi lɛ ateŋ mɛi pii po ná hemɔkɛyeli yɛ [Yesu mli], shi Farisifoi lɛ ahewɔ lɛ, amɛjajeee hemɔkɛyeli ni amɛyɔɔ yɛ emli lɛ amɛtsɔɔɔ, koni akashwie amɛ kɛjɛ kpeehe lɛ.”​—Yoh. 3:1-10; 7:50-52.

Yosef náaa ekãa ni ebaajie ehe shi akɛ Yesu kaselɔ, ni kɛ̃lɛ, kaselɔ ji lɛ. Enɛ yɛ hiɛdɔɔ waa, titri lɛ, yɛ nɔ ko ni Yesu wie lɛ hewɔ. Ewie akɛ: “Mɔ fɛɛ mɔ ni tsĩɔ mitã yɛ mɛi ahiɛ lɛ, mi hu matsĩ etã yɛ mi-Tsɛ ni yɔɔ ŋwɛi lɛ hiɛ. Shi mɔ fɛɛ mɔ ni kwaa mi yɛ mɛi ahiɛ lɛ, mi hu makwa lɛ yɛ mi-Tsɛ ni yɔɔ ŋwɛi lɛ hiɛ.” (Mat. 10:32, 33) Wɔnyɛŋ wɔwie akɛ Yosef kwa Yesu; kɛ̃lɛ wɔle akɛ, enáaa ekãa ni ejie ehe shi akɛ ekaselɔ. Ni bo hu?

 Shi nɔ kome yɛ ni Yosef fee ni wɔbaanyɛ wɔjie eyi yɛ he. Biblia lɛ kɛɔ akɛ, be ni Sanhedrin lɛ kpaŋ akɛ amɛbaagbe Yesu lɛ, efiii sɛɛ. (Luka 23:51) Ani eeenyɛ efee akɛ, tamɔ bɔ ni mɛi komɛi kɛɔ lɛ, no mli lɛ, ebɛ jɛmɛ? Wɔnyɛŋ wɔtsɔɔ. Kɛ̃lɛ, bɔ fɛɛ bɔ ni sane lɛ ji lɛ, ŋwanejee ko bɛ he akɛ, edɔ Yosef waa akɛ atsɔ jalɛsane hiɛ abu shi nɛkɛ, shi nɔ ko nɔ ko bɛ ni ebaanyɛ efee yɛ he!

YOSEF KPƐ EYIŊ AGBƐNƐ

Eeenyɛ efee akɛ, Yesu gbele lɛ sɛɛ lɛ, Yosef ná ekãa ni ekpɛ eyiŋ akɛ ebaahã ale akɛ Yesu kaselɔ ji lɛ. Sane ni yɔɔ Marko 15:43 lɛ hewɔ wɔwieɔ nakai. Jɛmɛ kɛɔ akɛ: “Ekɛ ekãa tee Pilato hiɛ ni eyabi koni aŋɔ Yesu gbonyo lɛ ahã lɛ.”

Etamɔ nɔ ni Yosef yɛ jɛmɛ be ni Yesu gboɔ lɛ. Anɔkwa, dani Pilato po baaná ele akɛ Yesu egbo lɛ, Yosef le momo. Mɛni hãa wɔnaa nakai? Be ni Yosef tee Pilato hiɛ ni eyabi ni ahã lɛ Yesu gbonyo lɛ, no mli lɛ Pilato leee akɛ Yesu egbo. (Mar. 15:44) Eeenyɛ efee akɛ, Yosef na bɔ ni Yesu piŋ yɛ piŋmɔ tso lɛ nɔ lɛ, ni no hã ehenilee bu lɛ fɔ. Ekolɛ enɛ ji nɔ ni hã ekpɛ eyiŋ akɛ ebaahã ale akɛ Yesu kaselɔ ji lɛ. Bɔ fɛɛ bɔ ni sane lɛ ji lɛ, Yosef fee ekãa agbɛnɛ, ni ehã efee faŋŋ akɛ Yesu kaselɔ ji lɛ.

YOSEF YAFU YESU

Yɛ Yudafoi lɛ amla naa lɛ, kɛ́ abu mɔ ko gbele fɔ ni asɛŋ lɛ lɛ, esa akɛ afu egbonyo lɛ dani hulu anyɔ shi. (5 Mose 21:22, 23) Shi Romabii lɛ, kɛ́ amɛbu mɛi gbele fɔ ni amɛsɛŋ amɛ lɛ, amɛshiɔ amɛgbohii lɛ yɛ  tsei lɛ anɔ ni amɛkpɔtɔɔ, loo amɛkɛ amɛ fɛɛ woɔ gbonyo bu kome mli. Yosef sumɔŋ kwraa ni afee Yesu nakai. Etsa gbonyo bu hee yɛ he ko ni bɛŋkɛ he ni asɛŋ Yesu yɛ lɛ. Amaniɛbɔɔ lɛ hãa wɔleɔ akɛ, afuko mɔ ko mɔ ko yɛ gbonyo bu nɛɛ mli pɛŋ. Ni tsɔɔ akɛ, Yosef fã kɛjɛ Arimatia * ebahi Yerusalem etsɛko, ni ehã atsa gbonyo bu nɛɛ koni kɛ́ lɛ diɛŋtsɛ loo ewekunyo ko gbo lɛ, afu lɛ yɛ mli. (Luka 23:53; Yoh. 19:41) Gbonyo bu nɛɛ mli Yosef fu Yesu yɛ lɛ, ni no hãa wɔnaa akɛ, emli hi waa diɛŋtsɛ. Nɔ ni efee nɛɛ hã gbalɛ ni kɛɔ akɛ abaafu Mesia lɛ yɛ ‘niiatsɛmɛi’ ateŋ lɛ ba mli.​—Yes. 53:5, 8, 9.

Ani nɔ ko yɛ ni he miihia bo fe wekukpaa ni yɔɔ okɛ Yehowa teŋ lɛ?

Mateo, Marko, Luka, kɛ Yohane fɛɛ bɔ amaniɛ akɛ, be ni ajie Yesu gbonyo lɛ kɛjɛ tso lɛ nɔ lɛ, Yosef kɛ klala kpakpa bala lɛ, ni ekɛ lɛ yafɔ̃ lɛ diɛŋtsɛ egbonyo bu lɛ mli. (Mat. 27:59-61; Mar. 15:46, 47; Luka 23:53, 55; Yoh. 19:38-40) Mɔ pɛ ni atsĩ etã akɛ eye ebua Yosef ji Nikodemo. Ekɛ tsofai ba ní akɛwo gbonyo lɛ. Hii enyɔ nɛɛ fɛɛ lɛ, hiɛnaanɔ bii ji amɛ. No hewɔ lɛ, eeenyɛ efee akɛ, jeee amɛ diɛŋtsɛ amɛwó gbonyo lɛ ni amɛyafu, shi moŋ amɛhã amɛtsuji tsu nitsumɔ nɛɛ. Fɛɛ sɛɛ lɛ, nɔ ni amɛtsu lɛ sa kadimɔ waa. Mɔ fɛɛ mɔ ni taa gbonyo he lɛ he tseee gbii kpawo, ni nɔ fɛɛ nɔ ni ebaata he lɛ hu he tseee. (4 Mose 19:11; Hag. 2:13) No hewɔ lɛ, nakai otsi lɛ, ni ji Hehoo otsi lɛ, hii enyɔ nɛɛ baŋ mɛi ateŋ, ni amɛnyɛŋ amɛkɛ amɛhe awo nibii fɛɛ ni afeɔ kɛyeɔ gbi jurɔ lɛ mli. (4 Mose 9:6) Kɛfata he lɛ, ekolɛ Sanhedrin lɛ mli bii krokomɛi lɛ ye Yosef he fɛo yɛ Yesu ni eyafu lɛ hewɔ. Shi Yosef na akɛ, he ni nibii eshɛ lɛ, esaaa akɛ ehãa saji nɛɛ gbaa enaa. Efu Yesu jogbaŋŋ, ni ehã mɛi fɛɛ le akɛ Kristo kaselɔ ji lɛ.

BƆ NI YOSEF SANE LƐ NAA YAKPA HÃ

Be ni afu Yesu agbe naa lɛ, Biblia lɛ etsĩii Yosef ni jɛ Arimatia lɛ tã dɔŋŋ. No hewɔ lɛ, ekolɛ obaabi akɛ: Mɛni ba enɔ yɛ no sɛɛ? Wɔleee. Shi sane ni wɔsusu he lɛ hãa wɔnaa akɛ, be ni ekɛ kai kɛ naagbai kpe lɛ, ejie hemɔkɛyeli kpo ni efee ekãa, ni enɛ ji nɔ kpakpa. No hewɔ lɛ, wɔbaanyɛ wɔhe wɔye akɛ, sɛɛ mli lɛ, ehã ale akɛ Kristofonyo ji lɛ.

Esa akɛ Yosef sane lɛ ahã wɔteŋ mɔ fɛɛ mɔ asusu nii ahe kɛya shɔŋŋ. Kɛ́ ehe bahia ni wɔkɛ hegbɛ ko ni wɔyɔɔ, nitsumɔ ko ni wɔtsuɔ, loo wɔheloonaa nibii ashã afɔle koni wekukpaa ni yɔɔ wɔ kɛ Yehowa teŋ lɛ akaŋmɛɛ wɔ lɛ, ani wɔbaafee? Ni kɛ́ eba lɛ akɛ wɔwekumɛi baakpoo wɔ, loo abaawo wɔ tsuŋ hu?

^ kk. 18 Eeenyɛ efee akɛ, Arimatia ji Rama, ni ji ŋmɛnɛŋmɛnɛ beiaŋ maŋ ni atsɛɔ lɛ Rentis (Rantis) lɛ. Maŋ nɛɛ yɛ Yerusalem kooyi-anaigbɛ, ni ekɛ lɛ teŋ jekɛmɔ baafee kilomitai 35. Jɛmɛ gbalɔ Samuel jɛ.​—1 Sam. 1:19, 20.