Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) MAY 2016

“Nyɛyaa Nyɛyafea Mɛi ni Jɛ Jeŋmaji lɛ Fɛɛ Mli lɛ Kaselɔi”

“Nyɛyaa Nyɛyafea Mɛi ni Jɛ Jeŋmaji lɛ Fɛɛ Mli lɛ Kaselɔi”

“Nyɛyaa nyɛyafea mɛi ni jɛ jeŋmaji lɛ fɛɛ mli lɛ kaselɔi, nyɛbaptisia amɛ . . . , nyɛtsɔa amɛ ni amɛye nii fiaa ni mifã nyɛ lɛ nɔ.”MATEO 28:19, 20.

LALAI: 141, 97

1, 2. Mɛni Yesu wie yɛ Mateo 24:14? Ni mɛɛ saji enɛ hãa wɔbiɔ?

YESU gba akɛ, yɛ naagbee gbii lɛ amli lɛ, abaashiɛ Maŋtsɛyeli lɛ he sane kpakpa lɛ yɛ shikpɔŋ lɛ nɔ fɛɛ. (Mateo 24:14) Akɛ Yehowa Odasefoi lɛ, nɔ kome ni akɛle wɔ waa yɛ jeŋ fɛɛ ji shiɛmɔ nitsumɔ lɛ. Mɛi komɛi nyaa sane ni wɔshiɛɔ lɛ he. Mɛi komɛi hu nyaaa he. Shi mɛi ni nyaaa he lɛ tete po kpɛlɛɔ nɔ akɛ wɔmiitsu nitsumɔ kpakpa. Wɔ diɛŋtsɛ hu wɔshiɔ wɔtsitsi akɛ wɔ ji mɛi ni tsuɔ nitsumɔ ni Yesu gba akɛ abaatsu lɛ. Ani nakai eji lɛɛlɛŋ? Mɛni hewɔ wɔbaanyɛ wɔná nɔmimaa akɛ nitsumɔ ni wɔtsuɔ lɛ ji nitsumɔ ni Yesu gba akɛ abaatsu yɛ wɔbeiaŋ lɛ?

2 Jamɔi pii kɛɔ akɛ amɛmiishiɛ sane kpakpa lɛ. Shi amɛteŋ mɛi babaoo yɛ ni he pɛ ni amɛshiɛɔ yɛ ji, yɛ sɔlemɔtsũi amli, TV nɔ, loo Intanɛt lɛ nɔ. Yɛ jamɔi krokomɛi agbɛfaŋ lɛ, nɔ pɛ ni amɛmli bii lɛ feɔ ji, amɛgbaa mɛi bɔ ni fee ni amɛbale Yesu. Jamɔi komɛi hu susuɔ akɛ, kɛ́ amɛmamɔ helatsamɔhei kɛ skul tsũi, amɛye amɛbua mɛi ni ehia amɛ, loo amɛfee mɛi  ejurɔ lɛ, belɛ shiɛmɔ nɔŋŋ amɛshiɛɔ lɛ. Shi kɛ́ jamɔ ko fee nibii nɛɛ, ani shiɛmɔ nitsumɔ ni Yesu gba akɛ abaatsu lɛ nɔŋŋ etsuɔ lɛ?

3. Yɛ famɔ ni Yesu kɛhã yɛ Mateo 28:19, 20 lɛ naa, mɛɛ nibii ejwɛ ekpaa gbɛ akɛ esɛɛnyiɛlɔi lɛ baafee?

3 Be ni Yesu kɛɛ ekaselɔi lɛ ni amɛyashiɛ lɛ, ani no mli lɛ eetsɔɔ akɛ amɛta shi ni mɛi aba amɛŋɔɔ? Dabi! Be ni atee lɛ shi lɛ, ekɛɛ esɛɛnyiɛlɔi ohai abɔ akɛ: “Nyɛyaa nyɛyafea mɛi ni jɛ jeŋmaji lɛ fɛɛ mli lɛ kaselɔi, nyɛbaptisia amɛ . . . , nyɛtsɔa amɛ ni amɛye nii fiaa ni mifã nyɛ lɛ nɔ.” (Mateo 28:19, 20) No hewɔ lɛ, Yesu miikpa gbɛ akɛ, esɛɛnyiɛlɔi lɛ baafee nibii ejwɛ komɛi. Klɛŋklɛŋ lɛ, amɛbaaya mɛi aŋɔɔ. No sɛɛ lɛ, amɛbaafee amɛ kaselɔi, amɛbaptisi amɛ, ni amɛtsɔɔ amɛ nii. Biblia mli nilelɔ ko wie akɛ, esa akɛ héyelilɔ fɛɛ héyelilɔ ‘aya’ ni eyashiɛ, kɛ́ yɛ ekutso lɛ mli jio, shɔŋŋ jio.Mateo 10:7; Luka 10:3.

4. Be ni Yesu kɛɛ ekaselɔi lɛ akɛ ebaafee amɛ “wolɛi ni baahɛ gbɔmɛi” lɛ, no mli lɛ, mɛni etsɔɔ lɛ?

4 Ani Yesu miikpa gbɛ akɛ esɛɛnyiɛlɔi lɛ ateŋ mɔ fɛɛ mɔ baate shi kɛkɛ ni eyashiɛ? Aloo eetao ni ato amɛhe gbɛjianɔ jogbaŋŋ dani amɛyashiɛ? Mɔ kome pɛ nyɛŋ eshiɛ etsɔɔ “jeŋmaji lɛ fɛɛ,” no hewɔ lɛ, esa akɛ ato Yesu kaselɔi lɛ ahe gbɛjianɔ akɛ kuu. Enɛ ji nɔ ni Yesu tsɔɔ be ni ekɛɛ ekaselɔi lɛ akɛ ebaafee amɛ “wolɛi ni baahɛ gbɔmɛi” lɛ. (Kanemɔ Mateo 4:18-22.) Jeee wolɛɛnyo ko ni efɔ̃ ekpãa kɛ kpoŋ ni eemɛ koni loo ko abakɔ lɛ he Yesu wieɔ lɛ. Moŋ lɛ, eewie wolɛi pii ni kɛ yaa miihɛ loo lɛ he. Enɛ jeee nitsumɔ bibioo, no hewɔ lɛ, esa akɛ wolɛi lɛ ato nibii ahe gbɛjianɔ jogbaŋŋ, ni amɛfee ekome.Luka 5:1-11.

5. Mɛɛ sanebimɔi ejwɛ ehe miihia ni wɔle amɛhetoo? Ni mɛni hewɔ?

5 Ja wɔle sanebimɔi ejwɛ ni nyiɛ sɛɛ nɛɛ ahetoo dani wɔbaanyɛ wɔle mɛi ni miishiɛ sane kpakpa lɛ ŋmɛnɛ:

  • Mɛɛ sane Yesu kɛɛ esɛɛnyiɛlɔi lɛ baashiɛ?

  • Mɛɛ yiŋtoo hewɔ amɛbaashiɛ?

  • Mɛɛ gbɛi anɔ amɛbaatsɔ amɛshiɛ?

  • Nɛgbɛ abaatsu shiɛmɔ nitsumɔ lɛ yɛ, ni be enyiɛ akɛbaatsu?

Kɛ́ wɔle sanebimɔi nɛɛ ahetoi lɛ, ebaahã wɔna mɛi ni miitsu yiwalaheremɔ nitsumɔ nɛɛ, ni ebaahã wɔfai shi ni wɔtswa akɛ wɔbaaya nɔ wɔshiɛ lɛ mli awa.1 Timoteo 4:16.

MƐƐ SANE YESU KƐƐ ESƐƐNYIƐLƆI LƐ BAASHIƐ?

6. Mɛni hewɔ obaanyɛ oná nɔmimaa akɛ, sane ni Yehowa Odasefoi shiɛɔ lɛ ji sane ni Yesu kɛɛ ashiɛ lɛ?

6 Kanemɔ Luka 4:43. Yesu shiɛ “Maŋtsɛyeli lɛ he sane kpakpa lɛ,” ni eesumɔ ni ekaselɔi lɛ hu ashiɛ nakai sane lɛ nɔŋŋ. Mɛɛ jamɔ mli bii shiɛɔ nakai sane lɛ amɛhãa mɛi fɛɛ? Yehowa Odasefoi pɛ! Mɛi ni sumɔɔɔ wɔsane lɛ ateŋ mɛi komɛi po  kpɛlɛɔ nɔ nakai. Akɛ nɔkwɛmɔnɔ lɛ, be ko lɛ, osɔfo ko ni ehi maji srɔtoisrɔtoi anɔ lɛ kɛ Yehowa Odasefonyo ko kpe. Ekɛɛ lɛ akɛ, yɛ maji srɔtoi ni etee nɔ lɛ eko fɛɛ eko mli lɛ, ebiɔ Yehowa Odasefoi ni yɔɔ jɛmɛ lɛ nɔ sane ni amɛshiɛɔ. Osɔfo lɛ kɛɛ akɛ: “Akɛni amɛ fɛɛ lɛ, kwashiai ji amɛ hewɔ lɛ, amɛhãa mi hetoo kome too lɛ nɔŋŋ, akɛ: ‘Maŋtsɛyeli lɛ he sane kpakpa lɛ.’” Nɔ ni Odasefoi lɛ kɛɛ osɔfo lɛ etsɔɔɔ akɛ kwashiai ji amɛ. Moŋ lɛ, etsɔɔ akɛ, Odasefoi lɛ ji anɔkwa Kristofoi, ni amɛfee ekome. (1 Korintobii 1:10) Nyɔŋmɔ Maŋtsɛyeli lɛ ji sane titri ni Buu-MɔɔEetswa Yehowa Maŋtsɛyeli He Adafi magazin lɛ wieɔ he. Atsɔɔ magazin nɛɛ shishi kɛtee wiemɔi 253 amli, ni akalaa nɔ ni miihe ashɛ 59,000,000 daa nyɔɔŋ nɔ, no hewɔ lɛ, no ji magazin ni ajaa fe fɛɛ yɛ je lɛ mli!

Yehowa Odasefoi pɛ ji mɛi ni shiɛɔ Nyɔŋmɔ Maŋtsɛyeli lɛ he sane kpakpa lɛ

7. Te wɔfeɔ tɛŋŋ wɔleɔ akɛ, jeee sane ni Yesu kɛɛ ashiɛ lɛ Kristendom osɔfoi lɛ shiɛɔ lɛ?

7 Kristendom osɔfoi lɛ eshiɛɛɛ Nyɔŋmɔ Maŋtsɛyeli lɛ he sane kpakpa lɛ. Ni kɛ́ amɛmiiwie Maŋtsɛyeli lɛ he po lɛ, amɛkɛɔ akɛ eji nɔ ko ni yɔɔ mɛi atsui mli. (Luka 17:21) Amɛtsɔɔɔ mɛi akɛ Maŋtsɛyeli lɛ ji nɔyeli ko ni yɔɔ ŋwɛi, ni akɛ Yesu ji enɔ maŋtsɛ. Moŋ lɛ, ja Blonya loo Easter eshɛ dani amɛwieɔ Yesu he. Amɛhãaa mɛi ale akɛ, Maŋtsɛyeli lɛ baatsu adesai anaagbai fɛɛ he nii, ni etsɛŋ ebaahã efɔŋfeemɔ fɛɛ sɛɛ afo yɛ shikpɔŋ lɛ nɔ. (Kpojiemɔ 19:11-21) Eyɛ faŋŋ akɛ, Kristendom osɔfoi lɛ leee nɔ ni Nyɔŋmɔ Maŋtsɛyeli lɛ nɔ Maŋtsɛ ni ji Yesu lɛ baafee ehã adesai. Ni akɛni amɛleee nɔ sane ni Yesu kɛɛ ashiɛ lɛ hewɔ lɛ, amɛnaaa nɔ hewɔ ni esa akɛ amɛshiɛ.

MƐƐ YIŊTOO HEWƆ AMƐBAASHIƐ?

8. Mɛɛ yiŋtoo ni ejaaa hewɔ Kristendombii lɛ ekomɛi shiɛɔ?

8 Esaaa akɛ Yesu kaselɔi lɛ shiɛɔ yɛ shika ni amɛtaoɔ amɛná loo sɔlemɔtsũi wujiwuji ni amɛtaoɔ amɛmamɔ lɛ hewɔ. Yesu wie akɛ: “Yaka nyɛná, yaka nyɛŋɔhãa.” (Mateo 10:8) No hewɔ lɛ, esaaa akɛ akɛ shiɛmɔ nitsumɔ lɛ yeɔ jara. (2 Korintobii 2:17) Esaaa akɛ Yesu kaselɔi lɛ kpaa gbɛ loo amɛbiɔ ni awo amɛ nyɔmɔ yɛ amɛshiɛmɔ nitsumɔ lɛ hewɔ. (Kanemɔ Bɔfoi 20:33-35.) Yɛ gbɛtsɔɔmɔ ni yɔɔ faŋŋ ni Yesu kɛhã nɛɛ fɛɛ sɛɛ lɛ, sɔlemɔi babaoo heɔ mɛi shika, koni amɛkɛkura amɛsɔlemɔtsũi lɛ, ni amɛkɛwo amɛsɔfoi lɛ kɛ mɛi krokomɛi ni tsuɔ nii yɛ sɔlemɔ lɛ mli lɛ nyɔmɔ. Enɛ hewɔ lɛ, Kristendom hiɛnyiɛlɔi lɛ ateŋ mɛi babaoo ená nii kpɔtɔɔ.Kpojiemɔ 17:4, 5.

Esaaa akɛ akɛ shiɛmɔ nitsumɔ lɛ yeɔ jara

9. Mɛni Yehowa Odasefoi feɔ kɛtsɔɔ akɛ, yiŋtoo kpakpa hewɔ amɛtsuɔ shiɛmɔ nitsumɔ lɛ?

9 Ani Yehowa Odasefoi heɔ shika yɛ amɛsafoŋ kpeei loo kpeei wuji ashishi? Dabi! Mɛi jɛɔ amɛsuɔmɔ mli amɛtsuɔ onia kɛfiɔ amɛnitsumɔ lɛ sɛɛ. (2 Korintobii 9:7) Awooo amɛ nyɔmɔ yɛ shiɛmɔ ni amɛshiɛɔ lɛ hewɔ, ni kɛ̃lɛ, amɛyɛ he miishɛɛ akɛ amɛkɛ amɛ diɛŋtsɛ amɛshika baatsu nitsumɔ nɛɛ. Nyɛsɛɛ afi lɛ, Yehowa Odasefoi lɛ kɛ nɔ ni miihe ashɛ ŋmɛlɛtswai akpekpe toi akpei enyɔ shiɛ  sane kpakpa lɛ, ni amɛfee Biblia mli nikasemɔi ni fa fe akpekpei nɛɛhu daa nyɔɔŋ nɔ. Niiamlitaolɔ ko wie yɛ nitsumɔ ni Yehowa Odasefoi lɛ tsuɔ lɛ he akɛ: “Oti titri ni ma amɛhiɛ ji, ni amɛshiɛ ni amɛtsɔɔ nii.” Ewie hu akɛ, Yehowa Odasefoi lɛ bɛ osɔfoi ní amɛmiiwo amɛ nyɔmɔ. Kɛjeee shika hewɔ wɔshiɛɔ lɛ, belɛ mɛni hewɔ wɔshiɛɔ mɔ? Wɔsumɔɔ Yehowa, ni wɔsumɔɔ gbɔmɛi hu, no hewɔ wɔjɛɔ wɔsuɔmɔ mli wɔshiɛɔ lɛ. Enɛ hãa gbalɛ ni yɔɔ Lala 110:3 lɛ baa mli. (Kanemɔ.)

MƐƐ GBƐI ANƆ AMƐBAATSƆ AMƐSHIƐ?

Wɔshiɛɔ yɛ he fɛɛ he ni wɔbaana mɛi yɛ (Kwɛmɔ kuku 10)

10. Mɛɛ gbɛi anɔ Yesu kɛ ekaselɔi lɛ tsɔ amɛshiɛ?

10 Mɛɛ gbɛi anɔ Yesu kɛ ekaselɔi lɛ tsɔ amɛshiɛ? Amɛtee amɛyashiɛ yɛ he fɛɛ he ni amɛbaana gbɔmɛi yɛ. Akɛ nɔkwɛmɔnɔ lɛ, amɛshiɛ yɛ gbɛjegbɛi ahe kɛ jaji anɔ. Shi kɛfata he lɛ, amɛyatao mɛi yɛ shĩai amli hu. (Mateo 10:11; Luka 8:1; Bɔfoi 5:42; 20:20) Gbɛjianɔ ni amɛto akɛ amɛbaaya shĩa fɛɛ shĩa lɛ, hã amɛnine shɛ gbɔmɛi srɔtoi fɛɛ nɔ.

11, 12. Mɛni hãa esoroɔ shiɛmɔ ni Kristendom sɔlemɔi lɛ shiɛɔ lɛ yɛ sane kpakpa jajemɔ nitsumɔ ni Yehowa webii lɛ tsuɔ lɛ he?

11 Ani Kristendom sɔlemɔi lɛ shiɛɔ sane kpakpa lɛ taakɛ Yesu fee lɛ? Bei pii lɛ, osɔfoi lɛ ni awoɔ amɛ nyɔmɔ lɛ ji mɛi ni shiɛɔ amɛhãa sɔlemɔbii lɛ. Osɔfoi nɛɛ shiɛɔ amɛhãa amɛsɔlemɔbii lɛ pɛ, ni amɛfeɔ nɔ fɛɛ nɔ ni amɛbaanyɛ koni amɛsɔlemɔbii lɛ akashi kɛtee sɔlemɔ kroko. Shi amɛyafeee mɛi krokomɛi kaselɔi. Bei komɛi lɛ, amɛwoɔ amɛsɔlemɔbii lɛ  hewalɛ ni amɛshiɛ. Akɛ nɔkwɛmɔnɔ lɛ, yɛ afi 2001 lɛ, Paapa John Paul II ŋma wolo ko eyahã esɔlemɔbii lɛ, ni ekɛwo amɛ hewalɛ ni amɛshiɛ Sanekpakpa lɛ. Ekɛɛ amɛ akɛ: “Esa akɛ wɔkɛ ekãa atsu shiɛmɔ nitsumɔ lɛ taakɛ bɔfo Paulo fee lɛ. Bɔfo Paulo wie akɛ: ‘Kɛ́ mishiɛɛɛ Sanekpakpa lɛ, kpoo hã mi.’” Paapa lɛ wie kɛfata he akɛ, esaaa akɛ mɛi fioo komɛi ni atsɔse amɛ lɛ pɛ tsuɔ shiɛmɔ nitsumɔ lɛ, moŋ lɛ esa akɛ sɔlemɔbii lɛ fɛɛ ashiɛ. Shi mɛi enyiɛ po ebo eŋaawoo lɛ toi?

12 Ni Yehowa Odasefoi hu? Amɛ pɛ ji mɛi ni shiɛɔ akɛ awo Yesu Maŋtsɛ yɛ afi 1914. Amɛboɔ Yesu toi, ni no hewɔ lɛ, shiɛmɔ nitsumɔ lɛ ji nitsumɔ ni he hiaa fe fɛɛ yɛ amɛshihilɛ mli. (Marko 13:10) Wolo ko (Pillars of Faith—American Congregations and Their Partners) wie akɛ, Yehowa Odasefoi buɔ shiɛmɔ nitsumɔ lɛ akɛ nitsumɔ ko ni he hiaa waa. Ekɛfata he akɛ, kɛ́ amɛna mɛi ni hɔmɔ miiye amɛ, mɛi ni he efee shoo, aloo mɛi ni hela emɔ amɛ lɛ, amɛbɔɔ mɔdɛŋ amɛyeɔ amɛbuaa amɛ. Shi be fɛɛ be lɛ, amɛhãa ehiɔ amɛjwɛŋmɔ mli akɛ, oti titri ni ma amɛhiɛ ji, ni amɛhã mɛi ale akɛ jeŋ nɛɛ miiba enaagbee, ni amɛtsɔɔ amɛ nɔ ni esa akɛ amɛfee koni ahere amɛyiwala. Yehowa Odasefoi kã he amɛmiishiɛ sane nɛɛ, ni gbɛi ni Yesu kɛ ekaselɔi lɛ kɛtsu nii lɛ, no nɔŋŋ amɛ hu amɛkɛtsuɔ nii.

NƐGBƐ ABAATSU SHIƐMƆ NITSUMƆ LƐ YƐ, NI BE ENYIƐ AKƐBAATSU?

13. Nɛgbɛ abaashiɛ sane kpakpa lɛ yɛ?

13 Yesu wie akɛ, esɛɛnyiɛlɔi lɛ baashiɛ sane kpakpa lɛ ní amɛtsɔɔ mɛi nii “yɛ shikpɔŋ lɛ nɔ fɛɛ.” Efã amɛ ni amɛfee “mɛi ni jɛ jeŋmaji lɛ fɛɛ mli lɛ kaselɔi.” (Mateo 24:14; 28:19, 20) Enɛ tsɔɔ akɛ, ehe baahia ni ashiɛ sane kpakpa lɛ yɛ jeŋ fɛɛ.

14, 15. Mɛni tsɔɔ akɛ Yehowa Odasefoi eshiɛ kɛkpele jeŋ fɛɛ, taakɛ Yesu gba lɛ? (Kwɛmɔ mfonirii ni yɔɔ nikasemɔ lɛ shishijee lɛ.)

14 Yehowa Odasefoi pɛ ji mɛi ni ehã Yesu gbalɛ akɛ abaashiɛ sane kpakpa lɛ yɛ je lɛŋ fɛɛ lɛ eba mli. Mɛni hewɔ wɔkɛɔ nakai? Yɛ United States lɛ, ayɛ Kristendom osɔfoi hii kɛ yei aaafee 600,000, shi ayɛ Yehowa Odasefoi aaafee 1,200,000 ní miishiɛ sane kpakpa lɛ yɛ jɛmɛ. Yɛ je lɛŋ fɛɛ lɛ, ayɛ Katolik osɔfoi aaafee 400,000, shi Yehowa Odasefoi fe 8,000,000 miishiɛ sane kpakpa lɛ yɛ maji 240 amli. Eyɛ faŋŋ akɛ, Yehowa Odasefoi ji mɛi ni shiɛɔ sane kpakpa lɛ yɛ jeŋ fɛɛ, ni amɛtsɔɔ enɛ nɔ amɛjieɔ Yehowa yi, ni amɛwoɔ ehiɛ nyam!Lala 34:2; 51:17.

15 Oti ni ma wɔhiɛ akɛ Yehowa Odasefoi ji, ni wɔshiɛ sane kpakpa lɛ wɔhã mɛi babaoo dani naagbee lɛ aba. Enɛ hewɔ lɛ, wɔtsɔɔ woji, magazin, tratii, kɛ kpeei wuji kɛ Kaimɔ lɛ he ninefɔɔ woji ashishi kɛtee wiemɔi fe 700 amli, ni wɔkala akpekpei abɔ. Wɔkɛ woji lɛ hãa mɛi ni wɔheee amɛ shika ko. Nyɛsɛɛ afi lɛ pɛ lɛ, wɔkala Biblia kasemɔ woji aaafee akpekpe toi akpei ejwɛ, akpekpei ohai enumɔ. Agbɛnɛ hu, wɔtsɔɔ Ŋmalɛi Krɔŋkrɔŋi—Jeŋ Hee Shishitsɔɔmɔ lɛ shishi kɛtee wiemɔi fe 130 amli, ni wɔkala nɔ ni fe akpekpei 200. Wɔwɛbsaiti lɛ hu yɛ wiemɔi fe 750 amli. Yehowa Odasefoi pɛ ji mɛi ni tsuɔ nitsumɔ ni tamɔ nɛkɛ.

16. Mɛni hãa wɔnaa akɛ Nyɔŋmɔ mumɔ lɛ yɛ Yehowa Odasefoi lɛ anɔ?

16 Be enyiɛ akɛbaatsu shiɛmɔ nitsumɔ lɛ? Yesu wie akɛ, abaashiɛ sane kpakpa lɛ  kɛyashi naagbee lɛ baaba. Yɛ naagbee gbii nɛɛ amli fɛɛ lɛ, Yehowa Odasefoi enyɛ amɛtsu shiɛmɔ nitsumɔ lɛ, ejaakɛ Yehowa mumɔ krɔŋkrɔŋ lɛ yɛ amɛnɔ. (Bɔfoi 1:8; 1 Petro 4:14) Ekolɛ, jamɔi krokomɛi amli bii baakɛɛ akɛ amɛ hu amɛyɛ mumɔ krɔŋkrɔŋ lɛ. Shi, ani amɛmiinyɛ amɛmiitsu shiɛmɔ nitsumɔ lɛ yɛ naagbee gbii nɛɛ amli, tamɔ bɔ ni Yehowa Odasefoi feɔ lɛ? Jamɔi komɛi eka akɛ amɛbaashiɛ tamɔ bɔ ni wɔfeɔ lɛ, shi amɛnyɛɛɛ. Mɛi komɛi hu shiɛɔ be kukuoo ko pɛ. Ni mɛi komɛi hu yaa shĩa fɛɛ shĩa, shi kɛ́ amɛtee lɛ, jeee Maŋtsɛyeli lɛ he sane kpakpa lɛ amɛyashiɛɔ. No hewɔ lɛ, eyɛ faŋŋ akɛ, jeee nitsumɔ ni Yesu baje shishi lɛ amɛtsuɔ lɛ.

NAMƐI JI MƐI NI SHIƐƆ SANE KPAKPA LƐ ŊMƐNƐ?

17, 18. (a) Mɛni hewɔ wɔbaanyɛ wɔkɛɛ kɛ nɔmimaa akɛ, ŋmɛnɛ lɛ, Yehowa Odasefoi ji mɛi ni shiɛɔ Maŋtsɛyeli lɛ he sane kpakpa lɛ? (b) Te wɔfeɔ tɛŋŋ wɔtsuɔ shiɛmɔ nitsumɔ lɛ?

17 No hewɔ lɛ, ŋmɛnɛ lɛ, namɛi shiɛɔ Maŋtsɛyeli lɛ he sane kpakpa lɛ? Yehowa Odasefoi pɛ! Mɛni hewɔ? Ejaakɛ wɔ wɔshiɛɔ Maŋtsɛyeli lɛ he sane kpakpa lɛ, ni no ji sane ni Yesu kɛɛ abaashiɛ lɛ. Wɔyaa mɛi aŋɔɔ wɔyashiɛɔ, ni no ji gbɛ ni Yesu kɛɛ abaatsɔ nɔ ashiɛ. Wɔsumɔɔ Yehowa kɛ wɔnaanyo gbɔmɔ, ni no hewɔ wɔshiɛɔ lɛ. Enɛ ji yiŋtoo hewɔ ni esa akɛ ashiɛ lɛ. Wɔshiɛɔ wɔhãa mɛi yɛ wiemɔi srɔtoi fɛɛ mli, ni wɔshiɛɔ wɔhãa mɛi ni jɛ maji srɔtoi fɛɛ nɔ. Enɛ hewɔ lɛ, wɔshiɛmɔ nitsumɔ lɛ ekpele jeŋ fɛɛ. Ni wɔbaaya nɔ wɔshiɛ Maŋtsɛyeli lɛ he sane kpakpa lɛ kɛyashi naagbee lɛ baaba!

18 Kɛ́ wɔkwɛ nitsumɔ kpakpa ni Yehowa webii tsuɔ yɛ naagbee gbii nɛɛ amli, bɔ ni afee ni amɛnyɛ amɛshiɛ sane kpakpa lɛ, wɔnaa kpɛɔ wɔhe waa. Shi te wɔfeɔ tɛŋŋ wɔnyɛɔ wɔtsuɔ nitsumɔ kpele nɛɛ? Bɔfo Paulo tsɔɔ mli akɛ: “Nyɔŋmɔ ji mɔ ni kanyaa nyɛ bɔ ni sa ehiɛ, ni ehãa nyɛshweɔ, ni ehãa nyɛnáa hewalɛ ní nyɛkɛaafee hu.” (Filipibii 2:13) Nyɛhãa wɔsɔlea ni Yehowa aya nɔ awaje wɔ koni wɔya nɔ wɔshiɛ sane kpakpa lɛ kɛ wɔnyɛmɔ fɛɛ!2 Timoteo 4:5.