Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Ejurɔ Kome Ni Afee Lɛ Wo Yibii Kpakpai

Ejurɔ Kome Ni Afee Lɛ Wo Yibii Kpakpai

AFII 60 ni eho nɛ lɛ, abaptisi nuu ko ni atsɛɔ lɛ John lɛ papa akɛ Yehowa Odasefonyo, yɛ maŋ bibioo ko ni yɔɔ India ni atsɛɔ lɛ Gujarat lɛ mli. No mli lɛ, John, enyɛmimɛi enumɔ lɛ, kɛ amɛmami fɛɛ ji Katolikbii, ni amɛyaa sɔlemɔ waa. No hewɔ lɛ, amɛte shi amɛwo amɛpapa lɛ waa.

Gbi ko lɛ, John papa tsu lɛ ni ekɛ envelope ayahã enaanyo Odasefonyo ko. Shi nakai leebi lɛ, John miigbele gbudugbaŋ agbo ko naa ni efo ewao. Fɛɛ sɛɛ lɛ, akɛni eetao ebo epapa toi hewɔ lɛ, ekɛ tako fĩ ewao lɛ, ni etee tsumɔ lɛ.

Be ni John yashɛ epapa naanyo lɛ shĩa lɛ, nuu lɛ ŋa, ní lɛ hu eji Yehowa Odasefonyo lɛ, ji mɔ ni bahe envelope lɛ. Ena John wao lɛ, ni ekɛɛ lɛ akɛ ebaasumɔ ni eto nɔ ehã lɛ. Eyakɔlɔ nibii ni akɛtoɔ fala nɔ kɛba, ekɛ tsofa tsumɔ fala lɛ hiɛ, ni ekɛ nii ni akɛfĩɔ fala nɔ fĩ nɔ ehã lɛ. No sɛɛ lɛ, efee tii klakla ehã lɛ. Be ni efeɔ nibii nɛɛ fɛɛ lɛ, ekɛ miishɛɛ miigba John Biblia lɛ mli sane.

Mlihilɛ ni nyɛmi yoo nɛɛ jie kpo etsɔɔ John lɛ hewɔ lɛ, jwɛŋmɔ ni ejaaa ni John hiɛ yɛ Yehowa Odasefoi ahe lɛ bɔi tsakemɔ. No hewɔ lɛ, John bi lɛ saji enyɔ komɛi ni esoro nɔ ni Odasefoi tsɔɔ yɛ he lɛ yɛ nɔ ni Katolikbii heɔ amɛyeɔ yɛ he lɛ he. Ebi lɛ kɛji Yesu nɔŋŋ ji Nyɔŋmɔ, kɛ agbɛnɛ hu, kɛji esa akɛ Kristofoi asɔle amɛhã Maria. Nyɛmi yoo lɛ ekase Gujarati, ni ji John maŋ wiemɔ lɛ, ni ejɛ Biblia lɛ mli ehã esanebimɔi lɛ ahetoo. Kɛkɛ ni ehã lɛ wolo bibioo ni yitso ji, “Maŋtsɛyeli Lɛ He Sane Kpakpa Nɛɛ.”

Sɛɛ mli be ni John bɔi wolo lɛ kanemɔ lɛ, eyɔse akɛ saji ni awieɔ yɛ mli lɛ fɛɛ yɛ Biblia lɛ mli ni eji anɔkwale. Etee esɔfo lɛ ŋɔɔ ni eyabi lɛ saji enyɔ ni ebi nyɛmi nuu lɛ ŋa lɛ. Osɔfo lɛ mli fu waa ni efɔ̃ Biblia etswa lɛ, ni ebolɔ ewo lɛ akɛ: “Otsɔ Satan! Tsɔɔmɔ mi Biblia lɛ mli he ni wieɔ akɛ jeee Yesu nɔŋŋ ji Nyɔŋmɔ. Tsɔɔmɔ mi emli he ni wieɔ akɛ esaaa akɛ ojáa Maria. Tsɔɔmɔ mi!” Bɔ ni osɔfo lɛ fee enii ehã lɛ hã John naa kpɛ ehe waa, ni ekɛɛ osɔfo lɛ akɛ, “Minane yiŋ Katolik sɔlemɔ tsũ mli dɔŋŋ.” Ni lɛɛlɛŋ, ekpa sɔlemɔ lɛ yaa!

Odasefoi lɛ kɛ John bɔi Biblia lɛ kasemɔ. Emɔ anɔkwale lɛ mli, ni ebɔi Yehowa sɔɔmɔ. Sɛɛ mli lɛ, eweku lɛ mli bii babaoo hu fee nakai. Afii 60 nɛ ni sane nɛɛ ba, shi John kaiɔ kɛbashi ŋmɛnɛ. Atswã yɛ ewao lɛ he ni nii lɛ fo lɛ lolo, ni no hãa ekaiɔ ejurɔ kome ni afee lɛ ni hã ená he miishɛɛ akɛ ebaasɔmɔ Yehowa ewala gbii fɛɛ lɛ.​—2 Kor. 6:4, 6.