Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Yehowa Sumɔɔ ‘Mɛi Ni Kɛ Shifimɔ Woɔ Yibii’

Yehowa Sumɔɔ ‘Mɛi Ni Kɛ Shifimɔ Woɔ Yibii’

‘Shi nɔ ni adu yɛ sũ kpakpa nɔ lɛ ji mɛi ni kɛ shifimɔ woɔ yibii.’​—LUKA 8:15.

LALAI: 68, 72

1, 2. (a) Mɛɛ gbɛ nɔ mɛi ni yaa nɔ amɛshiɛɔ yɛ hei ni abooo sane lɛ toi yɛ lɛ anɔkwɛmɔnɔ lɛ woɔ wɔ hewalɛ? (Kwɛmɔ mfoniri ni yɔɔ nikasemɔ lɛ shishijee lɛ.) (b) Mɛni Yesu wie yɛ bɔ ni mɛi ni yɔɔ emaŋ lɛ mli lɛ fee amɛnii amɛhã yɛ sane ni eshiɛɔ lɛ he lɛ he? (Kwɛmɔ shishigbɛ niŋmaa lɛ.)

NYƐMI nuu ko ni atsɛɔ lɛ Sergio lɛ kɛ eŋa Olinda eye aaafee afii 80, ni amɛmiisɔmɔ akɛ daa gbɛgbalɔi yɛ United States. Daa leebi ŋmɛlɛ kpawo lɛ, amɛnyiɛɔ kɛyaa maŋ lɛŋ he ko ni mɛi tsɔɔ waa lɛ. Kɛ́ amɛyashɛ jɛmɛ lɛ, amɛyadamɔɔ he ko ni akwɔɔ tsɔji yɛ lɛ koŋ nɔ ni amɛkɛ wɔwoji lɛ tsɔɔ mɛi ni hoɔ lɛ. Mɛi lɛ ateŋ mɛi babaoo efooo amɛdaaŋ, shi kɛ́ mɔ ko miiho ni ekwɛ amɛ lɛ, amɛfeɔ amɛhiɛ ŋmɔlɔŋmɔlɔ amɛtsɔɔ lɛ. Amɛhiɔ jɛmɛ kɛyashi shwane, kɛkɛ lɛ amɛnyiɛ blɛooblɛoo kɛtee shĩa. Nyɛsɛɛ nɛɛ, nyiɛmɔ ewa ehã amɛ, ejaakɛ amɛnaji waa amɛhe waa. Loloolo lɛ, nyɛmi nuu anɔkwafo nɛɛ kɛ eŋa lɛ nyiɛɔ kɛyaa he ni akwɔɔ tsɔji lɛ yɛ lɛ daa leebi ŋmɛlɛ kpawo, ni amɛfeɔ nakai shii ekpaa yɛ otsi lɛ mli. Anɔkwa, amɛfee nakai afii babaoo.

2 Tamɔ bɔ ni eji yɛ Sergio kɛ Olinda gbɛfaŋ lɛ, nyɛmimɛi anɔkwafoi  pii kɛ afii abɔ etee nɔ amɛshiɛ yɛ amɛshikpɔŋkukuji lɛ amli, tsɛ mɛi booo amɛ toi. Ani nakai eji yɛ bo hu ogbɛfaŋ? Belɛ, wɔmiijie oyi akɛ ofi shi ni otee nɔ oshiɛ yɛ shihilɛ ni wa nɛɛ mli. * Onɔkwɛmɔnɔ kpakpa lɛ woɔ onyɛmimɛi Kristofoi babaoo hewalɛ, ni mɛi ni kɛ afii babaoo esɔmɔ lɛ po fata he. Kpokpaa nɔkwɛlɔ ko wie akɛ: “Kɛ́ mikɛ nyɛmimɛi hii kɛ yei anɔkwafoi nɛɛ tsu nii yɛ shiɛmɔ nitsumɔ lɛ mli lɛ, amɛnɔkwɛmɔnɔ lɛ woɔ mi hewalɛ waa.” Kpokpaa nɔkwɛlɔ kroko hu wie akɛ: “Bɔ ni amɛyeɔ anɔkwa lɛ woɔ mi hewalɛ ni mafi shi ni mafee ekãa yɛ mishiɛmɔ nitsumɔ lɛ mli.” Kpokpaa nɔkwɛlɔ ko hu wie akɛ: “Amɛnɔkwɛmɔnɔ kpakpa lɛ hãa mitsui tɔɔ.”

3. Mɛɛ sanebimɔi etɛ ahe wɔbaasusu? Ni mɛni hewɔ?

3 Yɛ nikasemɔ nɛɛ mli lɛ, wɔbaasusu sanebimɔi etɛ ni nyiɛ sɛɛ nɛɛ ahe: Mɛni hewɔ bei komɛi lɛ wɔnijiaŋ jeɔ wui lɛ? Te wɔbaafee tɛŋŋ wɔwo yibii? Mɛni baaye abua wɔ ni wɔkɛ shifimɔ awo yibii? Sanebimɔi nɛɛ ahetoo lɛ baahã wɔfai shi ni wɔtswa akɛ wɔbaatsu shiɛmɔ nitsumɔ ni Yesu kɛwo wɔdɛŋ lɛ wɔgbe naa lɛ mli awa.

MƐNI HEWƆ BEI KOMƐI LƐ WƆNIJIAŊ JEƆ WUI LƐ?

4. (a) Te Paulo nu he ehã tɛŋŋ yɛ sane kpakpa lɛ toi ni Yudafoi lɛ ateŋ mɛi babaoo booo lɛ hewɔ? (b) Mɛni hewɔ Paulo nu he nakai lɛ?

4 Ani onijiaŋ eje wui pɛŋ akɛni mɛi booo sane kpakpa ni oshiɛɔ lɛ toi hewɔ? Kɛ́ nakai ni lɛ, belɛ oshihilɛ lɛ tamɔ bɔfo Paulo nɔ lɛ nɔŋŋ. Paulo kɛ aaafee afii 30 ni tsu shiɛmɔ nitsumɔ lɛ, ni enyɛ eye ebua mɛi babaoo ni amɛbatsɔmɔ Kristo kaselɔi. (Bɔf. 14:21; 2 Kor. 3:2, 3) Kɛ̃lɛ, Yudafoi ni eshiɛ etsɔɔ lɛ ateŋ mɛi pii ebatsɔmɔɔɔ Kristofoi. Yɛ nɔ najiaŋ ni amɛbaamɔ anɔkwale lɛ mli lɛ, amɛte shi amɛwo Paulo, ni amɛteŋ mɛi komɛi po wa lɛ yi. (Bɔf. 14:19; 17:1, 4, 5, 13) Te Paulo nu he ehã tɛŋŋ yɛ bɔ ni amɛfee amɛnii amɛhã lɛ hewɔ? Ewie akɛ: “Miiwie anɔkwale yɛ Kristo mli . . . miyeɔ awerɛho babaoo ni minuɔ dɔlɛ ni sɛɛ efooo he yɛ mitsui mli.” (Rom. 9:1-3) Mɛni hewɔ Yudafoi lɛ asane dɔ Paulo nakai lɛ? Ejaakɛ amɛsane kã etsui nɔ waa. Paulo sumɔɔ shiɛmɔ nitsumɔ lɛ waa, ni ekɛ etsui fɛɛ wo mli. No hewɔ lɛ, edɔ lɛ waa akɛ Yudafoi lɛ ahiɛ esɔɔɔ mɔbɔnalɛ ni Nyɔŋmɔ ejie kpo etsɔɔ amɛ lɛ.

5. (a) Mɛni hewɔ wɔshiɛɔ wɔhãa wɔkutsoŋbii lɛ? (b) Mɛni hewɔ ebɛ naakpɛɛ akɛ bei komɛi lɛ wɔnijiaŋ jeɔ wui lɛ?

5 Wɔ hu wɔshiɛɔ wɔhãa mɛi ejaakɛ amɛsane kã wɔtsui nɔ. (Mat. 22:39; 1 Kor. 11:1) Wɔmiisumɔ ni Yehowa ajɔɔ amɛ hu babaoo, tamɔ bɔ ni ejɔɔ wɔ be ni wɔkpɛ wɔyiŋ akɛ wɔbaasɔmɔ lɛ lɛ. Wɔná kulɛ wɔbaanyɛ wɔye wɔbua mɛi fɛɛ ni yɔɔ wɔshikpɔŋkuku lɛ mli lɛ ni amɛna nibii kpakpai babaoo ni miiŋmɛɛ amɛ lɛ. Enɛ hewɔ lɛ, wɔyaa nɔ wɔwoɔ amɛ hewalɛ ni amɛkase anɔkwalei ni kɔɔ Yehowa kɛ nɔ ni eto akɛ ebaafee ehã adesai lɛ he. Yɛ gbɛ ko nɔ lɛ, etamɔ nɔ ni wɔmiikɛɛ mɛi ni wɔshiɛɔ wɔhãa lɛ akɛ: ‘Wɔmiitao wɔke nyɛ nɔ ko fɛfɛo ko. Nyɛfainɛ nyɛmɔa mli.’ No hewɔ lɛ, kɛ́ amɛkpoo wɔnikeenii lɛ, ‘edɔɔ wɔ yɛ wɔtsui mli.’ Dɔ ni edɔɔ wɔ nɛɛ etsɔɔɔ akɛ wɔhemɔkɛyeli faaa. Nɔ moŋ ni etsɔɔ ji akɛ, wɔkɛ wɔtsui fɛɛ ewo shiɛmɔ nitsumɔ lɛ mli. No hewɔ lɛ, eyɛ mli akɛ bei komɛi lɛ, mɛi anifeemɔi jeɔ wɔnijiaŋ wui moŋ, shi wɔyaa nɔ wɔshiɛɔ. Nyɛmi yoo ko ni atsɛɔ lɛ Elena lɛ kɛ nɔ ni fe afii 25 esɔmɔ akɛ gbɛgbalɔ, ni nɔ ni ewie ji akɛ: “Shiɛmɔ nitsumɔ lɛ wa moŋ, shi nitsumɔ ko bɛ ni masumɔ ni matsu fe no.” Ani okɛ lɛ kpãaa gbee?

TE WƆBAAFEE TƐŊŊ WƆWO YIBII?

6. Mɛɛ sanebimɔ wɔbaahã hetoo? Ni mɛni baaye abua wɔ ni wɔhã hetoo lɛ?

6 Mɛni hewɔ wɔheɔ wɔyeɔ akɛ, ekɔɔɔ he eko shikpɔŋkuku mli ni wɔbaashiɛ yɛ lɛ, wɔbaanyɛ wɔwo yibii lɛ? Abɛbuai enyɔ komɛi ni Yesu gba lɛ baanyɛ aye abua wɔ ni wɔhã sanebimɔ nɛɛ ni  he hiaa waa lɛ hetoo. Abɛbuai enyɔ lɛ fɛɛ kɔɔ nɔ hewɔ ni esa akɛ ‘wɔwo yibii’ lɛ he. (Mat. 13:23) Klɛŋklɛŋ nɔ lɛ kɔɔ wain tso ko he.

7. (a) Yɛ Yesu abɛbua lɛ mli lɛ, namɔ ji “okwaafonyo lɛ”? Namɔ ji “wain tso lɛ”? Namɛi wain tso lɛ “niji lɛ” damɔ shi kɛhã? (b) Mɛɛ sanebimɔ ni kɔɔ abɛbua lɛ he wɔbaatao ehetoo?

7 Kanemɔ Yohane 15:1-5, 8Kadimɔ nɔ ni Yesu kɛɛ ekaselɔi lɛ. Ekɛɛ amɛ akɛ: “Enɛ ji nɔ ni woɔ mi-Tsɛ hiɛ nyam, akɛ nyɛya nɔ nyɛwo yibii babaoo ni nyɛhã ana hu akɛ nyɛji mikaselɔi.” Yesu kɛɛ Yehowa ji “okwaafonyo lɛ,” ni lɛ, Yesu lɛ, ji “anɔkwa wain tso lɛ,” ni ekaselɔi lɛ ji wain tso lɛ “niji lɛ.” * Kɛ́ nakai ni lɛ, belɛ mɛni ji yibii ni Kristo kɛɛ esa akɛ esɛɛnyiɛlɔi lɛ awo lɛ? Yesu etsɔɔɔ nɔ ni yibii lɛ ji lɛ tɛ̃ɛ yɛ abɛbua nɛɛ mli, shi ewie nɔ ko ni he hiaa waa ni baanyɛ aye abua wɔ ni wɔna nɔ ni eji.

8. (a) Mɛni hewɔ wɔbaanyɛ wɔkɛɛ akɛ yibii ni Yesu wie he yɛ abɛbua nɛɛ mli lɛ jeee kaselɔi hei? (b) Mɛni wɔle yɛ nibii fɛɛ ni Yehowa kɛɔ wɔ akɛ wɔfee lɛ ahe?

8 Yesu wie akɛ e-Tsɛ lɛ folɔɔ wain tso “nine fɛɛ nine ni wooo yibii lɛ” eshwieɔ. Ni tsɔɔ akɛ, ja wɔwo yibii dani Yehowa baabu wɔ akɛ etsuji. (Mat. 13:23; 21:43) Enɛ hãa wɔnaa faŋŋ akɛ, yibii ni Yesu wie he yɛ abɛbua nɛɛ mli akɛ esa akɛ esɛɛnyiɛlɔi fɛɛ awo lɛ jeee kaselɔi hei ni ekolɛ amɛbaaná lɛ. (Mat. 28:19) Eji nakai etsɔɔ kulɛ, Yehowa Odasefoi anɔkwafoi ni shiɛɔ yɛ hei ni mɛi booo sane lɛ toi yɛ lɛ fɛɛ tamɔ tsei niji ni wooo yibii. Ni tsɔɔ akɛ, Yehowa baafolɔ amɛ eshwie. Shi kɛ́ okwɛ lɛ, ani Yehowa baafee nakai? Dabi kwraa! Mɛni hewɔ? Ejaakɛ wɔnyɛŋ wɔnyɛ mɛi anɔ ni amɛbatsɔmɔ Yesu kaselɔi. Ni wɔle akɛ, Yehowa ebuŋ etsulɔ ko kwraa fɔ yɛ nɔ ko ni ele faŋŋ akɛ mɔ lɛ nyɛŋ afee kɔkɔɔkɔ lɛ hewɔ, ejaakɛ esumɔɔ wɔ. Yehowa ekɛŋ wɔ ni wɔfee nɔ ko ni ele akɛ wɔnyɛŋ wɔfee.​—5 Mo. 30:11-14.

9. (a) Mɛɛ nitsumɔ kɛ́ wɔtsu lɛ abaanyɛ akɛɛ akɛ wɔmiiwo yibii? (b) Mɛɛ abɛbua he wɔbaasusu, ni mɛni hewɔ?

9 Kɛ́ nakai ni lɛ, belɛ mɛni yibii lɛ damɔ shi kɛhã mɔ? Esa akɛ efee nɔ ko ni wɔteŋ mɔ fɛɛ mɔ baanyɛ afee. No hewɔ lɛ, mɛɛ nitsumɔ kɛ́ wɔtsu lɛ, abaanyɛ akɛɛ akɛ ‘wɔmiiwo yibii’? No ji Nyɔŋmɔ Maŋtsɛyeli lɛ he sane kpakpa shiɛmɔ nitsumɔ lɛ. * (Mat. 24:14) Yesu abɛbua ni kɔɔ nidulɔ lɛ he lɛ, ni ji abɛbua ni ji enyɔ ni wɔbaasusu he lɛ, hãa wɔnaa faŋŋ akɛ nakai eji.

10. (a) Yɛ Yesu abɛbua lɛ mli lɛ, mɛni dumɔwu lɛ kɛ sũ lɛ damɔ shi kɛhã? (b) Mɛɛ yibii wiiti tso woɔ?

10 Kanemɔ Luka 8:5-8, 11-15. Be ni Yesu gbalaa abɛbua ni kɔɔ nidulɔ lɛ he lɛ mli lɛ, ewie akɛ “dumɔwu lɛ ji Nyɔŋmɔ wiemɔ lɛ,” loo Maŋtsɛyeli sane lɛ. Sũ ni wui lɛ yashwie nɔ lɛ damɔ shi kɛhã mɛi atsuii. Wui ni yashwie sũ kpakpa nɔ lɛ ná shishifãi, amɛkwɛ̃kwɛ̃ɛ, ni amɛdara. Kɛkɛ ni “amɛwo yibii 100.” Kɛ́ wiiti adu lɛ, mɛɛ yibii ebaawo? Ani ebaawo wiiti tsei bibii? Dabi, moŋ lɛ ebaawo wiiti diɛŋtsɛ, kɛ́ wɔɔwie lɛ, wiiti dumɔwui ni abaanyɛ adu ni amɛbatsɔmɔ wiiti tsei. Yɛ abɛbua nɛɛ mli lɛ, dumɔwu kome ni adu lɛ wo yibii loo dumɔwui 100. Mɛni abɛbua nɛɛ tsɔɔ wɔ yɛ wɔshiɛmɔ nitsumɔ lɛ he?

Te wɔfeɔ tɛŋŋ ‘wɔkɛ shifimɔ woɔ yibii’? (Kwɛmɔ kuku 11)

11. (a) Mɛni nidulɔ lɛ he abɛbua lɛ tsɔɔ wɔ yɛ shiɛmɔ nitsumɔ lɛ he? (b) Te wɔfeɔ tɛŋŋ wɔwoɔ Maŋtsɛyeli dumɔwu hee?

11 Klɛŋklɛŋ be ni wɔfɔlɔi loo Odasefoi lɛ gba wɔ Nyɔŋmɔ Maŋtsɛyeli lɛ he sane lɛ, efee tamɔ nɔ ni amɛdu dumɔwu ko yɛ wɔtsui mli. Wɔmɔ wiemɔ lɛ mli, ni kɛ́ wɔɔwie lɛ, dumɔwu lɛ ná shishifãi ni ebɔi daa, tamɔ bɔ ni eba lɛ yɛ dumɔwu ni yagbee sũ kpakpa nɔ lɛ gbɛfaŋ lɛ. Enɛ hã amɛmii shɛ amɛhe waa. Dumɔwu ni amɛdu yɛ wɔtsui mli lɛ da kwraa ni agbɛnɛ lɛ ebɔi yibiiwoo. Shi mɛɛ yibii ewo? Ewooo kaselɔi hei, shi moŋ ewo Maŋtsɛyeli dumɔwu hee, tamɔ bɔ ni wiiti tso wooo wiiti tsei bibii, shi moŋ ewoɔ  wiiti diɛŋtsɛ lɛ. * Shi te wɔfeɔ tɛŋŋ wɔwoɔ Maŋtsɛyeli dumɔwu hee lɛ? Be fɛɛ be ni wɔbaawie Nyɔŋmɔ Maŋtsɛyeli lɛ he wɔtsɔɔ mɛi lɛ, etamɔ nɔ ni wɔmiigbɛ dumɔwu ni adu yɛ wɔtsui mli lɛ nɔŋŋ eko wɔmiishwã. (Luka 6:45; 8:1) No hewɔ lɛ, bei abɔ ni wɔyaa nɔ wɔshiɛɔ Maŋtsɛyeli lɛ he sane lɛ wɔtsɔɔ mɛi krokomɛi lɛ, ‘wɔkɛ shifimɔ miiwo yibii’ ji no.

12. (a) Mɛni wɔkaseɔ yɛ wain tso lɛ kɛ nidulɔ lɛ he abɛbuai ni Yesu gba lɛ amli? (b) Ni te enɛ hãa onuɔ he ohãa tɛŋŋ?

12 Mɛni wɔkaseɔ yɛ wain tso lɛ kɛ nidulɔ lɛ he abɛbuai ni Yesu gba lɛ amli? Nɔ ni wɔkaseɔ ji akɛ, jeee bɔ ni mɛi ni yɔɔ wɔshikpɔŋkuku lɛ mli lɛ feɔ amɛnii amɛhãa lɛ ni baatsɔɔ kɛji wɔmiiwo yibii loo wɔwooo yibii. Nɔ moŋ ni baatsɔɔ akɛ wɔmiiwo yibii ji, ni wɔbaaya nɔ wɔshiɛ. Paulo wie nɔ ko ni tamɔ nakai. Ewie akɛ: “Mɔ fɛɛ mɔ baaná lɛ diɛŋtsɛ ejweremɔnɔ yɛ lɛ diɛŋtsɛ enitsumɔ naa.” (1 Kor. 3:8) No hewɔ lɛ, nitsumɔ ni wɔtsuɔ lɛ hewɔ Yehowa baajwere wɔ, shi jeee nɔ ni jɛɔ nitsumɔ lɛ mli kɛbaa lɛ hewɔ. Nyɛmi yoo ko ni atsɛɔ lɛ Matilda ni kɛ afii 20 esɔmɔ akɛ daa gbɛgbalɔ lɛ wie akɛ: “Le ni mile akɛ Yehowa jɔɔ wɔmɔdɛŋbɔi lɛ anɔ lɛ hãa mináa miishɛɛ.”

MƐNI BAAYE ABUA WƆ NI WƆKƐ SHIFIMƆ AWO YIBII?

13, 14. Yɛ nɔ ni aŋma yɛ Romabii 10:1, 2 lɛ naa lɛ, mɛni hewɔ Paulo tee nɔ eshiɛ Maŋtsɛyeli sane lɛ etsɔɔ Yudafoi lɛ?

13 Mɛni baaye abua wɔ ni wɔkɛ shifimɔ awo yibii? Tamɔ bɔ ni wɔsusu he yɛ nikasemɔ nɛɛ shishijee lɛ, Paulo nijiaŋ je wui akɛni Yudafoi lɛ booo Maŋtsɛyeli sane lɛ toi lɛ hewɔ. Kɛ̃lɛ, etee nɔ eshiɛ etsɔɔ amɛ. Yɛ wolo ni eŋma eyahã Kristofoi ni yɔɔ Roma lɛ mli lɛ, ewie bɔ ni enuɔ he ehãa yɛ Yudafoi nɛɛ ahe lɛ he. Ewie akɛ: “Nɔ ni mitsui shweɔ kɛ fai ni mikɛ hiɛdɔɔ kpaa Nyɔŋmɔ mihãa amɛ ji akɛ, ahere amɛyiwala. Ejaakɛ miyeɔ amɛhe odase akɛ amɛhiɛ dɔɔ yɛ Nyɔŋmɔ he moŋ, shi jeee yɛ nilee krɔŋŋ naa.” (Rom. 10:1, 2) Mɛni hewɔ Paulo tee nɔ eshiɛ etsɔɔ amɛ lɛ?

14 Klɛŋklɛŋ lɛ, Paulo tee nɔ eshiɛ etsɔɔ Yudafoi lɛ ejaakɛ ‘etsui shwe’ waa akɛ ahere  amɛteŋ mɛi komɛi kɛ̃ ayiwala. (Rom. 11:13, 14) Nɔ ni ji enyɔ lɛ, Paulo wie akɛ ‘ekɛ hiɛdɔɔ kpa Nyɔŋmɔ fai ehã amɛ.’ Paulo sɔle ekpa Nyɔŋmɔ fai ni eye ebua Yudafoi lɛ, jeee maŋ muu lɛ fɛɛ, shi moŋ aŋkroaŋkroi ni yɔɔ mli lɛ, ní amɛbo Maŋtsɛyeli sane lɛ toi. Nɔ ni ji etɛ lɛ, Paulo wie akɛ: “Amɛhiɛ dɔɔ yɛ Nyɔŋmɔ he.” Ena akɛ gbɔmɛi kpakpai ji amɛ, ni akɛ amɛbaanyɛ amɛbasɔmɔ Yehowa. Paulo na akɛ, kɛ́ aye abua Yudafoi nɛɛ, bɔ ni amɛhiɛ dɔɔ yɛ amɛjamɔ lɛ he lɛ, nakai nɔŋŋ amɛkɛ hiɛdɔɔ baasɔmɔ akɛ Kristo sɛɛnyiɛlɔi, tamɔ bɔ ni eba lɛ yɛ egbɛfaŋ lɛ.

15. Te wɔbaafee tɛŋŋ wɔkase Paulo? Okɛ enɛ he nɔkwɛmɔnii ahã.

15 Te wɔbaafee tɛŋŋ wɔkase Paulo? Klɛŋklɛŋ lɛ, esa akɛ wɔshwe waa yɛ wɔtsui mli akɛ wɔbaatao “mɛi fɛɛ ni yɔɔ anɔkwale lɛ ni baanyɛ ahã amɛná naanɔ wala lɛ he tsui kpakpa lɛ.” Nɔ ni ji enyɔ lɛ, esa akɛ wɔkɛ hiɛdɔɔ akpa Yehowa fai ni eye ebua mɛi ni hiɛ tsui kpakpa lɛ koni amɛbo wɔ toi. (Bɔf. 13:48; 16:14) Nyɛmi yoo ko ni atsɛɔ lɛ Silvana, ni kɛ nɔ ni miihe ashɛ afii 30 esɔmɔ akɛ gbɛgbalɔ lɛ wie akɛ: “Dani maya shĩa ko mli yɛ mishikpɔŋkuku lɛ mli lɛ, misɔleɔ mibiɔ Yehowa koni eye ebua mi ni maná mɛi lɛ ahe jwɛŋmɔ kpakpa.” Agbɛnɛ hu, wɔsɔleɔ wɔhãa Yehowa koni ehã ebɔfoi lɛ atsɔɔ wɔ gbɛ kɛya mɛi ni hiɛ tsui kpakpa lɛ aŋɔɔ. (Mat. 10:11-13; Kpo. 14:6) Nyɛmi nuu ko ni atsɛɔ lɛ Robert, ni kɛ nɔ ni fe afii 30 esɔmɔ akɛ gbɛgbalɔ lɛ wie akɛ: “Eyɛ miishɛɛ waa akɛ wɔkɛ ŋwɛibɔfoi lɛ efee ekome kɛmiitsu nii, ejaakɛ amɛle nɔ ni yaa nɔ yɛ shĩatsɛmɛi lɛ ashihilɛ mli.” Nɔ ni ji etɛ lɛ, esa akɛ wɔbɔ mɔdɛŋ ni wɔkɛ wɔjwɛŋmɔ ama mɛi lɛ asui kpakpai lɛ anɔ, ni wɔna amɛ akɛ mɛi ni baanyɛ abasɔmɔ Yehowa. Nyɛmi nuu asafoŋ onukpa ko ni atsɛɔ lɛ Carl, ni abaptisi lɛ nɔ ni fe afii 50 ni eho nɛ lɛ wie akɛ: “Mikwɛɔ akɛ mana nɔ ko bibioo po ni tsɔɔ akɛ mɔ lɛ yɛ tsui kpakpa. Ani efee ehiɛ ŋmɔlɔŋmɔlɔ, ani etse ehiɛ ehã mi, ani ebi sane ko ni tsɔɔ akɛ eesumɔ ni enu nibii ashishi?” Kɛ́ wɔfee nibii nɛɛ, wɔbaaya nɔ wɔwo yibii tamɔ Paulo fee lɛ.

“KAAJIE ONINE YƐ HE”

16, 17. (a) Mɛni wɔkaseɔ yɛ ŋmalɛ ni yɔɔ Jajelɔ 11:6 lɛ mli? (b) Mɛɛ gbɛ nɔ wɔshiɛmɔ nitsumɔ lɛ baanyɛ aná mɛi ni naa wɔ lɛ anɔ hewalɛ?

16 Esaaa akɛ wɔhiɛ kpaa nɔ kɔkɔɔkɔ akɛ, kɛ́ efee tamɔ nɔ ni mɛi booo sane lɛ toi po lɛ, wɔshiɛmɔ nitsumɔ lɛ baanyɛ aná mɛi anɔ hewalɛ. (Kanemɔ Jajelɔ 11:6.) Eyɛ mli akɛ mɛi babaoo booo wɔ toi moŋ, shi amɛnaa wɔ. Amɛnaa bɔ ni wɔsaa wɔhe jogbaŋŋ, bɔ ni wɔjieɔ bulɛ kpo wɔtsɔɔ mɛi, kɛ bɔ ni wɔtseɔ wɔhiɛ wɔhãa mɔ fɛɛ mɔ lɛ. Enɛ baanyɛ aná amɛteŋ mɛi komɛi anɔ hewalɛ waa, ni ekolɛ no baanyɛ ahã amɛtsake jwɛŋmɔ ni ejaaa ni amɛhiɛ yɛ wɔhe lɛ. Sergio kɛ Olinda ni wɔtsĩ amɛtã yɛ nikasemɔ nɛɛ shishijee lɛ ná niiashikpamɔ ko ni tsɔɔ nakai.

17 Sergio wie akɛ: “Be ko lɛ, hela bamɔ wɔ, ni no hewɔ lɛ wɔnyɛɛɛ wɔya maŋ lɛ mli. Be ni ebahi fioo ni wɔbɔi yaa ekoŋŋ lɛ, mɛi ni tsɔɔ jɛmɛ kɛhoɔ lɛ bi wɔ akɛ, ‘Mɛni ba ni wɔna nyɛ etsɛ nɛkɛ?’” Olinda ŋmɔ fioo ni ewie akɛ: “Tsɔne kudɔlɔi lɛ fɔ̃ wɔ nine, ni amɛteŋ mɛi komɛi bolɔ kɛjɛ amɛtsɔji lɛ amli amɛkɛɛ, ‘Aanyɛkoo!’ Mɛi komɛi po bi wɔ ni wɔhã amɛ wɔmagazin lɛ eko.” Mɔ ko po fee nɔ ko ni hã Sergio kɛ Olinda naa kpɛ amɛhe waa. Mɔ lɛ ba amɛŋɔɔ yɛ odaseyeli shwiili lɛ he ebahã amɛ fɔfɔi, ni eda amɛ shi yɛ nitsumɔ kpakpa ni amɛtsuɔ lɛ hewɔ.

18. Mɛni hewɔ otswa ofai shi akɛ ‘okɛ shifimɔ baawo yibii’ lɛ?

18 Kɛ́ wɔtee nɔ wɔgba mɛi Nyɔŋmɔ Maŋtsɛyeli lɛ he sane, ni ‘wɔjieee wɔnine’ yɛ shiɛmɔ nitsumɔ lɛ he lɛ, belɛ wɔmiitsu nɔ ko ni he hiaa waa kɛmiiye wɔmiibua ni ‘aye jeŋmaji lɛ fɛɛ odase.’ (Mat. 24:14) Nɔ ni fe fɛɛ lɛ, wɔtsui baanyɔ wɔmli waa, ejaakɛ wɔle akɛ Yehowa náa nɔ ni wɔfeɔ lɛ he miishɛɛ. Anɔkwa, esumɔɔ mɛi fɛɛ ni kɛ “shifimɔ woɔ yibii” lɛ!

^ kk. 2 Tamɔ bɔ ni aŋma yɛ Sanekpakpai ejwɛ lɛ fɛɛ amli lɛ, Yesu diɛŋtsɛ po náaa lɛ mlɛo akɛ ebaashiɛ yɛ emaŋ lɛ mli.​—Mat. 13:57; Mar. 6:4; Luka 4:24; Yoh. 4:44.

^ kk. 7 Eyɛ mli akɛ yɛ abɛbua nɛɛ mli lɛ, tso lɛ niji lɛ damɔ shi kɛhã mɛi ni afɔ amɛ mu lɛ moŋ, shi nibii ni wɔkaseɔ yɛ abɛbua lɛ mli lɛ baanyɛ aye abua wɔ fɛɛ.

^ kk. 9 Eyɛ mli akɛ ‘yibii ni mumɔ lɛ hãa awoɔ’ lɛ fata yibii ni esa akɛ Kristofoi awo lɛ ahe moŋ, shi yɛ nikasemɔ nɛɛ kɛ nɔ ni nyiɛ sɛɛ lɛ mli lɛ, wɔbaawie “wɔnaabui lɛ ayibii” lɛ loo Maŋtsɛyeli shiɛmɔ nitsumɔ lɛ he.​—Gal. 5:22, 23; Heb. 13:15.

^ kk. 11 Bei komɛi lɛ, Yesu kɛ nɔkwɛmɔnii ni kɔɔ nidumɔ kɛ nikpamɔ he lɛ tsuɔ nii kɛ́ eewie kaselɔfeemɔ nitsumɔ lɛ he.​—Mat. 9:37; Yoh. 4:35-38.