Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) OCTOBER 2016

 WALA SHIHILƐ HE SANE

Mibɔ Mɔdɛŋ Mikase Mɛi Krokomɛi Anɔkwɛmɔnɔ Kpakpa Lɛ

Mibɔ Mɔdɛŋ Mikase Mɛi Krokomɛi Anɔkwɛmɔnɔ Kpakpa Lɛ

Be ko be ni miyɔɔ Colorado lɛ, Nyɛminuu Izak Marais tswa mi kɛjɛ Patterson, yɛ New York. Mibi lɛ akɛ, “Ani ole afii abɔ ni miye?” Ehã hetoo akɛ, “Hɛɛ, mile waa.” Ani ole nɔ hewɔ ni mibi lɛ nakai lɛ? Hã magba bo.

AFƆ mi December 10, 1936 yɛ maŋ ko ni atsɛɔ lɛ Wichita, ni yɔɔ Kansas yɛ Amerika lɛ. Mipapa William kɛ mimami Jean fɔ bii ejwɛ, ni miji amɛkromɔ. Mifɔlɔi kɛ Yehowa sɔɔmɔ shwɛɛɛ kwraa. No mli lɛ, mipapa ji asafo sɔɔlɔ, nɔ ni amrɔ nɛɛ atsɛɔ lɛ onukpai akuu lɛ asaji ahe gbɛjianɔtolɔ lɛ. Minaa Emma Wagner ji mɔ ni tsɔɔ mimami anɔkwale lɛ, ni ekɛ mɛi krokomɛi hu kase nii. Amɛteŋ mɔ kome ji Gertrude Steele, ni kɛ afii babaoo sɔmɔ akɛ maŋsɛɛ sɔɔlɔ yɛ Puerto Rico lɛ. * No hewɔ lɛ, miná mɛi pii ni fee nɔkwɛmɔnɔ kpakpa ni manyɛ makase.

MƐI KOMƐI NI FEE NƆKWƐMƆNƆ KPAKPA

Mipapa damɔ gbɛnta ko eehã mɛi magazin

Hɔɔ gbɛkɛ ko lɛ, mikɛ mipapa damɔ gbɛjegbɛi lɛ ahe wɔmiihã mɛi Buu-Mɔɔ Consolation (ni amrɔ nɛɛ atsɛɔ lɛ Awake! lɛ). No mli lɛ miye afii enumɔ. Nakai beiaŋ lɛ, aawuu Jeŋ Ta II lɛ, ni Amerika kɛ ehe ewo mli. Wɔhiɛ magazin lɛ hãmɔ ni datrɛfonyo ko ni etɔ dãa lɛ ba jɛmɛ. Eje gbɛ esopa mipapa jogbaŋŋ yɛ ehe ni ekɛwooo asraafoi anitsumɔ lɛ mli lɛ hewɔ. Ekɛɛ lɛ akɛ gbeyeilɔ ji lɛ, ni no hewɔ ekɛ saji jieɔ enaa koni ekaya ta lɛ. Datrɛfonyo nɛɛ badamɔ mipapa hiɛ tuuntu, ni ekɛɛ lɛ akɛ, “Gbeyeilɔ, kɛ́ nuu yɛ omli lɛ, taa mihe okwɛ!” Nuu lɛ nifeemɔ lɛ hã mɛi pii ba ni amɛbakwɛ nɔ ni yaa nɔ. Mitsui fã waa, shi bɔ ni mipapa ye ehe nɔ lɛ fee mi fɛo pam. Efooo nuu lɛ daaŋ, moŋ lɛ ehã mɛi ni ebabua shi lɛ magazin. Ahiɛ mli ni asraafonyo ko baho yɛ jɛmɛ, nɔŋŋ kɛkɛ ni datrɛfonyo lɛ bo ekɛɛ lɛ akɛ, “Baatsɔɔ gbeyeilɔ nɛɛ nɔ ko naa!” Asraafonyo lɛ diɛŋtsɛ na akɛ etɔ dãa, no hewɔ lɛ ekɛɛ lɛ akɛ, “Yaa shĩa ni dãa lɛ atsirɛ yɛ ohiɛ!” Kɛkɛ ni amɛyi enyɔ lɛ fɛɛ amɛshi amɛtee. Midaa Yehowa shi waa akɛ eduro mipapa ekãa nakai gbi lɛ. No mli lɛ, mipapa kuɔ yitsɔi, ni eyɛ shwapoi enyɔ yɛ Wichita, ni datrɛfonyo nɛɛ bakuɔ eyi yɛ eŋɔɔ!

Mi kɛ mifɔlɔi ni wɔmiiya kpee wulu ko yɛ Wichita yɛ aaafee afi 1940 mli

Be ni miná afii kpaanyɔ lɛ, mifɔlɔi hɔ̃ɔ wɔshĩa lɛ kɛ amɛshwapoi lɛ, ni amɛfee shĩa bibioo ko ni abaanyɛ akɛ tsɔne agbala. Kɛkɛ ni wɔfã kɛtee maŋ ko ni bɛŋkɛ Grand Junction ni yɔɔ Colorado lɛ koni wɔyasɔmɔ yɛ he ni hiamɔ lɛ da yɛ. Mifɔlɔi sɔmɔ akɛ gbɛgbalɔi.  Amɛye okwaa ni amɛlɛ kooloi kɛkwɛ wɔ. Yehowa jɔɔ amɛ yɛ ekãa ni amɛkɛshiɛ lɛ hewɔ, ni atse asafo yɛ jɛmɛ. Yɛ June 20, 1948 lɛ, mipapa baptisi mi kɛ mɛi krokomɛi ni ebamɔ anɔkwale lɛ mli lɛ yɛ faa ko mli. Mɛi ni abaptisi nakai gbi lɛ ateŋ mɛi komɛi ji Billie Nichols kɛ eŋa. Sɛɛ mli lɛ, Billie kɛ ebinuu lɛ fɛɛ batsɔmɔ kpokpaa nɔkwɛlɔi.

Wɔkɛ mɛi babaoo ni kɛ ekãa sɔmɔ Yehowa lɛ bɔ naanyo gbagbalii, titri lɛ, Steele weku lɛ mli bii lɛ. Amɛji Don kɛ eŋa Earlene, Dave kɛ eŋa Julia, kɛ Si kɛ eŋa Martha. Weku nɛɛ mli bii lɛ ná minɔ hewalɛ waa. Amɛhã mina akɛ, mɛi fɛɛ ni taoɔ Maŋtsɛyeli lɛ klɛŋklɛŋ lɛ atsui nyɔɔ amɛmli, ni amɛnáa miishɛɛ waa.

MIFÃ KƐTEE HE KROKO

Be ni miná afii 19 lɛ, wɔnaanyo ko ni atsɛɔ lɛ Bud Hasty lɛ bi mi kɛji masumɔ ni mafata ehe ni wɔyasɔmɔ akɛ gbɛgbalɔi yɛ Amerika wuoyigbɛ. Mikpɛlɛ nɔ. No hewɔ lɛ, kpokpaa nɔkwɛlɔ lɛ hã wɔfã kɛtee maŋ ko ni yɔɔ Louisiana, ni atsɛɔ lɛ Ruston lɛ, koni wɔyasɔmɔ yɛ jɛmɛ. No beiaŋ lɛ, nyɛmimɛi ni yɔɔ jɛmɛ lɛ ateŋ mɛi babaoo ekpa asafoŋ kpeei kɛ shiɛmɔ yaa. Shi akɛɛ wɔ akɛ, kɛ́ wɔtee lɛ, wɔto asafoŋ kpeei lɛ fɛɛ he gbɛjianɔ ni wɔfee daa otsi, ekɔɔɔ he eko mɛi abɔ ni baaba. Wɔná he ko ni wɔbaanyɛ wɔfee asafoŋ kpeei lɛ yɛ, wɔsaa jɛmɛ, ni wɔbɔi asafoŋ kpeei lɛ fɛɛ feemɔ. Be saŋŋ baho ni wɔyi enyɔ lɛ pɛ wɔbaa kpeei lɛ. No hewɔ lɛ, wɔja kpeei srɔtoi lɛ ashishi nifeemɔi lɛ wɔhã wɔhe. Kɛ́ Bud yɛ nifeemɔ lɛ, belɛ mi mahã saji lɛ fɛɛ hetoo, ni kɛ́ mi miyɔɔ nifeemɔ lɛ, belɛ lɛ ebaahã saji lɛ fɛɛ hetoo. Kɛ́ eba lɛ akɛ wɔbaafee nɔkwɛmɔnɔ lɛ, wɔyi enyɔ lɛ nɔŋŋ wɔfeɔ wɔtsɔɔ wɔhe! Wɔhiɛ mli nakai aahu kɛyashi nyɛmi yoo onukpa ko bɔi baa. Sɛɛ mli lɛ, Biblia mli nikaselɔi komɛi, kɛ nyɛmimɛi ni kulɛ amɛkpa asafoŋ kpeeiyaa lɛ ekomɛi hu bɔi baa. Eyeee be ko, ni wɔbatsɔ asafo.

Gbi ko lɛ, wɔkɛ Church of Christ osɔfo ko kpe ni ebibii wɔ ŋmalɛ naa saji komɛi misusuko he pɛŋ. Enɛ hɛle mi shi, ni ehã misusu nibii ni miheɔ miyeɔ lɛ ahe kɛtee shɔŋŋ. Mikase nii nyɔɔŋ nyɔɔŋ aahu otsi, koni maná saji ni ebibii lɛ ahetoo. Enɛ ye ebua mi waa; ehã wekukpaa ni yɔɔ mi kɛ Yehowa teŋ lɛ mli bawa, ni kɛjɛ nakai gbi lɛ nɔ kɛyaa lɛ, misheee osɔfo ko osɔfo ko gbeyei dɔŋŋ.

No sɛɛ etsɛɛɛ lɛ, kpokpaa nɔkwɛlɔ lɛ hã mishi kɛtee maŋ ko ni yɔɔ Arkansas, ni atsɛɔ lɛ El Dorado lɛ, koni maye mabua asafo ni yɔɔ jɛmɛ lɛ. Be ni miyɔɔ jɛmɛ lɛ, Colorado amralofoi ni tsɛɔ mɛi kɛhãa asraafoi anitsumɔ lɛ tsɛ mi shii abɔ. No hewɔ lɛ, mifɔɔ jɛmɛ yaa. Be ko be ni miyaa lɛ, miyaná oshara yɛ Texas, ni mitsɔne lɛ fite kwraa. No mli lɛ, gbɛgbalɔi krokomɛi fata mihe yɛ tsɔne lɛ mli. Wɔtswa nyɛmi nuu ko koni ebaye ebua wɔ. Nyɛmi nuu nɛɛ wo wɔ kɛtee eshĩa, ni no sɛɛ lɛ wɔfata ehe kɛtee asafoŋ kpee. Yɛ asafoŋ kpee lɛ shishi lɛ,  atswa adafi akɛ wɔyaná oshara. No hewɔ lɛ, nyɛmimɛi lɛ jɛ mlihilɛ mli amɛhã wɔ shika. Agbɛnɛ hu, nyɛmi nuu lɛ hɔ̃ɔ mitsɔne lɛ ehã mi, ehɔ̃ɔ ehe dɔlai 25.

Wɔná tsɔne kɛtee Wichita. No mli lɛ, wɔweku lɛ yɛ naanyo gbɛgbalɔ ko yɛ jɛmɛ ni atsɛɔ lɛ E. F. McCartney. Eyɛ bii hajii, ni atsɛɔ amɛ Frank kɛ Francis. Amɛbatsɔmɔ minanemɛi ni amɛkã he amɛji minanemɛi. Misumɔɔ amɛsane waa. No mli lɛ, amɛyɛ tsɔne momo ko, ni amɛhɔ̃ɔ amɛhã mi. Amɛhɔ̃ɔ amɛhe dɔlai 25 pɛpɛɛpɛ. Enɛ ji be klɛŋklɛŋ ni mina faŋŋ akɛ, Yehowa eduro mi nɔ ko ni he hiaa mi lɛ yɛ Maŋtsɛyeli lɛ ni miitao klɛŋklɛŋ lɛ hewɔ. Nyɛminuu McCartney kɛ eweku lɛ nɔ tsɔ ni mikɛ nyɛmi yoo fɛfɛo ko ni atsɛɔ lɛ Bethel Crane lɛ kpe. Bethel mami Ruth sɔmɔ kɛ ekãa akɛ gbɛgbalɔ yɛ maŋ ko ni yɔɔ Kansas, ni atsɛɔ lɛ Wellington lɛ mli, ni etee nɔ etsu gbɛgbamɔ nitsumɔ lɛ be ni eye afii 90 kɛ sɛɛ po. Eyeee afi ni mi kɛ Bethel bote gbalashihilɛ mli yɛ afi 1958. Ebatsɔ gbɛgbalɔ, ni mikɛ lɛ fɛɛ sɔmɔ yɛ El Dorado.

SƆƆMƆ HEGBƐI NI HÃ WƆMII SHƐ WƆHE

Wɔshwe akɛ wɔkase wɔfɔlɔi kɛ nyɛmimɛi krokomɛi ni fee nɔkwɛmɔnɔ kpakpa amɛhã wɔ yɛ wɔgbekɛbiiashi lɛ. No hewɔ lɛ, wɔkpɛ wɔyiŋ akɛ wɔbaatsu nitsumɔ fɛɛ nitsumɔ ni Yehowa asafo lɛ kɛbaahã wɔ. Ahã wɔyasɔmɔ akɛ gbɛgbalɔi krɛdɛi yɛ maŋ ko ni yɔɔ Arkansas, ni atsɛɔ lɛ Walnut Ridge lɛ. Kɛkɛ ni yɛ afi 1962 lɛ, afɔ̃ wɔ nine ni wɔba Gilead Skul lɛ klas ni ji 37 nɔ lɛ. Wɔmii shɛ wɔhe waa. Be ni wɔná wɔle akɛ wɔkɛ Don Steele fɛɛ baaya skul lɛ shi kome lɛ, wɔmli fili wɔ. Be ni wɔgbe skul lɛ naa lɛ, ahã mi kɛ Bethel yasɔmɔ akɛ maŋsɛɛ sɔɔlɔi yɛ Nairobi, yɛ Kenya. Edɔ wɔ waa akɛ wɔbaashi New York, shi be ni wɔyashɛ Nairobi ni wɔna nyɛmimɛi ni eba koni amɛbakpee wɔ yɛ kɔɔyɔŋ lɛji adaamɔhe lɛ, wɔmii shɛ wɔhe waa!

Wɔkɛ Chris Kanaiya kɛ eŋa Mary nyiɛ shiɛmɔ nɔ yɛ Nairobi

Eyeee be ko ni wɔbanya Kenya hilɛ, kɛ bɔ ni mɛi boɔ sane lɛ toi yɛ jɛmɛ lɛ he waa. Mɛi klɛŋklɛŋ ni wɔye wɔbua kɛba anɔkwale lɛ mli yɛ jɛmɛ ji Chris Kanaiya kɛ eŋa Mary. Kɛbashi ŋmɛnɛ lɛ, amɛkã he amɛmiisɔmɔ akɛ be fɛɛ sɔɔlɔi yɛ Kenya. Enɔ afi lɛ, ajie wɔ kɛtee Kampala yɛ Uganda, ni wɔji klɛŋklɛŋ maŋsɛɛ sɔɔlɔi ni yasɔmɔ yɛ Uganda. Wɔmii shɛ wɔhe waa, ejaakɛ mɛi babaoo bo sane lɛ toi ni amɛbatsɔmɔ wɔnyɛmimɛi Kristofoi. Shi afii etɛ kɛ nyɔji ekpaa sɛɛ lɛ, wɔkpɛ wɔyiŋ akɛ wɔbaasumɔ wɔfɔ. No hewɔ lɛ, wɔku wɔsɛɛ kɛtee Amerika. Gbi ni wɔbaashi Africa lɛ, wɔnáaa lɛ mlɛo kwraa. Edɔ wɔ waa diɛŋtsɛ. Anɔkwa, edɔ wɔ fe be ni wɔshiɔ New York lɛ po, ejaakɛ wɔbasumɔ mɛi ni yɔɔ Africa lɛ asane waa. Be ni wɔshiɔ lɛ, wɔshwelɛ ji wɔku wɔsɛɛ gbi ko kɛ̃.

WƆNÁ NITSUMƆ HEE

Wɔyahi he ko ni bɛŋkɛ he ni mifɔlɔi yɔɔ yɛ Colorado anaigbɛ lɛ. No sɛɛ etsɛɛɛ lɛ, wɔfɔ wɔkromɔbi, Kimberly, ni nyɔji 17 sɛɛ lɛ, wɔfɔ esɛɛho, Stephany. Wɔkɛ hiɛdɔɔ tsu nitsumɔ hee ni wɔná akɛ fɔlɔi lɛ, ni wɔbɔ mɔdɛŋ wɔdu anɔkwale lɛ wɔwo wɔbiyei lɛ atsui mli. No ji, wɔshwe akɛ wɔkase nɔkwɛmɔnɔ kpakpa ni wɔfɔlɔi kɛ mɛi krokomɛi fee amɛhã wɔ lɛ. Kɛfata he lɛ, wɔhã ehi wɔjwɛŋmɔ mli akɛ, eyɛ mli akɛ wɔnɔkwɛmɔnɔ kpakpa lɛ baanyɛ aye abua wɔbii lɛ ni amɛkpɛ amɛyiŋ akɛ amɛbaasɔmɔ Yehowa moŋ, shi no etsɔɔɔ doo akɛ nakai amɛbaafee. Yɛ nɔkwɛmɔnɔ kpakpa ni mifɔlɔi fee amɛhã wɔ lɛ fɛɛ sɛɛ lɛ, minyɛmi nuu fioo lɛ, kɛ minyɛmimɛi yei lɛ ateŋ mɔ kome eshi anɔkwale. Misɔlemɔ ji akɛ, amɛbaaku amɛsɛɛ amɛbakase nɔkwɛmɔnɔ kpakpa ni afee ahã amɛ lɛ.

Wɔkɛ miishɛɛ tsɔse wɔbii lɛ, ni wɔbɔ mɔdɛŋ akɛ wɔbaafee nɔ fɛɛ nɔ akɛ weku. He ni wɔyɔɔ yɛ Colorado lɛ bɛŋkɛ maŋ ko ni atsɛɔ lɛ Aspen. Ais nɔ shwɛmɔ ko ni atsɛɔ lɛ skiing lɛ ehe shi waa yɛ maŋ nɛɛ nɔ. No hewɔ lɛ, wɔ fɛɛ wɔkase shwɛmɔ nɛɛ, koni wɔnyɛ  wɔfee ekome kɛshwɛ. Kɛ́ wɔkɛ oblayei lɛ fee ekome kɛshwɛ nakai lɛ, wɔnáa hegbɛ wɔgbaa sane waa. Bei komɛi lɛ, wɔkɛ amɛ fãa gbɛ, ni kɛ́ wɔtee lɛ wɔwɔɔ bui amli yɛ agbo lɛ naa. Kɛ́ je na lɛ, wɔwereɔ la ni wɔgbaa sane kɛ miishɛɛ. Eyɛ mli akɛ no mli lɛ amɛdarako moŋ, shi amɛkɛ wɔ gba nɔ ni amɛbaasumɔ ni amɛtsu wɔsɛɛ, kɛ mɛi ni amɛbaasumɔ ni amɛkɛbote gbalashihilɛ mli lɛ he sane. Wɔye wɔbua amɛ ni amɛna akɛ, esa akɛ amɛjɛ amɛtsuiŋ amɛbo gbɛtsɔɔmɔi fɛɛ ni Yehowa kɛhãa lɛ toi. Wɔwo amɛ hewalɛ ni amɛkɛ be fɛɛ sɔɔmɔ nitsumɔ lɛ ama amɛhiɛ, ni wɔhã amɛle nɔ hewɔ ni nilee yɔɔ mli akɛ amɛkɛ mɛi ni amɛ hu amɛyɔɔ nakai oti lɛ nɔŋŋ baabote gbalashihilɛ mli. Wɔbɔ mɔdɛŋ wɔhã amɛle nɔ hewɔ ni ehi akɛ amɛbaamɛ ni amɛda fioo dani amɛbote gbalashihilɛ mli. No hewɔ lɛ, amɛkpɛ amɛyiŋ akɛ amɛbaahi shi oshija kɛyashi amɛbaaye, kɛ́ hooo kwraa lɛ, afii 23.

Taakɛ wɔfɔlɔi fee lɛ, wɔkɛ wɔbii lɛ fee ekome kɛtee asafoŋ kpeei, ni wɔkɛ amɛ fɔɔ shiɛmɔyaa. Wɔto gbɛjianɔ koni mɛi ni yɔɔ be fɛɛ sɔɔmɔ nitsumɔ lɛ mli lɛ abahi wɔŋɔɔ yɛ be kɛ beiaŋ. Kɛfata he lɛ, wɔgba amɛ niiashikpamɔi ni yɔɔ miishɛɛ ni wɔná be ni wɔsɔmɔɔ yɛ maŋsɛɛ lɛ. Wɔ fɛɛ wɔwie akɛ, wɔsɛɛ ko lɛ, wɔbaasumɔ ni wɔfã gbɛ kɛya Africa akɛ weku. No mli lɛ, sane nɛɛ kã wɔbiyei lɛ atsui nɔ waa.

Wɔfee weku jamɔ daa. Yɛ wɔweku jamɔ lɛ shishi lɛ, wɔfeɔ shihilɛi ni amɛbaanyɛ amɛkɛkpe yɛ skul lɛ ahe nɔkwɛmɔnɔ, koni wɔna bɔ ni amɛbaafee amɛtsu he nii amɛhã. Enɛ hã wɔweku jamɔ lɛ fee miishɛɛ waa, amɛkase nii yɛ mli, ni ehã amɛnyɛ amɛfã amɛhemɔkɛyeli lɛ he kɛ ekãa. Be ni amɛdaraa lɛ, bei komɛi lɛ, etɔɔ wɔ dani amɛbataraa shi kɛhãa weku jamɔ. Mikaiɔ akɛ be ko lɛ, amɛfee aahu ni mishwie amɛ akɛ amɛya, shi wɔkaseŋ nii lɛ dɔŋŋ. Sane lɛ gba amɛnaa waa ni amɛbɔi yaafo. Amɛkɛɛ amɛmiisumɔ ni wɔkase nii lɛ. Nɔ ni amɛfee lɛ hã wɔna akɛ, yɛ amɛtsuiŋ tɔ̃ɔ lɛ, amɛmiisumɔ ni amɛkase Yehowa he nii. Fiofio lɛ, amɛbanya nikasemɔ lɛ he waa, ni amɛnyɛɔ amɛgbaa wɔ amɛtsuiŋ saji fɛɛ. Mikaiɔ akɛ, bei komɛi lɛ, amɛwieɔ akɛ amɛkpɛlɛɛɛ nɔ ko ni amɛkase yɛ Biblia lɛ mli lɛ nɔ. Eyɛ mli akɛ kɛ́ amɛwie nakai lɛ, egbaa wɔnaa fioo moŋ, shi ehãa wɔleɔ nɔ ni yɔɔ amɛtsui mli. Wɔkɛ amɛ susuɔ nɔ ni amɛkɛɛ amɛkpɛlɛɛɛ nɔ lɛ he jogbaŋŋ, ni kɛ́ wɔfee nakai lɛ, ehãa amɛnaa nɔ hewɔ ni esa akɛ amɛkɛ nɔ ni Biblia lɛ ewie lɛ atsu nii.

TSAKEMƆI KROKOMƐI NI BA WƆSHIHILƐ MLI

Oona kɛ onaaa nɛɛ nɔŋŋ lɛ, gbekɛbii lɛ edara kwraa. Wɔná yelikɛbuamɔ kɛ gbɛtsɔɔmɔi ni Nyɔŋmɔ asafo lɛ kɛhãa lɛ he sɛɛ waa be ni wɔtsɔseɔ wɔbii lɛ koni amɛbasumɔ Yehowa lɛ. No hewɔ lɛ, be ni amɛgbe sɛkɛndre skul naa, ni amɛyi enyɔ lɛ fɛɛ amɛbatsɔmɔ gbɛgbalɔi lɛ, wɔmii shɛ wɔhe waa. Amɛkase ninenaa nitsumɔi koni amɛnyɛ amɛkwɛ amɛhe. Kɛkɛ ni amɛ kɛ nyɛmimɛi yei enyɔ komɛi fã kɛtee maŋ ko ni yɔɔ Tennessee, ni atsɛɔ lɛ Cleveland lɛ, koni amɛyasɔmɔ yɛ he ni hiamɔ lɛ da yɛ. Wɔhiɛ tse amɛ, shi wɔtsui nyɔ wɔmli waa akɛ amɛkɛ amɛhewalɛ miisɔmɔ Yehowa akɛ be fɛɛ sɔɔlɔi. Mi kɛ Bethel bɔi gbɛgbamɔ nitsumɔ lɛ ekoŋŋ, ni no hã wɔná sɔɔmɔ hegbɛi krokomɛi. Misɔmɔ akɛ kpokpaa nɔkwɛlɔ sɛɛmɔ, ni ahã mikwɛ kpokpaa wulu nɔ kpeei anɔ.

Dani wɔbiyei lɛ baaya Tennessee lɛ, amɛyashara shi yɛ nitsumɔhe nine ni yɔɔ London, yɛ England lɛ. No mli lɛ Stephany eye afii 19, ni be ni amɛtee lɛ, ekɛ nyɛmi nuu ko ni miisɔmɔ yɛ jɛmɛ, ni atsɛɔ lɛ Paul Norton lɛ kpe ni amɛbatsɔmɔ nanemɛi. Sɛɛ mli lɛ, amɛsaa amɛtee ekoŋŋ. Be ni amɛtee lɛ, Kimberly hu kɛ nyɛmi nuu ko ni atsɛɔ lɛ Brian Llewellyn lɛ kpe ni amɛbatsɔmɔ nanemɛi. Brian kɛ Paul fɛɛ tsuɔ nii yɛ he kome. Stephany mɛ kɛyashi ená afii 23, kɛkɛ ni ekɛ Paul bote gbalashihilɛ mli. Enɔ afi lɛ, Brian kɛ Kimberly hu bote gbalashihilɛ mli. No mli lɛ Kimberly eye afii 25. No hewɔ lɛ, oblayei lɛ ye amɛwiemɔ nɔ; amɛhi shi oshija, kɛ́ hooo kwraa lɛ, afii 23 dani amɛbote gbalashihilɛ mli. Wɔmii shɛ wɔhe waa yɛ mɛi ni amɛteŋ mɔ fɛɛ mɔ hala akɛ egbalashihilɛ mli hefatalɔ lɛ hewɔ.

Wɔ kɛ Paul, Stephany, Kimberly, kɛ Brian sha mfoniri nɛɛ yɛ afi 2002 be ni wɔtee Malawi nitsumɔhe nine lɛ

Wɔbiyei lɛ kɛɛ nɔkwɛmɔnɔ kpakpa ni wɔ kɛ amɛnii kɛ amɛnaa fee lɛ ye ebua amɛ ni amɛbo famɔ ni Yesu kɛhã akɛ ‘atao Maŋtsɛyeli lɛ kɛ Nyɔŋmɔ jalɛ lɛ klɛŋklɛŋ’ lɛ toi be ni nibii amli wa hã amɛ lɛ po. (Mat. 6:33) Yɛ April 1998 lɛ, afɔ̃ Paul kɛ Stephany nine ni amɛba Gilead Skul lɛ klas ni ji 105 nɔ lɛ, kɛkɛ ni no sɛɛ lɛ, ahã amɛyasɔmɔ yɛ Malawi, yɛ Africa. Nakai beiaŋ nɔŋŋ afɔ̃ Brian kɛ Kimberly hu nine ni amɛbasɔmɔ yɛ London Betel. Sɛɛ mli lɛ, akɛ amɛtee Malawi Betel. Wɔmli fili wɔ waa, ejaakɛ be fɛɛ sɔɔmɔ nitsumɔ lɛ ji nitsumɔ ni hi fe fɛɛ ni oblahii kɛ oblayei baanyɛ atsu.

 SƆƆMƆ HEGBƐ KROKO NI HÃ WƆNÁ MIISHƐƐ WAA

Yɛ January 2001 lɛ, Nyɛminuu Marais, ni ji mɔ ni kwɛɔ Translation Services Department lɛ nɔ yɛ asafo lɛ yitso lɛ, tswa mi, taakɛ miwie yɛ sane nɛɛ shishijee lɛ. Ehã mile akɛ, aato gbɛjianɔ ni aye abua mɛi ni tsɔɔ asafo lɛ woji lɛ ashishi lɛ ni amɛnu Blɔfo wiemɔ lɛ shishi jogbaŋŋ. No hewɔ lɛ, amɛbaasumɔ ni amɛtsɔse mi kɛ nyɛmimɛi hii krokomɛi koni wɔfã gbɛ kɛya je lɛŋ hei srɔtoi ni wɔyatsu nitsumɔ nɛɛ. No mli lɛ miye afii 64. Mi kɛ Bethel sɔle yɛ sane lɛ he, ni wɔkɛ mimami kɛ Bethel mami, ni no mli lɛ amɛdara yɛ afii amli lɛ susu he koni wɔkwɛ nɔ ni amɛbaakɛɛ. Eyɛ mli akɛ wɔbaashi amɛ moŋ, shi amɛkpɛlɛ akɛ wɔya. No hewɔ lɛ, mitswa Nyɛminuu Marais ni mikɛɛ lɛ akɛ, wɔbaasumɔ ni wɔtsu nitsumɔ lɛ.

Sɛɛ mli lɛ, mimami baná kansa. No hewɔ lɛ, wɔkɛɛ lɛ akɛ wɔbaahi shi koni wɔwa minyɛmi yoo Linda kɛkwɛ lɛ. Shi ekɛɛ mi akɛ, “Kaala, ejaakɛ no moŋ baahã magbo mra.” Linda hu fi esɛɛ. Wɔhiɛ sɔ amɛ kɛ nyɛmimɛi ni yɔɔ akutso lɛ mli lɛ waa yɛ amɛhe ni amɛkɛshã afɔle kɛ bɔ ni amɛye amɛbua wɔ lɛ hewɔ. Gbi ni wɔshi kɛtee Watchtower Educational Center yɛ Patterson lɛ, enɔ jetsɛremɔ nɔŋŋ ni Linda tswa mi akɛ Mama egbo. Wɔkɛ wɔhewalɛ fɛɛ tsu nitsumɔ hee ni ahã wɔ lɛ, ejaakɛ wɔle akɛ eji eyɛ wala mli kulɛ, nakai ebaasumɔ ni wɔfee.

Be ni wɔná wɔle akɛ, he klɛŋklɛŋ ni wɔbaaya ji Malawi nitsumɔhe nine lɛ, ni ji he ni mibiyei lɛ kɛ amɛwumɛi lɛ sɔmɔɔ yɛ lɛ, wɔmii shɛ wɔhe waa. Wɔnyɛŋ wɔtsɔɔ miishɛɛ ni wɔná be ni wɔfee ekome ekoŋŋ akɛ weku lɛ! No sɛɛ lɛ, wɔtee Zimbabwe, kɛkɛ ni wɔtee Zambia. Wɔtsu nitsumɔ nɛɛ afii etɛ kɛ fã, kɛkɛ ni ahã wɔku wɔsɛɛ kɛtee Malawi koni wɔyaŋmala nyɛmimɛi ni yɔɔ jɛmɛ ni awa amɛyi yɛ amɛhemɔkɛyeli lɛ hewɔ lɛ aniiashikpamɔi wɔshwie shi. *

Wɔkɛ wɔnabii lɛ nyiɛ shiɛmɔ nɔ

Yɛ afi 2005 lɛ, wɔku wɔsɛɛ kɛba Basalt yɛ Colorado, ni wɔbatsa wɔgbɛgbamɔ nitsumɔ lɛ nɔ. Edɔ wɔ waa akɛ wɔshi Africa. Yɛ afi 2006 lɛ, Brian kɛ Kimberly kɛ amɛbiyei enyɔ lɛ fã kɛbahi wɔmasɛi. Atsɛɔ amɛ Mackenzie kɛ Elizabeth. Paul kɛ Stephany yɛ Malawi lolo, ni amrɔ nɛɛ Paul miisɔmɔ akɛ jɛmɛ Nitsumɔhe Nine Ajinafoi Akuu lɛ mli nyo. Amrɔ nɛɛ, eshwɛ fioo ni maye afii 80, ni eŋɔɔ minaa waa akɛ atuu sɔ̃i ni kulɛ mitsuɔ he nii lɛ awo nyɛmimɛi ni hiɛ efã shi amɛgbɔlɔko tamɔ mi lɛ adɛŋ. Mikɛ nyɛmimɛi nɛɛ etsu nii be kplaŋŋ. Mi kɛ Bethel yɛ miishɛɛ waa, ejaakɛ wɔbɔ mɔdɛŋ wɔkase nɔkwɛmɔnɔ kpakpa ni wɔfɔlɔi fee amɛhã wɔ lɛ, ni wɔ hu wɔfee nɔkwɛmɔnɔ kpakpa wɔhã wɔbii kɛ wɔnabii.

^ kk. 5 Kɛ́ ootao ole Steele weku lɛ mli bii kɛ sɔɔmɔ ni amɛyasɔmɔ yɛ maŋsɛɛ lɛ he saji babaoo lɛ, kwɛmɔ May 1, 1956, Blɔfo Buu-Mɔɔ lɛ bf. 269-272, kɛ March 15, 1971, Blɔfo Buu-Mɔɔ lɛ bf. 186-190.

^ kk. 30 Akɛ nɔkwɛmɔnɔ lɛ, kwɛmɔ Nyɛminuu Trophim Nsomba wala shihilɛ he sane ni je kpo yɛ April 15, 2015, Buu-Mɔɔ lɛ bf. 27-31 lɛ.