Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ—Nikasemɔ Nɔ  |  May 2016

Ani Biblia lɛ Miiya Nɔ Eetsake Bo?

Ani Biblia lɛ Miiya Nɔ Eetsake Bo?

“Nyɛtsakea nyɛhe kɛtsɔ nyɛjwɛŋmɔ ni nyɛbaaya nɔ nyɛtsake lɛ nɔ.”ROMABII 12:2.

LALAI: 61, 52

1-3. (a) Mɛni ji sui komɛi ni ebaanyɛ ewa kɛhã mɛi ni abaptisi amɛ lɛ po akɛ amɛbaaye nɔ? (b) Ni mɛɛ saji ekolɛ wɔbaabi wɔhe? (Kwɛmɔ mfonirii ni yɔɔ nikasemɔ lɛ shishijee lɛ.)

BE KO ni eho lɛ, Kevin shwɛɔ asɔ, eshɛreɔ sigaret, enuɔ dãa waa, ni ekɛ tsofai fɔji tsuɔ nii, ni efee nakai afii babaoo. [1] (Kwɛmɔ shishigbɛ niŋmaa ni yɔɔ sane lɛ naagbee lɛ.) Shi be ni ebɔi Yehowa he nii kasemɔ lɛ, eshwe waa akɛ etsɔ enaanyo. No hewɔ lɛ, ekpa nibii fɔji ni efeɔ lɛ. Hewalɛ ni Biblia lɛ yɔɔ lɛ, kɛ Yehowa yelikɛbuamɔ ji nɔ ni ye ebua lɛ ni enyɛ efee nakai.Hebribii 4:12.

2 Yɛ Kevin baptisimɔ lɛ sɛɛ, ehe bahia ni eya nɔ etsake ejeŋba koni enyɛ enyiɛ Kristo sɛɛ jogbaŋŋ. (Efesobii 4:31, 32) Akɛ nɔkwɛmɔnɔ lɛ, no mli lɛ, etsui shaa lɛ waa, ni ebɔ mɔdɛŋ akɛ eye nɔ. Shi, efee lɛ naakpɛɛ akɛ, enáaa enɛ feemɔ mlɛo kwraa. Kevin wie akɛ, be ni etaoɔ ekpa nibii fɔji ni efeɔ dani abaptisi lɛ lɛ po lɛ, etɔɔɔ lɛ nakai! Ekpa Yehowa fai ni  eye ebua lɛ, ni ekɛ hiɛdɔɔ kase Biblia lɛ. No dani enyɛ eye sui gbohii nɛɛ anɔ.

3 Wɔteŋ mɛi babaoo yɛ ni dani abaabaptisi wɔ lɛ, ehe bahia ni wɔfee tsakemɔi wuji komɛi yɛ wɔshihilɛ mli, koni wɔnyɛ wɔhi shi yɛ nibii ni wɔkase yɛ Biblia lɛ mli lɛ anaa. Kɛ̃lɛ, kɛbashi ŋmɛnɛ lɛ, tsakemɔi bibii komɛi yɛ lolo ni esa akɛ wɔfee, koni wɔnyɛ wɔkase Nyɔŋmɔ kɛ Kristo jogbaŋŋ. (Efesobii 5:1, 2; 1 Petro 2:21) Akɛ nɔkwɛmɔnɔ lɛ, ekolɛ wɔyɔse akɛ, wɔwieɔ nii ahe waa, wɔyeɔ mɛi ahe osheku, loo wɔwieɔ mɛi ahe nyanyaanya wɔtsɔɔ mɛi krokomɛi. Aloo ekolɛ wɔyɔse akɛ, gbɔmɔ gbeyeishemɔ hewɔ lɛ, wɔnyɛɛɛ wɔfee nibii komɛi ni wɔle akɛ esa akɛ wɔfee. Eeenyɛ efee akɛ, wɔkɛ afii babaoo ebɔ mɔdɛŋ akɛ wɔbaaye gbɔjɔmɔi nɛɛ anɔ, shi wɔnyɛɛɛ. Enɛ hewɔ lɛ, ekolɛ wɔbaabi wɔhe akɛ: ‘Mɛni hewɔ etɔɔ mi waa kɛ tsakemɔi bibii nɛɛ afeemɔ nɛkɛ? Mɛni esa akɛ mafee koni manyɛ mikɛ nibii ni mikaneɔ yɛ Biblia lɛ mli lɛ atsu nii ni maya nɔ matsake mijeŋba?’

OBAANYƐ OFEE NƆ NI SA YEHOWA HIƐ

4. Mɛni hewɔ wɔnyɛɛɛ wɔfee nɔ ni Yehowa sumɔɔ be fɛɛ be lɛ?

4 Wɔsumɔɔ Yehowa, ni wɔmiisumɔ ni wɔjɛ wɔtsuiŋ fɛɛ wɔfee nɔ ni esumɔɔ. Shi, mɔbɔ sane ji akɛ, akɛni wɔyeee emuu hewɔ lɛ, jeee be fɛɛ be wɔnyɛɔ wɔfeɔ nakai. Bei pii lɛ, wɔnuɔ he tamɔ bɔfo Paulo. Ewie akɛ: “Mishweɔ akɛ mafee nɔ ni hi moŋ, shi mibɛ nyɛmɔ lɛ ní mikɛbaafee nɔ ni mishweɔ lɛ.”Romabii 7:18; Yakobo 3:2.

5. Mɛɛ sui komɛi wɔkwa dani abaptisi wɔ? Shi mɛni ji sui komɛi ni baanyɛ aya nɔ agba wɔnaa?

5 Dani mɔ ko baanyɛ abatsɔ Kristofonyo lɛ, esa akɛ ekpa nibii gbohii feemɔ, ni nakai pɛpɛɛpɛ wɔ fɛɛ wɔfee. (1 Korintobii 6:9, 10) Shi no etsɔɔɔ akɛ wɔye emuu. (Kolosebii 3:9, 10) No hewɔ lɛ, kɛ́ abaptisi wɔ etsɛ jio, abaptisi wɔ etsɛko jio lɛ, wɔbaaya nɔ wɔtɔ̃ yɛ be kɛ beiaŋ. Ekolɛ wɔbaashwe nibii gbohii komɛi, wɔbaaná henumɔi komɛi ni esaaa, loo wɔbaayɔse akɛ, ewa hã wɔ waa akɛ wɔbaaye su gbonyo ko ni eka wɔhe lɛ nɔ. Sui gbohii lɛ ekomɛi yɛ ni ekolɛ wɔkɛbaashi mple afii abɔ dani wɔbaaye nɔ.

6, 7. (a) Mɛɛ gbɛjianɔ Yehowa eto koni wɔnyɛ wɔkɛ lɛ abɔ naanyo yɛ emuu ni wɔyeee lɛ fɛɛ sɛɛ? (b) Mɛni hewɔ esaaa akɛ wɔshashaoɔ shi kwraa akɛ wɔbaabi Yehowa dɛŋ eshaifaa?

6 Shi, yɛ emuu ni oyeee lɛ fɛɛ sɛɛ lɛ, obaanyɛ oya nɔ okɛ Yehowa abɔ naanyo ni osɔmɔ lɛ. Be fɛɛ be lɛ, kaimɔ bɔ ni fee ni obatsɔ Yehowa naanyo. Yehowa na nɔ ko kpakpa yɛ ohe, ni eshwe akɛ ehã ole lɛ. (Yohane 6:44) No mli lɛ, ele faŋŋ akɛ, oyɛ fatɔi kɛ gbɔjɔmɔi, ni akɛ, obaatɔ̃ enɔ yɛ be kɛ beiaŋ. Shi, fɛɛ sɛɛ lɛ, ená he miishɛɛ akɛ ekɛ bo baabɔ naanyo.

7 Yehowa sumɔ wɔ aahu akɛ, ehã wɔ nɔ ko ni jara wa waa. Etsu e-Bi Yesu kɛba shikpɔŋ lɛ nɔ koni ekɛ ewala abafɔ̃ shi akɛ kpɔmɔnɔ yɛ wɔhe eshai lɛ ahewɔ. (Yohane 3:16) Kɛ́ wɔtɔ̃ Yehowa nɔ lɛ, wɔbaanyɛ wɔbi edɛŋ eshaifaa. Ni kpɔmɔnɔ lɛ hewɔ lɛ, wɔbaanyɛ wɔná nɔmimaa akɛ, ekɛ wɔtɔmɔ lɛ baake wɔ, ni wɔbaaya nɔ wɔfee enanemɛi. (Romabii 7:24, 25; 1 Yohane 2:1, 2) Kaahã ohiɛ kpa nɔ kɔkɔɔkɔ akɛ, Yesu bagbo yɛ eshafeelɔi ni tsakeɔ amɛtsui lɛ ahewɔ. No hewɔ lɛ, kɛ́ wɔnuɔ he akɛ tɔmɔ ni wɔtɔ̃ lɛ ehiii tamɔ mɛ, esa akɛ wɔya nɔ wɔbi Yehowa dɛŋ eshaifaa. Kɛ́ wɔfeee nakai lɛ, ebaafee tamɔ nɔ ni wɔdɛŋ ewo muji shi wɔsumɔɔɔ  ni wɔfɔɔ. Eŋɔɔ wɔnaa waa akɛ, yɛ emuu ni wɔyeee lɛ fɛɛ sɛɛ lɛ, Yehowa eto gbɛjianɔ koni wɔnyɛ wɔkɛ lɛ abɔ naanyo!Kanemɔ 1 Timoteo 1:15.

Kɛ́ wɔmiisumɔ ni wɔ kɛ Yehowa teŋ naanyobɔɔ lɛ mli aya nɔ awa lɛ, esa akɛ wɔya nɔ wɔbɔ mɔdɛŋ wɔkase lɛ kɛ e-Bi lɛ

8. Mɛni hewɔ esa akɛ wɔya nɔ wɔmia wɔhiɛ akɛ wɔbaaye sui gbohii ni eka wɔhe lɛ anɔ lɛ?

8 Ani enɛ tsɔɔ akɛ, wɔbaanyɛ wɔku wɔhiɛ wɔshwie wɔtɔmɔi lɛ anɔ, loo wɔkɛ emuu ni wɔyeee lɛ ajie wɔnaa? Dabi. Yehowa ekɛɛ wɔ nɔ ni ekpaa gbɛ yɛ enanemɛi adɛŋ. (Lala 15:1-5) No hewɔ lɛ, kɛ́ wɔmiisumɔ ni wɔ kɛ lɛ teŋ naanyobɔɔ lɛ mli aya nɔ awa lɛ, esa akɛ wɔya nɔ wɔbɔ mɔdɛŋ wɔkase lɛ kɛ e-Bi lɛ. Kɛfata he lɛ, esa akɛ wɔya nɔ wɔbɔ mɔdɛŋ akɛ wɔbaaye sui gbohii ni eka wɔhe lɛ anɔ. Kɛ́ wɔmia wɔhiɛ waa lɛ, ekolɛ wɔbaanyɛ wɔfã sui nɛɛ ekomɛi kɛ amɛshishi. Ekɔɔɔ he eko afii abɔ ni wɔkɛhi asafo lɛ mli lɛ, esa akɛ wɔya nɔ wɔfee tsakemɔi yɛ wɔshihilɛ mli.2 Korintobii 13:11.

9. Mɛni hewɔ esa akɛ wɔya nɔ wɔtsake wɔjeŋba ni wɔwo subaŋ hee lɛ?

9 Bɔfo Paulo kɛɛ Kristofoi akɛ: “Atsɔɔ nyɛ ní nyɛjie subaŋ momo lɛ ní kɛ nyɛtsutsu jeŋba lɛ kpãa gbee, ní aafite lɛ yɛ nibii ní eshweɔ ní lakaa nyɛ lɛ anaa lɛ, nyɛshɛ nyɛfɔ̃. Ni esa akɛ nyɛya nɔ nyɛhã nɔ titri ni kudɔɔ nyɛjwɛŋmɔ lɛ atsɔ ehee, ni esa akɛ nyɛwo subaŋ hee ní abɔ yɛ Nyɔŋmɔ suɔmɔ naa yɛ anɔkwa jalɛ kɛ anɔkwayeli krɔŋŋ mli lɛ.” (Efesobii 4:22-24) Ni tsɔɔ akɛ, esa akɛ wɔya nɔ wɔmia wɔhiɛ wɔtsake wɔjeŋba ni wɔwo “subaŋ hee” lɛ. No hewɔ lɛ, wɔbaanyɛ wɔya nɔ wɔkase Yehowa kɛ esui lɛ ahe nii, ekɔɔɔ he eko afii abɔ ni wɔkɛsɔmɔ lɛ. Ni Biblia lɛ baanyɛ aye abua wɔ ni wɔya nɔ wɔtsake wɔjeŋba ni wɔkase Yehowa jogbaŋŋ.

MƐNI HEWƆ EWA KƐHÃ WƆ AKƐ WƆBAAYE SUI GBOHII KOMƐI ANƆ LƐ?

10. Mɛɛ su baaye abua wɔ ni wɔkɛ nibii ni wɔkaseɔ yɛ Nyɔŋmɔ Wiemɔ lɛ mli lɛ atsu nii, ni wɔya nɔ wɔfee tsakemɔi? Ni mɛɛ saji ekolɛ wɔbaabi?

10 Wɔ fɛɛ wɔmiisumɔ ni wɔkɛ nibii ni wɔkaseɔ yɛ Biblia lɛ mli lɛ atsu nii, koni wɔya nɔ wɔfee tsakemɔi yɛ wɔshihilɛ mli. Shi, enɛ feemɔ bɛ mlɛo. Ebiɔ hiɛmiamɔ. Mɛni hewɔ? Ani Yehowa nyɛŋ etsɔ gbɛ ko nɔ ehã enɛ feemɔ afee mlɛo ahã wɔ?

11-13. Mɛni hewɔ Yehowa miisumɔ ni wɔmia wɔhiɛ ni wɔye sui gbohii ni eka wɔhe lɛ anɔ lɛ?

11 Kɛ́ wɔsusu nibii fɛɛ ni Yehowa ebɔ lɛ ahe lɛ, wɔnaa faŋŋ akɛ, eyɛ hewalɛ waa, ni ebaanyɛ efee nɔ fɛɛ nɔ ni esumɔɔ. Akɛ nɔkwɛmɔnɔ lɛ, susumɔ hulu lɛ he okwɛ. Hulu lɛ hãa wɔ kane kɛ dɔlɛ, ni hewalɛ ni ehãa yɛ hiŋmɛitswaa kome mli lɛ jeee shwɛmɔ kwraa. Hewalɛ nɛɛ fioo ko pɛ bashɛɔ shikpɔŋ lɛ nɔ, kɛ̃lɛ, no ji nɔ ni hãa gbɔmɛi, kooloi, kɛ tsei fɛɛ nyɛɔ amɛhiɔ wala mli. (Lala 74:16; Yesaia 40:26) Wɔle hu akɛ, Yehowa hãa etsuji ni yɔɔ shikpɔŋ lɛ nɔ lɛ hewalɛ be fɛɛ be ni ehe baahia amɛ. (Yesaia 40:29) No hewɔ lɛ, eji Yehowa miisumɔ ni etsɔ gbɛ ko nɔ ehã efee mlɛo kwraa kɛhã wɔ akɛ wɔɔye sui gbohii komɛi ni eka wɔhe lɛ anɔ kulɛ, ebaanyɛ efee aahu. Shi, efeee nakai. Mɛni hewɔ?

 12 Yehowa ehã wɔ heyeli. Ehã wɔ hegbɛ ni wɔhala kɛji wɔbaabo lɛ toi aloo wɔboŋ lɛ toi. Kɛ́ wɔkpɛ wɔyiŋ akɛ wɔbaabo lɛ toi, ni wɔmia wɔhiɛ waa akɛ wɔbaafee esuɔmɔnaa nii lɛ, no hãa enaa akɛ wɔsumɔɔ lɛ, ni wɔmiisumɔ ni etsui anyɔ emli. Satan kɛɛ Yehowa bɛ hegbɛ akɛ eyeɔ je lɛ nɔ. Shi, kɛ́ wɔbo Yehowa toi lɛ, wɔhãa mɛi fɛɛ leɔ akɛ, wɔmiisumɔ ni Yehowa aye wɔnɔ. Yehowa, wɔ-Tsɛ ni yɔɔ suɔmɔ lɛ, hiɛ sɔɔ mɔdɛŋ fɛɛ ni wɔbɔɔ koni wɔbo lɛ toi lɛ. (Hiob 2:3-5; Abɛi 27:11) Ebɛ mlɛo akɛ wɔbaaye sui gbohii komɛi ni yɔɔ wɔhe lɛ anɔ. Shi kɛ́ wɔmia wɔhiɛ waa akɛ wɔbaatsu amɛhe nii lɛ, no baatsɔɔ akɛ wɔyeɔ Yehowa anɔkwa, ni wɔmiisumɔ ni eye wɔnɔ.

13 Yehowa ekɛɛ wɔ akɛ, esa akɛ ‘wɔbɔ mɔdɛŋ fɛɛ ni wɔɔnyɛ’ ni wɔkase lɛ. (Kanemɔ 2 Petro 1:5-7; Kolosebii 3:12) Kɛfata he lɛ, eesumɔ ni wɔmia wɔhiɛ waa ni wɔjie susumɔi fɔji kɛje wɔjwɛŋmɔ mli, ni agbɛnɛ hu, wɔye wɔhenumɔi anɔ. (Romabii 8:5; 12:9) Be fɛɛ be ni wɔbaamia wɔhiɛ wɔye su gbonyo ko nɔ lɛ, wɔmii shɛɔ wɔhe ni wɔtsui nyɔɔ wɔmli.

HÃ NYƆŊMƆ WIEMƆ LƐ AYA NƆ ATSAKE BO

14, 15. Mɛni kɛ́ wɔfee lɛ, ebaaye ebua wɔ ni wɔkase Yehowa jogbaŋŋ ni wɔjie esui lɛ akpo? (Kwɛmɔ akrabatsa ni ji, “ Biblia lɛ kɛ Sɔlemɔ Ye Ebua Amɛ ni Amɛtsake.”)

14 Kɛ́ wɔmiitao ni wɔkase Yehowa jogbaŋŋ ni wɔjie esui lɛ akpo lɛ, mɛni esa akɛ wɔfee? Yɛ nɔ najiaŋ ni wɔ diɛŋtsɛ wɔbaakpɛ wɔyiŋ yɛ nɔ ni wɔbaafee he lɛ, esa akɛ wɔhã Nyɔŋmɔ atsɔɔ wɔ gbɛ. Romabii 12:2 lɛ kɛɔ akɛ: “Nyɛkahãa shihilɛ gbɛjianɔtoo nɛɛ shɔ̃a nyɛ dɔŋŋ, moŋ lɛ, nyɛtsakea nyɛhe kɛtsɔ nyɛjwɛŋmɔ ni  nyɛbaaya nɔ nyɛtsake lɛ nɔ, koni nyɛ diɛŋtsɛ nyɛnyɛ nyɛka nyɛkwɛ ni nyɛyɔse nɔ ni ji Nyɔŋmɔ suɔmɔnaa nii kpakpa ni ekpɛlɛɔ nɔ ni hi kɛwula shi lɛ.” Yehowa tsɔɔ Biblia lɛ kɛ mumɔ krɔŋkrɔŋ lɛ nɔ ehãa wɔleɔ bɔ ni eesumɔ ni wɔhi shi wɔhã. No hewɔ lɛ, esa akɛ wɔkane Biblia lɛ daa, wɔjwɛŋ nɔ, ni agbɛnɛ hu, wɔsɔle wɔbi lɛ ni eduro wɔ mumɔ krɔŋkrɔŋ lɛ. (Luka 11:13; Galatiabii 5:22, 23) Kɛ́ wɔfee nakai lɛ, wɔbaana bɔ tuuntu ni Yehowa miisumɔ ni wɔhi shi wɔhã, ni fiofio lɛ, bɔ ni wɔsusuɔ nii ahe wɔhãa lɛ kɛ enɔ lɛ baakpã gbee. Enɛ baahã nibii ni wɔsusuɔ he, nibii ni wɔwieɔ, kɛ nibii ni wɔfeɔ lɛ asa Yehowa hiɛ, ni wɔbaaye sui gbohii ni yɔɔ wɔhe lɛ anɔ. Fɛɛ sɛɛ lɛ, ehe baahia ni wɔhã wɔhiɛ ahi wɔhe nɔ koni sui nɛɛ akajie amɛhiɛ kpo ekoŋŋ.Abɛi 4:23.

Taomɔ saji kɛ ŋmalɛi ni baanyɛ aye abua bo ni oye sui gbohii ni eka ohe lɛ anɔ; kadimɔ amɛ ofɔ̃ shi, ni okane yɛ be kɛ beiaŋ (Kwɛmɔ kuku 15)

15 Yɛ Biblia lɛ ni wɔbaakane daa gbi lɛ sɛɛ lɛ, esa akɛ wɔkase Buu-Mɔɔ lɛ, Awake! lɛ, kɛ woji krokomɛi ni asafo lɛ efee lɛ. Enɛ baaye abua wɔ ni wɔnu Biblia lɛ shishi jogbaŋŋ, wɔna bɔ ni wɔbaafee wɔjie Yehowa sui lɛ akpo, ni wɔye sui gbohii ni yɔɔ wɔhe lɛ anɔ. Kɛ́ wɔmiikane woji lɛ, ni wɔna saji loo ŋmalɛi komɛi ni baanyɛ aye abua wɔ waa lɛ, wɔbaanyɛ wɔkadi amɛ wɔfɔ̃ shi, ni wɔsaa wɔkane yɛ be kɛ beiaŋ.

16. Kɛ́ efee tamɔ nɔ ni eetɔ wɔ kɛ sui gbohii komɛi atsakemɔ lɛ, mɛni hewɔ esaaa akɛ wɔnijiaŋ jeɔ wui lɛ?

16 Ebaahe be dani obaanyɛ okase Yehowa sui lɛ. No hewɔ lɛ, kɛ́ efee tamɔ nɔ ni  eetɔ bo kɛ sui gbohii lɛ ekomɛi atsakemɔ lɛ, kaahã onijiaŋ je wui. Yɛ shishijee mli lɛ, ekolɛ ehe baahia ni omia ohiɛ waa dani obaanyɛ okɛ nɔ ni Biblia lɛ kɛɔ lɛ atsu nii. Shi, kɛ́ otee nɔ omia ohiɛ akɛ obaahã osusumɔi kɛ onifeemɔi asa Yehowa hiɛ lɛ, be ni be shwieɔ mli lɛ, obaana akɛ ewaŋ ehaŋ bo tsɔ akɛ obaafee esuɔmɔnaa nii.Lala 37:31; Abɛi 23:12; Galatiabii 5:16, 17.

SUSUMƆ SHIHILƐ KPAKPA NI WƆBAANÁ WƆSƐƐ LƐ HE

17. Kɛ́ wɔye Yehowa anɔkwa lɛ, mɛɛ shihilɛ kpakpa wɔbaaná wɔsɛɛ?

17 Wɔyɛ hiɛnɔkamɔ akɛ, etsɛŋ, wɔbaaye emuu, ni wɔbaasɔmɔ Yehowa kɛya naanɔ. Nakai beiaŋ lɛ, ehe ebahiaŋ ni wɔwuu wɔshi sui gbohii, ni ebaafee mlɛo ehã wɔ akɛ wɔbaakase Yehowa. Shi amrɔ nɛɛ po lɛ, wɔbaanyɛ wɔsɔmɔ Yehowa, ejaakɛ ehã wɔ kpɔmɔnɔ lɛ. No hewɔ lɛ, eyɛ mli akɛ wɔyeee emuu moŋ, shi kɛ́ wɔtee nɔ wɔmia wɔhiɛ waa akɛ wɔbaahi shi yɛ nibii ni wɔkaseɔ yɛ Biblia lɛ mli lɛ anaa, ni wɔfee tsakemɔi yɛ wɔshihilɛ mli lɛ, wɔbaahã Yehowa mii ashɛ ehe.

18, 19. Mɛni hewɔ wɔbaanyɛ wɔná nɔmimaa akɛ, Biblia lɛ baanyɛ aya nɔ etsake wɔ lɛ?

18 Kevin fee bɔ fɛɛ bɔ ni ebaanyɛ koni enyɛ etsu emli ni fuɔ mramra lɛ he nii. Ekane Biblia lɛ ni ejwɛŋ nɔ, ni emia ehiɛ waa akɛ ekɛ nɔ ni ekaseɔ lɛ baatsu nii. Kɛfata he lɛ, ebo ŋaa ni enyɛmimɛi Kristofoi lɛ wo lɛ lɛ toi ni ekɛtsu nii. Kevin náaa lɛ mlɛo, shi afii fioo komɛi asɛɛ lɛ, enyɛ efee tsakemɔi, ni ená hegbɛ esɔmɔ akɛ asafoŋ sɔɔlɔ. Amrɔ nɛɛ, ekɛ afii 20 esɔmɔ akɛ asafoŋ onukpa. Shi loloolo lɛ, ehãa ehiɛ hiɔ ehe nɔ, koni su gbonyo nɛɛ akajie ehiɛ kpo dɔŋŋ.

19 Taakɛ eba lɛ yɛ Kevin gbɛfaŋ lɛ, wɔ hu wɔbaanyɛ wɔye sui gbohii ni eka wɔhe lɛ anɔ. Ni kɛ́ wɔnyɛ wɔfee nakai lɛ, wekukpãa ni yɔɔ wɔ kɛ Yehowa teŋ lɛ mli baaya nɔ awa. (Lala 25:14, Ga Biblia hee) Kɛ́ Yehowa na akɛ wɔmiifee bɔ fɛɛ bɔ ni wɔbaanyɛ koni wɔnyɛ wɔkase lɛ lɛ, lɛ hu ebaaye ebua wɔ ni wɔye omanye. Enɛ hewɔ lɛ, wɔbaanyɛ wɔná nɔmimaa akɛ, kɛ́ wɔkɛ nibii ni wɔkaseɔ yɛ Biblia lɛ mli lɛ tsu nii lɛ, ebaaya nɔ etsake wɔ.Lala 34:9.

^ [1](kuku 1) Atsake gbɛ́i lɛ.