Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Ani Ole?

Ani Ole?

Yɛ blema Israel lɛ, ani kojolɔi lɛ kɛ yiŋtoi ahewɔ ni awo Mose Mla lɛ tsu nii yɛ saji ni mɛi kɛba koni amɛye lɛ amli?

HƐƐ, amɛkɛtsu nii bei komɛi. Naa enɛ he nɔkwɛmɔnɔ kome. Aŋma yɛ 5 Mose 24:14, 15 lɛ akɛ: “Kaashishiu apaafonyo ohiafo ni efĩ lɛ, onyɛmimɛi lɛ ateŋ mɔ ko jio, gbɔ ni yɔɔ oshikpɔŋ lɛ nɔ yɛ omaji lɛ amli lɛ eko jio. . . . Kɛjeee nakai lɛ, ebaabolɔ etsɛ Yehowa ewo bo, ni no baatsɔ esha ehã bo.”

Ŋɛsuko lɛ ni aŋma apaafonyo lɛ faikpamɔ lɛ yɛ nɔ lɛ

Nɔ ko ni aŋma yɛ ŋɛsuko ko ni ana yɛ Ashdod niiaŋ lɛ nɔ lɛ hãa wɔnaa akɛ akɛ gbɛtsɔɔmɔ nɛɛ ni yɔɔ mla lɛ mli lɛ tsu nii. Blema nibii ahe nilelɔi kɛɛ aŋma sane ni yɔɔ ŋɛsuko nɛɛ nɔ lɛ dani afi 600 D.Ŋ.B. Eeenyɛ efee akɛ, aŋma ahã apaafonyo ko ni akɛɛ eyanyɛɛɛ ekpa ŋmɔshi nii falɛ pɔtɛɛ ko ni afo ahã lɛ lɛ. Nɔ ni aŋma lɛ kaneɔ akɛ: “Gbii fioo ni eho nɛɛ, otsulɔ kɛ ŋmɔshi nii ni ekpa lɛ yato nitoohe lɛ [apaafonyo lɛ ni wieɔ nɛɛ]. Shi Shobay binuu Hoshayahu ba ni ebaŋɔ otsulɔ lɛ atade. . . . Minyɛmimɛi apaafoi ni fata mihe kɛkpaa nii yɛ hulu ni tsoɔ gbaŋgbaŋ lɛ nɔ lɛ fɛɛ baaye odase . . . akɛ nɔ ni miwie nɛɛ ji anɔkwale. Mifeko nɔ fɔŋ ko. . . . Kɛ́ amralo lɛ nuɔ he akɛ ejeee enitsumɔ akɛ ehã akɛ etsulɔ lɛ atade lɛ aku sɛɛ abahã lɛ po lɛ, ekwɛ bɔ ni etsulɔ lɛ nii efee mɔbɔ waa lɛ, ni etsu saji ahe nii ehã lɛ! Esaaa akɛ omuaa onaa be ni otsulɔ lɛ nine shɛko etade lɛ nɔ.”

Blema saji ahe nilelɔ ko ni atsɛɔ lɛ Simon Schama lɛ wie yɛ faikpamɔ nɛɛ he akɛ, “Niŋmaa nɛɛ hãa wɔnaa bɔ ni apaafonyo lɛ bɔ mɔdɛŋ waa ni enine ashɛ [etade lɛ] nɔ ekoŋŋ, shi jeee no pɛ.” Ekɛfata he akɛ, “Ehãa wɔnaa hu akɛ, mɔ ni kɛ sane nɛɛ tee koni aye ahã lɛ lɛ le Mose Mla lɛ he nɔ ko, titri lɛ, famɔi ni yɔɔ 3 Mose lɛ kɛ 5 Mose lɛ ni tsɔɔ akɛ esaaa akɛ afeɔ ohiafoi niseniianii lɛ.”