Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) FEBRUARY 2017

Gbɛgbalɔi enyɔ, Nyɛminuu George Rollston kɛ Nyɛminuu Arthur Willis kɛ nu miiwo amɛtsɔne lɛ mli.—Australia Kooyigbɛ Kpokpaa lɛ nɔ, afi 1933

 AJIE KƐJƐ WƆNITOOHE LƐ

“Gbɛ Lɛ Nɔ Ehiii Jio, Ejekɛ Jio, No Jeee Naagba”

“Gbɛ Lɛ Nɔ Ehiii Jio, Ejekɛ Jio, No Jeee Naagba”

YƐ MARCH 1936 lɛ, hii enyɔ komɛi ni jɛ Sydney, yɛ Australia lɛ, kɛ tsɔne fã gbɛ kakadaŋŋ kɛtee Australia ŋa lɛ nɔ, ni ji maŋ lɛŋ hei ni etse amɛhe banee lɛ. Atsɛɔ hii enyɔ nɛɛ Arthur Willis kɛ Bill Newlands. Shi mɛni amɛtee kɔmɔ yɛ jɛmɛ? Ani amɛtee shisharamɔ? Dabi, amɛtee Maŋtsɛyeli lɛ he sane kpakpa lɛ shiɛmɔ. Be ni amɛkuɔ amɛsɛɛ kɛbaa Sydney yɛ March 26, 1937 lɛ, amɛfo gbɛ kilomitai 19,300 kɛ sɛɛ.

Yesu fã esɛɛnyiɛlɔi lɛ akɛ amɛye ehe odase “kɛyashi shikpɔŋ lɛ nɔ hei ni yɔɔ shɔŋŋshɔŋŋ lɛ.” (Bɔf. 1:8) Nyɛmimɛi fioo ni yɔɔ Australia lɛ na akɛ, kɛji amɛbaabo famɔ nɛɛ toi lɛ, belɛ jeee Australia ŋshɔnaa maji lɛ, ni ji hei ni no mli lɛ amɛfɔɔ shiɛmɔ yɛ lɛ pɛ amli esa akɛ amɛshiɛ yɛ. Amɛyɔse akɛ esa akɛ amɛkɛ sane kpakpa lɛ aya maji ni yɔɔ ŋa lɛ nɔ lɛ hu amli. Australia ŋa lɛ nɔ da waa. Ebaashɛ Ghana dalɛ toi 20 sɔŋŋ. Jɛmɛ dɔɔ waa, ni eyɛ dokoidokoi. No hewɔ lɛ, te Biblia Kaselɔi * fioo nɛɛ baafee tɛŋŋ amɛkɛ wiemɔ lɛ aya jɛmɛ? Amɛkɛ amɛhiɛ fɔ̃ Yehowa nɔ, ni amɛtswa amɛfai shi akɛ amɛbaatsu nɔ ni amɛbaanyɛ.

GBƐGBALƆI LƐ GBA GBƐ LƐ

Yɛ afi 1929 lɛ, asafoi ni yɔɔ Queensland kɛ Australia Anaigbɛ Kpokpaa lɛ nɔ lɛ fee tsɔji ni yɔɔ hewalɛ waa koni amɛkɛtsu ŋa lɛ nɔ hei ni yɔɔ amɛshikpɔŋkukuji lɛ amli lɛ amli nii. Amɛhala gbɛgbalɔi ni hiɛ wala ni le tsɔne saamɔ ni baanyɛ adamɔ dɔlɛ kɛ naagbai krokomɛi ni yɔɔ ŋa lɛ nɔ lɛ anaa, ni amɛwo amɛ gbɛ. Hei ni gbɛgbalɔi nɛɛ yashiɛ yɛ lɛ pii yɛ ni ashiɛko yɛ jɛmɛ pɛŋ.

Gbɛgbalɔi ni bɛ shika ni amɛkɛbaahe tsɔne lɛ, ta baisiko kɛtee shiɛmɔ yɛ ŋa lɛ nɔ. Akɛ nɔkwɛmɔnɔ lɛ, yɛ afi 1932 lɛ, Nyɛminuu Bennett Brickell, ni no mli lɛ eye afii 23 lɛ yi gbɛ kɛjɛ Rockhampton, yɛ Queensland, akɛ ekɛ nyɔji enumɔ yaashiɛ yɛ nakai kpokpaa lɛ kooyigbɛ. Eto kuntui, atadei, niyenii, kɛ woji pii ewo ebaisiko lɛ nɔ, kɛkɛ ni eyi mli. Eshiɛ aahu ni ebaisiko lɛ tai lɛ fɛɛ tsirɛ, shi no po hãa enijiaŋ aje wui ni eku esɛɛ. Ekɛ ehiɛ fɔ̃ Yehowa nɔ akɛ ebaaye ebua lɛ. No hewɔ lɛ, enyiɛ enane nɔ ni etsi baisiko lɛ kɛfo kilomitai 320 ni eshwɛ lɛ. Mɛi ni eka akɛ amɛbaanyiɛ kɛfo gbɛ ni efo lɛ ateŋ mɛi babaoo shɛɛɛ he ni amɛyaa ni kumai gbeɔ amɛ. Nyɛminuu Brickell kɛ nɔ ni fe afii 30 shiɛ kɛkpa Australia  fɛɛ. Ekɛ baisiko, moto, kɛ lɔle fã gbɛ shitoi akpei ohai abɔ kɛshiɛ sane kpakpa lɛ. Lɛ ji mɔ klɛŋklɛŋ ni yashiɛ ehã Australia Shikwɛ̃ɛbii ni yɔɔ ŋa lɛ nɔ lɛ, ni efata he ni atse asafoi yɛ jɛmɛ. Ŋa lɛ nɔ bii lɛ pii bale lɛ jogbaŋŋ ni amɛshwɛɛɛ ehe kwraa.

NAAGBAI NI AMƐKƐKPE

Kɛ́ akɛ Australia maŋ lɛ dalɛ kɛ mɛi abɔ ni yɔɔ jɛmɛ lɛ to maji pii anɔ he lɛ, amɛyi faaa kwraa, titri lɛ mɛi ni yɔɔ ŋa lɛ nɔ lɛ. No hewɔ lɛ, mɔdɛŋ ni Yehowa webii lɛ bɔ akɛ amɛbaashiɛ sane kpakpa lɛ yɛ ŋa lɛ nɔ lɛ sa kadimɔ waa.

Akɛ nɔkwɛmɔnɔ lɛ, susumɔ niiashikpamɔ ni gbɛgbalɔi enyɔ komɛi ni atsɛɔ amɛ Stuart Keltie kɛ William Torrington lɛ ná lɛ he okwɛ. Yɛ afi 1933 lɛ, amɛfã gbɛ kɛtsɔ shia ŋa ko ni kã shi shwaŋŋ ni atsɛɔ lɛ Simpson Shia Ŋa lɛ nɔ, koni amɛyashiɛ yɛ Alice Springs, ni ji maŋ ko ni yɔɔ Australia teŋ tuuntu lɛ. Yɛ gbɛ lɛ nɔ lɛ, tsɔne bibioo ni amɛhiɛ lɛ fite bɔ ni ehiii saamɔ. Shi akɛni amɛtswa amɛfai shi akɛ amɛbaatsu amɛshikpɔŋkuku lɛ mli nii amɛgbe naa hewɔ lɛ, amɛshi amɛma shi ni amɛtsa shiɛmɔ lɛ nɔ. Nyɛminuu Keltie nane kome ehiii, no hewɔ lɛ, eta afukpɔŋɔ nɔ kɛtsa nɔ. Gbɛgbalɔi enyɔ nɛɛ adeŋmegbomɔ lɛ efeee yaka. Gbɔiatoohe nɔkwɛlɔ ko ni amɛshiɛ amɛhã yɛ William Creek, ni ji oketekei adaamɔhe ko ni etse ehe banee lɛ bamɔ anɔkwale lɛ mli. Atsɛɔ nuu nɛɛ Charles Bernhardt. Charles hɔ̃ɔ egbɔiatoohe lɛ, ni ebatsɔ gbɛgbalɔ. Ekome ekɛ afii 15 shiɛ yɛ Australia hei komɛi ni etse amɛhe waa ni nu bɛ jɛmɛ lɛ.

Nyɛminuu Arthur Willis miito nibii eewo etsɔne lɛ mli koni eyashiɛ yɛ Australia ŋa lɛ nɔ.—Perth, Australia Anaigbɛ Kpokpaa lɛ nɔ, afi 1936

Gbɛgbalɔi nɛɛ kɛ gbɛgbalɔi krokomɛi ni shiɛ yɛ ŋa lɛ nɔ lɛ fee ekãa waa, ni amɛhãaa nɔ ko nɔ ko aje amɛnijiaŋ wui. Be ko lɛ, ehe Arthur Willis kɛ Bill Newlands ni wɔtsĩ amɛtã yɛ sane nɛɛ shishijee lɛ otsii enyɔ dani amɛnyɛ amɛfã gbɛ kilomitai 32, ejaakɛ nugbɔ enɛ waa ni ehã shia ŋa lɛ nɔ fɛɛ etsɔ ŋmɔtɔ. Bei komɛi lɛ, amɛyiɔ shi ni amɛtsiɔ amɛtsɔne lɛ yɛ hulu ni tsoɔ gbaŋgbaŋ lɛ nɔ kɛkwɔɔ shia gɔji wuji ni yɔɔ ŋa lɛ nɔ lɛ. Amɛtsɔmɔ jɔi ni mli eyimɔ kɛ tɛi wuji amli, ni amɛfo fai srɔtoi. Amɛtsɔne lɛ fite shii abɔ, ni kɛ́ efite lɛ, amɛtaa baisiko loo amɛnyiɛɔ gbii abɔ kɛyaa maji ni bɛŋkɛ amɛ lɛ amli. Amɛmɛɔ yɛ jɛmɛ otsii abɔ kɛyashi amɛnine baashɛ nɔ ni efite yɛ tsɔne lɛ he lɛ nɔ koni amɛkɛsaa. Shi naagbai nɛɛ fɛɛ asɛɛ lɛ, nyɛmimɛi lɛ anijiaŋ ejeee wui. Sɛɛ mli lɛ, Arthur Willis tsɛ oti ko ni awie he yɛ The Golden Age magazin lɛ mli lɛ sɛɛ, ni ewie akɛ: “Gbɛ lɛ nɔ ehiii jio, ejekɛ jio, no jeee naagba kɛhã E-dasefoi lɛ.”

Nyɛminuu Charles Harris ni kɛ afii babaoo sɔmɔ akɛ gbɛgbalɔ lɛ wie akɛ, naagbai ni ekɛkpe yɛ ŋa lɛ nɔ, kɛ bɔ ni jɛmɛ etse ehe banee lɛ hã etsi ebɛŋkɛ Yehowa. Ewie kɛfata he akɛ: “Kɛ́ oyɛ heloonaa nibii fioo pɛ lɛ, ehi kwraa fe kɛ́ oyɛ heloonaa nibii babaoo. Kɛ́ egbaaa Yesu naa akɛ ebaawɔ agbonaa kɛ́ ehe bahia ni efee nakai lɛ, belɛ wɔ hu esaaa akɛ egbaa wɔnaa akɛ wɔbaafee nakai yɛ sɔɔmɔ nitsumɔ lɛ hewɔ.” Nakai pɛpɛɛpɛ gbɛgbalɔi pii fee. Amɛkɛ amɛhewalɛ fɛɛ shiɛ kɛtee Australia maŋ lɛ mli he fɛɛ he, ni amɛye amɛbua mɛi babaoo ni amɛbatsɔmɔ Nyɔŋmɔ Maŋtsɛyeli lɛ shishi bii.

^ kk. 4 Yɛ afi 1931 lɛ, Biblia Kaselɔi lɛ tsake amɛgbɛ́i lɛ ni amɛfee lɛ Yehowa Odasefoi.Yes. 43:10.