Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) JANUARY 2017

Yaa Nɔ Oba Ohe Shi Kɛ́ Nakai Feemɔ Wa Po

Yaa Nɔ Oba Ohe Shi Kɛ́ Nakai Feemɔ Wa Po

“Okɛ o-Nyɔŋmɔ lɛ anyiɛ yɛ heshibaa mli!”MIKA 6:8.

LALAI: 48, 95

1-3. Mɛni gbalɔ ni jɛ Yuda lɛ efeee? Ni mɛni jɛ mli kɛba? (Kwɛmɔ mfoniri ni yɔɔ nikasemɔ lɛ shishijee lɛ.)

BE KO lɛ, Israel Maŋtsɛ Yerobeam fee afɔleshãa latɛ ko kɛhã amaga jamɔ yɛ Betel. No hewɔ lɛ, Yehowa tsu gbalɔ ko kɛtee eŋɔɔ koni eyawie eshi lɛ yɛ nɔ ni efee lɛ hewɔ. Gbalɔ ni baa ehe shi nɛɛ bo Yehowa toi ni eyajaje Nyɔŋmɔ sane lɛ. Maŋtsɛ lɛ mli fu lɛ, shi Yehowa bu ehe koni maŋtsɛ lɛ akaye lɛ awui.1 Maŋ. 13:1-10.

2 Yehowa wo gbalɔ oblanyo nɛɛ kita akɛ, ‘ekaye nii ni ekanu nu hu yɛ Israel, ni asaŋ ekatsɔ gbɛ ni etsɔ nɔ kɛtee lɛ nɔ’ kɛku esɛɛ. Be ni ekuɔ esɛɛ lɛ, nuumo ko ni kɛɛ Yehowa gbalɔ ji lɛ lɛ kɛ lɛ bakpe, ni elaka lɛ. Enɛ hewɔ lɛ, gbalɔ lɛ kɛ nuumo lɛ tee nuumo lɛ shĩa ni eyaye nii ni enu nu. Yehowa nyaaa nɔ ni gbalɔ oblanyo nɛɛ fee lɛ he. No hewɔ lɛ, be ni eyaa shĩa lɛ, jata ko kɛ lɛ bakpe yɛ gbɛ lɛ nɔ ni egbe lɛ.1 Maŋ. 13:11-24.

3 Biblia lɛ etsɔɔɔ wɔ nɔ hewɔ ni gbalɔ nɛɛ ni tsutsu ko lɛ ebaa ehe shi lɛ yabo nuumo lɛ moŋ toi fe Yehowa. Shi eeenyɛ efee akɛ, ehiɛ kpa nɔ akɛ esa akɛ ‘ekɛ Nyɔŋmɔ anyiɛ yɛ heshibaa mli.’ (Kanemɔ Mika 6:8.) Wiemɔ ni akɛtsu nii yɛ Biblia lɛ mli akɛ ‘wɔkɛ Nyɔŋmɔ anyiɛ’ lɛ tsɔɔ akɛ, esa akɛ wɔkɛ wɔhiɛ afɔ̃ enɔ, wɔfi e-Nɔyeli lɛ sɛɛ, ni wɔkɛ egbɛtsɔɔmɔi atsu nii. Kɛ́ wɔbaa wɔhe shi lɛ, wɔkɛ wɔ-Nyɔŋmɔ Ofe ni sumɔɔ wɔ lɛ baagba sane daa yɛ sɔlemɔ  mli. Nakai kulɛ esa akɛ gbalɔ lɛ afee. Kulɛ ebaanyɛ ebi Yehowa kɛji gbɛtsɔɔmɔi ni ekɛhã lɛ lɛ etsake. Shi Ŋmalɛi lɛ etsɔɔɔ akɛ efee nakai. Wɔ hu bei komɛi kɛ́ ehe bahia ni wɔkpɛ wɔyiŋ lɛ, ewaa kɛhãa wɔ akɛ wɔbaana nɔ ni Yehowa miisumɔ ni wɔfee. Shi kɛ́ wɔbaa wɔhe shi lɛ, wɔbaabi Yehowa ni etsɔɔ wɔ gbɛ koni wɔkakpɛ yiŋ gbonyo.

4. Mɛni he wɔbaasusu yɛ nikasemɔ nɛɛ mli?

4 Yɛ nikasemɔ ni tsɔ hiɛ lɛ mli lɛ, wɔna nɔ hewɔ ni ehe miihia ni wɔba wɔhe shi, kɛ nibii ni kɛ́ wɔfee lɛ, ebaatsɔɔ akɛ wɔbaa wɔhe shi. Kɛ̃lɛ, mɛɛ shihilɛi komɛi hãa anaa kɛji wɔbaa wɔhe shi aloo wɔwoɔ wɔhe nɔ? Ni kɛ́ wɔkɛ shihilɛi nɛɛ ateŋ eko kpe lɛ, mɛni baaye abua wɔ ni wɔya nɔ wɔba wɔhe shi? Yɛ nikasemɔ nɛɛ mli lɛ, wɔbaasusu shihilɛi nɛɛ ateŋ etɛ ahe, ni wɔkwɛ bɔ ni wɔbaafee wɔba wɔhe shi yɛ eko fɛɛ eko mli.Abɛi 11:2.

KƐ́ WƆSHIHILƐ TSAKE

5, 6. Mɛni Barzilai fee kɛtsɔɔ akɛ ebaa ehe shi?

5 Bɔ ni wɔfeɔ wɔnii wɔhãa kɛ́ wɔshihilɛ loo nitsumɔ ni akɛwo wɔdɛŋ lɛ tsake lɛ hãa anaa kɛji wɔbaa wɔhe shi aloo wɔwoɔ wɔhe nɔ. Susumɔ David naanyo ko ni atsɛɔ lɛ Barzilai lɛ he okwɛ. Be ko lɛ, David fɔ̃ lɛ nine ni ebahi emasɛi yɛ maŋtsɛ shĩa lɛ. Enɛ ji hegbɛ wulu diɛŋtsɛ. Shi no mli lɛ, Barzilai eye afii 80, no hewɔ lɛ, ekpɛlɛɛɛ David ninefɔ̃ɔ lɛ nɔ. Ekɛɛ David akɛ, akɛni egbɔ hewɔ lɛ, esumɔɔɔ ni eyatsɔɔ jatsu ehãa lɛ yɛ maŋtsɛ shĩa lɛ. No hewɔ lɛ, ekɛɛ lɛ ni ekɛ Kimham moŋ aya. Eeenyɛ efee akɛ, Kimham ji ebihii lɛ ateŋ mɔ kome.2 Sam. 19:32-38.

6 Yiŋ ni Barzilai kpɛ lɛ hi waa. Jeee nitsumɔ ni akɛbaawo edɛŋ yɛ maŋtsɛ shĩa lɛ naa foi ni eetao ejo, aloo lɛ diɛŋtsɛ eshĩa mli ni eetao ehi ni ejɔɔ ehe lɛ hewɔ ekpɛlɛɛɛ David ninefɔ̃ɔ lɛ nɔ lɛ. Moŋ lɛ, ehe shi ni ebaa lɛ hewɔ. Eyɔse akɛ, he ni eda eshɛ lɛ, jeee nɔ fɛɛ nɔ ebaanyɛ etsu. (Kanemɔ Galatiabii 6:4, 5.) Wɔbaanyɛ wɔkase enɔkwɛmɔnɔ kpakpa lɛ. Esaaa akɛ wɔhãa sɔɔmɔ hegbɛ ko ni wɔtaoɔ lɛ heɔ wɔjwɛŋmɔ fɛɛ, ni asaŋ esaaa akɛ wɔshweɔ akɛ wɔhe gbɛ́i. Kɛjeee nakai lɛ, wɔbaana wɔhe tsɔ, wɔkɛ wɔnyɛmimɛi lɛ baashi akaŋ, ni sɛɛ mli lɛ, wɔnine baanyɛ shi. (Gal. 5:26) Kɛ́ wɔbaa wɔhe shi lɛ, wɔkɛ wɔjwɛŋmɔ baama nɔ ni wɔ kɛ wɔnyɛmimɛi lɛ fɛɛ baanyɛ atsu kɛwo Nyɔŋmɔ hiɛ nyam lɛ nɔ, ni wɔbaakwɛ nɔ ni wɔbaanyɛ wɔfee kɛye wɔbua mɛi krokomɛi.1 Kor. 10:31.

7, 8. Mɛɛ gbɛ nɔ heshibaa baanyɛ aye abua wɔ ni wɔkɛ wɔhe akafɔ̃ wɔ diɛŋtsɛ wɔhe nɔ?

7 Kɛ́ atu sɔ̃i pii awo wɔdɛŋ lɛ, bei pii lɛ, ehãa wɔnáa hegbɛ yɛ mɛi anɔ, ni enɛ baanyɛ ahã ewa kɛhã wɔ akɛ wɔbaaba wɔhe shi. Be ni Nehemia nu akɛ mɛi ni yɔɔ Yerusalem lɛ kɛ naagbai miikpe lɛ, esɔle ekpa Yehowa fai ni eye ebua amɛ. (Neh. 1:4, 11) Yehowa bo esɔlemɔ lɛ toi. Maŋtsɛ Artashasta wo lɛ amralo yɛ nakai kpokpaa lɛ nɔ. Gbɛhe nɛɛ hã ehe gbɛ́i, ená nii, ni ená hegbɛi wuji. Kɛ̃lɛ, edamɔɔɔ lɛ diɛŋtsɛ eniiashikpamɔi kɛ hesai anɔ ekpɛɛɛ eyiŋ yɛ saji ahe. Moŋ lɛ, ekɛ Nyɔŋmɔ nyiɛ. Ebi Nyɔŋmɔ gbɛtsɔɔmɔ, ni ekane Nyɔŋmɔ Mla lɛ be fɛɛ be. (Neh. 8:1, 8, 9) Nehemia yeee mɛi krokomɛi anɔ nuŋtsɔmɛi asane, moŋ lɛ, esɔmɔ amɛ ni ekpaaa gbɛ akɛ ebaaná nɔ ko yɛ amɛhe.Neh. 5:14-19.

8 Wɔbaanyɛ wɔkase nɔ ko yɛ Nehemia sane lɛ mli. Kɛ́ atsake nitsumɔ ni wɔtsuɔ lɛ, aloo atu sɔ̃i babaoo awo wɔdɛŋ lɛ, esa akɛ wɔkwɛ jogbaŋŋ ni wɔkɛ wɔhe akafɔ̃ wɔniiashikpamɔi kɛ hesai anɔ. Akɛ nɔkwɛmɔnɔ lɛ, ani osɔleɔ dani okpɛɔ oyiŋ yɛ saji ahe? Aloo okpɛɔ oyiŋ yɛ saji ahe dani osɔleɔ ni Yehowa ajɔɔ yiŋkpɛɛ lɛ nɔ? Kɛ́ asafoŋ onukpa ji bo lɛ, ani osɔleɔ dani otsuɔ asafoŋ nitsumɔi srɔtoi lɛ ahe nii? Kɛ́ wɔbaa wɔhe shi lɛ, wɔkɛ wɔhe efɔŋ wɔ diɛŋtsɛ wɔhe nɔ.  Wɔbaahã ehi wɔjwɛŋmɔŋ akɛ, Nyɔŋmɔ he esa kwraa fe wɔ. No hewɔ lɛ, kɛ́ wɔtsu nitsumɔ ko aahu po lɛ, be fɛɛ be ni wɔbaatsu lɛ, esa akɛ wɔbi Nyɔŋmɔ ni eye ebua wɔ. (Kanemɔ Abɛi 3:5, 6.) Esaaa akɛ nitsumɔi srɔtoi ni akɛwo wɔdɛŋ lɛ hãa wɔnuɔ he akɛ wɔnɔ kwɔlɔ fe wɔweku lɛ loo wɔsafo lɛ mli bii lɛ. Moŋ lɛ, esa akɛ wɔkɛ wɔnyɛmimɛi lɛ afee ekome, ni wɔteŋ mɔ fɛɛ mɔ atsu nitsumɔi srɔtoi ni akɛwo edɛŋ lɛ he nii jogbaŋŋ.1 Tim. 3:15.

KƐ́ MƐI WIE AMƐSHI WƆ ALOO AMƐJIE WƆYI

9, 10. Mɛɛ gbɛ nɔ heshibaa baaye abua wɔ kɛ́ mɔ ko wie wɔhiɛ yɛ efɔŋ ko ni wɔfeko lɛ he?

9 Kɛ́ mɔ ko wie eshi wɔ, loo ewie wɔhiɛ yɛ efɔŋ ko ni wɔfeko lɛ he lɛ, eyɛ dɔlɛ waa. Hana kɛ shihilɛ ko ni tamɔ nakai kpe. No mli lɛ, efɔɔɔ, ni ebienyɛ Penina yeɔ ehe fɛo. Eyɛ mli akɛ no mli lɛ ewu lɛ sumɔɔ lɛ waa moŋ, shi sane nɛɛ ye etsui waa, ni efite emiishɛɛ fɛɛ. Sɛɛ mli be ni esɔleɔ yɛ kpeebuu lɛ, Osɔfonukpa Eli folɔ enaa akɛ etɔ dãa. Kwɛ bɔ ni enɛ baadɔ lɛ ahã! Kɛ̃lɛ, Hana ye emumɔ nɔ, ni ejɛ bulɛ mli ekɛɛ Eli akɛ etɔko dãa. Enɛ hãa wɔnaa akɛ ebaa ehe shi waa. Sɛɛ mli lɛ, esɔle kɛjie Yehowa yi. Aŋma sɔlemɔ nɛɛ afɔ̃ shi yɛ Biblia lɛ mli. Nibii ni ewie yɛ mli lɛ hãa wɔnaa akɛ eyɛ hemɔkɛyeli, ni ehiɛ sɔ nibii ni Yehowa fee ehã lɛ lɛ.1 Sam. 1:5-7, 12-16; 2:1-10.

10 Kɛ́ wɔbaa wɔhe shi lɛ, ‘wɔkɛ ekpakpa baaye efɔŋ nɔ kunim.’ (Rom. 12:21) Nibii fɔji eyi Satan je lɛ mli obɔ. No hewɔ lɛ, esa akɛ wɔmia wɔhiɛ waa ni wɔkawo wɔtsui la yɛ dɔlɛ nii ni mɛi ni yɔɔ je lɛ mli lɛ feɔ amɛshiɔ wɔ lɛ ahewɔ. (Lala 37:1) Bei komɛi lɛ, wɔnyɛmimɛi Kristofoi lɛ hu feɔ wɔ dɔlɛ nii, ni enɛ baanyɛ agba wɔnaa kwraa fe nɔ ni wɔkɛkpeɔ yɛ je lɛ mli lɛ po. Kɛ́ eba lɛ nakai lɛ, esa akɛ wɔba wɔhe shi ni wɔkase Yesu. Biblia lɛ wie yɛ ehe akɛ: “Be ni ajɛɔ lɛ lɛ, ejɛɛɛ mɔ ko etooo najiaŋ . . . , shi moŋ etu ehe ewo mɔ ni kojoɔ yɛ jalɛ naa lɛ dɛŋ.” (1 Pet. 2:23) Yesu le akɛ, oweletɔɔ lɛ, Yehowa nɔ ni. (Rom. 12:19) Wɔ hu esa akɛ wɔba wɔhe shi ni ‘wɔkɛ efɔŋ akato efɔŋ najiaŋ.’1 Pet. 3:8, 9.

11, 12. (a) Kɛ́ ajie wɔ yi loo awo wɔyiteŋ mulu lɛ, mɛni wɔbaanyɛ wɔfee kɛtsɔɔ akɛ wɔbaa wɔhe shi? (b) Mɛɛ gbɛ nɔ wɔbaanyɛ wɔtsɔ wɔhesaamɔ kɛ wɔnifeemɔi krokomɛi fɛɛ anɔ wɔhã ana akɛ wɔbaa wɔhe shi?

 11 Bɔ ni wɔfeɔ wɔnii wɔhãa kɛ́ mɛi jie wɔyi loo amɛwo wɔyiteŋ mulu lɛ baanyɛ ahã ana kɛji wɔbaa wɔhe shi aloo wɔwoɔ wɔhe nɔ. Susumɔ Ester he okwɛ. Ehe yɛ fɛo waa diɛŋtsɛ. Ahala lɛ afata yei krokomɛi ni he yɔɔ fɛo yɛ Persia Nɔyeli lɛ mli fɛɛ lɛ ahe, ni akɛ afi muu yakpa amɛ mui srɔtoi ni baahã amɛhe afee fɛo waa. Yei krokomɛi lɛ fee nɔ fɛɛ nɔ ni amɛbaanyɛ koni maŋtsɛ lɛ asumɔ amɛ. Shi Ester hu? Yɛ bɔ ni ajie eyi lɛ fɛɛ sɛɛ lɛ, esubaŋ tsakeee. Be ni maŋtsɛ lɛ hala lɛ akɛ eŋa po lɛ, etee nɔ eba ehe shi, ekɛ mɛi ye yɛ mlihilɛ mli, efó mɛi krokomɛi anɔ mli, ni ejie bulɛ kpo.Ester 2:9, 12, 15, 17.

Ani wɔhesaamɔ tsɔɔ akɛ wɔbuɔ Yehowa kɛ mɛi krokomɛi, aloo etsɔɔ akɛ wɔwoɔ wɔhe nɔ? (Kwɛmɔ kuku 12)

12 Kɛ́ wɔbaa wɔhe shi lɛ, wɔhesaamɔ kɛ wɔnifeemɔi krokomɛi fɛɛ baahã ana akɛ, wɔbuɔ wɔhe ni wɔbuɔ mɛi krokomɛi hu. Yɛ nɔ najiaŋ ni wɔbaafee fuu loo wɔbaafee nibii ni baahã mɛi agbala amɛjwɛŋmɔ kɛba wɔnɔ bɔ ni esaaa koni amɛsumɔ wɔsane lɛ, esa akɛ wɔjie “mumɔ ni yɔɔ kpoo ni he jɔ” moŋ kpo. (Kanemɔ 1 Petro 3:3, 4; Yer. 9:23, 24) Bɔ ni wɔfeɔ wɔnii wɔhãa kɛ nibii ni wɔwieɔ lɛ hãa anaa bɔ ni wɔnaa wɔhe wɔhãa. Akɛ nɔkwɛmɔnɔ lɛ, ekolɛ sɔɔmɔ hegbɛ ko ni wɔyɔɔ, sane ko ni wɔle, loo nyɛmimɛi komɛi ni yɔɔ sɔɔmɔ hegbɛi wuji ni wɔle amɛ lɛ hewɔ lɛ, wɔbaawie nibii ni tsɔɔ akɛ esoro wɔ kwraa. Aloo kɛ́ wɔkɛ mɛi tsu nɔ ko he nii ni eye omanye, ni wɔmiigbala mli wɔmiitsɔɔ mɔ ko lɛ, ekolɛ wɔbaawie lɛ tamɔ nɔ ni wɔ pɛ wɔtsu. Shi susumɔ Yesu he okwɛ. Etsɛ Hebri Ŋmalɛi lɛ asɛɛ yɛ ewiemɔi amli. Mɛni hewɔ efee nakai? Efee nakai ejaakɛ esumɔɔɔ ni etoibolɔi lɛ náa jwɛŋmɔ lɛ akɛ lɛ diɛŋtsɛ eyiŋ etoɔ ewieɔ lɛ. Moŋ lɛ, eesumɔ ni amɛna akɛ, nibii ni etsɔɔ amɛ lɛ fɛɛ jɛ Yehowa ŋɔɔ.Yoh. 8:28.

KƐ́ WƆMIIKPƐ WƆYIŊ

13, 14. Mɛɛ gbɛ nɔ heshibaa baanyɛ aye abua wɔ ni wɔkpɛ yiŋ ni ja yɛ saji ahe?

13 Shihilɛ kroko ni baanyɛ ahã ana kɛji wɔbaa wɔhe shi ji, kɛ́ wɔmiikpɛ wɔyiŋ yɛ sane ko he, loo kɛ́ yiŋ ni mɛi krokomɛi baakpɛ yɛ sane ko he lɛ baasa wɔhe. Wɔbaanyɛ wɔkase bɔfo Paulo yɛ enɛ gbɛfaŋ. Be ni eyɔɔ Kaisarea lɛ, gbalɔ Agabo kɛɛ lɛ akɛ, kɛ́ etee Yerusalem lɛ, abaamɔ lɛ, ni ekolɛ abaagbe lɛ. Akɛni nyɛmimɛi ni yɔɔ jɛmɛ lɛ sumɔɔɔ ni ebaa lɛ nakai hewɔ lɛ, amɛkpa lɛ fai ni ekaya Yerusalem. Shi Paulo hãaa amɛwiemɔ lɛ awo ehe gbeyei, ni yɛ nakai beiaŋ nɔŋŋ lɛ, ekɛ ehe efɔ̃ɔɔ lɛ diɛŋtsɛ ehe nɔ. Moŋ lɛ, ekɛ ehiɛ fɔ̃ Yehowa nɔ, ni etswa efai shi akɛ, ekɔɔɔ he eko nɔ ni Yehowa baaŋmɛ gbɛ akɛ eba enɔ lɛ, ebaatsu nitsumɔ ni akɛwo edɛŋ lɛ kɛyawula shi. No hewɔ lɛ, ekpɛ eyiŋ akɛ ebaaya. Akɛni nyɛmimɛi lɛ hu baa amɛhe shi hewɔ lɛ, be ni amɛna nakai lɛ, amɛfi eyiŋkpɛɛ lɛ sɛɛ ni amɛhã etee Yerusalem.Bɔf. 21:10-14.

14 Saji komɛi yɛ ni wɔleee bɔ ni amɛnaa baayakpa ahã, ni kɛ́ wɔle po lɛ, nɔ ko bɛ ni wɔbaanyɛ wɔfee yɛ he. Kɛ̃lɛ, heshibaa baanyɛ aye abua wɔ ni wɔkpɛ yiŋ ni ja yɛ saji nɛɛ ahe. Akɛ nɔkwɛmɔnɔ lɛ, ekolɛ wɔmiitao wɔkɛ wɔhe awo be fɛɛ sɔɔmɔ nitsumɔ lɛ mli. Shi ekolɛ wɔbaabi wɔhe akɛ, ‘Ni kɛ́ hela mɔ mi hu? Te mafee tɛŋŋ maye mabua mifɔlɔi ni egbɔlɔ lɛ? Namɔ baakwɛ mi kɛ́ migbɔ?’ Wɔnyɛŋ wɔle sanebimɔi nɛɛ ahetoo, ekɔɔɔ he eko bɔ ni wɔbaasɔle loo wɔbaafee niiamlitaomɔ yɛ he wɔhã. (Jaj. 8:16, 17) Kɛ̃lɛ, kɛ́ wɔkɛ wɔhiɛ fɔ̃ Yehowa nɔ lɛ, wɔbaakpɛlɛ nɔ akɛ nibii komɛi yɛ ni wɔnyɛŋ he nɔ ko wɔfee. Wɔbaafee niiamlitaomɔ, wɔbaabi mɛi ŋaawoo, ni wɔbaasɔle wɔbi Yehowa ni etsɔɔ wɔ gbɛ. Nibii nɛɛ baaye abua wɔ ni wɔkpɛ wɔyiŋ bɔ ni kɛ Nyɔŋmɔ mumɔ lɛ kpãa gbee.  (Kanemɔ Jajelɔ 11:4-6.) Kɛkɛ lɛ, Yehowa baanyɛ ajɔɔ wɔ ni ehã wɔyiŋkpɛɛ lɛ aye omanye, aloo ebaanyɛ eye ebua wɔ fiofio koni wɔtsake otii ni wɔkɛmamɔ wɔhiɛ lɛ.Abɛi 16:3, 9.

MƐNI BAAYE ABUA WƆ NI WƆYA NƆ WƆBA WƆHE SHI

15. Mɛɛ gbɛ nɔ kɛ́ wɔsusu Yehowa he lɛ, ebaaye ebua wɔ ni wɔya nɔ wɔba wɔhe shi?

15 Wɔna faŋŋ akɛ, heshibaa he yɛ sɛɛnamɔ waa. No hewɔ lɛ, mɛni baaye abua wɔ ni wɔya nɔ wɔba wɔhe shi? Hã wɔsusu nibii ejwɛ ni baaye abua wɔ lɛ ahe. Klɛŋklɛŋ lɛ, esa akɛ wɔsusu Yehowa he, ni wɔjwɛŋ sui kpakpai babaoo ni eyɔɔ lɛ anɔ waa. No baahã wɔna akɛ, enɔ kwɔ kwraa fe wɔ. (Yes. 8:13) Esa akɛ wɔhã ehi wɔjwɛŋmɔ mli akɛ, Nyɔŋmɔ Ofe lɛ diɛŋtsɛ wɔkɛnyiɛ lɛ, jeee gbɔmɔ ko loo ŋwɛibɔfo ko. Kɛ́ wɔsusu enɛ he lɛ, ebaatsirɛ wɔ ni ‘wɔba wɔhe shi yɛ enine ni wa lɛ shishi.’1 Pet. 5:6.

16. Mɛɛ gbɛ nɔ kɛ́ wɔjwɛŋ Nyɔŋmɔ suɔmɔ lɛ nɔ lɛ, ebaatsirɛ wɔ ni wɔba wɔhe shi?

16 Nɔ ni ji enyɔ ni baaye abua wɔ ni wɔya nɔ wɔba wɔhe shi ji, ni wɔbaajwɛŋ Yehowa suɔmɔ lɛ nɔ. Bɔfo Paulo wie akɛ, Yehowa kɛ “woo kpele” hãa wɔgbɔmɔtso lɛ henii ni hiɛ bɛ nyam tsɔ lɛ. (1 Kor. 12:23, 24) Yɛ gbɛ ni tamɔ nakai nɔŋŋ nɔ lɛ, eyɛ mli akɛ wɔteŋ mɔ fɛɛ mɔ yɛ gbɔjɔmɔi moŋ, shi Yehowa sumɔɔ wɔ fɛɛ. Ekɛ wɔ etooo mɛi krokomɛi ahe, ni kɛ́ wɔtɔ̃ po lɛ, eyaa nɔ ejieɔ suɔmɔ kpo etsɔɔ wɔ. Enɛ hewɔ lɛ, wɔyɛ nɔmimaa akɛ, ebaaya nɔ ehi wɔmasɛi, ekɔɔɔ he eko he ni wɔsɔmɔɔ yɛ.

17. Kɛ́ wɔkɛ wɔjwɛŋmɔ ma sui kpakpai ni wɔnyɛmimɛi lɛ jieɔ lɛ kpo lɛ anɔ lɛ, mɛɛ gbɛ nɔ wɔbaaná he sɛɛ?

17 Nɔ ni ji etɛ ni baaye abua wɔ ni wɔba wɔhe shi ji, ni wɔkɛ wɔjwɛŋmɔ baama sui kpakpai ni wɔnyɛmimɛi lɛ jieɔ lɛ kpo lɛ anɔ, tamɔ bɔ ni Yehowa hu feɔ lɛ. Yɛ nɔ najiaŋ ni be fɛɛ be lɛ, wɔbaahã mɛi ana akɛ wɔ esa akɛ wɔtsɔɔ amɛ nɔ ni amɛfee loo wɔ wɔyɔɔ hegbɛ yɛ amɛnɔ lɛ, esa akɛ wɔhã amɛtsɔɔ amɛsusumɔi, ni wɔkashashao shi akɛ wɔbaakpɛlɛ amɛsusumɔi lɛ anɔ. (Abɛi 13:10) Kɛ́ mɛi krokomɛi anine shɛ sɔɔmɔ hegbɛ ko nɔ lɛ, wɔkɛ amɛ baanya, ni wɔbaada Yehowa shi akɛ ehã wɔ kɛ wɔnyɛmimɛi ni yɔɔ jeŋ fɛɛ lɛ hegbɛ ni wɔsɔmɔ lɛ.1 Pet. 5:9.

18. Mɛni baaye abua wɔ ni wɔtsɔse wɔhenilee koni no aye abua wɔ ni wɔya nɔ wɔba wɔhe shi?

18 Nɔ ni ji ejwɛ ni baaye abua wɔ ni wɔya nɔ wɔba wɔhe shi ji, ni wɔkɛ Biblia mli shishitoo mlai baatsɔse wɔhenilee. Biblia mli shishitoo mlai baahã wɔsusu nii ahe, ni wɔnu nii ahe tamɔ Yehowa. Kɛ́ wɔkase nii daa, wɔsɔle, ni wɔkɛ nɔ ni wɔkaseɔ lɛ tsu nii lɛ, fiofio lɛ, wɔbaaná henilee kpakpa, ni wɔnifeemɔi kɛ wɔyiŋkpɛi baasa Nyɔŋmɔ hiɛ. (1 Tim. 1:5) Wɔbaana mɛi krokomɛi akɛ amɛnɔ kwɔlɔ fe wɔ. Yehowa ewo shi akɛ kɛ́ wɔfee nakai lɛ, ‘ebaagbe wɔtsɔsemɔ lɛ naa,’ koni wɔya nɔ wɔjie heshibaa kɛ sui kpakpai krokomɛi akpo.1 Pet. 5:10.

19. Mɛni baaye abua wɔ ni wɔya nɔ wɔba wɔhe shi kɛya naanɔ?

19 Ani okaiɔ gbalɔ lɛ ni jɛ Yuda ni wɔwie ehe yɛ nikasemɔ nɛɛ shishijee lɛ? Akɛni eyaaa nɔ ebaaa ehe shi hewɔ lɛ, wekukpaa ni yɔɔ ekɛ Nyɔŋmɔ teŋ lɛ fite, ni ewala ŋmɛɛ lɛ. Kɛ̃lɛ, Nyɔŋmɔ tsuji anɔkwafoi babaoo ni hi shi yɛ blema kɛ mɛi ni yɔɔ ŋmɛnɛ lɛ, anɔkwɛmɔnii kpakpai lɛ hãa wɔnaa akɛ, wɔbaanyɛ wɔya nɔ wɔba wɔhe shi. Kɛ́ wɔtee nɔ wɔkɛ Yehowa nyiɛ lɛ, wɔbaaya nɔ wɔba wɔhe shi. (Abɛi 8:13) Eji hegbɛ ni nɔ bɛ ni wɔná akɛ wɔkɛ Yehowa baanyiɛ ekɔɔɔ he eko shihilɛ mli ni wɔyɔɔ, ni wɔhiɛ sɔɔ hegbɛ nɛɛ waa. Nyɛhãa wɔtswaa wɔfai shi akɛ, wɔbaaya nɔ wɔfee nɔ fɛɛ nɔ ni wɔbaanyɛ ni wɔkɛ Yehowa anyiɛ yɛ heshibaa mli kɛya naanɔ.