Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 WALA SHIHILƐ HE SANE

Mifɔlɔi Wa Mi Ni Mitee Mihiɛ Yɛ Yehowa Sɔɔmɔ Lɛ Mli

Mifɔlɔi Wa Mi Ni Mitee Mihiɛ Yɛ Yehowa Sɔɔmɔ Lɛ Mli

NIGER FAA lɛ foo yɛ oshãra waa, ejaakɛ faa lɛ da, ehoɔ oya waa diɛŋtsɛ, ni elɛɛ fe kilomita kome kɛ fã. Be ni awuɔ ta lɛ yɛ Nigeria lɛ, faa lɛ foo bafee oshãra fe bɔ ni eji momo lɛ po, ejaakɛ kɛ́ ana ni oofo lɛ, abaanyɛ agbe bo. Kɛ̃lɛ, ehe bahia ni wɔfo faa nɛɛ shii abɔ. Mɛni hewɔ? Dani mahã sanebimɔ nɛɛ hetoo lɛ, hã magba bo mipapa kɛ mimami he sane fioo.

Abaptisi mipapa, John Mills, yɛ New York City, yɛ afi 1913 be ni eye afii 25. Nyɛminuu Russell ni hã baptisimɔ wiemɔ lɛ. No sɛɛ etsɛɛɛ lɛ, mipapa tee Trinidad, ni ekɛ Biblia Kaselɔ ko ni bɔɔ mɔdɛŋ waa ni atsɛɔ lɛ Constance Farmer lɛ bote gbalashihilɛ mli. No mli lɛ, mipapa naanyo ko ni atsɛɔ lɛ William R. Brown lɛ jieɔ “Photo-Drama of Creation” lɛ etsɔɔ mɛi, ni mipapa ye ebua lɛ kɛ nitsumɔ nɛɛ aahu kɛyashi ahã Nyɛminuu Brown kɛ ehefatalɔ lɛ yasɔmɔ yɛ Afrika Anaigbɛ yɛ afi 1923. Mipapa kɛ mimami tee nɔ amɛhi Trinidad. Amɛyi enyɔ lɛ fɛɛ yɛ hiɛnɔkamɔ akɛ amɛbaaya ŋwɛi.

WƆFƆLƆI JIE SUƆMƆ KPO AMƐTSƆƆ WƆ

Mifɔlɔi fɔ bii nɛɛhu, ni miji mɔ ni ji enyɔ nɔ. Amɛkɛ Nyɛminuu Rutherford, ni ji Watch Tower Bible and Tract Society lɛ sɛinɔtalɔ yɛ nakai beiaŋ lɛ gbɛ́i wo minyɛmi nukpa lɛ. Be ni amɛfɔ mi yɛ December 30, 1922 lɛ, amɛkɛ Clayton J. Woodworth gbɛ́i Woodworth lɛ wo mi. No mli lɛ, Nyɛminuu Woodworth ji mɔ ni toɔ saji ni jeɔ kpo yɛ The Golden Age lɛ (ni amrɔ nɛɛ atsɛɔ lɛ Awake! lɛ) mli lɛ ahe gbɛjianɔ. Wɔfɔlɔi hã wɔ fɛɛ wɔtee skul fioo, shi amɛwo wɔ hewalɛ waa ni wɔtiu mumɔŋ otii asɛɛ. Mimami nyɛɔ ekɛ mɔ susuɔ saji ahe kɛjɛɔ Ŋmalɛ lɛ mli ni ehãa mɔ yiŋ tsɔɔ; anɔkwa, ehe esa waa kɛ enɛ feemɔ. Mipapa hu sumɔɔ ni egba wɔ Biblia mli saji, ni kɛ́ eegba wɔ lɛ, ekɛ egbɔmɔtso lɛ fãi lɛ fɛɛ tsuɔ nii koni wɔna bɔ ni nibii tee lɛ hã lɛ jogbaŋŋ.

Amɛmɔdɛŋbɔɔ lɛ wo yibii waa. Mi kɛ minyɛmimɛi hii enyɔ ná hegbɛ wɔtee Gilead Skul lɛ eko. Wɔnyɛmimɛi yei lɛ ateŋ mɛi etɛ hu tsu gbɛgbamɔ nitsumɔ lɛ afii babaoo yɛ Trinidad and Tobago. Nibii ni wɔfɔlɔi tsɔɔ wɔ, nɔkwɛmɔnɔ kpakpa ni amɛfee, kɛ bɔ ni amɛwo wɔ hewalɛ lɛ, hã wɔhi “Yehowa shĩa lɛ,” ni wɔtee nɔ wɔwo yibii “yɛ wɔ-Nyɔŋmɔ lɛ kpoi lɛ anɔ.”​—Lala 92:13.

Wɔshĩa lɛ bafee he ni bei pii lɛ, ajɛɔ atoɔ shiɛmɔ nitsumɔ lɛ he gbɛjianɔ. Nakai beiaŋ lɛ, kɛ́ gbɛgbalɔi lɛ kpa shiɛmɔ lɛ, amɛbabuaa amɛhe naa yɛ wɔshĩa lɛ ni amɛgbaa maŋsɛɛ sɔɔlɔ ko ni atsɛɔ lɛ George Young lɛ he sane. Nyɛmi nuu nɛɛ jɛ Canada  ni ebasara wɔ yɛ Trinidad. Agbɛnɛ hu, mifɔlɔi kɛ miishɛɛ wie nitsumɔ kpakpa ni Nyɛminuu Brown kɛ eŋa ni no mli lɛ amɛsɔmɔɔ yɛ Afrika Anaigbɛ lɛ tsuɔ lɛ he. Nibii nɛɛ fɛɛ wo mi hewalɛ ni mije shiɛmɔ nitsumɔ lɛ shishi be ni miye afii nyɔŋma.

MIBLAHIIAŊ KƐYASHI MIBOTE GBALASHIHILƐ MLI

Nakai beiaŋ lɛ, wɔmagazin lɛ wieɔ eshiɔ amale jamɔi, jarayelɔi shishiulɔi, kɛ maŋkwramɔŋ gbɛjianɔtoi ni yeee anɔkwa lɛ waa. Enɛ hewɔ lɛ, yɛ afi 1936 lɛ, osɔfoi lɛ wo Trinidad maŋ hiɛnyiɛlɔ lɛ yiŋ koni ehã akɛ asafo lɛ woji lɛ fɛɛ akpa nitsumɔ yɛ maŋ lɛ mli, ni akashɛ eko kɛba maŋ lɛ mli dɔŋŋ. No hewɔ lɛ, wɔkɛ woji lɛ yatee, shi wɔtee nɔ wɔkɛtsu nii kɛyashi fɛɛ tã. Wɔjara ninefɔɔ woji, ni wɔtsotsoro taoi ni aŋmala nibii yɛ nɔ kɛnyiɛ kɛkpa maŋ lɛ mli, ni bei komɛi hu lɛ, wɔtaa baisiko kɛfeɔ nakai. Nyɛmimɛi komɛi ni jɛ Tunapuna maŋ lɛ mli lɛ kɛ tsɔne ni akɛ spika agbo ewo yiteŋ fã gbɛ amɛyashiɛ yɛ hei ni yɔɔ shɔŋŋshɔŋŋ yɛ Trinidad, ni wɔweku lɛ fata amɛhe kɛtee. Wɔná miishɛɛ waa! Ekãa ni nyɛmimɛi lɛ yɔɔ lɛ wo mi hewalɛ waa, no hewɔ lɛ, be ni miye afii 16 lɛ, mihã abaptisi mi.

Nyɛmimɛi ni jɛ Tunapuna lɛ kɛ tsɔne ni amɛkɛyashiɛ lɛ

Hiɛdɔɔ ni miweku lɛ kɛsɔmɔɔ Yehowa lɛ, kɛ niiashikpamɔi kpakpai ni miná yɛ migbekɛbiiashi lɛ hã mishwe waa akɛ matsɔ maŋsɛɛ sɔɔlɔ. Nakai shwelɛ lɛ yɛ mitsui mli lolo be ni miyafata Nyɛminuu Edmund W. Cummings he yɛ Aruba ŋshɔkpɔ lɛ nɔ yɛ afi 1944 lɛ. Wɔná mɛi nyɔŋma ba Kaimɔ lɛ yɛ afi 1945, ni enɛ hã wɔmii shɛ wɔhe waa. Enɔ afi lɛ, atse klɛŋklɛŋ asafo yɛ jɛmɛ.

Be ni Oris batsɔ mihefatalɔ lɛ, mishihilɛ tsake kwraa

No sɛɛ etsɛɛɛ lɛ, miye oblayoo ko ni mikɛtsuɔ nii ni atsɛɔ lɛ Oris Williams lɛ odase. Shishijee lɛ, Oris sumɔɔɔ ni ekpɛlɛɔ nɔ akɛ nibii ni atsɔɔ lɛ lɛ ejaaa, ni ekɛ mi taa saji anaa waa. Shi be ni ekase Biblia lɛ, ebana akɛ nɔ ni Nyɔŋmɔ Wiemɔ lɛ kɛɔ lɛ ji anɔkwale, ni yɛ January 5, 1947 lɛ, abaptisi lɛ. Sɛɛ mli lɛ, wɔbasumɔ wɔhe, ni wɔbote gbalashihilɛ mli. Eje gbɛgbamɔ nitsumɔ lɛ shishi yɛ November 1950. Be ni Oris batsɔ mihefatalɔ lɛ, mishihilɛ tsake kwraa.

WƆSƆMƆ KƐ MIISHƐƐ YƐ NIGERIA

Yɛ afi 1955 lɛ, afɔ̃ wɔ nine akɛ wɔba Gilead Skul lɛ. No hewɔ lɛ, mi kɛ Oris kpa nitsumɔi ni wɔtsuɔ lɛ, wɔhɔ̃ɔ wɔshĩa lɛ kɛ wɔnibii krokomɛi, ni wɔshi Aruba. Wɔklas lɛ ji klas ni ji 27 nɔ lɛ, ni wɔgbe skul lɛ naa July 29, 1956. Be ni wɔgbe naa lɛ, akɛ wɔ tee Nigeria.

Wɔ kɛ Betel weku lɛ sha mfoniri nɛɛ yɛ Lagos, yɛ Nigeria, yɛ afi 1957

Oris wie akɛ: “Yehowa mumɔ lɛ yeɔ ebuaa maŋsɛɛ sɔɔlɔi ni amɛnyɛɔ amɛdamɔɔ naagbai ni amɛkɛkpeɔ lɛ anaa. Eyɛ mli akɛ miwu sumɔɔ maŋsɛɛ sɔɔmɔ nitsumɔ lɛ moŋ, shi no mli lɛ, mi lɛ misumɔɔɔ. Kulɛ miitao mafɔ ni mato weku shishi. Shi be ni mibana akɛ ehe miihia waa ni ashiɛ sane kpakpa lɛ shi be ni eshwɛ lɛ faaa dɔŋŋ lɛ, mitsake mijwɛŋmɔ. Nibii ni wɔkase yɛ Gilead Skul lɛ saa mi jogbaŋŋ koni manyɛ masɔmɔ akɛ maŋsɛɛ sɔɔlɔ. Wɔkɛ meele ko ni atsɛɔ lɛ Queen Mary lɛ ni fã gbɛ kɛtee he ni akɛɛ wɔyasɔmɔ yɛ lɛ. Nyɛmi nuu ko ni tsuɔ nii yɛ Nyɛminuu Knorr ɔfis lɛ, ni atsɛɔ lɛ Worth Thornton lɛ bajie wɔ gbɛ, ni ehã wɔle akɛ wɔbaayasɔmɔ yɛ Betel. Mináaa he miishɛɛ kwraa, ejaakɛ no mli lɛ, misumɔɔɔ ni miyasɔmɔɔ yɛ Betel. Shi be ni wɔyashɛ ni mibɔi sɔɔmɔ lɛ, mibanya he waa. Mitsu nitsumɔi srɔtoi, ni amɛteŋ nɔ ni minya he fe fɛɛ ji, be ni mitsuɔ nii akɛ mɔ ko ni hereɔ gbɔi lɛ. Misumɔɔ gbɔmɔ, ni nitsumɔ nɛɛ hã miná hegbɛ mikɛ nyɛmimɛi ni yɔɔ Nigeria lɛ ateŋ mɛi pii shara. Amɛteŋ mɛi pii yɛ ni be ni amɛbaashɛ nitsumɔhe nine lɛ, amɛhe fɛɛ efee mulu, etɔ amɛ bliboo, ni hɔmɔ kɛ kumai miiye amɛ. Miná he miishɛɛ waa akɛ mahere amɛ hiɛmɛɛ ni mahã amɛnu he akɛ amɛba shĩa. Fɛɛ fata Yehowa sɔɔmɔ lɛ he, ni enɛ hã miná miishɛɛ ni mitsui nyɔ mimli.” Nitsumɔ fɛɛ nitsumɔ ni akɛhã wɔ lɛ hã wɔnyɛ wɔwo yibii yɛ Yehowa sɔɔmɔ lɛ mli.

Yɛ afi 1961 lɛ, wɔweku lɛ fee henaabuamɔ fioo ko yɛ Trinidad, ni wɔfɔ̃ Nyɛminuu Brown nine. Egba wɔ niiashikpamɔi ni yɔɔ miishɛɛ ni ená be ni esɔmɔɔ yɛ Afrika lɛ. Kɛkɛ ni mi hu miwie bɔ ni nitsumɔ lɛ shwereɔ yɛ Nigeria lɛ he. Nyɛminuu Brown kɛ enine fɔ̃ mikɔɔŋ nɔ, ni ekɛɛ mipapa akɛ: “Johnny, onáaa oya Afrika, shi Woodworth enyɛ etee!” Mipapa here nɔ akɛ: “Worth, yaa fɛɛ! Kaakwɛ osɛɛ!” Hewalɛwoo wiemɔi nɛɛ hã shwelɛ ni miyɔɔ akɛ matsu misɔɔmɔ lɛ he nii jogbaŋŋ kɛmɔ shi lɛ mli wa waa.

William “Bible” Brown kɛ eŋa, Antonia, wo wɔ hewalɛ waa

Yɛ afi 1962 lɛ, miná hegbɛ mitee Gilead Skul lɛ klas ni ji 37 nɔ lɛ, ni ehe nyɔji nyɔŋma. Nyɛminuu Wilfred Gooch, ni no mli lɛ esɔmɔɔ akɛ Nigeria nitsumɔhe nine lɛ nɔkwɛlɔ lɛ tee Gilead Skul lɛ klas ni ji 38 nɔ lɛ, ni ajie lɛ kɛtee England. No hewɔ lɛ,  ahã miye enajiaŋ akɛ Nigeria nitsumɔhe nine lɛ nɔkwɛlɔ. Tamɔ bɔ ni Nyɛminuu Brown fee lɛ, mi hu mifã gbɛ waa kɛtee Nigeria hei srɔtoisrɔtoi, ni enɛ hã mibale nyɛmimɛi lɛ jogbaŋŋ ni mibasumɔ amɛsane waa. Eyɛ mli akɛ nyɛmimɛi nɛɛ ateŋ mɛi pii bɛ nɔ ko tsɔ yɛ heloŋ gbɛfaŋ moŋ, shi miishɛɛ ni amɛyɔɔ lɛ kɛ bɔ ni amɛmii shɛ nii ni amɛyɔɔ lɛ he lɛ ye odase akɛ, jeee shika kɛ heloonaa nibii ni hãa mɔ náa miishɛɛ yɛ shihilɛ mli. Be fɛɛ be ni nyɛmimɛi lɛ baaba Kristofoi akpeei lɛ, atadei ni amɛwo lɛ he tse ni eyɛ fɛo, ni amɛhesaamɔ lɛ hu yɛ hiŋmɛi nɔ. Enɛ hã miná miishɛɛ waa, titri lɛ kɛ́ misusu shihilɛ mli ni amɛteŋ mɛi pii yɔɔ lɛ he. Kɛ́ aaya kpee lɛ, amɛteŋ mɛi pii taa bolekaja * loo tso lɔle (nɔ ni wɔtsɛɔ lɛ arooglas lɛ) mli kɛyaa. Bei pii lɛ, saji ni aŋmala yɛ tsɔji nɛɛ ahe lɛ yɛ miishɛɛ waa. Be ko lɛ, mina ni aŋma yɛ eko he akɛ: “Little drops of water make a mighty ocean” (yɛ Ga mli lɛ, “Ekomefeemɔ lɛ, no mli hewalɛ yɔɔ”).

Sane nɛɛ ji anɔkwale shiishi! Fioo ni wɔ fɛɛ wɔtsuɔ lɛ ji nɔ ni kɛ́ abua naa lɛ efeɔ pii lɛ. No hewɔ lɛ, wɔ hu wɔtsu nɔ ni wɔbaanyɛ. Be ni shɛɔ afi 1974 lɛ, aná shiɛlɔi fe 100,000 yɛ Nigeria. Anɔkwa, kɛ́ ajie United States kɛje mli lɛ, Nigeria ji klɛŋklɛŋ maŋ ni ná shiɛlɔi ayifalɛ nakai. Nitsumɔ lɛ shwere diɛŋtsɛ!

Awu ta yɛ Nigeria kɛjɛ afi 1967 kɛyashi afi 1970. Ta lɛ hewɔ lɛ, wɔnyɛmimɛi ni yɔɔ Biafra, yɛ Niger Faa lɛ sɛɛ lɛ nyɛɛɛ amɛkɛ nibii amaje nitsumɔhe nine lɛ, ni nitsumɔhe nine lɛ hu nyɛɛɛ ekɛ nibii amaje amɛ. No hewɔ lɛ, eyɛ mli akɛ eyɛ oshãra moŋ, shi ehe bahia ni wɔya jɛmɛ ni wɔkɛ asafo lɛ woji kɛ nibii krokomɛi ayahã amɛ. Wɔsɔle ni wɔkɛ wɔhiɛ fɔ̃ Yehowa nɔ, ni wɔfo faa lɛ kɛtee jɛmɛ shii abɔ, tamɔ bɔ ni miwie yɛ sane nɛɛ shishijee lɛ.

Asraafoi ni yɔɔ faa lɛ biɛ kɛ biɛ lɛ fɛɛ ahiɛ yɛ laŋlaŋ, titri lɛ amɛteŋ mɛi ni yɔɔ Biafra gbɛ lɛ. Agbɛnɛ hu, kooloi bibii ni baanyɛ awo mɔ hela yɛ faa lɛ mli. Enɛ kɛ nibii krokomɛi ji nɔ ni hã faa lɛ foo fee oshãra lɛ. Mikaiɔ akɛ, gbɛkɛ ko lɛ, mikwɔ lɛlɛ bibioo ko yɛ Asaba kɛfo faa ni hoɔ oya nɛɛ kɛtee Onitsha koni miyawo nɔkwɛlɔi ni yɔɔ Enugu lɛ hewalɛ. Be kroko hu lɛ, mifo faa lɛ kɛtee Aba ni miyawo asafoŋ onukpai ni yɔɔ jɛmɛ lɛ hewalɛ. Nakai beiaŋ lɛ, asraafoi lɛ eŋmɛɛɛ gbɛ ni asu kane yɛ jɛmɛ kɛ́ je na. Be ko be ni mikɛ asafoŋ onukpai lɛ kpe yɛ Port Harcourt lɛ, ehe bahia ni wɔfo wɔkpee lɛ nɔ kuku, ni wɔsɔle kɛmu naa oya, ejaakɛ Nigeria nɔyeli lɛ asraafoi lɛ kɛ Biafra asraafoi lɛ kɛshwã shi yɛ maŋ lɛ klotia lɛ.

Saramɔi nɛɛ ye ebua wɔnyɛmimɛi Kristofoi nɛɛ ni amɛna akɛ Yehowa sumɔɔ amɛsane ni esusuɔ amɛhe. Ta lɛ hewɔ lɛ, ehe bahia ni amɛkwɛ jogbaŋŋ ni amɛkɛ amɛhe akawo maŋkwramɔŋ saji amli, ni agbɛnɛ hu amɛhã ekomefeemɔ ahi amɛteŋ, ni wɔná hegbɛ wɔwo amɛ ŋaa yɛ enɛ he be ni wɔyasara amɛ lɛ. Dromɔ naa lɛ, wɔnyɛmimɛi ni yɔɔ Nigeria lɛ nyɛ amɛtsɔ ta gbeyeigbeyei nɛɛ mli. Amɛhãaa ekomefeemɔ ni yɔɔ amɛteŋ lɛ afite, ni amɛkɛ amɛnifeemɔ tsɔɔ akɛ amɛsumɔɔ amɛnyɛmimɛi lɛ fɛɛ ekɔɔɔ he eko weku mli ni amɛjɛ. Eji hegbɛ kpele ni wɔná akɛ wɔbaahi amɛmasɛi be ni amɛkɛ kaa nɛɛ kpeɔ lɛ!

Yɛ afi 1969 lɛ, afee majimaji ateŋ kpee ko ni yitso ji, “Toiŋjɔlɛ Yɛ Shikpɔŋ Nɔ,” yɛ Yankee Stadium, yɛ New York. Nyɛminuu Milton G. Henschel ji mɔ ni kwɛ nakai kpee lɛ nɔ, ni misɔmɔ akɛ esɛɛkwɛlɔ. Nibii ni mikase yɛ edɛŋ yɛ nakai kpee lɛ shishi lɛ ye ebua mi waa be ni wɔfee “Mɛi Ni Yɔɔ Ehiɛ Dromɔ” Majimaji Ateŋ Kpee lɛ yɛ Lagos, yɛ Nigeria, yɛ afi 1970 lɛ. Awu ta lɛ agbe naa etsɛɛɛ ni wɔfee kpee lɛ, ni eji Yehowa yeee ebuaaa wɔ kulɛ, wɔnyɛŋ wɔfee. Wɔfee yɛ wiemɔi 17 sɔŋŋ amli, ni mɛi 121,128 ba eko. Kɛbashi nakai beiaŋ lɛ, afeko kpee ko yɛ wiemɔi babaoo amli nakai dã. Asafo lɛ hai kɔɔyɔŋ lɛlɛ ni ewo Nyɛminuu Knorr, Nyɛminuu Henschel, kɛ mɛi krokomɛi kɛjɛ United States kɛ England kɛba kpee lɛ. Abaptisi mɛi 3,775, ni kɛjɛ Pentekoste gbi lɛ nɔ lɛ, kpeei fioo pɛ afee ni abaptisi mɛi pii nakai! Miyitsei ahe dɔ waa kɛ kpee lɛ he gbɛjianɔtoo. Mikpaaa shi akɛ miyitsei ahe edɔ nakai pɛŋ! Wɔshwere oyayaayai diɛŋtsɛ!

Mɛi 121,128 ba “Mɛi Ni Yɔɔ Ehiɛ Dromɔ” Majimaji Ateŋ Kpee lɛ ni afee yɛ wiemɔi 17 amli lɛ, ni wiemɔi nɛɛ ateŋ ekome ji, Ibo

Miye afii 30 kɛ sɛɛ yɛ Nigeria, ni misɔmɔ yɛ be kɛ beiaŋ akɛ nɔkwɛlɔ gbɛfalɔ. Agbɛnɛ hu, ahã miyasara nyɛmimɛi ni yɔɔ maji ni yɔɔ Afrika Anaigbɛ lɛ akɛ nitsumɔhe yitso najiaŋdamɔlɔ. Kɛ́ mitee lɛ, misaraa maŋsɛɛ sɔɔlɔi lɛ, miwoɔ amɛ hewalɛ, ni mihãa amɛleɔ akɛ asusuɔ amɛhe ni hiɛ kpako amɛnɔ. Amɛhiɛ sɔ enɛ waa, ni mi hu miná miishɛɛ waa. Nitsumɔ nɛɛ hã mina akɛ, nɔ kome ni he hiaa waa ni yeɔ ebuaa mɛi koni amɛya amɛhiɛ yɛ Nyɔŋmɔ sɔɔmɔ lɛ mli, ni ekomefeemɔ kɛ suɔmɔ ahi Yehowa asafo lɛ mli ji, ni wɔbaahã mɛi ana akɛ asusuɔ amɛhe.

 Yehowa pɛ yelikɛbuamɔ naa wɔnyɛ wɔdamɔ naagbai ni ta lɛ kɛba lɛ kɛ helai bibii ni mɔmɔ wɔ lɛ anaa. Be fɛɛ be lɛ, wɔnaa Yehowa nine yɛ wɔshihilɛ mli. Oris wie akɛ:

“Atridii mɔmɔ wɔ shii abɔ. Be ko be ni atridii lɛ eko mɔ Worth nakai lɛ, nɔ nyɔ enɔ ni akɛ lɛ yafɔ̃ helatsamɔhe yɛ Lagos. Akɛɛ mi akɛ ebaagbo, shi dromɔ naa lɛ, ehe wa lɛ! Be ni ehiɛ tserɛ lɛ lɛ, ekɛ Owula Nwambiwe, ni ji nɛɛsifonyo ni kwɛɔ lɛ lɛ bɔi Nyɔŋmɔ Maŋtsɛyeli lɛ he sane gbaa. Sɛɛ mli lɛ, mi kɛ lɛ tee ni wɔyasara nɛɛsifonyo nɛɛ ni wɔkɛ lɛ tsa Biblia mli sane ni ekɛ lɛ gba lɛ nɔ. Ekpɛlɛ anɔkwale lɛ nɔ, ni sɛɛ mli lɛ ebatsɔ asafoŋ onukpa yɛ asafo ko ni yɔɔ Aba lɛ mli. Mi hu minyɛ miye Muslimbii pii odase, ni amɛteŋ mɛi komɛi batsɔmɔ Yehowa sɔɔlɔi. Amɛteŋ mɛi komɛi po yɛ ni no mli lɛ, amɛkɛ amɛhe ewo jamɔ lɛ mli vii diɛŋtsɛ. Shi nɔ kome ni hã wɔná miishɛɛ waa ji, bɔ ni wɔbale Nigeriabii lɛ, amɛkusum, amɛhesaamɔ, amɛwiemɔ, kɛ nibii krokomɛi ni tamɔ nakai lɛ jogbaŋŋ lɛ, ni enɛ hã wɔbasumɔ amɛsane waa.”

Nɔ ni wɔkase yɛ enɛ mli ji akɛ, eyɛ mli akɛ ekolɛ ebaasoro bɔ ni wɔhiɔ shi wɔhãa loo bɔ ni atsɔse wɔ ahã lɛ kwraa yɛ bɔ ni mɛi ni yɔɔ maŋ nɔ ni wɔsɔmɔɔ yɛ lɛ hiɔ shi amɛhãa lɛ he moŋ, shi ja wɔsumɔ amɛ dani wɔbaawo yibii yɛ wɔsɔɔmɔ lɛ mli.

AHÃ WƆYASƆMƆ YƐ HEI KROKOMƐI

Yɛ afi 1987 lɛ, ajie wɔ yɛ Nigeria Betel, ni ahã wɔyasɔmɔ akɛ maŋsɛɛ sɔɔlɔi yɛ ŋshɔkpɔ fɛfɛo ko ni yɔɔ Caribbean niiaŋ ni atsɛɔ lɛ St. Lucia lɛ nɔ. Wɔná miishɛɛ waa, shi wɔkɛ naagbai hei kpe. Akɛ nɔkwɛmɔnɔ lɛ, naagba kome ni wɔná yɛ Afrika ji akɛ, nuu kome nyɛɔ ekɛ yei pii boteɔ gbalashihilɛ mli, shi yɛ St. Lucia lɛ, naagba ni wɔná ji akɛ, mɛi hiɔ shi akɛ wu kɛ ŋa tsɛbelɛ amɛboteko gbalashihilɛ mli. Wɔkɛ Nyɔŋmɔ Wiemɔ lɛ ye wɔbua wɔ-Biblia mli nikaselɔi lɛ, ni amɛteŋ mɛi pii fee tsakemɔi ni sa lɛ.

Mi kɛ Oris hi shi akɛ wu kɛ ŋa afii 68, ni suɔmɔ ni miyɔɔ kɛhã lɛ lɛ nɔ gbɔɔɔ

Yɛ afi 2005 lɛ, Gbɛtsɔɔmɔ Kuu lɛ hã wɔbɔi sɔɔmɔ yɛ nitsumɔhe yitso lɛ yɛ Brooklyn, yɛ New York, yɛ U.S.A., ejaakɛ no mli lɛ wɔbɔi gbɔlɔmɔ ni wɔhewalɛ ebɔi tãa. Enɛ hã wɔna akɛ amɛsumɔɔ wɔsane waa. Midaa Yehowa shi daa akɛ edro mi Oris. Shi yɛ afi 2015 lɛ, gbele baŋɔ lɛ kɛtee ni minu he waa. Eji hefatalɔ ni nɔ bɛ, ni misumɔɔ lɛ waa. Wɔhi shi akɛ wu kɛ ŋa afii 68, ni suɔmɔ ni miyɔɔ kɛhã lɛ lɛ nɔ gbɔɔɔ gbi ko gbi ko. Wɔna akɛ, nɔ ni hãa miishɛɛ hiɔ weku lɛ kɛ asafo lɛ mli ji, ni wɔkɛ yitsoyeli he gbɛjianɔ ni Yehowa eto lɛ baatsu nii, wɔkɛ tɔmɔi ake, wɔba wɔhe shi be fɛɛ be, ni wɔjie mumɔ lɛ yibii lɛ kpo.

Wɔnijiaŋ je wui, ni mɛi hã wɔnine nyɛ shi hu. Shi be fɛɛ be ni ebaaba lɛ nakai lɛ, wɔkpaa Yehowa fai ni eye ebua wɔ koni wɔfi shi, bɔ ni afee ni nibii pii ni wɔkɛshã afɔle koni wɔnyɛ wɔsɔmɔ lɛ lɛ akafee yaka. Afee tsakemɔi srɔtoi yɛ asafo lɛ mli, ni enɛ ehã asafo lɛ etee hiɛ waa. Shi wɔle akɛ, tsakemɔi kpakpai pii kamɔ wɔhiɛ lolo!​—Yes. 60:17; 2 Kor. 13:11.

Yehowa jɔɔ nitsumɔ kpakpa ni mifɔlɔi kɛ nyɛmimɛi krokomɛi ni yɔɔ Trinidad and Tobago lɛ tsu lɛ nɔ. Amaniɛbɔɔ ni yɔɔ amrɔ nɛɛ tsɔɔ akɛ, mɛi 9,892 miisɔmɔ anɔkwa Nyɔŋmɔ lɛ yɛ nakai ŋshɔkpɔ lɛ nɔ. Agbɛnɛ hu, nyɛmimɛi pii tsu nii waa kɛye amɛbua shiɛlɔi ni yɔɔ Aruba lɛ. Be ni miyɔɔ jɛmɛ lɛ, ayɛ asafo kome pɛ, shi amrɔ nɛɛ, ayɛ asafoi 14, ni amɛmiishwere waa. Nigeria hu etee hiɛ waa. Ŋmɛnɛ lɛ, ayɛ shiɛlɔi 381,398 sɔŋŋ yɛ jɛmɛ. Ni yɛ St. Lucia ŋshɔkpɔ lɛ nɔ lɛ, mɛi 783 miishiɛ Yehowa Maŋtsɛyeli lɛ he sane kpakpa lɛ.

Amrɔ nɛɛ, miye afii 90 kɛ sɛɛ. Lala 92:14 lɛ wieɔ yɛ mɛi ni adu amɛ yɛ Yehowa shĩa lɛ he akɛ: “Amɛbaaya nɔ amɛwo yibii yɛ amɛgbɔlɛ beiaŋ po; amɛbaaya nɔ amɛná hewalɛ ni amɛfee frɔ̃frɔ̃.” Kɛ́ misusu afii abɔ ni mikɛsɔmɔ Yehowa lɛ he lɛ, mimii shɛɔ mihe waa. Yehowa he nii ni mifɔlɔi kɛ nyɛmimɛi krokomɛi ni edara yɛ mumɔŋ lɛ tsɔɔ mi lɛ ewo mi hewalɛ ni minyɛ misɔmɔ Yehowa jogbaŋŋ kɛbashi ŋmɛnɛ. Yehowa ejie suɔmɔ ni tsakeee kpo etsɔɔ mi, ni ehã ‘miwo yibii yɛ ekpoi lɛ anɔ.’​—Lala 92:13.

^ kk. 18 Kwɛmɔ March 8, 1972 Awake! lɛ, bf. 24-26.