Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ) JANUARY 2016

Hã Nyɔŋmɔ ‘Duromɔ Keenɔ ní Anyɛŋ Naa Atsɔɔ lɛ’ Akanya Bo

Hã Nyɔŋmɔ ‘Duromɔ Keenɔ ní Anyɛŋ Naa Atsɔɔ lɛ’ Akanya Bo

“Shidaa ahã Nyɔŋmɔ yɛ eduromɔ keenɔ ní anyɛŋ naa atsɔɔ lɛ hewɔ.”2 KORINTOBII 9:15.

LALAI: 121, 63

1, 2. (a) Mɛni he Nyɔŋmɔ ‘duromɔ keenɔ ní anyɛŋ naa atsɔɔ’ lɛ kɔɔ? (b) Mɛɛ sanebimɔi ahe wɔbaasusu yɛ nikasemɔ nɛɛ mli?

ANI ole nikeenii ni fe fɛɛ ni Yehowa ehã wɔ kɛtsɔɔ akɛ esumɔɔ wɔ? No ji e-Bi koome Yesu ni etsu lɛ kɛba shikpɔŋ lɛ nɔ lɛ. (Yohane 3:16; 1 Yohane 4:9, 10) Bɔfo Paulo tsɛ nikeenii nɛɛ Nyɔŋmɔ ‘duromɔ keenɔ ní anyɛŋ naa atsɔɔ.’ (2 Korintobii 9:15) Mɛni hewɔ Paulo tsɛ lɛ nakai lɛ?

2 Paulo le akɛ, Yesu afɔleshãa lɛ nɔ Nyɔŋmɔ baatsɔ ehã wɔ nibii kpakpai fɛɛ ni ewo shi akɛ ebaahã wɔ lɛ. (Kanemɔ 2 Korintobii 1:20.) Ni tsɔɔ akɛ, Nyɔŋmɔ ‘duromɔ keenɔ ní anyɛŋ naa atsɔɔ’ lɛ kɔɔ Yesu afɔleshãa lɛ kɛ nibii kpakpai fɛɛ ni Yehowa jɛɔ esuɔmɔ ní tsakeee lɛ mli efeɔ ehãa wɔ lɛ hu ahe. Wɔjwɛŋmɔ nyɛŋ akpele nikeenii ni nɔ bɛ nɛɛ he kɔkɔɔkɔ, aahu ni wɔbaaná wiemɔi ni wɔkɛtsɔɔ naa. Te esa akɛ nikeenii ni jara wa nɛɛ aná wɔnɔ hewalɛ ehã tɛŋŋ? Ni mɛni esa akɛ etsirɛ wɔ ni wɔfee be ni wɔsaa wɔhe kɛhãa Kristo gbele lɛ Kaimɔ ni abaafee Shɔ, March 23, 2016 lɛ?

 NYƆŊMƆ NIKEENII LƐ NƆ BƐ

3, 4. (a) Kɛ́ mɔ ko ke bo nɔ ko lɛ, te onuɔ he ohãa tɛŋŋ? (b) Mɛɛ gbɛ nɔ nikeenii ko baanyɛ atsake oshihilɛ?

3 Kɛ́ mɔ ko ke wɔ nɔ ko lɛ, wɔnáa miishɛɛ waa. Shi nikeenii komɛi yɛ ni esoro amɛ kwraa, loo amɛhe yɛ sɛɛnamɔ waa, aahu akɛ, amɛbaanyɛ amɛtsake wɔshihilɛ. Akɛ nɔkwɛmɔnɔ lɛ, ŋɔɔ lɛ akɛ, oyafee nɔ fɔŋ ko ni abu bo gbele fɔ. Shi be ni ayaagbe bo lɛ, mɔ ko ni oleee lɛ kɛ ehe hã akɛ ebaagbo ehã bo. Yɛ gbɛ ko nɔ lɛ, etamɔ nɔ ni mɔ lɛ kɛ ewala eke bo. Te nikeenii ni jara wa nɛɛ baahã onu he ohã tɛŋŋ?

4 Ŋwanejee ko bɛ he akɛ, nikeenii krɛdɛɛ nɛɛ ni mɔ lɛ kɛhã bo kɛtsɔɔ akɛ esumɔɔ bo lɛ, baatsirɛ bo ni ofee tsakemɔi yɛ oshihilɛ mli. Ekolɛ, ebaatsirɛ bo ni osumɔ mɛi krokomɛi, ofee amɛ ejurɔ, ni okɛ mɛi fɛɛ ni etɔ̃ onɔ lɛ ahe ake amɛ. Ekã shi faŋŋ akɛ, bɔ ni obaahi shi ohã yɛ owala gbii ni eshwɛ lɛ amli lɛ, baahã mɛi fɛɛ ana bɔ ni ohiɛ esɔ nɔ ni mɔ lɛ fee ehã bo lɛ.

5. Mɛɛ gbɛ nɔ esoro kpɔmɔnɔ ni Nyɔŋmɔ kɛduro wɔ lɛ kwraa yɛ nikeenii krokomɛi fɛɛ ahe?

5 Nɔ ni mɔ ni wɔwie ehe yɛ nɔkwɛmɔnɔ lɛ mli lɛ fee lɛ sa kadimɔ, shi kɛ́ wɔkɛto Yesu kpɔmɔ afɔleshãa lɛ he lɛ, ejeee nɔ ko kwraa. (1 Petro 3:18) Mɛni hewɔ wɔkɛɔ nakai? Susumɔ otii ni nyiɛ sɛɛ nɛɛ ahe okwɛ: Wɔ fɛɛ wɔná esha akɛ gboshinii kɛjɛ Adam ŋɔɔ, ni esha dɛŋ nyɔmɔwoo ji gbele. (Romabii 5:12) Shi akɛni Yehowa sumɔɔ adesai fɛɛ hewɔ lɛ, etsu Yesu kɛba shikpɔŋ lɛ nɔ koni ‘ebasa enaa gbele ehã mɔ fɛɛ mɔ,’ loo yɛ gbɛ ko nɔ lɛ, ebagbo ehã wɔ. (Hebribii 2:9) Nɔ ni fe fɛɛ lɛ, kɛtsɔ Yesu afɔleshãa lɛ nɔ lɛ, Yehowa baahã gbele sɛɛ afo kɛya naanɔ! (Yesaia 25:7, 8; 1 Korintobii 15:22, 26) Mɛi fɛɛ ni heɔ Yesu nɔ amɛyeɔ lɛ baahi shi kɛya naanɔ yɛ toiŋjɔlɛ kɛ miishɛɛ mli. Amɛteŋ mɛi komɛi kɛ Kristo baaye nɔ yɛ ŋwɛi akɛ maŋtsɛmɛi yɛ Nyɔŋmɔ Maŋtsɛyeli lɛ mli, ni mɛi ni eshwɛ lɛ baahi shikpɔŋ lɛ nɔ akɛ Maŋtsɛyeli lɛ shishi bii. (Romabii 6:23; Kpojiemɔ 5:9, 10) Mɛɛ jɔɔmɔi krokomɛi Yehowa esaa eto mɛi fɛɛ ni baaná eduromɔ keenɔ lɛ he sɛɛ lɛ?

6. (a) Te jɔɔmɔi ni Yehowa esaa eto wɔ lɛ ateŋ nɔ ni okpaa gbɛ waa? (b) Tsɔɔmɔ nibii etɛ ni esa akɛ Nyɔŋmɔ suɔmɔ lɛ atsirɛ wɔ ni wɔfee.

6 Nyɔŋmɔ baahã shikpɔŋ lɛ atsɔ Paradeiso, ebaatsa helai srɔtoi fɛɛ, ni ebaatee gbohii ashi. (Yesaia 33:24; 35:5, 6; Yohane 5:28, 29) Wɔsumɔɔ Yehowa kɛ e-Bi koome lɛ yɛ ‘duromɔ keenɔ ní anyɛŋ naa atsɔɔ’ ni amɛkɛhã wɔ lɛ hewɔ. Mɛni esa akɛ suɔmɔ ni Nyɔŋmɔ ejie lɛ kpo etsɔɔ wɔ lɛ atsirɛ wɔ ni wɔfee? Esa akɛ etsirɛ wɔ ni (1) wɔnyiɛ Kristo Yesu nɔkwɛmɔnɔ lɛ sɛɛ kpaakpa, (2) wɔsumɔ wɔnyɛmimɛi lɛ, ni (3) wɔjɛ wɔtsuiŋ wɔkɛ mɛi ni tɔ̃ɔ wɔnɔ lɛ atɔmɔi ake amɛ.

“SUƆMƆ NI KRISTO LƐ YƆƆ LƐ NYƐƆ WƆNƆ”

7, 8. Mɛni esa akɛ Kristo suɔmɔ lɛ ahã wɔshwe akɛ wɔbaafee? Mɛni wɔbaanyɛ wɔfee kɛtsɔɔ akɛ wɔsumɔɔ Yehowa kɛ Kristo lɛɛlɛŋ?

7 Klɛŋklɛŋ lɛ, esa akɛ suɔmɔ ni Nyɔŋmɔ ejie lɛ kpo etsɔɔ wɔ lɛ ahã wɔshwe akɛ wɔbaahi shi wɔhã Yesu wɔwala gbii abɔ fɛɛ. Bɔfo Paulo wie akɛ: “Suɔmɔ ni Kristo lɛ yɔɔ lɛ nyɛɔ wɔnɔ.” (Kanemɔ 2 Korintobii 5:14, 15.) Paulo le akɛ, kɛ́ wɔhiɛ sɔɔ suɔmɔ kpele ni Yesu ejie lɛ kpo etsɔɔ wɔ lɛ, ebaanyɛ wɔnɔ, loo ebaakanya wɔ ni wɔsumɔ Yesu ni wɔwo ehiɛ nyam. Kɛ́ wɔnuɔ nɔ ni Yehowa efee ehã wɔ lɛ shishi jogbaŋŋ lɛ, wɔbaana akɛ esumɔɔ wɔ, ni no baahã wɔshwe akɛ wɔbaafee nibii ni woɔ Yesu hiɛ nyam wɔwala gbii fɛɛ. Mɛni ji nibii nɛɛ ekomɛi?

8 Kɛ́ wɔsumɔɔ Yehowa lɛ, wɔbaanyiɛ Yesu nanemaahei lɛ asɛɛ kpaakpa. (1 Petro 2:21; 1 Yohane 2:6) Kɛ́ wɔbo Nyɔŋmɔ kɛ Kristo toi lɛ, no tsɔɔ akɛ wɔsumɔɔ amɛ lɛɛlɛŋ.  Yesu wie akɛ: “Mɔ fɛɛ mɔ ni yɔɔ mikitãi lɛ ni eyeɔ nɔ lɛ, lɛ ji mɔ ni sumɔɔ mi. Ni mɔ fɛɛ mɔ ni sumɔɔ mi lɛ, mi-Tsɛ baasumɔ lɛ, ni mi hu masumɔ lɛ ni majie mihe shi faŋŋ matsɔɔ lɛ.”Yohane 14:21; 1 Yohane 5:3.

9. Mɛɛ nibii esa akɛ wɔkwɛ wɔhe nɔ jogbaŋŋ yɛ amɛhe?

9 Ehi akɛ wɔbaasusu bɔ ni wɔhiɔ wɔhãa lɛ he jogbaŋŋ yɛ Kaimɔ be nɛɛ mli. Bi ohe akɛ: ‘Mɛni mifeɔ bianɛ ni tsɔɔ akɛ miikase Yesu? Ni mɛɛ nibii krokomɛi amli manyɛ makase lɛ yɛ?’ Mɛi ni yɔɔ je lɛ mli lɛ miisumɔ ni wɔfee wɔnii tamɔ amɛ, ni enɛ hewɔ ehe miihia ni wɔsusu sanebimɔi nɛɛ ahe jogbaŋŋ lɛ. (Romabii 12:2) Kɛ́ wɔkwɛɛɛ ni ahi lɛ, wɔbaabɔi mɛi ni tsɛɔ amɛhe tsɔɔlɔi yɛ je nɛɛ mli, kɛ mɛi ni ehe gbɛ́i yɛ hiɛtserɛjiemɔ kɛ kpɔiaŋgbɔlemɔ mli lɛ kasemɔ. (Kolosebii 2:8; 1 Yohane 2:15-17) Mɛni baaye abua wɔ ni wɔkakase amɛ?

10. Mɛɛ saji esa akɛ wɔbi wɔhe yɛ Kaimɔ be nɛɛ mli? Ni mɛni amɛhetoi lɛ baanyɛ atsirɛ wɔ ni wɔfee? (Kwɛmɔ mfoniri ni yɔɔ nikasemɔ lɛ shishijee lɛ.)

10 Kaimɔ be lɛ ji be ni hi jogbaŋŋ ni okɛbaabote onibii amli okwɛ kɛji otadei, sinii, lalai, kɛ nibii ni yɔɔ okɔmpiuta, foŋ, kɛ ilɛtrɔniki tsɔnei krokomɛi anɔ lɛ sa Nyɔŋmɔ hiɛ. Bi ohe akɛ: ‘Eji Yesu yɛ biɛ kulɛ, ani manyɛ mawo atade nɛɛ?’ (Kanemɔ 1 Timoteo 2:9, 10.) ‘Ani atade nɛɛ sa mɔ ko ni kɛɛ Kristo sɛɛnyiɛlɔ ji lɛ? Ani Yesu baanya sinii ni mikwɛɔ lɛ, kɛ lalai ni miboɔ toi lɛ ahe? Kɛ́ Yesu na nibii ni yɔɔ mifoŋ loo mitablɛt lɛ nɔ lɛ, ani ebaafee mi hiɛgbele? Kɛ́ Yesu bi mi nɔ hewɔ ni minyaa vidio gem pɔtɛɛ ko he lɛ, ani ebaawa kɛhã mi akɛ mahã lɛ hetoo?’ Esa akɛ suɔmɔ ni wɔyɔɔ kɛhã Yehowa lɛ atsirɛ wɔ ni wɔshɛrɛ nibii fɛɛ ni esaaa Kristofoi lɛ wɔshwie, ekɔɔɔ he eko bɔ ni amɛkã wɔtsui nɔ amɛhã, loo shika abɔ ni wɔkɛhe. (Bɔfoi 19:19, 20) Wɔjɔɔ wɔhe nɔ wɔhã Yehowa, ni tsɔɔ akɛ, wɔwo Nyɔŋmɔ shi akɛ, wɔbaafee nɔ ni Kristo sumɔɔ, jeee nɔ ni wɔ diɛŋtsɛ wɔsumɔɔ. No hewɔ lɛ, esa akɛ wɔjie nibii fɛɛ ni baanyɛ ahã ewa kɛhã wɔ akɛ wɔbaakase Yesu lɛ kɛjɛ wɔshihilɛ mli.Mateo 5:29, 30; Filipibii 4:8.

11. (a) Mɛɛ gbɛ nɔ esa akɛ suɔmɔ ni Yehowa kɛ Yesu ejie lɛ kpo amɛtsɔɔ wɔ lɛ asa bɔ ni wɔtsuɔ shiɛmɔ nitsumɔ lɛ wɔhãa lɛ he? (b) Mɛɛ gbɛ nɔ suɔmɔ baanyɛ atsirɛ wɔ ni wɔye wɔbua mɛi krokomɛi ni yɔɔ asafo lɛ mli lɛ?

11 Esa akɛ suɔmɔ ni wɔyɔɔ kɛhã Yesu lɛ atsirɛ wɔ ni wɔshiɛ kɛ ekãa. (Mateo 28:19, 20; Luka 4:43) Ani obaanyɛ oto onibii ahe gbɛjianɔ koni onyɛ osɔmɔ akɛ gbɛgbalɔi awalɔ yɛ Kaimɔ be nɛɛ mli, ni okɛ ŋmɛlɛtswai 30 loo 50 ashiɛ sane kpakpa lɛ? Nyɛmi nuu ko ni eye afii 84, ni eŋa egbo lɛ susuuu akɛ ebaanyɛ esɔmɔ akɛ gbɛgbalɔi awalɔ, ejaakɛ egbɔ ni ebɛ gbɔmɔtsoŋ hewalɛ tsɔ. Shi gbɛgbalɔi ni yɔɔ ekutso lɛ mli lɛ ye amɛbua lɛ. Amɛto tsɔne he gbɛjianɔ amɛhã lɛ, ni amɛhala shikpɔŋkuku ko ni emli nitsumɔ baafee mlɛo kɛhã lɛ. Enɛ ye ebua nyɛmi nuu nɛɛ ni enyɛ ená ŋmɛlɛtswai 30 ni ewo shi akɛ ebaahã lɛ. Ani bo hu obaanyɛ oye obua mɔ ko yɛ osafo lɛ mli ni enyɛ esɔmɔ akɛ gbɛgbalɔi awalɔ yɛ March loo April nyɔɔŋ lɛ mli? Eji anɔkwale akɛ, jeee mɔ fɛɛ mɔ baanyɛ asɔmɔ akɛ gbɛgbalɔ loo gbɛgbalɔi awalɔ. Shi kɛ́ wɔhã suɔmɔ ni Yesu jie lɛ kpo lɛ ná wɔtsui nɔ hewalɛ, taakɛ ená Paulo tsui nɔ hewalɛ lɛ, ebaatsirɛ wɔ ní wɔkɛ wɔbe kɛ wɔhewalɛ ashã afɔle kɛtsu babaoo yɛ Yehowa sɔɔmɔ lɛ mli. Mɛni ji nɔ kroko ni Nyɔŋmɔ suɔmɔ lɛ baakanya wɔ ni wɔfee?

EJI WƆSƆ̃ AKƐ WƆSUMƆ WƆNYƐMIMƐI

12. Mɛni esa akɛ Nyɔŋmɔ suɔmɔ lɛ akanya wɔ ni wɔfee?

12 Nɔ ni ji enyɔ lɛ, esa akɛ suɔmɔ ni Nyɔŋmɔ ejie lɛ kpo etsɔɔ wɔ lɛ akanya wɔ ni wɔsumɔ wɔnyɛmimɛi. Bɔfo Yohane ŋma  akɛ: “Mɛi ni asumɔɔ, kɛ́ nɛkɛ ji bɔ ni Nyɔŋmɔ sumɔ wɔ lɛ, belɛ wɔ hu sɔ̃ kã wɔnɔ akɛ wɔsumɔsumɔɔ wɔhe.” (1 Yohane 4:7-11) Kɛ́ wɔsumɔɔɔ wɔnyɛmimɛi lɛ, belɛ, wɔnuko suɔmɔ ni Nyɔŋmɔ ejie lɛ kpo etsɔɔ wɔ lɛ shishi jogbaŋŋ. (1 Yohane 3:16) Mɛni wɔbaanyɛ wɔfee kɛtsɔɔ akɛ wɔsumɔɔ wɔnyɛmimɛi lɛ?

13. Mɛni Yesu fee kɛtsɔɔ akɛ esumɔɔ mɛi krokomɛi?

13 Nibii ni Yesu fee be ni eyɔɔ shikpɔŋ lɛ nɔ lɛ ji nɔkwɛmɔnɔ fɛfɛo kɛhã wɔ. Yesu ye ebua mɛi, titri lɛ, mɛi ni baa amɛhe shi. Etsa helai srɔtoi, ehã akpakei nyiɛ, egbele shwilafoi ahiŋmɛii, ehã toimulɔi nu nii, ni efɛne mumui alilɛi. (Mateo 11:4, 5) Yesu efeee enii tamɔ jamɔŋ hiɛnyiɛlɔi lɛ. Ejɛ etsuiŋ etsɔɔ mɛi fɛɛ ni baa amɛhe shi ni miitao ale Nyɔŋmɔ lɛ nii. (Yohane 7:49) Esumɔ amɛ, ni egbo deŋme eye ebua amɛ.Mateo 20:28.

Ani obaanyɛ oye obua nyɛmi ko ni eda yɛ afii amli ni ekɛ ehe awo shiɛmɔ nitsumɔ lɛ mli? (Kwɛmɔ kuku 14)

14. Mɛni obaanyɛ ofee kɛtsɔɔ akɛ osumɔɔ onyɛmimɛi lɛ?

14 Kaimɔ be lɛ ji be ni hi jogbaŋŋ ni okɛbaasusu bɔ ni obaafee oye obua nyɛmimɛi ni yɔɔ osafo lɛ mli lɛ he, titri lɛ mɛi ni edara yɛ afii amli lɛ. Ani obaanyɛ oyasara amɛ, ohoo nii oyahã amɛ, loo oye obua amɛ kɛ amɛshĩa nitsumɔi? Ani obaanyɛ oto gbɛjianɔ ni okɛ amɛ atsu nii yɛ shiɛmɔ nitsumɔ lɛ mli, loo oyawo amɛ kɛba asafoŋ kpeei? (Kanemɔ Luka 14:12-14.) Hã suɔmɔ ni Nyɔŋmɔ ejie lɛ kpo etsɔɔ bo lɛ akanya bo ni osumɔ onyɛmimɛi lɛ!

NAA ONYƐMIMƐI LƐ MƆBƆ

15. Mɛni esa akɛ wɔteŋ mɔ fɛɛ mɔ ahã ehi ejwɛŋmɔŋ?

15 Nɔ ni ji etɛ lɛ, suɔmɔ ni Yehowa ejie lɛ kpo etsɔɔ wɔ lɛ kanyaa wɔ ni wɔkɛ wɔnyɛmimɛi lɛ atɔmɔi keɔ amɛ. Wɔ fɛɛ wɔná esha kɛ gbele akɛ gboshinii kɛjɛ Adam ŋɔɔ, no hewɔ lɛ mɔ ko mɔ ko nyɛŋ eshi etsitsi ekɛɛ akɛ, “Mi lɛ, kpɔmɔnɔ lɛ he ehiaaa mi.” Mɔ ni yeɔ Nyɔŋmɔ anɔkwa fe fɛɛ yɛ je lɛ mli lɛ po nyɛŋ akɛɛ kɔkɔɔkɔ akɛ kpɔmɔnɔ lɛ he ehiaaa lɛ. Nyɔmɔ ni wɔteŋ mɔ fɛɛ mɔ hiɛ Nyɔŋmɔ lɛ da waa diɛŋtsɛ, shi ekɛke wɔ! Esaaa akɛ wɔhiɛ kpaa enɛ nɔ kɔkɔɔkɔ. Mɛni hewɔ? Abɛbua ko ni Yesu gba lɛ baaye abua wɔ ni wɔhã sanebimɔ nɛɛ hetoo.

16, 17. (a) Mɛni esa akɛ wɔkase yɛ Yesu abɛbua ni kɔɔ maŋtsɛ lɛ kɛ enyɔŋ lɛ he lɛ mli? (b) Yɛ nɔ ni okase yɛ abɛbua nɛɛ mli lɛ hewɔ lɛ, mɛni otswa ofai shi akɛ obaafee?

16 Yesu gba abɛbua ko ni kɔɔ maŋtsɛ ko kɛ enyɔŋ he. No mli lɛ, nyɔŋ lɛ hiɛ maŋtsɛ lɛ nyɔmɔ denarioi 60,000,000 sɔŋŋ, shi maŋtsɛ lɛ kɛ fɛɛ ke lɛ. Sɛɛ mli lɛ, nyɔŋ nɛɛ yamɔ enaanyo nyɔŋ ko ni hiɛ lɛ nyɔmɔ denarioi 100 pɛ, ni efee lɛ gidigidi ni ekɛ shika lɛ aba. Kulɛ, esa akɛ nyɔŋ nɛɛ asusu bɔ ni maŋtsɛ lɛ na lɛ mɔbɔ lɛ he, ni no akanya lɛ ni ena enaanyo lɛ mɔbɔ, shi efeee nakai. Be ni maŋtsɛ lɛ nu nɔ ni tee nɔ lɛ, emli wo la naakpa, ni ekɛɛ lɛ akɛ: “Nyɔŋ fɔŋ, be ni okpa mi fai lɛ, miŋɔ onyɔmɔ lɛ fɛɛ mike bo. Ani esaaa akɛ kulɛ bo hu onaa onaanyo nyɔŋ lɛ mɔbɔ taakɛ mina bo mɔbɔ lɛ?” (Mateo 18:23-35, shishigbɛ niŋmaa) Yehowa  hu kɛ nyɔmɔ wulu ni wɔhiɛ lɛ lɛ eke wɔ. No hewɔ lɛ, mɛni esa akɛ suɔmɔ kɛ mɔbɔnalɛ ni ejie lɛ kpo etsɔɔ wɔ lɛ atsirɛ wɔ ni wɔfee?

17 Amrɔ nɛɛ ni wɔsaa wɔhe kɛhãa Kaimɔ lɛ, wɔbaanyɛ wɔbi wɔhe akɛ: ‘Ani nyɛmi ko efee mi nɔ ko ni edɔ mi waa? Ani mikɛ etɔmɔ lɛ eke lɛ?’ Kɛ́ hetoo lɛ ji dabi lɛ, belɛ be nɛɛ ji be ni sa jogbaŋŋ akɛ wɔkase Yehowa, Mɔ ni kɛ tɔmɔi ‘faa mra’ lɛ. (Nehemia 9:17; Lala 86:5) Kɛ́ wɔhiɛ sɔɔ Yehowa mɔbɔnalɛ kpele lɛ, wɔ hu wɔbaana mɛi mɔbɔ, ni wɔbaajɛ wɔtsuiŋ wɔkɛ amɛtɔmɔi ake amɛ. Kɛ́ wɔsumɔɔɔ wɔnyɛmimɛi lɛ, ni wɔkɛ amɛtɔmɔi ekeee amɛ lɛ, Yehowa hu sumɔŋ wɔ, ni ekɛ wɔtɔmɔi ekeŋ wɔ. (Mateo 6:14, 15) Kɛ́ mɔ ko tɔ̃ wɔnɔ, ni wɔkɛ etɔmɔ ke lɛ lɛ, no etsɔɔɔ akɛ nɔ ni efee lɛ edɔko wɔ. Kɛ̃lɛ, no baanyɛ aye abua wɔ ni wɔná miishɛɛ wɔsɛɛ.

18. Mɛɛ gbɛ nɔ Nyɔŋmɔ suɔmɔ lɛ ye ebua nyɛmi yoo ko ni eku ehiɛ eshwie nyɛmi yoo kroko ko fatɔi anɔ?

18 Bei komɛi lɛ, ewa kɛhã wɔ akɛ wɔbaaku wɔhiɛ wɔshwie wɔnyɛmimɛi lɛ afatɔi anɔ. (Kanemɔ Efesobii 4:32; Kolosebii 3:13, 14.) Nyɛmi yoo ko ni atsɛɔ lɛ Lily lɛ bɔ mɔdɛŋ eku ehiɛ eshwie enyɛmimɛi afatɔi anɔ. [1] (Kwɛmɔ shishigbɛ niŋmaa ni yɔɔ sane lɛ naagbee lɛ.) Lily ye ebua nyɛmi yoo okulafo ko ni atsɛɔ lɛ Carol lɛ. Kɛ́ ebaaya he ko lɛ, Lily kɛ etsɔne woɔ lɛ kɛyaa, eyayeɔ jara ebahãa lɛ, ni efeɔ nibii krokomɛi babaoo ehãa lɛ. Fɛɛ sɛɛ lɛ, Carol wie Lily hiɛ be fɛɛ be, ni bei komɛi lɛ, enɛ hã ewa kɛhã lɛ akɛ ebaaye ebua lɛ. Shi Lily kɛ ejwɛŋmɔ ma sui kpakpai ni Carol yɔɔ lɛ anɔ, ni etee nɔ eye ebua lɛ afii abɔ. Sɛɛ mli lɛ, hela ko ni naa wa mɔ Carol ni egbo. Eyɛ mli akɛ Lily náaa lɛ mlɛo akɛ ebaaye ebua Carol moŋ, shi ewie akɛ: “Miikpa gbɛ akɛ abaatee Carol shi ni mana lɛ ekoŋŋ. Miitao mana bɔ ni ekɛ shihilɛ baaŋɔɔ ahã be ni eye emuu.” No hewɔ lɛ, eyɛ faŋŋ akɛ, suɔmɔ ni Nyɔŋmɔ ejie lɛ kpo etsɔɔ wɔ lɛ baanyɛ atsirɛ wɔ ni wɔku wɔhiɛ wɔshwie wɔnyɛmimɛi lɛ afatɔi anɔ, ni wɔkɛ wɔjwɛŋmɔ ama bɔ ni shihilɛ baafee be ni adesai fɛɛ eye emuu lɛ nɔ.

19. Mɛni obaahã Nyɔŋmɔ ‘duromɔ keenɔ ni anyɛŋ naa atsɔɔ’ lɛ akanya bo ni ofee?

19 Lɛɛlɛŋ, wɔnyɛŋ Yehowa duromɔ keenɔ lɛ naa wɔtsɔɔ. Nyɛhãa wɔhiɛ asɔa nikeenii nɛɛ daa! Kaimɔ be lɛ ji be ni sa jogbaŋŋ ni wɔkɛbaajwɛŋ nibii fɛɛ ni Yehowa kɛ Yesu efee ehã wɔ lɛ nɔ. Kɛ́ wɔfee nakai lɛ, suɔmɔ ni amɛjie lɛ kpo amɛtsɔɔ wɔ lɛ baakanya wɔ ni wɔnyiɛ Yesu nanemaahei lɛ asɛɛ kpaakpa, wɔsumɔ wɔnyɛmimɛi lɛ, ni wɔjɛ wɔtsuiŋ wɔkɛ amɛtɔmɔi ake amɛ.

^ [1] (kuku 18) Atsake gbɛ́i lɛ ekomɛi yɛ sane nɛɛ mli.