Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Fɔlɔi, Ani Nyɛmiiye Nyɛmiibua Nyɛbii Lɛ Ni Amɛshɛ Baptisimɔ He?

Fɔlɔi, Ani Nyɛmiiye Nyɛmiibua Nyɛbii Lɛ Ni Amɛshɛ Baptisimɔ He?

“Mɛni hewɔ oshashaoɔ shi? Tee shi ni ohã abaptisi bo.”​—BƆF. 22:16.

LALAI: 51, 135

1. Mɛni fɔlɔi ni ji Kristofoi lɛ miisumɔ ni amɛna faŋŋ dani abaptisi amɛbii lɛ?

NYƐMI yoo ko ni atsɛɔ lɛ Blossom Brandt lɛ gba nɔ ni ba be ni ekpɛ eyiŋ akɛ ebaasumɔ ni abaptisi lɛ lɛ, akɛ: “Mikɛ nyɔji babaoo kɛɛ Ataa kɛ Awo akɛ miitao ni abaptisi mi, ni amɛkɛ mi fɔɔ he wiemɔ yɛ be kɛ bei amli. Amɛmiitao amɛle kɛ́ mile bɔ ni hiɛdɔɔ yɔɔ miyiŋkpɛɛ lɛ he hã. Yɛ December 31, 1934 lɛ, gbi lɛ bashɛ kɛhã nɛkɛ nifeemɔ krɛdɛɛ nɛɛ yɛ mishihilɛ mli.” Fɔlɔi ni yɔɔ ŋmɛnɛ lɛ hu miisumɔ ni amɛye amɛbua amɛbii lɛ ni amɛkpɛ yiŋ kpakpai. Amɛle akɛ, kɛ́ amɛhã amɛbii lɛ tsi baptisimɔ amɛto ní jeee yiŋtoo kpakpa ko hewɔ lɛ, no baanyɛ afite wekukpaa ni yɔɔ amɛbii lɛ kɛ Yehowa teŋ lɛ. (Yak. 4:17) Kɛ̃lɛ, yɛ nakai beiaŋ nɔŋŋ lɛ, fɔlɔi ni hiɛ kã shi lɛ miisumɔ ni amɛna faŋŋ akɛ amɛbii lɛ efee klalo akɛ amɛbaahi shi akɛ Kristofoi, dani abaptisi amɛ.

2. (a) Mɛɛ naagba kpokpaa nɔkwɛlɔi komɛi eyɔse? (b) Mɛni he wɔbaasusu yɛ nikasemɔ nɛɛ mli?

2 Kpokpaa nɔkwɛlɔi komɛi eyɔse akɛ, oblahii kɛ oblayei babaoo ni eye kɛjɛ aaafee afii 18 kɛmiimɔ afii 23 yɛ ni atsɔse amɛ  yɛ anɔkwale lɛ mli shi abaptisiko amɛ. Oblahii kɛ oblayei nɛɛ ateŋ mɛi babaoo yaa asafoŋ kpeei, amɛji shiɛlɔi, ni amɛnaa amɛhe po akɛ Yehowa Odasefoi. Kɛ̃lɛ, yɛ yiŋtoo ko hewɔ lɛ, amɛjɔko amɛhe nɔ amɛhãko Yehowa koni abaptisi amɛ. Mɛni ekolɛ no ji yiŋtoo hewɔ ni abaptisiko amɛ lɛ? Yɛ amɛteŋ mɛi komɛi agbɛfaŋ lɛ, amɛfɔlɔi kɛɛ amɛmɛ fioo dã. Yɛ nikasemɔ nɛɛ mli lɛ, wɔbaakwɛ yiŋtoi ejwɛ komɛi ahewɔ ni fɔlɔi komɛi ni ji Kristofoi lɛ wooo amɛbii lɛ hewalɛ ni amɛya amɛhiɛ kɛshɛ baptisimɔ he.

ANI MIBI LƐ ESHƐ MƆ NI ABAPTISIƆ LƐ?

3. Mɛni Blossom fɔlɔi bɔ mɔdɛŋ waa koni amɛle?

3 Be ni Blossom, ni wɔtsĩ etã yɛ klɛŋklɛŋ kuku lɛ mli lɛ fɔlɔi ná amɛle akɛ eesumɔ ni abaptisi lɛ lɛ, amɛbɔ mɔdɛŋ waa koni amɛle kɛji amɛbiyoo lɛ eda bɔ ni ebaanyɛ enu nɔ ni baptisimɔ ji lɛ shishi ni ena akɛ ejeee shwɛmɔ sane. Te fɔlɔi baafee tɛŋŋ amɛna kɛji amɛbi ko eshɛ mɔ ni abaptisiɔ lɛ?

4. Mɛɛ gbɛ nɔ Yesu famɔ ni yɔɔ Mateo 28:19, 20 lɛ baanyɛ aye abua fɔlɔi be ni amɛtsɔɔ amɛbii lɛ nii lɛ?

4 Kanemɔ Mateo 28:19, 20. Tamɔ bɔ ni awie yɛ nikasemɔ ni tsɔ hiɛ lɛ mli lɛ, Biblia lɛ etsɔko afii ni esa akɛ mɔ ko aye dani abaptisi lɛ. Kɛ̃lɛ, ehi akɛ fɔlɔi baajwɛŋ nɔ ni atsɔɔ kɛ́ akɛɛ afee mɔ ko kaselɔ lɛ nɔ jogbaŋŋ. Nɔ ni Greek wiemɔ ni atsɔɔ shishi akɛ ‘nyɛfea mɛi kaselɔi’ yɛ Mateo 28:19 lɛ tsɔɔ ji, ni abaatsɔɔ mɔ ko nii kɛ jwɛŋmɔ lɛ akɛ, ebaahi shi yɛ mɔ ko tsɔɔmɔi anaa, loo ebaatsɔ mɔ lɛ kaselɔ. Dani mɔ ko baanyɛ atsɔ Yesu kaselɔ lɛ, esa akɛ ekase Yesu tsɔɔmɔi lɛ ni enu shishi jogbaŋŋ, ni etswa efai shi akɛ ebaahi shi yɛ tsɔɔmɔi nɛɛ anaa. No hewɔ lɛ, oti ni ma fɔlɔi fɛɛ ni ji Kristofoi lɛ ahiɛ ji, ni amɛtsɔɔ amɛbii lɛ nii kɛjɛ amɛbifabiiaŋ tɔ̃ɔ kɛ jwɛŋmɔ lɛ akɛ, bii lɛ baajɔɔ amɛhe nɔ amɛhã Yehowa ni abaptisi amɛ akɛ Kristo kaselɔi. Ekã shi faŋŋ akɛ, abaptisiii abifabii. Shi Biblia lɛ hãa wɔnaa akɛ gbekɛbii bibii po baanyɛ anu Biblia mli anɔkwalei ashishi ni amɛná he miishɛɛ.

5, 6. (a) Kɛ́ wɔsusu nibii ni tee nɔ yɛ Timoteo shihilɛ mli lɛ ahe lɛ, mɛni wɔbaanyɛ wɔkɛɛ yɛ ebaptisimɔ lɛ he? (b) Mɛni fɔlɔi ni hiɛ kã shi lɛ baanyɛ afee kɛye amɛbua amɛbii lɛ jogbaŋŋ?

5 Be ni Timoteo ji oblanyo ni ekpɛ eyiŋ akɛ ebaasɔmɔ Yehowa akɛ Kristo kaselɔ. Bɔfo Paulo wie akɛ Timoteo bifabiiaŋ tɔ̃ɔ ni ekase Nyɔŋmɔ Wiemɔ lɛ mli anɔkwalei lɛ. Eyɛ mli akɛ Timoteo papa jáaa Yehowa moŋ, shi emami kɛ enaa ni ji Yudafoi lɛ ye amɛbua lɛ ni ebaaná Nyɔŋmɔ Wiemɔ lɛ he miishɛɛ. Enɛ hã Timoteo ná hemɔkɛyeli ni mli wa waa. (2 Tim. 1:5; 3:14, 15) Be ni nyɛmimɛi lɛ jie Timoteo yi kɛhã sɔɔmɔ hegbɛi krɛdɛi yɛ Kristofoi asafo lɛ mli lɛ, no mli lɛ eye aaafee afii 20.​—Bɔf. 16:1-3.

6 Esoro gbekɛ fɛɛ gbekɛ, ni no hewɔ lɛ, esoro be ni amɛteŋ mɔ fɛɛ mɔ jwɛŋmɔ saa. Gbekɛbii komɛi ajwɛŋmɔ saa mra bɔ ni amɛbaanyɛ amɛnu anɔkwale lɛ shishi ni amɛkpɛ amɛyiŋ akɛ amɛbaasumɔ ni abaptisi amɛ. Shi yɛ amɛteŋ mɛi komɛi agbɛfaŋ lɛ, ja amɛdara fioo dani amɛbaanyɛ amɛkpɛ yiŋ nɛɛ. Enɛ hewɔ lɛ, fɔlɔi ni hiɛ kã shi lɛ enyɛɛɛ amɛbii anɔ akɛ amɛhã abaptisi amɛ. Moŋ lɛ, amɛkwɛɔ bɔ ni amɛbii lɛ ateŋ mɔ fɛɛ mɔ ji, ni amɛdamɔɔ no nɔ amɛyeɔ amɛbuaa amɛ koni amɛya amɛhiɛ. Fɔlɔi náa miishɛɛ waa kɛ́ amɛbii lɛ kɛ ŋaawoo ni yɔɔ Abɛi 27:11 lɛ tsu nii. (Kanemɔ.) Shi esaaa akɛ amɛhiɛ kpaa nɔ kɔkɔɔkɔ akɛ oti ni ma amɛhiɛ ji, ni amɛye amɛbua amɛbii lɛ koni amɛbatsɔmɔ Kristo kaselɔi. Kɛ́ fɔlɔi hã oti nɛɛ hi amɛjwɛŋmɔ mli lɛ, amɛbaabi amɛhe sane ni nyiɛ sɛɛ nɛɛ, akɛ, ‘Ani mibi lɛ enu nibii ashishi jogbaŋŋ bɔ ni ebaanyɛ ejɔɔ ehe nɔ ehã Yehowa ni abaptisi lɛ?’

 ANI MIBI LƐ ENU NIBII ASHISHI JOGBAŊŊ?

7. Ani esa akɛ mɔ ko ale Biblia mli anɔkwalei lɛ fɛɛ amli fitsofitso dani abaptisi lɛ? Tsɔɔmɔ mli.

7 Fɔlɔi tsɔɔ amɛbii Biblia lɛ koni amɛbii lɛ anu anɔkwale lɛ shishi jogbaŋŋ. Kɛ́ bii lɛ nu anɔkwale lɛ shishi jogbaŋŋ lɛ, no baatsirɛ amɛ ni amɛjɔɔ amɛhe nɔ amɛhã Nyɔŋmɔ. Shi no etsɔɔɔ akɛ esa akɛ bii lɛ ale Biblia mli anɔkwalei lɛ fɛɛ amli fitsofitso dani amɛbaanyɛ amɛjɔɔ amɛhe nɔ amɛhã Nyɔŋmɔ ni abaptisi amɛ. Esa akɛ mɔ fɛɛ mɔ ni batsɔɔ Kristo kaselɔ lɛ aya nɔ akase nii yɛ ebaptisimɔ lɛ sɛɛ. (Kanemɔ Kolosebii 1:9, 10.) No hewɔ lɛ, mɛni kɛ mɛni esa akɛ mɔ ko ale dani abaptisi lɛ?

8, 9. Mɛni wɔkaseɔ yɛ tsuŋwoohe nɔkwɛlɔ ni Paulo shiɛ ehã lɛ yɛ Filipi lɛ sane lɛ mli?

8 Weku ko ni hi shi yɛ blema lɛ aniiashikpamɔ lɛ baanyɛ aye abua fɔlɔi ni yɔɔ ŋmɛnɛ lɛ. (Bɔf. 16:25-33) Yɛ aaafee afi 50 Ŋ.B. be ni Paulo fã gbɛ kɛtee maŋsɛɛ nɔ ni ji shii enyɔ nɔ koni eyashiɛ sane kpakpa lɛ, etee Filipi. Be ni ekɛ Sila yɔɔ jɛmɛ lɛ, afolɔ amɛnaa, ni amɔmɔ amɛ ni awo amɛ tsuŋ. Shi nyɔɔŋ lɛ mli lɛ, shikpɔŋ lɛ hoso waa ni tsuŋwoohe lɛ shinai lɛ fɛɛ gbelegbelei. Tsuŋwoohe nɔkwɛlɔ lɛ susu akɛ mɛi ni awo amɛ tsuŋ lɛ fɛɛ ejo foi, no hewɔ lɛ, kulɛ eyaagbe ehe. Shi Paulo kɛɛ lɛ akɛ ekagbe ehe. No sɛɛ lɛ, ekɛ Sila shiɛ amɛtsɔɔ tsuŋwoohe nɔkwɛlɔ lɛ kɛ eweku lɛ. Nibii ni amɛtsɔɔ amɛ yɛ Yesu he lɛ ta amɛtsuiŋ waa. No hewɔ lɛ ani ole nɔ ni amɛfee? Amɛhã abaptisi amɛ amrɔ nɔŋŋ. Mɛni wɔkaseɔ yɛ sane nɛɛ mli?

9 Eeenyɛ efee akɛ, tsuŋwoohe nɔkwɛlɔ nɛɛ ji Roma asraafonyo ni eba pɛnshɛŋ. Ni tsɔɔ akɛ, eleee Ŋmalɛ lɛ mli nɔ ko kwraa. No hewɔ lɛ, ehe bahia ni ele klɛŋklɛŋ nibii ni esa akɛ Kristofonyo fɛɛ Kristofonyo ale lɛ, ni enu nɔ ni Nyɔŋmɔ biɔ ni etsuji afee lɛ shishi, ni etswa efai shi akɛ ebaahi shi yɛ Yesu tsɔɔmɔi lɛ anaa. Nibii ni nuu nɛɛ kase yɛ be kukuoo nɛɛ mli lɛ ta etsuiŋ ni etsirɛ lɛ koni ehã abaptisi lɛ. Ekã shi faŋŋ akɛ, yɛ ebaptisimɔ lɛ sɛɛ lɛ, etee nɔ ekase nibii krokomɛi efata nɔ ni atsɔɔ lɛ nɛɛ he. No hewɔ lɛ, fɔlɔi, kɛ́ nyɛna akɛ nyɛbi ko sumɔɔ Yehowa ni eesumɔ ni ebo lɛ toi ni ebakɛɛ nyɛ akɛ eesumɔ ni abaptisi lɛ lɛ, mɛni nyɛbaanyɛ nyɛfee? Ekolɛ nyɛbaanyɛ nyɛhã eyana asafoŋ onukpai lɛ koni amɛkwɛ kɛji esa mɔ ni abaptisiɔ lɛ lo. * Tamɔ bɔ ni eji yɛ Kristo kaselɔi krokomɛi ni abaptisi amɛ lɛ fɛɛ agbɛfaŋ lɛ, nyɛbi lɛ baaya nɔ ekase Yehowa he nii ewala beiaŋ fɛɛ, ni ekolɛ ebaafee nakai kɛya naanɔ po.​—Rom. 11:33, 34.

ANI ESA AKƐ OBI LƐ AGBE SKUL NAA DANI ABAPTISI LƐ?

10, 11. (a) Mɛɛ susumɔ fɔlɔi komɛi hiɛ? (b) Mɛni esa akɛ fɔlɔi ahã no he ahia amɛ klɛŋklɛŋ?

10 Fɔlɔi komɛi susuɔ akɛ esa akɛ amɛhã amɛbii lɛ agbe skul naa ni amɛbɔi nitsumɔ dani abaptisi amɛ. Ekolɛ amɛsusuɔ akɛ no baaye abua amɛbii lɛ ni amɛná shihilɛ kpakpa. Shi ani nakai eji lɛɛlɛŋ? Ani susumɔ ni amɛhiɛ nɛɛ kɛ Ŋmalɛ lɛ kpãa gbee? Mɛni Yehowa miisumɔ ni wɔkɛ wɔwala atsu?​—Kanemɔ Jajelɔ 12:1.

11 Esaaa akɛ wɔhiɛ kpaa nɔ kɔkɔɔkɔ akɛ, je lɛ kɛ emli nibii lɛ fɛɛ wooo mɛi hewalɛ ni amɛfee Yehowa suɔmɔnaa nii loo amɛná esusumɔ yɛ saji ahe. (Yak. 4:7, 8; 1 Yoh. 2:15-17; 5:19) Kɛ́ wekukpaa ni mli wa yɛ gbekɛ ko kɛ Yehowa teŋ lɛ, ebaanyɛ ewu eshi Satan, jeŋ fɔŋ nɛɛ, kɛ susumɔi gbohii ni ehe shi yɛ je lɛ mli lɛ. Kɛ́ fɔlɔi hã skulyaa kɛ heloonaa nitsumɔ fee nibii ni he hiaa amɛ fe fɛɛ yɛ shihilɛ mli lɛ, ekolɛ no baahã  amɛbii lɛ ahe aye akɛ nibii ni yɔɔ je lɛ mli lɛ ahe miihia fe wekukpaa ni yɔɔ amɛ kɛ Yehowa teŋ lɛ, ni enɛ yɛ oshara waa. Fɔlɔi ni sumɔɔ nyɛbii, ani nyɛmiisumɔ ni je lɛ atsɔɔ nyɛbii lɛ bɔ ni amɛbaafee amɛná miishɛɛ yɛ shihilɛ mli? Yɛ anɔkwale mli lɛ, ja wɔkɛ Yehowa eye klɛŋklɛŋ gbɛhe yɛ wɔshihilɛ mli dani wɔbaaná miishɛɛ diɛŋtsɛ ni wɔtsui baanyɔ wɔmli.​—Kanemɔ Lala 1:2, 3.

NI KƐ́ MIBI LƐ YAFEE ESHA KO NI YƆƆ HIƐDƆƆ HU?

12. Mɛni hewɔ fɔlɔi komɛi ehã amɛbii lɛ etsi baptisimɔ amɛto lɛ?

12 Be ni abi nyɛmi yoo ko nɔ hewɔ ni ehãaa abaptisi ebiyoo lɛ, ewie akɛ: “Eefee mi hiɛgbele akɛ makɛɛ nyɛ akɛ, nɔ titri hewɔ ni mifee nakai ji akɛ, mishe gbeyei akɛ ebaayafee esha ni abaashwie lɛ.” Fɔlɔi komɛi hiɛ jwɛŋmɔ ni nyɛmi yoo nɛɛ ná lɛ eko. Amɛsusuɔ akɛ esa akɛ amɛhã amɛbii lɛ amɛ kɛyashi buulufeemɔ ni yɔɔ gbekɛbii ahe lɛ baaje amɛtsui mli dani abaptisi amɛ. (1 Mo. 8:21; Abɛi 22:15) Ekolɛ amɛnuɔ he po akɛ, kɛ́ amɛtee lɛ nakai lɛ, ebaŋ lɛ akɛ abaashwie amɛbii lɛ kɛje asafo lɛ mli. Shi fɔlɔi ni hiɛ susumɔ ni tamɔ nɛkɛ lɛ miilaka amɛhe. Mɛni hewɔ?​—Yak. 1:22.

13. Kɛ́ mɔ ko tsi baptisimɔ eto lɛ, ani no tsɔɔ akɛ ebuŋ enifeemɔi ahe akɔntaa ehãŋ Yehowa? Tsɔɔmɔ mli.

13 Ekã shi faŋŋ akɛ, fɔlɔ fɛɛ fɔlɔ miisumɔ ni ebi lɛ ashɛ mɔ ni baanyɛ ajɔɔ ehe nɔ ehã Yehowa dani abaptisi lɛ. Shi kɛ́ fɔlɔ ko mu sane naa akɛ ja abaptisi ebi lɛ dani ebi lɛ baabu enifeemɔi ahe akɔntaa ehã Yehowa lɛ, elaka ehe. Mɛni hewɔ? Nɔ hewɔ lɛ ji akɛ, kɛ́ mɔ ko ná ele nɔ ni hi kɛ nɔ ni ehiii yɛ Yehowa hiɛ pɛ lɛ, nakai mɔ lɛ baabu enifeemɔi ahe akɔntaa ehã Yehowa, ekɔɔɔ he eko kɛji abaptisi lɛ loo abaptisiko lɛ. (Kanemɔ Yakobo 4:17.) No hewɔ lɛ, fɔlɔi ni hiɛ kã shi lɛ hãaa amɛbii atsi baptisimɔ amɛto. Moŋ lɛ, amɛbɔɔ mɔdɛŋ amɛfeɔ nɔkwɛmɔnɔ kpakpa amɛhãa amɛbii lɛ. Kɛjɛ amɛbii lɛ agbekɛbiiashi tɔ̃ɔ lɛ, amɛtsɔɔ amɛ nii koni amɛjɛ amɛtsuiŋ amɛsumɔ nibii ni Yehowa sumɔɔ lɛ ni amɛnyɛ nibii ni enyɛɔ lɛ. (Luka 6:40) Kɛ́ odu suɔmɔ ni tamɔ nɛkɛ owo obi lɛ tsui mli lɛ, no baahã ehi shi yɛ Yehowa jeŋba he mlai lɛ anaa, ni efeŋ esha ni yɔɔ hiɛdɔɔ.​—Yes. 35:8.

NƆ NI MƐI KROKOMƐI BAANYƐ AFEE KƐYE AMƐBUA

14. Mɛni asafoŋ onukpai baanyɛ afee kɛwa fɔlɔi ni miiye amɛmiibua amɛbii koni amɛshɛ baptisimɔ he lɛ?

14 Kɛ́ asafoŋ onukpai wie mumɔŋ otii ahe ekpakpa lɛ, no baahã yelikɛbuamɔ ni fɔlɔi lɛ kɛhãa amɛbii lɛ amɔ shi. Nyɛmi yoo ko ni kɛ nɔ ni fe afii 70 sɔmɔ akɛ gbɛgbalɔ lɛ wie akɛ sane ko ni Nyɛminuu Charles T. Russell kɛ lɛ gba yɛ egbekɛbiiashi be ni eye afii ekpaa pɛ lɛ ná enɔ hewalɛ waa. Ewie akɛ: “Ekɛ mi gba otii ni mikɛmamɔ mihiɛ yɛ Yehowa sɔɔmɔ lɛ mli lɛ ahe sane minitii 15.” Eniiashikpamɔ lɛ hãa wɔnaa akɛ, kɛ́ akɛ wiemɔi ni sa wo gbekɛbii hewalɛ lɛ, ebaanyɛ ená amɛnɔ hewalɛ amɛwala beiaŋ fɛɛ. (Abɛi 25:11) Asafoŋ onukpai lɛ baanyɛ ahã fɔlɔi kɛ amɛbii atsu nitsumɔi ni atsuɔ yɛ Maŋtsɛyeli Asa lɛ nɔ lɛ eko. Amɛbaanyɛ amɛkwɛ afii ni gbekɛbii lɛ eye kɛ amɛnyɛmɔi ni amɛhã amɛ nitsumɔi ni sa amɛ.

15. Mɛni asafoŋbii krokomɛi lɛ baanyɛ afee kɛwo gbekɛbii kɛ oblahii kɛ oblayei hewalɛ?

15 Mɛni asafoŋbii krokomɛi lɛ hu baanyɛ afee kɛye amɛbua fɔlɔi lɛ? Amɛbaanyɛ amɛfee nibii ni sa ni tsɔɔ akɛ amɛsusuɔ gbekɛbii lɛ ahe. Akɛ nɔkwɛmɔnɔ lɛ, amɛbaanyɛ amɛkɛ amɛhiɛ afɔ̃ shi ni amɛkadi nibii ni tsɔɔ akɛ gbekɛbii lɛ miiná suɔmɔ amɛmiihã Yehowa. Ani gbekɛ ko hã hetoo ko ni sa jogbaŋŋ yɛ asafoŋ kpee shishi, loo efee asaimɛnt ko jogbaŋŋ yɛ otsi-teŋ kpee  lɛ shishi? Ani enyɛ eye kaa ko ni ekɛkpe lɛ nɔ loo eŋɔ hegbɛ ko ni ená lɛ kɛye odase yɛ skul? Kɛ́ ona nɔ ko ni tamɔ nakai lɛ, jiemɔ gbekɛ lɛ yi oya nɔŋŋ. Agbɛnɛ hu, mɛni hewɔ okɛfeee osu akɛ dani abaaje asafoŋ kpeei ashishi kɛ be ni akpa lɛ, okɛ gbekɛbii kɛ oblahii kɛ oblayei lɛ baagba sane? Kɛ́ wɔfee enɛɛmɛi kɛ nibii krokomɛi ni tamɔ nakai lɛ, gbekɛbii lɛ kɛ oblahii kɛ oblayei lɛ baanu he akɛ amɛ hu amɛfata “asafo babaoo lɛ” he.​—Lala 35:18.

YE OBUA OBI LƐ NI ESHƐ BAPTISIMƆ HE

16, 17. (a) Mɛni hewɔ esa akɛ fɔlɔi aye abua amɛbii lɛ ni abaptisi amɛ? (b) Mɛni baanyɛ ahã fɔlɔi ni ji Kristofoi lɛ amii ashɛ amɛhe waa? (Kwɛmɔ mfoniri ni yɔɔ nikasemɔ lɛ shishijee lɛ.)

16 Fɔlɔi ni ji Kristofoi, nyɛyɛ hegbɛ ko ni nɔ bɛ, no ji ni ‘nyɛbaakwɛ nyɛbii lɛ yɛ Yehowa tsɔsemɔ kɛ eŋaawoo lɛ mli.’ (Efe. 6:4; Lala 127:3) Yɛ blema Israel lɛ, kɛ́ afɔ gbekɛ ko nɔŋŋ lɛ, abuɔ lɛ akɛ mɔ ko ni ajɔɔ ewala nɔ ahã Yehowa. Shi jeee nakai eji yɛ wɔbei nɛɛ amli. Agbɛnɛ hu, akɛ suɔmɔ kɛhã Nyɔŋmɔ kɛ anɔkwale lɛ fɔɔɔ mɔ ko mɔ ko. Fɔlɔi, kɛjɛ gbi nɔ ni nyɛbii lɛ baaba jeŋ nɔŋŋ lɛ, nyɛkɛmaa nyɛhiɛ akɛ nyɛbaaye nyɛbua amɛ ni amɛjɔɔ amɛwala nɔ amɛhã Yehowa ni abaptisi amɛ akɛ Kristo kaselɔi. Ani nɔ ko yɛ ni he hiaa fe enɛ? Nɔ ko kwraa bɛ, ejaakɛ kɛ́ mɔ ko jɔɔ ehe nɔ ehã Yehowa, ni abaptisi lɛ, ni eye anɔkwa lɛ, no dani Yehowa baahere eyiwala kɛfo amanehulu kpeteŋkpele ni baa lɛ.​—Mat. 24:13.

Esa akɛ fɔlɔi atswa amɛfai shi akɛ amɛbaaye amɛbua amɛbii lɛ ni amɛbatsɔmɔ Kristo kaselɔi (Kwɛmɔ kuku 16, 17)

17 Be ni Blossom Brandt kɛɛ efɔlɔi akɛ ebaasumɔ ni abaptisi lɛ lɛ, efɔlɔi lɛ kwɛ akɛ esa mɔ ni abaptisiɔ lɛ lo. Be ni amɛná nɔmimaa akɛ esa lɛ, amɛfi esɛɛ. Gbi gbɛkɛ ni enɔ jetsɛremɔ lɛ abaabaptisi lɛ lɛ, epapa fee nɔ ko ni sa jogbaŋŋ. Blossom kɛɛ akɛ: “Ehã wɔ fɛɛ wɔkula shi, ni esɔle. Ekɛɛ Yehowa akɛ ená miishɛɛ waa yɛ ebiyoo fioo nɛɛ yiŋ ni ekpɛ akɛ ebaajɔɔ ewala nɔ ehã lɛ lɛ hewɔ.” Nifeemɔ nɛɛ sɛɛ nɔ ni fe afii 60 lɛ, Blossom wie akɛ: “Bo diɛŋtsɛ obaana akɛ mihiɛ kpaŋ nakai gbɛkɛ lɛ nɔ kɔkɔɔkɔ yɛ yinɔi fɛɛ ni baaba lɛ mli!” Fɔlɔi, kɛji nyɛ hu nyɛye nyɛbua nyɛbii lɛ ni amɛjɔɔ amɛwala nɔ amɛhã Yehowa ni abaptisi amɛ lɛ, nyɛbaaná miishɛɛ, ni nyɛtsui baanyɔ nyɛmli tamɔ Blossom fɔlɔi lɛ.

^ kk. 9 Fɔlɔi baanyɛ amɛkɛ amɛbi lɛ asusu sane ni yɔɔ Questions Young People Ask​—Answers That Work, Kpo 2, bf. 304-310 lɛ mli lɛ he. Kwɛmɔ “Sanebimɔhe” ni yɔɔ April 2011 Wɔ Maŋtsɛyeli Sɔɔmɔ lɛ bf. 2 lɛ.