Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) NOVEMBER 2016

“Nitsumɔ lɛ Da”

“Nitsumɔ lɛ Da”

BE KO lɛ, Maŋtsɛ David kpee Israel lumɛi lɛ, epiafoi lɛ, kɛ hii ekãalɔi kɛ kakabãi lɛ fɛɛ kɛba Yerusalem kɛhã kpee ko ni sa kadimɔ waa. Yɛ kpee nɛɛ shishi lɛ, David tswa adafi krɛdɛɛ ko: Yehowa ehã ebi Solomon hegbɛ akɛ ema tsũ wulu ko ni yɔɔ fɛo waa, koni asɔmɔ anɔkwa Nyɔŋmɔ lɛ yɛ jɛmɛ. David hã amɛle akɛ, ekɛ gbɛtsɔɔmɔi fɛɛ ni Yehowa kɛhã lɛ yɛ bɔ ni esa akɛ ama tsũ lɛ ahã lɛ he lɛ ehã Solomon. Ekɛɛ amɛ akɛ: “Nitsumɔ lɛ da; ejaakɛ mɔɔ lɛ [loo, sɔlemɔwe lɛ] jeee gbɔmɔ nɔ ni, shi moŋ Yehowa Nyɔŋmɔ nɔ ni.”1 Kron. 28:1, 2, 6, 11, 12; 29:1.

Be ni David tswa adafi nɛɛ egbe naa lɛ, ebi kɛji ‘mɔ ko yɛ he tsui’ akɛ ebaatsu onia ehã Yehowa. (1 Kron. 29:5) Eji oyɛ jɛmɛ nakai gbi lɛ kulɛ, mɛni obaafee? Ani otsui baatsirɛ bo ni otsu onia kɛfi nitsumɔ kpele nɛɛ sɛɛ? Israelbii lɛ atsui tsirɛ amɛ ni amɛfi nitsumɔ lɛ sɛɛ. Biblia lɛ kɛɔ akɛ: “Maŋ lɛ nya yɛ hã ní amɛhã yɛ tsuijurɔ naa lɛ hewɔ, ejaakɛ amɛhã Yehowa kɛ amɛtsui muu lɛ fɛɛ yɛ suɔmɔ naa.”1 Kron. 29:9.

Afii ohai pii sɛɛ lɛ, Yehowa to gbɛjianɔ kroko kɛtsɔ Yesu kpɔmɔ afɔle lɛ nɔ, koni mɛi atsɔ no nɔ amɛjá lɛ. Mfonirifeemɔŋ sɔlemɔwe kpele nɛɛ hi kwraa fe blema sɔlemɔwe lɛ ni ama lɛ. (Heb. 9:11, 12) Ŋmɛnɛ lɛ, Yehowa miitsɔ sane kpakpa lɛ ni wɔshiɛɔ lɛ nɔ eeye eebua mɛi koni amɛsaa amɛ kɛ lɛ teŋ. (Mat. 28:19, 20) Daa afi lɛ, wɔfeɔ Biblia mli nikasemɔi akpekpei abɔ, abaptisiɔ kaselɔi hei akpei abɔ, ni atseɔ asafoi hei ohai abɔ.

Shweremɔ nɛɛ hewɔ lɛ, esa akɛ akala woji babaoo, amamɔ Maŋtsɛyeli Asai hei ni asaa memeji ni yɔɔ lɛ, ni agbɛnɛ hu, ahehee shikpɔji kɛhã kpeei bibii kɛ kpeei wuji. Anɔkwa, sane kpakpa shiɛmɔ nitsumɔ nɛɛ da waa, ni emli jɔɔmɔi fa!Mat. 24:14.

Wɔsumɔɔ Nyɔŋmɔ kɛ wɔnaanyo gbɔmɔ, ni wɔle akɛ etsɛŋ kwraa, Maŋtsɛyeli sane kpakpa shiɛmɔ nitsumɔ nɛɛ baaba naagbee. Enɛ kanyaa wɔ ni wɔjɛɔ wɔtsuiŋ wɔtsuɔ onia kɛfiɔ nitsumɔ lɛ sɛɛ. Eŋɔɔ wɔnaa waa akɛ ‘wɔkɛ wɔnii ni wɔyɔɔ lɛ baawo Yehowa hiɛ nyam,’ ni wɔle akɛ nyɔŋ anɔkwafo kɛ hiɛshikalɔ lɛ kɛ nibii nɛɛ baatsu nii jogbaŋŋ, koni anyɛ agbe nitsumɔ ni fe nitsumɔi fɛɛ ni atsu yɛ shikpɔŋ lɛ nɔ pɛŋ lɛ naa!Abɛi 3:9.