Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ) JUNE 2016

Su Kpakpa ko ni Jara Wa Fe Daimɔnd

Su Kpakpa ko ni Jara Wa Fe Daimɔnd

Daimɔnd ji ojarawatɛ ko ni mɛi shwɛɛɛ he kwraa. Ekomɛi ajara nyɛɔ eshɛɔ dɔlai akpekpei abɔ. Shi ani ole akɛ nibii komɛi yɛ ni Nyɔŋmɔ buɔ amɛ akɛ amɛjara wa fe ojarawatɛ nɛɛ kɛ ojarawatɛi krokomɛi fɛɛ?

 Gbi ko lɛ, yoo ko ni yɔɔ Armenia ni atsɛɔ lɛ Haykanush lɛ, na paspɔt ko kã shikpɔŋ. He ni ekã lɛ kɛ amɛshĩa lɛ teŋ jekɛɛɛ. Be ni ekɔ ni egbele naa lɛ, ena shika babaoo kɛ kaadi srɔtoi ni akɛjieɔ shika yɛ mli. Haykanush kɛ nii lɛ yatsɔɔ ewu. Ekɛ ewu lɛ fɛɛ ji shiɛlɔi ni abaptisiko amɛ.

Eyɛ mli akɛ, Haykanush kɛ ewu lɛ fɛɛ he egbi ni amɛyɛ nyɔji ni esa akɛ amɛwo moŋ, shi amɛkpɛ amɛyiŋ akɛ amɛkɛ shika lɛ baayahã nɔtsɛ. No mli lɛ aŋma he ni nɔtsɛ lɛ shĩa lɛ yɔɔ lɛ yɛ paspɔt lɛ mli. Be ni amɛkɛtee lɛ, nɔtsɛ lɛ kɛ eweku lɛ fɛɛ he jɔ̃ amɛhe waa. Haykanush kɛ ewu lɛ hã amɛle akɛ, nibii ni amɛkaseɔ yɛ Biblia lɛ mli lɛ ji nɔ ni tsirɛ amɛ ni amɛkɛ shika lɛ ba. Amɛŋɔ hegbɛ lɛ kɛgba weku lɛ Yehowa Odasefoi ahe sane, ni amɛhã amɛ wɔwoji lɛ ekomɛi ni amɛkane.

Nɔtsɛ lɛ kɛ eweku lɛ hiɛ sɔ nɔ ni Haykanush fee lɛ waa, no hewɔ lɛ amɛhã lɛ shika, shi eheee. Enɔ jetsɛremɔ lɛ, nɔtsɛ lɛ ŋa lɛ ba amɛshĩa lɛ koni ebahã Haykanush daimɔnd ga fɛfɛo ko. Ni efee aahu ekɛwo edɛŋ dani eshi etee.

Nɔ ni Haykanush kɛ ewu lɛ fee lɛ baahã mɛi pii anaa akpɛ amɛhe, tamɔ bɔ ni nɔtsɛ lɛ kɛ eweku lɛ naa kpɛ amɛhe lɛ. Shi ani Yehowa hu naa baakpɛ ehe? Te enaa anɔkwa ni amɛye lɛ ehãa tɛŋŋ? Mɛɛ gbɛ nɔ amɛná anɔkwa ni amɛye lɛ he sɛɛ?

SUI KOMƐI AHE YƐ SƐƐNAMƆ KWRAA FE HELOONAA NIBII

Yehowa webii le sanebimɔi nɛɛ ahetoo, ejaakɛ amɛle akɛ kɛ́ amɛjie esui akpo lɛ, enáa he miishɛɛ waa. Yɛ Yehowa hiɛ lɛ, kɛ́ mɔ ko nyɛ ekase lɛ lɛ, ehi kwraa fe ni ebaaná daimɔnd, shika tsuru, loo heloonaa nibii krokomɛi. Anɔkwa, nibii ni Yehowa buɔ akɛ amɛjara wa lɛ, jeee nomɛi kwraa ji nɔ ni adesai babaoo buɔ akɛ amɛjara wa. (Yes. 55:8, 9) Enɛ hewɔ lɛ, Yehowa tsuji miaa amɛhiɛ akɛ amɛbaajie esui lɛ akpo jogbaŋŋ.

Biblia lɛ maa enɛ nɔ mi yɛ Abɛi 3:13-15 lɛ. Jɛmɛ kɛɔ akɛ: “Ajɔɔ gbɔmɔ ni náa nilee kɛ gbɔmɔ ni náa jwɛŋmɔ! Ejaakɛ no námɔ hi fe jwiɛtɛi námɔ, ni emli sɛɛnamɔ lɛ fe shika krɔŋŋ. Ejara hu wa fe tɛŋɛlɛo, ni onii ni jara wa fɛɛ onyɛŋ okɛto he.” Ŋmalɛ nɛɛ hãa wɔnaa faŋŋ akɛ, Yehowa buɔ sui tamɔ sanesɛɛkɔmɔ kɛ nilee loo hiɛshikamɔ akɛ amɛjara wa fe heloonaa nibii.

Ni anɔkwayeli hu?

Yehowa yeɔ anɔkwa; ‘enyɛŋ emale.’ (Tito 1:2) Ekɛ emumɔ krɔŋkrɔŋ lɛ tsirɛ bɔfo Paulo ni eŋma eyahã Kristofoi ni yɔɔ Yudea yɛ klɛŋklɛŋ afii 100 lɛ mli lɛ akɛ: “Nyɛyaa nɔ nyɛsɔlea nyɛhãa wɔ, ejaakɛ wɔyɛ nɔmimaa akɛ wɔyɛ henilee kpakpa, ni wɔmiisumɔ ni wɔkɛ anɔkwayeli aba wɔjeŋ yɛ nɔ fɛɛ nɔ mli.”Heb. 13:18.

Yesu Kristo hu ye anɔkwa waa. Akɛ nɔkwɛmɔnɔ lɛ, be ni akɛ lɛ yadamɔ Sanhedrin lɛ hiɛ lɛ, Osɔfonukpa Kaiafa kɛɛ lɛ akɛ, ‘ekã kitã yɛ Nyɔŋmɔ hiɛkãalɔ lɛ hiɛ akɛ ebaawie anɔkwale, ní ekɛɛ amɛ kɛji lɛ ji Kristo lɛ, Nyɔŋmɔ Bi lɛ!’ No mli lɛ, Yesu le waa akɛ kɛ́ ekɛɛ amɛ akɛ lɛ ji Mesia lɛ, amɛbaakɛɛ akɛ ebɔ musu, ni amɛbaahã agbe lɛ. Shi, fɛɛ sɛɛ lɛ, ewie anɔkwale lɛ.Mat. 26:63-67.

Ni wɔ hu? Ani wɔbaaye anɔkwa kɛji no baahã shika loo heloonaa nɔ ko aŋmɛɛ wɔ po?

NƆ HEWƆ NI EBƐ MLƐO AKƐ ABAAYE ANƆKWA

Jeee be fɛɛ be eyɔɔ mlɛo akɛ wɔbaaye anɔkwa yɛ naagbee gbii nɛɛ amli, ejaakɛ  mɛi pii etsɔmɔ ‘hesuɔlɔi, kɛ shikasuɔlɔi.’ (2 Tim. 3:2) Ohia kɛ nitsumɔ ni anáaa ehã ewa kɛhã mɛi pii akɛ amɛbaaye anɔkwa. Mɛi babaoo nuɔ he akɛ, kɛ́ amɛju, amɛshishiu mɛi, loo amɛtsɔ gbɛi krokomɛi anɔ amɛtswa mɛi ojo lɛ, tɔmɔ ko kwraa bɛ he. Susumɔ gbonyo nɛɛ egbɛ eshwa he fɛɛ he. No hewɔ lɛ, ewa hã mɛi pii akɛ amɛbaaye anɔkwa, kɛ́ no baahã shika loo heloonaa nɔ ko aŋmɛɛ amɛ. Nyɛmimɛi komɛi po ehã susumɔ gbonyo nɛɛ ená amɛnɔ hewalɛ. Amɛyatiu “kutumpɔo sɛɛnamɔ” sɛɛ, ni amɛfite gbɛ́i kpakpa ni amɛyɔɔ yɛ asafo lɛ mli lɛ.1 Tim. 3:8; Tito 1:7.

Shi nyɛmimɛi babaoo bɛ nakai. Amɛkaseɔ Yesu. Amɛle akɛ, sui kpakpai ahe yɛ sɛɛnamɔ kwraa fe je nɛŋ shika kɛ heloonaa nibii fɛɛ. No hewɔ lɛ, nyɛmimɛi oblahii kɛ oblayei ni yaa skul lɛ sueee koni amɛbɔ mɔdɛŋ yɛ skul kai amli. (Abɛi 20:23) Be ni Haykanush ye anɔkwa lɛ, ake lɛ nii. Shi ekolɛ jeee nakai ebaaba lɛ yɛ wɔgbɛfaŋ. Kɛ̃lɛ, wɔle akɛ kɛ́ wɔtee nɔ wɔye anɔkwa, ni wɔfee nɔ ni ja yɛ Nyɔŋmɔ hiɛ lɛ, wɔbaaná henilee ni he tse, ni enɛ ji nɔ ko ni jara wa waa.

Nyɛmi nuu ko ni atsɛɔ lɛ Gagik lɛ ená enɛ mli niiashikpamɔ. Ewie akɛ: “Dani maba asafo lɛ mli lɛ, no mli lɛ mitsuɔ nii mihãa nitsumɔ agbo ko. Nitsumɔtsɛ lɛ wooo toi ni esa akɛ ewo lɛ fɛɛ, ejaakɛ jeee shika abɔ ni wɔnáa yɛ nitsumɔ lɛ mli lɛ fɛɛ ekɛwoɔ woji anɔ. Akɛni miji onukpai ni yɔɔ nitsumɔ lɛ mli lɛ ateŋ mɔ kome hewɔ lɛ, kɛ́ mɛi ni bakwɛɔ kɛji wɔmiiwo wɔtoi fɛɛ pɛpɛɛpɛ lɛ ba lɛ, ahãa miwoɔ amɛdɛŋ koni amɛkayakpa wɔhe mama. Enɛ hewɔ lɛ, abale mi akɛ mɔ ko ni yeee anɔkwa. Eyɛ mli akɛ mináa shika waa yɛ nakai nitsumɔ lɛ mli moŋ, shi be ni mikase anɔkwale lɛ, mikpa nakai ojotswaa lɛ, ni mi diɛŋtsɛ miyagbele minitsumɔ. Mikɛ minitsumɔ lɛ wo mla shishi, ni kɛjɛ gbi ni mibɔi nitsumɔ lɛ, miwo toi fɛɛ ni akpaa gbɛ akɛ mawo lɛ.”2 Kor. 8:21.

Shishijee mli lɛ, ebawa kɛhã Gagik akɛ ebaakwɛ eweku lɛ, ejaakɛ shika ni enáa yɛ enitsumɔ lɛ mli lɛ, ja akɛbɔ he aaafee toi enyɔ dani ebaashɛ nɔ ni kulɛ enáa lɛ. Shi ewie akɛ: “Amrɔ nɛɛ miyɛ miishɛɛ. Mile akɛ miyɛ henilee ni he tse yɛ Yehowa hiɛ. Miifee nɔkwɛmɔnɔ kpakpa miihã mibihii enyɔ lɛ, ni miná sɔɔmɔ hegbɛi yɛ asafo lɛ mli hu. Amrɔ nɛɛ, mɛi ni awoɔ too lɛ ahãa lɛ kɛ mɛi krokomɛi ni mikɛtsuɔ nii lɛ le akɛ, miyeɔ anɔkwa.”

YEHOWA BAAYE ABUA WƆ

Yehowa sumɔɔ mɛi ni tsɔɔ amɛjeŋba kpakpa kɛ anɔkwayeli nɔ amɛwoɔ ehiɛ nyam lɛ asane. (Tito 2:10) Ewo shi akɛ, kɛ́ wɔye lɛ anɔkwa lɛ, ebaaye ebua wɔ. Ekɛ emumɔ lɛ tsirɛ Maŋtsɛ David ni eŋma akɛ: “Sa lɛ gbekɛ ji mi ni agbɛnɛ mitsɔ nuumo, shi minako jalɔ ko ni akwa lɛ loo ni eseshibii miisisɛ̃ aboloo pɛŋ.”Lala 37:25.

Anɔkwafo Rut sane lɛ hãa wɔnaa akɛ, wiemɔi nɛɛ ji anɔkwale. Rut ye eshaayoo Naomi anɔkwa, ni ekwaaa lɛ yɛ egbɔlɛ beiaŋ. Rut fã eyahi Israel, koni enyɛ ejá anɔkwa Nyɔŋmɔ lɛ. (Rut 1:16, 17) Eye anɔkwa, ni etsu nii waa kɛye kpɛkpɛo, taakɛ atsɔɔ yɛ Mose Mla lɛ mli lɛ. Yehowa hãaa Rut kɛ Naomi awu bɔ; ekwɛ amɛ, taakɛ efee ehã David sɛɛ mli lɛ. (Rut 2:2-18) Shi yɛ heloonaa nibii ni Yehowa duro Rut lɛ fɛɛ sɛɛ lɛ, efee nɔ ko ni sa kadimɔ waa ehã lɛ. Ehala lɛ akɛ Maŋtsɛ David kɛ Mesia ni awo ehe shi lɛ ablemanyɛ!Rut 4:13-17; Mat. 1:5, 16.

Yehowa tsuji komɛi yɛ ni ewa kɛhã amɛ akɛ amɛaaná amɛdaaŋ ŋmaa. Shi yɛ nɔ najiaŋ  ni amɛbaatswa ojo bɔ ni afee ni amɛkɛkwɛ amɛhe lɛ, amɛŋaa amɛhiɛ latsa ni amɛgboɔ deŋme kɛtaoɔ amɛdaaŋ ŋmaa. Amɛkɛ amɛnifeemɔ etsɔɔ akɛ, amɛbuɔ Nyɔŋmɔ ni amɛaakase, kɛ anɔkwa ni amɛaaye lɛ akɛ ejara wa fe heloonaa nibii fɛɛ.Abɛi 12:24; Efe. 4:28.

Taakɛ Rut fee lɛ, nyɛmimɛi ni yɔɔ maji srɔtoi amli kɛ amɛnifeemɔ etsɔɔ akɛ, amɛheɔ amɛyeɔ akɛ Yehowa baakwɛ amɛ. Amɛkɛ amɛhiɛ efɔ̃ enɔ akɛ, taakɛ ewo shi lɛ, ‘eshiŋ amɛ, ni ekwaŋ amɛ kɔkɔɔkɔ.’ (Heb. 13:5) Yehowa etsɔɔ shii abɔ akɛ, eyeɔ ebua mɛi fɛɛ ni yeɔ anɔkwa be fɛɛ be lɛ. Yehowa ewo shi akɛ, ebaaya nɔ eduro etsuji fɛɛ amɛhiamɔ nii. Eye shiwoo nɛɛ nɔ, ni wɔle akɛ, ebaaya nɔ eye nɔ.Mat. 6:33.

Adesai buɔ daimɔnd kɛ heloonaa nibii krokomɛi akɛ amɛjara wa. Shi wɔle akɛ, yɛ Yehowa, wɔ-Tsɛ ni yɔɔ ŋwɛi lɛ hiɛ lɛ, ojarawatɛ ko kwraa bɛ ni jara wa fe anɔkwayeli kɛ jeŋba kpakpa!

Kɛ́ wɔye anɔkwa lɛ, wɔbaaná henilee ni he tse ni wɔhenilee ebuŋ wɔ fɔ kɛ́ wɔtee shiɛmɔ