Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ—Nikasemɔ Nɔ  |  February 2017

 WALA SHIHILƐ HE SANE

Nyɔŋmɔ Jie Mlihilɛ Kpo Etsɔɔ Wɔ Yɛ Gbɛi Srɔtoi Anɔ

Nyɔŋmɔ Jie Mlihilɛ Kpo Etsɔɔ Wɔ Yɛ Gbɛi Srɔtoi Anɔ

ATSƐƆ mipapa Arthur, ni no mli lɛ esumɔɔ Nyɔŋmɔjamɔ waa. Be ni eji oblanyo lɛ, eshwe akɛ etsɔ Methodist osɔfo. Shi be ni ebɔi asafo lɛ woji lɛ kanemɔ kɛ asafoŋ kpeei yaa lɛ, etsake ejwɛŋmɔ. Abaptisi lɛ yɛ afi 1914. No mli lɛ, eye afii 17. Be ni awuɔ Jeŋ Ta I lɛ, awo lɛ tsuŋ nyɔji nyɔŋma yɛ Kingston Tsuŋwoohe lɛ yɛ Ontario, yɛ Canada, ejaakɛ ekɛɛ ehiɛŋ tu. Be ni ajie lɛ kɛje tsuŋwoohe lɛ, etsɔ gbɛgbalɔ.

Yɛ afi 1926 lɛ, mipapa Arthur Guest kɛ nyɛmi yoo ko ni emami ba anɔkwale lɛ mli yɛ afi 1908 lɛ bote gbalashihilɛ mli. Atsɛɔ nyɛmi yoo nɛɛ Hazel Wilkinson. Afɔ mi yɛ April 24, 1931, ni mi ji amɛbii ejwɛ lɛ ateŋ mɔ ni ji enyɔ nɔ. Wɔweku lɛ kɛ Yehowa sɔɔmɔ shwɛɛɛ kwraa, ni akɛni Biblia lɛ kã wɔpapa tsui nɔ waa hewɔ lɛ, eye ebua wɔ ni wɔ hu wɔbasumɔ Nyɔŋmɔ Wiemɔ lɛ waa. Bei pii lɛ, wɔfeɔ ekome akɛ weku kɛtsuɔ shĩa fɛɛ shĩa shiɛmɔ nitsumɔ lɛ.Bɔf. 20:20.

MIKƆ MIPAPA NANE

Yɛ afi 1939 lɛ, Jeŋ Ta II lɛ je shishi, ni enɔ afi lɛ, atsĩ Yehowa Odasefoi anitsumɔ lɛ naa yɛ Canada. No mli lɛ, kɛ́ wɔtee skul lɛ, ahãa skulbii lɛ ŋaa aflaŋaa lɛ, ni amɛláa jakumaŋ lalai. Shi akɛni mi kɛ minyɛmi yoo nukpa Dorothy efeee eko hewɔ lɛ, kɛ́ abaaŋa aflaŋaa lɛ, ashwieɔ wɔ kɛjeɔ skul tsũ lɛ mli. Gbi ko lɛ, mitsɔɔlɔ lɛ fee nɔ ko ni fee mi naakpɛɛ waa. Eshwie mihiɛ shi yɛ miskulbii lɛ ahiɛ akɛ gbeyeilɔ ji mi. Be ni akpa skul lɛ, miskulbii lɛ ekomɛi fee ekome ni amɛyi mi, ni amɛtsi mi amɛgbee shi. Shi nɔ ni amɛfee lɛ ejeee minijiaŋ wui, moŋ lɛ, ewo mi hewalɛ ni maya nɔ ‘mabo Nyɔŋmɔ moŋ toi akɛ nɔyelɔ fe gbɔmɛi.’Bɔf. 5:29.

 Abaptisi mi yɛ nu tanki ko mli yɛ kooloi alɛɛhe ko, yɛ July 1942, be ni miye afii 11. Daa afi kɛ́ wɔhã gbɛ lɛ, mitsuɔ gbɛhãmɔ gbɛgbamɔ nitsumɔ lɛ (nɔ ni amrɔ nɛɛ atsɛɔ lɛ gbɛgbalɔi awamɔ nitsumɔ lɛ). Be ko lɛ, mi kɛ nyɛmimɛi etɛ komɛi tee wɔyashiɛ wɔhã mɛi komɛi ni folɔɔ tsei yɛ shikpɔŋkuku ko ni yɔɔ Ontario kooyigbɛ ni akɛhãko asafo ko lɛ mli.

Mibatsɔ gbɛgbalɔ yɛ May 1, 1949. Nakai beiaŋ lɛ, aamamɔ tsũi komɛi yɛ nitsumɔhe nine lɛ, ni afɔ̃ mi nine ni mibaye mibua. No hewɔ lɛ, yɛ December 1 lɛ, mibafata Canada Betel weku lɛ he. He ni ahã mitsu nii yɛ ji he ni akalaa woji yɛ lɛ, ni mikase bɔ ni akɛ tsɔji ni yɔɔ jɛmɛ lɛ tsuɔ nii ahãa. Be ni wɔkalaa trati ko ni wieɔ bɔ ni awaa Yehowa webii lɛ ayi yɛ Canada lɛ he lɛ, mitsu nii gbɛkɛgbɛkɛ otsii pii.

Sɛɛ mli lɛ, akɛ mi tee Service Department lɛ. Be ko lɛ, gbɛgbalɔi komɛi ni miiya amɛyasɔmɔ yɛ Quebec lɛ ba nitsumɔhe nine lɛ, ni ahã mibibii amɛ saji. Nakai beiaŋ fɛɛ lɛ, aate shi aawo wɔnitsumɔ lɛ waa yɛ jɛmɛ. Atsɛɔ gbɛgbalɔi nɛɛ ateŋ mɔ kome Mary Zazula, ni ejɛ Edmonton, yɛ Alberta. Be ni Mary kɛ enyɛmi nukpa, Joe, bɔi Biblia lɛ kasemɔ lɛ, amɛfɔlɔi ni no mli lɛ amɛji Orthodox jamɔ lɛ mli bii lɛ kɛɛ amɛkpa, shi amɛkpaaa. No hewɔ lɛ, ashwie amɛ kɛjɛ shĩa. Yɛ June 1951 lɛ, abaptisi amɛyi enyɔ lɛ fɛɛ, ni no sɛɛ nyɔji ekpaa lɛ, amɛbatsɔmɔ gbɛgbalɔi. Be ni mibiɔ Mary saji lɛ, mina akɛ esumɔɔ Yehowa waa. Mikɛɛ mihe akɛ, ‘Kɛ́ minuuu sane gbonyo ko yɛ nyɛmi yoo nɛɛ he lɛ, etamɔ nɔ ni lɛ mikɛbaabote gbalashihilɛ mli.’ Nyɔji nɛɛhu sɛɛ, yɛ January 30, 1954 lɛ, wɔbote gbalashihilɛ mli. Enɔ otsi lɛ, afɔ̃ wɔ nine ni wɔba koni atsɔse wɔ kɛhã kpokpaa nɔkwɛmɔ nitsumɔ lɛ. Wɔkɛ afii enyɔ sɔmɔ kpokpaa ko yɛ Ontario kooyigbɛ.

Be ni shiɛmɔ nitsumɔ lɛ bɔi shweremɔ oyayaayai yɛ jeŋ fɛɛ lɛ, abi ni nyɛmimɛi kɛ amɛhe ahã koni atsɔse amɛ akɛ maŋsɛɛ sɔɔlɔi. Wɔbu akɔntaa akɛ, kɛ́ wɔnyɛɔ wɔdamɔɔ Canada fɛ̃i lɛ naa, ni yɛ latsaa beiaŋ hu lɛ, wɔnyɛɔ wɔkpeɔ tɔŋtɔŋi lɛ anaa lɛ, no lɛ wɔbaanyɛ wɔyasɔmɔ yɛ je nɛŋ he fɛɛ he, ekɔɔɔ he eko naagbai ni yɔɔ jɛmɛ. Afɔ̃ wɔ nine ní wɔba Gilead Skul lɛ klas ni ji 27 nɔ lɛ, ni wɔgbe skul lɛ naa yɛ July 1956. He ni akɛɛ wɔyasɔmɔ yɛ ji Brazil, ni wɔyashɛ jɛmɛ yɛ November mli.

MAŊSƐƐ SƆƆMƆ YƐ BRAZIL

Be ni wɔyashɛ Brazil nitsumɔhe nine lɛ, wɔbɔi Portuguese kasemɔ. Wɔkase ŋamɔi kɛ shiɛmɔ wiemɔ kuku ko, kɛkɛ ni wɔbɔi shiɛmɔ. Ahã wɔle akɛ, kɛ́ mɔ ko ná wiemɔ lɛ he miishɛɛ lɛ, wɔbaanyɛ wɔkane ŋmalɛi ni wieɔ bɔ ni shihilɛ baafee yɛ Nyɔŋmɔ Maŋtsɛyeli lɛ shishi lɛ wɔhã lɛ. Klɛŋklɛŋ gbi ni wɔtee shiɛmɔ lɛ, yoo ko bo sane lɛ toi waa. No  hewɔ lɛ, mikane Kpojiemɔ 21:3, 4 lɛ mihã lɛ, kɛkɛ ni nɔ nyɔ minɔ! Asomoaŋ, migbɔmɔtso lɛ nyɛɛɛ jɛmɛ dɔlɛ lɛ, ni ehe be saŋŋ dani minyɛ midamɔ naa.

Ahã wɔyafata nyɛmimɛi yei maŋsɛɛ sɔɔlɔi ejwɛ komɛi ahe yɛ maŋ ko ni yɔɔ Brazil ni atsɛɔ lɛ Campos lɛ mli. Amɛgbɛ́i ji: Esther Tracy, Ramona Bauer, Luiza Schwarz, kɛ Lorraine Brookes (ni amrɔ nɛɛ atsɛɔ lɛ Lorraine Wallen lɛ). Wɔ fɛɛ wɔhi shĩa kome mli. Be ni wɔtee jɛmɛ klɛŋklɛŋ kwraa lɛ, kuu kome pɛ yɔɔ jɛmɛ, shi amrɔ nɛɛ atse asafoi 15 yɛ jɛmɛ. Nitsumɔ ni ahã mi yɛ shĩa lɛ mli ji, niiahefɔmɔ kɛ lai lɛmɔ. Ju gbɛkɛ ko be ni wɔgbe Buu-Mɔɔ Nikasemɔ lɛ naa lɛ, miŋa kã tsũ mli sɛi lɛ ekome mli, ni wɔmiigba nibii ni tee nɔ yɛ gbi lɛ mli lɛ he sane. Be ni ewo eyitso nɔ akɛ eete shi lɛ, wɔleee he ni onufu jɛ yɛ sune lɛ shishi! Jɛmɛ fee hoo fioo kɛyashi migbe lɛ.

Wɔkɛ afi kome kase Portuguese, ni no sɛɛ lɛ, ahã misɔmɔ akɛ kpokpaa nɔkwɛlɔ. Wɔsɔmɔ yɛ akrowai amli, he ni sarawa hewalɛ bɛ. Wɔwɔ sai anɔ yɛ shikpɔŋ, ni wɔkɛ okpɔŋɔ kɛ shwiili ni fã gbɛ. Be ko be ni wɔshiɛɔ yɛ shikpɔŋkuku ko ni akɛwoko asafo ko dɛŋ lɛ mli lɛ, wɔkɛ oketeke fã gbɛ kɛtee maŋ ko ni yɔɔ gɔji lɛ anɔ lɛ mli. Wɔhai tsũ yɛ shĩa ko ni skulbii wɔɔ mli lɛ mli ni wɔwɔ jɛmɛ. Be ni wɔyɔɔ jɛmɛ lɛ, nitsumɔhe nine lɛ maje wɔ magazin 800 ni wɔkɛtsu nii yɛ shiɛmɔ nitsumɔ lɛ mli. No hewɔ lɛ, ehe bahia ni wɔya post ɔfis lɛ shii abɔ ni wɔyaloo woji lɛ kɛba he ni wɔyato lɛ.

Yɛ afi 1962 lɛ, afee Maŋtsɛyeli Sɔɔmɔ Skul lɛ ahã nyɛmimɛi hii ni yɔɔ Brazil lɛ, ni ahã nyɛmimɛi yei maŋsɛɛ sɔɔlɔi fata amɛhe. Nyɔji ekpaa ni mi kome miifã gbɛ kɛmiiya heihei miikwɛ skul lɛ nɔ ní Mary fataaa mihe. Mikwɛ skul lɛ nɔ yɛ Manaus, Belém, Fortaleza, Recife, kɛ Salvador. Mito kpee wulu ko he gbɛjianɔ yɛ Manaus. Afee kpee nɛɛ yɛ tsũ wulu ko ni ehe gbɛ́i waa lɛ mli. Nugbɔ nɛ waa ni efite nu ni wɔnuɔ lɛ kɛ he ni wɔhoɔ nii ni wɔyeɔ nii yɛ lɛ. (Yɛ nakai beiaŋ lɛ, ahoɔ nii yɛ kpeei wuji ashishi.) No hewɔ lɛ, miwó maŋ lɛ asraafoi lɛ atoi nɔ, ni asraafonyo nukpa ko to gbɛjianɔ koni ahã wɔ nu ni wɔbaanu kɛyashi wɔbaagbe kpee lɛ naa. Kɛfata he lɛ, ehã asraafoi komɛi fee agbai wuji enyɔ koni wɔhoo nii ni wɔye nii yɛ shishi.

Be ni mikwɛɔ skul lɛ nɔ lɛ, ahã Mary yashiɛ yɛ kpokpaa ko ni Portugalbii jarayelɔi fa yɛ jɛmɛ waa lɛ nɔ. Shika ehe mɛi ni yɔɔ jɛmɛ lɛ ajwɛŋmɔ fɛɛ. Enáaa mɔ kome po eshiɛ etsɔɔ. No hewɔ lɛ, ekɛɛ Betelbii komɛi akɛ, “Abaanyɛ akɛ mi aya he fɛɛ he, shi jeee Portugal.” Ewie sane nɛɛ etsɛɛɛ ni aŋma wɔ wolo akɛ wɔyasɔmɔ yɛ Portugal. Mary daaŋ jɔ! No beiaŋ lɛ, atsĩ nitsumɔ lɛ naa yɛ jɛmɛ, shi fɛɛ sɛɛ lɛ wɔtee.

 BƆ NI NITSUMƆ LƐ TEE LƐ EHÃ YƐ PORTUGAL

Wɔyashɛ Lisbon, yɛ Portugal, yɛ August 1964. Polisifoi ni yɔɔ Portugal ni tsuɔ amɛnitsumɔ lɛ yɛ dujiaŋ lɛ wa nyɛmimɛi lɛ ayi waa. Bɔ ni shihilɛ lɛ yɔɔ hewɔ lɛ, nyɛmimɛi lɛ ebakpeee wɔ ni wɔkɛ amɛ sharaaa hu. Wɔyahi tsũ ko ni skulbii wɔɔ mli lɛ mli, kɛyashi wɔnine shɛ wɔvisa nɔ. Be ni wɔná visa lɛ, wɔyahai tsũ diɛŋtsɛ. January 1965 dani wɔnyɛ wɔkɛ nitsumɔhe nine lɛ shara. Be klɛŋklɛŋ ni wɔtee asafoŋ kpeei lɛ, wɔná miishɛɛ waa, ejaakɛ nyɔji enumɔ sɔŋŋ ni wɔyako eko!

Ahã wɔle akɛ polisifoi lɛ yaa nyɛmimɛi lɛ ashĩai daa gbi amɛyamɔmɔɔ amɛ. Aŋamɔ Maŋtsɛyeli Asai babaoo, ni no hewɔ lɛ, afee asafoŋ kpeei lɛ yɛ nyɛmimɛi ashĩai amli. Amɔmɔ nyɛmimɛi ohai abɔ ni ayatataa amɛdaaŋ. Amralofoi lɛ jie amɛhiɛ amɛka nyɛmimɛi hii lɛ ni amɛwa amɛyi waa koni amɛtsɔɔ amɛ nyɛmimɛi ni kwɛɔ asafoŋ kpeei lɛ anɔ lɛ agbɛ́i. Enɛ hewɔ lɛ, kɛ́ nyɛmimɛi lɛ kɛ amɛhe miiwie lɛ, amɛtsɛɛɛ amɛgbɛ́i fɛɛ; amɛtsɛɔ gbɛ́i lɛ ekome pɛ, tamɔ ekolɛ José aloo Paulo, ni amɛkɛ nɔ ni fata he lɛ fataaa he. No hewɔ lɛ, nakai wɔ hu wɔfee.

Bɔ ni wɔbaafee wɔhã nyɛmimɛi lɛ aná asafo lɛ woji lɛ amɛkane lɛ bafee nɔ ni he hiaa wɔ fe fɛɛ. Ahã Mary tswa Buu-Mɔɔ lɛ mli saji ni abaakase lɛ kɛ woji krokomɛi ewo woji krɛdɛi komɛi ni akɛwoɔ tsɔne ni akɛfeɔ woji lɛ mli lɛ anɔ.

WƆFÃ SANE KPAKPA LƐ HE YƐ SANEYELIHEI

Yɛ June 1966 lɛ, akɛ nyɛmimɛi 49 ni yɔɔ Feijó Asafo lɛ mli lɛ fɛɛ tee saneyelihe. Afolɔ amɛnaa akɛ amɛtee kpee yɛ mɔ ko shĩa, ni akɛ, nɔ ni amɛfee lɛ teɔ shi woɔ maŋ lɛ mla. Mikɛ nyɛmimɛi lɛ fee ekome kɛkase bɔ ni esa akɛ amɛjie saji ni abaabibii amɛ lɛ anaa amɛhã. Mifee tamɔ nɔ ni miji mɔ ni folɔɔ amɛnaa lɛ, ni mibibii amɛ saji koni amɛjie naa. No mli lɛ, wɔle faŋŋ akɛ wɔyeŋ kunim yɛ saneyeli lɛ mli, shi wɔyɔse akɛ be ni yi aawula shi lɛ, ebaafee odaseyeli kpele kɛhã mɛi babaoo. Be ni mlalelɔ ni yadamɔ wɔnajiaŋ lɛ muɔ saji ni ewie kɛfã wɔhe lɛ naa lɛ, etsɛ nɔ ni Gamaliel wie yɛ klɛŋklɛŋ afii 100 lɛ mli lɛ sɛɛ. (Bɔf. 5:33-39) Awo nyɛmimɛi 49 lɛ fɛɛ tsuŋ. Akɛ mɛi komɛi wo mli nyɔji enumɔ kɛ fã, ni mɔ ni eyaaa kwraa lɛ, jeee gbii 45. Awie sane nɛɛ he yɛ redio, TV, kɛ adafitswaa woji amli. Miishɛɛ sane ji akɛ, mlalelɔ ni fee ekãa ni eyafã wɔhe lɛ bɔi Biblia kasemɔ kɛ asafoŋ kpeei baa dani egbo.

Yɛ December 1966 lɛ, awó mi nitsumɔhe nine nɔkwɛlɔ. Mikɛ be ni mikɛsɔmɔ akɛ nɔkwɛlɔ lɛ pii tsu mla saji ahe nii. Wɔye kunim yɛ saji babaoo amli, ni ebaafee faŋŋ akɛ, esaaa akɛ atsĩɔ Yehowa Odasefoi anaa. (Fil. 1:7) Yɛ December 18, 1974 lɛ, akɛ asafo lɛ gbɛ́i wo maŋ lɛ woji amli. Nyɛminuu Nathan Knorr kɛ Nyɛminuu Frederick Franz jɛ nitsumɔhe yitso lɛ amɛbafata wɔhe kɛda Yehowa shi yɛ  kpee krɛdɛɛ ko ni afee yɛ Oporto kɛ Lisbon lɛ shishi. Mɛi fɛɛ ni ba kpee lɛ ayibɔ ji, 46,870.

Heyeli nɛɛ hã nitsumɔ lɛ shwere yɛ ŋshɔkpɔi babaoo ni awieɔ Portuguese yɛ jɛmɛ lɛ anɔ. Ŋshɔkpɔi nɛɛ ekomɛi ji, Azores ŋshɔkpɔi lɛ, Cape Verde, Madeira, kɛ São Tomé and Príncipe. Shweremɔ nɛɛ hewɔ lɛ, ehe bahia ni agbele nitsumɔhe nine lɛ mli, ni yɛ afi 1988 lɛ, nakai pɛpɛɛpɛ afee. Yɛ April 23, 1988 lɛ, Nyɛminuu Milton Henschel fee sɛinɔtalɔ be ni ajɔɔ tsũi lɛ anɔ ahãa Yehowa lɛ. Mɛi 45,522 ba nifeemɔ nɛɛ shishi. Wɔná miishɛɛ waa akɛ nyɛmimɛi 20 ni esɔmɔ akɛ maŋsɛɛ sɔɔlɔi yɛ Portugal lɛ nyɛ amɛba nifeemɔ ni sa kadimɔ nɛɛ shishi.

NYƐMIMƐI ANƆKWAFOI NI WƆKƐBƆ LƐ YE AMƐBUA WƆ

Nyɛmimɛi anɔkwafoi ni wɔkɛbɔ lɛ eye ebua wɔ waa. Akɛ nɔkwɛmɔnɔ lɛ, mikase nɔ ko yɛ Nyɛminuu Theodore Jaracz dɛŋ be ni mifata ehe kɛyasara nitsumɔhe nine ko lɛ. No mli lɛ, nyɛmimɛi ni yɔɔ jɛmɛ lɛ kɛ naagba wulu ko miikpe, ni Nitsumɔhe Nine Ajinafoi Akuu lɛ efee he eko aahu, shi afu ma he ni ema. Nyɛminuu Jaracz na akɛ, nyɛmimɛi lɛ ehao, no hewɔ lɛ ekɛɛ amɛ akɛ: “Yoo, kɛ́ nyɛtsu fioo lɛ, efa, agbɛnɛ lɛ nyɛhãa mumɔ krɔŋkrɔŋ lɛ gbɛ ni lɛ hu etsu eko.” Be ko be ni mi kɛ Mary tee Brooklyn lɛ, wɔ kɛ nyɛmimɛi fioo komɛi yasara Nyɛminuu Franz. Be ni wɔbi Nyɛminuu Franz nɔ ni afii pii ni ekɛsɔmɔ Yehowa lɛ ehã ena, kɛ ŋaa ni ebaasumɔ ni ewo wɔ lɛ, ekɛɛ wɔ akɛ: “Nɔ ni makɛɛ nyɛ ji: Yɛ ŋɔɔmɔ mli jio, joomɔ mli jio lɛ, nyɛkpɛtɛa Yehowa gbɛjianɔtoo lɛ fã ni yɔɔ shikpɔŋ lɛ nɔ lɛ he. No pɛ ji gbɛjianɔtoo ni miitsu nitsumɔ ni Yesu fã ekaselɔi lɛ akɛ amɛtsu lɛ, akɛ amɛshiɛ Nyɔŋmɔ Maŋtsɛyeli lɛ he sane kpakpa lɛ!”

Wɔbo ŋaawoo nɛɛ toi, ni ehã wɔná miishɛɛ waa. Wɔhiɛ kpaŋ niiashikpamɔi ni wɔná be ni wɔsaraa nitsumɔhe niji srɔtoi lɛ anɔ kɔkɔɔkɔ. Saramɔi nɛɛ hã wɔná hegbɛ wɔjie hiɛsɔɔ ni wɔyɔɔ kɛhã mɛi fɛɛ, onukpai kɛ gbekɛbii bluublu, ni sɔmɔɔ Yehowa yɛ anɔkwayeli mli lɛ kpo, ni wɔwo amɛ hewalɛ ni amɛya nɔ amɛsɔmɔ Yehowa.

Amrɔ nɛɛ, mi kɛ Mary fɛɛ eye fe afii 80. Mary miye helai babaoo. (2 Kor. 12:9) Kai ni wɔkɛkpe lɛ ehã wɔhemɔkɛyeli kɛ wɔfai shi ni wɔtswa akɛ wɔbaaye Yehowa anɔkwa lɛ mli ewa. Kɛ́ wɔku wɔkuɛ wɔkwɛ wɔshihilɛ mli lɛ, wɔbaanyɛ wɔwie kɛ nɔmimaa akɛ, Yehowa ejie emlihilɛ lɛ kpo etsɔɔ wɔ yɛ gbɛi srɔtoisrɔtoi babaoo anɔ. *

^ kk. 29 Nyɛminuu Douglas Guest gbo yɛ October 25, 2015, be ni atoɔ sane nɛɛ he gbɛjianɔ lɛ. Eye Yehowa anɔkwa kɛyashi egbo.