Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Kɛ́ Naagba Ko Ba Dani Anaa Naanyo Kpakpa

Kɛ́ Naagba Ko Ba Dani Anaa Naanyo Kpakpa

Gianni kɛ Maurizio ehi shi akɛ nanemɛi aaafee afii 50 sɔŋŋ. Shi be ko lɛ, shwɛ sharao ni nɔ ko fite amɛnaanyobɔɔ lɛ. Maurizio wie akɛ: “Ebashɛ be ko ni nibii eyaaa lɛ jogbaŋŋ ehãaa mi kwraa. Mitɔ̃ tɔmɔi komɛi ni yɔɔ hiɛdɔɔ, ni enɛ bɔi wɔteŋ fitemɔ fiofio.” Gianni kɛfata he akɛ: “Maurizio ni kɛ mi bɔi Biblia lɛ kasemɔ. Mibɔ mɔdɛŋ akɛ makase lɛ. No hewɔ lɛ, nɔ ni efee lɛ fee mi naakpɛɛ waa. Mina akɛ fitemɔ nɔŋŋ kɛ̃ wɔnaanyobɔɔ lɛ baafite. Minu he akɛ, mibɛ mɔ ko dɔŋŋ, tamɔ nɔ ni aŋmɛɛ mihe yɛ ŋshɔ lɛ teŋ.”

NANEMƐI kpakpai anɔ bɛ. Shi kɛ́ naanyobɔɔ ko baahi shi daa lɛ, ebiɔ mɔdɛŋbɔɔ. No hewɔ lɛ, kɛ́ naagba ko miihe afite okɛ onaanyo ko teŋ lɛ, mɛni obaanyɛ ofee kɛbaa nyɛnaanyobɔɔ lɛ yi? Wɔbaanyɛ wɔkase nɔ ko yɛ bɔ ni nanemɛi kpakpai komɛi ni awie amɛhe yɛ Biblia lɛ mli lɛ tsu naagbai komɛi ni baanyɛ afite amɛnaanyobɔɔ lɛ he nii amɛhã lɛ mli.

KƐ́ ONAANYO LƐ TƆ̃

Maŋtsɛ David, ni be ko ni eho lɛ eji tookwɛlɔ lɛ, ná nanemɛi kpakpai pii. Amɛteŋ mɔ kome ni wɔle waa ji Yonatan. (1 Sam. 18:1) Shi no mli lɛ, David yɛ nanemɛi krokomɛi hu, tamɔ gbalɔ Natan nɛkɛ. Biblia lɛ etsɔɔɔ wɔ be ni David kɛ Natan batsɔmɔ nanemɛi. Shi wɔle akɛ, be ko lɛ, David tsɛ Natan ni ekɛ lɛ gba eyitsoŋ sane. Ekɛɛ lɛ akɛ eetao ema tsũ ehã Yehowa. Bɔ ni David bi Natan ŋaawoo yɛ sane nɛɛ he lɛ hãa wɔnaa akɛ, nanemɛi ji amɛ. David le akɛ Natan baawo lɛ ŋaa kpakpa, ejaakɛ Yehowa mumɔ lɛ yɛ Natan nɔ.2 Sam. 7:2, 3.

Shi be ko lɛ, naagba ko ba ni kulɛ ebaanyɛ efite amɛnaanyobɔɔ lɛ. Maŋtsɛ David kɛ Batsheba yafite gbãla, ni sɛɛ mli lɛ, ehã agbe ewu  Uria hu. (2 Sam. 11:2-21) David eye Yehowa anɔkwa, ni eye jalɛsane afii babaoo. No hewɔ lɛ, mɛni ba ni maŋtsɛ kpakpa nɛɛ yafee eshai ni yɔɔ hiɛdɔɔ nɛkɛ? Ani enaaa akɛ nɔ ni eyaafee lɛ ehiii kwraa? Aloo eyasusu akɛ ebaanyɛ efee ni ekɛtee Nyɔŋmɔ?

Mɛni Natan baafee yɛ sane nɛɛ he? Jeee lɛ pɛ ená ele nɔ ni David efee lɛ. Mɛi krokomɛi hu ná amɛle. No hewɔ lɛ, kulɛ ebaanyɛ ekpɛ eyiŋ akɛ ebaafee diŋŋ koni mɛi krokomɛi ni le sane lɛ kɛ David ayawie, bɔ ni afee ni ekɛ lɛ teŋ naanyobɔɔ lɛ akafite. Kɛ́ Natan yawie lɛ, ekolɛ David baanyɛ ehã agbe lɛ po. Ani jeee lɛ nɔŋŋ ehã agbe Uria ni efeko nɔ ko lɛ?

Shi Natan efeee diŋŋ. No mli lɛ, eesɔmɔ akɛ Nyɔŋmɔ naawielɔ, ni ele akɛ kɛ́ efee diŋŋ yɛ sane nɛɛ he lɛ, ehenilee baagba enaa, ni enyɛŋ ekɛ David ahi shi tamɔ nɔ ni nɔ ko bako. Yehowa sumɔɔɔ nɔ ni David efee lɛ, ni esa akɛ eye ebua lɛ ni esaa ekɛ Yehowa teŋ. Ehe bahia ni Natan atsɔɔ akɛ naanyo kpakpa ji lɛ. No hewɔ lɛ, etee ekɛ Maŋtsɛ David yawie. Natan tao nɔkwɛmɔnɔ ko ni ekɛkpa esane lɛ hiɛ, ni nɔkwɛmɔnɔ ni ehala lɛ ta David, ni be ko ni eho lɛ eji tookwɛlɔ lɛ tsuiŋ. Natan kɛɛ David nɔ ni Nyɔŋmɔ tsu lɛ ni eyakɛɛ lɛ lɛ, shi bɔ ni ewie lɛ ehã lɛ ye ebua David ni ena bɔ ni eshai ni efee lɛ yɔɔ hiɛdɔɔ hã, ni no tsirɛ lɛ ni etsake etsui.2 Sam. 12:1-14.

Kɛ́ onaanyo ko fee nɔ ko ni ehiii kwraa aloo efee esha ko ni yɔɔ hiɛdɔɔ lɛ, mɛni obaafee? Ani obaaya ni okɛ lɛ ayawie nɔ ni efee lɛ he? Ani obaayabɔ asafoŋ onukpai lɛ koni amɛye amɛbua lɛ ni esaa ekɛ Yehowa teŋ? Ekolɛ, obaanu he akɛ, kɛ́ okɛ lɛ yawie lɛ, nyɛnaanyobɔɔ lɛ baafite. Aloo kɛ́ oyabɔ asafoŋ onukpai lɛ, belɛ jeee naanyo kpakpa ji bo. Shi ani esa akɛ ofee diŋŋ?

Gianni, ni wɔtsĩ etã kɛtsɔ hiɛ lɛ wie akɛ: “Miyɔse akɛ Maurizio etsake. Ekɛ saji ebɔi mi teemɔ. No hewɔ lɛ, mikpɛ miyiŋ akɛ maya eŋɔɔ ni mikɛ lɛ ayawie nɔ ni efee lɛ he. Shi mináaa enɛ feemɔ mlɛo kwraa. Mibi mihe akɛ: ‘Mɛni makɛɛ lɛ ni eleee? Ekolɛ emli baafu mi waa!’ Shi mikai nibii ni ekɛ mi ekase lɛ, ni no wo mi hewalɛ ni mikɛ lɛ ayawie. Be ni yelikɛbuamɔ he hiaa mi lɛ, Maurizio efeee diŋŋ. Mina akɛ sane nɛɛ baanyɛ afite wɔnaanyobɔɔ lɛ, shi miyɔse hu akɛ esa akɛ maye mabua minaanyo lɛ ejaakɛ esane kã mitsui nɔ.”

Maurizio wie akɛ: “Gianni hã mile faŋŋ akɛ, nɔ ni mifee lɛ yɛ hiɛdɔɔ, ni mijeee enɛ he ŋwane. Mikpɛlɛ nɔ akɛ jeee lɛ loo Yehowa ni efee mi nɔ ko; mi diɛŋtsɛ mifee mihe. No hewɔ lɛ, mikpɛlɛ tsɔsemɔ ni akɛhã mi lɛ nɔ, ni yɛ be ni sa mli lɛ, mihe bawa yɛ mumɔŋ ekoŋŋ.”

KƐ́ ONAANYO LƐ HE FI LƐ

David nanemɛi krokomɛi hu ye lɛ anɔkwa yɛ jaramɔ bei amli. Amɛteŋ mɔ kome ji Hushai. Biblia lɛ tsɛɔ Hushai akɛ “David naanyo.” (2 Sam. 16:16; 1 Kron. 27:33) Eeenyɛ efee akɛ, maŋtsɛ lɛ naanyo lɛ sɔmɔ yɛ maŋtsɛwe lɛ, ni ekɛ maŋtsɛ lɛ bɔ gbagbalii. Kɛ́ maŋtsɛ lɛ yɛ teemɔŋ nɔ ko ni eetao atsu he nii lɛ, eeenyɛ efee akɛ bei komɛi lɛ, lɛ edɛŋ ekɛwoɔ.

Be ni David binuu Absalom shɔ̃ maŋtsɛyeli lɛ yɛ edɛŋ lɛ, Israelbii pii yafi Absalom sɛɛ, shi Hushai efeee nakai. Be ni David joɔ ebinuu lɛ naa foi lɛ, Hushai kɛ lɛ tee. David diɛŋtsɛ bi kɛ mɛi krokomɛi ni emuɔ efɔ̃ɔ amɛnɔ lɛ te shi amɛwo lɛ, ni enɛ dɔ lɛ waa diɛŋtsɛ. Shi Hushai ye lɛ anɔkwa. Be ni David tsu lɛ ni eyafite eyi nɔ ni Absalom kɛ ewebii lɛ kpaŋɔ lɛ, etee, eyɛ mli akɛ no kɛ ewala wo oshara mli. Jeee maŋtsɛ lɛ tsulɔ ni Hushai ji lɛ pɛ kɛkɛ hewɔ etee tsumɔ lɛ, shi moŋ naanyo anɔkwafo ni eji lɛ hu hewɔ.2 Sam. 15:13-17, 32-37; 16:15–17:16.

Ŋmɛnɛ lɛ, wɔnyɛmimɛi Kristofoi lɛ hu kɛ wɔ bɔɔ naanyo, jeee yɛ nitsumɔ ko loo sɔɔmɔ hegbɛ ko ni atuu awo wɔdɛŋ yɛ asafo lɛ mli lɛ hewɔ, shi moŋ yɛ wɔsane ni kã amɛtsui nɔ waa lɛ hewɔ. Amɛkɛ amɛnifeemɔ tsɔɔ akɛ nanemɛi kpakpai ji amɛ, ni enɛ hãa wɔmii shɛɔ wɔhe.

 Nyɛmi nuu ko ni atsɛɔ lɛ Federico lɛ niiashikpamɔ maa enɛ nɔ mi. Enaanyo ko ni esumɔɔ esane waa ni atsɛɔ lɛ Antonio lɛ ye ebua lɛ be ni eyaje shihilɛ ko ni jaraa lɛ mli. Federico wie akɛ: “Be ni Antonio ba wɔsafo lɛ mli lɛ, eyeee be ko ni wɔbatsɔmɔ nanemɛi. No mli lɛ, wɔ fɛɛ wɔmiisɔmɔ kɛ miishɛɛ akɛ asafoŋ sɔɔlɔi. Etsɛɛɛ ni awó lɛ asafoŋ onukpa. Yɛ minaanyo ni eji lɛ sɛɛ lɛ, efee nɔkwɛmɔnɔ kpakpa ehã mi.” Kɛkɛ ni Federico yafee esha ko ni yɔɔ hiɛdɔɔ. Etee asafoŋ onukpai lɛ aŋɔɔ amrɔ nɔŋŋ, ni amɛye amɛbua lɛ. Shi ehe bahia ni ekɛ esɔɔmɔ hegbɛi ni eyɔɔ akɛ gbɛgbalɔ kɛ asafoŋ sɔɔlɔ lɛ afɔ̃ shi dã. Te Antonio fee enii ehã tɛŋŋ yɛ nɔ ni eba lɛ he?

Be ni Federico yaje shihilɛ ko ni jaraa mli lɛ, enaanyo Antonio bo lɛ toi ni ewo lɛ hewalɛ

Federico wie akɛ: “Mina akɛ sane lɛ edɔ Antonio waa tamɔ bɔ ni edɔ mi lɛ nɔŋŋ. Efee bɔ fɛɛ bɔ ni ebaanyɛ ni ekɛshɛje mimii ni ewo mi hewalɛ. Eye ebua mi waa ni misaa wekukpaa ni yɔɔ mi kɛ Yehowa teŋ lɛ. Ekwaaa mi. Ewo mi hewalɛ ni mifee nibii ni baahã manyɛ madamɔ minaji anɔ ekoŋŋ yɛ asafo lɛ mli, ni ekɛɛ mi akɛ minijiaŋ akaje wui.” Antonio hu wie akɛ: “Mikɛ Federico bɔ waa fe be ni eho lɛ po. Mifee nakai koni enyɛ egba mi nibii fɛɛ ni haoɔ lɛ, kɛ bɔ ni enuɔ he ehãa yɛ nɔ ni eba lɛ he ni esheee gbeyei.” Miishɛɛ sane ji akɛ, sɛɛ mli lɛ, Federico nyɛ ebadamɔ enaji anɔ ekoŋŋ, ni fee sɛɛ lɛ, enyɛ esɔmɔ akɛ gbɛgbalɔ kɛ asafoŋ sɔɔlɔ ekoŋŋ. Antonio wie kɛmu naa akɛ: “Amrɔ nɛɛ, wɔbɛ asafo kome mli, shi wɔnaanyobɔɔ lɛ mli ewa fe tsutsu lɛ po.”

KƐ́ ONAANYO LƐ YEEE BO ANƆKWA

Kɛ́ onaanyo kpakpa ko kwa bo be ni yelikɛbuamɔ he miihia bo waa lɛ, te obaanu he ohã tɛŋŋ? Ebaadɔ bo waa, aloo jeee nakai? Shi ani okɛ etɔmɔ lɛ baake lɛ? Ani okɛbaake lɛ kwraa ni okɛ lɛ ahi shi tamɔ nɔ ni nɔ ko bako?

Susumɔ nɔ ni ba Yesu kɛ ebɔfoi anɔkwafoi lɛ ateŋ be ni eshwɛ fioo ni abaagbe lɛ lɛ he okwɛ. Yesu kɛ ebɔfoi lɛ bɔ gbagbalii diɛŋtsɛ, ni amɛbasumɔ amɛhe waa. Ebɛ naakpɛɛ akɛ etsɛ amɛ enanemɛi. (Yoh. 15:15) Shi be ni amɔ Yesu lɛ, ani ole nɔ ni amɛfee? Amɛjo foi amɛshi lɛ. No mli lɛ, Petro etsɔ hiɛ ewie  yɛ amɛ fɛɛ amɛhiɛ akɛ ekwaŋ Yesu kɔkɔɔkɔ. Shi nakai gbɛkɛ lɛ nɔŋŋ lɛ, etso akɛ eleee e-Nuŋtsɔ lɛ!Mat. 26:31-33, 56, 69-75.

Yesu le momo akɛ ekaselɔi lɛ fɛɛ baajo foi amɛshi lɛ. Shi no etsɔɔɔ akɛ nɔ ni amɛfee lɛ ja gbɛ aloo ebɛ dɔlɛ. Fɛɛ sɛɛ lɛ, yɛ eshitee lɛ sɛɛ gbii fioo ko be ni ekɛ amɛ wieɔ lɛ, nɔ ko nɔ ko etsɔɔɔ akɛ enu he akɛ amɛhã enine enyɛ shi. Emli fuuu amɛ, ni asaŋ eshwaaa ehe akɛ ehala amɛ akɛ ekaselɔi. Yesu kaneee amɛfatɔi lɛ fɛɛ ekomekome yɛ amɛhiɛ, ní etsɔɔ amɛ nibii gbohii fɛɛ ni amɛfee nakai gbɛkɛ ni amɔ lɛ lɛ.

Moŋ lɛ, Yesu shɛje Petro kɛ bɔfoi krokomɛi lɛ amii ni ewo amɛ hewalɛ. Etuu nitsumɔ ni he hiaa fe fɛɛ yɛ adesai ayinɔsane mli lɛ ewo amɛdɛŋ, ni etsɔɔ amɛ bɔ ni amɛtsu lɛ amɛhã. Enɛ hã amɛná nɔmimaa akɛ, emuɔ efɔ̃ɔ amɛnɔ. Yesu hãaa nɔ ni eba lɛ afite ekɛ amɛ teŋ naanyobɔɔ lɛ. Suɔmɔ ni ejie lɛ kpo etsɔɔ amɛ lɛ ta amɛtsuiŋ waa. No hewɔ lɛ, amɛbɔ mɔdɛŋ waa akɛ amɛhãŋ amɛ-Nuŋtsɔ lɛ nine anyɛ shi dɔŋŋ. Anɔkwa, amɛtsu nitsumɔ ni ekɛwo amɛdɛŋ lɛ amɛgbe naa owula kosɛɛ.Bɔf. 1:8; Kol. 1:23.

Nyɛmi yoo ko ni atsɛɔ lɛ Elvira lɛ kaiɔ sane ko ni ba ekɛ enaanyo ko ni esumɔɔ esane waa ni atsɛɔ lɛ Giuliana lɛ teŋ. Ewie akɛ: “Be ni ekɛɛ mi akɛ nɔ ni mifee lɛ edɔ lɛ waa diɛŋtsɛ lɛ, sane lɛ gba minaa. Mina faŋŋ akɛ, mifeee ni ahi. Shi nɔ ni fee mi fɛo waa yɛ ehe ji akɛ, no po gbaaa enaa tamɔ bɔ ni misubaŋ gbonyo lɛ baaye mi awui ahã lɛ. Nɔ titri ni ye etsui ji, bɔ ni mi diɛŋtsɛ miyeɔ mihe awui lɛ, shi jeee bɔ ni nɔ ni mifee lɛ egba enaa ehã, ni mihiɛ kpaŋ enɛ nɔ kɔkɔɔkɔ. Mida Yehowa shi akɛ eduro mi naanyo ko ni sumɔɔ mi fe lɛ diɛŋtsɛ ehe po.”

Yɛ nibii ni wɔsusu he lɛ anaa lɛ, te naanyo kpakpa baafee enii ehã tɛŋŋ kɛ́ naagba ba? Kɛ́ ehe bahia lɛ, ebaajɛ mlihilɛ mli ekɛ wɔ awie ni eshiuuu wɔ nɔ ko nɔ. Ebaaye wɔ anɔkwa yɛ fimɔ beiaŋ po, tamɔ bɔ ni Natan kɛ Hushai fee lɛ, ni ebaafee enii tamɔ Yesu, mɔ ni jɛ esuɔmɔ mli ekɛ eshai ke lɛ. No hewɔ lɛ, ani naanyo kpakpa ji bo?