Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Shɛjeɔ Wɔmii Yɛ Wɔjaramɔ Shihilɛi Fɛɛ Mli

Yehowa Shɛjeɔ Wɔmii Yɛ Wɔjaramɔ Shihilɛi Fɛɛ Mli

Miishɛjemɔ fɛɛ Nyɔŋmɔ lɛ . . . shɛjeɔ wɔmii yɛ wɔjaramɔ shihilɛi fɛɛ mli.”2 KOR. 1:3, 4.

LALAI: 38, 56

1, 2. Mɛɛ gbɛ nɔ Yehowa shɛjeɔ wɔmii kɛ́ wɔyaje jaramɔ shihilɛi amli? Mɛɛ shi ewo wɔ yɛ e-Wiemɔ lɛ mli?

NYƐMI NUU oblanyo ko ni eji oshijafo lɛ, yana asafoŋ onukpa ko ni atsɛɔ lɛ Stephen, ni hiɛ efã ni ebote gbalashihilɛ mli lɛ koni ekɛ lɛ asusu sane ko he. No mli lɛ, oblanyo lɛ miisusu sane ni aŋma yɛ 1 Korintobii 7:28 lɛ he. Jɛmɛ kɛɔ akɛ: “Mɛi ni boteɔ gbalashihilɛ mli lɛ, amɛbaana amanehulu yɛ amɛheloo mli.” Ebi Stephen akɛ, “Mɛni ji ‘amanehulu’ ni atsĩ tã yɛ ŋmalɛ nɛɛ mli lɛ, ni kɛ́ mibote gbalashihilɛ mli lɛ, te mafee tɛŋŋ makpee naa?” Dani Stephen baahã lɛ hetoo lɛ, ekɛɛ lɛ ni esusu sane kroko ni bɔfo Paulo ŋma lɛ he. Paulo kɛɛ Yehowa ji “miishɛjemɔ fɛɛ Nyɔŋmɔ . . . mɔ ni shɛjeɔ wɔmii yɛ wɔjaramɔ shihilɛi [aloo “wɔmanehului” sh. niŋ.] fɛɛ mli.”2 Kor. 1:3, 4.

2 Wɔle akɛ wɔ-Tsɛ Yehowa sumɔɔ wɔsane waa, ni eshɛjeɔ wɔmii kɛ́ wɔyaje jaramɔ shihilɛi amli. Ekolɛ okaiɔ be ko ni Nyɔŋmɔ ye ebua bo ni etsɔɔ bo gbɛ kɛtsɔ e-Wiemɔ lɛ nɔ. Wɔle akɛ, Yehowa miisumɔ ni ahi ahã wɔ, tamɔ bɔ ni eshwe ehã  etsuji ni hi shi yɛ blema lɛ.Kanemɔ Yeremia 29:11, 12.

3. Mɛɛ sanebimɔi wɔbaahã hetoo yɛ nikasemɔ nɛɛ mli?

3 Bei pii lɛ, kɛ́ wɔle he ni naagba ko jɛ lɛ, wɔnyɛɔ wɔkpeɔ naa jogbaŋŋ fe kɛ́ wɔleee he ni ejɛ. Nakai nɔŋŋ eji yɛ gbalashihilɛ kɛ weku shihilɛ mli amanehului lɛ ahe. No hewɔ lɛ, mɛni ji nibii komɛi ni kɛ ‘heloo mli amanehulu’ ni Paulo wie he lɛ baa? Mɛɛ gbɛ nɔ mɛi komɛi ni awie amɛhe yɛ Biblia lɛ mli, kɛ mɛi komɛi ni yɔɔ wɔbei nɛɛ amli lɛ anɔkwɛmɔnɔ baanyɛ aye abua wɔ ni wɔna he ni wɔbaaná miishɛjemɔ yɛ kɛ́ wɔkɛ naagbai kpe? Sanebimɔi nɛɛ ahetoo baaye abua wɔ ni wɔnyɛ wɔkpee jaramɔ shihilɛi anaa.

GBALASHIHILƐ MLI NAAGBAI

4, 5. Mɛɛ amanehului ekolɛ gbalashihilɛ mli bii baaná?

4 Be ni Nyɔŋmɔ bɔ klɛŋklɛŋ yoo lɛ ni ekɛ lɛ bahã nuu lɛ akɛ eŋa lɛ, ewie akɛ: “Nuu aaashi etsɛ kɛ enyɛ, ni eeekpɛtɛ eŋa he, ni amɛaatsɔ heloo kome.” (1 Mose 2:24) Shi akɛni ŋmɛnɛ lɛ, adesai yeee emuu hewɔ lɛ, kɛ́ mɛi bote gbalashihilɛ mli lɛ, naagbai baanyɛ aba amɛ kɛ amɛwekumɛi ateŋ. (Rom. 3:23) Akɛ nɔkwɛmɔnɔ lɛ, ekolɛ dani yoo ko baabote gbalashihilɛ mli lɛ, eyɛ efɔlɔi ashishi. Shi Nyɔŋmɔ Wiemɔ lɛ kɛɔ akɛ, kɛ́ ená ebote gbalashihilɛ mli pɛ, eyaje ewu lɛ yitsoyeli shishi. (1 Kor. 11:3) Kɛ̃lɛ, bei komɛi lɛ, kɛ́ mɛi bote gbalashihilɛ mli ehee lɛ, ewa kɛhã nuu lɛ akɛ ebaatsɔɔ eŋa lɛ nɔ ni efee, ni ewa kɛhã ŋa lɛ hu akɛ ebaabo ewu lɛ toi moŋ fe efɔlɔi. Kɛfata he lɛ, kɛ́ mɛi bote gbalashihilɛ mli ehee lɛ, naagbai baa amɛ kɛ amɛshaahiimɛi kɛ amɛshaayeimɛi ateŋ, ni enɛ baanyɛ afee amanehulu kɛhã amɛ.

5 Bei pii lɛ, kɛ́ nuu ko kɛ eŋa ná amɛle akɛ yoo lɛ hiɛ hɔ lɛ, amɛnáa miishɛɛ waa. Shi yɛ nakai beiaŋ nɔŋŋ lɛ, amɛfeɔ yeyeeye. Ekolɛ amɛbaabi amɛhe akɛ, ‘Ani nibii baaya lɛ jogbaŋŋ yɛ hɔhiɛmɔ lɛ mli? Ani gbekɛ lɛ baaná gbɔmɔtsoŋ hewalɛ kpakpa? Ani wɔbaaná shika kɛkwɛ lɛ?’ Kɛ́ yoo lɛ ná efɔ lɛ, ehe baahia ni nuu lɛ kɛ yoo lɛ fɛɛ afee tsakemɔi yɛ amɛshihilɛ mli. Ekolɛ, gbekɛ lɛ kwɛmɔ lɛ baahe yoo lɛ be kɛ ejwɛŋmɔ waa, ni enáŋ dekã pii ehãŋ ewu lɛ tamɔ be ko ni eho. Agbɛnɛ hu, nuu lɛ sɔ̃i baafa, ejaakɛ bianɛ lɛ, jeee eŋa lɛ pɛ esa akɛ ekwɛ, shi moŋ esa akɛ ekwɛ gbekɛ lɛ, ni ji mɔ hee ni eba weku lɛ mli lɛ hu ni etsu ehiamɔ nii ahe nii ehã lɛ.

6-8. Kɛ́ gbalashihilɛ mli bii miitao bi waa shi amɛnáaa lɛ, mɛɛ gbɛ nɔ ebaanyɛ ehao amɛ?

6 Bii afɔmɔ hiɛ ehe naagbai. Kɛ̃lɛ, kɛ́ yoo ko bote gbalashihilɛ mli ni ekwɛ aahu shi bi baaa lɛ, no hu baanyɛ afee naagba kɛhã lɛ; ebaanyɛ etsɔ ‘heloo mli amanehulu’ kɛhã ekɛ ewu lɛ fɛɛ. (Abɛi 13:12) Yɛ blema lɛ, kɛ́ mɔ ko bote gbalashihilɛ mli shi efɔɔɔ lɛ, abuɔ lɛ akɛ eyɛ hiɛgbele waa. Enɛ hewɔ Yakob ŋa Rahel hao waa be ni ena akɛ enyɛmi yoo lɛ efɔ bii pii, shi lɛ lɛ, enyɛɛɛ efɔ lɛ. (1 Mose 30:1, 2) Bei pii lɛ, mɛi biɔ maŋsɛɛ sɔɔlɔi ni miisɔmɔ yɛ hei ni abuɔ bii babaoo afɔmɔ akɛ ehe miihia waa lɛ nɔ hewɔ ni amɛbɛ bii. Nyɛmimɛi lɛ jɛɔ hiɛshikamɔ mli amɛgbalaa nibii amli amɛtsɔɔ amɛ, shi ekɔɔɔ he eko bɔ ni amɛbaagbala mli amɛhã lɛ, mɛi lɛ kɛɔ amɛ akɛ, “Nyɛkashea gbeyei, wɔbaasɔle wɔhã nyɛ!”

7 Susumɔ nyɛmi yoo ko ni jɛ England lɛ hu niiashikpamɔ lɛ he okwɛ. Nyɛmi yoo nɛɛ shwe waa akɛ efɔ, shi bi lɛ eko baaa aahu ni efo fɔmɔ. Sane lɛ gba enaa waa diɛŋtsɛ, ejaakɛ ena faŋŋ akɛ, ja jeŋ hee lɛ mli dani ebaaná lɛ diɛŋtsɛ ebi. Ekɛ  ewu lɛ kpɛ amɛyiŋ akɛ amɛbaayaŋɔ bi. Fɛɛ sɛɛ lɛ, eye awerɛho kɛyashi be ko. Ewie akɛ: “Mile akɛ kɛ́ miyaŋɔ bi lɛ, etamɔɔɔ ni mi diɛŋtsɛ mafɔ.”

8 Biblia lɛ wie yɛ Kristofoi yei ahe akɛ, ‘abaatsɔ biiafɔmɔ nɔ abaa amɛyi shweshweeshwe.’ (1 Tim. 2:15) Ani enɛ tsɔɔ akɛ kɛ́ nyɛmi yoo ko fɔ lɛ, no baahã ená naanɔ wala? Dabi. Nɔ moŋ ni etsɔɔ ji akɛ, akɛni bii akwɛmɔ kɛ shĩa nitsumɔ heɔ mɔ be waa hewɔ lɛ, kɛ́ nyɛmi yoo ko yɛ bii lɛ, ebuɔ ehe, ejaakɛ ehãaa ená dekã ni ekɛye mɛi ahe osheku loo ekɛ enaa awo amɛsaji amli. (1 Tim. 5:13) Shi no hu etsɔɔɔ akɛ enáŋ naagbai yɛ egbala lɛ kɛ eweku lɛ mli.

Mɛni baanyɛ aye abua bo kɛ́ osuɔlɔ ko gbo? (Kwɛmɔ kuku 9, 12)

9. Mɛni hewɔ eyɔɔ dɔlɛ waa akɛ mɔ ko hefatalɔ baagbo ashi lɛ lɛ?

9 Gbalashihilɛ mli amanehulu kome ko ni bei pii lɛ mɛi ajwɛŋmɔ eyaaa nɔ ji, hefatalɔ gbele. Nyɛmimɛi pii kɛ shihilɛ ni jaraa nɛɛ ekpe. Yɛ amɛteŋ mɛi komɛi agbɛfaŋ lɛ, amɛhefatalɔi lɛ agbele lɛ ti amɛ shi trukaa. Kristofoi heɔ shi ni Yesu wo akɛ abaatee gbohii ashi lɛ amɛyeɔ kɛ amɛtsui fɛɛ. (Yoh. 5:28, 29) Mɛɛ gbɛ nɔ enɛ yeɔ ebuaa amɛ kɛ́ amɛhefatalɔi gboi? Eshɛjeɔ amɛmii waa. Gbohiiashitee he hiɛnɔkamɔ lɛ ji gbɛ kome ni wɔ-Tsɛ ni yɔɔ suɔmɔ lɛ tsɔɔ nɔ ekɛ e-Wiemɔ lɛ shɛjeɔ wɔmii yɛ wɔmanehului amli. Agbɛnɛ lɛ, nyɛhãa wɔsusua bɔ ni Nyɔŋmɔ tsuji komɛi fee amɛná miishɛjemɔ ni ekɛhãa lɛ he sɛɛ, kɛ bɔ ni enɛ ye ebua amɛ ehã.

NIBII KOMƐI NI BAANYƐ ASHƐJE WƆMII YƐ JARAMƆ SHIHILƐI AMLI

10. Mɛni shɛje Hana mii yɛ shihilɛ ni jaraa ni ekɛkpe lɛ mli? (Kwɛmɔ mfoniri ni yɔɔ nikasemɔ lɛ shishijee lɛ.)

10 Hana, ni ji Elkana ŋa ni esumɔɔ waa lɛ kɛ naagba ko kpe. Ebienyɛ Penina fɔ bii pii ehã ewu lɛ, shi lɛ lɛ, enyɛɛɛ efɔ. (Kanemɔ 1 Samuel 1:4-7.) Penina ye Hana he fɛo “daa afi,” ni enɛ hao Hana waa diɛŋtsɛ. No hewɔ lɛ, Hana sɔle ehã Yehowa yɛ sane nɛɛ he. Ŋmalɛi lɛ kɛɛ, ‘esɔle aahu’ yɛ Yehowa hiɛ. Ekpa lɛ fai akɛ ehã lɛ binuu, ni ekɛ ehiɛ fɔ̃ enɔ akɛ, ebaahã efɔ, aloo kɛjeee nakai lɛ, ebaatsɔ gbɛ ko nɔ kɛ̃ eye ebua lɛ. Enɛ shɛje Hana mii, ni no hewɔ lɛ, “ehiɛ efeee tɔtɔɔtɔ dɔŋŋ.”1 Sam. 1:12, 17, 18.

11. Mɛɛ gbɛ nɔ sɔlemɔ baanyɛ ashɛje wɔmii?

11 Shii abɔ ni wɔyeee emuu ni wɔyɔɔ Satan jeŋ fɔŋ nɛɛ mli lɛ, wɔkɛ shihilɛi ni jaraa baakpe. (1 Yoh. 5:19) Shi miishɛɛ sane ji akɛ, Yehowa ji “miishɛjemɔ fɛɛ Nyɔŋmɔ lɛ”! Gbɛ kome ni wɔbaanyɛ wɔtsɔ nɔ wɔhã eshɛje wɔmii kɛ́ wɔkɛ naagbai kɛ amanehului kpe ji, ni wɔbaasɔle wɔhã lɛ. Nakai Hana fee. Esɔle ehã Yehowa, ni egba lɛ nɔ fɛɛ nɔ ni kã etsui nɔ. Wɔ hu kɛ́ wɔyaje shihilɛi ni jaraa amli lɛ, nyɛhãa wɔsɔlea ni wɔgbaa Yehowa nɔ fɛɛ nɔ ni kã wɔtsui nɔ kɛ bɔ ni wɔnuɔ he wɔhãa. Yɛ nɔ najiaŋ ni wɔbaatsĩ nɔ ni haoɔ wɔ lɛ tã kɛkɛ wɔtsɔɔ lɛ lɛ, nyɛhãa wɔkɛ hiɛdɔɔ akpaa lɛ fai ni eye ebua wɔ.Fil. 4:6, 7.

12. Mɛni shɛje okulafo Hana mii?

12 Kɛ́ wɔwerɛ eho wɔhe waa yɛ bi ni wɔbɛ loo wɔsuɔlɔ ko ni egbo lɛ hewɔ po lɛ, nɔ ko kɛ̃ yɛ ni baanyɛ ashɛje wɔmii. Susumɔ yoo okulafo ko ni hi shi yɛ Yesu beiaŋ ni lɛ hu atsɛɔ lɛ Hana lɛ he okwɛ. Ebote gbalashihilɛ mli afii kpawo pɛ sɛɛ ni ewu lɛ gbo. Ni etamɔ nɔ ni ebɛ bi, ejaakɛ Biblia lɛ etsĩii ebii atã. Mɛni ye ebua Hana ni enyɛ ekpee eshihilɛ lɛ naa? Luka 2:37 lɛ kɛɔ akɛ: “Enane kpaaa yɛ sɔlemɔwe lɛ, ni ekɛ sɔɔmɔ krɔŋŋ hãa nyɔɔŋ kɛ shwane, ni ehiɔ ŋmaa ni ekpaa fai kɛ hiɛdɔɔ.” Be ni Hana egbɔ ni eye afii 84  po lɛ, etee nɔ esɔmɔ Yehowa kɛ miishɛɛ, ni enɛ shɛje emii.

13. Gbaa niiashikpamɔ ko ni tsɔɔ bɔ ni nanemɛi kpakpai baanyɛ ashɛje wɔmii kɛji akɛ wɔwekumɛi po hã wɔnine nyɛ shi.

13 Kɛ́ wɔkɛ wɔnyɛmimɛi Kristofoi lɛ bɔ gbagbalii lɛ, wɔbaaná nanemɛi kpakpai yɛ asafo lɛ mli. (Abɛi 18:24) Nyɛmi yoo ko ni atsɛɔ lɛ Paula lɛ kaiɔ bɔ ni enu he ehã be ni emami shi anɔkwale lɛ. No mli lɛ, eye afii enumɔ pɛ, ni enáaa shihilɛ lɛ mlɛo kwraa. Shi gbɛgbalɔ ko ni atsɛɔ lɛ Ann lɛ ye ebua lɛ waa ni ewo lɛ hewalɛ. Paula wie akɛ: “Eyɛ mli akɛ Ann jeee miwekunyo moŋ, shi bɔ ni ejie suɔmɔ kpo etsɔɔ mi ni esusu mihe lɛ ye ebua mi waa. Eye ebua mi koni maya nɔ masɔmɔ Yehowa.” Paula yɛ anɔkwale lɛ mli lolo. Kɛfata he lɛ, emami lɛ eku esɛɛ kɛba asafo lɛ mli, ni enɛ ehã Paula mii eshɛ ehe waa. Eŋɔɔ Ann naa waa akɛ enyɛ eye ebua Paula koni eya nɔ esɔmɔ Yehowa.

14. Kɛ́ wɔshɛje mɛi krokomɛi amii lɛ, mɛɛ gbɛ nɔ wɔnáa he sɛɛ?

14 Kɛ́ wɔsusu mɛi krokomɛi ahe ni wɔfee amɛ ejurɔ lɛ, no baanyɛ aye abua wɔ ni wɔjie wɔjwɛŋmɔ kɛje wɔnaagbai anɔ. Akɛ nɔkwɛmɔnɔ lɛ, nyɛmimɛi yei oshijafoi kɛ mɛi ni ebote gbalashihilɛ mli fɛɛ le akɛ, kɛ́ amɛkɛ Nyɔŋmɔ fee ekome kɛtsu nii yɛ sane kpakpa jajemɔ nitsumɔ lɛ mli lɛ, amɛnáa miishɛɛ waa, ejaakɛ amɛle akɛ amɛmiifee Nyɔŋmɔ suɔmɔnaa nii. Oti ni ma nyɛmimɛi yei nɛɛ ahiɛ ji ni  amɛwo Nyɔŋmɔ hiɛ nyam. Amɛteŋ mɛi komɛi po buɔ shiɛmɔ nitsumɔ lɛ akɛ eji tsofa. Ŋwanejee ko bɛ he akɛ, kɛ́ wɔsusu mɛi ni yɔɔ wɔshikpɔŋkuku lɛ kɛ wɔsafo lɛ mli lɛ ahe lɛ, ebaahã wɔ kɛ wɔnyɛmimɛi lɛ ateŋ naanyobɔɔ lɛ mli awa. (Fil. 2:4) Bɔfo Paulo fee enɛ he nɔkwɛmɔnɔ kpakpa. Ewie yɛ enyɛmimɛi ni yɔɔ Tesalonika lɛ ahe akɛ, ekwɛ amɛ “tamɔ bɔ ni yoo ní miihã fufɔ kɛ suɔmɔ kwɛɔ lɛ diɛŋtsɛ ebii lɛ.” Kɛfata he lɛ, eshɛje amɛmii ni ewo amɛ hewalɛ tamɔ bɔ ni tsɛ feɔ ehãa ebii lɛ.Kanemɔ 1 Tesalonikabii 2:7, 11, 12.

WƆBAANYƐ WƆSHƐJE WEKUI AMII

15. Namɛi asɔ̃ eji akɛ amɛtsɔɔ gbekɛbii anɔkwale lɛ?

15 Wɔbaanyɛ wɔshɛje wekui ni yɔɔ wɔsafo lɛ mli lɛ amii ni wɔye wɔbua amɛ. Bei komɛi lɛ, mɛi ni ba anɔkwale lɛ mli etsɛko lɛ kpaa mɛi ni etsɛ yɛ asafo lɛ mli lɛ fai ni amɛye amɛbua amɛbii lɛ loo amɛkɛ amɛ akase nii po. Biblia lɛ kɛɔ akɛ eji fɔlɔi asɔ̃ akɛ amɛtsɔɔ amɛbii lɛ nii ni amɛtsɔse amɛ. (Abɛi 23:22; Efe. 6:1-4) Eyɛ mli akɛ, bei komɛi lɛ, ehe bahiaa ni mɛi krokomɛi aye abua fɔlɔi lɛ moŋ, shi esaaa akɛ amɛshiɔ nitsumɔ lɛ fɛɛ amɛfɔ̃ɔ mɛi lɛ anɔ. Ehe miihia ni amɛkɛ amɛbii lɛ agba sane daa.

16. Mɛni esa akɛ wɔhã ehi wɔjwɛŋmɔ mli kɛ́ wɔmiiye wɔmiibua gbekɛbii?

16 Kɛ́ fɔlɔ ko kɛɛ bo akɛ okɛ ebi akase nii lɛ, no etsɔɔɔ akɛ obatsɔ gbekɛ lɛ fɔlɔ. Bei komɛi lɛ, abaanyɛ ahã okɛ gbekɛ ko ni efɔlɔi bɛ anɔkwale lɛ he miishɛɛ lɛ akase nii. Kɛ́ okɛ gbekɛ ko ni jeee obi miikase nii lɛ, hã ehi ojwɛŋmɔ mli akɛ, ooye oobua lɛ ni ele Yehowa, shi jeee ni ebatsɔ obi. Nilee yɛ mli akɛ okɛ gbekɛ lɛ baakase nii lɛ yɛ efɔlɔi lɛ ashĩa be ni efɔlɔi lɛ loo Odasefonyo kroko ni eda yɔɔ jɛmɛ. Aloo kɛjeee nakai lɛ, nyɛbaanyɛ nyɛkase yɛ he ko ni mɛi baana nyɛ. Kɛ́ ofee nakai lɛ, ebaawa waa akɛ mɔ ko baaná susumɔ ni ejaaa yɛ nɔ ni yaa nɔ lɛ he. Wɔshwelɛ ji akɛ, yɛ be ni sa mli lɛ, fɔlɔi lɛ diɛŋtsɛ baatsu sɔ̃ ni Nyɔŋmɔ etu ewo amɛdɛŋ lɛ he nii, ni amɛkɛ amɛbii lɛ akase nii.

17. Mɛɛ gbɛ nɔ bii baanyɛ ashɛje mɛi krokomɛi ni yɔɔ weku lɛ mli lɛ amii?

17 Kɛ́ gbekɛbii kase anɔkwa Nyɔŋmɔ lɛ he nii, amɛbasumɔ lɛ, ni amɛbo egbɛtsɔɔmɔi atoi lɛ, amɛshɛjeɔ weku muu lɛ fɛɛ mii. Bii ni tamɔ nɛkɛ lɛ buɔ amɛfɔlɔi ni amɛyeɔ amɛbuaa amɛ yɛ heloŋ gbɛfaŋ hu. Kɛfata he lɛ, kɛ́ amɛtee nɔ amɛye Yehowa anɔkwa lɛ, amɛwoɔ weku muu lɛ fɛɛ hewalɛ. Dani Nu Afua lɛ baaba lɛ, Set wekunyo ko ni atsɛɔ lɛ Lamek lɛ sɔmɔ Yehowa. Nuu nɛɛ gba yɛ ebi Noa he akɛ: “Mɔnɛ baashɛje wɔmii yɛ wɔnitsumɔi kɛ wɔnijiaŋ tɔlɛi lɛ ni jɛ shikpɔŋ lɛ loomɔ ni Yehowa elomɔ lɛ hewɔ lɛ mli.” Nakai gbalɛ lɛ ba mli be ni Yehowa jie loomɔ lɛ yɛ shikpɔŋ lɛ nɔ. (1 Mose 5:29; 8:21) Kɛ́ bii tee nɔ amɛsɔmɔ Yehowa lɛ, amɛbaanyɛ amɛshɛje weku muu lɛ fɛɛ mii, ni amɛye amɛbua amɛ koni amɛnyɛ amɛkpee kai fɛɛ ni baaba amɛnɔ ŋmɛnɛ kɛ wɔsɛɛ lɛ anaa.

18. Mɛni baaye abua wɔ ni wɔnyɛ wɔkpee amanehului kɛ jaramɔ shihilɛi fɛɛ ni wɔkɛbaakpe lɛ anaa?

18 Yehowa webii ni yɔɔ ŋmɛnɛ lɛ sɔleɔ, amɛjwɛŋɔ Biblia mli nɔkwɛmɔnii srɔtoi anɔ, ni amɛkɛ amɛnyɛmimɛi Kristofoi lɛ bɔɔ gbagbalii. Enɛ shɛjeɔ amɛmii yɛ shihilɛi ni jaraa ni amɛkɛkpeɔ lɛ fɛɛ amli. (Kanemɔ Lala 145:18, 19.) Kɛ́ wɔhã ehi wɔjwɛŋmɔ mli be fɛɛ be akɛ, Yehowa efee klalo akɛ ebaashɛje wɔmii lɛ, no baaye abua wɔ ni wɔnyɛ wɔkpee jaramɔ shihilɛi fɛɛ ni wɔkɛkpeɔ ŋmɛnɛ kɛ nɔ ni wɔkɛbaakpe wɔsɛɛ lɛ anaa.