Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Ná Hemɔkɛyeli—Ni Okpɛ Oyiŋ Yɛ Nilee Mli!

Ná Hemɔkɛyeli—Ni Okpɛ Oyiŋ Yɛ Nilee Mli!

‘Yaa nɔ obi yɛ hemɔkɛyeli mli, ni oyiŋ akafee bo kɔshikɔshi kwraa.’YAK. 1:6.

LALAI: 81, 70

1. Mɛni hã Kain kpɛ yiŋ ni ejaaa lɛ? Ni mɛni jɛ eyiŋkpɛɛ lɛ mli kɛba?

BE KO lɛ, Kain mli fu enyɛmi Habel waa, ni ehe bahia ni ekpɛ eyiŋ yɛ nɔ ni ebaafee he. Ani ebaadi emlifu lɛ sɛɛ ni eyafee efɔŋ, aloo ebaaye ehe nɔ? Nibii enyɔ nɛɛ ateŋ eko fɛɛ eko ni ebaahala lɛ baasa eshihilɛ he ewala gbii abɔ fɛɛ. Kain ekpɛɛɛ yiŋ kpakpa; ehala akɛ ebaafee efɔŋ, ni nɔ ni jɛ mli kɛba ji akɛ, egbe enyɛmi lɛ. Kain yiŋkpɛɛ gbonyo lɛ fite wekukpaa kpakpa ni yɔɔ ekɛ e-Bɔlɔ lɛ teŋ lɛ.1 Mose 4:3-16.

2. Mɛni hewɔ ehe miihia ni wɔle bɔ ni akpɛɔ yiŋ yɛ nilee mli?

2 Wɔ hu wɔkpɛɔ wɔyiŋ yɛ saji srɔtoi ahe yɛ shihilɛ mli. Saji nɛɛ ekomɛi ji wala kɛ gbele sane, shi ekomɛi hu bɛ hiɛdɔɔ tsɔ. Fɛɛ sɛɛ lɛ, yiŋ ni wɔkpɛɔ lɛ babaoo yɛ ni baanyɛ asa wɔshihilɛ he waa. No hewɔ lɛ, ehe miihia ni wɔle bɔ ni akpɛɔ yiŋ yɛ nilee mli. Kɛ́ wɔkpɛ yiŋ ni ja yɛ saji ahe lɛ, ekolɛ wɔnáŋ naagbai kɛ haomɔi babaoo yɛ shihilɛ mli, ni wɔtoiŋ baajɔ wɔ.Abɛi 14:8.

3. (a) Mɛɛ gbɛ nɔ hemɔkɛyeli baanyɛ aye abua wɔ ni wɔkpɛ wɔyiŋ yɛ nilee mli? (b) Mɛɛ sanebimɔi wɔbaahã hetoo?

3 Mɛni baaye abua wɔ ni wɔkpɛ wɔyiŋ yɛ nilee mli? Esa akɛ wɔhe Nyɔŋmɔ nɔ wɔye. Esaaa akɛ wɔyiŋ feɔ wɔ kɔshikɔshi bibioo po akɛ ebaanyɛ eye ebua wɔ ni wɔhiɛ akã shi ni eeshwe ni  efee nakai. Agbɛnɛ hu, esa akɛ wɔhe wɔye akɛ, Yehowa Wiemɔ lɛ kɛ emli gbɛtsɔɔmɔi lɛ anɔ bɛ. (Kanemɔ Yakobo 1:5-8.) Kɛ́ wɔhã wekukpaa ni yɔɔ wɔ kɛ Yehowa teŋ lɛ mli wa, ni wɔfee nibii ni baahã wɔsumɔ e-Wiemɔ lɛ waa lɛ, wɔkɛ wɔhiɛ baafɔ̃ enɔ kwraa yɛ nɔ fɛɛ nɔ mli. Enɛ baatsirɛ wɔ ni wɔpɛi e-Wiemɔ lɛ mli be fɛɛ be ni ehe baahia ni wɔkpɛ wɔyiŋ yɛ sane ko he. Shi mɛni baaye abua wɔ ni wɔnyɛ wɔkpɛ yiŋ ni ja yɛ saji ahe? Ni kɛ́ wɔkpɛ wɔyiŋ yɛ sane ko he lɛ, ani no tsɔɔ akɛ esaaa akɛ wɔtsakeɔ wɔyiŋkpɛɛ lɛ ekɔɔɔ he eko nɔ ni baaba?

BƆ FƐƐ BƆ NI FEE LƐ, WƆBAAKPƐ WƆYIŊ YƐ NƆ KO HE

4. Mɛni Adam kpɛ eyiŋ akɛ ebaafee? Ni mɛni jɛ mli kɛba?

4 Kɛjɛ be ni Nyɔŋmɔ bɔ adesai lɛ, mɛi srɔtoi ekpɛ amɛyiŋ yɛ saji ni he hiaa ahe. Akɛ nɔkwɛmɔnɔ lɛ, ehe bahia ni Adam akpɛ eyiŋ kɛji ebaabo mɔ ni bɔ lɛ lɛ toi aloo ebaabo eŋa Hawa toi. Adam jɛ esuɔmɔ mli ekpɛ eyiŋ akɛ ebaabo eŋa lɛ toi. Shi kɛ́ okwɛ lɛ, ani ekpɛ eyiŋ yɛ nilee mli? Dabi kwraa! Eyiŋkpɛɛ gbonyo nɛɛ hã Paradeiso lɛ kɛ ewala tete ŋmɛɛ lɛ. Ni kɛbashi ŋmɛnɛ lɛ, wɔmiina amane yɛ nakai yiŋ gbonyo ni ekpɛ lɛ hewɔ.

5. Te esa akɛ wɔna hegbɛ ni Nyɔŋmɔ kɛduro wɔ akɛ wɔkpɛ wɔyiŋ yɛ saji ahe lɛ wɔhã tɛŋŋ?

5 Mɛi komɛi susuɔ akɛ eji ehe ehiaaa ni wɔkpɛ wɔyiŋ yɛ nɔ ko kwraa he kulɛ, shihilɛ baaŋɔɔ waa. Ekolɛ bo hu onuɔ he nakai. Shi kaimɔ akɛ, Yehowa ebɔɔɔ wɔ tamɔ tsɔji. Tsɔji bɛ jwɛŋmɔ. Shi wɔ lɛ, Yehowa eduro wɔ jwɛŋmɔ koni wɔnyɛ wɔsusu nibii ahe ni wɔkpɛ wɔyiŋ. Kɛfata he lɛ, ehã wɔ Biblia lɛ koni no aye abua wɔ ni wɔkpɛ wɔyiŋ yɛ nilee mli. Wɔ diɛŋtsɛ wɔsɛɛnamɔ hewɔ Yehowa miisumɔ ni wɔkpɛ wɔyiŋ yɛ saji ahe lɛ. Mɛni hewɔ wɔkɛɔ nakai?

6, 7. Mɛni ehe bahia ni Israelbii lɛ akpɛ amɛyiŋ yɛ he? Ni mɛni hewɔ amɛnáaa lɛ mlɛo akɛ amɛbaakpɛ yiŋ ni ja lɛ? (Kwɛmɔ mfoniri ni yɔɔ nikasemɔ lɛ shishijee lɛ.)

6 Be ni Israelbii lɛ yɔɔ Shiwoo Shikpɔŋ lɛ nɔ lɛ, ehe bahia ni amɛkpɛ amɛyiŋ kɛji amɛbaajá Yehowa aloo amɛbaajá nyɔŋmɔi krokomɛi. (Kanemɔ Yoshua 24:15.) Kɛji amɛhala akɛ amɛbaajá Yehowa jio, amɛhala akɛ amɛbaajá nyɔŋmɔi krokomɛi jio lɛ, efeemɔ waaa. Shi kɛ́ amɛjá Yehowa lɛ, amɛbaaná wala, ni kɛ́ amɛjá nyɔŋmɔi krokomɛi lɛ, amɛnáŋ wala. Ani Israelbii lɛ nyɛ amɛkpɛ amɛyiŋ yɛ nilee mli? Dabi. Yɛ kojolɔi lɛ abeiaŋ lɛ, amɛkpa yɛ Yehowa sɛɛ shii abɔ ni amɛyajá amale nyɔŋmɔi. (Koj. 2:3, 11-23) Afii komɛi asɛɛ, yɛ gbalɔ Elia beiaŋ lɛ, ehe bahia ni Nyɔŋmɔ webii lɛ akpɛ amɛyiŋ ekoŋŋ yɛ sane ko he. Ani amɛbaasɔmɔ Yehowa, aloo amɛbaasɔmɔ amale nyɔŋmɔ ni atsɛɔ lɛ Baal lɛ? (1 Maŋ. 18:21) Kulɛ, esaaa akɛ ewaa kɛhãa Israelbii lɛ akɛ amɛbaakpɛ amɛyiŋ yɛ sane nɛɛ he, ejaakɛ kɛ́ amɛsɔmɔ Yehowa lɛ, amɛbaaná he sɛɛ, ni no baatsɔɔ akɛ amɛhiɛ kã shi. Mɛi ni hiɛ kãaa shi pɛ baashi Yehowa sɛɛ ni amɛyajá nyɔŋmɔ ko ni wala bɛ emli. Fɛɛ sɛɛ lɛ, Israelbii lɛ enaaa nɔ ni amɛfeɔ. ‘Amɛdidã yɛ saji enyɔ teŋ.’ No hewɔ lɛ, Elia kã amɛhiɛ, ni ejɛ hiɛshikamɔ mli ewo amɛ hewalɛ ni amɛsɔmɔ Yehowa, anɔkwa Nyɔŋmɔ lɛ.

7 Mɛni eeenyɛ efee akɛ no hã ewa kɛhã Israelbii lɛ akɛ amɛbaakpɛ yiŋ ni ja yɛ sane nɛɛ he? Klɛŋklɛŋ lɛ, amɛheee Yehowa nɔ amɛyeee, ni amɛŋmɛ amɛyiŋ kpɔ akɛ amɛboŋ lɛ toi dɔŋŋ. Amɛkaseee Yehowa he nii, ni amɛkɛ ehe nilee ni amɛyɔɔ momo lɛ hu tsuuu nii. Kɛfata he lɛ, amɛkɛ amɛhiɛ efɔ̃ɔɔ enɔ. Eji amɛkase Yehowa he nii ni amɛkɛ nibii ni amɛkase lɛ tsu nii kulɛ, amɛbaakpɛ amɛyiŋ yɛ nilee mli. (Lala 25:12) Nɔ ni ji enyɔ lɛ, Israelbii lɛ hã mɛi ni bɔle amɛ lɛ anifeemɔi kɛ amɛsusumɔi  ná amɛnɔ hewalɛ. Israelbii lɛ hã amagajalɔi nɛɛ tsɔɔ amɛ nɔ ni amɛfee kɛ nɔ ni amɛkafee, ni amɛyafata amɛhe kɛjá amɛmagai lɛ. No mli lɛ, Yehowa ejɛ jeeŋmɔ ebɔ amɛ kɔkɔ akɛ amɛkanyiɛ mɛi asɛɛ kɛyafee efɔŋ.2 Mose 23:2.

ANI ESA AKƐ WƆHÃ MƐI KROKOMƐI AKPƐ YIŊ AHÃ WƆ?

8. Mɛɛ nɔ ko ni he hiaa wɔkaseɔ yɛ Israelbii lɛ asane lɛ mli?

8 Israelbii lɛ asane lɛ hãa wɔnaa akɛ, eji wɔteŋ mɔ fɛɛ mɔ sɔ̃ akɛ lɛ diɛŋtsɛ ekpɛ eyiŋ yɛ saji ahe. Ehãa wɔnaa hu akɛ, ja wɔkase Nyɔŋmɔ Wiemɔ lɛ dani wɔbaanyɛ wɔkpɛ wɔyiŋ yɛ nilee mli. Biblia lɛ kɛɔ akɛ: “Mɔ fɛɛ mɔ baatere lɛ diɛŋtsɛ ejatsu ni ji esɔ̃.” (Gal. 6:5, sh. niŋ.) No hewɔ lɛ, esaaa akɛ wɔkɛ sɔ̃ nɛɛ tereɔ mɛi krokomɛi; esaaa akɛ wɔhãa mɛi krokomɛi kpɛɔ yiŋ amɛhãa wɔ. Moŋ lɛ, esa akɛ wɔ diɛŋtsɛ wɔkase Nyɔŋmɔ he nii koni wɔle esuɔmɔnaa nii ni wɔfee.

9. Mɛni hewɔ eyɔɔ oshara akɛ wɔbaahã mɛi krokomɛi akpɛ yiŋ ahã wɔ lɛ?

9 Mɛɛ gbɛ nɔ kɛ́ wɔkwɛɛɛ ni ahi lɛ, wɔbaahã mɛi krokomɛi akpɛ yiŋ ahã wɔ? Kɛ́ wɔhã mɛi nyɛ wɔnɔ ni no hã wɔyafee nɔ ko ni ejaaa lɛ, wɔhã amɛkpɛ yiŋ amɛhã wɔ, ni enɛ yɛ oshara. (Abɛi 1:10, 15) Ekɔɔɔ he eko bɔ ni mɛi baanyɛ wɔnɔ ahã lɛ, eji wɔsɔ̃ akɛ wɔdamɔ wɔhenilee ni wɔkɛ Biblia lɛ etsɔse lɛ nɔ wɔkpɛ wɔyiŋ yɛ saji ahe. Kɛ́ wɔhã mɛi krokomɛi kpɛ yiŋ amɛhã wɔ lɛ, bei pii lɛ, nɔ ni etsɔɔ ji akɛ wɔkpɛ wɔyiŋ akɛ wɔbaanyiɛ amɛsɛɛ, ni yiŋkpɛɛ nɛɛ baanyɛ ekɛ naagbai babaoo aba.

10. Mɛni Paulo bɔ Kristofoi ni yɔɔ Galatia lɛ kɔkɔ yɛ he?

10 Bɔfo Paulo bɔ Kristofoi ni yɔɔ Galatia lɛ kɔkɔ akɛ, amɛkahã mɛi krokomɛi kpɛ yiŋ amɛhã amɛ yɛ saji ni ashi ahã mɔ fɛɛ mɔ koni lɛ diɛŋtsɛ ekpɛ eyiŋ yɛ he lɛ amli, ejaakɛ nakai feemɔ yɛ oshara. (Kanemɔ Galatiabii 4:17.) Nyɛmimɛi komɛi ni yɔɔ nakai asafo lɛ mli lɛ kɛ amɛsusumɔi fi nyɛmimɛi krokomɛi anɔ. Mɛni hewɔ? Koni nyɛmimɛi nɛɛ abanyiɛ amɛsɛɛ, moŋ fe ni amɛbaanyiɛ bɔfoi lɛ asɛɛ. Nɔ ni amɛfee nɛɛ hã efee faŋŋ akɛ, amɛnyɛmimɛi Kristofoi lɛ ahilɛkɛhamɔ jeee amɛhe sane, ni amɛbuuu hegbɛ ni amɛnyɛmimɛi lɛ yɔɔ akɛ amɛ diɛŋtsɛ amɛkpɛɔ amɛyiŋ yɛ saji ahe lɛ.

11. Mɛɛ gbɛ nɔ wɔbaanyɛ wɔye wɔbua mɛi krokomɛi be ni amɛkpɛɔ amɛyiŋ yɛ saji ahe lɛ?

 11 Paulo ekpɛɛɛ yiŋ ehãaa enyɛmimɛi Kristofoi lɛ, ejaakɛ ele akɛ amɛyɛ hegbɛ ni amɛ diɛŋtsɛ amɛkpɛɔ amɛyiŋ yɛ saji ahe. Enɛ ji nɔkwɛmɔnɔ kpakpa kɛhã wɔ. (Kanemɔ 2 Korintobii 1:24.) Ŋmɛnɛ lɛ, eyɛ mli akɛ asafoŋ onukpai baanyɛ awo amɛnyɛmimɛi Kristofoi lɛ ŋaa yɛ saji ni esa akɛ mɔ fɛɛ mɔ akpɛ eyiŋ yɛ he lɛ ahe moŋ, shi esa akɛ amɛkase Paulo. Esa akɛ amɛkwɛ jogbaŋŋ ni amɛkakpɛ yiŋ amɛhã amɛ. Be ni amɛtsɔɔ nyɛmi ko nɔ ni Nyɔŋmɔ Wiemɔ lɛ kɛɔ yɛ sane ko he lɛ amɛgbe naa lɛ, esa akɛ amɛshi mɔ lɛ koni lɛ diɛŋtsɛ ekpɛ eyiŋ yɛ nɔ ni ebaafee he. Nilee yɛ mli akɛ amɛbaafee nakai, ejaakɛ nɔ fɛɛ nɔ ni baajɛ yiŋkpɛɛ lɛ mli kɛba, ekpakpa jio, efɔŋ jio lɛ, mɔ lɛ ni baatere. Naa nɔ ko ni he hiaa waa ni esa akɛ wɔkadi: Wɔbaanyɛ wɔgbala mɛi krokomɛi ajwɛŋmɔ kɛya Biblia mli shishitoo mlai loo ŋaawoi ni baanyɛ aye abua amɛ lɛ anɔ. Shi loloolo lɛ, eji amɛ diɛŋtsɛ amɛsɔ̃ akɛ amɛbaakpɛ amɛyiŋ yɛ nɔ ni amɛbaafee he. Kɛ́ amɛkpɛ amɛyiŋ yɛ nilee mli lɛ, amɛbaaná he sɛɛ. Wɔkasusu kɔkɔɔkɔ akɛ wɔyɛ hegbɛ ni wɔkpɛɔ yiŋ wɔhãa wɔnyɛmimɛi Kristofoi lɛ.

Asafoŋ onukpai ni yɔɔ suɔmɔ lɛ yeɔ amɛbuaa mɛi krokomɛi koni amɛ diɛŋtsɛ amɛkpɛ amɛyiŋ yɛ saji ahe (Kwɛmɔ kuku 11)

KAAHÃ OHENUMƆI KUDƆ OYIŊKPƐI

12, 13. Mɛni hewɔ eyɔɔ oshara akɛ wɔbaahã wɔhenumɔi akudɔ wɔ?

12 Mɛi pii susuɔ akɛ ejeee tɔmɔ akɛ amɛbaafee nɔ ni amɛtsui sumɔɔ. Shi enɛ feemɔ yɛ oshara, ni yɛ gbɛ ko nɔ lɛ, eteɔ shi ewoɔ Ŋmalɛi lɛ po. Biblia lɛ kɛɔ akɛ wɔkanyiɛ wɔhenumɔi loo wɔtsui ni yeee emuu lɛ sɛɛ. (Abɛi 28:26) Mɛni hewɔ? Ejaakɛ “tsui yɔɔ nɛɛ, eyi tɔ kɛ kutumpɔo fe nii fɛɛ, ni esane ehiii kwraa.” (Yer. 17:9) Saji pii yɛ Biblia lɛ mli ni hãa wɔnaa akɛ, kɛ́ wɔnyiɛ wɔtsui sɛɛ lɛ, wɔyagbeŋ naa ekpakpa. (Yer. 3:17; 13:10; 1 Maŋ. 11:9) Mɛɛ naagbai baanyɛ aba kɛji wɔfee nɔ fɛɛ nɔ ni wɔtsui kɛɔ wɔ akɛ wɔfee lɛ?

13 Yehowa efã wɔ akɛ wɔsumɔ lɛ kɛ wɔtsui fɛɛ, ni wɔsumɔ wɔnaanyo gbɔmɔ tamɔ wɔ diɛŋtsɛ wɔhe. (Mat. 22:37-39) Shi ŋmalɛi ni atsɛ yɛ kuku ni tsɔ hiɛ lɛ mli lɛ hãa wɔnaa akɛ, kɛ́ wɔyadi wɔtsui loo wɔhenumɔi asɛɛ lɛ, wɔnyɛŋ wɔsusu nibii ahe jogbaŋŋ ni no baanyɛ ahã wɔfee nibii ni esaaa. Akɛ nɔkwɛmɔnɔ lɛ, kɛ́ mɛi amli fu lɛ, ewa akɛ amɛbaakpɛ amɛyiŋ yɛ nilee mli. (Abɛi 14:17; 29:22) Nakai nɔŋŋ kɛ́ mɔ ko nijiaŋ je wui lɛ, ewa akɛ ebaakpɛ yiŋ ni ja yɛ saji ahe. (4 Mose 32:6-12; Abɛi 24:10) Biblia lɛ hãa wɔleɔ akɛ, nilee yɛ mli akɛ wɔbaahã Nyɔŋmɔ mla lɛ akudɔ wɔjwɛŋmɔ. (Rom. 7:25) No hewɔ lɛ, kɛ́ ehe bahia ni wɔkpɛ wɔyiŋ yɛ sane ko ni he hiaa he lɛ, esa akɛ wɔkwɛ jogbaŋŋ ni wɔkahã wɔhenumɔi kudɔ wɔ.

ANI ESA AKƐ OTSAKE OJWƐŊMƆ?

14. Mɛni hãa wɔnaa akɛ, ejeee tɔmɔ akɛ mɔ ko baatsake ejwɛŋmɔ yɛ yiŋ ko ni ekpɛ lɛ he?

14 Esa akɛ wɔkpɛ wɔyiŋ yɛ nilee mli. Shi kɛ́ wɔkpɛ wɔyiŋ yɛ nilee mli po lɛ, bei komɛi lɛ, ehe baahia ni wɔsusu yiŋkpɛɛ lɛ he ekoŋŋ, ni wɔkwɛ kɛji esa akɛ wɔtsake wɔjwɛŋmɔ. Yehowa fee enɛ he nɔkwɛmɔnɔ. Ekpɛ eyiŋ akɛ ebaakpãtã Ninivebii ni hi shi yɛ Yona beiaŋ lɛ ahiɛ. Shi be ni “Nyɔŋmɔ na amɛnifeemɔ nii lɛ, akɛ amɛkpale kɛjɛ amɛgbɛ fɔŋ lɛ nɔ” lɛ, eshwa ehe loo etsake ejwɛŋmɔ “yɛ efɔŋ ní ekɛɛ ebaafee amɛ lɛ hewɔ, ni efeee.” (Yona 3:10) Be ni Yehowa na akɛ Ninivebii lɛ etsake amɛtsui, ni amɛkpa nibii gbohii ni amɛfeɔ lɛ, lɛ hu etsake yiŋ ni ekpɛ yɛ amɛhe lɛ. Enɛ hãa wɔnaa akɛ, Yehowa nuɔ nii ashishi, ebaa ehe shi, ni eyɛ musuŋtsɔlɛ. Kɛfata he lɛ, Nyɔŋmɔ tamɔɔɔ adesai, ejaakɛ kɛ́ emli fu po lɛ, ekpɛɔ eyiŋ yɛ nilee mli.

15. Mɛɛ yiŋtoi ahewɔ ekolɛ ehe baahia ni wɔtsake yiŋ ko ni wɔkpɛ lɛ?

15 Bei komɛi lɛ, ehi akɛ wɔbaasusu yiŋ  ko ni wɔkpɛ lɛ he ekoŋŋ wɔkwɛ. Ekolɛ, kɛjɛ be ni wɔkpɛ nakai yiŋ lɛ, nibii etsake, ni no hewɔ lɛ, ehe baahia ni wɔ hu wɔtsake wɔjwɛŋmɔ. Yehowa po tsake ejwɛŋmɔ yɛ yiŋ komɛi ni ekpɛ lɛ ahe be ni nibii tsake. (1 Maŋ. 21:20, 21, 27-29; 2 Maŋ. 20:1-5) Kɛ́ wɔná wɔle saji hei yɛ yiŋ ko ni wɔkpɛ momo lɛ he lɛ, no hu baanyɛ ahã wɔsusu nakai yiŋkpɛɛ lɛ he ekoŋŋ. Be ko lɛ, afolɔ Saul nabi Mefiboshet naa ahã Maŋtsɛ David, ni no hã ekpɛ yiŋ ko ni ejaaa. Sɛɛ mli be ni David ná ele anɔkwale ni yɔɔ sane lɛ mli lɛ, etsake yiŋ ni ekpɛ lɛ. (2 Sam. 16:3, 4; 19:25-30) Bei komɛi lɛ, nilee yɛ mli akɛ wɔ hu wɔbaafee nakai.

16. (a) Mɛni ji nibii komɛi ni baaye abua wɔ ni wɔkpɛ wɔyiŋ yɛ nilee mli? (b) Mɛni hewɔ esa akɛ wɔsusu yiŋ komɛi ni wɔkpɛ momo lɛ ahe ekoŋŋ? Ni mɛɛ gbɛ nɔ wɔbaanyɛ wɔfee nakai?

16 Biblia lɛ woɔ wɔ ŋaa ni wɔto wɔtsui shi kɛ́ ehe bahia ni wɔkpɛ wɔyiŋ yɛ sane ko ni he hiaa lɛ he. (Abɛi 21:5, Ga Biblia hee) Kɛ́ wɔhe be kɛsusu saji ahe jogbaŋŋ dani wɔkpɛ wɔyiŋ lɛ, ewaaa akɛ wɔbaakpɛ yiŋ ni ja. (1 Tes. 5:21) Dani wekuyitso ko baakpɛ eyiŋ yɛ sane ko he lɛ, esa akɛ ehe be kɛpɛi Ŋmalɛi lɛ kɛ asafo lɛ woji lɛ amli, ni ebo nibii ni mɛi krokomɛi ni yɔɔ weku lɛ mli lɛ yɔɔ kɛɛmɔ lɛ toi. Kɛ́ obaakai lɛ, Nyɔŋmɔ kɛɛ Abraham akɛ ebo eŋa lɛ toi. (1 Mose 21:9-12) Esa akɛ asafoŋ onukpai hu ahe be kɛtao nibii amli. Kɛfata he lɛ, esaaa akɛ efeɔ amɛ hiɛgbele, loo ewaa kɛhãa amɛ akɛ amɛbaatsake amɛjwɛŋmɔ yɛ yiŋ ko ni amɛkpɛ lɛ he kɛji ehe bahia ni amɛfee nakai yɛ saji hei komɛi ni amɛná amɛle lɛ ahewɔ. Kɛ́ amɛfee nakai lɛ, no baatsɔɔ akɛ amɛnuɔ nii ashi, ni amɛbaa amɛhe shi, ni no baafee nɔkwɛmɔnɔ kpakpa kɛhã asafoŋbii lɛ fɛɛ. Ni kɛ́ asafoŋbii lɛ kase sui kpakpai nɛɛ lɛ, toiŋjɔlɛ kɛ ekomefeemɔ baahi asafo lɛ mli.Bɔf. 6:1-4.

FEEMƆ NƆ NI OKPƐ OYIŊ AKƐ OBAAFEE LƐ

17. Te wɔbaafee tɛŋŋ wɔkpɛ yiŋ ni ja yɛ saji ahe?

17 Yiŋkpɛi komɛi yɛ hiɛdɔɔ fe ekrokomɛi. Yiŋkpɛi ni yɔɔ hiɛdɔɔ nɛɛ eko ji, kɛji wɔbaabote gbalashihilɛ mli loo wɔbaahi shi oshija. Ni kɛ́ wɔkpɛ wɔyiŋ akɛ wɔbaabote gbalashihilɛ mli lɛ, ehe baahia ni wɔkpɛ wɔyiŋ yɛ mɔ ni wɔbaasumɔ ni wɔkɛhi shi lɛ he. Ekroko hu ji, be ni wɔbaasumɔ ni wɔkɛ wɔhe awo be fɛɛ sɔɔmɔ nitsumɔ lɛ mli, kɛ bɔ ni wɔbaafee wɔfee nakai. Dani wɔbaakpɛ wɔyiŋ yɛ saji nɛɛ kɛ ekrokomɛi ni tamɔ nakai lɛ ahe lɛ, esa akɛ wɔsɔle ni wɔsusu nibii ahe kɛya shɔŋŋ, ni ekolɛ enɛ baahe be. Kɛfata he lɛ, esa akɛ wɔkɛ wɔhiɛ afɔ̃ Yehowa nɔ kwraa akɛ ebaatsɔɔ wɔ gbɛ ni esa akɛ wɔkɔ. (Abɛi 1:5) Ŋaawoi ni yɔɔ Biblia lɛ mli lɛ anɔ bɛ, no hewɔ lɛ, esa akɛ wɔkɛ wɔhe afɔ̃ nɔ, ni wɔsɔle koni Yehowa atsɔɔ wɔ gbɛ. Be fɛɛ be lɛ, esa akɛ wɔkai akɛ, Yehowa baanyɛ aduro wɔ sui ni baaye abua wɔ ni wɔyiŋkpɛi kɛ esuɔmɔnaa nii akpã gbee. Dani wɔbaakpɛ wɔyiŋ yɛ sane ko ni he hiaa lɛ he lɛ, esa akɛ wɔhã efee wɔsu akɛ wɔbaabi wɔhe akɛ: ‘Ani miyiŋkpɛɛ lɛ baatsɔɔ akɛ misumɔɔ Yehowa? Ani ebaahã miishɛɛ kɛ toiŋjɔlɛ ahi miweku lɛ mli? Ani ebaatsɔɔ akɛ mitoɔ mitsui shi ni mimli hi?’

18. Mɛni hewɔ Yehowa miisumɔ ni wɔ diɛŋtsɛ wɔkpɛ wɔyiŋ yɛ saji ahe lɛ?

18 Yehowa enyɛɛɛ wɔnɔ ni wɔsumɔ lɛ ni wɔsɔmɔ lɛ. Eduro wɔ heyeli. No hewɔ lɛ, wɔyɛ hegbɛ ni wɔ diɛŋtsɛ wɔhalaa kɛji wɔbaasɔmɔ lɛ loo wɔsɔmɔɔɔ lɛ. (Yosh. 24:15; Jaj. 5:3) Kɛ̃lɛ, kɛ́ wɔdamɔ Biblia lɛ nɔ wɔkpɛ wɔyiŋ yɛ nɔ ko he lɛ, eekpa gbɛ akɛ wɔbaatsu wɔyiŋkpɛɛ lɛ he nii. Kɛ́ wɔhe wɔye akɛ gbɛtsɔɔmɔi kɛ shishitoo mlai fɛɛ ni Yehowa ejɛ mlihilɛ mli ekɛhã wɔ lɛ hi lɛ, no baaye abua wɔ ni wɔkpɛ wɔyiŋ yɛ nilee mli, ni wɔfi shi yɛ wɔgbɛi fɛɛ mli.Yak. 1:5-8; 4:8.