Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Sanebimɔi Ni Jɛ Kanelɔi Adɛŋ

Sanebimɔi Ni Jɛ Kanelɔi Adɛŋ

Mɛni hewɔ asafo lɛ eŋmɛɛɛ gbɛ ni mɛi kɛ asafo lɛ woji, vidioi, lalai, kɛ nibii krokomɛi awo amɛ diɛŋtsɛ amɛwɛbsaiti nɔ loo amɛkɛwo ‘social media’ nɔ?

Akɛni wɔhɔ̃ɔɔ wɔwoji, vidioi, lalai, kɛ nibii krokomɛi lɛ hewɔ lɛ, mɛi komɛi nuɔ he akɛ tɔmɔ bɛ he akɛ amɛbaakɔpe ni amɛkɛwo wɛbsaitii krokomɛi anɔ loo social media nɔ. (Social media ji wɛbsaiti fɛɛ wɛbsaiti ni mɛi yaa nɔ, loo program fɛɛ program ni mɛi kɛwoɔ amɛfoŋ kɛ tablɛtii anɔ koni amɛnyɛ amɛkɛ mɛi krokomɛi ni yɔɔ nakai wɛbsaiti lɛ nɔ loo amɛyɔɔ nakai program lɛ eko lɛ ashara.) Shi kɛ́ mɔ ko fee nakai lɛ, eku wɔwɛbsaitii lɛ ahe Mlai Ni Yɔɔ He lɛ amli. * Mɛi efee nakai ni amɛhã wɔná naagbai ni yɔɔ hiɛdɔɔ. Atsɔɔ faŋŋ yɛ wɔwɛbsaitii lɛ ahe Mlai lɛ amli akɛ, mɔ ko mɔ ko bɛ hegbɛ ni ekɛ “mfonirii, woji kɛ nibii, lalai, kɛ vidioi” ni yɔɔ wɛbsaitii nɛɛ anɔ lɛ woɔ Intanɛt lɛ nɔ, kɛ́ yɛ wɛbsaiti ko nɔ jio, social media nɔ jio. Mɛni hewɔ awo mla nɛɛ?

Mɔ ko mɔ ko kɛ wɔnibii akawo wɛbsaiti kroko nɔ, ejaakɛ wɔgbɛ́i kamɔ nɔ

Wɔkɛ nibii fɛɛ ni yɔɔ wɔwɛbsaiti lɛ nɔ lɛ ewo mla shishi, ni wɔgbɛ́i kã nɔ. Bei komɛi lɛ, mɛi ni ekwa anɔkwa jamɔ lɛ kɛ mɛi krokomɛi ni teɔ shi amɛwoɔ wɔ lɛ kɛ wɔwoji, vidioi, kɛ nibii krokomɛi woɔ amɛwɛbsaitii anɔ koni no ahã Yehowa Odasefoi kɛ mɛi krokomɛi anya amɛwɛbsaitii lɛ ahe. Wɛbsaitii nɛɛ ahe yɛ oshara waa, ejaakɛ atsɔɔ ŋaa gbɛ nɔ akɛ nibii ni baahã mɛi ayiŋ afutu amɛ yɛ anɔkwale lɛ he lɛ woɔ nɔ. (Lala 26:4; Abɛi 22:5) Mɛi komɛi hu kɛ wɔwoji lɛ amli mfonirii, wɔvidioi kɛ lalai lɛ, kɛ jw.org okadi lɛ tsuɔ nii yɛ gbɛ ni esaaa nɔ. Amɛteŋ mɛi komɛi kɛfeɔ program ni akɛwoɔ foŋ kɛ tablɛtii anɔ, amɛkɛwoɔ nibii ni amɛhɔ̃ɔ ahe, loo amɛkɛtswaa amɛnibii ahe adafi. Yɛ mla naa lɛ, wɔyɛ hegbɛ ni wɔtsĩɔ mɛi nɛɛ fɛɛ anaa, ejaakɛ wɔkɛ wɔnibii lɛ ewo mla shishi ni wɔgbɛ́i kamɔ fɛɛ nɔ. (Abɛi 27:12) Shi kɛ́ wɔna loo wɔnu ni wɔnyɛmimɛi Kristofoi lɛ loo mɛi krokomɛi kɛ wɔwoji lɛ amli mfonirii, wɔvidioi, wɔlalai loo nibii krokomɛi miiwo wɛbsaitii krokomɛi anɔ loo wɔna ni amɛkɛ jw.org okadi lɛ miitswa amɛnibii  ahe adafi ni wɔfeee he nɔ ko lɛ, kɛ́ wɔkɛ shiteekɛwolɔi kɛ nitsumɔhei ni kɛ wɔnibii lɛ tsuɔ nii lɛ tee kɔɔtu lɛ, ebaawa akɛ wɔbaaye omanye.

Eyɛ oshara akɛ abaashi jw.org wɛbsaiti lɛ sɛɛ ni ayagbala wɔwoji, vidioi, kɛ nibii krokomɛi lɛ kɛjɛ wɛbsaiti krokomɛi anɔ. Yɛ “nyɔŋ anɔkwafo kɛ hiɛshikalɔ lɛ” sɛɛ lɛ, Yehowa hãko mɔ ko mɔ ko nitsumɔ akɛ ehã ewebii lɛ mumɔŋ niyenii. (Mat. 24:45) Nyɔŋ lɛ kɛ wɛbsaitii etɛ, ni ji www.jw.org, tv.jw.org, kɛ wol.jw.org lɛ pɛ ni tsuɔ nii kɛlɛɔ Nyɔŋmɔ webii lɛ. Yehowa asafo lɛ yɛ program ni akɛwoɔ foŋ kɛ tablɛtii anɔ lɛ etɛ pɛ, ni nomɛi ji, JW Language®, JW Library®, kɛ JW Library Sign Language®. Adafitswai bɛ wɛbsaitii kɛ program srɔtoi nɛɛ anɔ, ni wɔbaanyɛ wɔná nɔmimaa akɛ, gbɔmɛi fɔji tsakeko nibii ni wɔnáa yɛ jɛmɛ lɛ ahiɛ. Ani wɔbaanyɛ wɔná nɔmimaa ni tamɔ nakai kɛji wɔyagbala asafo lɛ nibii lɛ kɛjɛ wɛbsaitii kɛ program krokomɛi anɔ?​—Lala 18:26; 19:8.

Kɛ́ wɔkɛ asafo lɛ nibii lɛ yawo wɛbsaitii ni mɛi nyɛɔ amɛtsɔɔ amɛjwɛŋmɔ yɛ nɔ lɛ anɔ lɛ, ehãa mɛi ni ekwa anɔkwa jamɔ lɛ kɛ mɛi krokomɛi ni wieɔ amɛshiɔ Yehowa asafo lɛ náa hegbɛ amɛduɔ nibii ni baahã mɛi ayiŋ afutu amɛ yɛ anɔkwale lɛ he amɛwoɔ mɛi ayitsoŋ. Nyɛmimɛi komɛi po kɛ mɛi etaa saji anaa yɛ Intanɛt lɛ nɔ, ni enɛ ehã agbe Yehowa gbɛ́i lɛ he guɔ waa. Kɛ́ lɛɛlɛŋ wɔmiitao wɔjɛ mlijɔlɛ mli wɔkɛ mɔ ko ni kuɔ wɔnaa yɛ anɔkwale lɛ hewɔ lɛ awie lɛ, wɛbsaitii ni tamɔ nɛkɛ lɛ ebafeŋ hei ni sa ni wɔbaafee nakai yɛ. (2 Tim. 2:23-25; 1 Tim. 6:3-5) Ayɔse hu akɛ, mɛi komɛi kɛ asafo lɛ, Gbɛtsɔɔmɔ Kuu lɛ, loo Gbɛtsɔɔmɔ Kuu lɛ mli bii agbɛ́i ewo social media nɔ loo amɛkɛgbele wɛbsaitii. Nyɛfainɛ, Gbɛtsɔɔmɔ Kuu lɛ mli bii lɛ ateŋ mɔ ko mɔ ko bɛ lɛ diɛŋtsɛ ewɛbsaiti, ni asaŋ amɛteŋ mɔ ko mɔ ko kɛ social media tsuuu nii.

Kɛ́ wɔgbala mɛi ajwɛŋmɔ kɛtee jw.org lɛ nɔ lɛ, eyeɔ ebuaa ni ashiɛɔ “sane kpakpa” lɛ. (Mat. 24:14) Yehowa asafo lɛ yaa nɔ esaa wɛbsaitii, program srɔtoi, kɛ nibii krokomɛi ni ekɛhãa wɔ koni wɔkɛtsu nii yɛ shiɛmɔ nitsumɔ lɛ nɔ lɛ be fɛɛ be, ni wɔmiisumɔ ni mɛi krokomɛi aná nibii nɛɛ ahe sɛɛ, aloo jeee nakai? No hewɔ lɛ, tamɔ bɔ ni awie yɛ Mlai Ni Yɔɔ He lɛ mli lɛ, wɔbaanyɛ wɔkɛ asafo lɛ woji, vidioi, lalai, kɛ nibii krokomɛi amaje mɛi kɛtsɔ e-mail nɔ, ni agbɛnɛ hu wɔbaanyɛ wɔkɛ amɛhe link amaje. Kɛ́ wɔgbala mɛi ajwɛŋmɔ kɛtee wɛbsaitii ni asafo lɛ diɛŋtsɛ efee lɛ anɔ lɛ, wɔmiiye wɔmiibua amɛ ni amɛná mumɔŋ niyenii kɛjɛ “nyɔŋ anɔkwafo kɛ hiɛshikalɔ lɛ,” ni ji mɔ koome pɛ ni Nyɔŋmɔ tsɔɔ enɔ elɛɔ ewebii lɛ ŋɔɔ.

^ kk. 1 Kɛ́ otee jw.org wɛbsaiti lɛ shishigbɛ kwraa lɛ, obaana he ko ni kɛ́ ogbele lɛ, obaana wɔwɛbsaitii lɛ ahe Mlai Ni Yɔɔ He lɛ. Mlai ni atsɔɔ yɛ jɛmɛ lɛ kɔɔ nibii fɛɛ ni yɔɔ wɔwɛbsaitii lɛ anɔ lɛ ahe.