Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 70

Yesu Tsa Nuu ko ni Afɔ lɛ Shwilafo

Yesu Tsa Nuu ko ni Afɔ lɛ Shwilafo

YOHANE 9:1-18

  • ATSA NIBALƆ KO NI ESHWILA KƐJƐ EFƆMƆ MLI

Yesu kã he eyɛ Yerusalem yɛ Hejɔɔmɔ Gbi lɛ nɔ. Be ni ekɛ ekaselɔi lɛ nyiɛ maŋ lɛ mli lɛ, amɛna nibalɔ ko ni eshwila kɛjɛ efɔmɔ mli. Kaselɔi lɛ bi Yesu akɛ: “Rabi, namɔ fee esha, nuu nɛɛ loo efɔlɔi, hewɔ ni afɔ lɛ shwilafo lɛ?”Yohane 9:2.

Kaselɔi lɛ le akɛ nuu nɛɛ bɛ susuma ko ni anaaa ni ehi shi dani afɔ lɛ, kɛ̃lɛ amɛleee kɛji mɔ ko baanyɛ afee esha be ni eyɔɔ enyɛ musuŋ. Yesu hã hetoo akɛ: “Nuu nɛɛ loo efɔlɔi lɛ efeko esha, shi moŋ eba lɛ nakai koni ajie Nyɔŋmɔ nitsumɔi lɛ akpo yɛ egbɛfaŋ.” (Yohane 9:3) No hewɔ lɛ, jeee tɔmɔ pɔtɛɛ loo esha ko ni nuu nɛɛ loo efɔlɔi lɛ fee lɛ hewɔ ni eshwila lɛ. Shi moŋ, Adam esha lɛ hewɔ lɛ, gbɔmɛi fɛɛ ni afɔɔ lɛ yeee emuu ni amɛbaanyɛ amɛje kpa, tamɔ shwilamɔ nɛkɛ. Shi nuu lɛ shwilamɔ lɛ hã Yesu ná hegbɛ koni ekɛhã ana Nyɔŋmɔ nitsumɔi lɛ, taakɛ efee yɛ bei krokomɛi amli be ni etsa mɛi ahelai lɛ.

Yesu tsɔɔ akɛ, esa akɛ akɛ oyaiyeli atsu nitsumɔi nɛɛ. Ewie akɛ: “Ní je etsɛre nɛɛ, esa akɛ wɔtsu mɔ ni tsu mi lɛ nitsumɔi; nyɔɔŋ lɛ miiba, be mli ni mɔ ko nyɛŋ nii atsu. Gbii abɔ ni miyɔɔ je lɛ mli nɛɛ, miji je lɛ la lɛ.” (Yohane 9:4, 5) Hɛɛ, etsɛŋ Yesu gbele lɛ baahã eyaje gbonyo bu lɛ mli duŋ lɛ mli, ni enyɛŋ efee nɔ ko nɔ ko yɛ jɛmɛ. Shi dani nakai be lɛ baashɛ lɛ, lɛ ji mɔ ni hãa je lɛ la.

Shi ani Yesu baatsa nuu lɛ? Kɛ́ nakai lɛ, mɛɛ gbɛ nɔ ebaatsɔ etsa lɛ? Yesu tsɛ̃ lajɔ̃ efɔ̃ shikpɔŋ, ni ekɛ lajɔ̃ lɛ kpɔtɔ sũ. Ekɛ sũ ni ekpɔtɔ lɛ eko kpa nuu lɛ hiŋmɛii anɔ ni ekɛɛ lɛ akɛ: “Yaafɔflɔ yɛ Siloam kpaakpo lɛ mli.” (Yohane 9:7) Nuu lɛ bo lɛ toi. Be ni eyafɔflɔ lɛ, ena nii! Kwɛ bɔ ni emii baashɛ ehe ehã be ni ena nii klɛŋklɛŋ kwraa yɛ eshihilɛ mli lɛ!

Ekutsoŋbii kɛ mɛi krokomɛi ni le lɛ akɛ kulɛ eji shwilafo lɛ anaa kpɛ amɛhe. Amɛbi akɛ: “Ani jeee nuu ni kulɛ etaa shi ebaa nii lɛ nɛ?” Amɛteŋ mɛi komɛi kɛɛ: “Lɛ ni.” Shi mɛi komɛi hu heee yeee ni amɛkɛɛ: “Dabi kwraa, shi eje lɛ.” Nuu lɛ diɛŋtsɛ kɛɛ amɛ akɛ: “Mi ni.”Yohane 9:8, 9.

No hewɔ lɛ, amɛbi lɛ akɛ: “Belɛ, te fee tɛŋŋ ni ohiŋmɛii gbele lɛ?” Ehã hetoo akɛ: “Nuu ko ni atsɛɔ lɛ Yesu lɛ kpɔtɔ sũ ni ekɛkpa mihiŋmɛii anɔ ni ekɛɛ mi akɛ, ‘Yaa Siloam ni oyafɔflɔ.’ No hewɔ lɛ, mitee ni miyafɔflɔ ni mina nii.” Kɛkɛ ni amɛbi lɛ akɛ: “Nɛgbɛ nakai nuu lɛ yɔɔ?” Nibalɔ lɛ hã hetoo akɛ: “Mileee.”Yohane 9:10-12.

Mɛi lɛ kpala nuu lɛ kɛtee Farisifoi lɛ aŋɔɔ. Amɛ hu amɛmiitao amɛle bɔ ni fee ni nuu lɛ bɔi ninamɔ lɛ. Ekɛɛ amɛ akɛ: “Ekɛ sũ ni akpɔtɔ kpa mihiŋmɛii anɔ, ni miyafɔflɔ, ni miina nii.” Kulɛ esa akɛ Farisifoi lɛ hu aná miishɛɛ taakɛ nibalɔ ni atsa lɛ lɛ ená miishɛɛ lɛ. Shi amɛteŋ mɛi komɛi gbe Yesu he guɔ moŋ. Amɛwie akɛ: “Nuu nɛɛ jɛɛɛ Nyɔŋmɔ ŋɔɔ ejaakɛ eyeee Hejɔɔmɔ Gbi lɛ.” Kɛ̃lɛ, mɛi krokomɛi hu kɛɛ: “Te aaafee tɛŋŋ ni eshafeelɔ ko aaafee okadii ni tamɔ nakai lɛ?” (Yohane 9:15, 16) No hewɔ lɛ, amɛteŋ gbala.

Akɛni amɛkɛ amɛhe kpãaa gbee hewɔ lɛ, amɛbi nuu ni amrɔ nɛɛ eena nii lɛ akɛ: “Akɛni egbele ohiŋmɛii hewɔ lɛ, mɛni okɛɔ yɛ ehe?” Nuu lɛ yiŋ efeee lɛ enyɔnyɔɔnyɔ yɛ mɔ ni Yesu ji lɛ he. Ekɛɛ amɛ akɛ: “Gbalɔ ji lɛ.”Yohane 9:17.

Loloolo lɛ, Yudafoi lɛ heee enɛ yeee. Ekolɛ amɛsusu akɛ Yesu kɛ nuu nɛɛ efee ekome koni amɛlaka mɛi lɛ. Amɛmu sane naa akɛ, gbɛ kome ni abaanyɛ atsɔ nɔ ana sane lɛ naa ji, ní abi nibalɔ lɛ fɔlɔi kɛji no mli lɛ amɛbi lɛ eshwila lɛɛlɛŋ.

Ekrokromɛi Hu Nɛ

‘Kristo ni Ji Nyɔŋmɔ Hewalɛ Lɛ’

Mɛni Yesu Kristo naakpɛɛ nii kɛ nitsɔɔmɔi lɛ tsɔɔ yɛ Yehowa he?