Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 NIKASEMƆ 6

Ye Nyɔŋmɔ Anɔkwa Daa!

Ye Nyɔŋmɔ Anɔkwa Daa!

“Miŋmɛŋ minɔkwayeli lɛ he kɛyashi magbo!”​—HIOB 27:5.

LALA 34 Nyiɛmɔ Yɛ Anɔkwayeli Mli

NƆ NI ABAASUSU HE *

1. Mɛni Odasefoi etɛ ni awie amɛhe yɛ kuku nɛɛ mli lɛ fee kɛtsɔɔ akɛ amɛyeɔ Yehowa anɔkwa?

ŊƆƆ lɛ akɛ, Yehowa Odasefonyo oblayoo fioo ko etee skul. Nakai gbi lɛ, aaye gbi jurɔ ko, ni etsɔɔlɔ lɛ kɛɛ skulbii lɛ fɛɛ afata he ni aye. Shi wɔnyɛmi yoo lɛ le akɛ nakai gbi jurɔ lɛ esaaa Nyɔŋmɔ hiɛ. No hewɔ lɛ, ejɛ bulɛ mli ehã tsɔɔlɔ lɛ le akɛ enyɛŋ efee nakai. Naa shihilɛ kroko. Nyɛmi nuu ko ni hiɛ gboɔ waa lɛ miishiɛ yɛ shĩa fɛɛ shĩa ni ekai akɛ, oblanyo ko ni ekɛyaa skul ni eye Yehowa Odasefoi ahe fɛo pɛŋ lɛ yɛ shĩa ni tsa nɔ lɛ mli. Enɛ hã eshe gbeyei fioo. Shi efee ekãa ni etee nakai shĩa lɛ mli. Susumɔ enɛ hu he okwɛ. Gbi ko lɛ, nyɛmi nuu ko ni tsuɔ nii waa lɛ nitsumɔtsɛ kɛɛ lɛ akɛ efee nɔ ko ni ele akɛ ejaaa loo ni teɔ shi ewoɔ maŋ lɛ mla. Kɛ́ ekɛɛ efeee lɛ, ekolɛ nitsumɔ nɛɛ baaje edɛŋ. Eyɛ mli akɛ no nɔŋŋ etsuɔ kɛkwɛɔ eweku lɛ moŋ, shi ehã enitsumɔtsɛ lɛ le akɛ eesumɔ ni eye anɔkwa ni ebo maŋ lɛ mla lɛ toi, ejaakɛ nakai Nyɔŋmɔ kpaa gbɛ yɛ etsuji fɛɛ adɛŋ.​—Rom. 13:1-4; Heb. 13:18.

2. Mɛɛ sanebimɔi wɔbaahã hetoo? Ni mɛni hewɔ?

2 Nyɛmimɛi ni wɔwie amɛhe yɛ kuku ni tsɔ hiɛ lɛ mli lɛ jie sui kpakpai komɛi akpo. Akɛ nɔkwɛmɔnɔ lɛ, amɛ fɛɛ amɛtsɔɔ akɛ amɛyɛ ekãa. Agbɛnɛ hu, amɛtsɔɔ akɛ amɛmiisumɔ ni amɛfee nɔ ni ja. Shi su kome ko ni amɛjie lɛ kpo ni sa kadimɔ waa ji, anɔkwayeli. Akɛni amɛ fɛɛ amɛtswa amɛfai shi akɛ amɛbaaye Yehowa anɔkwa hewɔ lɛ, amɛhãaa shihilɛi ni amɛkɛkpe lɛ anyɛ amɛnɔ ni amɛgbo enɔ toi. Kwɛ bɔ ni Yehowa mii baashɛ ehe ehã akɛ amɛjie su nɛɛ kpo! Wɔ hu wɔmiisumɔ ni wɔhã wɔ-Tsɛ ni yɔɔ ŋwɛi lɛ aná wɔhe miishɛɛ, aloo jeee nakai? No hewɔ lɛ, nyɛhãa wɔtaoa sanebimɔi nɛɛ ahetoo: Kɛ́ akɛɛ wɔye Yehowa anɔkwa lɛ, te atsɔɔ tɛŋŋ? Mɛni hewɔ esa akɛ wɔ fɛɛ wɔye Yehowa anɔkwa? Ni mɛni wɔbaanyɛ wɔfee koni wɔfai shi ni wɔtswa  akɛ wɔbaaye Yehowa anɔkwa daa yɛ gbii fɔji nɛɛ amli lɛ mli awa?

KƐ́ AKƐƐ WƆYE YEHOWA ANƆKWA LƐ TE ATSƆƆ TƐŊŊ?

3. (a) Kɛ́ akɛɛ wɔye Yehowa anɔkwa lɛ, te atsɔɔ tɛŋŋ? (b) Okɛ nɔkwɛmɔnɔ ahã kɛtsɔɔ nɔ hewɔ ni Yehowa miisumɔ ni wɔsumɔ lɛ kɛ wɔtsui muu fɛɛ ni wɔye lɛ anɔkwa be fɛɛ be.

3 Kɛ́ akɛɛ wɔ, ni ji Yehowa tsuji lɛ, wɔye lɛ anɔkwa lɛ, nɔ ni etsɔɔ ji akɛ, wɔsumɔ lɛ kɛ wɔtsui muu fɛɛ, wɔkɛ wɔhe fɛɛ ahã lɛ, ni wɔfee esuɔmɔnaa nii be fɛɛ be. Hebri wiemɔ ni akɛtsu nii yɛ Biblia lɛ mli ni atsɔɔ shishi akɛ “anɔkwayeli” lɛ shishinumɔ ji, nɔ ko ni eye emuu, nɔ ko ni kpa ko kwraa bɛ he, loo nɔ ko ni hi kɛwula shi. Yehowa wie yɛ Mla lɛ mli akɛ, esa akɛ kooloi ni Israelbii lɛ kɛbaashã afɔle amɛhã lɛ lɛ afee kooloi ni kpa ko kwraa bɛ amɛhe. * (3 Mo. 22:21, 22) Ehã amɛle akɛ, amɛkɛ kooloo akpaketsɛ, loo kooloo ni toi kome etse, loo ni eshwila, loo ni miiye hela ko, akashã afɔle amɛhã lɛ. Esa akɛ kooloi fɛɛ ni amɛkɛbaaba lɛ afee nɔ ni eye emuu, ni kpa ko kwraa bɛ amɛhe, ni hi kɛwula shi, kɛjeee nakai lɛ, ekpɛlɛŋ afɔleshaa lɛ nɔ. (Mal. 1:6-9) Kɛ́ oyaahé aduawa ni ona akɛ mɔ ko eye fã, loo oyaahé wolo ni ona akɛ emli baafai lɛ ekomɛi elaaje, loo oyaahé tsɔne ni ona akɛ afamɔ ehe nibii lɛ, ani obaahé lɛ nakai? Ekã shi faŋŋ akɛ ohéŋ, ejaakɛ oona akɛ nii lɛ yeee emuu; kpa loo naagba yɛ he. No hewɔ lɛ, ebɛ naakpɛɛ akɛ Yehowa hu miisumɔ ni wɔsumɔ lɛ kɛ wɔtsui muu fɛɛ ni wɔye lɛ anɔkwa be fɛɛ be.

4. (a) Mɛni hewɔ wɔbaanyɛ wɔkɛɛ akɛ mɛi ni yeee emuu po baanyɛ aye Yehowa anɔkwa lɛ? (b) Yɛ nɔ ni aŋma yɛ Lala 103:12-14 lɛ naa lɛ, mɛni Yehowa le yɛ wɔhe?

4 Shi akɛni wɔyeee emuu ni wɔtɔ̃ɔ be fɛɛ be hewɔ lɛ, ekolɛ wɔbaanu he akɛ wɔnyɛŋ wɔye Yehowa anɔkwa. Shi ani ja wɔye emuu dani wɔbaanyɛ wɔye Yehowa anɔkwa? Dabi. Naa nibii enyɔ komɛi ahewɔ ni wɔwieɔ nakai. Klɛŋklɛŋ lɛ, Yehowa kɛ ejwɛŋmɔ emaaa wɔtɔmɔi anɔ. Biblia lɛ kɛɔ akɛ: “Ao Yah, eji okwɛɔ tɔmɔi kulɛ, Ao Yehowa, namɔ baanyɛ shi adamɔ?” (Lala 130:3) Yehowa le akɛ wɔtɔ̃ɔ, ejaakɛ wɔyeee emuu, ni no hewɔ lɛ, ejɛɔ etsuiŋ ekɛ wɔhe eshai keɔ wɔ. (Lala 86:5) Nɔ ni ji enyɔ lɛ, Yehowa le nɔ ni wɔbaanyɛ wɔfee kɛ nɔ ni wɔnyɛŋ wɔfee. No hewɔ lɛ, ekɛŋ wɔ ni wɔfee nɔ ko ni lɛ diɛŋtsɛ ele akɛ wɔnyɛŋ wɔfee. (Kanemɔ Lala 103:12-14.) Kɛ́ nakai ni lɛ, belɛ mɛɛ gbɛ nɔ wɔbaanyɛ wɔye emuu, wɔhi kɛwula shi, loo wɔfee mɛi ni kpa ko kwraa bɛ amɛhe yɛ ehiɛ?

5. Mɛni hewɔ wɔbaanyɛ wɔkɛɛ akɛ suɔmɔ ji nɔ titri ni baaye abua wɔ ni wɔye Yehowa anɔkwa lɛ?

5 Suɔmɔ ji nɔ titri ni baaye abua wɔ ni wɔye Yehowa anɔkwa be fɛɛ be. Be fɛɛ be lɛ, esa akɛ wɔsumɔ wɔ-Tsɛ ni yɔɔ ŋwɛi lɛ kɛ wɔtsui muu fɛɛ, ni wɔkɛ wɔhe fɛɛ ahã lɛ. No ji, esaaa akɛ shi ko kwraa baa wɔsuɔmɔ lɛ he. Kɛ́ wɔkɛ kai kpe, shi fɛɛ sɛɛ lɛ, wɔtee nɔ wɔsumɔ Nyɔŋmɔ kɛ wɔtsui muu fɛɛ lɛ, belɛ wɔmiiye lɛ anɔkwa ji no. (1 Kro. 28:9; Mat. 22:37) Susumɔ nyɛmimɛi etɛ ni wɔwie amɛhe yɛ klɛŋklɛŋ kuku lɛ mli lɛ ahe ekoŋŋ okwɛ. Mɛni hewɔ amɛkpɛ yiŋ ni amɛkpɛ lɛ? Ani oblayoo fioo lɛ yeee gbi jurɔ lɛ akɛni esumɔɔɔ ni enáa miishɛɛ yɛ skul hewɔ? Ani oblanyo lɛ hu tee enaanyo lɛ shĩa lɛ akɛni eesumɔ ni ashwie ehiɛ shi lɛ hewɔ? Ani nyɛmi nuu lɛ miisumɔ ni enitsumɔ lɛ aje edɛŋ ni no hewɔ efeee nɔ ni enitsumɔtsɛ lɛ kɛɛ efee lɛ? Dabi kwraa. Moŋ lɛ, amɛteŋ mɔ fɛɛ mɔ miisumɔ ni efee e-Tsɛ ni yɔɔ ŋwɛi lɛ suɔmɔnaa nii ni ehi shi yɛ etaomɔ nii ni ja lɛ anaa, ni no hewɔ amɛkpɛ yiŋ ni amɛkpɛ lɛ. Amɛsusu nɔ ni Yehowa miisumɔ ni amɛfee lɛ he dani amɛkpɛ amɛyiŋ, ejaakɛ amɛsumɔɔ lɛ. Amɛkɛ amɛnifeemɔ tsɔɔ akɛ, amɛyeɔ Yehowa anɔkwa.

 MƐNI HEWƆ ESA AKƐ WƆYE YEHOWA ANƆKWA?

6. (a) Mɛni hewɔ esa akɛ wɔye Yehowa anɔkwa? (b) Mɛni Adam kɛ Hawa fee kɛtsɔɔ akɛ amɛyeee Yehowa anɔkwa?

6 Mɛni hewɔ ehe miihia waa ni oye Yehowa anɔkwa? Ehe miihia, ejaakɛ Satan efolɔ bo kɛ Yehowa fɛɛ naa. Nakai ŋwɛibɔfo atuatselɔ lɛ te shi ewo Yehowa yɛ Eden abɔɔ lɛ mli tɔ̃ɔ, ni no hã ená gbɛ́i Satan, ni shishi ji “Shiteekɛwolɔ” lɛ. Efite Yehowa gbɛ́i kpakpa lɛ, ejaakɛ yɛ nɔ ni ewie yɛ abɔɔ lɛ mli lɛ naa lɛ, Yehowa ji Nɔyelɔ fɔŋ, esusuɔ lɛ pɛ ehe, ni eyeee anɔkwa. Mɔbɔ sane ji akɛ, Adam kɛ Hawa yafata Satan he ni amɛtse Yehowa hiɛ atua. (1 Mo. 3:1-6) Kulɛ, esa akɛ nibii pii ni Yehowa efee ehã amɛ yɛ abɔɔ lɛ mli lɛ ahã amɛsumɔ lɛ waa. Shi eyabaaa lɛ nakai. Be ni Satan te shi ewo Yehowa lɛ, amɛkɛ amɛnifeemɔ tsɔɔ faŋŋ akɛ, amɛsumɔɔɔ Yehowa kɛ amɛtsui muu fɛɛ. Sɛɛ mli lɛ, sane kroko te shi, ni no ji, ‘Ani adesa ko yɛ ni sumɔɔ Yehowa aahu akɛ ebaaye lɛ anɔkwa yɛ shihilɛ fɛɛ shihilɛ mli?’ Nakai sane lɛ te shi be ni Satan ka Hiob lɛ.

7. Yɛ nɔ ni aŋma yɛ Hiob 1:8-11 lɛ naa lɛ, te Yehowa nu he ehã tɛŋŋ yɛ anɔkwa ni Hiob yeɔ lɛ lɛ he? Shi te Satan nu he ehã tɛŋŋ yɛ he?

7 Hiob hi shi be ni Israelbii lɛ yɔɔ Ejipt lɛ. Eyɛ mli akɛ eji adesa ni yeee emuu tamɔ wɔ nɔŋŋ ni etɔ̃ hu moŋ, shi be ni eyɔɔ wala mli lɛ, mɔ ko mɔ ko bɛ shikpɔŋ lɛ nɔ ni yeɔ Yehowa anɔkwa tamɔ lɛ. Enɛ hewɔ lɛ, Yehowa basumɔ Hiob sane waa. Eeenyɛ efee akɛ, dani Hiob sane lɛ baaba po lɛ, no mli lɛ Satan ebɔ Yehowa ahora akɛ adesa ko bɛ ni baaye Yehowa anɔkwa. No hewɔ lɛ, Yehowa gbala Satan jwɛŋmɔ kɛtee anɔkwa ni Hiob yeɔ Nyɔŋmɔ lɛ nɔ, ejaakɛ enɔkwayeli lɛ miihã aana akɛ Satan ji amalelɔ! Satan kɛɛ Yehowa akɛ, kɛ́ eŋmɛ lɛ  gbɛ ni eka Hiob lɛ, Hiob baaŋmɛɛ enɔkwayeli lɛ he. Akɛni Yehowa heɔ enaanyo Hiob eyeɔ hewɔ lɛ, eŋmɛ Satan gbɛ ni eka Hiob.​—Kanemɔ Hiob 1:8-11.

8. Mɛni Satan fee Hiob?

8 Satan yitsoŋ wa, ni eji gbɔmɔgbelɔ. Ekpãtã nibii fɛɛ ni Hiob yɔɔ lɛ hiɛ, egbe etsuji lɛ fɛɛ, ni Hiob bulɛ fɛɛ tã. No sɛɛ lɛ, ekɛ ehiɛ tsɔɔ Hiob weku lɛ, ni egbe ebii nyɔŋma lɛ fɛɛ. Kɛkɛ ni eta Hiob gbɔmɔtso lɛ he; ehã asanei ni waa mɔ he waa tsɛ̃rɛ̃ lɛ kɛjɛ epampam aahu kɛyashi enane shishi. Hiob ŋa lɛ hao ni ewerɛ ho ehe aahu akɛ, ekɛɛ ewu lɛ akɛ elomɔ Nyɔŋmɔ ni egbo. Hiob diɛŋtsɛ po shwe gbele. Fɛɛ sɛɛ lɛ, etee nɔ eye Nyɔŋmɔ anɔkwa. Be ni Satan na nakai lɛ, ekɛ kaa kroko hu ba Hiob nɔ, ni enɛ lɛ, ekɛtsɔ Hiob nanemɛi etɛ komɛi anɔ. Hii nɛɛ batara Hiob masɛi gbii abɔ, shi yɛ nɔ najiaŋ ni amɛbaashɛje emii lɛ, amɛwie ehiɛ nyanyaanya. Amɛkɛɛ lɛ akɛ Nyɔŋmɔ ji mɔ ni hɔ enaagbai lɛ fɛɛ asɛɛ, ni akɛ eye anɔkwa jio, eyeee anɔkwa jio, Nyɔŋmɔ enaaa. Amɛwie po akɛ, nɔ ni enina Hiob lɛ sa lɛ, ejaakɛ gbɔmɔ gbonyo ji lɛ!​—Hiob 1:13-22; 2:7-11; 15:4, 5; 22:3-6; 25:4-6.

9. Yɛ naagbai ni Hiob kɛkpe lɛ fɛɛ sɛɛ lɛ, mɛni efeee?

9 Te Hiob fee enii ehã tɛŋŋ yɛ naagbai ni nina lɛ ahe? Emli fu ni ejiejie saji ni enanemɛi lɛ wie amɛshi lɛ lɛ anaa. Sɛɛ mli lɛ, lɛ diɛŋtsɛ po ewie akɛ ewie kpɛŋkpɛŋ. Agbɛnɛ hu, Hiob kɛ hiɛdɔɔ fã ehe akɛ esane ja, shi jeee nakai hiɛdɔɔ lɛ nɔŋŋ ekɛfã Nyɔŋmɔ he. Ehã ana faŋŋ akɛ eyeee emuu lɛɛlɛŋ. (Hiob 6:3; 13:4, 5; 32:2; 34:5) Kɛ̃lɛ, be ni nibii amli wa waa kɛhã lɛ po lɛ, ekwaaa Yehowa Nyɔŋmɔ. Eheee amalei ni hii etɛ lɛ ni kɛɛ amɛnaanyo ji lɛ lɛ wie lɛ eyeee. Ewie akɛ: “Ebaŋ lɛ kɔkɔɔkɔ akɛ mabu nyɛ jalɔi! Miŋmɛŋ minɔkwayeli lɛ he kɛyashi magbo!” (Hiob 27:5) Sane nɛɛ ni Hiob wie lɛ sa kadimɔ waa. Ehãa wɔnaa akɛ ekpaaa yɛ Nyɔŋmɔ sɛɛ. Enɛ ji nɔkwɛmɔnɔ kpakpa kɛhã wɔ.

10. Te sane ni Satan kɛfɔ̃ Hiob nɔ lɛ kɔɔ ohe ehãa tɛŋŋ?

10 Ŋmɛnɛ lɛ, Satan miifolɔ bo hu onaa. Ekɛɛ jeee suɔmɔ ni osumɔɔ Yehowa Nyɔŋmɔ lɛ hewɔ osɔmɔɔ lɛ ni oyeɔ lɛ anɔkwa lɛ, ni akɛ, kɛ́ onibii loo owala yaje oshãra mli lɛ, obaakwa Yehowa! (Hiob 2:4, 5; Kpo. 12:10) Te onuɔ he ohãa tɛŋŋ yɛ naafolɔmɔ nɛɛ he? Ani jeee jɛ Satan jɛɔ bo lɛ? Shi Yehowa ehã bo hegbɛ koni ohã ana faŋŋ akɛ nɔ ni Satan wieɔ lɛ bɛ mli. Eŋmɛ Satan gbɛ ni eka bo, ejaakɛ ele akɛ obaaya nɔ oye lɛ, Yehowa lɛ, anɔkwa be fɛɛ be. Enɛ ji hegbɛ ni nɔ bɛ! Nyɔŋmɔ heɔ bo eyeɔ, ni ewo shi akɛ ebaaye ebua bo. (Heb. 13:6) Bo lɛ susumɔ he okwɛ: Yehowa, jeŋ muu fɛɛ Nɔyelɔ lɛ, heɔ bo eyeɔ! Ani oona nɔ hewɔ ni ehe miihia waa ni oye lɛ anɔkwa be fɛɛ be lɛ? Kɛ́ wɔye Yehowa anɔkwa lɛ, wɔmiitse egbɛ́i lɛ he, ni wɔmiitsɔɔ akɛ wɔfiɔ enɔyeli lɛ sɛɛ. Agbɛnɛ hu, ehãa anaa akɛ Satan ji amalelɔ. No hewɔ lɛ, mɛni baaye abua wɔ ni wɔye Nyɔŋmɔ anɔkwa daa?

MƐNI BAAYE ABUA WƆ NI WƆYE NYƆŊMƆ ANƆKWA YƐ NAAGBEE GBII NƐƐ AMLI?

11. Mɛni he wɔbaasusu amrɔ nɛɛ?

11 Satan ejie ehiɛ eka Nyɔŋmɔ tsuji waa yɛ “naagbee gbii” nɛɛ amli. (2 Tim. 3:1) Mɛni baaye abua wɔ ni wɔya nɔ wɔye Nyɔŋmɔ anɔkwa yɛ bei ni mli shihilɛ wa nɛɛ amli? Wɔbaanyɛ wɔkase Hiob. Dani Satan baaka Hiob lɛ, no mli lɛ Hiob eye Nyɔŋmɔ anɔkwa afii babaoo. Amrɔ nɛɛ, wɔbaasusu nibii etɛ ni Hiob fee lɛ ahe ni wɔkwɛ bɔ ni enɛ baanyɛ ahã wɔfai shi ni wɔtswa akɛ wɔbaaye Nyɔŋmɔ anɔkwa lɛ mli awa.

Mɛni kɛ mɛni wɔbaanyɛ wɔfee koni wɔfai shi ni wɔtswa akɛ wɔbaaye Yehowa anɔkwa daa lɛ mli awa? (Kwɛmɔ kuku 12) *

12. (a) Yɛ nɔ ni aŋma yɛ Hiob 26:7, 8, 14 lɛ naa lɛ, mɛni Hiob fee ni hã eshe Yehowa gbeyei ni ebu lɛ waa? (b) Mɛni wɔbaanyɛ wɔfee koni wɔ hu wɔshe Yehowa gbeyei?

12 Hiob fee nibii ni baahã ebu Nyɔŋmɔ waa  ni eshe lɛ gbeyei, ni enɛ hã ebasumɔ Nyɔŋmɔ waa. Hiob he be kɛsusu nibii ni Yehowa ebɔ lɛ ahe. (Kanemɔ Hiob 26:7, 8, 14.) Esusu nibii tamɔ shikpɔŋ lɛ, ŋwɛi, atatui lɛ, kɛ nugbɔshiimɔi ahe, ni enɛ fɛɛ hã enaa kpɛ ehe waa. Kɛ̃lɛ, eyɔse akɛ nɔ ni ele yɛ nibii ni Yehowa ebɔ lɛ ahe lɛ shɛɛɛ nɔ ko kwraa. Agbɛnɛ hu, Hiob hiɛ sɔ Yehowa wiemɔi lɛ waa, ni ewie akɛ: “Mikɛ ewiemɔi lɛ eto tamɔ jwetri.” (Hiob 23:12) Hiob she Yehowa gbeyei ni ebu lɛ waa. Ena lɛ akɛ e-Tsɛ, esumɔ lɛ, ni eshwe akɛ efee esuɔmɔnaa nii. Enɛ hã efai shi ni etswa akɛ ebaaya nɔ eye Yehowa anɔkwa lɛ mli wa. Esa akɛ wɔkase Hiob. Ŋmɛnɛ lɛ, wɔle nibii pii yɛ nibii ni Yehowa ebɔ lɛ ahe ni mɛi ni hi shi yɛ Hiob beiaŋ lɛ leee. Agbɛnɛ hu, wɔyɛ Biblia muu lɛ fɛɛ, ni no yeɔ ebuaa wɔ ni wɔleɔ Yehowa jogbaŋŋ. Esa akɛ nibii nɛɛ fɛɛ ahã wɔshe Yehowa gbeyei ni wɔbu lɛ waa. Kɛ́ wɔfee nakai lɛ, ebaatsirɛ wɔ ni wɔsumɔ lɛ, wɔbo lɛ toi, ni wɔtswa wɔfai shi waa akɛ wɔbaaye lɛ anɔkwa daa.​—Hiob 28:28.

Kɛ́ wɔkwɛɛɛ ponografi lɛ, wɔfai shi ni wɔtswa akɛ wɔbaaye Nyɔŋmɔ anɔkwa lɛ mli baawa (Kwɛmɔ kuku 13) *

13-14. (a) Mɛni Hiob 31:1 lɛ hãa wɔnaa akɛ Hiob fee ni tsɔɔ akɛ eboɔ Nyɔŋmɔ toi? (b) Te wɔbaafee tɛŋŋ wɔkase Hiob?

13 Hiob bo Nyɔŋmɔ toi yɛ nɔ fɛɛ nɔ mli, ni no hã efai shi ni etswa akɛ ebaaye Nyɔŋmɔ anɔkwa lɛ mli wa. Hiob le akɛ, ja ebo Nyɔŋmɔ toi dani ebaanyɛ eye lɛ anɔkwa. Be fɛɛ be ni wɔbaabo Nyɔŋmɔ toi lɛ, wɔfai shi ni wɔtswa akɛ wɔbaaye lɛ anɔkwa lɛ mli waa. Hiob mia ehiɛ waa akɛ ebaabo Nyɔŋmɔ toi yɛ nibii fɛɛ ni efeɔ lɛ amli. Akɛ nɔkwɛmɔnɔ lɛ, ekwɛ jogbaŋŋ yɛ bɔ ni ekɛ yei sharaa ehãa lɛ he. (Kanemɔ Hiob 31:1.) Akɛni eyɛ ŋa hewɔ lɛ, ena akɛ ejaaa akɛ ebaaná yei krokomɛi ahe suɔmɔ. Ŋmɛnɛ lɛ, he fɛɛ he ni obaatsɔ yɛ je lɛ mli lɛ, obaana loo obaanu nɔ ko ni kɔɔ bɔlɛnamɔ he. Ani bo hu otswa ofai shi akɛ onáŋ mɔ ko ni jeee ohefatalɔ lɛ he suɔmɔ? Ani otswa ofai shi akɛ okwɛŋ ponografi loo mfonirii ni teɔ bɔlɛnamɔ akɔnɔ shi, kɛ́ yɛ TV nɔ jio, woji amli jio, he kroko jio? (Mat. 5:28) Kɛ́ wɔmia wɔhiɛ wɔye wɔhe nɔ daa gbi lɛ, wɔfai shi ni wɔtswa akɛ wɔbaaye Yehowa anɔkwa lɛ mli baawa.

Kɛ́ wɔtiuuu heloonaa nibii asɛɛ lɛ, wɔfai shi ni wɔtswa akɛ wɔbaaye Nyɔŋmɔ anɔkwa lɛ mli baawa (Kwɛmɔ kuku 14) *

 14 Bɔ ni Hiob na heloonaa nibii ehã lɛ hu hãa wɔnaa akɛ ebo Yehowa toi. Eyɔse akɛ kɛji ekɛ ehiɛ fɔ̃ nibii ni eyɔɔ lɛ anɔ lɛ, esa akɛ agbala etoi, ejaakɛ eji tɔmɔ ni yɔɔ hiɛdɔɔ. (Hiob 31:24, 25, 28) Ŋmɛnɛ lɛ, heloonaa nibii ehe mɛi pii ni yɔɔ je lɛŋ lɛ ajwɛŋmɔ kɛ amɛtsui fɛɛ. Kɛ́ wɔná jwɛŋmɔ ni ja yɛ shika kɛ heloonaa nibii ahe, tamɔ bɔ ni Biblia lɛ woɔ wɔ hewalɛ ni wɔfee lɛ, wɔfai shi ni wɔtswa akɛ wɔbaaye Yehowa anɔkwa daa lɛ mli baawa.​—Abɛi 30:8, 9; Mat. 6:19-21.

Kɛ́ wɔhãaa wɔhiɛ aje wɔhiɛnɔkamɔ lɛ nɔ lɛ, wɔfai shi ni wɔtswa akɛ wɔbaaye Nyɔŋmɔ anɔkwa lɛ mli baawa (Kwɛmɔ kuku 15) *

15. (a) Mɛɛ hiɛnɔkamɔ ye ebua Hiob ni etee nɔ eye Nyɔŋmɔ anɔkwa? (b) Kɛ́ wɔhã nibii kpakpai ni Yehowa ewo shi akɛ ebaahã wɔ lɛ hi wɔjwɛŋmɔŋ lɛ, mɛɛ gbɛ nɔ no baanyɛ aye abua wɔ?

15 Hiob he eye akɛ Nyɔŋmɔ baajwere lɛ, ni hiɛnɔkamɔ nɛɛ ye ebua lɛ ni etee nɔ eye Nyɔŋmɔ anɔkwa. Hiob he eye akɛ Nyɔŋmɔ naa anɔkwa ni eyeɔ lɛ lɛ, ni ehiɛ sɔɔ. (Hiob 31:6) Yɛ kai kɛ naagbai ni ekɛkpe lɛ fɛɛ sɛɛ lɛ, ehe eye akɛ wɔsɛɛ ko lɛ, Yehowa baajwere lɛ. Ekã shi faŋŋ akɛ, enɛ ye ebua lɛ ni etee nɔ eye Nyɔŋmɔ anɔkwa. Yehowa ná anɔkwa ni Hiob ye lɛ lɛ he miishɛɛ waa aahu akɛ, ejɔɔ lɛ waa, eyɛ mli akɛ no mli lɛ Hiob kã he eji adesa ni yeee emuu. (Hiob 42:12-17; Yak. 5:11) Wɔsɛɛ lɛ, Yehowa baajɔɔ Hiob waa fe bɔ ni ejɔɔ lɛ yɛ blema lɛ po. Ani oheɔ oyeɔ kɛ otsui fɛɛ akɛ Yehowa baajwere bo yɛ anɔkwa ni oyeɔ lɛ lɛ hewɔ? Nyɔŋmɔ tsakeko. (Mal. 3:6) Kɛ́ wɔhã ehi wɔjwɛŋmɔŋ akɛ, ehiɛ sɔɔ wɔ waa yɛ anɔkwa ni wɔyeɔ lɛ lɛ hewɔ lɛ, no baahã hiɛnɔkamɔ ni mli wa ni wɔyɔɔ akɛ wɔsɛɛ lɛ ebaajwere wɔ lɛ mli awa daa.​—1 Tes. 5:8, 9.

16. Mɛni esa akɛ wɔtswa wɔfai shi akɛ wɔbaafee?

16 Tswaa ofai shi akɛ obaaye Yehowa anɔkwa daa! Bei komɛi lɛ, ekolɛ obaanu he akɛ bo pɛ ji Yehowa tsulɔ anɔkwafo ni eshwɛ yɛ shikpɔŋ lɛ nɔ. Shi kaimɔ akɛ, oyɛ nyɛmimɛi akpekpei abɔ yɛ jeŋ fɛɛ ni amɛ hu amɛmiiye Yehowa anɔkwa. Agbɛnɛ hu, kaahã ohiɛ kpa nɔ akɛ, kɛ́ oye Nyɔŋmɔ anɔkwa lɛ, belɛ ookase Nyɔŋmɔ tsuji pii ni hi shi yɛ blema ni tswa amɛfai shi akɛ, kɛ́ gbe abaagbe amɛ po lɛ, amɛbaaye Nyɔŋmɔ anɔkwa lɛ. (Heb. 11:36-38; 12:1) Hiob wie akɛ ‘eŋmɛŋ enɔkwayeli lɛ he.’ Nyɛhãa wɔ fɛɛ wɔtswaa wɔfai shi akɛ, wɔbaakase lɛ ni wɔ hu wɔye Nyɔŋmɔ anɔkwa daa. Kɛ́ wɔfee nakai lɛ, ebaawo Yehowa hiɛ nyam ŋmɛnɛ kɛ daa!

LALA 124 Ye Anɔkwa Daa!

^ kk. 5 Kɛ́ akɛɛ wɔye Yehowa anɔkwa lɛ, te atsɔɔ tɛŋŋ? Mɛni hewɔ Yehowa miisumɔ ni etsuji aye lɛ anɔkwa? Mɛni hewɔ ehe miihia ni wɔteŋ mɔ fɛɛ mɔ aye Yehowa anɔkwa? Yɛ nikasemɔ nɛɛ mli lɛ, wɔbaajɛ Ŋmalɛ lɛ mli wɔhã sanebimɔi nɛɛ hetoo. Agbɛnɛ hu, wɔbaana nibii ni esa akɛ wɔfee koni wɔfai shi ni wɔtswa akɛ wɔbaaye Yehowa anɔkwa daa lɛ mli awa. Kɛ́ wɔye Yehowa anɔkwa lɛ, ebaajɔɔ wɔ waa.

^ kk. 3 Hebri wiemɔ ni atsɔɔ shishi akɛ ‘kpa ko bɛ he’ kɛ́ aawie kooloi ahe lɛ kɛ Hebri wiemɔ ni bei komɛi lɛ atsɔɔ shishi akɛ “anɔkwayeli” kɛ́ aawie gbɔmɛi ahe lɛ yɛ tsakpãa.

^ kk. 50 MFONIRI LƐ HE SANE: Wɔmiina Hiob bii lɛ ekomɛi agbekɛbiiashi be ni etsɔɔ amɛ nibii ni Yehowa ebɔ lɛ ahe nii lɛ.

^ kk. 52 MFONIRI LƐ HE SANE: Nyɛmi nuu ko yɛ nitsumɔhe ni mɛi ni ekɛtsuɔ nii lɛ miitsɛ lɛ ni eba ni amɛkwɛ ponografi, shi eyaaa.

^ kk. 54 MFONIRI LƐ HE SANE: Aakɔne nyɛmi nuu ko yiŋ ni ehé TV agbo ko ni jara wa ni he ehiaaa lɛ, shi ekpɛlɛɛɛ ni ebaahé.

^ kk. 56 MFONIRI LƐ HE SANE: Nyɛmi nuu ko ehe be kɛmiijwɛŋ Paradeiso ni baaba wɔsɛɛ lɛ he ni eesɔle.