Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Ani Ole Anɔkwale Lɛ Fɛɛ?

Ani Ole Anɔkwale Lɛ Fɛɛ?

“Mɔ ni hãa sane hetoo dani eboɔ sane lɛ mli toi lɛ, eefee buulu ni eeshwie ehiɛ shi hu.”​—ABƐI 18:13.

LALAI: 126, 95

1, 2. (a) Mɛni esa akɛ wɔ fɛɛ wɔnyɛ wɔfee? Ni mɛni hewɔ? (b) Mɛni he wɔbaasusu yɛ nikasemɔ nɛɛ mli?

EHE miihia ni wɔ fɛɛ wɔle bɔ ni ataoɔ saji amli jogbaŋŋ, ejaakɛ no baaye abua wɔ ni wɔna kɛji sane ko ni wɔnu loo wɔkane lɛ yɛ mli aloo ebɛ mli koni wɔnyɛ wɔkpɛ yiŋ ni ja. (Abɛi 3:21-23; 8:4, 5) Kɛ́ wɔnyɛɛɛ wɔtao saji amli ni wɔle kɛji amɛyɛ mli loo amɛbɛ mli lɛ, ewaaa kwraa akɛ Satan kɛ eje lɛ baalaka wɔ. (Efe. 5:6; Kol. 2:8) Anɔkwa, ja wɔle anɔkwale ni yɔɔ sane ko mli dani wɔbaanyɛ wɔkpɛ yiŋ ni ja. Abɛi 18:13 lɛ kɛɔ akɛ: “Mɔ ni hãa sane hetoo dani eboɔ sane lɛ mli toi lɛ, eefee buulu ni eeshwie ehiɛ shi hu.”

2 Yɛ nikasemɔ nɛɛ mli lɛ, wɔbaakwɛ nibii komɛi ni hãa ewaa kɛhãa wɔ akɛ wɔbaale anɔkwale fɛɛ ni yɔɔ sane ko mli ni wɔnyɛ wɔkpɛ yiŋ ni ja. Agbɛnɛ hu, wɔbaana Biblia mli shishitoo mlai kɛ nɔkwɛmɔnii ni baaye abua wɔ ni wɔle bɔ ni ataoɔ saji amli jogbaŋŋ.

KAAHE “WIEMƆ FƐƐ WIEMƆ” OYE

3. Mɛni hewɔ esa akɛ wɔkɛ Biblia mli shishitoo mla ni yɔɔ Abɛi 14:15 lɛ atsu nii lɛ? (Kwɛmɔ mfoniri ni yɔɔ nikasemɔ lɛ shishijee lɛ.)

3 Gbii etɛ nɛɛ lɛ, Intanɛt lɛ, TV, redio, adafitswaa woji, kɛ nibii krokomɛi ni tamɔ nakai lɛ ahewɔ lɛ, wɔnuɔ saji pii. Wɔteŋ mɛi komɛi hu yɛ ni wɔnanemɛi kɛ wɔwekumɛi sɛndiɔ wɔ tɛs mɛseji kɛ e-mail pii. Etamɔ nɔ ni daa nɛɛ sane ko yɛ ni aatao wɔle.  Wɔnanemɛi kɛ wɔwekumɛi lɛ ehiɛɛɛ wɔhe jwɛŋmɔ fɔŋ. Fɛɛ sɛɛ lɛ, esa akɛ wɔkwɛ wɔhe nɔ jogbaŋŋ, ni wɔtao saji fɛɛ ni wɔnuɔ lɛ amli jogbaŋŋ. Mɛni hewɔ? Ejaakɛ ŋmɛnɛ lɛ, mɛi jeɔ gbɛ amɛgbɛɔ amalei amɛshwãa loo amɛtsɔɔ anɔkwale lɛ hiɛ amɛbuɔ shi koni amɛkɛlaka mɛi. Shi mɛɛ Biblia mli shishitoo mla baanyɛ aye abua wɔ? Abɛi 14:15 lɛ kɛɔ akɛ: “Mɔ ni jwɛŋmɔ esako lɛ heɔ wiemɔ fɛɛ wiemɔ eyeɔ, shi hiɛtɛ̃lɔ kwɛɔ enajifaamɔi jogbaŋŋ.”

4. Mɛɛ gbɛ nɔ Filipibii 4:8, 9 lɛ baanyɛ awa wɔ ni wɔle saji ni wɔbaanyɛ wɔkane kɛ nɔ ni esaaa akɛ wɔkaneɔ? Ni mɛni hewɔ ehe miihia ni wɔná saji ni wɔbaanyɛ wɔmu wɔfɔ̃ nɔ be fɛɛ be lɛ? (Kwɛmɔ akrabatsa ni yitso ji, “ Nibii Fioo Komɛi Ni Baaye Abua Wɔ Ni Wɔná Saji Ni Ja.”)

4 Ja wɔle anɔkwale fɛɛ ni yɔɔ sane ko mli dani wɔbaanyɛ wɔkpɛ yiŋ ni ja. No hewɔ lɛ, jeee nɔ fɛɛ nɔ kɛkɛ esa akɛ wɔkane. (Kanemɔ Filipibii 4:8, 9.) Wɛbsaitii komɛi yɛ ni anyɛɛɛ amu afɔ̃ saji ni yɔɔ jɛmɛ lɛ anɔ, ni e-mail komɛi ni mɛi kɛmajeɔ wɔ lɛ ji saji ni afo atã. No hewɔ lɛ, esaaa akɛ wɔfiteɔ wɔbe kɛkaneɔ saji ni tamɔ nɛkɛ. Agbɛnɛ hu, ehe miihia waa ni wɔtsi wɔhe kwraa kɛje wɛbsaitii ni mɛi ni ekwa anɔkwa jamɔ lɛ kɛtsuɔ nii lɛ ahe. Oti titri ni ma mɛi nɛɛ ahiɛ ji, ni amɛhã wɔhemɔkɛyeli lɛ mli agbɔjɔ ni amɛtsɔ anɔkwale lɛ hiɛ amɛbu shi. Kɛ́ wɔdamɔ saji ni bɛ mli anɔ wɔkpɛ wɔyiŋ lɛ, wɔbaakpɛ yiŋ gbonyo. Amalei baanyɛ aná wɔtsui kɛ wɔjwɛŋmɔ nɔ hewalɛ waa. Kaahã ohiɛ kpa anɔkwa sane nɛɛ nɔ kɔkɔɔkɔ!​—1 Tim. 6:20, 21.

5. Mɛɛ sane ni bɛ mli ababɔ Israelbii lɛ? Ni te enɛ ná amɛnɔ hewalɛ ehã tɛŋŋ?

5 Kɛ́ wɔhe saji ni bɛ mli wɔye lɛ, ebaanyɛ eye awui waa. Susumɔ nɔ ko ni ba yɛ Mose beiaŋ lɛ he okwɛ. Be ni mɛi 12 ni atsu koni amɛyakpá Shiwoo Shikpɔŋ lɛ shi lɛ ku amɛsɛɛ lɛ, amɛteŋ mɛi 10 kɛ amaniɛbɔɔ gbonyo ba. (4 Mo. 13:25-33) Hii 10 nɛɛ wo sane he waa, ni nibii ni amɛwie lɛ ekomɛi bɛ mli. Shi Israelbii lɛ he amaniɛbɔɔ gbonyo lɛ amɛye, ni enɛ hã amɛtsui fã waa ni amɛnijiaŋ je wui hu. (4 Mo. 14:1-4) Mɛni hewɔ amɛhe amɛye lɛ? Ekolɛ amɛyasusu akɛ, akɛni mɛi ni kɛ amaniɛbɔɔ gbonyo lɛ ba lɛ ayi fa hewɔ lɛ, nɔ ni amɛwie lɛ yɛ mli. Amɛbooo amaniɛbɔɔ kpakpa ni hii anɔkwafoi Yoshua kɛ Kaleb kɛba lɛ toi. (4 Mo. 14:6-10) Yɛ nɔ najiaŋ ni amɛbaatao sane lɛ mli koni amɛle anɔkwale ni yɔɔ mli, ni agbɛnɛ hu amɛkɛ amɛhiɛ afɔ̃ Yehowa nɔ lɛ, amɛhe amaniɛbɔɔ gbonyo lɛ amɛye. Amɛye kwashiai asane!

6. Mɛni hewɔ esaaa akɛ wɔnaa kpɛɔ wɔhe kɛ́ wɔnu ni mɛi miiwie Yehowa webii ahe sane ni bɛ mli kwraa lɛ?

6 Esa akɛ wɔkwɛ jogbaŋŋ, titrii lɛ, kɛ́ wɔnu sane ko ni kɔɔ Yehowa webii lɛ ahe. Biblia lɛ kɛɔ akɛ Satan wieɔ Nyɔŋmɔ tsuji anɔkwafoi ahe efɔŋ. (Kpo. 12:10) Yesu bɔ wɔ kɔkɔ akɛ, ‘mɛi baamale amɛwie wɔhe efɔŋ fɛɛ efɔŋ.’ (Mat. 5:11) Kɛ́ wɔhã kɔkɔbɔɔ nɛɛ hi wɔjwɛŋmɔŋ be fɛɛ be lɛ, wɔnaa ekpɛŋ wɔhe kɛ́ wɔnu ni mɛi miiwie Yehowa webii ahe sane ni bɛ mli kwraa.

7. Dani obaasɛndi e-mail loo tɛs mɛseji ohã mɔ ko lɛ, mɛɛ saji esa akɛ obi ohe?

7 Ani osumɔɔ e-mail kɛ tɛs mɛseji sɛndimɔ waa? Kɛ́ onu sane ko loo niiashikpamɔ ko ni ŋɔɔ onaa waa lɛ, ani ohe tswaa shi ni ohã onanemɛi kɛ owekumɛi ale amrɔ nɔŋŋ, tamɔ bɔ ni mɛi ni tsuɔ nii yɛ TV kɛ redio steshɛŋ lɛ ahe tswaa shi ni amɛtswa nɔ ko he adafi kɛ́ amɛnu nɔŋŋ lɛ? Dani obaasɛndi nakai sane lɛ, bi ohe akɛ: ‘Ani miyɛ nɔmimaa akɛ sane nɛɛ ni miyasɛndi lɛ yɛ mli? Ani mile sane lɛ mli fɛɛ jogbaŋŋ?’ Kɛ́ onyɛɛɛ ohã sanebimɔi nɛɛ ahetoo akɛ hɛɛ lɛ, belɛ kwɛmɔ jogbaŋŋ ni ekaba lɛ akɛ amale oyaagbɛ oshwã lɛ. Kɛ́ oyiŋ miifee bo kɔshikɔshi yɛ sane lɛ he lɛ, kaasɛndi. Jiemɔ yɛ foŋ lɛ nɔ, diliitimɔ!

8. Mɛni mɛi ni teɔ shi amɛwoɔ wɔnitsumɔ lɛ yɛ maji komɛi anɔ lɛ feɔ? Ni kɛ́ wɔkwɛɛɛ ni ahi lɛ, mɛɛ gbɛ nɔ ekolɛ wɔbaaye wɔbua amɛ?

8 Naa oshãra kroko ni baanyɛ aba kɛji wɔsɛndi  e-mail kɛ tɛs mɛseji wɔhã mɛi ni wɔsusuuu he dã. Yɛ maji komɛi anɔ lɛ, ahãaa wɔnyɛmimɛi lɛ heyeli ni amɛsɔmɔ Yehowa bɔ ni amɛsumɔɔ, ni yɛ hei komɛi po lɛ, atsĩ wɔnitsumɔ lɛ naa kwraa. Mɛi ni teɔ shi amɛwoɔ wɔnitsumɔ lɛ yɛ maji nɛɛ anɔ lɛ baanyɛ aje gbɛ amɛgbɛ saji ni bɛ mli amɛshwã koni amɛkɛwo wɔhe gbeyei loo koni amɛkɛ mligbalamɔi aba wɔteŋ. Enɛ he nɔkwɛmɔnɔ ji nɔ ni ba yɛ maji ni tsutsu ko lɛ amɛfeɔ Soviet Union lɛ anɔ lɛ. KGB lɛ, ni ji polisifoi ni tsuɔ amɛnitsumɔ lɛ yɛ dujiaŋ lɛ gbɛ nyɛmimɛi komɛi ni ale waa lɛ ahe saji ni bɛ mli amɛshwã. Amɛkɛɛ nyɛmimɛi nɛɛ eshi asafo lɛ. * Mɔbɔ sane ji akɛ, nyɛmimɛi pii he amalei nɛɛ amɛye, ni amɛshi Yehowa asafo lɛ. Miishɛɛ sane ji akɛ, sɛɛ mli lɛ, amɛteŋ mɛi babaoo ku amɛsɛɛ kɛba asafo lɛ mli, shi mɛi komɛi hu baaa dɔŋŋ. Amɛkɛ amɛhemɔkɛyeli lɛ yasha shi. (1 Tim. 1:19) Mɛni obaanyɛ ofee koni oshãra ni tamɔ nɛkɛ akanina bo? Kaahe nɔ fɛɛ nɔ ni onuɔ lɛ oye. Kɛ́ onu sane gbonyo ko loo sane ko ni obɛ nɔmimaa yɛ he lɛ, kaagbɛ oshwã. Moŋ lɛ, taomɔ mli koni ole anɔkwale ni yɔɔ mli.

ANI OLE SANE MUU LƐ FƐƐ?

9. Mɛɛ nɔ kroko baanyɛ ahã ewa kɛhã wɔ akɛ wɔbaakpɛ yiŋ ni ja?

9 Saji ni wɔnuɔ lɛ ekomɛi yɛ ni amɛfãi komɛi yɛ mli, shi amɛfãi ni eshwɛ lɛ, amale sɔŋŋ. Bei komɛi hu lɛ, jeee sane muu lɛ fɛɛ ahãa wɔleɔ; agbaa wɔ efã ko pɛ. Kɛ́ wɔleee anɔkwale fɛɛ ni yɔɔ sane ko mli lɛ, ebaawa kɛhã wɔ akɛ wɔbaakpɛ yiŋ ni ja. Kaadamɔ anɔkwale fioo ni yɔɔ sane ko mli lɛ nɔ ohe sane muu lɛ fɛɛ oye. Mɛni wɔbaanyɛ wɔfee koni akɛ saji ni tamɔ nɛkɛ akalaka wɔ?​—Efe. 4:14.

10. Mɛni hewɔ kulɛ Israelbii lɛ yaafã amɛnyɛmimɛi lɛ anɔ ta lɛ? Shi mɛni ba ni amɛnáaa amɛwu ta lɛ dɔŋŋ?

10 Susumɔ shihilɛ ko ni Israelbii ni yɔɔ Yordan Faa lɛ anai lɛ kɛkpe yɛ Yoshua beiaŋ lɛ he okwɛ. (Yos. 22:9-34) Ababɔ amɛ amaniɛ akɛ, Israel wekui ni yɔɔ Yordan lɛ bokã lɛ, ni ji Rubenbii lɛ kɛ Gadbii lɛ kɛ Manase weku lɛ fã lɛ, ema afɔleshaa latɛ ni da waa diɛŋtsɛ yɛ Yordan lɛ naa. Sane nɛɛ ni amɛnu lɛ yɛ mli, shi asomoaŋ, jeee sane muu lɛ fɛɛ ni. Be ni Israelbii ni yɔɔ Yordan lɛ anai lɛ nu akɛ amɛnyɛmimɛi lɛ ema afɔleshaa latɛ lɛ, amɛmu sane naa akɛ amɛnyɛmimɛi lɛ etse  Yehowa hiɛ atua. No hewɔ lɛ, amɛbua amɛhe naa koni amɛkɛ amɛ ayawu. (Kanemɔ Yoshua 22:9-12.) Dromɔ naa lɛ, amɛtsu mɛi koni amɛyabi sane lɛ mli dani amɛfã amɛnyɛmimɛi lɛ anɔ ta. Be ni amɛtee lɛ, mɛni akɛɛ amɛ? Rubenbii lɛ kɛ Gadbii lɛ kɛ Manase weku lɛ fã lɛ kɛɛ amɛ akɛ, jeee afɔleshaa hewɔ amɛma afɔleshaa latɛ lɛ, shi moŋ koni wɔsɛɛ lɛ, no afee okadi ahã mɛi fɛɛ akɛ amɛ hu amɛjáa Yehowa. Kwɛ bɔ ni Israelbii lɛ amii baashɛ amɛhe waa akɛ amɛhe be kɛtao sane lɛ mli jogbaŋŋ, ni amɛyadɔɔɔ klante amɛtooo amɛnyɛmimɛi lɛ anɔ!

11. (a) Mɛni ba ni aye Mefiboshet sane fɔŋ? (b) Mɛni kulɛ esa akɛ David afee?

11 Bei komɛi lɛ, mɛi yeɔ wɔ sane fɔŋ akɛni amɛnu wɔhe sane ko shi amɛtaooo mli ni amɛbaale anɔkwale fɛɛ ni yɔɔ mli lɛ hewɔ. Susumɔ sane ni Maŋtsɛ David kɛye Mefiboshet lɛ he okwɛ. Be ni awó David maŋtsɛ lɛ, efee Saul nabi Mefiboshet ejurɔ waa. Ekɛ shikpɔji fɛɛ ni Saul yɔɔ lɛ hã lɛ. (2 Sam. 9:6, 7) Shi be ko lɛ, David nu sane gbonyo ko yɛ Mefiboshet he. Nɔ najiaŋ ni ebaatao sane lɛ mli lɛ, eshɔ̃ Mefiboshet gboshinii lɛ fɛɛ yɛ edɛŋ. (2 Sam. 16:1-4) Sɛɛ mli be ni David kɛ Mefiboshet wie lɛ, ena akɛ yiŋ ni ekpɛ lɛ ejaaa, ni no hewɔ lɛ, eku sɛɛ ekɛ Mefiboshet gboshinii lɛ eko hã lɛ. (2 Sam. 19:24-29) Eji David to etsui shi etao sane lɛ mli kulɛ, eyeŋ Mefiboshet sane fɔŋ nɛɛ.

12, 13. (a) Be ni mɛi male amɛwie Yesu he efɔŋ lɛ, mɛni efee? (b) Kɛ́ mɔ ko wie wɔhe sane fɔŋ ko lɛ, mɛni wɔbaanyɛ wɔfee?

12 Ni kɛ́ mɔ ko male ewie wɔhe efɔŋ hu? Mɛni wɔbaanyɛ wɔfee? Yesu kɛ Yohane Baptisilɔ lɛ kɛ shihilɛ nɛɛ eko kpe. (Kanemɔ Mateo 11:18, 19.) Te Yesu tsu shihilɛ lɛ he nii ehã tɛŋŋ? Efiteee ebe kɛ ehewalɛ fɛɛ kɛjieee amalei nɛɛ anaa. Moŋ lɛ, ewo mɛi hewalɛ ni amɛkwɛ ewiemɔ kɛ enifeemɔ koni amɛ diɛŋtsɛ amɛkojo kɛji saji ni awieɔ yɛ ehe lɛ yɛ mli nakai lo. Yesu wie akɛ: “Abuɔ hiɛshikamɔ bem yɛ enitsumɔi lɛ anaa.”​—Mat. 11:19; shn.

13 Wɔbaanyɛ wɔkase nɔ ko ni he hiaa waa yɛ sane nɛɛ mli. Bei komɛi lɛ, mɛi folɔɔ wɔnaa loo amɛwieɔ wɔhe saji fɔji, ni enɛ baanyɛ afite gbɛ́i kpakpa ni wɔyɔɔ lɛ. Kɛ́ eba lɛ nakai lɛ, mɛni wɔbaanyɛ wɔfee? Kɛ́ mɔ ko male ewie ohe efɔŋ lɛ, hii shi yɛ gbɛ ni hãŋ mɔ ko mɔ ko ahe nakai amale lɛ eye lɛ nɔ. Tamɔ bɔ ni eba lɛ yɛ Yesu gbɛfaŋ lɛ, kɛ́ oba ojeŋ jogbaŋŋ lɛ, mɛi baana akɛ saji kɔdɔji fɛɛ ni awie yɛ ohe lɛ bɛ mli.

ANI OHEƆ OHE OYEƆ FE NINE?

14, 15. Mɛni hewɔ eyɔɔ oshãra akɛ wɔkɛ wɔhe baafɔ̃ wɔ diɛŋtsɛ wɔniiashishinumɔ nɔ?

14 Kɛbashi he ni wɔshɛ nɛɛ lɛ, wɔna akɛ ebɛ mlɛo akɛ wɔbaale anɔkwale fɛɛ ni yɔɔ sane ko mli, ni enɛ baanyɛ asa yiŋ srɔtoi ni wɔkpɛɔ lɛ ahe. Shi nɔ kroko yɛ ni baanyɛ ahã wɔmu sane naa yɛ gbɛ ni ejaaa nɔ. No ji emuu ni wɔyeee lɛ. Ekolɛ, wɔkɛ afii babaoo esɔmɔ Yehowa, ni no hewɔ lɛ, wɔnyɛɔ wɔkɔɔ saji komɛi asɛɛ, wɔnuɔ nibii komɛi ashishi, ni no hãa wɔnyɛɔ wɔkpɛɔ yiŋ ni ja yɛ nibii pii amli. Eeenyɛ efee akɛ, enɛ hewɔ lɛ, mɛi buɔ wɔ waa. Shi nyɛmɔi ni wɔyɔɔ nɛɛ baanyɛ atsɔ wɔ tsɔne. Yɛ mɛɛ gbɛ nɔ?

15 Kɛ́ wɔkwɛɛɛ ni ahi lɛ, nyɛmɔi nɛɛ ahewɔ lɛ, wɔkɛ wɔhe baafɔ̃ wɔ diɛŋtsɛ wɔniiashishinumɔ nɔ fe nine. Wɔbaadamɔ bɔ ni wɔnuɔ he wɔhãa kɛ wɔ diɛŋtsɛ wɔsusumɔ nɔ wɔkpɛ yiŋ yɛ saji ahe. Wɔbaanu he akɛ, kɛ́ wɔleee anɔkwale fɛɛ ni yɔɔ sane ko mli po lɛ, wɔbaanyɛ wɔnu shishi. Enɛ yɛ oshãra waa! Biblia lɛ bɔɔ wɔ kɔkɔ faŋŋ akɛ, wɔkɛ wɔhe akafɔ̃ wɔ diɛŋtsɛ wɔniiashishinumɔ nɔ.​—Abɛi 3:5, 6; 28:26.

16. Yɛ nɔkwɛmɔnɔ nɛɛ mli lɛ, mɛni tee nɔ yɛ niyelihe lɛ? Ni te Tom mu saji anaa ehã tɛŋŋ?

16 Naa enɛ he nɔkwɛmɔnɔ. Ŋɔɔ lɛ akɛ, be ko lɛ, nyɛmi nuu asafoŋ onukpa ko ni yɔɔ niiashikpamɔ waa ni atsɛɔ lɛ Tom lɛ tee niyelihe  ko gbɛkɛ ko. Be ni eshɛ jɛmɛ lɛ, naa enaanyo asafoŋ onukpa ko ni atsɛɔ lɛ John ni ekɛ yoo ko ni jeee eŋa ta okpɔlɔ he ni amɛmiigba sane kɛ miishɛɛ ni amɛmiiŋmɔ. Nɔ ni fite sane lɛ kwraa ji akɛ, Tom na ni John efua yoo nɛɛ. Sane lɛ gba Tom naa waa. Ebi ehe akɛ: ‘Ani John gbãla lɛ naagbee nɛ? Te eŋa kɛ ebii lɛ baafee tɛŋŋ?’ Tom ena sane nɛɛ eko dã, ni ele bɔ ni nibii anaa yakpa hã. Eji bo ji Tom ni ona nɔ ni ena lɛ kulɛ, mɛni obaafee?

17. Yɛ nɔkwɛmɔnɔ nɛɛ mli lɛ, mɛni Tom ná ele sɛɛ mli? Ni mɛni wɔkaseɔ yɛ mli?

17 Shi ani bɔ ni Tom mu saji anaa ehã lɛ ja? Ani no mli lɛ, ele sane lɛ mli fɛɛ? Nakai gbɛkɛ lɛ nɔŋŋ lɛ, etswa John yɛ sane nɛɛ he. John kɛɛ lɛ akɛ, yoo lɛ ni ena ni ekɛ lɛ ta shi lɛ ji enyɛmi yoo, ni akɛ ejɛ he ko shɔŋŋ ebasara amɛ. Ewie akɛ, afii abɔ nɛ ni amɛna amɛhe, shi akɛni ŋmɛlɛtswai fioo ko pɛ ebaaye yɛ jɛmɛ hewɔ lɛ, hegbɛ pɛ ni ená ni ekɛ lɛ baagba sane ji be ni amɛkpe yɛ niyelihe lɛ. Ewie akɛ hegbɛ baaa ni eŋa baafata amɛhe. Tom mii shɛ ehe waa akɛ ehãko mɛi krokomɛi ale susumɔ ni ená yɛ John kɛ eweku lɛ he lɛ. Mɛni wɔkaseɔ yɛ nɔkwɛmɔnɔ nɛɛ mli? No ji akɛ, ekɔɔɔ he eko afii abɔ ni wɔkɛsɔmɔ Yehowa lɛ, be fɛɛ be lɛ, esa akɛ wɔle anɔkwale fɛɛ ni yɔɔ sane ko mli dani wɔmu saji anaa.

18. Kɛ́ wɔsumɔɔɔ wɔnyɛmimɛi lɛ asane lɛ, mɛɛ gbɛ nɔ no baanyɛ ahã wɔhe amɛhe saji ni bɛ mli wɔye?

18 Kɛ́ naagba yɛ wɔ kɛ nyɛmi ko teŋ, ni wɔkɛ wɔjwɛŋmɔ ma nakai naagba lɛ nɔ lɛ, wɔbaaná wɔnyɛmi lɛ he jwɛŋmɔ fɔŋ, ni no hu baanyɛ ahã wɔmu sane naa yɛ gbɛ ni ejaaa nɔ. Kɛ́ wɔnu nakai nyɛmi lɛ he sane gbonyo ko lɛ, wɔjwɛŋ he shii enyɔ po ni wɔbaahe wɔye. Kɛ́ wɔsumɔɔɔ ni ebaa lɛ nakai lɛ, belɛ esaaa akɛ wɔnáa wɔnyɛmimɛi lɛ ahe jwɛŋmɔ fɔŋ. Kɛ́ wɔná wɔnyɛmimɛi lɛ ahe jwɛŋmɔ fɔŋ lɛ, no baanyɛ ahã wɔmu saji anaa yɛ gbɛ ni ejaaa nɔ. (1 Tim. 6:4, 5) Kɛ́ wɔhe tsɛ̃ wɔnyɛmimɛi lɛ loo wɔye amɛhe awuŋa lɛ, ebaawa kɛhã wɔ akɛ wɔbaana amɛ bɔ ni amɛji diɛŋtsɛ. No hewɔ lɛ, yɛ nɔ najiaŋ ni wɔbaahã sui gbohii nɛɛ ahe shi yɛ wɔtsui mli lɛ, nyɛhãa wɔsumɔa wɔnyɛmimɛi lɛ ni wɔjɛ wɔtsuiŋ wɔkɛ amɛtɔmɔi ake amɛ kwraa.​—Kanemɔ Kolosebii 3:12-14.

BIBLIA MLI SHISHITOO MLAI BAABU WƆHE

19, 20. (a) Mɛɛ Biblia mli shishitoo mlai baanyɛ aye abua wɔ ni wɔnyɛ wɔna kɛji sane ko ni wɔnu lɛ yɛ mli aloo ebɛ mli? (b) Mɛni he wɔbaasusu yɛ nikasemɔ ni nyiɛ sɛɛ lɛ mli?

19 Ŋmɛnɛ lɛ, ewa waa akɛ wɔbaale anɔkwale fɛɛ ni yɔɔ saji ni wɔnuɔ lɛ amli ni wɔna kɛji amɛyɛ mli loo amɛbɛ mli. Mɛni hewɔ? Ejaakɛ saji ni wɔnuɔ lɛ pii yɛ ni fã anɔkwale ni fã hu amale. Ekomɛi hu yɛ ni anɔkwale lɛ nɔŋŋ ni, shi jeee sane lɛ fɛɛ agba wɔ lɛ. Kɛfata he lɛ, wɔyeee emuu. Mɛni baaye abua wɔ ni wɔnyɛ wɔtao saji amli jogbaŋŋ ni wɔkpɛ yiŋ ni ja? Esa akɛ wɔkɛ shishitoo mlai ni yɔɔ Biblia lɛ mli lɛ atsu nii. Shishitoo mlai nɛɛ ekome ji akɛ, kɛ́ wɔhã sane hetoo dani wɔbo sane lɛ mli toi lɛ, wɔmiifee buulu ni wɔmiishwie wɔhiɛ shi hu. (Abɛi 18:13) Ekroko hu nɛ: Kɛ́ wɔnu sane ko lɛ, esa akɛ wɔtao mli dani wɔhe wɔye. (Abɛi 14:15) Naa shishitoo mla kroko hu: Kɛ́ wɔkɛ afii babaoo esɔmɔ Yehowa po lɛ, esaaa akɛ wɔkɛ wɔhe fɔ̃ɔ wɔ diɛŋtsɛ wɔniiashishinumɔ nɔ. (Abɛi 3:5, 6) Biblia mli shishitoo mlai baabu wɔhe ni amɛbaaye amɛbua wɔ ni wɔkpɛ yiŋ kpakpai kɛji akɛ wɔtao nii amli jogbaŋŋ koni wɔle anɔkwale fɛɛ ni yɔɔ saji ni wɔnuɔ lɛ amli.

20 Shi nɔ kroko hu yɛ ni baanyɛ ahã ewa kɛhã wɔ akɛ wɔbaatao sane ko mli ni wɔle anɔkwale fɛɛ ni yɔɔ mli. No ji akɛ, emuu ni wɔyeee lɛ hewɔ lɛ, ewaaa kwraa akɛ wɔbaadamɔ nɔ ni wɔhiŋmɛii naa lɛ nɔ wɔmu sane naa. Yɛ nikasemɔ ni nyiɛ sɛɛ lɛ mli lɛ, wɔbaakwɛ nibii komɛi ni baanyɛ ahã tsɔne nɛɛ adu wɔ, kɛ nɔ ni baaye abua wɔ ni wɔkagbee mli.

^ kk. 8 Kwɛmɔ 2004 Yearbook of Jehovah’s Witnesses lɛ, bf. 111-112, kɛ 2008 Yearbook lɛ, bf. 133-135 lɛ.