Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Ani Okaiɔ?

Ani Okaiɔ?

Ani okane Buu-Mɔɔ srɔtoi ni ba nyɛsɛɛ nɛɛ jogbaŋŋ? Kwɛmɔ akɛ obaanyɛ ohã sanebimɔi ni nyiɛ sɛɛ nɛɛ ahetoo lo:

Kɛ́ Nyɔŋmɔ gbɛjianɔtoo lɛ kɛ gbɛtsɔɔmɔi hã lɛ, te esa akɛ kpokpaa nɔkwɛlɔi, asafoŋ onukpai, kɛ nyɛmimɛi hii krokomɛi ni tamɔ nakai lɛ afee amɛnii amɛhã tɛŋŋ?

Esa akɛ amɛbo toi oya. Amɛbaanyɛ amɛbi amɛhe akɛ: ‘Ani miwoɔ minyɛmimɛi Kristofoi lɛ hewalɛ ni amɛya nɔ amɛye Nyɔŋmɔ anɔkwa? Kɛ́ akɛ gbɛtsɔɔmɔ ko hã lɛ, ani miboɔ toi oya ni mikɛtsuɔ nii amrɔ nɔŋŋ?’w16.11, bf. 11.

Mɛɛ be Kristofoi batsɔmɔ nyɔji amɛhã Babilon Kpeteŋkpele lɛ?

Enɛ ba yɛ bɔfoi lɛ agbele sɛɛ afii fioo ko. Nakai beiaŋ mɛi komɛi wó amɛhe osɔfoi yɛ asafo lɛ mli. Sɔlemɔ lɛ kɛ Nɔyeli lɛ hã amale Kristojamɔ gbɛ eshwã, ni amɛhãaa Kristofoi anɔkwafoi ni tamɔ ŋmaa lɛ mumɔhe kwraa. Shi mɛi ni afɔ amɛ mu lɛ bɔi amɛhe tsemɔ afii fioo komɛi dani afi 1914.w16.11, bf. 23-25.

Mɛni hewɔ nɔ ni Lefèvre d’Étaples tsu lɛ sa kadimɔ lɛ?

Yɛ aaafee afi 1520 lɛ, Lefèvre tsɔɔ Biblia lɛ shishi kɛtee French mli koni mɛi foji hu anyɛ akane. Bɔ ni egbala Biblia mli saji amli ehã lɛ ná Martin Luther, William Tyndale, kɛ John Calvin nɔ hewalɛ.wp16.6, bf. 10-12.

Mɛɛ srɔto yɔɔ mɛi ni kɛ ‘amɛjwɛŋmɔ maa heloo lɛ nɔ’ lɛ kɛ mɛi ni ‘kɛmaa mumɔ lɛ nɔ’ lɛ ateŋ? (Rom. 8:6)

Mɛi ni ‘kɛmaa heloo lɛ nɔ’ lɛ hãa nibii fɔji ahe akɔnɔi náa amɛsusumɔi kɛ amɛnifeemɔi fɛɛ anɔ hewalɛ; no he kwraa amɛwieɔ daa, ni amɛmii shɛɔ he diɛŋtsɛ. Amɛnaagbee ji gbele. Mɛi ni ‘kɛmaa mumɔ lɛ nɔ’ lɛ hãa mumɔ krɔŋkrɔŋ lɛ kudɔɔ amɛ yɛ nibii fɛɛ mli, amɛfeɔ Nyɔŋmɔ suɔmɔnaa nii, ni amɛsusumɔi saa Nyɔŋmɔ hiɛ. Amɛbaaná wala kɛ toiŋjɔlɛ.w16.12, bf. 15-17.

Mɛɛ nibii komɛi baanyɛ aye abua wɔ koni wɔkaye wɔtsui fe nine?

Tsu nibii ni he hiaa waa lɛ ahe nii klɛŋklɛŋ, kpɛlɛmɔ nɔ akɛ jeee nɔ fɛɛ nɔ obaanyɛ ofee, taomɔ be yɛ gbi lɛ mli ni okɛjɔɔ ohe, hemɔ be kɛkwɛ nibii ni Yehowa ebɔ lɛ, okɛ nibii komɛi afee ŋmɔlɔ, gbɔlemɔ okpɔiaŋ daa, ni owɔ mra.w16.12, bf. 22-23.

Mɛɛ shishinumɔ naa “ajie Henok kɛtee koni ekana gbele”? (Heb. 11:5)

Eeenyɛ efee akɛ, Yehowa ŋɔ Henok kɛjɛ wala mli kɛtee gbele mli, ni Henok enaaa po akɛ eegbo.wp17.1, bf. 12-13.

Mɛni hewɔ ehe miihia ni wɔba wɔhe shi?

Mɛi ni baa amɛhe shi lɛ kpɛlɛɔ nɔ akɛ, jeee nɔ fɛɛ nɔ amɛbaanyɛ amɛfee, loo amɛyɔɔ hegbɛ akɛ amɛfeɔ. Amɛbuɔ mɛi krokomɛi ni amɛkɛ amɛ yeɔ yɛ mlihilɛ naa. Amɛnuuu he akɛ amɛhe miihia fe mɛi krokomɛi.w17.01, bf. 18.

Mɛni hãa anaa akɛ Nyɔŋmɔ ji mɔ ni kudɔ klɛŋklɛŋ afii 100 lɛ gbɛtsɔɔmɔ kuu lɛ, tamɔ bɔ ni ekudɔɔ ŋmɛnɛŋmɛnɛ beiaŋ Gbɛtsɔɔmɔ Kuu lɛ?

Mumɔ krɔŋkrɔŋ lɛ ye ebua amɛ ni amɛnu anɔkwalei ni yɔɔ Ŋmalɛi lɛ amli lɛ ashishi jogbaŋŋ. Ŋwɛibɔfoi ye amɛbua amɛ ni amɛkwɛ shiɛmɔ nitsumɔ lɛ nɔ, ni amɛkɛ amɛhiɛ fɔ̃ Nyɔŋmɔ Wiemɔ lɛ nɔ be ni amɛkɛ gbɛtsɔɔmɔi hãa lɛ. Nakai nɔŋŋ wɔnaa ŋmɛnɛ.w17.02, bf. 26-28.

Mɛni hãa wɔnaa kpɔmɔnɔ lɛ akɛ nɔ ko ni jara wa waa?

Nibii ejwɛ. Nomɛi ji: Mɔ ni kɛhã wɔ lɛ, nɔ hewɔ ni ekɛhã wɔ, nɔ ni ekɛshã afɔle dani ekɛhã wɔ, kɛ nɔ pɔtɛɛ ni etsu ehã wɔ. Esa akɛ wɔjwɛŋ nibii ejwɛ nɛɛ anɔ.wp17.2, bf. 4-6.

Kɛ́ Kristofonyo ko ná ekpɛ eyiŋ yɛ sane ko he lɛ, ani ebaanyɛ etsake ejwɛŋmɔ?

Esa akɛ wɔye wɔwiemɔ nɔ. Kɛ̃lɛ, bei komɛi lɛ, ehe baahia ni wɔsusu yiŋ ko ni wɔkpɛ lɛ he ekoŋŋ. Be ni Yehowa na akɛ Ninivebii lɛ etsake amɛtsui lɛ, etsake yiŋ ni ekpɛ yɛ amɛhe lɛ. Kɛ́ wɔná wɔle saji hei yɛ yiŋ ko ni wɔkpɛ momo lɛ he lɛ, ekolɛ ehe baahia ni wɔsusu nakai yiŋkpɛɛ lɛ he ekoŋŋ.w17.03, bf. 16-17.

Mɛni hewɔ eyɔɔ oshara waa akɛ wɔbaaye mɛi ahe osheku?

Oshekuyeli baanyɛ ahã naagba bibioo atsɔ naagba agbo, kɛkɛ lɛ ehe nitsumɔ ewa. Wɔsane ja jio, ejaaa jio lɛ, kɛ́ wɔwie mɛi ahe efɔŋ wɔtsɔɔ mɛi krokomɛi lɛ, no tsuŋ sane lɛ he nii.w17.04, bf. 21.