Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Mɛɛ Suɔmɔ Hãa Anáa Miishɛɛ Diɛŋtsɛ?

Mɛɛ Suɔmɔ Hãa Anáa Miishɛɛ Diɛŋtsɛ?

“Maŋ ni Yehowa ji amɛ-Nyɔŋmɔ lɛ yɛ miishɛɛ!”​—LALA 144:15.

LALAI: 111, 109

1. Mɛni hewɔ esoro wɔyinɔ nɛɛ kwraa yɛ yinɔi fɛɛ ni eho lɛ ahe?

ESORO wɔyinɔ nɛɛ kwraa yɛ yinɔi fɛɛ ni eho lɛ ahe. Tamɔ bɔ ni Biblia lɛ egba lɛ, ŋmɛnɛ lɛ, Yehowa miibua “asafoku babaoo ko . . . ni jɛ jeŋmaŋ fɛɛ jeŋmaŋ kɛ weku fɛɛ weku kɛ gbɔmɛi srɔtoi fɛɛ kɛ wiemɔ fɛɛ wiemɔ mli” lɛ anaa. Mɛi ni abua amɛnaa nɛɛ feɔ “maŋ ni he wa” ni yɔɔ miishɛɛ. Amrɔ nɛɛ amɛyi fa fe akpekpei kpaanyɔ, ni “amɛkɛ sɔɔmɔ krɔŋŋ hãa [Nyɔŋmɔ] jetsɛremɔ kɛ jenamɔ.” (Kpo. 7:9, 15; Yes. 60:22) Yɛ yinɔsane mli fɛɛ lɛ, anáko mɛi babaoo ni sumɔɔ Nyɔŋmɔ kɛ amɛnyɛmi gbɔmɔ tamɔ nɛkɛ pɛŋ.

2. Mɛni gbɛ nɔ esoro suɔmɔ ni mɛi ni jeee Nyɔŋmɔ nanemɛi lɛ jieɔ lɛ kpo lɛ yɛ suɔmɔ ni Nyɔŋmɔ nanemɛi lɛ jieɔ lɛ kpo lɛ he? (Kwɛmɔ mfoniri ni yɔɔ nikasemɔ lɛ shishijee lɛ.)

2 Kɛ̃lɛ, Ŋmalɛ lɛ gba akɛ yɛ wɔgbii nɛɛ amli lɛ, mɛi ni jeee Nyɔŋmɔ nanemɛi lɛ baasumɔ nibii krokomɛi moŋ fe Nyɔŋmɔ, ni enɛ baahã amɛfo amɛ pɛ amɛnɔ mli. Bɔfo Paulo ŋma akɛ: “Naagbee gbii lɛ amli lɛ . . . , gbɔmɛi baatsɔmɔ hesuɔlɔi, shikasuɔlɔi, . . . mɛi ni sumɔɔ shwɛmɔ-kɛ-ŋɔɔmɔ moŋ fe Nyɔŋmɔ.” (2 Tim. 3:1-4) Esoro suɔmɔ nɛɛ ni hãa mɔ foɔ lɛ pɛ enɔ mli lɛ kwraa yɛ suɔmɔ ni wɔyɔɔ kɛhã Nyɔŋmɔ lɛ he. Mɛi susuɔ akɛ kɛ́ amɛtiu nibii ni amɛ pɛ amɛbaaná he sɛɛ lɛ asɛɛ lɛ, no baahã amɛná miishɛɛ, shi no moŋ hãaa  amɛná miishɛɛ. Anɔkwa, suɔmɔ nɛɛ hãa mɛi babaoo foɔ amɛ pɛ amɛnɔ mli ni ehãa je lɛ ‘mli shihilɛ waa.’

3. Mɛni wɔbaasusu he yɛ nikasemɔ nɛɛ mli? Mɛni hewɔ wɔbaafee nakai?

3 Paulo le akɛ yɛ wɔgbii nɛɛ amli lɛ, mɛi pii baajie suɔmɔ ni hãa amɛfoɔ amɛ pɛ amɛnɔ mli lɛ kpo, ni su nɛɛ baanyɛ aná Kristofoi anɔ hewalɛ. No hewɔ lɛ, ebɔ Kristofoi kɔkɔ koni ‘amɛtsi amɛhe kɛje’ mɛi ni sumɔɔ nibii krokomɛi moŋ fe Nyɔŋmɔ lɛ ahe. (2 Tim. 3:5) Shi wɔnyɛŋ wɔkɛɛ akɛ wɔkɛ mɛi ni tamɔ nɛkɛ lɛ efeŋ nɔ ko kwraa. No hewɔ lɛ, te wɔɔfee tɛŋŋ wɔkpoo sui gbohii nɛɛ ni mɛi ni wɔyɔɔ amɛteŋ lɛ jieɔ lɛ kpo lɛ, ni wɔjie sui kpakpai ni baahã Yehowa, Nyɔŋmɔ ni yɔɔ suɔmɔ lɛ, aná wɔhe miishɛɛ lɛ akpo? Nyɛhãa wɔsusua srɔto ni yɔɔ suɔmɔ ni Nyɔŋmɔ miisumɔ ni wɔjie kpo kɛ suɔmɔ ni awie yɛ 2 Timoteo 3:2-4 lɛ he wɔkwɛa. Be ni wɔfeɔ nakai lɛ, wɔbaapɛi wɔmli ni wɔkwɛ bɔ ni wɔbaafee wɔjie suɔmɔ ni baahã wɔtsui anyɔ wɔmli ni wɔná miishɛɛ diɛŋtsɛ lɛ kpo.

ANI OSUMƆƆ NYƆŊMƆ LOO OSUMƆƆ BO DIƐŊTSƐ OHE?

4. Mɛni hewɔ ejeee tɔmɔ akɛ wɔbaasumɔ wɔ diɛŋtsɛ wɔhe yɛ gbɛ kpakpa nɔ lɛ?

4 Akɛ mumɔ tsirɛ bɔfo Paulo ni eŋma akɛ: “Gbɔmɛi baatsɔmɔ hesuɔlɔi.” Ani no tsɔɔ akɛ esaaa akɛ wɔsumɔɔ wɔ diɛŋtsɛ wɔhe? Dabi, kɛ́ mɔ ko sumɔɔ lɛ diɛŋtsɛ ehe lɛ naagba ko bɛ he, ni ehe miihia ni wɔsumɔ wɔ diɛŋtsɛ wɔhe yɛ gbɛ kpakpa nɔ. Nakai ji bɔ ni Yehowa bɔ wɔ. Yesu kɛɛ akɛ: “Suɔmɔ onyɛmi gbɔmɔ tamɔ bo diɛŋtsɛ ohe.” (Mar. 12:31) Anɔkwa, kɛ́ wɔsumɔɔɔ wɔ diɛŋtsɛ wɔhe lɛ, wɔnyɛŋ wɔsumɔ wɔnyɛmi gbɔmɔ. Biblia lɛ kɛɔ hu akɛ: “Wumɛi asumɔ amɛŋamɛi tamɔ amɛ diɛŋtsɛ amɛgbɔmɔtsei. Nuu ni sumɔɔ eŋa lɛ, lɛ diɛŋtsɛ ehe esumɔɔ, ejaakɛ gbɔmɔ ko gbɔmɔ ko enyɛko lɛ diɛŋtsɛ egbɔmɔtso dã, shi moŋ elɛɔ lɛ ni edɔɔ he.” (Efe. 5:28, 29) No hewɔ lɛ, ekã shi faŋŋ akɛ esa akɛ wɔsumɔ wɔ diɛŋtsɛ wɔhe yɛ gbɛ kpakpa nɔ.

5. Te mɛi ni sumɔɔ amɛ diɛŋtsɛ amɛhe fe nine lɛ feɔ amɛnii amɛhãa tɛŋŋ?

5 Naagba yɛ suɔmɔ ni mɔ baasumɔ ehe ni atsĩ tã yɛ 2 Timoteo 3:2 lɛ mli lɛ he; ejeee suɔmɔ kpakpa. Ehãa mɔ foɔ lɛ pɛ enɔ mli. Mɛi ni sumɔɔ amɛ diɛŋtsɛ amɛhe fe nine lɛ buɔ amɛhe tsɔ fe bɔ ni sa akɛ amɛbu amɛhe. (Kanemɔ Romabii 12:3.) Be fɛɛ be lɛ, amɛsusuɔ amɛ pɛ amɛhe, amɛsusuuu mɔ ko mɔ ko he. Kɛ́ nibii eyaaa lɛ jogbaŋŋ lɛ, amɛshwaa mɛi krokomɛi moŋ fe ni amɛbaashwa amɛhe. Mɛi ni foɔ amɛ pɛ amɛnɔ mli lɛ bɛ miishɛɛ diɛŋtsɛ.

6. Mɛɛ sui mɛi ni sumɔɔ Nyɔŋmɔ lɛ jieɔ lɛ kpo?

6 Biblia he nilelɔi komɛi heɔ amɛyeɔ akɛ bɔfo Paulo tsĩ hesuɔmɔ tã klɛŋklɛŋ, ejaakɛ no hãa ajieɔ sui gbohii krokomɛi ni etsĩ tã akɛ mɛi pii baajie lɛ kpo yɛ naagbee gbii lɛ amli lɛ akpo. Nɔ ni tamɔɔɔ nakai lɛ, suɔmɔ ni Nyɔŋmɔ miisumɔ ni wɔjie lɛ kpo lɛ hãa ajieɔ sui kpakpai akpo. Biblia lɛ hãa wɔleɔ akɛ suɔmɔ nɛɛ hãa ajieɔ sui tamɔ miishɛɛ, toiŋjɔlɛ, tsuishitoo, mlihilɛ, ekpakpafeemɔ, hemɔkɛyeli, mlijɔlɛ, kɛ henɔyeli kpo. (Gal. 5:22, 23) Aŋma yɛ Lalai Awolo lɛ mli akɛ: “Maŋ ni Yehowa ji amɛ-Nyɔŋmɔ lɛ yɛ miishɛɛ!” (Lala 144:15) Yehowa ji miishɛɛ Nyɔŋmɔ, ni ewebii lɛ hu yɛ miishɛɛ. Agbɛnɛ hu, etsuji lɛ efeee amɛnii tamɔ mɛi ni sumɔɔ amɛ diɛŋtsɛ amɛhe fe nine ni be fɛɛ be lɛ amɛmiisusu nɔ ni amɛbaaná kɛjɛ mɛi krokomɛi adɛŋ lɛ he lɛ. Moŋ lɛ, amɛkɛ amɛhe shãa afɔle kɛhã mɛi krokomɛi ahilɛkɛhamɔ, ni no hewɔ lɛ, amɛyɛ miishɛɛ.​—Bɔf. 20:35.

Mɛni wɔbaanyɛ wɔfee koni wɔkatsɔmɔ hesuɔlɔi? (Kwɛmɔ kuku 7)

7. Mɛɛ sanebimɔi baahã wɔna kɛji wɔsumɔɔ Nyɔŋmɔ fe wɔ diɛŋtsɛ wɔhe?

7 Te wɔbaafee tɛŋŋ wɔna akɛ wɔsumɔɔ wɔ diɛŋtsɛ wɔhe fe Nyɔŋmɔ? Nyɛhãa wɔsusua ŋaawoo ni yɔɔ Filipibii 2:3, 4 lɛ he wɔkwɛa. Aŋma yɛ jɛmɛ akɛ: “Nyɛkajɛa naataamɔ loo nyɛhe ni nyɛnaa tsɔ mli nyɛfea nɔ ko nɔ ko, shi moŋ nyɛkɛ heshibaa abua mɛi krokomɛi akɛ amɛnɔ kwɔlɔ fe nyɛ, be mli ni nyɛtaoɔ nibii ni hi hã mɛi krokomɛi, shi jeee nibii ni hi hã nyɛ pɛ lɛ.” Wɔbaanyɛ wɔbi wɔhe akɛ:  ‘Ani mikɛ ŋaawoo nɛɛ tsuɔ nii yɛ mishihilɛ mli? Ani mibɔɔ mɔdɛŋ fɛɛ ni manyɛ koni mafee nɔ ni Nyɔŋmɔ miisumɔ ni mafee? Ani mitaoɔ gbɛi ni matsɔ nɔ maye mabua mɛi ni yɔɔ misafo lɛ mli kɛ mɛi ni mikɛkpeɔ yɛ shiɛmɔ nitsumɔ lɛ mli lɛ?’ Jeee be fɛɛ be eyɔɔ mlɛo akɛ wɔkɛ wɔbe kɛ wɔhewalɛ baashã afɔle kɛye wɔbua mɛi krokomɛi. Ebiɔ hiɛmiamɔ, ni bei komɛi po lɛ, ebaabi ni wɔkɛ nibii komɛi ni wɔsumɔɔ waa lɛ ashã afɔle. Shi ani nɔ ko yɛ ni baahã wɔná miishɛɛ fe ni wɔɔle akɛ jeŋ muu fɛɛ Nɔyelɔ lɛ náa wɔhe miishɛɛ?

8. Mɛni nyɛmimɛi komɛi efee akɛni amɛsumɔɔ Nyɔŋmɔ lɛ hewɔ?

8 Nyɛmimɛi komɛi eŋmɛɛ nitsumɔi komɛi ni kulɛ ebaahã amɛtsɔmɔ niiatsɛmɛi lɛ ahe ejaakɛ amɛsumɔɔ Nyɔŋmɔ ni amɛmiisumɔ ni amɛkɛ amɛbe babaoo asɔmɔ lɛ. Akɛ nɔkwɛmɔnɔ lɛ, Ericka ji datrɛfonyo, ni eyɛ United States. Ekpɛ mli akɛ ebaatsu gbɛgbamɔ nitsumɔ lɛ moŋ fe ni ekɛ ebe fɛɛ baatsu nii akɛ datrɛfonyo. Lɛ kɛ ewu fɛɛ eyasɔmɔ yɛ maji srɔtoi amli. Ericka wie akɛ: “Yelikɛbuamɔ ni wɔkɛhã mɛi ni wieɔ wiemɔi krokomɛi, kɛ nanemɛi ni wɔná yɛ sɔɔmɔ nitsumɔ lɛ mli lɛ, ehã wɔná miishɛɛ waa ni wɔnuɔ he akɛ wɔkɛ wɔwala miitsu nɔ ko kpakpa. Mitsuɔ nii akɛ datrɛfonyo lolo, shi akɛni mikɛ mibe babaoo kɛ mihewalɛ tsɔɔ mɛi nii koni amɛle Yehowa, ni agbɛnɛ hu, miyeɔ mibuaa mɛi yɛ asafo lɛ mli hewɔ lɛ, mináa miishɛɛ ni mitsui nyɔɔ mimli.”

ANI OOBUA JWETRII ANAA YƐ ŊWƐI LOO YƐ SHIKPƆŊ LƐ NƆ?

9. Mɛni hewɔ mɔ ni sumɔɔ shika náaa miishɛɛ lɛ?

9 Paulo ŋma akɛ mɛi baatsɔmɔ “shikasuɔlɔi.” Afii komɛi ni eho nɛ lɛ, gbɛgbalɔ ko ni yɔɔ Ireland lɛ kɛ nuu ko gba Nyɔŋmɔ he sane. Nuu lɛ jie ewalɛt lɛ kɛjɛ ekotoku lɛ mli, ejie shika yɛ mli, ewó shika lɛ nɔ kɛtee ŋwɛi ni ekɛ miishɛɛ kɛɛ akɛ, “Minyɔŋmɔ nɛ!” Eyɛ mli akɛ mɛi babaoo ewieŋ nɔ ni nuu nɛɛ wie lɛ yɛ faŋŋ moŋ, shi nakai amɛnuɔ he. Amɛsumɔɔ shika kɛ nibii ni shika baanyɛ ahe lɛ. Shi Biblia lɛ bɔɔ wɔ kɔkɔ akɛ: “Mɔ ni sumɔɔ jwiɛtɛi lɛ, jwiɛtɛi shɛɛɛ enaa, ni mɔ ni sumɔɔ ni ená nii hu lɛ, nii ni enáa lɛ shɛɛɛ enaa.” (Jaj. 5:10) Mɛi ni sumɔɔ shika lɛ, shika shɛɛɛ amɛnaa. Amɛsumɔɔ ni amɛná pii kɛfata he, amɛgboɔ deŋme kɛtaoɔ, ni enɛ hãa ‘amɛkɛ piŋmɔi babaoo gbulɔɔ amɛhe.’​—1 Tim. 6:9, 10.

10. Mɛni Biblia lɛ kɛɔ yɛ ninámɔ kɛ ohiayeli he?

10 Shika he miihia wɔ fɛɛ. Shika buɔ wɔhe yɛ gbɛ ko nɔ. (Jaj. 7:12) Shi kɛ́ mɔ ko yɛ shika ni ebaanyɛ ekɛhe ehiamɔ nii pɛ lɛ, ani emii baanyɛ ashɛ ehe lɛɛlɛŋ? Hɛɛ! (Kanemɔ Jajelɔ 5:12.) Yake binuu Agur ŋma akɛ: “Kaahã miye ohia, ni kaahã miná nii hu. Hã maye niyenii ni baashɛ mi lɛ kɛkɛ.” Ewaaa akɛ wɔbaanu nɔ hewɔ ni esumɔɔɔ ni eyeɔ ohia butuu lɛ shishi. Tamɔ bɔ ni etee nɔ ewie lɛ, esumɔɔɔ ni nɔ ko kaa lɛ ni eyaju ejaakɛ kɛ́ efee nakai lɛ ebaagbe Nyɔŋmɔ he guɔ. Shi mɛni hewɔ esɔle koni ekaná nii lɛ? Eŋma akɛ: “Koni mikatɔ ni mije osɛɛ ni mikɛɛ, ‘Namɔ ji Yehowa?’” (Abɛi 30:8, 9) Ekolɛ ole mɛi ni kɛ amɛhiɛ fɔ̃ɔ nii ni amɛná lɛ nɔ moŋ fe Nyɔŋmɔ.

11. Mɛɛ ŋaa Yesu wo yɛ shika he?

11 Mɛi ni sumɔɔ shika nyɛŋ asa Nyɔŋmɔ hiɛ. Yesu wie akɛ: “Mɔ ko nyɛŋ etsɔ nyɔŋ ehã nuŋtsɔmɛi enyɔ; ejaakɛ no lɛ, ebaanyɛ mɔ kome ni ebaasumɔ mɔ kroko lɛ, loo ebaakpɛtɛ mɔ kome he ni ebuŋ mɔ kroko lɛ ehãŋ nɔ ko. Nyɛnyɛŋ nyɛtsɔmɔ nyɔji nyɛhã Nyɔŋmɔ kɛ Ninámɔ fɛɛ.” Shi dani ebaawie enɛ lɛ, ewie akɛ: “Nyɛkpaa jwetrii ni nyɛbuaa naa nyɛhãa nyɛhe yɛ shikpɔŋ lɛ nɔ, he ni abɛi ni yeɔ mama kɛ ŋkanale fiteɔ nii, ni julɔi hu gbuɔ kɛboteɔ mli kɛbajuɔ yɛ lɛ. Shi moŋ, nyɛbuaa jwetrii anaa nyɛhãa nyɛhe yɛ ŋwɛi, he ni abɛi ni yeɔ mama loo ŋkanale fiteee nii, ni julɔi hu egbuuu kɛboteee mli kɛyajuuu yɛ lɛ.”​—Mat. 6:19, 20, 24.

12. Mɛni hewɔ kɛ́ wɔbuaaa heloonaa nibii pii anaa wɔhãaa wɔhe lɛ wɔnáa lɛ mlɛo akɛ wɔbaasɔmɔ Nyɔŋmɔ lɛ? Okɛ enɛ he nɔkwɛmɔnɔ ahã.

12 Yehowa tsuji babaoo ena akɛ, kɛ́ amɛbuaaa  heloonaa nibii pii anaa amɛhãaa amɛhe lɛ, ehãa amɛmii shɛɔ amɛhe ni amɛnáa be pii hu kɛsɔmɔɔ lɛ. Akɛ nɔkwɛmɔnɔ lɛ, Jack ni yɔɔ United States lɛ hɔ̃ɔ shĩa wulu ni eyɔɔ lɛ kɛ enitsumɔ lɛ ejaakɛ ele akɛ no baahã enyɛ ekɛ eŋa fɛɛ atsu gbɛgbamɔ nitsumɔ lɛ. Ewie akɛ: “Mishĩa fɛfɛo kɛ mishikpɔŋ lɛ yɛ he ko ni yɔɔ fɛo ni etse ehe banee, ni shishijee lɛ ewa waa kɛhã mi akɛ mahɔ̃ɔ. Eyɛ naakpɛɛ waa akɛ minu he nakai, ejaakɛ naagbai ni mikɛkpeɔ yɛ minitsumɔhe lɛ hewɔ lɛ, be fɛɛ be ni maba shĩa lɛ mihao, ni enɛ tee nɔ afii pii. No mli lɛ, miŋa ji daa gbɛgbalɔ ni be fɛɛ be lɛ, eyɛ miishɛɛ. Miŋa kɛɔ akɛ, ‘Minitsumɔtsɛ lɛ nɔ bɛ kwraa!’ Amrɔ nɛɛ ni mi hu miitsu gbɛgbamɔ nitsumɔ lɛ, wɔ fɛɛ wɔmiitsu nii wɔmiihã mɔ kome too lɛ nɔŋŋ, ni ji Yehowa.”

Mɛni wɔbaanyɛ wɔfee koni wɔkatsɔmɔ shikasuɔlɔi? (Kwɛmɔ kuku 13)

13. Mɛni kɛ́ wɔfee lɛ ebaanyɛ ehã wɔna kɛji wɔsumɔɔ shika loo wɔsumɔɔɔ shika?

13 Kɛ́ wɔmiitao wɔna kɛji wɔsumɔɔ shika loo wɔsumɔɔɔ shika lɛ, esa akɛ wɔjɛ wɔtsui mli fɛɛ wɔbi wɔhe saji ni nyiɛ sɛɛ nɛɛ: ‘Ani miheɔ nɔ ni Biblia lɛ wieɔ yɛ shika he lɛ miyeɔ lɛɛlɛŋ? Ani mihiɔ shi yɛ nɔ ni Biblia lɛ wieɔ yɛ shika he lɛ naa? Ani shikataomɔ he hiaa mi fe nɔ fɛɛ nɔ? Ani minaa heloonaa nibii akɛ amɛhe miihia fe wekukpaa ni yɔɔ mi kɛ Yehowa teŋ kɛ mi kɛ mɛi krokomɛi ateŋ lɛ? Ani miheɔ miyeɔ lɛɛlɛŋ akɛ Yehowa baahã mi nibii ni he hiaa mi lɛ?’ Wɔbaanyɛ wɔhe wɔye akɛ, bɔ fɛɛ bɔ ni fee lɛ ebaahã mɛi ni kɛ amɛhiɛ fɔ̃ɔ enɔ lɛ aná amɛhiamɔ nii.​—Mat. 6:33.

ANI WƆSUMƆƆ YEHOWA LOO WƆSUMƆƆ SHWƐMƆ-KƐ-ŊƆƆMƆ?

14. Mɛɛ susumɔ ni sa esa akɛ wɔná yɛ shwɛmɔ-kɛ-ŋɔɔmɔ he?

14 Tamɔ bɔ ni Biblia lɛ gba lɛ, ŋmɛnɛ lɛ mɛi pii “sumɔɔ shwɛmɔ-kɛ-ŋɔɔmɔ.” Bɔ ni tɔmɔ bɛ he akɛ mɔ baasumɔ lɛ diɛŋtsɛ ehe kɛ shika yɛ gbɛ kpakpa nɔ lɛ, nakai nɔŋŋ tɔmɔ bɛ he akɛ wɔkɛ wɔhe baawo shwɛmɔ-kɛ-ŋɔɔmɔ mli yɛ gbɛ kpakpa nɔ. Yehowa sumɔɔɔ ni wɔwaa wɔhe yi, ni esumɔɔɔ hu ni wɔtsiɔ wɔhe kɛjeɔ nifeemɔi ni sa ni baahã wɔmii ashɛ wɔhe lɛ ahe. Biblia lɛ woɔ mɔ fɛɛ mɔ ni sɔmɔɔ Nyɔŋmɔ lɛ hewalɛ akɛ: “Yaa ni oyaye oniyenii kɛ miishɛɛ, ni okɛ tsuijurɔ ayanu owain.”​—Jaj. 9:7.

15. Kɛ́ akɛɛ mɔ ko sumɔɔ shwɛmɔ-kɛ-ŋɔɔmɔ lɛ, te atsɔɔ tɛŋŋ?

15 Nɔ ni 2 Timoteo 3:4 lɛ wieɔ he lɛ kɔɔ suɔmɔ ni abaaná ahã shwɛmɔ-kɛ-ŋɔɔmɔ  ni ajie jwɛŋmɔ kɛje Nyɔŋmɔ nɔ kwraa lɛ he. Kadimɔ akɛ ŋmalɛ nɛɛ ekɛɛɛ akɛ mɛi baasumɔ shwɛmɔ-kɛ-ŋɔɔmɔ fe Nyɔŋmɔ, ookɛɛ amɛyɛ suɔmɔ fio ko kɛhã Nyɔŋmɔ. Moŋ lɛ, ekɛɛ amɛbaasumɔ shwɛmɔ-kɛ-ŋɔɔmɔ ‘moŋ fe Nyɔŋmɔ.’ Nilelɔ ko ŋma akɛ: “Ekã shi faŋŋ akɛ [ŋmalɛ] nɛɛ etsɔɔɔ kwraa akɛ mɛi ni sumɔɔ shwɛmɔ-kɛ-ŋɔɔmɔ lɛ yɛ suɔmɔ fioo ko kɛhã Nyɔŋmɔ. Etsɔɔ akɛ amɛsumɔɔɔ Nyɔŋmɔ kwraa.” Ŋwanejee ko bɛ he akɛ, enɛ ji kɔkɔbɔɔ ni yɔɔ hiɛdɔɔ kɛhã mɛi ni sumɔɔ shwɛmɔ-kɛ-ŋɔɔmɔ lɛ! Biblia lɛ wieɔ akɛ “shihilɛ nɛɛ mli ŋɔɔmɔyelii lɛ gbalaa” “mɛi ni sumɔɔ shwɛmɔ-kɛ-ŋɔɔmɔ” lɛ, ni sane nɛɛ ji anɔkwale diɛŋtsɛ.​—Luka 8:14.

16, 17. Mɛɛ nɔkwɛmɔnɔ Yesu fee yɛ shwɛmɔ-kɛ-ŋɔɔmɔ he?

16 Yesu hã wɔna bɔ ni wɔbaanyɛ wɔkɛ wɔhe awo shwɛmɔ-kɛ-ŋɔɔmɔ mli yɛ gbɛ kpakpa nɔ. Etee “yookpeemɔ he okpɔlɔŋmɛɛ” kɛ “okpɔlɔ wulu ko” ni aŋmɛ lɛ lɛ shishi. (Yoh. 2:1-10; Luka 5:29) Be ni wain ni ajaa yɛ yookpeemɔ he okpɔlɔŋmɛɛ lɛ shishi lɛ miihe atã lɛ, efee naakpɛɛ nii ko; ehã nu tsɔ wain koni aná wain ahã mɛi ni yɔɔ jɛmɛ lɛ. Be ko hu lɛ, mɛi komɛi ni buɔ amɛhe jalɔi tuutu lɛ wie amɛshi Yesu yɛ niyeli kɛ daanumɔ he, shi ehã efee faŋŋ akɛ susumɔ ni amɛhiɛ lɛ ejaaa.​—Luka 7:33-36.

17 Shi Yesu hãaa shwɛmɔ-kɛ-ŋɔɔmɔ afee nɔ ni he hiaa lɛ fe fɛɛ yɛ eshihilɛ mli. Ehã Yehowa fee mɔ ni he hiaa lɛ fe fɛɛ, ni ekɛ ehe fɛɛ shã afɔle ehã mɛi krokomɛi. Ejɛ esuɔmɔ mli ehã apiŋ lɛ yɛ tso nɔ kɛyashi egbo, bɔ ni afee ni mɛi pii aná wala. Yesu kɛɛ mɛi ni miitao ni amɛnyiɛ esɛɛ lɛ akɛ: “Kɛ́ mɛi jɛ nyɛ ni amɛwa nyɛ yi ni amɛmale amɛwie nyɛhe efɔŋ fɛɛ efɔŋ yɛ mihewɔ lɛ, nyɛyɛ miishɛɛ. Nyɛnyaa ni nyɛmli afilia nyɛ, akɛni nyɛjweremɔnɔ lɛ fa babaoo yɛ ŋwɛi lɛ hewɔ, ejaakɛ nakai nɔŋŋ amɛwa gbalɔi ni tsɔ nyɛhiɛ lɛ ayi.”​—Mat. 5:11, 12.

Mɛni wɔbaanyɛ wɔfee koni wɔkatsɔmɔ mɛi ni sumɔɔ shwɛmɔ-kɛ-ŋɔɔmɔ? (Kwɛmɔ kuku 18)

18. Mɛni baahã wɔna kɛji wɔsumɔɔ shwɛmɔ-kɛ-ŋɔɔmɔ fe Nyɔŋmɔ?

18 Mɛni baahã wɔna kɛji wɔsumɔɔ shwɛmɔ-kɛ-ŋɔɔmɔ fe Nyɔŋmɔ? Wɔbaanyɛ wɔbi wɔhe akɛ: ‘Ani mihãa hiɛtserɛjiemɔ he hiaa mi fe asafoŋ kpeei kɛ shiɛmɔ? Ani miisumɔ ni mikɛ nibii komɛi ashã afɔle akɛni miisumɔ ni masɔmɔ Nyɔŋmɔ lɛ hewɔ? Kɛ́ miikpɛ miyiŋ yɛ nibii ni mikɛbaajie mihiɛtserɛ lɛ ahe lɛ, ani misusuɔ bɔ ni Yehowa baana yiŋ ni makpɛ lɛ ahã lɛ he?’ Kɛ́ wɔsumɔɔ Nyɔŋmɔ lɛɛlɛŋ lɛ, jeee nibii ni wɔle akɛ esaaa ehiɛ lɛ pɛ kɛkɛ wɔbaakwɛ jogbaŋŋ koni wɔkɛ wɔhe akawo mli, moŋ lɛ, wɔbaakwɛ jogbaŋŋ koni wɔkɛ wɔhe akawo nibii ni efeɔ wɔ akɛ esaaa ehiɛ lɛ hu amli.​—Kanemɔ Mateo 22:37, 38.

BƆ NI OBAAFEE ONÁ MIISHƐƐ

19. Namɛi náŋ miishɛɛ kɔkɔɔkɔ?

19 Satan je lɛ ehã adesai ena amanehulu aaafee afii 6,000 sɔŋŋ nɛ. Amrɔ nɛɛ Satan je lɛ miiba enaagbee, ni shikpɔŋ lɛ nɔ eyi kɛ gbɔmɛi ni sumɔɔ amɛ diɛŋtsɛ amɛhe fe nine, kɛ mɛi ni sumɔɔ shika kɛ shwɛmɔ-kɛ-ŋɔɔmɔ. Amɛfoɔ amɛ pɛ amɛnɔ mli, ni amɛhãa nibii ni amɛshweɔ lɛ he hiaa amɛ fe nibii krokomɛi fɛɛ. Mɛi ni jieɔ sui ni tamɔ nɛkɛ akpo lɛ náŋ miishɛɛ kɔkɔɔkɔ. Moŋ lɛ, tamɔ bɔ ni Lalai Awolo lɛ tsɔɔ lɛ: “Mɔ ni Yakob Nyɔŋmɔ lɛ ji eyelikɛbualɔ lɛ yɛ miishɛɛ, mɔ ni hiɛ kã Yehowa, e-Nyɔŋmɔ lɛ nɔ lɛ.”​—Lala 146:5.

20. Te suɔmɔ ni oyɔɔ kɛhã Nyɔŋmɔ lɛ hãa onuɔ he ohãa tɛŋŋ?

20 Yehowa tsuji sumɔɔ lɛ waa. Daa afi lɛ, mɛi babaoo baleɔ lɛ ni amɛ hu amɛsumɔɔ lɛ. Enɛ tsɔɔ akɛ Nyɔŋmɔ Maŋtsɛyeli lɛ miiye nɔ, ni etsɛŋ ekɛ jɔɔmɔi ni baahã wɔnaa akpɛ wɔhe waa baaba. Kɛ́ wɔfee nɔ ni Yehowa miisumɔ ni wɔfee lɛ, ebaaná wɔhe miishɛɛ, ni no baahã wɔná miishɛɛ ni wɔtsui anyɔ wɔmli. Agbɛnɛ hu, mɛi ni sumɔɔ Yehowa lɛ amii baashɛ amɛhe kɛya naanɔ! Yɛ nikasemɔ ni nyiɛ sɛɛ lɛ mli lɛ, wɔbaasusu sui ni mɛi ni sumɔɔ amɛ diɛŋtsɛ amɛhe fe nine lɛ jieɔ lɛ kpo lɛ ahe, ni wɔbaana bɔ ni esoro sui nɛɛ kwraa yɛ sui ni Yehowa tsuji jieɔ lɛ kpo lɛ ahe.