Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) APRIL 2016

 WALA SHIHILƐ HE SANE

Bɔ ni Fee ni Roman Sistɛs Komɛi Batsɔmɔ Mumɔŋ Nyɛmimɛi

Bɔ ni Fee ni Roman Sistɛs Komɛi Batsɔmɔ Mumɔŋ Nyɛmimɛi

AFII babaoo ni eho nɛ lɛ, minyɛmi yoo fioo Araceli mli fu mi, ni ebolɔ ewo mi ekɛɛ: “Efa. Okɛ mi akawie ojamɔ lɛ he dɔŋŋ. Ewoɔ mimli la. Mɛɛ gbɔmɔ kwraa ji bo?” Nɔ ni ewie lɛ gba minaa waa. Amrɔ nɛɛ, miye afii 91, shi etamɔ nɔ ni wiemɔi nɛɛ miigbɛɛ yɛ mitoiiaŋ lolo. Kɛ̃lɛ, taakɛ Jajelɔ 7:8 lɛ kɛɔ lɛ, “sane naagbee hi fe ebɔimɔ.”Felisa.

Felisa: Afɔ mi yɛ Spain, ni mijɛ weku ko ni bɛ nɔ ko tsɔ lɛ mli. Mipapa tsu nii akɛ dadesɔ̃lɔ, ni mimami yeɔ apaa yɛ mɛi aŋmɔshi. Miji amɛkromɔbi, ni miyɛ nyɛmimɛi kpawo. Katolikbii ji wɔ, ni wɔkɛ sɔlemɔyaa shwɛɛɛ kwraa. Miweku lɛ mli bii 13 sɔŋŋ batsɔmɔ osɔfoi, loo amɛtsu nitsumɔi krokomɛi yɛ sɔlemɔ lɛ mli. Mimami nyɛmi nuu sɔmɔ akɛ osɔfo, ni etsɔɔ nii yɛ Katolik skul ko. Be ni egbo lɛ, Paapa John Paul II wo ehiɛ nyam, ni ekɛ lɛ fata Katolik hetselɔi lɛ ahe.

Be ni miye afii 12 lɛ, abɔi tawuu yɛ Spain. Yɛ ta lɛ sɛɛ lɛ, awo mipapa tsuŋ, ejaakɛ ekɛ nɔyeli lɛ kpãaa gbee yɛ bɔ ni amɛtaoɔ amɛkwra maŋ lɛ amɛhã lɛ he. Nibii amli bawa kɛhã mimami, ni nɔ ni wɔbaaye po bawa. No hewɔ lɛ, ekɛ minyɛmimɛi yei etɛ lɛ, ni ji, Araceli, Lauri, kɛ Ramoni, tee Katolik sɔlemɔ shĩa ko ni yɔɔ Bilbao lɛ, koni alɛ amɛ yɛ jɛmɛ. He ni ekɛ amɛtee lɛ, Roman sistɛs sɔŋŋ yɔɔ jɛmɛ.

Araceli: No mli lɛ, miye afii 14, Lauri eye afii 12, ni Ramoni eye afii 10, ni wɔhiɛ tse shĩa waa. Wɔnitsumɔ yɛ sɔlemɔ shĩa lɛ ji, ni wɔsaa jɛmɛ. Afii enyɔ sɛɛ lɛ, akɛ wɔ tee sɔlemɔ shĩa agbo ko ni yɔɔ Zaragoza lɛ. Akwɛɔ mɛi ni egbɔlɔ yɛ sɔlemɔ shĩa nɛɛ. Nitsumɔ ni akɛhã wɔ yɛ jɛmɛ ji, ni wɔsaa kpata lɛ shi, ni enɛ hã etɔ wɔ bliboo.

Felisa: Be ni akɛ minyɛmimɛi yei lɛ tee sɔlemɔ shĩa lɛ ni yɔɔ Zaragoza lɛ, mimami kɛ mitsɛkwɛ̃ ko, ni no mli lɛ, esɔmɔɔ akɛ osɔfo yɛ Katolik sɔlemɔ ni yɔɔ wɔmaŋ lɛ mli lɛ, kpɛ amɛyiŋ akɛ amɛkɛ mi baayafata amɛhe yɛ jɛmɛ. Amɛfee nakai koni amɛkɛgbala mi kɛ oblanyo ko ni ená mihe suɔmɔ lɛ teŋ. Miná miishɛɛ waa akɛ akɛ mi miiya sɔlemɔ shĩa lɛ, ejaakɛ misumɔɔ Nyɔŋmɔ. Mitee sɔlemɔ daa gbi, ni mishwe waa akɛ mayasɔmɔ yɛ Katolik sɔlemɔi ni yɔɔ maŋsɛɛ lɛ eko mli, tamɔ mimami nyɛmi bi ko ni sɔlemɔ lɛ kɛ lɛ tee Afrika lɛ.

Abɛkugbɛ: Sɔlemɔ shĩa ni yɔɔ Zaragoza, yɛ Spain lɛ; ninejurɔgbɛ: Nácar-Colunga Biblia shishitsɔɔmɔ lɛ

 Shi be ni miyashɛ sɔlemɔ shĩa lɛ, mihiɛ tsɔ yaje misɛɛ. Roman sistɛs lɛ wooo mi hewalɛ ni maya mihiɛ yɛ sɔlemɔ lɛ mli, koni manyɛ mayasɔmɔ yɛ maŋsɛɛ. No hewɔ lɛ, afi sɛɛ lɛ, miku misɛɛ miba shĩa, ni mibakwɛ mitsɛkwɛ̃ lɛ, mɔ ni sɔmɔɔ akɛ osɔfo lɛ. Misaa shĩa lɛ mli mihãa lɛ, ni daa gbɛkɛnaashi lɛ, mikɛ lɛ fɛɛ feɔ ekome ni wɔkɛ ashinao ni Katolikbii kɛsɔleɔ lɛ sɔleɔ. Agbɛnɛ hu, mitoɔ fɔfɔi ni yɔɔ sɔlemɔ lɛ fɛfɛo, ni miwulaa Maria kɛ Katolik hetselɔi lɛ ahe amagai ni mamɔ jɛmɛ lɛ.

Araceli: Be ni miyɔɔ Zaragoza lɛ, mikã klɛŋklɛŋ kitai ni esa akɛ mɔ akã dani ebatsɔ Roman sista lɛ. No sɛɛ lɛ, sistɛs lɛ kpɛ amɛyiŋ akɛ amɛbaagbala wɔyi etɛ lɛ wɔteŋ. No hewɔ lɛ, amɛkɛ mi tee sɔlemɔ shĩa ko ni yɔɔ Madrid, amɛkɛ Lauri tee sɔlemɔ shĩa ko ni yɔɔ Valencia, ni amɛshi Ramoni yɛ Zaragoza. Be ni mitee Madrid lɛ, mikã kitai lɛ nɔ ni ji shii enyɔ nɔ. Skulbii, mɛi ni egbɔlɔ, kɛ mɛi krokomɛi bahiɔ sɔlemɔ shĩa ni yɔɔ Madrid lɛ. No hewɔ lɛ, nitsumɔ etãaa yɛ jɛmɛ. Mitsu nii yɛ helatsamɔhe ni yɔɔ sɔlemɔ shĩa lɛ.

Be ni mibatsɔ Roman sista lɛ, mimii shɛ mihe waa. Misusu akɛ maná be pii ni mikɛkane Biblia lɛ ni manu shishi jogbaŋŋ. Shi jeee nakai kwraa eba lɛ. Wɔkɛ Biblia lɛ tsuuu nii yɛ sɔlemɔ shĩa lɛ, ni mɔ ko mɔ ko kɛ mi egbaaa Nyɔŋmɔ loo Yesu he sane. Nɔ pɛ ni minyɛ mifee yɛ jɛmɛ ji, mikase Latin fioo, mikase Katolik hetselɔi lɛ ahe nii, ni mijá Maria. Be ni eshwɛ lɛ fɛɛ lɛ, mitsu nii dɛŋdɛŋ.

Mihao, ni jɛmɛ shihilɛ je mitsine. Minu he akɛ, eji miitsu nii ni miiná shika kɛmiiye kɛmiibua miweku lɛ kulɛ, sɛɛnamɔ yɛ he, moŋ fe ni matsu nii yɛ sɔlemɔ shĩa lɛ, ni shika lɛ aya mɛi krokomɛi akotokui amli. No hewɔ lɛ, mikɛ wɔ onukpa fe fɛɛ lɛ wie he. Mikɛɛ lɛ akɛ, miitao maya shĩa. Shi ehã awo mi tsuŋ yɛ sɔlemɔ shĩa lɛ mli nɔŋŋ, kɛ jwɛŋmɔ lɛ akɛ no baahã matsake mijwɛŋmɔ.

Sɛɛ mli lɛ, ehã aŋmɛɛ mihe, koni ekwɛ kɛji mitsake mijwɛŋmɔ. Shi, be ni ekɛ sistɛs krokomɛi lɛ na akɛ mitsakeko mijwɛŋmɔ lɛ, amɛsaa amɛwo mi tsuŋ. Amɛfee nakai shii etɛ sɔŋŋ, shi mitsakeee mijwɛŋmɔ. No hewɔ lɛ, amɛkɛɛ mi akɛ, kɛ́ mikɛɛ doo mashi lɛ, belɛ miŋma nɔ ni nyiɛ sɛɛ nɛɛ: “Miisumɔ masɔmɔ Satan moŋ fe Nyɔŋmɔ, ni no hewɔ mishiɔ lɛ.” Mihe jɔ̃ mihe. Shi mitswa mifai shi akɛ, miŋmaŋ nɔ ni amɛkɛɛ miŋma lɛ kɔkɔɔkɔ, kɛ́ no baabi ni maya nɔ mahi sɔlemɔ shĩa lɛ po. Sɛɛ mli lɛ, mikɛɛ amɛ akɛ, miitao mana osɔfo ko ni majaje mihe eshai matsɔɔ lɛ. Be ni mikɛ osɔfo lɛ kpe lɛ, migba lɛ nɔ fɛɛ nɔ. Osɔfo lɛ bi gbɛ kɛjɛ osɔfo ni kwɛɔ nakai kpokpaa lɛ nɔ lɛ dɛŋ ni ehã akɛ mi ku sɛɛ kɛtee sɔlemɔ shĩa lɛ ni yɔɔ Zaragoza lɛ. Mihi jɛmɛ nyɔji fioo komɛi, kɛkɛ ni akɛɛ mi akɛ manyɛ maya shĩa. No sɛɛ etsɛɛɛ lɛ, Lauri kɛ Ramoni hu ku amɛsɛɛ amɛba shĩa.

 WOLO KO NI GBALA WƆTEŊ

Felisa

Felisa: Sɛɛ mli lɛ, mibote gbalashihilɛ mli, ni miyahi Cantabria kpokpaa lɛ nɔ. No mli fɛɛ lɛ, miyaa sɔlemɔ be fɛɛ be, ni mifooo mli. Hɔgbaa ko be ni mitee sɔlemɔ lɛ, osɔfo lɛ kɛ mlifu wie akɛ, “Bɛ nyɛna wolo nɛɛ?” Kɛkɛ ni ewo Anɔkwale ni Kɛ Mɔ Yaa Naanɔ Wala Mli lɛ wolo lɛ nɔ etsɔɔ wɔ, ni ekɛɛ akɛ, “Kɛ́ mɔ ko ehã bo eko lɛ, okɛbahã mi, aloo shɛ ofɔ̃!”

No mli lɛ, mibɛ wolo nɛɛ eko, shi nɔ ni ewie lɛ hã mishwe akɛ maná eko. Gbii fioo komɛi asɛɛ lɛ, yei enyɔ komɛi ni ji Yehowa Odasefoi ba miŋɔɔ yɛ shĩa, ni amɛbahã mi wolo lɛ eko. Mikane wolo lɛ nakai gbɛkɛ lɛ nɔŋŋ. Be ni yei enyɔ lɛ ku amɛsɛɛ amɛbasara mi lɛ, amɛbi mi kɛji masumɔ ni amɛkɛ mi akase Biblia lɛ, ni mikpɛlɛ nɔ.

Anɔkwale wolo lɛ

Ekã mitsui nɔ waa akɛ mafee nɔ ni Nyɔŋmɔ sumɔɔ. No hewɔ lɛ, be ni mikase Yehowa he nii lɛ, mibasumɔ lɛ waa. Mishwe akɛ mahã mɔ fɛɛ mɔ ale ehe sane. Yɛ afi 1973 lɛ, abaptisi mi. Ni mikɛ hegbɛ fɛɛ hegbɛ ni miná lɛ gba miwekumɛi lɛ anɔkwale lɛ he sane. Shi miwekumɛi lɛ eyanyaaa anɔkwale lɛ he kwraa, titri lɛ, minyɛmi yoo Araceli. Amɛyasusu akɛ alaka mi.

Araceli: Bɔ ni akɛ mi ye yɛ sɔlemɔ shĩa lɛ hewɔ lɛ, mimli fu, ni mináaa miishɛɛ yɛ sɔlemɔ lɛ mli dɔŋŋ. Kɛ̃lɛ, mitee sɔlemɔ daa Hɔgbaa, ni mikɛ ashinao ni akɛsɔleɔ lɛ sɔle daa. Nakai beiaŋ fɛɛ lɛ, miitao manu Biblia lɛ shishi jogbaŋŋ. No hewɔ lɛ, misɔle mikɛɛ Nyɔŋmɔ ni eye ebua mi. No mli nɔŋŋ ni Felisa gba mi nibii ni ekaseɔ lɛ. Ekãa kɛ miishɛɛ ni ekɛwie nibii ni ekaseɔ lɛ ahe lɛ hã misusu akɛ eeye sɛkɛ. Mikɛ lɛ kpãaa gbee kwraa yɛ nibii ni ewieɔ lɛ ahe.

Araceli

Sɛɛ mli lɛ, nitsumɔ hã miku misɛɛ kɛtee Madrid, ni mibote gbalashihilɛ mli yɛ jɛmɛ. Be ni afii lɛ hoɔ yaa lɛ, mibayɔse akɛ mɛi ni fɔɔ sɔlemɔ yaa lɛ ehiii shi yɛ Yesu tsɔɔmɔi lɛ anaa. Enɛ hã minine nyɛ shi waa. No hewɔ lɛ, mikpa sɔlemɔ yaa. Miheee tsɔɔmɔi ni kɔɔ hɛl la kɛ Katolik hetselɔi lɛ ahe lɛ miyeee dɔŋŋ, ni miheee miyeee akɛ osɔfo ko baanyɛ ekɛ eshai ake. Mikpãta amagai fɛɛ ni miyɔɔ lɛ ahiɛ. Efee mi akɛ nɔ ni mifeɔ lɛ ehiii. Kɛ̃lɛ, mitee nɔ misɔle mikɛɛ Nyɔŋmɔ akɛ: “Miitao male bo. Ye obua mi!” Mikaiɔ akɛ, nakai beiaŋ fɛɛ lɛ, Yehowa Odasefoi batswaa mishinaa lɛ shii abɔ, shi migbeleee amɛ. Jamɔi fɛɛ asane je mitsine.

 No mli lɛ, Lauri yɛ France, ni Ramoni yɛ Spain. Aaafee afi 1980 lɛ, Yehowa Odasefoi kɛ amɛ bɔi Biblia lɛ kasemɔ. Mimu sane naa akɛ, amɛhã aalaka amɛ, tamɔ bɔ ni alaka Felisa lɛ nɔŋŋ. No sɛɛ be ko lɛ, mi kɛ yoo ko ni yɔɔ wɔkutso lɛ mli ni atsɛɔ lɛ Angelines lɛ kpe, ni wɔbatsɔmɔ nanemɛi kpakpai. Lɛ hu Yehowa Odasefonyo ji lɛ. Angelines kɛ ewu lɛ kɛɛ mi shii abɔ akɛ, amɛbaasumɔ ni amɛkɛ mi akase Biblia lɛ. Ejaakɛ amɛyɔse akɛ, eyɛ mli akɛ mikɛɛ minyaaa jamɔ he moŋ, shi miitao manu Biblia lɛ shishi jogbaŋŋ. Be ni be shwie mli lɛ, mikɛɛ amɛ akɛ: “Yoo minu. Shi kɛ́ nyɛkɛ mi miikase nii lɛ, makane ŋmalɛi lɛ kɛjɛ mi diɛŋtsɛ mi-Biblia lɛ mli!” No mli lɛ, Biblia ni mihiɛ ji Nácar-Colunga shishitsɔɔmɔ lɛ.

BIBLIA LƐ HÃ WƆFEE EKOME

Felisa: Be ni abaptisi mi yɛ afi 1973 lɛ, no mli lɛ, Odasefoi aaafee 70 pɛ yɔɔ Cantabria maŋtiase ni ji Santander lɛ mli. No hewɔ lɛ, ehe bahia ni wɔfã gbɛ wɔyashiɛ yɛ akrowai ohai abɔ ni yɔɔ Cantabria kpokpaa lɛ nɔ lɛ. Akrowai nɛɛ kɛ he ni wɔyɔɔ lɛ teŋ jekɛ waa. Wɔta bɔs mli kɛyashiɛ yɛ ekomɛi amli, ni ekomɛi hu yɛ ni wɔkɛ tsɔne bibioo ni tee jɛmɛ. Shi yɛ naagbee lɛ, wɔshiɛ yɛ akrowai lɛ fɛɛ mli.

Mikɛ mɛi pii ekase Biblia lɛ, ni abaptisi amɛteŋ mɛi 11. Mɛi ni mikɛkase nii lɛ ateŋ mɛi pii ji Katolikbii. Mito mitsui shi mihã amɛ, ejaakɛ mile akɛ, taakɛ eba lɛ yɛ migbɛfaŋ lɛ, ebaahe be dani amɛbaana akɛ nibii ni amɛheɔ amɛyeɔ lɛ jeee anɔkwale. Miyɔse akɛ, Biblia lɛ kɛ Yehowa mumɔ krɔŋkrɔŋ lɛ pɛ baanyɛ ahã mɔ ko afee tsakemɔi ni enu anɔkwale lɛ shishi. (Hebribii 4:12) Abaptisi miwu Bienvenido yɛ afi 1979. Dani ebaabale anɔkwale lɛ, no mli lɛ polisifonyo ji lɛ. Mimami bɔi Biblia lɛ kasemɔ, shi etsɛɛɛ ni egbo.

Araceli: Be ni Yehowa Odasefoi kɛ mi bɔi Biblia lɛ kasemɔ lɛ, minu he akɛ amɛbaalaka mi. Shi be ni be shwieɔ mli lɛ, minuuu he nakai dɔŋŋ. Mina akɛ, Odasefoi lɛ hiɔ shi yɛ nibii ni amɛtsɔɔ mɛi yɛ Biblia lɛ mli lɛ naa. Hemɔkɛyeli ni miyɔɔ yɛ Yehowa kɛ Biblia lɛ mli lɛ mli bawa, ni mina akɛ, mitsui enyɔ mimli agbɛnɛ. Mɛi ni yɔɔ wɔkutso lɛ mli lɛ ateŋ mɛi komɛi yɔse enɛ. Amɛkɛɛ mi akɛ, “Araceli gbɛ ni okɔ lɛ, kaaje nɔ!”

Mikaiɔ akɛ, be ko lɛ, misɔle mikɛɛ Yehowa akɛ, “Yehowa, oyiwaladɔŋŋ akɛ oshiii misane ohãaa mi, ni akɛ, ohã mi hegbɛi babaoo ni mikɛkase Biblia lɛ ni manu shishi jogbaŋŋ, ejaakɛ no ji nɔ ni kã mitsui nɔ.” Mikpa minyɛmi yoo Felisa hu fai yɛ wiemɔi ni wawai ni miwie mishi lɛ lɛ ahewɔ. Kɛjɛ nakai be lɛ kɛyaa lɛ, yɛ nɔ najiaŋ ni wɔkɛ wɔhe baataa naa yɛ saji ahe lɛ, wɔkɛ miishɛɛ susuɔ nibii ni wɔkase yɛ Biblia lɛ mli lɛ ahe. Abaptisi mi yɛ afi 1989. No mli lɛ, miye afii 61.

Felisa: Amrɔ nɛɛ miye afii 91, ni mitsɔ okulafo. Minyɛɛɛ matsu babaoo yɛ Yehowa sɔɔmɔ lɛ mli tamɔ bɔ ni mifeɔ be ko ni eho lɛ. Shi mikaneɔ Biblia lɛ daa gbi, ni be fɛɛ be ni manu he akɛ miyɛ hewalɛ bɔ ni sa lɛ, miyaa asafoŋ kpeei kɛ shiɛmɔ.

Araceli: Misumɔɔ ni mashiɛ mahã osɔfoi kɛ Roman sistɛs fɛɛ ni mikɛkpeɔ, ni efeɔ mi akɛ, Roman sista ni mitsɔ pɛŋ lɛ hewɔ mifeɔ nakai. Amɛteŋ mɛi komɛi boɔ toi, ni amɛteŋ mɛi babaoo hu ŋɔɔ woji kɛ magazin. Mikaiɔ osɔfo ko ni no mli lɛ miyaa eŋɔɔ mikɛ lɛ yagbaa Biblia lɛ mli sane. Be ko lɛ, ekɛɛ mi akɛ: “Araceli, nɔ ni owieɔ lɛ, nyɔŋma shiishi. Shi he ni mida mishɛ nɛɛ, nɛgbɛ maya? Mɛni misɔlemɔ bii lɛ kɛ miwekumɛi lɛ baakɛɛ?” Mi hu mibi lɛ akɛ: “Ni mɛni Nyɔŋmɔ hu baakɛɛ?” Sane lɛ shi lɛ waa, ni mina akɛ, ehiɛ etsake. Shi etamɔ nɔ ni enáaa ekãa ni ekɛmɔ anɔkwale lɛ mli.

Nɔ kome ni mihiɛ kpaŋ nɔ kɔkɔɔkɔ ji be ni miwu kɛɛ mi akɛ ebaafata mihe kɛya asafoŋ kpee lɛ. Be klɛŋklɛŋ ni ekɛ mi tee lɛ, no mli lɛ eye fe afii 80, ni kɛjɛ nakai gbi lɛ nɔ kɛyaa lɛ, efooo asafoŋ kpee mli shi kome po. Akɛ lɛ bɔi Biblia lɛ kasemɔ, ni ebɔi shiɛmɔyaa. Kɛ́ mikai bɔ ni mikɛ lɛ fee ekome kɛtsu shiɛmɔ nitsumɔ lɛ, mináa miishɛɛ waa. Egbo be ni eshwɛ nyɔji enyɔ ni abaabaptisi lɛ.

Felisa: Be ni mibɔi Yehowa sɔɔmɔ lɛ, minyɛmimɛi yei etɛ ni nyiɛ misɛɛ lɛ te shi amɛwo mi. Shi sɛɛ mli lɛ, amɛ hu amɛba anɔkwale lɛ mli. Enɛ ji jɔɔmɔi ni nɔ bɛ ni minine eshɛ nɔ lɛ ateŋ ekome. Amrɔ nɛɛ, wɔnyɛɔ wɔtaa shi wɔsusuɔ wɔ-Nyɔŋmɔ lɛ kɛ e-Wiemɔ lɛ he kɛ miishɛɛ. Ejaakɛ wɔ fɛɛ wɔsumɔɔ Yehowa wɔ-Nyɔŋmɔ lɛ waa, ni wɔmiijá lɛ! *

^ kk. 29 Araceli eye afii 87, Felisa eye afii 91, ni Ramoni eye afii 83. Amɛ fɛɛ amɛkɛ anɔkwayeli miisɔmɔ Yehowa. Lauri gbo yɛ afi 1990, ni lɛ hu eye Yehowa anɔkwa kɛyawula shi.