Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ) FEBRUARY 2017

Sanebimɔi Ni Jɛ Kanelɔi Adɛŋ

Sanebimɔi Ni Jɛ Kanelɔi Adɛŋ

Bɔfo Paulo wie akɛ Yehowa hãŋ “aka nyɛ fe bɔ ni nyɛbaanyɛ naa nyɛdamɔ.” (1 Kor. 10:13) Ani enɛ tsɔɔ akɛ Yehowa tsɔɔ hiɛ ekwɛɔ naagbai kɛ shihilɛi ni wɔbaanyɛ naa wɔdamɔ, ni edamɔɔ no nɔ ehalaa kai ni ebaaŋmɛ gbɛ ni wɔkɛkpe?

Kɛ́ nakai Yehowa feɔ lɛ, ani no etsɔŋ akɛ lɛ ekudɔɔ nɔ fɛɛ nɔ ni yaa nɔ yɛ wɔshihilɛ mli? Be ni nyɛmi nuu ko binuu gbe ehe lɛ, ebi akɛ: ‘Ani Yehowa tsɔ hiɛ ekwɛ mi kɛ miŋa shihilɛ mli ni ena akɛ kɛ́ wɔbi lɛ gbe ehe lɛ, wɔbaanyɛ naa wɔdamɔ? Ani Nyɔŋmɔ ŋmɛ gbɛ ni wɔyaje shihilɛ nɛɛ mli, akɛni etsɔ hiɛ ena akɛ wɔbaanyɛ wɔkpee naa lɛ hewɔ?’ Te esa akɛ wɔnu Paulo wiemɔi lɛ ashishi wɔhã tɛŋŋ?

Ŋmalɛi lɛ hãa wɔleɔ akɛ, Yehowa tsɔɔɔ hiɛ ekwɛɛɛ naagbai kɛ shihilɛi ni wɔbaanyɛ naa wɔdamɔ, ní edamɔ no nɔ ehala kai ni ebaaŋmɛ gbɛ ni wɔkɛkpe, ni nɔ ni Paulo wie yɛ 1 Korintobii 10:13 lɛ eteee shi ewooo Ŋmalɛi lɛ. Hã wɔkwɛ yiŋtoi ejwɛ ahewɔ ni wɔbaanyɛ wɔmu sane naa nakai.

Klɛŋklɛŋ lɛ, Yehowa ehã adesai heyeli. Ehã wɔ hegbɛ ni wɔ diɛŋtsɛ wɔkpɛ wɔyiŋ yɛ saji ahe. (5 Mose 30:19, 20; Yosh. 24:15) Kɛ́ wɔkpɛ wɔyiŋ yɛ nilee mli lɛ, wɔbaanyɛ wɔná nɔmimaa akɛ, Yehowa baatsɔɔ wɔ gbɛ. (Abɛi 16:9) Shi kɛ́ wɔkpɛ yiŋ gbonyo lɛ, wɔbaakpa emli yibii. (Gal. 6:7) Eji Yehowa ni halaa kai ni wɔkɛbaakpe kulɛ, ehãŋ wɔ hegbɛ ni wɔ diɛŋtsɛ wɔkpɛ wɔyiŋ yɛ saji komɛi ahe. Ni kɛ́ efee nakai lɛ, ani jeee wɔheyeli lɛ eshɔ̃ɔ yɛ wɔdɛŋ lɛ?

Nɔ ni ji enyɔ lɛ, Yehowa ejieee wɔ kɛjeee osharai ni baa trukaa lɛ amli. (Jaj. 9:11, 12) Nɔ fɔŋ ko baanyɛ anina wɔteŋ mɔ fɛɛ mɔ, ní eleee ehe be. Yesu wie mɛi 18 komɛi ni mɔɔ ko kumɔ eshwie amɛnɔ lɛ ahe, ni ehã efee faŋŋ akɛ, jeee Nyɔŋmɔ ni hã amɛgboi. (Luka 13:1-5) Osharai baa trukaa, no hewɔ lɛ nilee bɛ mli akɛ wɔbaakɛɛ akɛ Nyɔŋmɔ tsɔɔ hiɛ ehalaa mɛi ni baagboi kɛ mɛi ni baaná wala yɛ osharai amli.

Nɔ ni ji etɛ lɛ, Satan kɛɛ wɔyeŋ Yehowa anɔkwa be fɛɛ be. Satan efolɔ Yehowa tsuji fɛɛ anaa. Ekɛɛ kɛ́ wɔkɛ kai kpe loo wɔyaje shihilɛi ni mli wala amli lɛ, wɔyeŋ Yehowa anɔkwa, ejaakɛ nɔ ni wɔbaaná yɛ Yehowa dɛŋ lɛ hewɔ wɔjáa lɛ. (Hiob 1:9-11; 2:4; Kpoj. 12:10) No hewɔ lɛ, kɛ́ Yehowa hãaa wɔkɛ kai komɛi akpe, akɛni etsɔ hiɛ ena akɛ wɔnyɛŋ  nomɛi anaa wɔdamɔ hewɔ lɛ, ani no hãŋ efee tamɔ nɔ ni Satan sane ja?

Nɔ ni ji ejwɛ lɛ, jeee nɔ fɛɛ nɔ ni baaya nɔ yɛ wɔshihilɛ mli lɛ Yehowa tsɔɔ hiɛ eleɔ. Kɛ́ eji anɔkwale akɛ Nyɔŋmɔ tsɔɔ hiɛ ehalaa kai ni ebaaŋmɛ gbɛ ni wɔkɛkpe lɛ, belɛ no tsɔɔ akɛ, ele nɔ fɛɛ nɔ ni baaba wɔnɔ. Shi ani nakai eji? Dabi. Biblia lɛ hãa wɔleɔ akɛ, Yehowa baanyɛ atsɔ hiɛ ale nɔ fɛɛ nɔ ni baaba wɔsɛɛ. (Yes. 46:10) Shi ehãa wɔleɔ hu akɛ, jeee be fɛɛ be ekɛ hewalɛ nɛɛ tsuɔ nii. (1 Mose 18:20, 21; 22:12) Yehowa eduro wɔ heyeli, no hewɔ lɛ eesumɔ ni wɔ diɛŋtsɛ wɔkpɛ wɔyiŋ yɛ saji ahe. Esumɔŋ ni ekɛ hewalɛ ni eyɔɔ ni ekɛaale wɔsɛɛ sane lɛ feɔ nɔ ko ni baahã efee tamɔ nɔ ni lɛ ehãa wɔkpɛɔ yiŋ srɔtoi ni wɔkpɛɔ lɛ.5 Mose 32:4; 2 Kor. 3:17.

Kɛ́ nakai ni lɛ, belɛ mɛni Paulo tsɔɔ be ni ewie akɛ Nyɔŋmɔ hãŋ “aka nyɛ fe bɔ ni nyɛbaanyɛ naa nyɛdamɔ” lɛ? Paulo wiemɔi nɛɛ kɔɔ nɔ ni Nyɔŋmɔ feɔ be ni wɔkɛ shihilɛ ko ni mli wa miikpe lɛ he, shi jeee nɔ ni efeɔ dani wɔyajeɔ shihilɛ lɛ mli. * Ewiemɔi lɛ hãa wɔnáa nɔmimaa akɛ, kɛ́ wɔkɛ wɔhiɛ fɔ̃ Yehowa nɔ lɛ, ebaaye ebua wɔ ni wɔnyɛ wɔkpee jaramɔ shihilɛ fɛɛ jaramɔ shihilɛ ni wɔkɛbaakpe lɛ naa. (Lala 55:23) Paulo wiemɔi ni woɔ mɔ hewalɛ nɛɛ damɔ anɔkwa saji enyɔ komɛi ni he hiaa waa lɛ anɔ.

Klɛŋklɛŋ nɔ lɛ ji akɛ, naagbai ni wɔkɛkpeɔ lɛ eko bɛ ní jeee “gbɔmɛi ahe nɔ.” Bei abɔ ni wɔyɔɔ jeŋ fɔŋ nɛɛ mli lɛ, wɔkɛ naagbai srɔtoi baakpe, ni oshara baanyɛ anina wɔ. Shi kɛ́ wɔkɛ wɔhiɛ fɔ̃ Nyɔŋmɔ nɔ lɛ, wɔbaanyɛ wɔkpee fɛɛ naa. (1 Pet. 5:8, 9) Dani Paulo baawie wiemɔi ni yɔɔ 1 Korintobii 10:13 lɛ, ewie kai ni Israelbii lɛ kɛkpe yɛ ŋa lɛ nɔ lɛ ahe. (1 Kor. 10:6-11) Kai nɛɛ eko kwraa bɛ ni kulɛ amɛnyɛŋ naa amɛdamɔ. Anɔkwa, amɛteŋ mɛi ni kɛ amɛhiɛ fɔ̃ Yehowa nɔ lɛ nyɛ amɛkpee fɛɛ naa. Shi “amɛteŋ mɛi komɛi” kɛ amɛhiɛ efɔ̃ɔɔ Yehowa nɔ, ni no hã amɛgbo enɔ toi lɛ.

Nɔ ni ji enyɔ lɛ ji akɛ, “anɔkwafo ji Nyɔŋmɔ.” Bɔ ni Nyɔŋmɔ kɛ ewebii eye ehã kɛjɛ blema lɛ hãa wɔnaa faŋŋ akɛ, Nyɔŋmɔ jieɔ esuɔmɔ ni tsakeee lɛ kpo etsɔɔ “mɛi ní sumɔɔ lɛ kɛ mɛi ní yeɔ ekitai lɛ anɔ” lɛ. (5 Mose 7:9) Ehãa wɔnaa hu akɛ, eyeɔ eshiwoi fɛɛ anɔ. (Yosh. 23:14) Enɛ hewɔ lɛ, mɛi fɛɛ ni sumɔɔ lɛ ni amɛboɔ lɛ toi lɛ baanyɛ aná nɔmimaa akɛ, tamɔ bɔ ni ewo shi lɛ: (1) Ehãŋ shihilɛ ni amɛkɛkpeɔ lɛ mli awa aahu akɛ, amɛnyɛɛɛ naa amɛdamɔ dɔŋŋ, ni (2) “ebaaje gbɛ” ni amɛkɛaaje mli ehã amɛ.

Yehowa “shɛjeɔ wɔmii yɛ wɔjaramɔ shihilɛi fɛɛ mli”

Mɛɛ gbɛ nɔ Yehowa tsɔɔ ‘ejeɔ gbɛ’ ehãa mɛi ni kɛ amɛhiɛ fɔ̃ɔ enɔ lɛ? Kɛ́ Yehowa miisumɔ lɛ, ebaanyɛ ejie naagba lɛ kɛje jɛmɛ kwraa. Shi kadimɔ akɛ Paulo wie akɛ: “Ebaaje [ni ji Yehowa baaje] gbɛ ni nyɛkɛaaje mli hu ehã nyɛ koni nyɛnyɛ naa nyɛdamɔ.” No hewɔ lɛ, bei pii lɛ, nɔ ni Yehowa feɔ ‘kɛjeɔ gbɛ’ lɛ ji, ewajeɔ wɔ koni wɔnyɛ wɔkpee shihilɛ lɛ naa ni wɔya nɔ wɔye lɛ anɔkwa. Susumɔ gbɛi ni nyiɛ sɛɛ nɛɛ ni etsɔɔ nɔ efeɔ nakai lɛ ahe okwɛ.

  • ‘Eshɛjeɔ wɔmii yɛ wɔjaramɔ shihilɛi fɛɛ amli.’ (2 Kor. 1:3, 4) Yehowa baanyɛ atsɔ Biblia lɛ, emumɔ krɔŋkrɔŋ lɛ, kɛ nyɔŋ anɔkwafo lɛ nɔ ejɔɔ wɔtsui kɛ wɔjwɛŋmɔ he, ni eye ebua wɔ ni wɔkafee yeyeeye fe nine.Mat. 24:45; Yoh. 14:16, sh. niŋ., Rom. 15:4.

  • Ebaanyɛ etsɔ emumɔ krɔŋkrɔŋ lɛ nɔ etsɔɔ wɔ gbɛ. (Yoh. 14:26) Kɛ́ wɔyaje shihilɛ ko ni jaraa mli lɛ, Yehowa mumɔ lɛ baanyɛ ahã wɔkai Biblia mli sane ko loo shishitoo mla ko, ni eye ebua wɔ ni wɔna bɔ ni wɔbaafee wɔkɛtsu nii.

  • Ebaanyɛ etsɔ ŋwɛibɔfoi lɛ anɔ eye ebua wɔ.Heb. 1:14.

  • Ebaanyɛ etsɔ wɔnyɛmimɛi Kristofoi lɛ anɔ eye ebua wɔ. Wɔnyɛmimɛi lɛ baanyɛ ‘aye abua wɔ ni amɛwaje wɔ’ kɛtsɔ amɛwiemɔi kɛ amɛnifeemɔi anɔ.Kol. 4:11, sh. niŋ.

No hewɔ lɛ, Paulo wiemɔi ni yɔɔ 1 Korintobii 10:13 lɛ etsɔɔɔ akɛ Nyɔŋmɔ kwɛɔ naagbai kɛ shihilɛi ni wɔbaanyɛ naa wɔdamɔ, ni edamɔɔ no nɔ ehalaa kai ni ebaaŋmɛ gbɛ ni wɔkɛkpe. Kɛ̃lɛ, wɔbaanyɛ wɔná nɔmimaa akɛ, kɛ́ wɔkɛ wɔhiɛ fɔ̃ Yehowa nɔ kɛ wɔtsui fɛɛ lɛ, wɔbaanyɛ wɔkpee jaramɔ shihilɛ fɛɛ jaramɔ shihilɛ kɛ naagba fɛɛ naagba ni wɔkɛbaakpe lɛ naa, ejaakɛ Yehowa ‘baaje gbɛ’ ni wɔkɛaaje mli ehã wɔ koni wɔnyɛ naa wɔdamɔ. Enɛ shɛjeɔ wɔmii waa!

^ kk. 2 Hela wiemɔ ni atsɔɔ shishi akɛ “kaa” lɛ baanyɛ akɔ shihilɛi ni jaraa hu ahe.