Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ—Nikasemɔ Nɔ  |  April 2016

Kɛ́ Wɔye Nyɔŋmɔ Anɔkwa lɛ, Wɔbaaná Ehiɛ Duromɔ

Kɛ́ Wɔye Nyɔŋmɔ Anɔkwa lɛ, Wɔbaaná Ehiɛ Duromɔ

“[Nyɛkasea] mɛi ni tsɔɔ hemɔkɛyeli kɛ tsuishitoo nɔ amɛnáa shiwoi lɛ.”HEBRIBII 6:12.

LALAI: 86, 54

1, 2. Mɛɛ shihilɛ ni bɛ mlɛo Yefta kɛ ebiyoo lɛ kɛkpe?

FEEMƆ he mfoniri ni oblayoo ko kɛ lala kɛ joo hiɛ foi eyaakpee epapa. Emii eshɛ ehe waa akɛ, epapa tee ta ni eyaye kunim, ni amrɔ nɛɛ eeba shĩa shweshweeshwe. Shi bɔ ni epapa here lɛ nɔ lɛ hã enaa kpɛ ehe. Yɛ nɔ najiaŋ ni ekɛ lɛ baanya lɛ, egbala etadei, ni ebo ekɛɛ: “Ao, mibi! ohã mihe ejɔ naakpa, bo pam ohã oshara bashãra mi nɛɛ.” Kɛkɛ ni ekɛɛ ebiyoo lɛ akɛ, ewo Yehowa shi ko ni baahã lɛ oblayoo lɛ, eshihilɛ atsake kɛya naanɔ. Ekɛɛ lɛ akɛ, yɛ eshiwoo lɛ naa lɛ, enyɛŋ abote gbalashihilɛ mli ni efɔ. Shi amrɔ nɔŋŋ ni oblayoo lɛ kɛɛ epapa akɛ, esa akɛ eye shi ni ewo Yehowa lɛ nɔ. Nɔ ni ewie lɛ sa kadimɔ waa, ejaakɛ ehãa wɔnaa akɛ, eyɛ nɔmimaa akɛ nɔ fɛɛ nɔ ni Yehowa baakɛɛ lɛ akɛ efee lɛ hi. (Kojolɔi 11:34-37) Hemɔkɛyeli ni ejie lɛ kpo lɛ hã epapa ná ehe miishɛɛ waa, ejaakɛ ele akɛ, yiŋ ni ebiyoo lɛ ekpɛ lɛ baahã Yehowa mii ashɛ ehe.

2 Oblayoo lɛ ji Yefta biyoo lɛ, ni nɔ ni lɛ kɛ etsɛ fee lɛ hãa  wɔnaa akɛ, amɛkɛ amɛhiɛ fɔ̃ Yehowa nɔ kwraa, ni amɛfee esuɔmɔnaa nii. Eyɛ mli akɛ amɛnáaa lɛ mlɛo akɛ amɛbaaye Yehowa anɔkwa moŋ, shi amɛfee nakai. Amɛtswa amɛfai shi akɛ, amɛbaahã Yehowa tsui anya, kɛ́ no baabi ni amɛkɛ nibii komɛi ashã afɔle po.

3. Mɛɛ gbɛ nɔ nɔkwɛmɔnɔ kpakpa ni Yefta kɛ ebiyoo lɛ fee lɛ baanyɛ aye abua wɔ ŋmɛnɛ?

3 Jeee be fɛɛ be eyɔɔ mlɛo akɛ wɔbaaye Yehowa anɔkwa. No hewɔ lɛ, esa akɛ ‘wɔmia wɔhiɛ waa kɛwu hemɔkɛyeli lɛ he ta lɛ.’ (Yuda 3) Nɔ kome ni baaye abua wɔ ji, nɔkwɛmɔnɔ kpakpa ni Yefta kɛ ebiyoo lɛ fee lɛ. Mɛɛ shihilɛ ni jaraa amɛkɛkpe? Ni mɛni ye ebua amɛ ni amɛtee nɔ amɛye Yehowa anɔkwa?

KAAHÃ JE LƐ MUMƆ LƐ NÁ ONƆ HEWALƐ

4, 5. (a) Be ni Israelbii lɛ tee Shiwoo Shikpɔŋ lɛ nɔ lɛ, mɛni Yehowa fã amɛ ni amɛfee? (b) Taakɛ wɔnaa yɛ Lala 106 lɛ, mɛni ba Israelbii lɛ anɔ yɛ Yehowa nɔ toi ni amɛgbo lɛ hewɔ?

4 Eeenyɛ efee akɛ, nibii ni Yefta kɛ ebiyoo lɛ na gbi fɛɛ gbi lɛ, hãaa amɛhiɛ akpa nɔ kɔkɔɔkɔ akɛ, Israelbii lɛ egbo Yehowa nɔ toi. Aaafee afii 300 ni eho lɛ, Yehowa fã Israelbii lɛ akɛ, amɛgbe amale jálɔi fɛɛ ni yɔɔ Shiwoo Shikpɔŋ lɛ nɔ. Shi, amɛgbo enɔ toi. (5 Mose 7:1-4) No hewɔ lɛ, be ni shɛɔ Yefta beiaŋ lɛ, Israelbii pii ebɔi Kanaanbii lɛ kasemɔ. Amɛmiijá amale nyɔŋmɔi, ni amɛmiiba jeŋba sha.Kanemɔ Lala 106:34-39.

5 Israelbii lɛ atoigbele lɛ hewɔ lɛ, Yehowa ŋmɛ gbɛ ni amɛhenyɛlɔi ye amɛnɔ. (Kojolɔi 2:1-3, 11-15; Lala 106:40-43) Ŋwanejee ko bɛ he akɛ, enɛ hã ewa waa kɛhã wekui ni sumɔɔ Yehowa lɛ akɛ amɛbaaya nɔ amɛye lɛ anɔkwa. Kɛ̃lɛ, Biblia lɛ hãa wɔleɔ akɛ, mɛi komɛi nyɛ amɛye lɛ anɔkwa kɛ̃. Mɛi nɛɛ ateŋ mɛi komɛi ji, Yefta kɛ ebiyoo lɛ, kɛ agbɛnɛ hu, Elkana, Hana, kɛ Samuel. Amɛtswa amɛfai shi akɛ, amɛbaahã Yehowa tsui anyɔ emli.1 Samuel 1:20-28; 2:26.

6. Te je lɛŋ shihilɛ yɔɔ tɛŋŋ ŋmɛnɛ? Ni mɛni esa akɛ wɔfee?

6 Ŋmɛnɛ lɛ, mɛi susuɔ nii ahe ni amɛfeɔ amɛnii tamɔ Kanaanbii lɛ. Amɛhɔ̃ɔ amɛhe amɛhã bɔlɛnamɔ jeŋba sha, yiwalɛ nifeemɔi, kɛ shika suɔmɔ. Shi Yehowa ebɔ wɔ kɔkɔ yɛ nibii nɛɛ ahe. Ejaakɛ eesumɔ ni ebu wɔhe kɛjɛ nibii gbohii nɛɛ ahe, tamɔ bɔ ni eshwe akɛ ebu Israelbii lɛ ahe kɛjɛ he lɛ nɔŋŋ. No hewɔ lɛ, ani wɔbaabo lɛ toi, aloo wɔbaafee wɔnii tamɔ Israelbii lɛ? (1 Korintobii 10:6-11) Esa akɛ wɔtswa wɔfai shi akɛ, wɔhaŋ je lɛ aná wɔsusumɔi anɔ hewalɛ kɔkɔɔkɔ. (Romabii 12:2) Ani obaamia ohiɛ ofee nakai?

YEFTA YE YEHOWA ANƆKWA YƐ DƆLƐ NIBII NI AFEE LƐ LƐ FƐƐ SƐƐ

7. (a) Mɛɛ sane Yefta maŋbii lɛ kɛye lɛ? (b) Te Yefta fee enii ehã tɛŋŋ?

7 Yɛ Yefta beiaŋ lɛ, Filistibii lɛ kɛ Amonbii lɛ fɛɛ hao Israelbii lɛ, ejaakɛ amɛgbo Yehowa nɔ toi. (Kojolɔi 10:7, 8) Shi, yɛ naagbai ni enɛ kɛba lɛ sɛɛ lɛ, nɔ kroko hu yɛ ni gba Yefta naa waa. No ji akɛ, lɛ diɛŋtsɛ enyɛmimɛi hii ye ehe awuŋa ni amɛnyɛ lɛ. Enɛ hewɔ lɛ, amɛshwie lɛ kɛje etsɛmɛi ashikpɔŋ lɛ nɔ. (Kojolɔi 11:1-3) Shi Yefta hãaa amɛyitsoŋwalɛ lɛ aná enɔ hewalɛ. Mɛni tsɔɔ nakai? Be ni Israel onukpai lɛ bakpa lɛ fai ni eye ebua amɛ lɛ, efee nakai amrɔ  nɔŋŋ. (Kojolɔi 11:4-11) Mɛni eeenyɛ efee akɛ no hã efee nakai?

8, 9. (a) Mɛɛ saji komɛi yɔɔ Mose Mla lɛ mli eeenyɛ efee akɛ Yefta susu he? (b) Mɛni Yefta yɔse akɛ no ji nɔ ni he hiaa fe fɛɛ?

8 Yefta le Mose Mla lɛ jogbaŋŋ, ni ekase bɔ ni Yehowa kɛ Israel maŋ lɛ ye ehã lɛ hu he nii fitsofitso. Enɛ hã ebale nibii ni sa Nyɔŋmɔ hiɛ kɛ nibii ni enyɛɔ. (Kojolɔi 11:12-27) Nilee nɛɛ ji nɔ ni kudɔ lɛ ni ekpɛ yiŋ ni ja yɛ shihilɛ mli. Nuu kãkãlɔ nɛɛ na akɛ, Yehowa sumɔɔɔ ni ewebii bɛɔ mɛi amɛwoɔ amɛmli loo amɛtɔɔ amɛhe owele, shi moŋ eesumɔ ni amɛsumɔ amɛhe. Kɛfata he lɛ, Mla lɛ hã ebana akɛ, esa akɛ ekɛ mɛi ni nyɛɔ lɛ lɛ po aye jogbaŋŋ.Kanemɔ 2 Mose 23:5; 3 Mose 19:17, 18.

9 Eeenyɛ efee akɛ, Yefta susu Yosef nɔkwɛmɔnɔ lɛ he. Ekolɛ esusu bɔ ni Yosef na enyɛmimɛi lɛ mɔbɔ yɛ nyɛ ni amɛnyɛ lɛ lɛ fɛɛ sɛɛ lɛ he. (1 Mose 37:4; 45:4, 5) Kɛ́ nakai ni lɛ, belɛ wɔbaanyɛ wɔkɛɛ akɛ, no ji nɔ ni ye ebua lɛ ni efee nɔ ni Yehowa sumɔɔ. Nɔ ni enyɛmimɛi hii lɛ fee lɛ dɔ lɛ waa. Shi eyɔse akɛ, Yehowa gbɛ́i lɛ he ni abaatse, kɛ ewebii lɛ ahe ni abaabu lɛ he miihia kwraa fe naagba ni yɔɔ ekɛ enyɛmimɛi lɛ ateŋ lɛ. (Kojolɔi 11:9) No hewɔ lɛ, etswa efai shi akɛ, ebaaye Yehowa anɔkwa. Enɛ hewɔ lɛ, Yehowa jɔɔ lɛ kɛ Israelbii lɛ fɛɛ.Hebribii 11:32, 33.

Kɛ́ mɔ ko fee wɔ nɔ ko ni yɔɔ dɔlɛ lɛ, esaaa akɛ no hãa wɔkpaa Yehowa sɔɔmɔ

10. Mɛɛ gbɛ nɔ Biblia mli shishitoo mlai baanyɛ aye abua wɔ kɛ́ nyɛmi ko fee wɔ nɔ ko ni yɔɔ dɔlɛ?

10 Mɛni wɔkaseɔ yɛ Yefta nɔkwɛmɔnɔ lɛ mli? Kɛ́ nyɛmi ko fee wɔ nɔ ko ni yɔɔ dɔlɛ, loo eye wɔ sane fɔŋ ko lɛ, te wɔfeɔ wɔnii wɔhãa tɛŋŋ? Ani sane lɛ dɔɔ wɔ aahu akɛ, wɔkpaa asafoŋ kpeei yaa, wɔtseɔ wɔhe kɛjeɔ nyɛmimɛi lɛ ahe, ni wɔkpaa Yehowa sɔɔmɔ? Esaaa akɛ ebaa lɛ nakai kɔkɔɔkɔ. Nyɛhãa wɔkasea Yefta ni wɔboa Yehowa toi. Ejaakɛ no baaye abua wɔ ni wɔnyɛ wɔdamɔ shihilɛi ni tamɔ nakai lɛ anaa, ni wɔ hu wɔfee nɔkwɛmɔnɔ kpakpa wɔhã mɛi krokomɛi.Romabii 12:20, 21; Kolosebii 3:13.

KƐ́ WƆJƐ WƆTSUIŊ WƆKƐ WƆNIBII SHÃ AFƆLE LƐ, ETSƆƆ AKƐ WƆYƐ HEMƆKƐYELI

11, 12. Mɛni Yefta wo Yehowa shi akɛ ebaafee? Ni mɛni no mli lɛ etsɔɔ lɛ?

11 Yefta na akɛ, kɛ́ Nyɔŋmɔ yeee ebuaaa lɛ lɛ, enyɛŋ ekpɔ̃ Israelbii lɛ kɛjɛ Amonbii lɛ adɛŋ. Ewo Yehowa shi akɛ, kɛ́ eye ebua lɛ ni eye kunim yɛ ta lɛ mli lɛ, ekɛ mɔ klɛŋklɛŋ ni baajɛ eshĩa lɛ mli abakpee lɛ lɛ baahã Lɛ akɛ “shãa afɔle.” (Kojolɔi 11:30, 31) Mɛni enɛ tsɔɔ?

12 Yehowa sumɔɔɔ ni ashãa adesai yɛ la mli ahãa lɛ akɛ afɔle; enihiinii ni. No hewɔ lɛ, ekã shi faŋŋ akɛ, jeee no ji nɔ ni yɔɔ Yefta jwɛŋmɔ mli be ni ekɛɛ ekɛ mɔ ni baabakpee lɛ lɛ baahã akɛ shãa afɔle lɛ. (5 Mose 18:9, 10) Yɛ Mose Mla lɛ mli lɛ, kɛ́ mɔ ko kɛ nɔ ko ke Yehowa kwraa lɛ, awieɔ he akɛ eji shãa afɔle. No  hewɔ lɛ, Yefta miitsɔɔ akɛ, ekɛ mɔ ni baabakpee lɛ lɛ baahã Yehowa kwraa koni esɔmɔ yɛ kpeebuu lɛ ewala gbii abɔ fɛɛ. Yehowa bo Yefta toi, ni eye ebua lɛ ni ekpãtã ehenyɛlɔi lɛ ahiɛ butuu. (Kojolɔi 11:32, 33) Shi, ani ole mɔ klɛŋklɛŋ ni bakpee Yefta?

13, 14. Mɛɛ gbɛ nɔ nɔ ni Yefta wie, ni abɔ he amaniɛ yɛ Kojolɔi 11:35 lɛ hãa wɔnaa akɛ eyɛ hemɔkɛyeli?

13 Ani okaiɔ sane ni wɔkɛkpa nikasemɔ nɛɛ hiɛ lɛ? Be ni Yefta jɛ ta lɛ eba lɛ, ebiyoo koome pɛ ni eyɔɔ, ni esumɔɔ esane naakpa lɛ ji mɔ klɛŋklɛŋ ni bakpee lɛ. Ani Yefta baaye eshiwoo lɛ nɔ? Ani ekɛ ebiyoo lɛ baahã Yehowa koni esɔmɔ yɛ kpeebuu lɛ ewala gbii fɛɛ?

14 Shi kome ekoŋŋ lɛ, eeenyɛ efee akɛ, shishitoo mlai ni yɔɔ Nyɔŋmɔ Mla lɛ mli lɛ ji nɔ ni ye ebua Yefta ni ekpɛ yiŋ ni ja yɛ sane nɛɛ mli. Ekolɛ ekai nɔ ni Nyɔŋmɔ kɛɛ ewebii lɛ, ni aŋma yɛ 2 Mose 23:19 lɛ. Nyɔŋmɔ kɛɛ amɛ akɛ, amɛkɛ amɛnibii lɛ ateŋ nɔ ni hi fe fɛɛ lɛ ahã lɛ. Mla lɛ tsɔɔ hu akɛ, kɛ́ mɔ ko wo Yehowa shi lɛ, esa akɛ ebɔ mɔdɛŋ ni eye eshiwoo lɛ nɔ. Esa akɛ “bɔ fɛɛ bɔ ni je enaa lɛ, efee nakai.” (4 Mose 30:3) No hewɔ lɛ, ehe bahia ni Yefta aye eshiwoo lɛ nɔ, kɛ́ no baabi ni lɛ kɛ ebiyoo lɛ kɛ nibii komɛi ashã afɔle po. Ehe bahia ni efee enii tamɔ Hana, ní eeenyɛ efee akɛ ehi shi yɛ ebeiaŋ lɛ nɔŋŋ. Akɛni ebiyoo lɛ baasɔmɔ yɛ kpeebuu lɛ hewɔ lɛ, eboteŋ gbalashihilɛ mli ni ebaafɔ. No hewɔ lɛ, Yefta naŋ gboshiniyelɔ. (Kojolɔi 11:34) Kɛ̃lɛ, Yefta ye Yehowa anɔkwa, ewie akɛ: “Migbele minaa mihã Yehowa, ni minyɛŋ minaa makpale.” (Kojolɔi 11:35) Yehowa hiɛ sɔ Yefta afɔleshaa kpele lɛ, ni ejɔɔ lɛ. Eji bo ji Yefta kulɛ, ani obaaye Yehowa anɔkwa?

15. Mɛni wɔteŋ mɛi babaoo ewo Yehowa shi akɛ wɔbaafee? Ni mɛni wɔbaanyɛ wɔfee kɛtsɔɔ akɛ wɔyeɔ lɛ anɔkwa?

 15 Be ni wɔjɔɔ wɔhe nɔ wɔhã Yehowa lɛ, wɔwo lɛ shi akɛ, wɔbaafee esuɔmɔnaa nii, ekɔɔɔ he eko nɔ ni baaba. No mli lɛ, wɔle akɛ jeee be fɛɛ be wɔbaaná lɛ mlɛo akɛ wɔbaaye nakai shiwoo lɛ nɔ. No hewɔ lɛ, kɛ́ Nyɔŋmɔ kɛɛ wɔ akɛ wɔfee nɔ ko ni wɔsumɔɔɔ, loo nɔ ko ni baanyɛ ahã wɔhe afĩ wɔ lɛ, te wɔfeɔ wɔnii wɔhãa tɛŋŋ? Ani wɔpuɔ sɛɛsɛɛ? Aloo wɔyeɔ wɔshiwoo lɛ nɔ ni wɔjɛɔ wɔtsuiŋ wɔboɔ lɛ toi? Anɔkwa, jeee be fɛɛ be eyɔɔ mlɛo akɛ wɔkɛ wɔnibii baashã afɔle wɔhã Yehowa, shi kɛ́ wɔfee nakai lɛ, ebaajɔɔ wɔ waa. (Maleaki 3:10) Ni Yefta biyoo lɛ hu? Te efee enii ehã tɛŋŋ yɛ epapa shiwoo lɛ he?

Mɛni wɔbaanyɛ wɔfee kɛtsɔɔ akɛ wɔyɛ hemɔkɛyeli tamɔ Yefta kɛ ebiyoo lɛ? (Kwɛmɔ kuku 16, 17)

16. Te Yefta biyoo lɛ fee enii ehã tɛŋŋ yɛ epapa shiwoo lɛ he? (Kwɛmɔ mfoniri ni yɔɔ nikasemɔ lɛ shishijee lɛ.)

16 Esoro Yefta shiwoo lɛ yɛ Hana nɔ lɛ he. Hana wo Yehowa shi akɛ, ekɛ ebinuu Samuel baahã lɛ akɛ Nazirnyo, koni esɔmɔ yɛ kpeebuu lɛ. (1 Samuel 1:11) Nazirbii lɛ baanyɛ abote gbalashihilɛ mli, ni amɛfɔ. Shi yɛ Yefta biyoo lɛ gbɛfaŋ lɛ, epapa kɛ lɛ hã akɛ “shãa afɔle,” ni tsɔɔ akɛ, eboteŋ gbalashihilɛ mli ni ebaafɔ. (Kojolɔi 11:37-40) Mɛɛ afɔleshaa kpele po nɛ! Bo lɛ susumɔ he okwɛ: Akɛni Yefta ji hiɛnyiɛlɔ yɛ Israel hewɔ lɛ, kulɛ ebiyoo lɛ kɛ nuu ko ni abuɔ lɛ waa yɛ maŋ lɛ mli ni baahi shi. Shi amrɔ nɛɛ, fɛɛ ebɔ lɛ, ejaakɛ eyaasɔmɔ yɛ kpeebuu lɛ. No hewɔ lɛ, te efee enii ehã tɛŋŋ? Ekɛ Yehowa sɔɔmɔ ye klɛŋklɛŋ gbɛhe. Ekɛɛ epapa akɛ: “Feemɔ mi bɔ ni jɛ onaa lɛ.” (Kojolɔi 11:36) Yoo fɛɛ yoo miisumɔ ni ebote gbalashihilɛ mli ni efɔ. Shi Yefta biyoo lɛ kɛ enyɔ lɛ fɛɛ shã afɔle koni enyɛ esɔmɔ Yehowa. Mɛɛ gbɛ nɔ wɔbaanyɛ wɔkase lɛ, ni wɔ hu wɔkɛ wɔhe ashã afɔle wɔhã Yehowa?

Yoo fɛɛ yoo miisumɔ ni ebote gbalashihilɛ mli ni efɔ, shi Yefta biyoo lɛ kɛ enyɔ lɛ fɛɛ shã afɔle koni enyɛ esɔmɔ Yehowa

17. (a) Mɛɛ gbɛ nɔ wɔbaanyɛ wɔkase Yefta kɛ ebiyoo lɛ? (b) Mɛɛ gbɛ nɔ Hebribii 6:10-12 lɛ woɔ bo hewalɛ ni okɛ ohe ashã afɔle?

17 Nyɛmimɛi oblahii kɛ oblayei akpei abɔ ejɛ amɛsuɔmɔ mli amɛkɛ gbalashihilɛ mli botemɔ kɛ bifɔmɔ eshã  afɔle dã. Mɛni hewɔ? Ejaakɛ amɛmiisumɔ ni amɛkɛ amɛjwɛŋmɔ fɛɛ ama Yehowa sɔɔmɔ lɛ nɔ, ni amɛtsu babaoo yɛ esɔɔmɔ lɛ mli. Nyɛmimɛi komɛi ni edara yɛ afii amli lɛ hu kɛ be ni kulɛ amɛbaanyɛ amɛkɛhi amɛbii kɛ amɛnabii amasɛi lɛ eshã afɔle, bɔ ni afee ni amɛnyɛ amɛkɛ amɛbe kɛ amɛhewalɛ asɔmɔ Yehowa. Amɛteŋ mɛi komɛi miiye amɛmiibua yɛ hei ni aamamɔ Maŋtsɛyeli Asai kɛ tsũi krokomɛi ni akɛsɔmɔɔ Yehowa yɛ lɛ, ni amɛteŋ mɛi komɛi hu etee Skul Kɛhã Maŋtsɛyeli Sane Kpakpa Jajelɔi lɛ eko, ni amɛmiisɔmɔ yɛ hei ni hiamɔ lɛ da yɛ. Mɛi komɛi hu eto amɛnibii ahe gbɛjianɔ koni amɛnyɛ amɛkɛ be pii asɔmɔ Yehowa yɛ Kaimɔ be lɛ mli. Yehowa hiɛ kpaŋ suɔmɔ ni nyɛmimɛi anɔkwafoi nɛɛ jieɔ lɛ kpo lɛ, kɛ bɔ ni amɛkɛ amɛhe kɛ amɛnibii shãa afɔle amɛhãa lɛ lɛ nɔ kɔkɔɔkɔ. (Kanemɔ Hebribii 6:10-12.) Ni bo hu? Ani obaanyɛ okɛ nibii komɛi ashã afɔle koni onyɛ okɛ be babaoo asɔmɔ Yehowa?

MƐNI WƆKASE?

18, 19. Mɛni wɔkase yɛ Yefta kɛ ebiyoo lɛ sane lɛ mli? Ni mɛɛ gbɛ nɔ wɔbaanyɛ wɔtsɔ wɔkase amɛ?

18 Mɛni ye ebua Yefta ni enyɛ edamɔ shihilɛi srɔtoi ni ekɛkpe lɛ anaa? Ekɛ ehiɛ fɔ̃ Yehowa nɔ yɛ yiŋ srɔtoi ni ekpɛ lɛ amli. Ehãaa mɛi ni bɔle lɛ lɛ anifeemɔi gbohii lɛ aná enɔ hewalɛ. Ni etee nɔ eye Yehowa anɔkwa yɛ nibii ni yɔɔ dɔlɛ ni mɛi fee lɛ lɛ fɛɛ sɛɛ. Ekɛ ebiyoo lɛ fɛɛ jɛ amɛsuɔmɔ mli amɛkɛ nibii shã afɔle amɛhã Yehowa, ni enɛ hewɔ lɛ, ejɔɔ amɛ, ni ekɛ amɛ tsu nii yɛ esɔɔmɔ lɛ mli. Be ni mɛi kpa Yehowa sɔɔmɔ lɛ, ekɛ ebiyoo lɛ tee nɔ amɛye Yehowa anɔkwa.

19 Biblia lɛ kɛɔ akɛ: “[Nyɛkasea] mɛi ni tsɔɔ hemɔkɛyeli kɛ tsuishitoo nɔ amɛnáa shiwoi lɛ.” (Hebribii 6:12) No hewɔ lɛ, nyɛhãa wɔkasea Yefta kɛ ebiyoo lɛ, ni wɔya nɔ wɔye Yehowa anɔkwa. Kɛ́ wɔfee nakai lɛ, Yehowa baajɔɔ wɔ.