Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 WALA SHIHILƐ HE SANE

Yehowa Nyɛɔ Nii Fɛɛ Efeɔ

Yehowa Nyɛɔ Nii Fɛɛ Efeɔ

BE KO lɛ, miŋa Mairambubu ta lɔle mli eeya he ko ni enu ni mɔ ko miikɛɛ akɛ, “Gbele sɛɛ baafo, ni abaatee mɛi ni egboi lɛ hu ashi kɛba wala mli ekoŋŋ.” Ená nɔ ni enu lɛ he miishɛɛ ni eshwe akɛ ele saji krokomɛi ni kɔɔ he. No hewɔ lɛ, be ni lɔle lɛ wa ni amɛyi shi lɛ, enyiɛ yoo lɛ ni wie sane lɛ sɛɛ ni eyanina lɛ. Yoo nɛɛ gbɛ́i ji Apun Mambetsadykova, ni Yehowa Odasefonyo ji lɛ. Nakai beiaŋ lɛ, eyɛ oshara waa akɛ abaana ni mɔ ko kɛ Odasefonyo miigba sane, shi nibii ni wɔkase yɛ Apun ŋɔɔ sɛɛ mli lɛ tsake wɔshihilɛ.

WƆTSU NII KƐJƐ LEEBI KƐYASHI GBƐKƐ

Afɔ mi yɛ ŋmɔ agbo ko ni wekui srɔtoi efee ekome kɛmiitsu nii yɛ mli lɛ nɔ yɛ he ko ni bɛŋkɛ maŋ ni atsɛɔ lɛ Tokmok ni yɔɔ Kyrgyzstan lɛ yɛ afi 1937. Shikpɔŋ ni amɛhuɔ ŋmɔ lɛ yɛ nɔ lɛ ji amralo lɛ nɔ. Kyrgyzbii ji wɔ, ni wɔwieɔ Kyrgyz. Mifɔlɔi ye apaa yɛ ŋmɔ lɛ nɔ, ni amɛtsu nii kɛjɛ leebi kɛyashi gbɛkɛ. Ahãa mɛi ni yeɔ apaa yɛ ŋmɔ lɛ mli lɛ ŋmɔshi nibii lɛ eko yɛ be kɛ beiaŋ, shi awoɔ amɛ nyɔmɔ shi kome pɛ daa afi. Mimami náaa mi kɛ minyɛmi yoo fioo lɛ kwɛmɔ mlɛo kwraa. Mitee skul afii enumɔ pɛ, kɛkɛ ni mikpa ni mi hu mibɔi nitsumɔ yɛ ŋmɔ lɛ mli kɛjɛ leebi kɛyashi gbɛkɛ.

Teskey Ala-Too gɔji lɛ

Mɛi pii ni yɔɔ he ni mihi lɛ ji ohiafoi, ni etɔɔ amɛ waa dani amɛnáa amɛdaaŋ ŋmaa. Be ni miji oblanyo lɛ, miheee be kɛsusuuu nɔ hewɔ ni adesai yɔɔ shihilɛ mli loo bɔ ni jeŋ shihilɛ baafee wɔsɛɛ lɛ he. Kɛ́ mikwɛ bɔ ni nibii kpakpai ni mikase yɛ Yehowa Nyɔŋmɔ kɛ eyiŋtoo lɛ he lɛ etsake mishihilɛ ehã lɛ, efeɔ mi naakpɛɛ. Bɔ ni fee ni anɔkwale lɛ shɛ Kyrgyzstan ni egbɛ eshwã yɛ jɛmɛ lɛ yɛ naakpɛɛ. He klɛŋklɛŋ ni mɛi nu sane kpakpa lɛ yɛ ji Kyrgyzstan kooyigbɛ, ni ji he ni mijɛ lɛ.

YIWAA HÃ ANƆKWALE LƐ SHƐ KYRGYZSTAN

Anɔkwale lɛ shɛ Kyrgyzstan yɛ afi 1956 mli. No mli lɛ, Kyrgyzstan fata maji ni feɔ Soviet Union lɛ ahe. Soviet Union nɔyeli lɛ hã adu maŋkwramɔ susumɔ ko ni atsɛɔ lɛ komunizim awo maŋbii lɛ ajwɛŋmɔ kɛ amɛtsui mli, ni ebɛ mlɛo kwraa akɛ mɔ ko baakpoo susumɔ nɛɛ ni emɔ anɔkwale lɛ mli. Yehowa Odasefoi ni yɔɔ maji ni feɔ Soviet Union lɛ amli lɛ kɛ amɛhe wooo maŋkwramɔ saji amli.  (Yoh. 18:36) Enɛ hewɔ lɛ, abu amɛ akɛ mɛi ni nyɛɔ nɔyeli lɛ, ni awa amɛ yi. Shi susumɔ ko bɛ ni baanyɛ atsĩ Nyɔŋmɔ Wiemɔ lɛ naa koni ekashɛ mɛi ni hiɛ tsui krɔŋŋ lɛ atsui he. Anɔkwa, yɛ afii babaoo ni mikɛhi shi lɛ amli lɛ, nɔ kome ni he hiaa waa ni mikase ji akɛ, Yehowa “nyɛɔ nii fɛɛ efeɔ.”​—Mar. 10:27.

Emil Yantzen

Yehowa Odasefoi lɛ ayi ni awa lɛ ni hã anɔkwale lɛ shɛ Kyrgyzstan. Te eba lɛ tɛŋŋ? Siberia fata maji ni feɔ Soviet Union lɛ ahe, ni jɛmɛ akɛ mɛi ni Nɔyeli lɛ buɔ amɛ akɛ ehenyɛlɔi lɛ yaa. Be ni aŋmɛɛ mɛi nɛɛ ahe lɛ, amɛteŋ mɛi babaoo ba Kyrgyzstan, ni mɛi ni ba lɛ ateŋ mɛi komɛi ji Yehowa Odasefoi. Emil Yantzen, ni afɔ lɛ yɛ Kyrgyzstan yɛ afi 1919 lɛ fata mɛi ni jɛ Siberia amɛba lɛ ahe. Emil kɛ Odasefoi lɛ kpe be ni akɛ lɛ tee nitsumɔ nsara ko mli yɛ Siberia lɛ. Emɔ anɔkwale lɛ mli, ni yɛ afi 1956 lɛ, eku esɛɛ kɛba Kyrgyzstan. Emil bahi he ko ni bɛŋkɛ Sokuluk, ni ji he ni mijɛ lɛ. Yɛ afi 1958 lɛ, atse asafo yɛ Sokuluk, ni no ji klɛŋklɛŋ asafo ni atse yɛ Kyrgyzstan.

Victor Vinter

Aaafee afi sɛɛ lɛ, Victor Vinter fã kɛba Sokuluk. Awa nyɛmi nuu anɔkwafo nɛɛ yi shii abɔ. Awo lɛ tsuŋ afii etɛ yɛ ehe ni ekɛwooo maŋkwramɔ saji amli lɛ hewɔ shii enyɔ sɔŋŋ. Kɛkɛ ni asaa awo lɛ tsuŋ afii nyɔŋma, ni no sɛɛ lɛ, akɛ lɛ tee Siberia afii enumɔ. Shi yɛ nyɛmimɛi lɛ ayi ni awa lɛ fɛɛ sɛɛ lɛ, anɔkwa jamɔ tee nɔ eshwere.

AKƐ ANƆKWALE LƐ BA MIŊƆƆ

Eduard Varter

Be ni shɛɔ afi 1963 lɛ, Odasefoi aaafee 160 ni yɔɔ Kyrgyzstan. Amɛteŋ mɛi pii jɛ Germany, Ukraine, kɛ Russia. Eduard Varter, ni abaptisi lɛ yɛ Germany yɛ afi 1924, shi ashwie lɛ kɛje emaŋ lɛ fata he. Yɛ aaafee afi 1940 lɛ, Nazibii lɛ kɛ lɛ tee yiwalɛ nsara ko mli, ni no sɛɛ afii fioo komɛi lɛ, Komunistbii ni yɔɔ Soviet Union lɛ mɔ lɛ kɛtee he ko ni bɛŋkɛ Siberia. Yɛ afi 1961 lɛ, nyɛmi nuu anɔkwafo nɛɛ fã ni eyahi Kant maŋ lɛ ni bɛŋkɛ he ni afɔ mi yɛ lɛ mli.

Elizabeth Fot; Aksamai Sultanalieva

Yehowa tsulɔ anɔkwafo kroko ni hi Kant ji Elizabeth Fot. Elizabeth ji nikpɛlɔ, ni akɛni ehe esa waa kɛ nikpɛɛ hewɔ lɛ, datrɛfoi, tsɔɔlɔi, kɛ mɛi krokomɛi ni tamɔ nakai kɛ nibii bahãa lɛ ni ekpɛ ehã amɛ. Mɛi ni kɛ amɛnibii bahãa lɛ lɛ ateŋ mɔ kome ji Aksamai Sultanalieva. Aksamai wu tsuɔ nii yɛ maŋ lɛ lɔyafoi lɛ anitsumɔhe lɛ. Be ko lɛ, Aksamai kɛ nii bahã Elizabeth koni ekpɛ ehã lɛ, shi be ni eba lɛ, ebibii saji pii yɛ nɔ hewɔ ni adesai yɔɔ shihilɛ mli kɛ nɔ ni baa mɛi ni egboi lɛ anɔ lɛ he. Elizabeth jɛ Biblia lɛ mli tɛ̃ɛ ehã esanebimɔi lɛ fɛɛ hetoo. Aksamai batsɔ sane kpakpa shiɛlɔ ni yɔɔ ekãa.

Nikolai Chimpoesh

Nɛkɛ be nɛɛ mli nɔŋŋ ni awó Nikolai Chimpoesh ni jɛ Moldova lɛ kpokpaa nɔkwɛlɔ, ni esɔmɔ akɛ kpokpaa nɔkwɛlɔ nɔ ni miihe ashɛ afii 30. Yɛ saramɔ ni esaraa asafoi lɛ sɛɛ lɛ, Nikolai to gbɛjianɔ ni akala asafo lɛ woji lɛ babaoo ni ajara ahã nyɛmimɛi lɛ. Shi amralofoi lɛ na nɔ ni efeɔ lɛ. No hewɔ lɛ, Eduard Varter wo Nikolai ŋaa akɛ: “Kɛ́ amralofoi lɛ bi bo sane lɛ, kɛɛmɔ amɛ kpoo akɛ wɔwoji lɛ jɛ wɔnitsumɔhe yitso ni yɔɔ Brooklyn lɛ. Kwɛmɔ mɔ ni biɔ bo sane lɛ hiɛ tɛ̃ɛ. Kaashe gbeyei kwraa.”​—Mat. 10:19.

No sɛɛ etsɛɛɛ lɛ, atsɛ Nikolai kɛtee amralofoi lɛ anitsumɔhe ko ni yɔɔ Kant lɛ. Nikolai gba nɔ ni ba yɛ jɛmɛ lɛ, akɛ: “Amralofoi lɛ eko bi mi he ni wɔnáa wɔwoji lɛ kɛjɛɔ. Mihã hetoo akɛ wɔnáa kɛjɛɔ Brooklyn. Be ni mikɛɛ nakai lɛ, enaaa nɔ ni ewieɔ. No hewɔ lɛ, eŋmɛɛ mihe ni miya, ni atsɛɛɛ mi kɛyaaa jɛmɛ dɔŋŋ.” Nyɛmimɛi lɛ fee ekãa ni amɛkɛ hiɛshikamɔ tee nɔ amɛshiɛ sane kpakpa lɛ yɛ  Kyrgyzstan kooyigbɛ, ni ji he ni mijɛ lɛ. Naagbee lɛ, yɛ afi 1981 lɛ, miweku lɛ hu nu anɔkwalei ni nɔ bɛ ni kɔɔ Yehowa he lɛ, ni miŋa Mairambubu ji mɔ klɛŋklɛŋ ni nu sane lɛ.

MIŊA YIŊ EFEEE LƐ KƆSHIKƆSHI AKƐ ANƆKWALE LƐ NƐ

Mairambubu jɛ Naryn Kpokpaa lɛ ni yɔɔ Kyrgyzstan lɛ nɔ. Gbi ko yɛ August 1974 lɛ, eba minyɛmi yoo lɛ shĩa ebasara lɛ, ni jɛmɛ mikɛ lɛ kpe yɛ klɛŋklɛŋ kwraa. Be ni mina Mairambubu nɔŋŋ ni mitsui mɔ lɛ. Wɔbote gbalashihilɛ mli nakai gbi lɛ nɔ nɔŋŋ.

Apun Mambetsadykova

Yɛ January 1981 mli lɛ, Mairambubu ta lɔle mli eeya jara nɔ ni enu ni yoo ko miishiɛ, tamɔ bɔ ni miwie yɛ shishijee lɛ. Eshwe akɛ ele saji krokomɛi ni kɔɔ nɔ ni enu lɛ he, no hewɔ lɛ, ebi yoo lɛ egbɛ́i kɛ he ni eyɔɔ. Yoo lɛ kɛɛ lɛ akɛ atsɛɔ lɛ Apun, shi etsɔɔɔ lɛ he ni eyɔɔ, ejaakɛ no mli lɛ, agu Yehowa Odasefoi lɛ anitsumɔ lɛ. Moŋ lɛ, Apun bi miŋa he ni wɔyɔɔ. Nakai gbi lɛ, miŋa ba shĩa kɛ miishɛɛ.

Be ni Mairambubu shɛ shi lɛ, ekɛɛ mi akɛ, “Minu saji ni yɔɔ miishɛɛ.” Ekɛfata he akɛ: “Yoo ko kɛɛ mi akɛ etsɛŋ gbɔmɛi gboiŋ dɔŋŋ. Kooloi awuiyelɔi po ahe baajɔ.” Efee mi tamɔ eetã adesã, no hewɔ lɛ, mikɛɛ lɛ akɛ: “Bo lɛ, hã wɔmɛ kɛyashi ebaaba biɛ ni ebagbala nibii amli jogbaŋŋ.”

Nyɔji etɛ sɛɛ lɛ, Apun basara wɔ. No sɛɛ lɛ, nyɛmimɛi lɛ tee nɔ amɛsara wɔ, ni mɛi ni basara wɔ lɛ ateŋ mɛi komɛi fata klɛŋklɛŋ Kyrgyzbii ni batsɔmɔ Odasefoi lɛ ahe. Nyɛmimɛi yei nɛɛ tsɔɔ wɔ nibii ni yɔɔ miishɛɛ kɛ naakpɛɛ ni kɔɔ Yehowa kɛ yiŋtoo hewɔ ni ebɔ adesai lɛ he. Amɛkɛ wolo ni yitso ji Kɛjɛ Paradeiso ni Laaje Kɛyaa Paradeiso ni Asaa Akpɔ̃ lɛ ni tsɔɔ wɔ nii. * Shi akɛni wolo nɛɛ ekome pɛ yɔɔ Tokmok fɛɛ hewɔ lɛ, wɔkɔpe eko wɔhã wɔhe.

Gbalɛ ni yɔɔ 1 Mose 3:15 lɛ fata nibii ni wɔkase klɛŋklɛŋ lɛ ahe. Yehowa baatsɔ Yesu, ni ji Mesia lɛ kɛ Nyɔŋmɔ Maŋtsɛyeli lɛ nɔ Maŋtsɛ lɛ nɔ ehã gbalɛ nɛɛ aba mli. Enɛ ji sane ko ni he hiaa waa ni esa akɛ mɔ fɛɛ mɔ anu! Ni no hewɔ esa akɛ wɔ fɛɛ wɔfata he ni ashiɛ lɛ. (Mat. 24:14) Etsɛɛɛ ni wɔkɛ nibii ni wɔkase yɛ Biblia lɛ mli lɛ bɔi nitsumɔ yɛ wɔshihilɛ mli.

WƆTEE ASAFOŊ KPEEI NI SƐƐ MLI LƐ ABAPTISI WƆ

Nyɛmi nuu ko ni yɔɔ Tokmok lɛ fɔ̃ wɔ nine kɛtee yookpeemɔ ko shishi. Mikɛ miŋa na akɛ esoro bɔ ni Odasefoi lɛ feɔ amɛnii amɛhãa. Akɛ dãa baaa yookpeemɔ lɛ shishi, ni ato nifeemɔ lɛ he gbɛjianɔ jogbaŋŋ. Esoro enɛ kwraa yɛ yookpeemɔi  krokomɛi ni wɔtee lɛ ahe, ejaakɛ yɛ nomɛi ashishi lɛ, atɔ dãa waa, afee basabasa, ni akɛ wiemɔi ni esaaa tsu nii.

Agbɛnɛ hu, wɔkɛ asafo ni yɔɔ Tokmok lɛ tee amɛsafoŋ kpeei lɛ ekomɛi. Kɛ́ kɔɔyɔɔ lɛ mli yɛ bɔ ni sa lɛ, afeɔ kpeei lɛ yɛ koo lɛ mli. Nyɛmimɛi lɛ le akɛ polisifoi lɛ kwɛɔ wɔyaa kɛbaa waa, no hewɔ lɛ, amɛhãa nyɛmi nuu ko kwɛɔ koni kɛ́ mɔ ko miiba lɛ ewo wɔtoi nɔ. Kɛ́ shɛ fɛi be lɛ, wɔkpeɔ yɛ shĩa ko mli. Bei komɛi lɛ, polisifoi lɛ baa shĩa lɛ, ni amɛbiɔ ni wɔtsɔɔ amɛ nɔ ni wɔfeɔ. Be ni abaabaptisi wɔ yɛ July 1982 lɛ, nyɛmimɛi lɛ kwɛ jogbaŋŋ koni polisifoi lɛ akana nɔ ni yaa nɔ lɛ. (Mat. 10:16) Nyɛmimɛi lɛ ba fiofio ni wɔkpe yɛ koo ko mli. Wɔlá Maŋtsɛyeli lala kome ni wɔbo baptisimɔ wiemɔ lɛ toi, ni abaptisi mi kɛ Mairambubu yɛ Chüy Faa lɛ mli.

WƆŊƆ HEGBƐ KO KƐLƐƐ WƆSƆƆMƆ NITSUMƆ LƐ MLI

Yɛ afi 1987 lɛ, nyɛmi nuu ko kɛɛ miyasara mɔ ko ni yɔɔ wiemɔ lɛ he miishɛɛ ni yɔɔ Balykchy maŋ lɛ mli. Kɛ́ ota oketeke mli kɛjɛ wɔshĩa lɛ kɛmiiya jɛmɛ lɛ, eheɔ ŋmɛlɛtswai ejwɛ. Wɔtee Balykchy shii fioo komɛi wɔyashiɛ. Wɔna akɛ mɛi babaoo yɛ jɛmɛ ni yɛ wiemɔ lɛ he miishɛɛ. Ekã shi faŋŋ akɛ, eji hegbɛ ni wɔná ni wɔkɛbaalɛɛ wɔsɔɔmɔ nitsumɔ lɛ mli.

Mi kɛ Mairambubu fã gbɛ kɛtee Balykchy shii abɔ. Wɔyaye otsii anaagbee babaoo yɛ jɛmɛ. Kɛ́ wɔtee lɛ, wɔyaa shiɛmɔ, ni wɔfeɔ asafoŋ kpeei. Mɛi nya asafo lɛ woji lɛ ahe waa. Wɔkɛ woji lɛ woɔ mishok mli kɛjɛɔ Tokmok kɛyaa. Mishok ji atomo kotoku. Daa nyɔɔŋ nɔ lɛ, wɔkɛ woji kotokui enyɔ obɔbɔ yaa, shi no po shɛɛɛ. Kɛ́ wɔta oketeke lɛ mli kɛmiiya Balykchy lɛ, wɔshiɛɔ wɔhãa mɛi ni yɔɔ mli lɛ, ni nakai nɔŋŋ wɔfeɔ kɛ́ wɔmiiku wɔsɛɛ.

Be klɛŋklɛŋ ni wɔtee Balykchy lɛ sɛɛ afii kpaanyɔ yɛ afi 1995 lɛ, atse asafo yɛ jɛmɛ. Gbɛ ni wɔfãa kɛjɛɔ Tokmok kɛyaa Balykchy nakai afii kpaanyɔ lɛ he wɔshika pii. Shi wɔ hu ni wɔbɛ nɔ ko nɛɛ. No hewɔ lɛ, te wɔfee tɛŋŋ wɔnyɛ wɔtee wɔba lɛ? Nyɛmi nuu ko hãa wɔ shika daa koni wɔkɛkwɛ wɔhe. Yehowa na akɛ wɔmiisumɔ ni wɔlɛɛ wɔsɔɔmɔ nitsumɔ lɛ mli, no hewɔ lɛ, ‘efɔse jɔɔmɔi eshwie wɔnɔ.’ (Mal. 3:10) Lɛɛlɛŋ, Yehowa nyɛɔ nii fɛɛ efeɔ!

WƆTSƆSE WƆBII LƐ NI WƆKƐ WƆHE WO SƆƆMƆ NITSUMƆ LƐ MLI

Yɛ afi 1992 lɛ, awó mi asafoŋ onukpa, ni mi ji klɛŋklɛŋ Kyrgyznyo ni awó lɛ asafoŋ onukpa yɛ Kyrgyzstan. Yɛ wɔsafo lɛ shikpɔŋkuku lɛ mli yɛ Tokmok lɛ, wɔná hegbɛi hei ni wɔkɛbaaye mɛi odase. Wɔkɛ Kyrgyzbii oblahii kɛ oblayei babaoo ni eba skul lɛ kase Biblia lɛ. Mɛi ni wɔkɛkase nii lɛ ateŋ mɔ kome miisɔmɔ akɛ Nitsumɔhe Nine Ajinafoi Akuu lɛ mli nyo, ni mɛi enyɔ hu miisɔmɔ akɛ gbɛgbalɔi krɛdɛi. Kɛ́ wɔtee asafoŋ kpeei lɛ, wɔyeɔ wɔbuaa nyɛmimɛi lɛ yɛ gbɛ kroko hu nɔ. Yɛ aaafee afi 1990 kɛ no sɛɛ fioo lɛ, akalaa asafo lɛ woji lɛ ni afeɔ asafoŋ kpeei lɛ yɛ Russian mli. Be ni mɛi ni nuɔ Kyrgyz jogbaŋŋ fe Russian lɛ ayi bafa yɛ wɔsafo lɛ mli lɛ, mitsɔɔ nibii ni awieɔ yɛ asafoŋ kpeei lɛ ashishi lɛ kɛtee Kyrgyz mli, ni no ye ebua amɛ ni amɛnu anɔkwale lɛ shishi jogbaŋŋ.

Mi kɛ miŋa kɛ wɔbii lɛ ateŋ mɛi kpaanyɔ yɛ afi 1989 mli

Yɛ nɛkɛ be nɛɛ mli lɛ, wɔbɛ dekã kwraa kɛ wɔbii lɛ akwɛmɔ. Wɔkɛ amɛ yaa shiɛmɔ kɛ asafoŋ kpeei. Wɔbiyoo Gulsayra, ni no mli lɛ eye afii 12 lɛ, sumɔɔ ni ekɛ mɛi ni hoɔ yɛ gbɛjegbɛ lɛ he lɛ agba Biblia  lɛ mli sane. Agbɛnɛ hu, wɔbii lɛ sumɔɔ ni amɛkpe ŋmalɛi amɛwo amɛyitsoŋ. Nibii nɛɛ ni wɔfee lɛ hewɔ lɛ, wɔbii lɛ, kɛ agbɛnɛ hu, sɛɛ mli lɛ, wɔnabii lɛ, kɛ amɛhe wo asafoŋ nifeemɔi amli waa. Wɔbii 9 kɛ nabii 11 ni yɔɔ wala mli lɛ ateŋ mɛi 16 miisɔmɔ Yehowa loo amɛkɛ amɛfɔlɔi yaa asafoŋ kpeei.

TSAKEMƆI NI SA KADIMƆ

Eji akɛɛ nyɛmimɛi ni je Yehowa nitsumɔ lɛ shishi yɛ wɔkpokpaa lɛ nɔ yɛ aaafee afi 1950 lɛ akɛ, tsakemɔi ni eba Kyrgyzstan ŋmɛnɛ lɛ baaba kulɛ, ekolɛ amɛbaaje he ŋwane. Akɛ nɔkwɛmɔnɔ lɛ, kɛjɛ aaafee afi 1990 kɛbaa lɛ, wɔnyɛɔ wɔshiɛɔ sane kpakpa lɛ ni wɔbuaa wɔhe naa kutuu ni mɔ ko mɔ ko gbaaa wɔnaa.

Mi kɛ miŋa nyiɛ shiɛmɔ nɔ

Yɛ afi 1991 lɛ, mi kɛ miŋa tee kpee wulu ko yɛ Alma-Ata, ni amrɔ nɛɛ lɛ atsɛɔ lɛ Almaty lɛ yɛ Kazakhstan. Enɛ ji klɛŋklɛŋ kpee wulu ni wɔtee. Yɛ afi 1993 lɛ, nyɛmimɛi ni yɔɔ Kyrgyzstan lɛ fee kpee wulu yɛ Spartak Stediɔm ni yɔɔ Bishkek lɛ, ni no ji klɛŋklɛŋ kpee wulu ni afee yɛ Kyrgyzstan. Nyɛmimɛi lɛ kɛ otsi kome saa stediɔm lɛ kɛhã kpee lɛ. Enɛ ta mɔ ni kwɛɔ stediɔm lɛ nɔ lɛ tsuiŋ aahu akɛ, ehã afee kpee lɛ yɛ jɛmɛ ni eheee shika.

Yɛ afi 1994 lɛ, wɔshɛ oti ko ni sa kadimɔ waa he. Nakai afi lɛ, akala asafo lɛ woji lɛ eko yɛ Kyrgyz mli, ni enɛ ji klɛŋklɛŋ nɔ ni akala. Amrɔ nɛɛ, nyɛmimɛi ni tsɔɔ wiemɔ shishi yɛ nitsumɔhe nine lɛ yɛ Bishkek lɛ, tsɔɔ asafo lɛ woji lɛ ashishi kɛyaa Kyrgyz mli. Yɛ afi 1998 lɛ, aŋmɛ gbɛ ni Odasefoi lɛ kɛ amɛnitsumɔ lɛ wo mla shishi yɛ Kyrgyzstan. Asafo lɛ eshwere, ni amrɔ nɛɛ, nyɛmimɛi ni yɔɔ Kyrgyzstan lɛ ayi fa kwraa fe 5,000. Ŋmɛnɛ lɛ, wɔyɛ asafoi 83 kɛ kui 25 yɛ Chinese, Blɔfo, Kyrgyz, Russian, Russia Mumuii Awiemɔ, Turkish, Uighur, kɛ Uzbek mli. Nyɛmimɛi ni yɔɔ asafoi kɛ kui nɛɛ amli lɛ jɛ hei srɔtoi kɛ shihilɛi srɔtoi amli, shi wɔ fɛɛ wɔfee ekome kɛmiisɔmɔ Yehowa. Yehowa pɛ dromɔ naa tsakemɔi ni sa kadimɔ nɛɛ fɛɛ eba.

Yehowa tsake mishihilɛ hu. Mijɛ ohiafoi aweku mli, ni mitee skul afii enumɔ pɛ. Kɛ̃lɛ, Yehowa ehã minyɛ misɔmɔ akɛ asafoŋ onukpa ni mitsɔɔ mɛi ni etee skul fe mi lɛ anɔkwalei ni nɔ bɛ ni yɔɔ Biblia lɛ mli lɛ. Eji anɔkwale akɛ Yehowa nyɛɔ efeɔ nibii ni wɔjwɛŋmɔ shɛɛɛ he kwraa. Nibii ni etee nɔ yɛ mi diɛŋtsɛ mishihilɛ mli lɛ tsirɛɔ mi ni maya nɔ maye Yehowa, mɔ ni “nyɛɔ nii fɛɛ efeɔ” lɛ he odase.​—Mat. 19:26.

^ kk. 21 Yehowa Odasefoi ni fee wolo nɛɛ, shi bianɛ lɛ akpa kalamɔ.