Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Wo “Nɔ Ni Nyɔŋmɔ Kɛtsa Lɛ” Hiɛ Nyam

Wo “Nɔ Ni Nyɔŋmɔ Kɛtsa Lɛ” Hiɛ Nyam

“Nɔ ni Nyɔŋmɔ kɛtsa lɛ, gbɔmɔ ko akagbála mli.”​—MAR. 10:9.

LALAI: 131, 132

1, 2. Mɛni esa akɛ Hebribii 13:4 lɛ atsirɛ wɔ ni wɔfee?

WƆ FƐƐ wɔmiisumɔ ni wɔwo Yehowa hiɛ nyam, aloo jeee nakai? Ni enɛ hi jogbaŋŋ, ejaakɛ Yehowa sa woo, ni ewo shi akɛ kɛ́ wɔwo ehiɛ nyam lɛ, lɛ hu ebaawo wɔhiɛ nyam. (1 Sam. 2:30; Abɛi 3:9; Kpo. 4:11) Yehowa miisumɔ hu ni wɔjie bulɛ kpo wɔtsɔɔ amralofoi lɛ kɛ mɛi krokomɛi ni tamɔ nakai. (Rom. 12:10; 13:7) Shi nɔ kome ko yɛ ni Yehowa miisumɔ ni wɔwo hiɛ nyam waa. No ji gbalashihilɛ.

2 Bɔfo Paulo wie akɛ: “Awo gbalashihilɛ hiɛ nyam yɛ mɛi fɛɛ ateŋ, ni akabule gbalashihilɛ saa lɛ.” (Heb. 13:4) Kadimɔ akɛ Paulo ekɛɛɛ akɛ “gbalashihilɛ hiɛ nyam,” oookɛɛ nɔ ni eekɛɛ Kristofoi lɛ anɔkwa sane ko ni eetao amɛle kɛkɛ. Moŋ lɛ, ekɛɛ akɛ, “awo gbalashihilɛ hiɛ nyam,” ni tsɔɔ akɛ ekɛ gbɛtsɔɔmɔ miihã amɛ. Eekɛɛ amɛ akɛ, amɛkabu gbalashihilɛ akɛ nɔ ko fɛlɛfɛlɛ ko kɛkɛ, shi moŋ amɛwo hiɛ nyam. No hewɔ lɛ, te onaa gbalashihilɛ ohãa tɛŋŋ? Ni kɛ́ obote gbalashihilɛ mli lɛ, ani oowo ogbãla lɛ hiɛ nyam?

3. Mɛɛ ŋaa ni he hiaa Yesu wo yɛ gbalashihilɛ he? (Kwɛmɔ mfoniri ni yɔɔ nikasemɔ lɛ shishijee lɛ.)

3 Kɛ́ oowo ogbãla lɛ hiɛ nyam lɛ, belɛ onyiɛ Yesu nɔkwɛmɔnɔ kpakpa lɛ sɛɛ, ejaakɛ Yesu wo gbalashihilɛ hiɛ nyam. Be ni Farisifoi lɛ bi lɛ gbalatsemɔ he sane lɛ, etsɛ nɔ ni Nyɔŋmɔ wie yɛ klɛŋklɛŋ gbalashihilɛ lɛ he lɛ yisɛɛ, akɛ: “Enɛ hewɔ lɛ, nuu baashi epapa kɛ emami, ni  amɛyi enyɔ lɛ fɛɛ amɛbaatsɔ heloo kome.” Kɛkɛ ni ewie kɛfata he akɛ: “Nɔ ni Nyɔŋmɔ kɛtsa lɛ, gbɔmɔ ko akagbála mli.”​—Kanemɔ Marko 10:2-12; 1 Mo. 2:24.

4. Be enyiɛ Yehowa to akɛ gbalashihilɛ mli bii ahi shi akɛ wu kɛ ŋa kɛyashi?

4 Nɔ ni Yesu wie nɛɛ tsɔɔ akɛ ele akɛ Nyɔŋmɔ ni to gbalashihilɛ he gbɛjianɔ, ni akɛ esaaa akɛ atseɔ gbãla. Be ni Nyɔŋmɔ kɛ Hawa bahã Adam akɛ eŋa lɛ, Nyɔŋmɔ ekɛɛɛ amɛ akɛ amɛbaanyɛ amɛtse gbãla. Moŋ lɛ, eto akɛ “amɛyi enyɔ lɛ” amɛhi shi akɛ wu kɛ ŋa kɛya naanɔ.

NIBII NI TSAKE GBALASHIHILƐ GBƐJIANƆTOO LƐ KƐYASHI BE KO

5. Mɛɛ gbɛ nɔ gbele saa gbalashihilɛ he?

5 Tamɔ bɔ ni wɔle lɛ, be ni Adam fee esha lɛ, nibii pii tsake. Tsakemɔi nɛɛ ateŋ ekome ji akɛ, adesai bɔi gboimɔ, ni enɛ sa gbalashihilɛ he. Sane ko ni bɔfo Paulo wie lɛ hãa wɔnaa enɛ faŋŋ. Ewie akɛ gbele ji nɔ ni kɛ gbalashihilɛ baa naagbee, ni kɛ́ eba lɛ nakai lɛ, mɔ ni agbo ashi lɛ lɛ baanyɛ abote gbalashihilɛ mli ekoŋŋ.​—Rom. 7:1-3.

6. Mɛɛ gbɛ nɔ Mose Mla lɛ hãa wɔnaa bɔ ni Nyɔŋmɔ naa gbalashihilɛ ehãa?

6 Gbalashihilɛ he saji babaoo yɛ Mla ni Nyɔŋmɔ kɛhã Israelbii lɛ mli. Akɛ nɔkwɛmɔnɔ lɛ, Mla lɛ hã Israel hii hegbɛ ni amɛkɛ yei enyɔ loo nɔ ni fe nakai abote gbalashihilɛ mli. Shi dani Nyɔŋmɔ kɛ Mla lɛ baahã amɛ po lɛ, no mli lɛ hii pii feɔ nakai momo. Kɛ̃lɛ, Mla lɛ kɛ gbɛtsɔɔmɔi hã yɛ gbalashihilɛ ni tamɔ nɛkɛ lɛ he, bɔ ni afee ni akafee yei kɛ gbekɛbii niseniianii. Akɛ nɔkwɛmɔnɔ lɛ, kɛ́ Israel nuu ko kɛ nyɔŋ ko bote gbalashihilɛ mli, ni sɛɛ mli lɛ, ekɛ yoo kroko hu bote gbalashihilɛ mli lɛ, esa akɛ eya nɔ ekwɛ eklɛŋklɛŋ ŋa lɛ jogbaŋŋ tamɔ bɔ ni efeɔ dani ekɛ yoo ni ji enyɔ lɛ hi shi lɛ. Nyɔŋmɔ bi ni nuu lɛ aya nɔ ahã klɛŋklɛŋ yoo lɛ ehiamɔ nii ni ebu ehe. (2 Mo. 21:9, 10) Eyɛ mli akɛ ŋmɛnɛ lɛ, wɔbɛ Mose Mla lɛ shishi dɔŋŋ moŋ, shi Mla lɛ hãa wɔnaa akɛ Yehowa ebuuu gbalashihilɛ akɛ nɔ ko fɛlɛfɛlɛ kwraa. Enɛ woɔ wɔ hewalɛ ni wɔ hu wɔwo gbalashihilɛ hiɛ nyam, aloo jeee nakai?

7, 8. (a) Yɛ nɔ ni aŋma yɛ 5 Mose 24:1 lɛ naa lɛ, mɛni Mla lɛ wie yɛ gbalatsemɔ he? (b) Te Yehowa naa gbalatsemɔ ehãa tɛŋŋ?

7 Mɛni Mla lɛ wie yɛ gbalatsemɔ he? Eyɛ mli akɛ Nyɔŋmɔ etooo ni atse gbãla moŋ, shi Mla lɛ ŋmɛ gbɛ ni Israelbii lɛ ashwie amɛŋamɛi kɛji amɛna “hiɛgbejianii ko” yɛ amɛhe. (Kanemɔ 5 Mose 24:1.) Mla lɛ etsɔɔɔ nɔ ni “hiɛgbejianii” nɛɛ ji. Shi ekã shi faŋŋ akɛ, ebaafee nɔ ko ni yɔɔ hiɛgbele waa loo tɔmɔ ko ni yɔɔ hiɛdɔɔ waa, jeee tɔmɔ bibioo ko kɛkɛ. (5 Mo. 23:14) Dɔlɛ sane ji akɛ, be ni shɛɔ Yesu beiaŋ lɛ, Yudafoi pii ‘miishwie amɛŋamɛi yɛ sane fɛɛ sane hewɔ.’ (Mat. 19:3) Wɔsumɔŋ wɔkɔ amɛnane kɔkɔɔkɔ!

8 Yɛ gbalɔ Maleaki beiaŋ lɛ, nɔ ni mɛi komɛi feɔ nɛ: amɛshwieɔ amɛŋamɛi ni amɛkɛ amɛ ehi shi kɛjɛ amɛblahiiaŋ lɛ koni amɛkɛ oblayei ni ekolɛ amɛjáaa Yehowa po lɛ ahi shi. Shi Nyɔŋmɔ tsɔ Maleaki nɔ ehã ana bɔ ni enuɔ he ehãa yɛ gbalatsemɔ he. Ewie akɛ: “Minyɛɔ gbalatsemɔ.” (Mal. 2:14-16) Nɔ ni ewie nɛɛ kɛ nɔ ni ewie yɛ klɛŋklɛŋ gbalashihilɛ lɛ he lɛ kpãa gbee. Ewie akɛ nuu baakpɛtɛ eŋa he, “ni amɛbaatsɔ heloo kome.” (1 Mo. 2:24) Nɔ ni Yesu wie lɛ, akɛ “nɔ ni Nyɔŋmɔ kɛtsa lɛ, gbɔmɔ ko akagbála mli” lɛ, hãa wɔnaa akɛ efiɔ nɔ ni e-Tsɛ lɛ ewie yɛ gbalashihilɛ he lɛ sɛɛ.​—Mat. 19:6.

NƆ KOME PƐ NI ABAANYƐ ADAMƆ NƆ ATSE GBÃLA

9. Te esa akɛ wɔnu nɔ ni Yesu wie yɛ Marko 10:11, 12 lɛ shishi wɔhã tɛŋŋ?

9 Shi ekolɛ mɔ ko baabi akɛ, ‘Ani nɔ ko yɛ ni Kristofonyo baanyɛ adamɔ nɔ etse ehefatalɔ gbãla ni ekɛ mɔ kroko abote gbalashihilɛ mli?’ Kadimɔ nɔ ni Yesu wie yɛ gbalatsemɔ he. Ewie akɛ: “Mɔ fɛɛ mɔ ni shwieɔ eŋa ni ekɛ mɔ kroko boteɔ gbalashihilɛ mli lɛ, efite gbãla, etɔ̃ yoo lɛ nɔ, ni kɛji yoo ko tse ewu gbãla ni no sɛɛ lɛ, ekɛ mɔ kroko bote gbalashihilɛ mli lɛ, efite gbãla.” (Mar. 10:11, 12; Luka 16:18) Nɔ ni Yesu wie nɛɛ  hãa wɔnaa akɛ, ebuuu gbalashihilɛ akɛ nɔ ko fɛlɛfɛlɛ, ni esumɔɔɔ ni wɔ hu wɔbuɔ lɛ nakai. Kɛ́ nuu ko shwie eŋa be ni eŋa lɛ ejeko esɛɛ, ni ekɛ yoo kroko yahi shi lɛ, efite gbãla. Ni nakai nɔŋŋ kɛ́ yoo ko hu shi ewu be ni ewu lɛ ejeko esɛɛ, ni ekɛ nuu kroko yahi shi lɛ, efite gbãla. Mɛni hewɔ? Ejaakɛ yɛ Yehowa hiɛ lɛ, kɛ́ mɔ ko shwie eŋa loo mɔ ko tse ewu gbãla lɛ, no kɛkɛ etsɔɔɔ akɛ amɛjeee wu kɛ ŋa dɔŋŋ. Yɛ ehiɛ lɛ, amɛkã he amɛji “heloo kome.” Yesu wie hu akɛ, kɛ́ mɔ ko shwie eŋa be ni eŋa lɛ ejeko esɛɛ lɛ, no baanyɛ ahã yoo lɛ afite gbãla. Mɛni hewɔ? Yɛ Yesu beiaŋ lɛ, kɛ́ mɔ ko shwie eŋa nakai lɛ, ekolɛ yoo lɛ náŋ lɛ mlɛo akɛ ebaakwɛ ehe. No hewɔ lɛ, no baatsirɛ lɛ ni eyatao wu, ni kɛ́ ená ekɛ nuu ko bote gbalashihilɛ mli pɛ, efite gbãla.

10. Mɛni ji nɔ kome pɛ ni Kristofonyo baanyɛ adamɔ nɔ etse ehefatalɔ gbãla ní kɛ́ eesumɔ lɛ, ekɛ mɔ kroko ahi shi?

10 Yesu tsɔɔ nɔ kome pɛ ni abaanyɛ adamɔ nɔ atse gbãla. Ewie akɛ: “Mɔ fɛɛ mɔ ni shwieɔ eŋa, ni jeee akɛ eŋa lɛ ebɔ ajwamaŋ [yɛ Greek mli lɛ, por·neiʹa], ni ekɛ mɔ kroko boteɔ gbalashihilɛ mli lɛ, efite gbãla.” (Mat. 19:9) Be ni Yesu hãa e-Gɔŋ Nɔ Shiɛmɔ lɛ, nakai nɔŋŋ ewie. (Mat. 5:31, 32) Shii enyɔ lɛ fɛɛ lɛ, Yesu tsĩ ‘ajwamaŋbɔɔ’ tã. Kɛ́ mɔ ko kɛ mɔ ko ni jeee ewu loo eŋa ná bɔlɛ lɛ, ebɔ ajwamaŋ. No hewɔ lɛ, kɛ́ mɔ ko fite gbãla, efee ashawo, ekɛ kooloo ko ná bɔlɛ, loo oshijafo ji lɛ ni ekɛ oshijafo kroko ná bɔlɛ, loo nuu ji lɛ ni ekɛ nuu ná bɔlɛ aloo yoo ji lɛ ni ekɛ yoo ná bɔlɛ lɛ, ebɔ ajwamaŋ. Yɛ nɔ ni Yesu wie lɛ naa lɛ, kɛ́ nuu ko ni ebote gbalashihilɛ mli lɛ yabɔ ajwamaŋ lɛ, eŋa lɛ baanyɛ akpɛ eyiŋ kɛji ebaatse lɛ gbãla loo ekɛ lɛ baaya nɔ ahi shi. Kɛ́ etse lɛ gbãla lɛ, amɛjeee wu kɛ ŋa dɔŋŋ yɛ Nyɔŋmɔ hiɛ.

11. Mɛni hewɔ ekolɛ Kristofonyo ko ni ehefatalɔ eyabɔ ajwamaŋ lɛ baakpɛ eyiŋ akɛ etseŋ lɛ gbãla lɛ?

11 Nɔ kome ni esa akɛ wɔkadi ji akɛ, Yesu ekɛɛɛ akɛ kɛ́ mɔ ko hefatalɔ yabɔ ajwamaŋ lɛ, bɔ fɛɛ bɔ ni fee lɛ, eshwie lɛ loo etse lɛ gbãla. No hewɔ lɛ, akɛ nɔkwɛmɔnɔ lɛ, yoo ko ni wu eyabɔ ajwamaŋ lɛ baanyɛ akpɛ eyiŋ akɛ etseŋ nuu lɛ gbãla. Ekolɛ esumɔɔ lɛ, ni eesumɔ ni ekɛ ehe ake lɛ ni ekɛ lɛ afee ekome ni amɛsaa amɛgbãla lɛ. Yɛ anɔkwale mli lɛ, kɛ́ etse nuu lɛ gbãla shi eboteee gbalashihilɛ mli dɔŋŋ lɛ, ekɛ naagbai baakpe. Namɔ baakwɛ lɛ yɛ heloŋ gbɛfaŋ? Ni  bɔlɛnamɔ gbɛfaŋ hu? Ani ehe efeŋ shoo? Ni kɛ́ amɛyɛ bii lɛ, namɔ baakwɛ amɛ ni eye ebua lɛ ni etsɔse amɛ yɛ anɔkwale lɛ mli? (1 Kor. 7:14) Eyɛ faŋŋ akɛ, kɛ́ mɔ ko tse ehefatalɔ ni eyabɔ ajwamaŋ lɛ gbãla lɛ, ekɛ naagbai wuji baakpe.

12, 13. (a) Mɛɛ naagba Hosea kɛkpe yɛ egbãla lɛ mli? (b) Mɛni hewɔ Hosea kɛ Gomer tsa amɛgbãla lɛ nɔ lɛ? Mɛni no tsɔɔ wɔ yɛ gbalashihilɛ he ŋmɛnɛ?

12 Wɔbaanyɛ wɔkase nii waa yɛ bɔ ni nibii tee lɛ ehã yɛ gbalɔ Hosea kɛ eŋa lɛ teŋ lɛ mli. Nyɔŋmɔ kɛɛ Hosea akɛ ekɛ yoo ko ni atsɛɔ lɛ Gomer lɛ abote gbalashihilɛ mli. Nyɔŋmɔ kɛɛ lɛ akɛ Gomer “kɛ ehe baawo ashawofeemɔ mli” ni ‘ebaaná bii kɛjɛ eshawofeemɔ lɛ mli.’ Gomer ‘fɔ binuu ehã Hosea.’ (Hos. 1:2, 3) Sɛɛ mli lɛ, efɔ biyoo kɛ binuu, ni eeenyɛ efee akɛ ekɛ nuu kroko ni fɔ bii nɛɛ. Gomer fite gbãla shii abɔ, shi Hosea eshwieee lɛ. Agbɛnɛ lɛ, lɛ diɛŋtsɛ eshi Hosea ni eyatsɔ nyɔŋ. Shi Hosea yahé lɛ kɛba ekoŋŋ. (Hos. 3:1, 2) Yehowa kɛ Hosea kɛ eŋa lɛ teŋ sane lɛ fee bɔ ni Israelbii lɛ kwa lɛ shii abɔ shi ekɛ amɛhe ke amɛ lɛ he nɔkwɛmɔnɔ. Shi mɛni wɔ hu wɔbaanyɛ wɔkase yɛ mli?

13 Kɛ́ Kristofonyo ko hefatalɔ yabɔ ajwamaŋ lɛ, lɛ mɔ ni ashi lɛ ni ayabɔ ajwamaŋ lɛ baakpɛ eyiŋ kɛji ekɛ ehefatalɔ lɛ he baake lɛ aloo ekɛ ehe ekeŋ lɛ. Yɛ nɔ ni Yesu wie lɛ naa lɛ, ebaanyɛ etse lɛ gbãla ni ekɛ mɔ kroko abote gbalashihilɛ mli, kɛ́ eesumɔ. Shi yɛ nakai beiaŋ nɔŋŋ lɛ, kɛ́ ekɛ ehe ke lɛ ni amɛtee nɔ amɛhi shi akɛ wu kɛ ŋa lɛ, no hu etɔ̃ko. Be ni Gomer ku esɛɛ lɛ, Hosea kɛ lɛ tsa amɛgbãla lɛ nɔ, ni ekɛɛ lɛ akɛ ekɛ nuu kroko akayaná bɔlɛ dɔŋŋ. Hosea diɛŋtsɛ hu kɛ Gomer ‘náaa bɔlɛ’ kɛyashi be ko. (Hos. 3:3, shn.) Shi ŋwanejee ko bɛ he akɛ, sɛɛ mli lɛ, Hosea kɛ Gomer bɔi bɔlɛnamɔ ekoŋŋ. Enɛ fee bɔ ni Yehowa jɛ esuɔmɔ mli ekɛ Israelbii lɛ ahe ke amɛ ni ekɛ amɛ hi shi akɛ ewebii ekoŋŋ lɛ he mfoniri. (Hos. 1:11; 3:3-5) Mɛni enɛ tsɔɔ wɔ yɛ gbalashihilɛ he ŋmɛnɛ? Kɛ́ hefatalɔ ni eyabɔko ajwamaŋ lɛ kɛ mɔ ni eyabɔ ajwamaŋ lɛ bɔi bɔlɛnamɔ lɛ, no baatsɔɔ akɛ ekɛ ehe eke lɛ. (1 Kor. 7:3, 5) Akɛni ekɛ lɛ ená bɔlɛ hewɔ lɛ, ebɛ nɔ ko dɔŋŋ ni ebaadamɔ nɔ etse lɛ gbãla. Moŋ lɛ, esa akɛ ekɛ lɛ afee ekome ni amɛkwɛ bɔ ni amɛbaafee amɛye amɛbua amɛhe ni amɛna gbalashihilɛ tamɔ bɔ ni Nyɔŋmɔ naa lɛ lɛ.

WO GBALASHIHILƐ HIƐ NYAM KƐ́ OKƐ NAAGBAI MIIKPE YƐ OGBÃLA LƐ MLI PO

14. Yɛ nɔ ni aŋma yɛ 1 Korintobii 7:10, 11 lɛ naa lɛ, mɛni baanyɛ aba yɛ gbalashihilɛ mli?

14 Esa akɛ Kristofoi fɛɛ amia amɛhiɛ waa ni amɛwo gbalashihilɛ hiɛ nyam, tamɔ bɔ ni Yesu kɛ Yehowa feɔ lɛ. Shi akɛni wɔyeee emuu hewɔ lɛ, jeee be fɛɛ be wɔ fɛɛ wɔnyɛɔ wɔfeɔ nakai. (Rom. 7:18-23) No hewɔ lɛ, esaaa akɛ efeɔ wɔ naakpɛɛ akɛ blema Kristofoi lɛ ateŋ mɛi komɛi kɛ naagbai kpe yɛ amɛgbalashihilɛ mli. Paulo kɛɛ amɛ akɛ, “esaaa akɛ ŋa tseɔ ehe kɛjeɔ ewu he”; fɛɛ sɛɛ lɛ, amɛteŋ mɛi komɛi fee nakai.​—Kanemɔ 1 Korintobii 7:10, 11.

Mɛni abaanyɛ afee kɛye abua mɛi ni kɛ naagbai pii miikpe yɛ amɛgbalashihilɛ mli lɛ? (Kwɛmɔ kuku 15)

15, 16. (a) Kɛ́ gbalashihilɛ mli bii komɛi kɛ naagbai miikpe po lɛ, mɛni esa akɛ amɛtswa amɛfai shi akɛ amɛbaafee? Ni mɛni hewɔ? (b) Te enɛ kɔɔ mɛi ni amɛhefatalɔi sɔmɔɔɔ Yehowa lɛ ahe ehãa tɛŋŋ?

15 Paulo etsɔɔɔ shihilɛi ni hã ŋamɛi komɛi tse amɛhe kɛje amɛwumɛi ahe lɛ. Shi wɔbaanyɛ wɔwie akɛ ejeee ajwamaŋbɔɔ, ejaakɛ eji ajwamaŋbɔɔ ni kulɛ, ŋa lɛ baanyɛ adamɔ no nɔ etse ewu lɛ gbãla ni ekɛ mɔ kroko abote gbalashihilɛ mli. Paulo ŋma akɛ kɛ́ yoo ko tse ehe kɛje ewu he lɛ, “eya nɔ ehi shi oshija, kɛjeee nakai lɛ, ekɛ ewu lɛ ayakpãtã.” Nɔ ni ewie nɛɛ tsɔɔ akɛ, yɛ Nyɔŋmɔ hiɛ lɛ, yoo lɛ kɛ ewu lɛ kã he amɛji gbalashihilɛ mli hefatalɔi. Paulo wo mɛi ni tamɔ nakai lɛ ŋaa akɛ, kɛji amɛteŋ mɔ ko ebɔko ajwamaŋ lɛ, belɛ ekɔɔɔ he eko nɔ naagba ni amɛkɛkpeɔ lɛ, amɛtsu he nii koni amɛfee ekome ekoŋŋ. Amɛbaanyɛ amɛbi asafoŋ onukpai lɛ adɛŋ yelikɛbuamɔ. Asafoŋ onukpai lɛ etsɔŋ mɔ ni sane ja kɛ mɔ ni sane ejaaa. Moŋ lɛ, amɛbaajɛ Biblia lɛ mli amɛwo amɛ ŋaa.

16 Ni kɛ́ Kristofonyo ko hefatalɔ sɔmɔɔɔ Yehowa hu? Ani no tsɔɔ akɛ kɛ́ amɛkɛ naagbai kpe yɛ amɛgbalashihilɛ lɛ mli lɛ esa akɛ etse  ehe kɛje ehefatalɔ lɛ he? Tamɔ bɔ ni wɔna kɛtsɔ hiɛ lɛ, Biblia lɛ kɛɔ akɛ nɔ kome pɛ ni mɔ ko baanyɛ adamɔ nɔ etse gbãla ji ajwamaŋbɔɔ. Shi etsɔko nibii ni mɔ ko baanyɛ adamɔ nɔ etse ehe kɛje ehefatalɔ he. Paulo ŋma akɛ: “Kɛ́ yoo ko . . . yɛ wu ni heee yeee, ni nuu lɛ ekpɛlɛ akɛ ekɛ lɛ baahi shi lɛ, yoo lɛ akashi ewu lɛ.” (1 Kor. 7:12, 13) Gbɛtsɔɔmɔ nɛɛ kɔɔ wɔ mɛi ni wɔyɔɔ ŋmɛnɛ lɛ hu ahe.

17, 18. Mɛni hewɔ Kristofoi komɛi etee nɔ amɛkɛ amɛhefatalɔi ehi he kome yɛ naagbai ni mli wala waa ni amɛkɛkpeɔ yɛ amɛgbalashihilɛ lɛ mli lɛ fɛɛ sɛɛ?

17 Shi bei komɛi lɛ, bɔ ni “wu ni heee yeee” lɛ feɔ enii ehãa lɛ hãa anaa akɛ esumɔɔɔ ni ‘ekɛ eŋa lɛ hiɔ shi.’ Akɛ nɔkwɛmɔnɔ lɛ, ekolɛ efeɔ eŋa lɛ niseniianii, aahu po akɛ eŋa lɛ nuɔ he akɛ egbɔmɔtsoŋ hewalɛnamɔ kɛ ewala yɛ oshãra mli. Aloo ekolɛ ejeɔ gbɛ ekuɔ ehiɛ eshwieɔ eŋa lɛ kɛ gbekɛbii lɛ anɔ ni ekwɛɛɛ amɛ, loo efeɔ nɔ fɛɛ nɔ ni ebaanyɛ kɛtsĩɔ eŋa lɛ naa koni ekanyɛ eye Nyɔŋmɔ anɔkwa loo esɔmɔ lɛ. Shihilɛi ni tamɔ nɛkɛ ahewɔ lɛ, Kristofoi komɛi emu sane naa akɛ, kɛ́ nuu lɛ kɛɛ eesumɔ ni ekɛ amɛ ahi shi po lɛ, enifeemɔ etsɔɔɔ nakai, ni no hewɔ lɛ, esa akɛ amɛtse amɛhe kɛje ehe ni amɛyahi he kroko. Shi Kristofoi ni kɛ naagbai tamɔ enɛɛmɛi miikpe lɛ ateŋ mɛi komɛi hu ekpɛ amɛyiŋ akɛ, amɛbaamia amɛhiɛ ni amɛya nɔ amɛkɛ amɛhefatalɔi lɛ ahi shi ni amɛsaa amɛgbãla lɛ. Mɛni hewɔ amɛkpɛ amɛyiŋ nakai?

18 Kɛ́ mɔ ko tse ehe kɛje ehefatalɔ lɛ he akɛni enuɔ he akɛ ehefatalɔ lɛ ekpɛlɛɛɛ ni ekɛ lɛ hiɔ shi lɛ hewɔ lɛ, no etsɔɔɔ akɛ amɛjeee wu kɛ ŋa dɔŋŋ. Ni akɛni amɛkã he amɛji wu kɛ ŋa hewɔ lɛ, amɛ fɛɛ amɛkɛ naagbai ni wɔwie he kɛtsɔ hiɛ lɛ baakpe. Naa nɔ kroko hewɔ ni ehi akɛ gbalashihilɛ mli bii baahi he kome. Bɔfo Paulo wie akɛ: “Afee wu ni heee yeee lɛ krɔŋkrɔŋ yɛ eŋa lɛ hewɔ, ni ŋa ni heee yeee lɛ hu, afee lɛ krɔŋkrɔŋ yɛ nyɛmi nuu lɛ hewɔ; kɛjeee nakai kulɛ, nyɛbii lɛ baafee mɛi ni he tseee, shi amrɔ nɛɛ, amɛyɛ krɔŋkrɔŋ.” (1 Kor. 7:14) Kristofoi anɔkwafoi pii ni kɛ naagbai ni mli wala waa kpe yɛ amɛgbalashihilɛ mli shi amɛkpɛ amɛyiŋ akɛ amɛbaaya nɔ amɛkɛ amɛhefatalɔi ni sɔmɔɔɔ Yehowa lɛ ahi shi lɛ, ená miishɛɛ waa akɛ amɛmia amɛhiɛ amɛfee nakai, ejaakɛ amɛhefatalɔi lɛ ebatsɔmɔ Yehowa tsuji.​—Kanemɔ 1 Korintobii 7:16; 1 Pet. 3:1, 2.

19. Mɛni hewɔ Kristofoi pii agbãla esɔ lɛ?

19 Yesu wie gbalatsemɔ he, ni Yehowa mumɔ lɛ tsirɛ bɔfo Paulo ni ewo Kristofoi ŋaa yɛ tsemɔ ni mɔ baatse ehe kɛje ehefatalɔ he ni eyahi he kroko lɛ he. Nɔ ni kã amɛyi enyɔ lɛ fɛɛ amɛtsui nɔ ji, ni Nyɔŋmɔ tsuji awo gbalashihilɛ hiɛ nyam. Ŋmɛnɛ lɛ, wɔnaa gbalashihilɛ mli bii babaoo ni yɔɔ miishɛɛ yɛ Kristofoi asafo lɛ mli yɛ jeŋ fɛɛ, ni ekolɛ pii yɛ osafo lɛ mli. Nɔ ni hãa amɛnáa miishɛɛ lɛ ji akɛ, wumɛi lɛ yeɔ amɛŋamɛi lɛ anɔkwa ni amɛsumɔɔ amɛ, ni ŋamɛi lɛ hu sumɔɔ amɛwumɛi lɛ ni amɛbuɔ amɛ. Nyɛmimɛi akpekpei abɔ nɛɛ fɛɛ hãa wɔnaa akɛ, abaanyɛ awo gbalashihilɛ hiɛ nyam. Amɛtsɔɔ akɛ nɔ ni Nyɔŋmɔ wie lɛ ji anɔkwale, akɛ: “Enɛ hewɔ lɛ, nuu baashi epapa kɛ emami ni ebaakpɛtɛ eŋa he, ni amɛyi enyɔ lɛ fɛɛ amɛbaatsɔ heloo kome.”​—Efe. 5:31, 33.