Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Ŋɔɔ Woo Ohã Mɛi Ni Sa Woo

Ŋɔɔ Woo Ohã Mɛi Ni Sa Woo

“Aŋɔ jɔɔmɔ kɛ woo kɛ anunyam kɛ nyɛmɔ ahã mɔ ni ta maŋtsɛ sɛi lɛ nɔ lɛ kɛ Gwantɛŋbi lɛ kɛya naanɔi anaanɔ.”KPOJ. 5:13.

LALAI: 9, 108

1. Mɛni hewɔ mɛi komɛi sa woo lɛ? Mɛɛ sanebimɔi wɔbaahã hetoo yɛ nikasemɔ nɛɛ mli?

KƐ́ AKƐƐ akɛ woo ahã mɔ ko lɛ, nɔ ni etsɔɔ ji, ni akɛ mɔ lɛ baaye yɛ gbɛ krɛdɛɛ nɔ ni ajie bulɛ kpo atsɔɔ lɛ. No hewɔ lɛ, jeee mɔ fɛɛ mɔ kɛkɛ sa woo. Mɛi ni efee nɔ ko ni sa kadimɔ, loo amɛyɔɔ hegbɛ krɛdɛɛ ko lɛ, ji mɛi ni sa woo. Enɛ hewɔ lɛ, ekolɛ obaabi akɛ, ‘Namɛi esa akɛ mikɛ woo ahã? Ni mɛni hewɔ esa akɛ mafee nakai?’ Wɔbaahã sanebimɔi nɛɛ ahetoo yɛ nikasemɔ nɛɛ mli.

2, 3. (a) Mɛni hewɔ esa jogbaŋŋ akɛ wɔbaawo Yehowa lɛ? (Kwɛmɔ mfoniri ni yɔɔ nikasemɔ lɛ shishijee lɛ.) (b) Namɔ ji Gwantɛŋbi ni awie ehe yɛ Kpojiemɔ 5:13 lɛ? Ni mɛni hewɔ esa woo lɛ?

2 Kpojiemɔ 5:13 lɛ kɛɔ akɛ, “mɔ ni ta maŋtsɛ sɛi lɛ nɔ lɛ kɛ Gwantɛŋbi lɛ” sa woo. Shi mɛni hewɔ Yehowa sa woo lɛ? Kpojiemɔ yitso 4 lɛ tsɔɔ wɔ yiŋtoo kome hewɔ. Ewieɔ akɛ mɛi ni yɔɔ ŋwɛi lɛ kɛ gbee ni wa jie Yehowa, “mɔ ni ta maŋtsɛ sɛi lɛ nɔ ni hiɛ kã kɛmiiya naanɔi anaanɔ lɛ” yi amɛkɛɛ: “Yehowa wɔ-Nyɔŋmɔ, bo ji mɔ ni sa akɛ oŋɔ anunyam lɛ kɛ woo lɛ kɛ hewalɛ lɛ, ejaakɛ bo obɔ nibii fɛɛ, ni osuɔmɔ naa hewɔ amɛba shihilɛ mli ni abɔ amɛ.”Kpoj. 4:9-11.

 3 Namɔ ji Gwantɛŋbi lɛ, ni mɛni hewɔ esa woo? Be ni Yesu Kristo yɔɔ shikpɔŋ lɛ nɔ lɛ, awie yɛ ehe akɛ lɛ ji “Nyɔŋmɔ Gwantɛŋbi ni wóɔ je lɛ he esha lɛ kɛyaa lɛ.” (Yoh. 1:29) Enɛ ji yiŋtoo kome hewɔ ni esa woo lɛ. Biblia lɛ wieɔ hu akɛ, Yesu nɔ kwɔ kwraa fe adesai maŋtsɛmɛi fɛɛ ni ebaho kɛ mɛi ni yɔɔ amrɔ nɛɛ. Ekɛɔ akɛ: “Lɛ ji mɛi ni yeɔ nɔ akɛ maŋtsɛmɛi lɛ a-Maŋtsɛ, kɛ mɛi ni yeɔ nɔ akɛ nuŋtsɔmɛi lɛ a-Nuŋtsɔ, mɔ hu ni lɛ ekome pɛ eyɔɔ gbɔmɔtso ni gbooo, ní ehiɔ la ni anyɛŋ abɛŋkɛ mli lɛ, mɔ ni gbɔmɔ ko gbɔmɔ ko enako lɛ dã, ni enyɛŋ lɛ ena hu lɛ.” (1 Tim. 6:14-16) Yɛ Yesu sɛɛ lɛ, ani ole maŋtsɛ ko ni ejɛ esuɔmɔ mli ekɛ ewala eshã afɔle akɛ kpɔmɔnɔ ehã ewebii? Enɛ hewɔ lɛ, esa akɛ wɔkɛ bɔfoi akpei abɔ ni yɔɔ ŋwɛi lɛ afee ekome ni wɔkɛ gbee ni wa akɛɛ akɛ: “Gwantɛŋbi lɛ ni agbe lɛ lɛ sa akɛ eŋɔ hewalɛ kɛ ninámɔ kɛ hiɛshikamɔ kɛ nyɛmɔ kɛ woo kɛ anunyam kɛ jɔɔmɔ lɛ.”Kpoj. 5:12.

4. Kɛ́ wɔkɛ woo hãaa Yehowa kɛ Kristo lɛ, mɛni baaba?

4 Kɛ́ wɔkɛ woo hãaa Yehowa kɛ Kristo lɛ, wɔnáŋ naanɔ wala. Yohane 5:22, 23 lɛ kɛɔ akɛ: “Tsɛ lɛ ekojooo mɔ ko mɔ ko, shi moŋ etu kojomɔ lɛ fɛɛ ewo Bi lɛ dɛŋ, koni mɛi fɛɛ kɛ woo ahã Bi lɛ tamɔ bɔ ni amɛkɛ woo hãa Tsɛ lɛ. Mɔ fɛɛ mɔ ni kɛ woo hãaa Bi lɛ, ekɛ woo hãaa Tsɛ lɛ ni tsu lɛ lɛ hu.”Kanemɔ Lala 2:11, 12.

5. Mɛni hewɔ adesai fɛɛ sa woo kɛ bulɛ lɛ?

5 “Nyɔŋmɔ bɔ gbɔmɔ yɛ esubaŋ lɛ nɔ.” (1 Mose 1:27) Enɛ hewɔ lɛ, mɛi babaoo jieɔ Yehowa sui lɛ eko kɛ̃ kpo. Akɛ nɔkwɛmɔnɔ lɛ, mɛi jieɔ suɔmɔ, mlihilɛ, kɛ musuŋtsɔlɛ kpo amɛtsɔɔ mɛi krokomɛi. Kɛfata he lɛ, eyɛ mli akɛ mɛi komɛi feɔ amɛnii oookɛɛ amɛbɛ henilee moŋ, shi adesai fɛɛ yɛ eko. Yɛ wɔfɔmɔsu naa lɛ, wɔnyɛɔ wɔnaa kɛji nɔ ko ja loo ejaaa, kɛ́ ehi loo ehiii, ni wɔle nibii ni kɛ́ mɔ ko fee lɛ ebaatsɔɔ akɛ eyeɔ anɔkwa, kɛ nɔ ni kɛ́ efee lɛ ebaatsɔɔ akɛ eyeee anɔkwa. (Rom. 2:14, 15) Kɛ́ nɔ ko he tse ni eyɛ fɛo lɛ, wɔsumɔɔ, aloo jeee nakai? Ni namɔ sumɔŋ ni ekɛ mɛi krokomɛi ahi shi yɛ toiŋjɔlɛ mli? Nibii nɛɛ fɛɛ tsɔɔ akɛ, adesai fɛɛ jieɔ Yehowa anunyam lɛ eko kɛ̃ kpo, ni no hewɔ lɛ, amɛsa woo kɛ bulɛ.Lala 8:6.

KƐ́ AKƐƐ WƆWO MƐI LƐ, TE ESA AKƐ WƆFEE LƐ TƐŊŊ?

6, 7. Mɛɛ gbɛ nɔ esoro Yehowa Odasefoi yɛ mɛi babaoo ahe?

6 Esa akɛ wɔkɛ woo ahã mɛi krokomɛi ni wɔbu amɛ. Shi te esa akɛ wɔfee lɛ tɛŋŋ? Ŋmɛnɛ lɛ, Satan je lɛ mumɔ lɛ ená mɛi babaoo anɔ hewalɛ waa. Enɛ hewɔ lɛ, mɛi komɛi buɔ jamɔŋ hiɛnyiɛlɔi, maŋkwralɔi, kɛ mɛi ni bɔɔ mɔdɛŋ yɛ akaŋshii kɛ hiɛtserɛjiemɔ mli lɛ fe nine, ni amɛkɛ woo srɔto ko hãa amɛ, oookɛɛ jamɔ kwraa amɛtaoɔ amɛjá amɛ nɛɛ. Mɛi komɛi po naa amɛ tamɔ ŋwɛibɔfoi, ni amɛkaseɔ amɛhesaamɔ, amɛsubaŋ, kɛ amɛnifeemɔ.

7 Shi anɔkwa Kristofoi efeee amɛnii nakai. Amɛkɛ woo srɔto ko hãaa adesa ko adesa ko. Yɛ adesai fɛɛ ni ehi shi pɛŋ lɛ ateŋ lɛ, Kristo pɛ ji mɔ ni fee nɔkwɛmɔnɔ ni eye emuu ehã wɔ. (1 Pet. 2:21) Nyɔŋmɔ miisumɔ ni wɔwo mɛi. Shi emli baafu wɔ kɛji akɛ wɔkɛ woo srɔto ko hã amɛ. Esaaa akɛ wɔhiɛ kpaa nɔ kɔkɔɔkɔ akɛ: “Mɛi fɛɛ efee esha ni amɛnyɛɛɛ amɛjie Nyɔŋmɔ anunyam lɛ kpo.” (Rom. 3:23) No hewɔ lɛ, esaaa akɛ wɔjáa adesa ko adesa ko.

8, 9. (a) Te Yehowa Odasefoi kɛ amralofoi lɛ yeɔ amɛhãa tɛŋŋ? (b) Mɛɛ be esaaa akɛ wɔboɔ amralofoi lɛ toi?

8 Mɛi komɛi hu yɛ ni esa akɛ wɔwo amɛ yɛ gbɛhe ni amɛyɔɔ lɛ hewɔ. Akɛ  nɔkwɛmɔnɔ lɛ, amralofoi lɛ feɔ nibii pii amɛhãa wɔ. Amɛkwɛɔ ni nibii aya nɔ jogbaŋŋ yɛ maŋ lɛ mli koni basabasafeemɔ akaba. Kɛfata he lɛ, amɛkwɛɔ koni maŋbii lɛ anine ashɛ amɛhiamɔ nii anɔ. Bɔfo Paulo tsɛ amralofoi lɛ akɛ “hegbɛi ni nɔ kwɔlɔ,” ni ewo Kristofoi ŋaa ni amɛŋɔ amɛhe amɛwo amɛshishi. Ewie akɛ: “Nyɛŋɔa mɛi fɛɛ agbɛnaa nii nyɛhãa amɛ: mɔ ni biɔ too lɛ, nyɛwoa too lɛ; . . . mɔ ni biɔ woo lɛ, nyɛŋɔa woo lɛ nyɛhãa lɛ.”Rom. 13:1, 7.

9 Ŋaawoo nɛɛ hewɔ lɛ, Yehowa Odasefoi jɛɔ amɛsuɔmɔ mli amɛkɛ woo hãa amralofoi lɛ, yɛ nɔ ni maŋ lɛ mla lɛ biɔ lɛ naa. Wɔboɔ amɛ toi ni wɔkɛ gbɛtsɔɔmɔi ni amɛkɛhãa wɔ lɛ tsuɔ nii, shii abɔ ni eteee shi ewooo Ŋmalɛi lɛ. Wɔnyɛŋ wɔgbo Nyɔŋmɔ nɔ toi loo wɔfee nɔ ko ni baatsɔɔ akɛ wɔkɛ wɔhe miiwo maŋkwramɔŋ saji loo tawuu mli.Kanemɔ 1 Petro 2:13-17.

10. Mɛɛ nɔkwɛmɔnɔ kpakpa Yehowa tsuji ni hi shi yɛ blema lɛ fee yɛ bɔ ni amɛkɛ nɔyelii kɛ amralofoi ye amɛhã lɛ mli?

10 Yehowa tsuji ni hi shi yɛ blema lɛ fee nɔkwɛmɔnɔ kpakpa yɛ bɔ ni amɛkɛ nɔyelii kɛ amralofoi ye amɛhã lɛ mli. Akɛ nɔkwɛmɔnɔ lɛ, be ni Roma Nɔyeli lɛ bi ni mɛi fɛɛ ni yɔɔ amɛshishi lɛ aya amɛmaŋ ni amɛyaŋma amɛgbɛ́i lɛ, Yosef kɛ Maria bo toi. Amɛfã gbɛ kɛtee Betlehem eyɛ mli akɛ no mli lɛ eshwɛ fioo ni Maria baafɔ Yesu. (Luka 2:1-5) Afii komɛi asɛɛ be ni akɛ Paulo tee Maŋtsɛ Herode Agripa kɛ Yudea amralo Festo hiɛ koni eyajie enaa yɛ efɔŋ ko ni akɛɛ efee lɛ hewɔ lɛ, Paulo jie bulɛ ni sa kpo etsɔɔ amɛ.Bɔf. 25:1-12; 26:1-3.

11, 12. (a) Mɛni hewɔ wɔkɛ woo ni wɔkɛhãa maŋ onukpai lɛ eko hãaa jamɔŋ hiɛnyiɛlɔi lɛ? (b) Be ni nyɛmi nuu ko jie bulɛ kpo etsɔɔ Austria maŋkwralɔ ko lɛ, mɛni jɛ mli kɛba?

11 Eyɛ mli akɛ jamɔŋ hiɛnyiɛlɔi komɛi miisumɔ ni akɛ woo srɔto ko ahã amɛ moŋ, shi akɛ Yehowa Odasefoi lɛ, wɔkɛ woo ni tamɔ nɛkɛ hãaa amɛ. Amale jamɔi gbeɔ Nyɔŋmɔ gbɛ́i lɛ he guɔ ni amɛtsɔɔ tsɔɔmɔi ni damɔɔɔ e-Wiemɔ lɛ nɔ. Enɛ hewɔ lɛ, wɔkɛ woo srɔto ko hãaa jamɔŋ hiɛnyiɛlɔi nɛɛ; woo ni wɔkɛhãa mɛi fɛɛ lɛ, no nɔŋŋ eko wɔkɛhãa amɛ. Yesu wie eshi jamɔŋ hiɛnyiɛlɔi ni hi shi yɛ ebeiaŋ lɛ ni etsɛ amɛ osatofoi kɛ gbɛtsɔɔlɔi shwilafoi. (Mat. 23:23, 24) Kɛ̃lɛ, tɔmɔ bɛ he akɛ wɔkɛ bulɛ kɛ woo ni sa baahã maŋ onukpai, ni kɛ́ wɔfee nakai lɛ, ebaanyɛ ewo yibii kpakpai.

12 Susumɔ niiashikpamɔ nɛɛ ni nyɛmi nuu ko ni jɛ Austria ni atsɛɔ lɛ Leopold Engleitner lɛ ná lɛ he okwɛ. Be ni awuɔ Jeŋ Ta II lɛ, Nazibii lɛ mɔmɔ mɛi ni amɛkɛ amɛ wo oketeke mli kɛtee Buchenwald nsara lɛ mli. Nyɛminuu Engleitner kɛ Austria maŋkwralɔ ko ni atsɛɔ lɛ Dr. Heinrich Gleissner lɛ fata mɛi ni amɔmɔ nɛɛ ahe. Be ni akɛ amɛ yaa lɛ, Nyɛminuu Engleitner jɛ bulɛ mli egbala ehemɔkɛyeli lɛ mli etsɔɔ Dr. Gleissner. Gleissner bo lɛ toi jogbaŋŋ. Sɛɛ mli be ni awu ta lɛ agbe naa lɛ, ekɛ gbɛhe ni eyɔɔ akɛ maŋ onukpa lɛ ye ebua nyɛmimɛi ni yɔɔ Austria lɛ. Ekolɛ, bo hu onu niiashikpamɔi krokomɛi ni maa nɔ mi akɛ, kɛ́ wɔkɛ woo ni sa hã maŋ onukpai, taakɛ Biblia lɛ fãa Kristofoi akɛ amɛfee lɛ, ewoɔ yibii kpakpai.

MƐI KROKOMƐI NI ESA AKƐ WƆKƐ WOO AHÃ

13. Namɛi esa akɛ wɔbu waa ni wɔkɛ woo ahã? Ni mɛni hewɔ?

13 Esa akɛ wɔkɛ woo ahã wɔnyɛmimɛi Kristofoi lɛ ni wɔbu amɛ, titri lɛ, mɛi ni nyiɛɔ hiɛ yɛ wɔteŋ lɛ. Amɛteŋ mɛi komɛi ji, asafoŋ onukpai, kpokpaa nɔkwɛlɔi, Nitsumɔhe Nine Ajinafoi Akuu mli bii,  kɛ Gbɛtsɔɔmɔ Kuu lɛ mli bii. (Kanemɔ 1 Timoteo 5:17.) Ekɔɔɔ he eko maŋ nɔ ni nyɛmimɛi nɛɛ jɛ, skul abɔ ni amɛtee, shika abɔ ni amɛyɔɔ, loo nitsumɔ ni amɛtsuɔ lɛ, wɔkɛ woo hãa amɛ. Nyɛmimɛi hii nɛɛ yeɔ amɛbuaa ni anyɛɔ akwɛɔ Nyɔŋmɔ webii lɛ jogbaŋŋ. Biblia lɛ wieɔ akɛ akɛ amɛ ehã wɔ akɛ “nikeenii.” (Efe. 4:8) Wɔnyɛmimɛi Kristofoi ni hi shi yɛ blema lɛ bu mɛi ni ahala akɛ amɛnyiɛ hiɛ yɛ asafo lɛ mli lɛ waa, ni ŋmɛnɛ lɛ, wɔnyiɛɔ amɛnɔkwɛmɔnɔ kpakpa lɛ sɛɛ. Shi esaaa akɛ wɔkɛ woo srɔto ko hãa nyɛmimɛi nɛɛ loo wɔfeɔ wɔnii oookɛɛ wɔmiijá amɛ. Kɛ̃lɛ, akɛni amɛtsuɔ nii waa, ni amɛbaa amɛhe shi hewɔ lɛ, esa akɛ wɔbu amɛ ni wɔkɛ woo ni sa lɛ ahã amɛ.Kanemɔ 2 Korintobii 1:24; Kpojiemɔ 19:10.

14, 15. Mɛɛ gbɛ nɔ esoro nyɛmimɛi ni nyiɛɔ hiɛ yɛ wɔteŋ lɛ yɛ jamɔŋ hiɛnyiɛlɔi babaoo ahe?

14 Nyɛmimɛi ni nyiɛɔ hiɛ yɛ wɔteŋ lɛ jɛɔ heshibaa mli amɛkwɛɔ wɔnɔ jogbaŋŋ. Enɛ hewɔ lɛ, amɛsumɔɔɔ ni wɔnyaa amɛhe loo wɔjieɔ amɛyi fe nine, tamɔ bɔ ni mɛi feɔ amɛhãa mɛi ni ehe gbɛ́i yɛ je lɛ mli lɛ. Esoro nyɛmimɛi nɛɛ kwraa yɛ jamɔŋ hiɛnyiɛlɔi ni yɔɔ ŋmɛnɛ lɛ kɛ mɛi ni hi shi yɛ Yesu beiaŋ lɛ ahe. Yesu wie yɛ jamɔŋ hiɛnyiɛlɔi ni hi shi yɛ ebeiaŋ lɛ ahe akɛ: “Amɛsumɔɔ hiɛnaanɔbii agbɛhe tamɔ yɛ gbɛkɛ okpɔlɔŋmɛi ashishi, kɛ hiɛgbɛ sɛii ni yɔɔ kpeehei lɛ anɔ taramɔ kɛ jaji anɔ ŋamɔi.”Mat. 23:6, 7.

15 Nyɛmimɛi ni nyiɛɔ hiɛ yɛ wɔteŋ lɛ boɔ Yesu wiemɔi ni nyiɛ sɛɛ nɛɛ toi, akɛ: “Akatsɛ nyɛ Rabi, ejaakɛ mɔ kome ji nyɛ-Tsɔɔlɔ, ni nyɛ fɛɛ lɛ, nyɛmimɛi ji nyɛ. Kɛfata he lɛ, nyɛkatsɛa mɔ ko nyɛtsɛ yɛ shikpɔŋ lɛ nɔ, ejaakɛ mɔ kome ji nyɛ-Tsɛ, mɔ ni yɔɔ ŋwɛi lɛ. Asaŋ, akatsɛ nyɛ hiɛnyiɛlɔi, ejaakɛ mɔ kome ji nyɛ-Hiɛnyiɛlɔ, Kristo lɛ. Shi esa akɛ mɔ ni ji agbo fe fɛɛ yɛ nyɛteŋ lɛ atsɔ nyɛsɔɔlɔ. Mɔ fɛɛ mɔ ni wóɔ ehe nɔ lɛ abaaba lɛ shi, ni mɔ fɛɛ mɔ ni baa ehe shi lɛ abaawó enɔ.” (Mat. 23:8-12) Asafoŋ onukpai ni yɔɔ je lɛŋ fɛɛ lɛ baa amɛhe shi ni amɛkɛ Yesu gbɛtsɔɔmɔ nɛɛ tsuɔ nii. Enɛ hewɔ amɛsafoŋbii lɛ sumɔɔ amɛ, amɛbuɔ amɛ, ni amɛkɛ woo ni sa hãa amɛ lɛ.

Kɛ́ asafoŋ onukpai lɛ ba amɛhe shi lɛ, asafoŋbii lɛ baasumɔ amɛ, amɛbaabu amɛ, ni amɛkɛ woo baahã amɛ (Kwɛmɔ kuku 13-15)

16. Mɛni hewɔ esa akɛ wɔmia wɔhiɛ ni wɔkɛ nɔ ni Biblia lɛ ewie lɛ atsu nii lɛ?

16 Ehe be dani Kristofoi ni hi shi yɛ blema lɛ nyɛ amɛyɔse mɛi ni esa akɛ amɛkɛ woo ahã kɛ gbɛ ni esa akɛ amɛtsɔ nɔ amɛfee nakai. Ni ekolɛ nakai ebaaba lɛ yɛ wɔ hu wɔgbɛfaŋ. (Bɔf. 10:22-26; 3 Yoh. 9, 10) Shi ekɔɔɔ he eko bɔ ni efeemɔ wa hã lɛ, esa akɛ wɔmia wɔhiɛ ni wɔkɛ nɔ ni  Biblia lɛ ewie lɛ atsu nii, ejaakɛ sɛɛnamɔi pii yɛ he.

SƐƐNAMƆ YƐ HE AKƐ WƆKƐ WOO NI SA BAAHÃ MƐI

17. Kɛ́ wɔkɛ woo hã mɛi ni yɔɔ hegbɛi yɛ je lɛ mli lɛ, mɛɛ yibii kpakpai ewoɔ?

17 Kɛ́ wɔbu mɛi ni yɔɔ hegbɛi yɛ je lɛ mli lɛ ni wɔkɛ woo hã amɛ lɛ, ekolɛ amɛ hu amɛbaafã hegbɛ ni wɔyɔɔ akɛ wɔshiɛɔ sane kpakpa lɛ he, ni amɛbaaná jwɛŋmɔ ni ja yɛ wɔshiɛmɔ nitsumɔ lɛ he. Afii komɛi ni eho lɛ, nyɛmi yoo gbɛgbalɔ ko ni yɔɔ Germany ni atsɛɔ lɛ Birgit lɛ tee nifeemɔ ko yɛ ebiyoo lɛ skul lɛ. Be ni etee lɛ, skul tsɔɔlɔi lɛ kɛɛ lɛ akɛ, amɛmii eshɛ amɛhe waa akɛ Odasefoi kɛ amɛbii baa amɛskul lɛ. Amɛwie akɛ, eji Odasefoi abii bɛ amɛskul lɛ kulɛ, ebahiŋ kwraa. Birgit tsɔɔ amɛ nɔ hewɔ ni esoro Odasefoi abii lɛ. Ekɛɛ amɛ akɛ: “Wɔkɛ gbɛtsɔɔmɔi ni Nyɔŋmɔ kɛhã yɛ bɔ ni esa akɛ gbekɛbii aba amɛjeŋ amɛhã lɛ he lɛ tsɔseɔ wɔbii lɛ, ni gbɛtsɔɔmɔi nɛɛ eko ji ni amɛbu amɛtsɔɔlɔi lɛ ni amɛkɛ woo ahã amɛ.” Tsɔɔlɔi lɛ ateŋ mɔ kome wie akɛ: “Eji gbekɛbii lɛ fɛɛ tamɔ nyɛbii lɛ kulɛ, nitsɔɔmɔ baaŋɔɔ waa.” Otsii komɛi asɛɛ lɛ, tsɔɔlɔi lɛ ateŋ mɔ kome tee kpokpaa wulu nɔ kpee ko yɛ Leipzig.

18, 19. Mɛni hewɔ esa akɛ wɔŋmɛ pɛpɛɛpɛ yɛ woo ni wɔkɛhãa asafoŋ onukpai lɛ mli?

18 Shishitoo mlai kpakpai ni yɔɔ Nyɔŋmɔ Wiemɔ lɛ mli lɛ baanyɛ aye abua wɔ ni wɔkɛ woo ni sa ahã asafoŋ onukpai lɛ. (Kanemɔ Hebribii 13:7, 17.) Asafoŋ onukpai lɛ tsuɔ nii waa, no hewɔ lɛ, esa akɛ wɔjie amɛ yi, ni wɔbɔ mɔdɛŋ wɔkɛ gbɛtsɔɔmɔi ni amɛkɛhãa wɔ lɛ atsu nii. Kɛ́ wɔfee nakai lɛ, amɛkɛ miishɛɛ baatsu nitsumɔi srɔtoi ni amɛtsuɔ lɛ. Shi no hu etsɔɔɔ akɛ wɔkase bɔ ni asafoŋ onukpa ko ni mɛi le lɛ waa lɛ saa ehe ehãa, bɔ ni etsɔɔ nii ehãa, aloo bɔ ni ewieɔ ehãa lɛ pɛpɛɛpɛ. Kɛ́ wɔfee nakai lɛ, ani jeee adesai asɛɛ wɔbɔi nyiɛmɔ lɛ? Esaaa akɛ wɔhiɛ kpaa nɔ akɛ asafoŋ onukpai lɛ yeee emuu tamɔ wɔ nɔŋŋ. No hewɔ lɛ, Kristo ji mɔ ni esa akɛ wɔnyiɛ esɛɛ ni wɔkase lɛ.

19 Kɛ́ wɔbu asafoŋ onukpai lɛ ni wɔkɛ woo ni sa hã amɛ, shi yɛ nakai beiaŋ nɔŋŋ lɛ wɔkɛ amɛ yeee tamɔ bɔ ni akɛ mɛi ni ehe gbɛ́i yɛ je lɛ mli lɛ yeɔ hãa lɛ, ebaawa amɛ waa. Ebaahã efee mlɛo kɛhã amɛ akɛ amɛbaaba amɛhe shi, ni ehaŋ amɛnu he akɛ amɛtɔ̃ɔɔ loo amɛhi fe mɛi krokomɛi.

20. Kɛ́ wɔkɛ woo hã mɛi ni sa woo lɛ, mɛɛ gbɛ nɔ eyeɔ ebuaa wɔ?

20 Kɛ́ wɔkɛ woo hã mɛi ni sa woo lɛ, eyeɔ ebuaa wɔ diɛŋtsɛ hu. Ehãaa wɔkɛ wɔjwɛŋmɔ ama wɔ diɛŋtsɛ wɔnɔ tuutu, ni eyeɔ ebuaa wɔ ni wɔya nɔ wɔba wɔhe shi kɛ́ mɛi jie wɔyi loo amɛkɛ woo hã wɔ po. Ehãa wɔkɛ Yehowa gbɛjianɔtoo lɛ nyiɛɔ, ejaakɛ Yehowa gbɛjianɔtoo lɛ kɛ woo srɔto ko hãaa mɔ ko mɔ ko, ekɔɔɔ he eko kɛ́ mɔ lɛ yɛ asafo lɛ mli loo ebɛ mli. Kɛfata he lɛ, etsɔɔ akɛ wɔhiɛ kã shi, ejaakɛ kɛ́ wɔkɛ woo srɔto ko hã mɔ ko, ni sɛɛ mli lɛ mɔ lɛ fee nɔ ko ni hã wɔnine nyɛ shi lɛ, ebaanyɛ etɔ̃tɔ wɔnane.

21. Mɛni ji yiŋtoo ni fe fɛɛ hewɔ ni esa akɛ wɔkɛ woo ahã mɛi ni sa woo lɛ?

21 Nɔ ni he hiaa fe fɛɛ lɛ, kɛ́ wɔkɛ woo hã mɛi ni sa woo lɛ, Nyɔŋmɔ tsui nyɔɔ emli, ejaakɛ eesumɔ ni wɔfee nakai. Kɛ́ wɔkɛ woo hã mɛi lɛ, wɔmiiye Yehowa anɔkwa, ni no baahã ená hetoo ehã mɔ ni bɔɔ lɛ ahora lɛ. (Abɛi 27:11) Ŋmɛnɛ lɛ, mɛi pii kɛ woo hãa mɛi, shi amɛfeɔ ni etekeɔ nɔ. Belɛ, kwɛ bɔ ni ehi waa akɛ Yehowa etsɔɔ wɔ bɔ ni wɔbaafee wɔŋmɛ pɛpɛɛpɛ be ni wɔkɛ woo hãa mɛi krokomɛi lɛ.