Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ—Nikasemɔ Nɔ  |  March 2016

Yehowa Tsɔɔ Ewebii Gbɛ Koni Amɛná Wala

Yehowa Tsɔɔ Ewebii Gbɛ Koni Amɛná Wala

“Gbɛ lɛ nɛ! nyɛnyiɛa nɔ!”YESAIA 30:21.

LALAI: 65, 48

1, 2. (a) Mɛɛ okadii baa mɛi pii awala yi? (Kwɛmɔ mfoniri ni yɔɔ nikasemɔ lɛ shishijee lɛ.) (b) Mɛni Nyɔŋmɔ feɔ ehãa ewebii lɛ koni ekɛbaa amɛwala yi?

AFII babaoo ni eho nɛ lɛ, afee nɔ ko ni sa kadimɔ yɛ maji komɛi amli. Akɛ okadii komɛi mamɔ hei ni oketekei foɔ lɔle gbɛi amli yɛ lɛ, bɔ ni afee ni lɔle ko akayaje oketeke gbɛ lɛ nɔ be ni oketeke ko miiba. Yɛ nɔ ni aŋma yɛ okadii nɛɛ anɔ lɛ naa lɛ, kɛ́ draivafoi shɛ hei ni okadii lɛ yɔɔ lɛ, esa akɛ amɛmɛ, amɛkwɛ kɛji oketeke ko miiba lo, ni amɛbo amɛhewɔŋ toi akɛ amɛbaanu eko gbɛɛmɔ lo, dani amɛya. Mɛi ni bo gbɛtsɔɔmɔi nɛɛ toi lɛ baa amɛwala yi.

2 Nɔ ni Yehowa efee ehã ewebii lɛ he yɛ sɛɛnamɔ kwraa fe okadii ni wɔwie he nɛɛ. Gbɛtsɔɔmɔi ni Yehowa kɛhãa ewebii lɛ buɔ amɛhe kɛjɛɔ osharai ahe, ni ebaanyɛ ehã amɛná naanɔ wala hu. Taakɛ bɔ ni tookwɛlɔ ko ni sumɔɔ etooku lɛ feɔ lɛ, Yehowa tsɔɔ ewebii lɛ gbɛ ni ebɔɔ amɛ kɔkɔ hu, bɔ ni afee ni amɛkakɔ gbɛ ko ni kɛ amɛwala baawo oshara mli.Kanemɔ Yesaia 30:20, 21.

YEHOWA ETSƆƆ EWEBII LƐ GBƐ KƐJƐ BLEMA TƆ̃Ɔ

3. Te fee tɛŋŋ ni adesai fɛɛ feɔ esha ni amɛgboiɔ lɛ?

3 Kɛjɛ be ni Yehowa bɔ adesai lɛ, ehã mɛi srɔtoi gbɛtsɔɔmɔi yɛ nibii pɔtɛi ahe. Akɛ nɔkwɛmɔnɔ lɛ, Yehowa kɛ gbɛtsɔɔmɔi ni  yɔɔ faŋŋ hã Adam kɛ Hawa yɛ Eden abɔɔ lɛ mli. Eji amɛbo gbɛtsɔɔmɔi nɛɛ toi kulɛ, amɛ kɛ amɛbii fɛɛ baaná miishɛɛ, ni amɛbaahi shi kɛya naanɔ. (1 Mose 2:15-17) Shi amɛyabooo toi. Hawa yabo onufu lɛ moŋ toi, ni Adam hu yabo eŋa lɛ toi. Ni tsɔɔ akɛ, amɛmiisumɔ ni kooloi kɛ adesai atsɔɔ amɛ gbɛ, moŋ fe amɛ-Tsɛ ni yɔɔ suɔmɔ lɛ. Mɛni jɛ amɛtoigbele lɛ mli kɛba? Amɛyi enyɔ lɛ fɛɛ amɛna nɔ, ni amɛgboi ní amɛbɛ hiɛnɔkamɔ. Kɛfata he lɛ, amɛshi esha kɛ gbele akɛ gboshinii amɛhã adesai fɛɛ.

4. (a) Yɛ Nu Afua lɛ sɛɛ lɛ, mɛni hewɔ ehe bahia ni Nyɔŋmɔ ahã adesai gbɛtsɔɔmɔi hei? (b) Mɛɛ gbɛ nɔ gbɛtsɔɔmɔ nɛɛ hã ana jwɛŋmɔ ni Nyɔŋmɔ hiɛ yɛ wala he?

4 Nyɔŋmɔ kɛ gbɛtsɔɔmɔi hã Noa, ni no hã abaa lɛ kɛ eweku lɛ yi kɛfo Nu Afua lɛ. Yɛ Nu Afua lɛ sɛɛ lɛ, Nyɔŋmɔ kɛɛ adesai akɛ amɛkaye lá. Mɛni hewɔ efee nakai? Efee nakai, ejaakɛ kɛjɛ Nu Afua lɛ sɛɛ kɛyaa lɛ, ebaakpɛlɛ ni adesai agbe kooloi ni amɛye. Tsakemɔ nɛɛ hewɔ lɛ, ehã amɛ gbɛtsɔɔmɔ hee ko. Ekɛɛ amɛ akɛ: “Loo kɛ elá ni ji esusuma [loo ewala] lɛ, nyɛkayea.” (1 Mose 9:1-4) Mla nɛɛ hãa wɔnaa jwɛŋmɔ ni Nyɔŋmɔ hiɛ yɛ wala he. Wala lɛ, Yehowa nɔ ni. Lɛ ebɔ wɔ, ni lɛ ehã wɔ wala, no hewɔ lɛ, lɛ pɛ eyɔɔ hegbɛ akɛ ewoɔ mlai yɛ wala he. Akɛ nɔkwɛmɔnɔ lɛ, ewo mla akɛ, mɔ ko mɔ ko akagbe gbɔmɔ. Lá kɛ wala yɛ krɔŋkrɔŋ hã Nyɔŋmɔ, ni ebaagbala mɔ fɛɛ mɔ ni kɛ nibii enyɔ nɛɛ tsuɔ nii yɛ gbɛ ni esaaa nɔ lɛ toi.1 Mose 9:5, 6.

5. Mɛni he wɔbaasusu? Ni mɛɛ gbɛ nɔ wɔbaaná he sɛɛ?

5 Yɛ Noa gbele sɛɛ lɛ, Nyɔŋmɔ tee nɔ etsɔɔ ewebii lɛ gbɛ. Yɛ nikasemɔ nɛɛ mli lɛ, wɔbaasusu nɔkwɛmɔnii fioo komɛi ni hãa wɔnaa gbɛi ni etsɔ nɔ efee nakai lɛ ahe. Enɛ baahã wɔfai shi ni wɔtswa akɛ wɔbaanyiɛ Yehowa gbɛtsɔɔmɔi asɛɛ kɛyabote jeŋ hee lɛ mli tɔ̃ɔ lɛ mli awa.

YEHOWA KƐ GBƐTSƆƆMƆI HEI HÃ MAŊ HEE KO

6. Mɛni hewɔ ehe bahia ni Nyɔŋmɔ ahã Israelbii lɛ Mla lɛ? Ni mɛni Nyɔŋmɔ kpa gbɛ akɛ amɛbaafee koni ejɔɔ amɛ?

6 Yɛ Mose beiaŋ lɛ, Yehowa hã ewebii lɛ gbɛtsɔɔmɔi yɛ bɔ ni esa akɛ amɛba amɛjeŋ kɛ bɔ ni esa akɛ amɛjá lɛ amɛhã lɛ he. Mɛni hewɔ? Ejaakɛ, ewebii lɛ ashihilɛ tsake. Israelbii lɛ kɛ nɔ ni fe afii 200 hi shi akɛ nyɔji yɛ Ejipt. Shi Ejiptbii lɛ jáa gbohii, amɛkotoɔ amagai, ni amɛfeɔ nibii pii ni wooo Nyɔŋmɔ hiɛ nyam. No hewɔ lɛ, be ni Nyɔŋmɔ kpɔ̃ ewebii lɛ kɛje Ejipt, ni amɛbatsɔ maŋ ni hiɛ ehe lɛ, ehe bahia ni ehã amɛ gbɛtsɔɔmɔi hei. Enɛ hewɔ lɛ, ehã amɛ e-Mla lɛ, koni no pɛ atsɔɔ amɛ gbɛ. Niiamlitaomɔ woji komɛi kɛɔ akɛ, Hebri wiemɔ ni atsɔɔ shishi akɛ “mla” lɛ kɛ Hebri wiemɔ ko ni anyɛɔ atsɔɔ shishi akɛ “kudɔmɔ,” “gbɛtsɔɔmɔ,” loo “tsɔsemɔ” lɛ yɛ tsakpãa. Mla lɛ bu Israelbii lɛ ahe, ni ehãaa amɛkɛ amɛhe awo bɔlɛnamɔ jeŋba sha, kɛ amale jamɔ ni ehe shi yɛ maji ni ebɔle amɛ lɛ amli lɛ mli. Be fɛɛ be ni Israelbii lɛ baabo Nyɔŋmɔ toi lɛ, ejɔɔ amɛ. Shi kɛ́ amɛgbo enɔ toi lɛ, amɛnaa nɔ waa.Kanemɔ 5 Mose 28:1, 2, 15.

7. (a) Mɛɛ yiŋtoo kroko hewɔ Yehowa hã Israelbii lɛ gbɛtsɔɔmɔi hei lɛ? (b) Mɛɛ gbɛ nɔ Mla lɛ bafee tamɔ mɔ ko ni ‘miitsɔɔ Israelbii lɛ gbɛ’ kɛmiiya Kristo ŋɔɔ?

7 Yehowa hã Israelbii lɛ gbɛtsɔɔmɔi hei lɛ yɛ yiŋtoo kroko hu hewɔ. Mla lɛ saa Israelbii lɛ eto kɛhã nifeemɔ ko ni sa kadimɔ waa ni baahã Yehowa yiŋtoo lɛ aba mli. No ji, Yesu Kristo, ni ji Mesia lɛ baa lɛ. Mla lɛ kai Israelbii lɛ akɛ amɛyeee emuu. Agbɛnɛ hu, eye ebua amɛ ní amɛna akɛ, ehe miihia ni  akpɔ̃ amɛ. Mɛni hewɔ? Ejaakɛ ehã amɛna akɛ, esa akɛ amɛná afɔle ko ni yeɔ emuu, ni baanyɛ ahã amɛye amɛhe kwraa kɛje esha he. (Galatiabii 3:19; Hebribii 10:1-10) Kɛfata he lɛ, Mla lɛ bu weku ni Mesia lɛ baajɛ mli aba lɛ he, ni eye ebua Israelbii lɛ ní amɛnyɛ amɛkpa lɛ gbɛ. No hewɔ lɛ, Mla lɛ bafee tamɔ mɔ ko ni ‘miitsɔɔ amɛ gbɛ’ loo eenyiɛ amɛhiɛ kɛmiiya Kristo ŋɔɔ.Galatiabii 3:23, 24.

8. Mɛni hewɔ esa akɛ wɔkɛ shishitoo mlai ni yɔɔ Mose Mla lɛ mli lɛ atsu nii?

8 Akɛ Kristofoi lɛ, wɔbɛ Mla lɛ shishi. Kɛ̃lɛ, wɔbaanyɛ wɔná gbɛtsɔɔmɔi ni Yehowa kɛhã yɛ mli lɛ ahe sɛɛ. Yɛ mɛɛ gbɛ nɔ? Gbɛtsɔɔmɔi ni yɔɔ Mla lɛ mli lɛ fɛɛ damɔ shishitoo mlai anɔ, ni shishitoo mlai nɛɛ baanyɛ aye abua wɔ ŋmɛnɛ yɛ wɔshihilɛ mli, ni ehã wɔsɔmɔ Yehowa jogbaŋŋ. No hewɔ lɛ, esa akɛ wɔhe be kɛsusu amɛhe. Yehowa hã aŋmala mlai lɛ ashwie shi yɛ Biblia lɛ mli koni wɔkase nii kɛjɛ mli, wɔkɛ shishitoo mlai ni yɔɔ mli lɛ atsu nii, ni agbɛnɛ hu, wɔna akɛ nibii ni Yesu batsɔɔ wɔ lɛ ahe yɛ sɛɛnamɔ fe nomɛi po. Susumɔ nibii ni Yesu tsɔɔ wɔ lɛ ateŋ ekome he okwɛ. Ewie akɛ: “Nyɛnu akɛ akɛɛ akɛ: ‘Esaaa akɛ ofiteɔ gbãla.’ Shi mi lɛ, miikɛɛ nyɛ akɛ, mɔ fɛɛ mɔ ni yaa nɔ ekwɛɔ yoo ni enáa ehe akɔnɔ lɛ, ekɛ lɛ efite gbãla momo yɛ etsuiŋ.” Kɛ́ wɔbo gbɛtsɔɔmɔ nɛɛ toi lɛ, jeee gbalafitemɔ pɛ wɔbaatsi wɔhe kɛje, shi moŋ wɔbaakpoo susumɔi kɛ henumɔi ni esaaa hu.Mateo 5:27, 28.

9. Mɛɛ tsakemɔ hewɔ Nyɔŋmɔ hã ewebii lɛ gbɛtsɔɔmɔi hei lɛ?

9 Be ni Yesu ba shikpɔŋ lɛ nɔ akɛ Mesia lɛ, Yehowa hã ewebii lɛ gbɛtsɔɔmɔi hei, ni ehã amɛnu nibii krokomɛi ni kɔɔ E-yiŋtoo lɛ he lɛ shishi. Mɛni hewɔ Yehowa fee nakai? Efee nakai, ejaakɛ yɛ afi 33 lɛ, efee tsakemɔ ko. Ekpoo Israel maŋ lɛ, ni ehala Kristofoi asafo lɛ akɛ ewebii.

YEHOWA HÃ MUMƆŊ ISRAEL GBƐTSƆƆMƆI

10. Mɛni hewɔ Nyɔŋmɔ hã Kristofoi asafo lɛ mlai hei? Ni mɛɛ gbɛ nɔ esoro mlai nɛɛ yɛ mlai ni ekɛhã Israelbii lɛ ahe?

10 Mɛi ni Yehowa hala akɛ ewebii yɛ Mose beiaŋ, ni ehã amɛ Mla lɛ jɛ maŋ kome nɔ. Shi mumɔŋ Israel, ni ji mɛi ni ehala akɛ ewebii kɛjɛ klɛŋklɛŋ afii 100 lɛ mli kɛbaa lɛ, jɛ maji srɔtoi kɛ shihilɛi srɔtoisrɔtoi amli. Enɛ hewɔ lɛ, ehe bahia ni Yehowa atsake gbɛtsɔɔmɔi ni ekɛhã amɛ lɛ ekomɛi ahiɛ loo ehã amɛ mlai hei yɛ bɔ ni esa akɛ amɛba amɛjeŋ amɛhã kɛ bɔ ni esa akɛ amɛjá lɛ amɛhã lɛ he. Mɛi nɛɛ ji mɛi ni feɔ Kristofoi asafo lɛ, ni Yehowa kɛ amɛ ekpaŋ kpaŋmɔ hee ko. Gbɛjianɔtoo hee nɛɛ hãa wɔnaa faŋŋ akɛ, “Nyɔŋmɔ kwɛɛɛ mɛi ahiɛiaŋ, moŋ lɛ, yɛ jeŋmaŋ fɛɛ jeŋmaŋ mli lɛ, mɔ ni sheɔ lɛ gbeyei ni efeɔ nɔ ni ja lɛ, lɛ ji mɔ ni ekpɛlɛɔ enɔ.” (Bɔfoi 10:34, 35) “Kristo lɛ mla lɛ” damɔ shishitoo mlai ni aŋmala yɛ mɛi atsuii anɔ lɛ nɔ. Etamɔɔɔ Mose Mla lɛ ni aŋmala yɛ tɛ taoi anɔ lɛ. “Kristo lɛ mla lɛ” kudɔɔ Kristofoi, ekɔɔɔ he eko maŋ nɔ ni amɛyɔɔ, ni mɛi fɛɛ ni hiɔ shi yɛ naa lɛ náa he sɛɛ.Galatiabii 6:2.

11. Mɛɛ nibii enyɔ komɛi ahe “Kristo lɛ mla lɛ” kɔɔ?

11 Mumɔŋ Israel ená gbɛtsɔɔmɔi ni Yehowa ehã amɛ kɛtsɔ Yesu nɔ lɛ ahe sɛɛ waa. Be ni eshwɛ fioo ni kpaŋmɔ hee lɛ baabɔi nitsumɔ lɛ, Yesu hã amɛ famɔi enyɔ komɛi ni sa kadimɔ. Ekome kɔɔ shiɛmɔ nitsumɔ lɛ he, ni ekroko lɛ kɔɔ bɔ ni esa akɛ Kristofoi ahi shi ahã, kɛ bɔ ni esa akɛ amɛkɛ amɛhe aye ahã lɛ he. Famɔi nɛɛ kɔɔ Kristofoi ni hi shi yɛ blema kɛ mɛi ni yɔɔ ŋmɛnɛ lɛ fɛɛ he. No hewɔ lɛ, kɛ́ wɔhiɛnɔkamɔ ji akɛ wɔbaaya  ŋwɛi jio, wɔhiɛnɔkamɔ ji akɛ wɔbaahi shikpɔŋ lɛ nɔ jio lɛ, esa akɛ wɔye famɔi nɛɛ anɔ.

12. Yɛ blema lɛ, mɛɛ gbɛtsɔɔmɔ yɔɔ kɛhã mɛi ni miitao asɔmɔ Yehowa? Mɛɛ gbɛ nɔ esoro Yesu famɔ akɛ ashiɛ lɛ yɛ gbɛtsɔɔmɔ nɛɛ he?

12 Yɛ blema lɛ, kɛ́ mɔ ko miitao esɔmɔ Yehowa lɛ, ja eba Israel. (1 Maŋtsɛmɛi 8:41-43) Shi sɛɛ mli lɛ, Yesu kɛ famɔ ko hã. Wɔnaa famɔ nɛɛ yɛ Mateo 28:19, 20 lɛ. (Kanemɔ.) Yesu kɛɛ esɛɛnyiɛlɔi lɛ akɛ ‘amɛya’ mɛi fɛɛ aŋɔɔ. Yɛ afi 33 Pentekoste gbi lɛ nɔ lɛ, Yehowa fee nɔ ko ni hã ana faŋŋ akɛ, eesumɔ ni ashiɛ sane kpakpa lɛ yɛ jeŋ fɛɛ. Nakai gbi lɛ, ekɛ mumɔ krɔŋkrɔŋ lɛ fɔ asafo hee lɛ mli bii aaafee 120 mu, ni no hã amɛnyɛ amɛshiɛ yɛ wiemɔi srɔtoi amli amɛhã Yudafoi kɛ mɛi ni etsake amɛbatsɔmɔ Yudafoi. (Bɔfoi 2:4-11) Sɛɛ mli lɛ, amɛshiɛ amɛhã Samariabii hu. Kɛkɛ ni yɛ afi 36 lɛ, Nyɔŋmɔ hã amɛkɛ Jeŋmajiaŋbii ni afolɔko amɛ ketia hu fata mɛi ni amɛshiɛɔ amɛhãa lɛ ahe. Kɛjɛ no nɔ kɛbaa nɛɛ, Kristofoi yaa je lɛŋ he fɛɛ he amɛyashiɛɔ amɛhãa mɛi fɛɛ!

13, 14. (a) Mɛni “kitã hee” ni Yesu kɛhã wɔ lɛ biɔ ni wɔfee? (b) Mɛɛ nɔkwɛmɔnɔ efee ehã wɔ yɛ enɛ gbɛfaŋ? Ni te wɔɔfee tɛŋŋ wɔkase lɛ?

13 Yesu hã wɔ “kitã hee” yɛ bɔ ni esa akɛ wɔkɛ wɔnyɛmimɛi aye ahã lɛ he. (Kanemɔ Yohane 13:34, 35.) Yɛ suɔmɔ ni wɔbaasumɔ amɛ yɛ nɔ fɛɛ nɔ mli lɛ sɛɛ lɛ, esa akɛ wɔfee klalo akɛ wɔkɛ wɔwala baafɔ̃ shi wɔhã amɛ. Enɛ ji nɔ ko ni ejeee kpo yɛ Mose Mla lɛ mli.Mateo 22:39; 1 Yohane 3:16.

14 Yesu fee enɛ he nɔkwɛmɔnɔ ni nɔ bɛ. Esumɔɔ ekaselɔi lɛ aahu akɛ, ejɛ esuɔmɔ mli ekɛ ewala fɔ̃ shi ehã amɛ. Ni enɛ ji nɔ ni ekpaa gbɛ akɛ mɛi fɛɛ ni nyiɛ esɛɛ lɛ baafee. No hewɔ lɛ, esa akɛ wɔfee klalo akɛ, piŋmɔ mli jio, gbele mli jio lɛ, wɔbaaya nɔ wɔsumɔ wɔnyɛmimɛi lɛ.1 Tesalonikabii 2:8.

YEHOWA TSƆƆ WƆ GBƐ ŊMƐNƐ, NI EBAAFEE NAKAI KƐYASHI NAANƆ

15, 16. Mɛni ji nibii komɛi ni hãa esoroɔ bei ni wɔyɔɔ mli nɛɛ? Ni mɛɛ gbɛ nɔ Nyɔŋmɔ tsɔɔ ekudɔɔ wɔ?

15 Yesu kɛ nitsumɔ ewo “nyɔŋ anɔkwafo kɛ hiɛshikalɔ lɛ” dɛŋ akɛ, ehã ewebii lɛ mumɔŋ niyenii “yɛ be ni sa mli.” (Mateo 24:45-47) Niyenii nɛɛ eko ji, gbɛtsɔɔmɔi ni ekɛhãa Nyɔŋmɔ webii lɛ kɛ́ nibii tsake lɛ. Mɛni ji nibii komɛi ni hãa esoroɔ bei ni wɔyɔɔ mli nɛɛ yɛ ekrokomɛi fɛɛ ni eho lɛ ahe?

16 Klɛŋklɛŋ kwraa lɛ, wɔyɛ “naagbee gbii lɛ” amli, ni etsɛŋ kwraa wɔkɛ amanehulu ni fe amanehului fɛɛ ni eba pɛŋ lɛ baakpe. (2 Timoteo 3:1; Marko 13:19) Agbɛnɛ hu, ashwie Satan kɛ edaimonioi lɛ kɛjɛ ŋwɛi kɛba shikpɔŋ lɛ nɔ, ni amɛhã adesai miina nɔ waa. (Kpojiemɔ 12:9, 12) Kɛfata he lɛ, wɔmiishiɛ sane kpakpa lɛ yɛ je lɛŋ fɛɛ, taakɛ Yesu fã wɔ akɛ wɔfee lɛ pɛpɛɛpɛ. Yɛ yinɔsane mli fɛɛ lɛ, be ko bɛ ni ashiɛ yɛ maji kɛ wiemɔi babaoo amli, tamɔ bɔ ni wɔfeɔ amrɔ nɛɛ!

17, 18. Te esa akɛ wɔfee wɔnii wɔhã tɛŋŋ yɛ gbɛtsɔɔmɔi ni wɔnine shɛɔ nɔ ŋmɛnɛ lɛ ahe?

17 Yehowa asafo lɛ ehã wɔ dɛŋdadei babaoo ni baaye abua wɔ yɛ shiɛmɔ nitsumɔ lɛ mli. Ani okɛ dɛŋdadei nɛɛ miitsu nii? Kɛ́ wɔtee Kristofoi akpeei lɛ, atsɔɔ wɔ bɔ ni wɔbaafee wɔkɛ dɛŋdadei nɛɛ atsu nii jogbaŋŋ. Kɛ́ ahã wɔ gbɛtsɔɔmɔi ni tamɔ nakai lɛ, ani onaa lɛ akɛ ejɛ Nyɔŋmɔ ŋɔɔ?

18 Ja wɔbo gbɛtsɔɔmɔi fɛɛ ni Nyɔŋmɔ kɛhãa wɔ kɛtsɔ Kristofoi asafo lɛ nɔ lɛ toi jogbaŋŋ dani ebaajɔɔ wɔ. Kɛ́ wɔboɔ Yehowa toi bianɛ lɛ, kɛ́ “amanehulu kpeteŋkpele” lɛ fɛ, ni aakpãtã Satan jeŋ fɔŋ nɛɛ hiɛ lɛ,  ebaafee mlɛo ehã wɔ akɛ wɔbaabo gbɛtsɔɔmɔi fɛɛ ni ebaahã wɔ lɛ toi ni wɔkɛtsu nii. (Mateo 24:21) Yɛ amanehulu kpeteŋkpele lɛ sɛɛ, be ni jalɛ jeŋ hee lɛ eba, ni Satan bɛ dɔŋŋ lɛ, gbɛtsɔɔmɔi hei ahe baahia wɔ.

Yɛ jeŋ hee lɛ mli lɛ, abaagbele wolokpoi anaa, ni abaahã wɔ gbɛtsɔɔmɔi hei yɛ bɔ ni esa akɛ wɔhi shi wɔhã yɛ Paradeiso lɛ mli lɛ he (Kwɛmɔ kuku 19, 20)

19, 20. Mɛɛ wolokpoi anaa abaagbele wɔsɛɛ?

19 Yɛ Mose beiaŋ lɛ, ehe bahia ni Nyɔŋmɔ ahã Israel maŋ lɛ gbɛtsɔɔmɔi hei, no hewɔ lɛ, ehã amɛ Mla lɛ. Sɛɛ mli lɛ, ehã Kristofoi asafo lɛ “Kristo lɛ mla lɛ” koni no atsɔɔ amɛ gbɛ. Biblia lɛ kɛɔ akɛ, yɛ jeŋ hee lɛ mli lɛ, abaagbele wolokpoi hei anaa. Ni tsɔɔ akɛ, shi kome ekoŋŋ lɛ, Yehowa baahã wɔ gbɛtsɔɔmɔi hei. (Kanemɔ Kpojiemɔ 20:12.) Ekã shi faŋŋ akɛ, wolokpoi nɛɛ baatsɔɔ wɔ nɔ ni Yehowa kpaa gbɛ yɛ mɛi fɛɛ ni baahi wala mli yɛ nakai beiaŋ lɛ adɛŋ. Ehe baahia ni mɛi ni abaatee amɛ shi lɛ, kɛ mɛi krokomɛi fɛɛ ni baahi wala mli yɛ nakai beiaŋ lɛ, akase wolokpoi nɛɛ koni amɛle nɔ ni Nyɔŋmɔ taoɔ ni amɛfee. Wolokpoi nɛɛ baaye abua wɔ ni wɔle bɔ ni Yehowa susuɔ nii ahe ehãa lɛ jogbaŋŋ. Kɛfata he lɛ, wɔbaanu Biblia lɛ hu shishi jogbaŋŋ. Enɛ hewɔ lɛ, yɛ Paradeiso lɛ mli lɛ, wɔbaasumɔ wɔhe, wɔbaajie bulɛ kpo wɔtsɔɔ wɔhe, ni wɔfeŋ nibii ni bulɛ bɛ he. (Yesaia 26:9) Ŋwanejee ko bɛ he akɛ, yɛ Yesu Kristo, wɔ-Maŋtsɛ lɛ kudɔmɔ shishi lɛ, wɔbaakase nibii babaoo, ni wɔbaatsɔɔ mɛi nii hu!

20 Kɛ́ wɔkɛ gbɛtsɔɔmɔi ni “aŋmala yɛ wolokpoi lɛ amli lɛ” tsu nii, ni wɔye Yehowa anɔkwa yɛ naagbee kaa lɛ mli lɛ, wɔgbɛ́i baahi “wala wolokpo lɛ” mli kɛya naanɔ. Hɛɛ, wɔbaahi shi kɛya naanɔ! No hewɔ lɛ, nyɛhãa wɔhea be kɛkanea Biblia lɛ, wɔpɛia mli koni wɔnu shishi jogbaŋŋ, ni wɔkɛ gbɛtsɔɔmɔi fɛɛ ni Nyɔŋmɔ hãa wɔ ŋmɛnɛ lɛ atsu nii. Kɛ́ wɔfee nakai lɛ, Yehowa, wɔ-Nyɔŋmɔ ni yɔɔ suɔmɔ ni hiɛ kã shi lɛ, baabaa wɔyi kɛfo amanehulu kpeteŋkpele lɛ, ni wɔbaaya nɔ wɔkase ehe nii kɛ miishɛɛ kɛya naanɔ.Jajelɔ 3:11; Romabii 11:33.