Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) JANUARY 2017

Nɔ Hewɔ Ni Esa Akɛ Wɔba Wɔhe Shi

Nɔ Hewɔ Ni Esa Akɛ Wɔba Wɔhe Shi

“Heshibalɔi moŋ yɔɔ nilee.”ABƐI 11:2.

LALAI: 38, 69

1, 2. Mɛni hewɔ Nyɔŋmɔ kwa Saul? (Kwɛmɔ mfoniri ni yɔɔ nikasemɔ lɛ shishijee lɛ.)

BE NI awó Saul Israel nɔ maŋtsɛ lɛ, no mli lɛ, ebaa ehe shi ni abuɔ lɛ. (1 Sam. 9:1, 2, 21; 10:20-24) Shi eyeee be ko kwraa ni ebɔi ehe nɔ womɔ. Akɛ nɔkwɛmɔnɔ lɛ, be ko lɛ, Filistibii akpei abɔ ba ni amɛkɛ Israel abawu. Gbalɔ Samuel kɛɛ Saul akɛ emɛ lɛ yɛ Gilgal koni ebashã afɔle ehã Yehowa yɛ jɛmɛ. Shi Samuel ebashɛɛɛ yɛ be naa. Be ni Saul kwɛ bɔ ni Israelbii lɛ atsui efã ni amɛgbɛɔ amɛshwaa lɛ, ekolɛ ekɛɛ ehe akɛ, ‘Esa akɛ mafee nɔ ko yɛ shihilɛ lɛ he, ni esa akɛ mafee nakai amrɔ nɔŋŋ.’ No hewɔ lɛ, lɛ diɛŋtsɛ eyashã afɔle lɛ, tsɛ ebɛ hegbɛ ni efeɔ nakai. Nɔ ni efee nɛɛ eŋɔɔɔ Yehowa naa.1 Sam. 13:5-9.

2 Be ni Samuel bashɛ Gilgal, ni ena nɔ ni Saul efee lɛ, ekã ehiɛ. Shi yɛ nɔ najiaŋ ni Saul baakpɛlɛ tsɔsemɔ lɛ nɔ lɛ, ekɛ saji jiejie enaa, ni eshwa mɛi krokomɛi. (1 Sam. 13:10-14) Sɛɛ mli lɛ, Saul fee nibii krokomɛi ni tsɔɔ akɛ ewóɔ ehe nɔ. No hewɔ lɛ, Yehowa kwa lɛ, ni maŋtsɛyeli lɛ je edɛŋ. (1 Sam. 15:22, 23) Eyɛ mli akɛ Saul je shishi jogbaŋŋ moŋ, shi eyagbeee naa jogbaŋŋ.1 Sam. 31:1-6.

3. (a) Mɛɛ jwɛŋmɔ mɛi pii hiɛ yɛ heshibaa he? (b) Mɛɛ sanebimɔi ahetoo abaahã yɛ nikasemɔ nɛɛ kɛ nɔ ni nyiɛ sɛɛ lɛ mli?

 3 Ŋmɛnɛ lɛ, mɛi babaoo nuɔ he akɛ amɛhi fe mɛi krokomɛi loo amɛbɔɔ mɔdɛŋ fe amɛ. Enɛ hewɔ lɛ, amɛnaaa nɔ hewɔ ni esa akɛ amɛba amɛhe shi. Akɛ nɔkwɛmɔnɔ lɛ, nuu ko ni ale lɛ waa akɛ efeɔ sini, ni sɛɛ mli lɛ ebatsɔ amralo lɛ wie akɛ: “Mi lɛ, mibaaa mihe shi, ni mibaŋ mihe shi kɔkɔɔkɔ.” Kɛ̃lɛ, mɛni hewɔ esa akɛ wɔba wɔhe shi? Kɛ́ wɔbaa wɔhe shi lɛ, mɛni wɔbaafee, ni mɛni wɔfeŋ? Kɛfata he lɛ, mɛni baaye abua wɔ ni wɔya nɔ wɔba wɔhe shi kɛ́ nakai feemɔ wa po? Wɔbaahã klɛŋklɛŋ sanebimɔi enyɔ lɛ ahetoo yɛ nikasemɔ nɛɛ mli, ni wɔbaahã sanebimɔ ni ji etɛ lɛ hetoo yɛ nikasemɔ ni nyiɛ sɛɛ lɛ mli.

MƐNI HEWƆ EHE MIIHIA NI WƆBA WƆHE SHI LƐ?

4. Mɛni mɛi ni wóɔ amɛhe nɔ lɛ feɔ?

4 Biblia lɛ hãa wɔnaa akɛ, mɛi ni baa amɛhe shi lɛ wóoo amɛhe nɔ. (Kanemɔ Abɛi 11:2.) Henɔwomɔ hãa mɛi jeɔ gbɛ amɛfeɔ nibii ni amɛle akɛ Nyɔŋmɔ nyaaa he. David kpa Yehowa fai ni eye ebua lɛ koni ekafee nakai. (Lala 19:14) Mɛi ni wóɔ amɛhe nɔ lɛ haa shi ni amɛfeɔ nibii ni atsuko amɛ loo ahãko amɛ hegbɛ akɛ amɛfee. Wɔ fɛɛ wɔfeɔ nakai yɛ bei kɛ beiaŋ, ejaakɛ wɔyeee emuu. Shi tamɔ bɔ ni wɔnaa yɛ Maŋtsɛ Saul sane lɛ mli lɛ, kɛ́ wɔkɛfee wɔsu akɛ wɔbaafee nibii ni ahãko wɔ hegbɛ akɛ wɔfee lɛ, Yehowa náŋ wɔhe miishɛɛ. Lala 119:21 lɛ hãa wɔleɔ akɛ, Yehowa ‘kãa mɛi ni wóɔ amɛhe nɔ lɛ.’ Mɛni hewɔ Yehowa feɔ nakai?

5. Mɛni hewɔ eji hiɛdɔɔ sane akɛ wɔbaafee nibii ni ahãko wɔ hegbɛ akɛ wɔfee lɛ?

5 Kɛ́ wɔfeɔ nibii ni ahãko wɔ hegbɛ akɛ wɔfee lɛ, no tsɔɔ akɛ wɔnaaa Yehowa akɛ wɔ-Nyɔŋmɔ kɛ mɔ ni yɔɔ hegbɛ akɛ eyeɔ wɔnɔ. Agbɛnɛ hu, ebaanyɛ ehã béi aba wɔ kɛ mɛi krokomɛi ateŋ. (Abɛi 13:10) Kɛfata he lɛ, sɛɛ mli kɛ́ mɔ fɛɛ mɔ na faŋŋ akɛ wɔfee nɔ ko ni wɔbɛ hegbɛ akɛ wɔfeɔ lɛ, wɔhiɛ baashwie shi, ni wɔhiɛ baagboi kpɔtɔɔ. (Luka 14:8, 9) Eyɛ faŋŋ akɛ, sɛɛnamɔ ko bɛ he akɛ wɔbaafee nibii ni wɔbɛ hegbɛ akɛ wɔfeɔ. No hewɔ ni Yehowa miisumɔ ni wɔba wɔhe shi lɛ.

KƐ́ WƆBAA WƆHE SHI LƐ, MƐNI WƆBAAFEE?

6, 7. Mɛni hãa anaa akɛ mɔ ko baa ehe shi?

6 Biblia lɛ hãa wɔleɔ akɛ, mɛi ni baa amɛhe shi lɛ wóoo amɛhe nɔ, ni amɛnaaa amɛhe tsɔ. Moŋ lɛ, ‘amɛbuɔ mɛi krokomɛi akɛ amɛnɔ kwɔlɔ fe amɛ.’ (Fil. 2:3) Amɛnyɛɔ amɛyɔseɔ nibii ni amɛbɔɔ mɔdɛŋ yɛ mli kɛ nibii ni amɛbɔɔɔ mɔdɛŋ yɛ mli. No hewɔ lɛ, amɛkpɛlɛɔ amɛtɔmɔi anɔ, ni amɛboɔ ŋaawoo toi. Yehowa sumɔɔ heshibalɔi waa.

7 Kɛfata he lɛ, Biblia lɛ hãa wɔleɔ akɛ, mɛi ni baa amɛhe shi lɛ kpɛlɛɔ nɔ akɛ, jeee nɔ fɛɛ nɔ amɛbaanyɛ amɛfee, loo amɛyɔɔ hegbɛ akɛ amɛfeɔ. No hewɔ lɛ, amɛbuɔ mɛi krokomɛi ni amɛkɛ amɛ yeɔ yɛ mlihilɛ naa.

8. Mɛɛ sanebimɔi baanyɛ ahã wɔna kɛji wɔbɔi wɔhe nɔ womɔ?

8 Bei komɛi lɛ, wɔbaanyɛ wɔbɔi wɔhe nɔ womɔ ni wɔyɔseee po. Yɛ mɛɛ gbɛ nɔ? Susumɔ sanebimɔi ni nyiɛ sɛɛ nɛɛ ahe okwɛ. Ani onuɔ he akɛ sɔɔmɔ hegbɛ ko ni oyɔɔ lɛ hewɔ lɛ, ohe miihia fe mɛi krokomɛi? (Rom. 12:16) Ani ofeɔ nibii ni baahã mɛi agbala amɛjwɛŋmɔ kɛba onɔ fe nine? (1 Tim. 2:9, 10) Ani bei komɛi lɛ onuɔ he akɛ, akɛni bo loo mɛi komɛi  ni ole lɛ tsuɔ sɔ̃i ni tsitsii ahe nii yɛ asafo lɛ mli hewɔ lɛ, bo esa akɛ otsɔɔ mɛi krokomɛi nɔ ni amɛfee loo amɛkafee? (1 Kor. 4:6) Kɛ́ ohã sanebimɔi nɛɛ fɛɛ loo ekome po hetoo akɛ hɛɛ lɛ, belɛ eeenyɛ efee akɛ obɔi ohe nɔ womɔ.

9. Mɛɛ sui gbohii hãa mɛi komɛi wóɔ amɛhe nɔ? Okɛ Biblia mli nɔkwɛmɔnɔ ko ahã.

9 Ekɔɔɔ he eko afii abɔ ni wɔkɛsɔmɔ Yehowa lɛ, kɛ́ wɔŋmɛ gbɛ ni akɔnɔi fɔji he shi yɛ wɔtsui mli lɛ, wɔbaawó wɔhe nɔ. Akɛ nɔkwɛmɔnɔ lɛ, kɛ́ wɔye mɛi ahe awuŋa, wɔyeee wɔmlifu nɔ, loo wɔtao hiɛnyam lɛ, ebaanyɛ ehã wɔwó wɔhe nɔ. Biblia lɛ hãa wɔleɔ mɛi komɛi ni jie sui gbohii nɛɛ akpo. Amɛteŋ mɛi komɛi ji, Absalom, Uzia, kɛ Nebukadnezar. Yehowa ba mɛi nɛɛ fɛɛ ashi yɛ amɛhenɔwomɔ lɛ hewɔ.2 Sam. 15:1-6; 18:9-17; 2 Kron. 26:16-21; Dan. 5:18-21.

10. Mɛni hewɔ esaaa akɛ wɔkojoɔ mɛi yɛ amɛnifeemɔi ahe? Okɛ Biblia mli nɔkwɛmɔnɔ ko ahã.

10 Nibii krokomɛi hu baanyɛ ahã wɔfee nii kɛteke hegbɛi ni wɔyɔɔ lɛ. Akɛ nɔkwɛmɔnɔ lɛ, Abimelek kɛ Petro fɛɛ fee nii kɛteke hegbɛi ni amɛyɔɔ lɛ. (1 Mose 20:2-7; Mat. 26:31-35) Shi ani wɔbaanyɛ wɔmu sane naa akɛ henɔwolɔi ji amɛ? Ani eeenyɛ efee akɛ anɔkwale lɛ fɛɛ ni amɛleee, loo amɛhiɛ ni bɛ amɛhe nɔ lɛ hewɔ amɛfee nii kɛteke hegbɛi ni amɛyɔɔ lɛ? Wɔnyɛŋ wɔna nɔ ni yɔɔ mɛi atsui mli, no hewɔ lɛ, nilee bɛ mli akɛ wɔbaakojo mɛi yɛ amɛnifeemɔi ahe.Kanemɔ Yakobo 4:12.

OHIƐ ASƆ NƆ NI OTSUƆ YƐ YEHOWA ASAFO LƐ MLI LƐ

11. Kɛ́ wɔbaa wɔhe shi lɛ, te wɔbaana nitsumɔ ni wɔtsuɔ yɛ asafo lɛ mli lɛ wɔhã tɛŋŋ?

11 Kɛ́ wɔbaa wɔhe shi lɛ, wɔhiɛ baasɔ nɔ fɛɛ nɔ ni wɔtsuɔ yɛ Nyɔŋmɔ asafo lɛ mli lɛ. Akɛni Yehowa toɔ enɔ fɛɛ nɔ he gbɛjianɔ jogbaŋŋ hewɔ lɛ, ehã wɔteŋ mɔ fɛɛ mɔ nitsumɔ ko yɛ esafo lɛ mli. Esoro nitsumɔi lɛ ateŋ eko fɛɛ eko, shi fɛɛ he miihia. Yehowa ejɛ mlihilɛ mli ehã wɔteŋ mɔ fɛɛ mɔ hesai, nyɛmɔi, kɛ duromɔ keenii srɔtoi, ni eekpa gbɛ akɛ wɔkɛ fɛɛ baatsu nii yɛ gbɛ ni esumɔɔ lɛ nɔ. (Rom. 12:4-8) Wɔbaanyɛ wɔkɛ nikeenii srɔtoi nɛɛ atsu nii kɛwo ehiɛ nyam, ni wɔkɛye wɔbua mɛi krokomɛi hu.Kanemɔ 1 Petro 4:10.

Mɛɛ gbɛ nɔ wɔbaanyɛ wɔkase Yesu kɛ́ wɔnitsumɔ lɛ tsake? (Kwɛmɔ kuku 12-14)

12, 13. Mɛni hewɔ esaaa akɛ efeɔ wɔ naakpɛɛ akɛ nitsumɔ ni wɔtsuɔ yɛ Nyɔŋmɔ asafo lɛ mli lɛ baanyɛ atsake lɛ?

12 Be ni be shwieɔ mli lɛ, nitsumɔ ni wɔtsuɔ yɛ Yehowa asafo lɛ mli lɛ baanyɛ atsake. Susumɔ Yesu he okwɛ. Shishijee mli lɛ, ekɛ Yehowa pɛ yɔɔ. (Abɛi 8:22) Sɛɛ mli lɛ, eye ebua Yehowa kɛbɔ ŋwɛibɔfoi, shikpɔŋ lɛ, adebɔɔ nibii fɛɛ ni yɔɔ ŋwɛiniiaŋ lɛ, kɛ adesai. (Kol. 1:16) Be ni be shwie mli lɛ, Yehowa tsu lɛ kɛba shikpɔŋ lɛ nɔ akɛ adesa. Ebatsɔ abifao, ni eda ebatsɔ onukpa. (Fil. 2:7) Be ni egbo ni atee lɛ shi lɛ, eku esɛɛ kɛtee ŋwɛi akɛ mumɔŋ gbɔmɔ, ni yɛ afi 1914 lɛ, Nyɔŋmɔ wó lɛ e-Maŋtsɛyeli lɛ nɔ Maŋtsɛ. (Heb. 2:9) Shi no etsɔɔɔ akɛ enitsumɔ tsakeŋ dɔŋŋ. Yɛ Afii Akpe lɛ sɛɛ lɛ, ebaaŋɔ e-Maŋtsɛyeli lɛ ehã Yehowa, koni “Nyɔŋmɔ atsɔ nibii fɛɛ ahã mɔ fɛɛ mɔ.”1 Kor. 15:28.

13 Wɔ hu nitsumɔ ni wɔtsuɔ lɛ baanyɛ atsake. Bei komɛi lɛ, yiŋ ni wɔkpɛɔ yɛ shihilɛ mli lɛ ji nɔ ni hãa ebaa lɛ nakai. Akɛ nɔkwɛmɔnɔ lɛ, mɔ ko ni ji ehi shi akɛ oshijafo lɛ baanyɛ akpɛ eyiŋ akɛ, ebaabote gbalashihilɛ mli ni efɔ. Ekolɛ no sɛɛ lɛ, ebaanyɛ ekpɛ eyiŋ akɛ ebaafee tsakemɔi yɛ eshihilɛ mli koni enyɛ etsu be fɛɛ sɔɔmɔ nitsumɔ lɛ. Yiŋkpɛi  nɛɛ eko fɛɛ eko kɛ sɔ̃i kɛ nitsumɔi ni ekɛnyiɛ. Shihilɛ mli ni wɔyɔɔ lɛ hu baanyɛ asa nitsumɔ ni wɔtsuɔ lɛ he. Kɛ̃lɛ, kɛ́ oblahii kɛ oblayei ji wɔ jio, wɔdara yɛ afii amli jio, wɔyɛ gbɔmɔtsoŋ hewalɛ jio, wɔbɛ gbɔmɔtsoŋ hewalɛ jio lɛ, Yehowa le nɔ ni wɔteŋ mɔ fɛɛ mɔ baanyɛ atsu yɛ esɔɔmɔ lɛ mli. Ekpaaa babaoo gbɛ kɛjɛɛɛ wɔdɛŋ, moŋ lɛ, ehiɛ sɔɔ nɔ fɛɛ nɔ ni wɔtsuɔ yɛ esɔɔmɔ lɛ mli.Heb. 6:10.

14. Mɛɛ gbɛ nɔ heshibaa baaye abua wɔ ni wɔmii ashɛ wɔhe ekɔɔɔ he eko nitsumɔ ni akɛbaawo wɔdɛŋ?

14 Yesu kɛ miishɛɛ tsu nitsumɔ fɛɛ nitsumɔ ni akɛhã lɛ lɛ, ni wɔ hu wɔbaanyɛ wɔfee nakai nɔŋŋ. (Abɛi 8:30, 31) Kɛ́ wɔbaa wɔhe shi lɛ, wɔhiɛ baasɔ nitsumɔ fɛɛ nitsumɔ ni akɛbaahã wɔ yɛ asafo lɛ mli lɛ. Wɔyeŋ wɔtsui yɛ sɔɔmɔ hegbɛi ni wɔnine shɛko nɔ lɛ ahe, ni wɔyeŋ mɛi krokomɛi ni nine eshɛ nɔ lɛ hu ahe awuŋa. Moŋ lɛ, wɔkɛ wɔjwɛŋmɔ baama nitsumɔ ni akɛhã wɔ lɛ nɔ, ni wɔkɛ miishɛɛ baatsu, ejaakɛ wɔle akɛ Yehowa ji mɔ ni kɛ nitsumɔ lɛ hã wɔ. Yɛ nakai beiaŋ nɔŋŋ lɛ, wɔhiɛ baasɔ nitsumɔ ni Yehowa kɛwo mɛi krokomɛi adɛŋ lɛ, ni wɔbaajɛ wɔtsuiŋ fɛɛ wɔfi amɛsɛɛ.Rom. 12:10.

KƐ́ WƆBAA WƆHE SHI LƐ, MƐNI WƆFEŊ?

15. Mɛni wɔkaseɔ yɛ Gideon sane lɛ mli?

15 Mɔ ko ni ba ehe shi waa ni wɔbaanyɛ wɔkase lɛ ji Gideon. Be ni Yehowa kɛ nitsumɔ wo edɛŋ akɛ ehere Israelbii lɛ kɛjɛ Midianbii lɛ adɛŋ lɛ, ewie akɛ:  “Miweku lɛ ejwa yɛ Manase, ni mi ji gbekɛ kwraa yɛ mitsɛ we lɛ.” (Koj. 6:15) Fɛɛ sɛɛ lɛ, ekɛ ehiɛ fɔ̃ Yehowa nɔ ni ekpɛlɛ nitsumɔ lɛ nɔ. No sɛɛ lɛ, ebɔ mɔdɛŋ akɛ ebaanu nɔ ni Yehowa kpaa gbɛ akɛ efee lɛ shishi, ni esɔle ebi Yehowa ni eye ebua lɛ. (Koj. 6:36-40) Gideon he wa ni eyɛ ekãa. Kɛ̃lɛ, ehiɛ kã shi, ni ele ŋaa hu. (Koj. 6:11, 27) Sɛɛ mli be ni maŋbii lɛ miitao amɛwó lɛ maŋtsɛ lɛ, ekpoo. Be ni etsu nitsumɔ ni Yehowa kɛwo edɛŋ lɛ egbe naa lɛ, eku esɛɛ kɛtee shĩa.Koj. 8:22, 23, 29.

16, 17. Mɛɛ gbɛ nɔ heshibaa baanyɛ aye abua wɔ ni wɔya wɔhiɛ yɛ mumɔŋ?

16 Kɛ́ mɔ ko kpɛlɛ sɔɔmɔ hegbɛ ko nɔ, loo eshwe akɛ enine ashɛ sɔɔmɔ hegbɛ ko nɔ lɛ, no etsɔɔɔ akɛ ewóɔ ehe nɔ. Biblia lɛ woɔ wɔ fɛɛ hewalɛ ni wɔya wɔhiɛ yɛ mumɔŋ. (1 Tim. 4:13-15) Shi ani ja wɔnine eshɛ sɔɔmɔ hegbɛi anɔ dani wɔbaanyɛ wɔya wɔhiɛ yɛ mumɔŋ? Dabi. Ekɔɔɔ he eko nɔ ni wɔtsuɔ yɛ asafo lɛ mli lɛ, Yehowa baanyɛ aye abua wɔ ni wɔya wɔhiɛ yɛ mumɔŋ, ni wɔkɛ nyɛmɔi ni ekɛduro wɔ lɛ atsu nii jogbaŋŋ kɛsɔmɔ lɛ, ni wɔkɛye wɔbua mɛi krokomɛi.

17 Kɛ́ wɔbaa wɔhe shi lɛ, dani wɔbaakpɛlɛ nitsumɔ ko nɔ lɛ, wɔbaakwɛ nɔ ni nitsumɔ lɛ biɔ ni wɔfee. No sɛɛ lɛ, wɔkɛ sɔlemɔ kɛ anɔkwayeli baapɛi wɔshihilɛ mli wɔkwɛ kɛji wɔbaanyɛ wɔtsu. Akɛ nɔkwɛmɔnɔ lɛ, ani wɔbaanyɛ wɔtsu nakai nitsumɔ lɛ, ni yɛ nakai beiaŋ nɔŋŋ lɛ, wɔtsu nibii krokomɛi ni he hiaa lɛ ahe nii? Kɛjeee nakai lɛ, ani wɔbaanyɛ wɔhã mɛi krokomɛi atsu nitsumɔ ni wɔtsuɔ amrɔ nɛɛ koni wɔnyɛ wɔná be kɛ hewalɛ kɛtsu nitsumɔ hee lɛ? Kɛ́ wɔnyɛɛɛ wɔfee nakai lɛ, belɛ ekolɛ ebaahi akɛ wɔbaashi nitsumɔ lɛ wɔhã mɛi ni baanyɛ atsu. Kɛ́ wɔbaa wɔhe shi lɛ, dani wɔbaakpɛlɛ nitsumɔ ko nɔ lɛ, wɔbaakwɛ kɛji wɔyɛ hewalɛ kɛ hesai ni wɔkɛbaatsu.

18. (a) Kɛ́ ahã wɔ nitsumɔ hee ko lɛ, mɛni heshibaa baatsirɛ wɔ ni wɔfee? (b) Mɛɛ gbɛ nɔ Romabii 12:3 lɛ baanyɛ aye abua wɔ ni wɔba wɔhe shi?

18 Yehowa miisumɔ ni wɔkɛ lɛ anyiɛ “yɛ heshibaa mli.” (Mika 6:8) No hewɔ lɛ, kɛ́ akɛ nitsumɔ hee ko wo wɔdɛŋ yɛ asafo lɛ mli lɛ, esa akɛ wɔsɔle wɔbi Yehowa ni etsɔɔ wɔ gbɛ ni eye ebua wɔ, tamɔ bɔ ni Gideon fee lɛ, ni wɔsusu nibii ni ekɛɔ wɔ kɛtsɔ e-Wiemɔ lɛ kɛ egbɛjianɔtoo lɛ nɔ lɛ ahe jogbaŋŋ. Be fɛɛ be lɛ, esa akɛ wɔhã ehi wɔjwɛŋmɔŋ akɛ, Yehowa heshibaa lɛ ni hãa mɔ tsɔɔ mɔ wulu, shi jeee wɔ diɛŋtsɛ wɔnyɛmɔi. (Lala 18:35, NW) Kɛ́ wɔbaa wɔhe shi lɛ, wɔnuŋ he akɛ wɔnɔ kwɔlɔ fe mɛi krokomɛi, ni asaŋ wɔnuŋ he akɛ wɔbaa shi tsɔ fe amɛ.—Kanemɔ Romabii 12:3.

19. Mɛɛ yiŋtoi ahewɔ esa akɛ wɔba wɔhe shi?

19 Kɛ́ wɔbaa wɔhe shi lɛ, wɔbaakpɛlɛ nɔ akɛ Yehowa pɛ sa akɛ eŋɔ anunyam lɛ, ejaakɛ lɛ ebɔ wɔ, ni lɛ ji Jeŋ Muu Fɛɛ Nɔyelɔ. (Kpoj. 4:11) Heshibaa hãa wɔkɛ miishɛɛ tsuɔ nitsumɔ fɛɛ nitsumɔ ni akɛwoɔ wɔdɛŋ yɛ Yehowa asafo lɛ mli lɛ. Kɛfata he lɛ, ehãa wɔkɛ nɔ ni baahi ahã mɛi krokomɛi lɛ yeɔ nɔ ni hi hã wɔ lɛ hiɛ, ni wɔfeee nibii ni baagba wɔnyɛmimɛi lɛ anaa loo ehã amɛnu he akɛ wɔnɔ kwɔlɔ fe amɛ. Enɛ hãa ekomefeemɔ hiɔ asafo lɛ mli. Agbɛnɛ hu, heshibaa hãa wɔsusuɔ nii ahe kɛyaa shɔŋŋ, ni no hewɔ lɛ, wɔtɔ̃ɔɔ tɔmɔi ni yɔɔ hiɛdɔɔ. Ekã shi faŋŋ akɛ, heshibaa ji su ko ni he miihia Nyɔŋmɔ webii fɛɛ, ni Yehowa hiɛ sɔɔ mɛi fɛɛ ni jieɔ lɛ kpo lɛ. Shi mɛni baaye abua wɔ ni wɔya nɔ wɔba wɔhe shi kɛ́ nakai feemɔ wa po? Nikasemɔ ni nyiɛ sɛɛ lɛ baatsɔɔ wɔ.