Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 WALA SHIHILƐ HE SANE

Mikɛ Hiɛshikalɔi Enyiɛ, Ni Miná He Sɛɛ

Mikɛ Hiɛshikalɔi Enyiɛ, Ni Miná He Sɛɛ

GBI ko leebi lɛ, mikɛ mɛi fioo ko damɔ tsũ ko ni akɛ kooloi aniyenii toɔ mli lɛ mli. No mli lɛ, kɔɔyɔɔ lɛ mli ejɔ fioo, ni no hã mina akɛ etsɛŋ fɛ̃i baaba waa. Ayɛ nu ni mli ejɔ awo dade tanki ko ni ma wɔhiɛ mli. Sane nɛɛ ba afii babaoo ni eho nɛ yɛ maŋ ko ni atsɛɔ lɛ Brookings, ni yɔɔ South Dakota, yɛ U.S.A. lɛ. Shi mɛni wɔtee feemɔ yɛ nakai tsũ lɛ mli? Hã magba bo mihe sane fioo, koni ona nɔ ni wɔtee feemɔ yɛ jɛmɛ.

MIWEKU LƐ HE SANE

Mitsɛkwɛ̃ Alfred kɛ mipapa

Afɔ mi yɛ March 7, 1936, ni miji mifɔlɔi abii ejwɛ lɛ anaagbee mɔ. Wɔhi ŋmɔ bibioo ko nɔ yɛ South Dakota anaigbɛ. Okwaayeli kɛ kooloi alɛɛ ji nitsumɔ titri ni wɔweku lɛ tsu, shi nitsumɔ kroko ko yɛ ni wɔbu lɛ akɛ ehe miihia fe nomɛi po. Abaptisi mifɔlɔi akɛ Yehowa Odasefoi yɛ afi 1934. Akɛni amɛjɔɔ amɛhe nɔ amɛhã Yehowa, wɔ-Tsɛ ni yɔɔ ŋwɛi lɛ hewɔ lɛ, nɔ ni kã amɛtsui nɔ fe fɛɛ ji ni amɛbaafee Nyɔŋmɔ suɔmɔnaa nii. Atsɛɔ mipapa Clarence, ni esɔmɔ akɛ asafo sɔɔlɔ (nɔ ni amrɔ nɛɛ atsɛɔ lɛ onukpai akuu lɛ saji ahe gbɛjianɔtolɔ) yɛ asafo bibioo ni wɔyɔɔ mli lɛ mli yɛ Conde, yɛ South Dakota. Sɛɛ mli lɛ, mitsɛkwɛ̃ Alfred hu ná sɔɔmɔ hegbɛ nɛɛ.

Wɔweku lɛ kɛ shiɛmɔ yɛ shĩai amli kɛ Kristofoi akpeeiyaa shwɛɛɛ kwraa. Wɔgba mɛi krokomɛi nibii kpakpai ni Biblia lɛ ewie akɛ Nyɔŋmɔ baafee ehã adesai lɛ. Nɔkwɛmɔnɔ kpakpa ni wɔfɔlɔi fee amɛhã wɔ lɛ kɛ bɔ ni amɛtsɔse wɔ jogbaŋŋ lɛ, bote wɔtsuiŋ tɔ̃ɔ ni ená wɔnɔ hewalɛ kpakpa. Mi kɛ minyɛmi yoo Dorothy fɛɛ tsɔmɔ shiɛlɔi be ni wɔye afii ekpaa. Yɛ afi 1943 lɛ, miŋma migbɛ́i yɛ Teokrase Sɔɔmɔ Skul lɛ ni no mli lɛ aje shishi etsɛko lɛ mli.

Afi 1952 be ni misɔmɔɔ akɛ gbɛgbalɔ lɛ

Nɔ kroko ni wɔweku lɛ kɛshwɛɛɛ kwraa ji kpokpaa nɔ kpeei kɛ kpokpaa wulu nɔ kpeei. Yɛ kpokpaa wulu nɔ kpee ko ni afee yɛ afi 1949 yɛ  Sioux Falls, ni yɔɔ South Dakota lɛ, Nyɛminuu Grant Suiter hã wiemɔ ko ni yitso ji, “Ebɛŋkɛ Fe Bɔ Ni Osusuɔ!” Mikaiɔ nakai maŋshiɛmɔ lɛ lolo. Yɛ nakai maŋshiɛmɔ lɛ mli lɛ, ehã efee faŋŋ akɛ esa akɛ Kristofoi fɛɛ ni ejɔɔ amɛhe nɔ lɛ kɛ amɛbe kɛ amɛhewalɛ fɛɛ ashiɛ Nyɔŋmɔ Maŋtsɛyeli lɛ he sane kpakpa lɛ. Enɛ tsirɛ mi ni mijɔɔ mihe nɔ mihã Yehowa. Abaptisi mi yɛ kpokpaa nɔ kpee ni afee yɛ Brookings yɛ kpee wulu nɛɛ sɛɛ nɔŋŋ lɛ shishi. No ji nɔ ni miwie he yɛ sane nɛɛ shishijee lɛ akɛ wɔdamɔ he ko ni akɛ kooloi aniyenii toɔ lɛ. Abaptisi wɔyi ejwɛ nakai gbi lɛ, ni ji November 12, 1949, yɛ nakai dade tanki lɛ mli.

No sɛɛ lɛ, mikpɛ miyiŋ akɛ matsɔ daa gbɛgbalɔ, ni yɛ January 1, 1952 lɛ, mishɛ oti nɛɛ he. No mli lɛ, miye afii 15. Biblia lɛ kɛɔ akɛ: “Mɔ ni kɛ nilelɔi nyiɛɔ lɛ, eeetsɔ nilelɔ.” (Abɛi 13:20) Miná nilelɔi pii yɛ miweku lɛ mli, ni amɛye amɛbua mi ni minyɛ mitsu gbɛgbamɔ nitsumɔ lɛ. Amɛteŋ mɔ kome ji mitsɛkwɛ̃ Julius, ni no mli lɛ eye afii 60 lɛ. Eyɛ mli akɛ eye mi onukpa kwraa moŋ, shi efata mihe kɛtsu gbɛgbamɔ nitsumɔ lɛ, ni wɔná miishɛɛ waa yɛ shiɛmɔ nitsumɔ lɛ mli. Akɛni eyɛ niiashikpamɔ yɛ shihilɛ mli hewɔ lɛ, mikase nibii pii yɛ edɛŋ. Etsɛɛɛ ni Dorothy hu batsɔ daa gbɛgbalɔ.

KPOKPAA NƆKWƐLƆI YE AMƐBUA MI

Be ni miji oblanyo lɛ, mifɔlɔi fɔ̃ kpokpaa nɔkwɛlɔi srɔtoi kɛ amɛŋamɛi nine ni amɛbahi wɔŋɔɔ. Amɛteŋ mɔ kome ji Nyɛminuu Jesse Cantwell kɛ eŋa Lynn, ni amɛye amɛbua mi waa. Amɛfata mɛi ni wo mi hewalɛ ni matsu gbɛgbamɔ nitsumɔ lɛ ahe. Bɔ ni amɛná dekã amɛhã mi lɛ kanya mi ni mikɛ mumɔŋ otii mamɔ mihiɛ. Bei komɛi kɛ́ amɛmiisɔmɔ asafoi ni bɛŋkɛ wɔshĩa lɛ, amɛfɔ̃ɔ mi nine ni mibafata amɛhe ni wɔya shiɛmɔ. Enɛ wo mi hewalɛ, ni ehã miná miishɛɛ waa!

Yɛ amɛsɛɛ lɛ, Nyɛminuu Bud Miller kɛ eŋa Joan, basɔmɔ wɔ. No mli lɛ, miye afii 18, ni maŋ lɛ kpa gbɛ akɛ mikɛ mihe baawo asraafoi anitsumɔ lɛ mli. Amralofoi ni tsɛɔ mɛi kɛhãa asraafoi anitsumɔ lɛ hã mi nitsumɔ ko akɛ mitsu. Shi minu he akɛ nitsumɔ nɛɛ teɔ shi ewoɔ gbɛtsɔɔmɔ ni Yesu kɛhã akɛ esɛɛnyiɛlɔi lɛ kɛ amɛhe akawo maŋkwramɔŋ saji amli lɛ. (Yoh. 15:19) Akɛni miitao maya nɔ mashiɛ Maŋtsɛyeli lɛ he sane kpakpa lɛ hewɔ lɛ, mihã amɛle akɛ sane kpakpa shiɛlɔ ji mi, ni mikpa amɛ fai ni amɛkɛ mi akawo asraafoi anitsumɔ lɛ mli.

Be ni miyana amralofoi lɛ, Nyɛminuu Miller fata mihe kɛtee, ni enɛ hã miná miishɛɛ waa. Nyɛminuu Miller sheee nɔ ko nɔ ko gbeyei, ewaaa hãaa lɛ  akɛ ekɛ mɛi baabɔ naanyo, ni ele Ŋmalɛi lɛ amli hu jogbaŋŋ. Ehã miná ekãa ko! Sɛɛ mli yɛ afi 1954 teŋgbɛ lɛ, amralofoi lɛ kpɛlɛ nɔ akɛ esaaa akɛ akɛ mi woɔ asraafoi anitsumɔ lɛ mli. Enɛ hã minyɛ mishɛ mumɔŋ oti kroko ni mikɛma mihiɛ lɛ he.

Mikɛ tsɔne nɛɛ tsu nii be ni miba Betel ehee lɛ

Be ni amralofoi lɛ kpɛlɛ nɔ akɛ amɛkɛ mi woŋ asraafoi anitsumɔ lɛ mli lɛ sɛɛ etsɛɛɛ ni afɔ̃ mi nine ni mibasɔmɔ yɛ Betel. Ahã miyatsu nii yɛ Watchtower Farm ni yɔɔ Staten Island yɛ New York lɛ. Misɔmɔ yɛ jɛmɛ aaafee afii etɛ. Miná niiashikpamɔi babaoo ni yɔɔ miishɛɛ ejaakɛ mikɛ nilelɔi pii kpe yɛ jɛmɛ ni mikɛ amɛ tsu nii.

BETEL SƆƆMƆ

Mikɛ Nyɛminuu Franz sha mfoniri nɛɛ yɛ WBBR

No mli lɛ, asafo lɛ redio steshɛŋ ni ji WBBR lɛ yɛ Staten Island he ni wɔtsuɔ nii yɛ lɛ. Asafo lɛ kɛ redio steshɛŋ nɛɛ tsu nii kɛjɛ afi 1924 kɛyashi afi 1957. Betel weku lɛ mli bii 15 kɛmiimɔ 20 pɛ tsu nii yɛ ŋmɔ lɛ mli kɛ he ni alɛɔ kooloi lɛ yɛ lɛ. Wɔteŋ mɛi ni tsu nii yɛ jɛmɛ lɛ ateŋ mɛi pii yɛ wɔblahiiaŋ kɛ wɔblayeiaŋ, ni wɔbɛ niiashikpamɔ. Shi no mli lɛ, nyɛmi nuu ko ni afɔ lɛ mu ni hiɛ efã saŋŋ lɛ fata wɔhe. Atsɛɔ lɛ Eldon Woodworth, ni ekɛ wɔ hi shi tamɔ tsɛ kɛ ebii. Ehiɛ kã shi waa, ni etsɔse wɔ jogbaŋŋ. Mikaiɔ akɛ bei komɛi lɛ, wɔkɛ wɔhe béɔ fiofio, ni kɛ́ eba lɛ nakai lɛ, Nyɛminuu Woodworth kɛɔ akɛ, “Kɛ́ okwɛ mɛi ni Nuŋtsɔ lɛ kɛtsuɔ nii kɛ nɔ ni enyɛ ekɛ amɛ etsu lɛ, eyɛ naakpɛɛ waa.”

Harry Peterson kɛ shiɛmɔ nitsumɔ lɛ shwɛɛɛ kwraa

Wɔná hegbɛ ni nɔ bɛ akɛ wɔkɛ Nyɛminuu Frederick W. Franz baatsu nii. Nyɛminuu Franz le Ŋmalɛi lɛ amli jogbaŋŋ, ni enɛ ná wɔnɔ hewalɛ. Ená wɔteŋ mɔ fɛɛ mɔ he miishɛɛ. Mɔ ni hoo nii ehã wɔ ji Nyɛminuu Harry Peterson; egbɛ́i diɛŋtsɛ ji Papargyropoulos, shi wɔkɛ no efɔɔɔ lɛ tsɛmɔ ejaakɛ etsɛmɔ wa. Lɛ hu efata mɛi ni afɔ amɛ mu lɛ ahe, ni enyaa shiɛmɔ nitsumɔ lɛ he waa. Nyɛminuu Peterson kɛ nitsumɔ ni etsuɔ yɛ Betel lɛ shwɛɛɛ kwraa, shi ekuuu ehiɛ efɔ̃ɔɔ shiɛmɔ nitsumɔ lɛ nɔ. Daa nyɔɔŋ nɔ lɛ, ehãa magazin ohai abɔ. Agbɛnɛ hu, ele Ŋmalɛi lɛ amli jogbaŋŋ. Wɔbibii lɛ saji babaoo, ni ehã hetoo.

MIKASE NII YƐ NYƐMIMƐI YEI NI HIƐ KÃ SHI ADƐŊ

No mli lɛ, ayɛ he ko yɛ ŋmɔ lɛ mli ni wɔkɛ ŋmɔshi nibii lɛ yaa koni akɛwo tɔi kɛ tsɛnsii amli ni amɛkafite. Daa afi lɛ, wɔfeɔ aduawai kɛ ŋmɔshi nibii krokomɛi tsɛnsii 45,000 loo nɔ wɔhãa Betel weku lɛ. Miná hegbɛ mikɛ Nyɛmiyoo Etta Huth tsu nitsumɔ nɛɛ. Nyɛmi yoo nɛɛ hiɛ kã shi waa. Lɛ ji mɔ ni tsɔɔ wɔ bɔ ni wɔtsu ŋmɔshi nibii lɛ ahe nii wɔhã.  Nyɛmimɛi yei komɛi jɛɔ asafoi lɛ amli amɛbayeɔ amɛbuaa wɔ kɛ nitsumɔ lɛ, ni nyɛmi yoo nɛɛ nɔŋŋ ji mɔ ni tsɔɔ amɛ nɔ ni amɛtsu. Yɛ nitsumɔ wulu ni Nyɛmiyoo Huth tsuɔ lɛ fɛɛ sɛɛ lɛ, eba ehe shi ehã nyɛmimɛi ni atuu ŋmɔ lɛ mli nitsumɔ lɛ awo amɛdɛŋ akɛ amɛkwɛ nɔ lɛ be fɛɛ be ni ebu amɛ. Efee nɔkwɛmɔnɔ kpakpa ehã wɔ fɛɛ.

Mi kɛ Angela, kɛ Etta Huth

Nyɛmimɛi yei oblayei ni bayeɔ amɛbuaa kɛhã nitsumɔ lɛ ateŋ mɔ kome ji Angela Romano. Be ni eba anɔkwale lɛ mli lɛ, Etta ye ebua lɛ. Mikɛ Angela bote gbalashihilɛ mli yɛ April 1958, ni wɔhi shi akɛ wu kɛ ŋa afii 58. Wɔná sɔɔmɔ hegbɛi babaoo. Angie hiɛ kã shi ni eyeɔ Yehowa anɔkwa, ni enɛ ehã wɔgbãla lɛ esɔ waa. Ekɔɔɔ he eko naagbai ni wɔkɛbaakpe lɛ, misheee gbeyei, ejaakɛ mile akɛ manyɛ mikɛ mihiɛ afɔ̃ enɔ.

MISƆMƆ AKƐ MAŊSƐƐ SƆƆLƆ KƐ NƆKWƐLƆ GBƐFALƆ

Yɛ afi 1957 lɛ, asafo lɛ hɔ̃ɔ WBBR redio steshɛŋ lɛ kɛ ehe nibii fɛɛ ni yɔɔ Staten Island lɛ. No hewɔ lɛ, miyasɔmɔ yɛ Brooklyn Betel be kukuoo ko. No sɛɛ ni mikɛ Angie bote gbalashihilɛ mli lɛ. Be ni wɔbote gbalashihilɛ mli lɛ, mishi Betel, ni wɔkɛ aaafee afii etɛ sɔmɔ akɛ gbɛgbalɔi yɛ Staten Island. Mitsu nii mihã mɛi ni bahe redio steshɛŋ lɛ kɛyashi be ko. Redio steshɛŋ hee nɛɛ gbɛ́i ji WPOW.

Mi kɛ Angie tswa wɔfai shi akɛ wɔbaahã wɔshihilɛ afee mlɛo, bɔ ni afee ni wɔnyɛ wɔtsu nitsumɔ fɛɛ nitsumɔ ni asafo lɛ kɛbaawo wɔdɛŋ. Enɛ hewɔ lɛ, yɛ afi 1961 shishijee gbɛ, be ni akɛɛ wɔyasɔmɔ akɛ gbɛgbalɔi krɛdɛi yɛ Falls City, yɛ Nebraska lɛ, wɔnyɛ wɔtee. Shi wɔyeee be tsɔ yɛ jɛmɛ, kɛkɛ ni afɔ̃ wɔ nine ni wɔba Maŋtsɛyeli Sɔɔmɔ Skul lɛ yɛ South Lansing, yɛ New York. No beiaŋ lɛ, skul lɛ heɔ nyɔɔŋ kome. Skul lɛ hã wɔná miishɛɛ waa, ni wɔyasusu akɛ abaahã wɔyatsa wɔnitsumɔ akɛ gbɛgbalɔi krɛdɛi yɛ Nebraska lɛ nɔ. No hewɔ lɛ, be ni akɛɛ wɔ akɛ wɔbaayasɔmɔ akɛ maŋsɛɛ sɔɔlɔi yɛ Cambodia lɛ, wɔnaa kpɛ wɔhe waa. Cambodia yɛ Asia Wuoyi-anaigbɛ, ni jɛmɛ yɛ fɛo waa. Nibii ni wɔna, nibii ni wɔnu, kɛ nibii ni wɔye yɛ jɛmɛ lɛ yɛ srɔto kwraa, ni wɔshwe waa akɛ wɔshiɛ sane kpakpa lɛ wɔhã mɛi ni yɔɔ jɛmɛ lɛ.

Shi be ni maŋkwramɔŋ saji hã maŋ lɛ mli fee hirihiri lɛ, wɔfã kɛtee South Vietnam. Dɔlɛ sane ji akɛ, afii enyɔ sɛɛ lɛ, hela bamɔ mi waa, no hewɔ lɛ, wɔku wɔsɛɛ kɛtee United States. Ehe bahia ni wɔkɛ be fɛɛ sɔɔmɔ nitsumɔ lɛ afɔ̃ shi fioo kɛyashi miná hewalɛ. Shi be ni miná hewalɛ nɔŋŋ ni wɔje shishi ekoŋŋ.

Mikɛ Angela sha mfoniri nɛɛ yɛ 1975, dani abibii wɔ sane yɛ TV nɔ

Yɛ March 1965 lɛ, ahã mibɔi sɔɔmɔ akɛ nɔkwɛlɔ gbɛfalɔ, ni wɔyasɔmɔ asafoi srɔtoi. Wɔkɛ afii 33 tsu nitsumɔ nɛɛ, ni misɔmɔ akɛ kpokpaa nɔkwɛlɔ kɛ kpokpaa wulu nɔkwɛlɔ. Wɔye wɔbua kɛto kpokpaa wulu kpeei ahe gbɛjianɔ. Nitsumɔ nɛɛ hã miná miishɛɛ, ejaakɛ minyaa kpokpaa wulu nɔ kpeei ahe waa. Wɔkɛ afii komɛi sɔmɔ asafoi ni yɔɔ New York City kɛ ehewɔŋ, ni no hewɔ lɛ, wɔfee kpeei wuji babaoo yɛ Yankee Stadium.

WƆKU SƐƐ KƐBA BETEL NI MITSU NII YƐ SKUL SRƆTOI AMLI

Tamɔ eji yɛ mɛi pii ni yɔɔ be fɛɛ sɔɔmɔ krɛdɛɛ lɛ mli lɛ agbɛfaŋ lɛ, Yehowa asafo lɛ ehã wɔ nitsumɔi hei srɔtoi ni tsumɔ yɔɔ tɔlɛ kɛ miishɛɛ fɛɛ. Akɛ nɔkwɛmɔnɔ lɛ, yɛ afi 1995 lɛ, ahã mitsɔɔ nii yɛ Sɔɔmɔ Tsɔsemɔ Skul lɛ. No sɛɛ afii etɛ lɛ, afɔ̃ wɔ nine ni wɔku wɔsɛɛ wɔba Betel. Miná miishɛɛ waa akɛ miiku  misɛɛ kɛmiiya he ni mije be fɛɛ sɔɔmɔ krɛdɛɛ nitsumɔ lɛ shishi yɛ nɔ ni fe afii 40 nɛ lɛ. Ahã mitsu nii fioo yɛ Service Department lɛ, ni mitsɔɔ nii yɛ skul srɔtoi amli. Yɛ afi 2007 lɛ, Gbɛtsɔɔmɔ Kuu lɛ to Theocratic Schools Department lɛ shishi koni ekwɛ skul srɔtoi ni afeɔ yɛ Betel lɛ anɔ, ni miná hegbɛ mikɛ afii komɛi sɔmɔ akɛ mɔ ni kwɛɔ Department nɛɛ nɔ.

Nyɛsɛɛ nɛɛ, afee tsakemɔi srɔtoi yɛ skul srɔtoi lɛ amli. Yɛ afi 2008 lɛ, aje Skul Kɛha Asafoŋ Onukpai lɛ shishi. Yɛ afii enyɔ pɛ mli lɛ, atsɔɔ asafoŋ onukpai 12,000 kɛ sɛɛ nii yɛ Patterson kɛ Brooklyn Betel. Amrɔ nɛɛ, ato gbɛjianɔ koni afee skul nɛɛ yɛ hei srɔtoisrɔtoi, ni atsɔse nyɛmimɛi komɛi koni amɛtsɔɔ nii yɛ skul lɛ mli. Yɛ afi 2010 lɛ, atsake Sɔɔmɔ Tsɔsemɔ Skul lɛ gbɛ́i, ni afee lɛ Biblia Skul Kɛha Nyɛmimɛi Hii Oshijafoi, kɛkɛ ni atse skul hee ni ji Biblia Skul Kɛha Kristofoi Gbalashihilɛ Mli Hefatalɔi lɛ.

Yɛ afi 2015 sɔɔmɔ afi lɛ shishijee lɛ, afee skul srɔtoi enyɔ nɛɛ ekome, ni awo lɛ gbɛ́i akɛ Skul Kɛhã Maŋtsɛyeli Sane Kpakpa Jajelɔi. Gbalashihilɛ mli bii, nyɛmimɛi hii oshijafoi, kɛ nyɛmimɛi yei oshijafoi fɛɛ baanyɛ aya skul nɛɛ eko. Nyɛmimɛi ni yɔɔ je lɛŋ hei srɔtoi amii shɛ amɛhe waa be ni amɛnu akɛ abaafee skul nɛɛ yɛ amɛmaji lɛ hu anɔ. Eyɛ miishɛɛ waa akɛ agbɛnɛ lɛ, nyɛmimɛi babaoo ená hegbɛ akɛ amɛbaaya skul srɔtoi nɛɛ eko, ni midaa Yehowa shi waa akɛ miná hegbɛ mikɛ nyɛmimɛi pii ni kɛ nibii eshã afɔle koni amɛnyɛ amɛya skul srɔtoi nɛɛ eko lɛ egba sane.

Kɛ́ miku mikuɛ mikwɛ bɔ ni nibii etee lɛ ehã kɛjɛ migbekɛbiiashi dani abaabaptisi mi yɛ nakai dade tanki lɛ mli, aahu kɛbashi ŋmɛnɛ lɛ, midaa Yehowa shi waa akɛ mikɛ mɛi ni hiɛ kã shi ebɔ ni amɛye amɛbua mi yɛ esɔɔmɔ lɛ mli. Miye amɛteŋ mɛi komɛi onukpa, ni amɛteŋ mɛi komɛi hu ye mi onukpa, ni jeee he kome wɔ fɛɛ wɔjɛ. Shi yɛ amɛtsuiŋ tɔ̃ɔ lɛ, amɛsumɔɔ Nyɔŋmɔ, ni enɛ je kpo faŋŋ yɛ amɛsubaŋ kɛ amɛnifeemɔ mli. Hiɛshikalɔi pii yɛ Yehowa asafo lɛ mli ni wɔbaanyɛ wɔkɛ amɛ anyiɛ. Mikɛ amɛteŋ mɛi komɛi enyiɛ, ni manyɛ mawie kɛ nɔmimaa akɛ, miná he sɛɛ waa.

Eŋɔɔ minaa akɛ mikɛ skulbii ni jɛ maji srɔtoi anɔ egba sane