Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Ná Hemɔkɛyeli Ni Obo Nyɔŋmɔ Toi Tamɔ Noa, Daniel, Kɛ Hiob

Ná Hemɔkɛyeli Ni Obo Nyɔŋmɔ Toi Tamɔ Noa, Daniel, Kɛ Hiob

‘Noa, kɛ Daniel, kɛ Hiob lɛ, amɛ diɛŋtsɛ amɛwala pɛ amɛbaanyɛ amɛhere yɛ amɛjalɛ nifeemɔi lɛ ahewɔ.’​—EZE. 14:14.

LALAI: 89, 119

1, 2. (a) Mɛni hewɔ Noa, Daniel, kɛ Hiob shihilɛ he sane lɛ baanyɛ awo wɔ hewalɛ? (b) Nɛgbɛ Ezekiel ŋma wiemɔi ni yɔɔ Ezekiel 14:14 lɛ yɛ, ni mɛɛ be eŋma? No mli lɛ, te nibii yɔɔ tɛŋŋ yɛ Yerusalem?

ANI ooye hela ko? Ani oyɛ shika he naagbai? Ani aawa bo yi, aloo okɛ naagbai krokomɛi miikpe? Ani bei komɛi lɛ, onuɔ he akɛ Yehowa sɔɔmɔ lɛ eŋɔɔɔ? Kɛ́ nakai ni lɛ, nibii ni tee nɔ yɛ Noa, Daniel, kɛ Hiob shihilɛ mli kɛ bɔ ni amɛtsu he nii amɛhã lɛ baanyɛ awo bo hewalɛ. Hii nɛɛ yeee emuu tamɔ wɔ nɔŋŋ, ni naagbai ni amɛkɛkpe lɛ tamɔ naagbai ni wɔ hu wɔkɛkpeɔ lɛ. Amɛwala tete yaje oshara mli shii abɔ. Kɛ̃lɛ, amɛtee nɔ amɛye Nyɔŋmɔ anɔkwa, ni no hewɔ lɛ, ena amɛ akɛ mɛi ni fee nɔkwɛmɔnɔ kpakpa yɛ hemɔkɛyeli kɛ toiboo mli.​—Kanemɔ Ezekiel 14:12-14.

2 Ezekiel ŋma ŋmalɛ ni wɔnikasemɔ lɛ damɔ nɔ lɛ yɛ Babilonia yɛ afi 612 D.Ŋ.B. * (Eze. 1:1; 8:1) No mli lɛ, mɛi ni yɔɔ Yerusalem lɛ ekwa Yehowa jamɔ lɛ. Anɔkwa, eŋma sane nɛɛ sɛɛ etsɛɛɛ ni  akpãtã Yerusalem hiɛ yɛ 607 D.Ŋ.B., tamɔ bɔ ni agba afɔ̃ shi lɛ. Mɛi ni yɔɔ Yerusalem lɛ ateŋ mɛi fioo ko pɛ ná hemɔkɛyeli ni amɛbo Nyɔŋmɔ toi tamɔ Noa, Daniel, kɛ Hiob, ni no hewɔ lɛ, amɛyi ná wala. (Eze. 9:1-5) Amɛteŋ mɛi komɛi ji Yeremia, Baruk, Ebed-melek, kɛ Rekabbii lɛ.

3. Mɛni he wɔbaasusu yɛ nikasemɔ nɛɛ mli?

3 Ŋmɛnɛ hu lɛ, mɛi ni Yehowa buɔ amɛ akɛ jalɔi, ni ji mɛi ni tamɔ Noa, Daniel, kɛ Hiob pɛ baaná wala kɛ́ akpãtã jeŋ fɔŋ nɛɛ hiɛ. (Kpo. 7:9, 14) No hewɔ lɛ, nyɛhãa wɔkwɛa nɔ hewɔ ni Yehowa na hii nɛɛ akɛ mɛi ni ja ni fee nɔkwɛmɔnɔ kpakpa lɛ. Wɔbaakwɛ (1) naagbai ni amɛteŋ mɔ fɛɛ mɔ kɛkpe kɛ (2) bɔ ni wɔɔfee wɔná hemɔkɛyeli ni wɔbo Nyɔŋmɔ toi tamɔ amɛ.

NOA NÁ HEMƆKƐYELI NI EBO NYƆŊMƆ TOI NƆ NI FE AFII 900

4, 5. Mɛɛ naagbai Noa kɛkpe? Mɛni hewɔ eshifimɔ lɛ sa kadimɔ lɛ?

4 Mɛɛ naagbai Noa kɛkpe? Be ni shɛɔ Noa nanakaŋsowa Henok beiaŋ lɛ, mɛi ebuuu Nyɔŋmɔ kwraa. Amɛwie “wiemɔi ni wawai” amɛshi Yehowa. (Yuda 14, 15) Mɛi tee nɔ amɛye awui ni amɛfee nibii gbohii babaoo. Anɔkwa, yɛ Noa beiaŋ lɛ, “shikpɔŋ lɛ nɔ eyi obɔ kɛ yiwalɛ.” Ŋwɛibɔfoi fɔji komɛi hu ba shikpɔŋ lɛ nɔ. Amɛŋɔ adesai agbɔmɔtsei ni amɛkɛ yei bote gbalashihilɛ mli. Bii ni amɛfɔ lɛ ayitseiaŋ wala ni amɛye awui waa. (1 Mo. 6:2-4, 11, 12) Shi esoro Noa kwraa yɛ eyinɔbii lɛ ateŋ. Biblia lɛ kɛɔ akɛ, “Noa hiɛ ba nyam yɛ Yehowa hiɛ. . . . Ehi shi akɛ mɔ ni sane ko bɛ ehe yɛ eyinɔbii lɛ ateŋ. Noa kɛ anɔkwa Nyɔŋmɔ lɛ nyiɛ.”​—1 Mo. 6:8, 9.

5 Mɛni wiemɔi nɛɛ tsɔɔ wɔ yɛ Noa he? Klɛŋklɛŋ lɛ, amɛtsɔɔ wɔ akɛ, Noa kɛ Nyɔŋmɔ enyiɛɛɛ yɛ nakai jeŋ fɔŋ lɛ mli afii 70 loo 80 ko pɛ kɛkɛ, shi moŋ ekɛ lɛ nyiɛ nɔ ni miihe ashɛ afii 600 sɔŋŋ dani Nu Afua lɛ ba! (1 Mo. 7:11) Nɔ ni ji enyɔ lɛ, amɛtsɔɔ wɔ akɛ, enáaa Nyɔŋmɔ webii asafo ko ni baaye abua lɛ ni amɛwo lɛ hewalɛ, tamɔ bɔ ni wɔyɔɔ asafoi ŋmɛnɛ lɛ. Eeenyɛ efee po akɛ, enyɛmimɛi hii kɛ yei lɛ wooo lɛ hewalɛ ni esɔmɔ Yehowa. *

6. Mɛni Noa fee ni hãa wɔnaa akɛ efee ekãa waa?

6 Noa na akɛ ehe miihia ni efee babaoo fe ni eeehi shi akɛ jalɔ kɛkɛ. No hewɔ lɛ, efee ekãa ni egba mɛi krokomɛi hemɔkɛyeli ni eyɔɔ yɛ Yehowa mli lɛ he sane. Biblia lɛ tsɛɔ lɛ “jalɛ shiɛlɔ.” (2 Pet. 2:5) Bɔfo Paulo wie yɛ Noa he akɛ, “Etsɔ ehemɔkɛyeli lɛ nɔ ebu je lɛ fɔ.” (Heb. 11:7) Kɛ́ Noa shiɛ lɛ, belɛ ekã shi faŋŋ akɛ, mɛi ŋmɔ lɛ ni amɛte shi amɛwo lɛ. Ekolɛ amɛka po akɛ amɛbaapila lɛ. Shi Noa ‘sheee gbɔmɛi gbeyei.’ (Abɛi 29:25) Yehowa dro lɛ ekãa, tamɔ bɔ ni efeɔ ehãa etsuji anɔkwafoi fɛɛ lɛ.

7. Be ni Noa kpɛɔ adeka lɛ, mɛɛ naagbai ekɛkpe?

7 Be ni Noa eye Nyɔŋmɔ anɔkwa nɔ ni fe afii 500 lɛ, Yehowa kɛɛ lɛ akɛ ekpɛ adeka koni akɛhere adesai kɛ kooloi ayiwala. (1 Mo. 5:32; 6:14) Ekã shi faŋŋ akɛ, Noa na akɛ adeka lɛ kpɛɛ efeŋ mlɛo kwraa, ni eyɔse hu akɛ, mɛi baaye ehe fɛo waa ni amɛbaate shi amɛwo lɛ fe bɔ ni amɛfeɔ momo lɛ po. Fɛɛ sɛɛ lɛ, ená hemɔkɛyeli ni ebo Yehowa toi. ‘Bɔ ni Nyɔŋmɔ fã lɛ lɛ, nakai pɛpɛɛpɛ efee.’​—1 Mo. 6:22.

8. Mɛni tsɔɔ akɛ Noa kɛ ehiɛ fɔ̃ Yehowa nɔ akɛ ebaakwɛ lɛ kɛ eweku lɛ?

8 Naagba kroko ni Noa kɛkpe ji bɔ ni ebaafee ekwɛ eŋa kɛ ebii lɛ. Dani Nu Afua lɛ baaba lɛ, mɛi gboɔ deŋme waa dani shikpɔŋ lɛ baa nii ehãa amɛ, ni Noa hu gbo deŋme nakai nɔŋŋ. (1 Mo. 5:28, 29) Kɛ̃lɛ, eyeee etsui tuutu yɛ bɔ ni ebaafee ekwɛ eweku lɛ he. Moŋ lɛ, ehã Nyɔŋmɔ sɔɔmɔ lɛ fee nɔ ni he hiaa lɛ fe fɛɛ. Eeenyɛ efee akɛ, adeka lɛ kpɛɛ lɛ he afii 40 loo 50, shi yɛ be  nɛɛ mli fɛɛ lɛ, Noa tee nɔ eye Yehowa anɔkwa. Yɛ Nu Afua lɛ sɛɛ lɛ, Noa tee nɔ ehi shi afii 350, ni eye Nyɔŋmɔ anɔkwa kɛyashi egbo. (1 Mo. 9:28) Ekã shi faŋŋ akɛ, Noa fee hemɔkɛyeli kɛ toiboo he nɔkwɛmɔnɔ kpakpa!

9, 10. (a) Te wɔɔfee tɛŋŋ wɔná hemɔkɛyeli ni wɔbo Nyɔŋmɔ toi tamɔ Noa? (b) Kɛ́ otswa ofai shi akɛ obaabo Nyɔŋmɔ mlai lɛ atoi lɛ, mɛni lɛ hu ebaafee ehã bo?

9 Te wɔɔfee tɛŋŋ wɔná hemɔkɛyeli ni wɔbo Nyɔŋmɔ toi tamɔ Noa? Wɔbaanyɛ wɔfee nakai kɛ́ wɔhã mɛi le akɛ gbɛtsɔɔmɔi ni Nyɔŋmɔ kɛhã yɛ nɔ ni ja kɛ nɔ ni ejaaa he lɛ hi, wɔhã ana akɛ wɔfataaa Satan je lɛ he, ni wɔtee nɔ wɔhã Yehowa sɔɔmɔ lɛ he hia wɔ fe nibii krokomɛi fɛɛ. (Mat. 6:33; Yoh. 15:19) Ekã shi faŋŋ akɛ, je lɛ náŋ wɔhe miishɛɛ kɛji wɔfee nibii nɛɛ. Amrɔ nɛɛ po lɛ, yɛ maji komɛi anɔ lɛ, mɛi wieɔ amɛshiɔ wɔ yɛ adafitswaa woji amli kɛ hei krokomɛi akɛni wɔtswa wɔfai shi akɛ wɔbaabo Nyɔŋmɔ mlai ni kɔɔ gbalashihilɛ kɛ bɔlɛnamɔ he lɛ atoi hewɔ. (Kanemɔ Maleaki 3:17, 18.) Shi tamɔ bɔ ni Noa fee lɛ, wɔsheɔ Yehowa gbeyei, shi jeee gbɔmɛi. Wɔle akɛ lɛ pɛ ji mɔ ni baanyɛ ahã wɔ naanɔ wala.​—Luka 12:4, 5.

10 Bi ohe akɛ: ‘Ani maya nɔ mafee nɔ ni ja yɛ Nyɔŋmɔ hiɛ kɛ́ mɛi ye mihe fɛo loo amɛwie amɛshi mi po? Ani miheɔ miyeɔ akɛ Yehowa baanyɛ akwɛ mi kɛ miweku lɛ kɛ́ nibii amli wa po?’ Kɛ́ okɛ ohiɛ fɔ̃ Yehowa nɔ ni obo lɛ toi tamɔ Noa fee lɛ, obaanyɛ oná nɔmimaa akɛ Yehowa baakwɛ bo.​—Fip. 4:6, 7.

DANIEL NÁ HEMƆKƐYELI NI EBO NYƆŊMƆ TOI YƐ BABILON

11. Mɛɛ naagbai ni naa wa Daniel kɛ enanemɛi etɛ lɛ kɛkpe yɛ Babilon? (Kwɛmɔ mfoniri ni yɔɔ nikasemɔ lɛ shishijee lɛ.)

11 Mɛɛ naagbai Daniel kɛkpe? Aŋɔ Daniel nom kɛtee Babilon. Nakai beiaŋ lɛ, amagajamɔ kɛ ŋkunyaayeli ehe shi waa yɛ Babilon. Agbɛnɛ hu, Babilonbii lɛ ebuuu Yudafoi lɛ, ni amɛye Yudafoi lɛ kɛ Yehowa, ni ji Yudafoi lɛ a-Nyɔŋmɔ lɛ, he fɛo. (Lala 137:1, 3) Enɛ dɔ Daniel kɛ Yudafoi anɔkwafoi krokomɛi lɛ waa. Kɛfata he lɛ, akɛni atsɔse Daniel kɛ enanemɛi etɛ lɛ, ni ji Hanania, Mishael, kɛ Azaria koni amɛsɔmɔ maŋtsɛ lɛ hewɔ lɛ, gbɔmɛi gbala amɛjwɛŋmɔ kɛtee amɛnɔ. Ahã amɛ maŋtsɛ lɛ niyenii lɛ eko akɛ amɛye. Shi niyenii ni maŋtsɛ lɛ yeɔ lɛ ekomɛi yɛ ni Yehowa ekɛɛ ewebii lɛ akɛ amɛkaye. No hewɔ lɛ, Daniel ‘kɛ maŋtsɛ lɛ niyenii srɔtoi lɛ eko, loo wain ni enuɔ lɛ eko buleee ehe.’​—Dan. 1:5-8, 14-17.

12. (a) Mɛɛ sui kpakpai Daniel jie lɛ kpo? (b) Te Yehowa na Daniel ehã tɛŋŋ?

12 Eeenyɛ efee akɛ, Daniel kɛ naagba kroko kpe ni kɛ́ akwɛɛɛ jogbaŋŋ lɛ, ebaafee tamɔ nɔ ni ejeee naagba. Akɛni ebɔɔ mɔdɛŋ waa hewɔ lɛ, maŋtsɛ lɛ hã lɛ hegbɛi ni nɔ kwɔlɔ. (Dan. 1:19, 20) Shi enɛ hãaa ewó ehe nɔ loo esusu akɛ esane ja be fɛɛ be. Moŋ lɛ, eba ehe shi ni eyeee etsui naa sane. Ekɛ nibii ni enyɛ etsu lɛ yijiemɔ lɛ fɛɛ hã Yehowa. (Dan. 2:30) Daniel kã he eji oblanyo fioo be ni Yehowa bu lɛ eshi Noa kɛ Hiob nɔ akɛ, lɛ hu jalɔ ji lɛ ni eji mɔ ko ni abaanyɛ akase. Enɛ sa kadimɔ waa. Ani Daniel fee nɔ ko ni hã Nyɔŋmɔ shwa ehe akɛ ewie ehe ekpakpa nakai? Dabi kwraa! Daniel hiɛ ehemɔkɛyeli lɛ mli ni etee nɔ ebo Nyɔŋmɔ toi ewala beiaŋ fɛɛ. Be ni Daniel eye aaafee afii 100 lɛ, Yehowa bɔfo ko kɛɛ lɛ akɛ: “Ao Daniel, nuu ni ashwɛɛɛ ohe kwraa.” Enɛ baahã Daniel tsui anyɔ emli waa.​—Dan. 10:11.

13. Mɛni eeenyɛ efee akɛ no fata yiŋtoi ahewɔ ni Yehowa hã Daniel ná hegbɛ ni nɔ kwɔ lɛ?

13 Akɛni Yehowa ná Daniel he miishɛɛ waa hewɔ lɛ, awó lɛ maŋ onukpa yɛ Babilonbii lɛ anɔyeli lɛ kɛ Medo-Persiabii lɛ anɔyeli lɛ mli. (Dan. 1:21; 6:1, 2) Eeenyɛ efee akɛ, Yehowa je gbɛ ehã Daniel ná hegbɛ nɛɛ koni eye ebua ewebii lɛ tamɔ bɔ ni Yosef ye ebua amɛ yɛ Ejipt, ni Ester kɛ Mordekai hu ye amɛbua amɛ yɛ Persia lɛ. * (Dan. 2:48)  Ekã shi faŋŋ akɛ, be ni Ezekiel kɛ Yudafoi krokomɛi ni aŋɔ amɛ nom lɛ na bɔ ni Yehowa kɛ ehe wo saji amli yɛ nɛkɛ gbɛ nɔ lɛ, amɛtsui nyɔ amɛmli waa.

Yehowa shwɛɛɛ mɛi ni yeɔ lɛ anɔkwa lɛ ahe kwraa (Kwɛmɔ kuku 14, 15)

14, 15. (a) Mɛni hewɔ wɔbaanyɛ wɔkɛɛ akɛ wɔshihilɛ lɛ tamɔ Daniel nɔ lɛ nɔŋŋ? (b) Mɛni fɔlɔi baanyɛ akase yɛ Daniel fɔlɔi lɛ ahe?

14 Te wɔɔfee tɛŋŋ wɔná hemɔkɛyeli ni wɔbo Nyɔŋmɔ toi tamɔ Daniel? Jeŋ ni wɔyɔɔ mli ŋmɛnɛ lɛ hu eyi obɔ kɛ jeŋba sha kɛ amale jamɔ. Biblia lɛ kɛɔ akɛ, Babilon Kpeteŋkpele lɛ, ni damɔ shi kɛhã amale jamɔi fɛɛ ni yɔɔ je lɛ mli lɛ, ji “daimonioi ashihilɛhe.” (Kpo. 18:2) Babilon Kpeteŋkpele lɛ ená mɛi babaoo anɔ hewalɛ. Shi wɔ lɛ, esoro wɔ kwraa. Wɔtamɔ gbɔi yɛ je nɛŋ, ni no hewɔ lɛ, mɛi yeɔ wɔhe fɛo. (Mar. 13:13) Belɛ, nyɛhãa wɔtsia wɔbɛŋkɛa Yehowa, wɔ-Nyɔŋmɔ lɛ waa, tamɔ bɔ ni Daniel fee lɛ. Kɛ́ wɔba wɔhe shi, wɔkɛ wɔhiɛ fɔ̃ Yehowa nɔ, ni wɔbo lɛ toi lɛ, wɔ hu eshwɛŋ wɔhe kwraa.​—Hag. 2:7.

15 Fɔlɔi, mɛni nyɛbaanyɛ nyɛkase yɛ Daniel fɔlɔi lɛ ahe? Eyɛ mli akɛ be ni Daniel ji gbekɛ fioo lɛ, efɔŋfeemɔ ehe shi waa yɛ Yuda moŋ, shi eda ebatsɔ mɔ ko ni sumɔɔ Nyɔŋmɔ. Enɛ baaa kɛkɛ. Ekã shi faŋŋ akɛ, Daniel fɔlɔi tsɔɔ lɛ Yehowa he nii. (Abɛi 22:6) Gbɛ́i Daniel ni amɛkɛwo lɛ lɛ shishi ji “Mikojolɔ Ji Nyɔŋmɔ,” ni enɛ tsɔɔ akɛ amɛsheɔ Nyɔŋmɔ gbeyei. (Dan. 1:6, shn.) No hewɔ lɛ, fɔlɔi, nyɛkashia nyɛbii lɛ ajeŋ nyɛhãa amɛ. Nyɛtoa nyɛtsui shi ni nyɛtsɔa amɛ Yehowa he nii. (Efe. 6:4) Nyɛtsĩa amɛtã yɛ nyɛsɔlemɔi amli, ni nyɛkɛ amɛ afea ekome kɛsɔlea hu. Kɛ́ nyɛbɔ mɔdɛŋ nyɛdu Biblia mli anɔkwalei nyɛwo nyɛbii lɛ atsuii amli lɛ, Yehowa hu baajɔɔ nyɛ waa.​—Lala 37:5.

HIOB NÁ HEMƆKƐYELI NI EBO NYƆŊMƆ TOI YƐ NINÁMƆ KƐ OHIA FƐƐ MLI

16, 17. Mɛɛ kaa Hiob kɛkpe be ni eji niiatsɛ lɛ? Mɛɛ kaa Abonsam kɛba Hiob nɔ?

16 Mɛɛ naagbai Hiob kɛkpe? Hiob shihilɛ tsake kwraa be ni Abonsam ka lɛ lɛ. Dani kaa lɛ baaba lɛ, no mli lɛ, Hiob ji “gbɔmɔ wulu fe Bokãgbɛbii lɛ fɛɛ.” (Hiob 1:3) Eyɛ nii, ehe gbɛ́i, ni mɛi buɔ lɛ waa. (Hiob 29:7-16) Fɛɛ sɛɛ lɛ, Hiob enaaa ehe tsɔ, ni enuuu he akɛ Nyɔŋmɔ he ehiaaa lɛ. Nɔ hewɔ ni wɔwieɔ nakai ji akɛ, Yehowa tsɛ lɛ ‘etsulɔ,’ ni ewie kɛfata he akɛ: “Eji nuu ni ja ni yeɔ anɔkwa; esheɔ Nyɔŋmɔ gbeyei, ni etsiɔ ehe kɛjeɔ nɔ fɔŋ he.”​—Hiob 1:8.

17 Trukaa lɛ, Hiob shihilɛ tsake kwraa. Enibii fɛɛ ahiɛ kpãtã, ni ehao aahu akɛ, ená kulɛ egbo. Wɔle akɛ mɔ ni hã Hiob yaje shihilɛ nɛɛ mli ji Satan. Satan folɔ Hiob naa akɛ nibii ni enáa kɛjɛɔ Nyɔŋmɔ dɛŋ lɛ ahewɔ esɔmɔɔ Nyɔŋmɔ. (Kanemɔ Hiob 1:9, 10.) Yehowa ekuuu ehiɛ efɔ̃ɔɔ naafolɔmɔ nɛɛ ni yɔɔ hiɛdɔɔ waa lɛ nɔ. Ehã Hiob hegbɛ  koni etsɔɔ akɛ eji anɔkwafo, ni akɛ suɔmɔ ni eyɔɔ kɛhã lɛ lɛ hewɔ esɔmɔɔ lɛ lɛ, shi jeee nibii ni ebaaná yɛ edɛŋ lɛ ahewɔ.

18. (a) Mɛni taa otsuiŋ waa yɛ bɔ ni Hiob ye Nyɔŋmɔ anɔkwa lɛ he? (b) Mɛni wɔbaanyɛ wɔkase yɛ Yehowa he yɛ bɔ ni ekɛ Hiob ye ehã lɛ mli?

18 Satan tutua Hiob shii abɔ, ni ehã Hiob mu sane naa akɛ Nyɔŋmɔ ji mɔ ni tutuaa lɛ lɛ. (Hiob 1:13-21) No sɛɛ lɛ, hii etɛ komɛi ni kɛɛ amɛba ni amɛbashɛje Hiob mii lɛ wie wiemɔi ni naa wawai amɛshi lɛ. Nibii ni amɛwie lɛ fɛɛ tsɔɔ akɛ, amɛsusuɔ akɛ gbɔmɔ gbonyo ji Hiob, ni Nyɔŋmɔ miigbala etoi yɛ no hewɔ. (Hiob 2:11; 22:1, 5-10) Fɛɛ sɛɛ lɛ, Hiob tee nɔ eye Yehowa anɔkwa. Eyɛ mli akɛ Hiob wie nibii komɛi ni esaaa moŋ, shi Yehowa na akɛ shihilɛ mli ni eyaje lɛ hewɔ ewie nakai lɛ. (Hiob 6:1-3) Nyɔŋmɔ diɛŋtsɛ na akɛ, Hiob ehao waa yɛ naagbai kɛ jɛmɔi ni Satan eto eshwie enɔ lɛ ahewɔ, ni kɛ̃lɛ, ekã he eeye Nyɔŋmɔ anɔkwa. Be ni kaa lɛ ba naagbee lɛ, Yehowa hã Hiob ná nibii ni eyɔɔ dani aka lɛ lɛ toi enyɔ, ni ekɛ afii 140 sɔŋŋ fata efii lɛ ahe. (Yak. 5:11) Hiob tee nɔ eye Yehowa anɔkwa yɛ afii nɛɛ fɛɛ amli. Te wɔfeɔ tɛŋŋ wɔleɔ enɛ? Hiob gbele lɛ sɛɛ afii ohai abɔ dani Ezekiel ŋma ŋmalɛ ni nikasemɔ nɛɛ damɔ nɔ lɛ.

19, 20. (a) Te wɔɔfee tɛŋŋ wɔná hemɔkɛyeli ni wɔbo Nyɔŋmɔ toi tamɔ Hiob? (b) Mɛɛ gbɛ nɔ wɔbaanyɛ wɔkase Nyɔŋmɔ ni wɔjie musuŋtsɔlɛ kpo?

19 Te wɔɔfee tɛŋŋ wɔná hemɔkɛyeli ni wɔbo Nyɔŋmɔ toi tamɔ Hiob? Ekɔɔɔ he eko shihilɛ mli ni wɔbaayaje lɛ, esa akɛ wɔhã Yehowa afee mɔ ni he hiaa fe fɛɛ yɛ wɔshihilɛ mli, ni wɔjɛ wɔtsuiŋ fɛɛ wɔkɛ wɔhiɛ afɔ̃ enɔ ni wɔbo lɛ toi. Anɔkwa, wɔyɛ yiŋtoi babaoo ahewɔ ni esa akɛ wɔfee nakai, ejaakɛ nibii ni wɔle lɛ pii yɛ ni Hiob leee. Akɛ nɔkwɛmɔnɔ lɛ, wɔle Satan kɛ eŋaatsɔi lɛ ahe saji babaoo. (2 Kor. 2:11) Saji ni yɔɔ Hiob wolo lɛ mli lɛ kɛ Biblia mli saji krokomɛi ahewɔ lɛ, wɔle nɔ hewɔ ni Nyɔŋmɔ ŋmɛɔ gbɛ ni adesai ana amanehulu. Daniel gbalɛ lɛ hu hãa wɔleɔ akɛ, Nyɔŋmɔ Maŋtsɛyeli lɛ baaye je lɛ fɛɛ nɔ, ni Kristo Yesu ji Maŋtsɛyeli nɛɛ nɔ Maŋtsɛ. (Dan. 7:13, 14) Ni wɔle akɛ etsɛŋ, Maŋtsɛyeli nɛɛ baahã adesai anaagbai fɛɛ asɛɛ afo kɛya naanɔ.

20 Hiob sane lɛ hãa wɔnaa hu akɛ, esa akɛ wɔmusuŋ atsɔ wɔ yɛ wɔnyɛmimɛi Kristofoi ni kɛ naagbai ni naa wala miikpe lɛ ahe. Amɛteŋ mɛi komɛi baanyɛ awie nibii komɛi ni esaaa, tamɔ bɔ ni Hiob fee lɛ. (Jaj. 7:7) Shi yɛ nɔ najiaŋ ni wɔbaaná amɛhe jwɛŋmɔ fɔŋ lɛ, esa akɛ wɔyoo nii sɛɛ ni wɔmusuŋ atsɔ wɔ yɛ amɛ he. Kɛ́ wɔfee nakai lɛ, no baatsɔɔ akɛ wɔmiikase Yehowa, wɔ-Tsɛ ni yɔɔ suɔmɔ ni naa mɔbɔ lɛ.​—Lala 103:8.

YEHOWA ‘BAAHÃ OHE AWA’

21. Mɛɛ gbɛ nɔ wiemɔi ni yɔɔ 1 Petro 5:10 lɛ kaiɔ wɔ nibii ni tee nɔ yɛ Noa, Daniel, kɛ Hiob shihilɛ mli?

21 Eyɛ mli akɛ Noa, Daniel, kɛ Hiob hi shi yɛ yinɔi srɔtoi amli ni esoro naagbai ni amɛteŋ mɔ fɛɛ mɔ kɛkpe moŋ, shi amɛfi shi ni amɛye Yehowa anɔkwa. Bɔ ni nibii tee lɛ ehã yɛ amɛshihilɛ mli lɛ kaiɔ wɔ sane ko ni bɔfo Petro wie lɛ, akɛ: “Be ni nyɛna amanehulu fioo sɛɛ lɛ, dromɔ fɛɛ Nyɔŋmɔ lɛ diɛŋtsɛ . . . baagbe nyɛtsɔsemɔ lɛ naa. Ebaahã nyɛhe awa, ebaawaje nyɛ, ebaahã nyɛnaji amɔmɔ shi jogbaŋŋ.”​—1 Pet. 5:10.

22. Mɛni he wɔbaasusu yɛ nikasemɔ ni nyiɛ sɛɛ lɛ mli?

22 Wiemɔi ni yɔɔ 1 Petro 5:10 lɛ kɔɔ Nyɔŋmɔ tsuji ni yɔɔ ŋmɛnɛ lɛ hu ahe. Yehowa ewo wɔ shi akɛ ebaahã wɔná hewalɛ kɛfi shi shiŋŋ. Wɔ fɛɛ wɔmiisumɔ ni Yehowa awaje wɔ koni wɔya nɔ wɔye lɛ anɔkwa, ni enɛ hewɔ wɔmiisumɔ ni wɔná hemɔkɛyeli ni wɔbo Nyɔŋmɔ toi tamɔ Noa, Daniel, kɛ Hiob lɛ. Yɛ nikasemɔ ni nyiɛ sɛɛ lɛ mli lɛ, wɔbaana akɛ nɔ titri ni hã hii nɛɛ nyɛ amɛye anɔkwa ji akɛ, amɛle Yehowa jogbaŋŋ. Anɔkwa, amɛnu nibii fɛɛ ni Yehowa kpaa gbɛ yɛ amɛdɛŋ lɛ shishi. (Abɛi 28:5) Wɔ hu wɔbaanyɛ wɔfee nakai.

^ kk. 2 Aŋɔ Ezekiel nom yɛ afi 617 D.Ŋ.B. Eŋma Ezekiel 8:1–19:14 lɛ be ni aŋɔ lɛ nom lɛ sɛɛ, yɛ “afi ni ji ekpaa lɛ mli,” ni tsɔɔ akɛ eŋma yɛ afi 612 D.Ŋ.B.

^ kk. 5 Noa papa Lamek he Nyɔŋmɔ nɔ eye, shi egbo aaafee afii enumɔ dani Nu Afua lɛ ba. Kɛ́ Noa mami kɛ enyɛmimɛi hii kɛ yei lɛ yɛ wala mli be ni Nu Afua lɛ ba lɛ, belɛ amɛyi náaa wala.

^ kk. 13 Eeenyɛ efee akɛ, Yehowa hã Daniel nanemɛi etɛ lɛ ná hegbɛi yɛ Babilon koni amɛ hu amɛye amɛbua ewebii lɛ.​—Dan. 2:49.