Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 78

Shĩa Nɔkwɛlɔ Anɔkwafo, Saamɔ Ohe Oto

Shĩa Nɔkwɛlɔ Anɔkwafo, Saamɔ Ohe Oto

LUKA 12:35-59

  • ESA AKƐ SHĨA NƆKWƐLƆ ANƆKWAFO LƐ ASAA EHE ETO

  • YESU BA KONI EKƐ MLIGBALAMƆ ABA

Yesu etsɔ hiɛ etsɔɔ akɛ, “tooku bibioo” ko pɛ baahi ŋwɛi Maŋtsɛyeli lɛ mli. (Luka 12:32) Shi esaaa akɛ “tooku bibioo” lɛ kɛ hegbɛ kpele ni amɛbaaná nɛɛ shwɛɔ kwraa. Anɔkwa, etee nɔ ema nɔ mi akɛ, kɛ́ mɔ ko baahi Maŋtsɛyeli lɛ mli lɛ, ehe miihia waa ni ená su kpakpa.

No hewɔ lɛ, Yesu wie etsɔɔ ekaselɔi lɛ akɛ amɛsaa amɛhe amɛto be ni ebaaku esɛɛ eba ekoŋŋ lɛ. Ekɛɛ amɛ akɛ: “Nyɛwoa nyɛtadei ni nyɛfea klalo ni nyɛhãa nyɛkanei lɛ hu atsoa, ni nyɛ diɛŋtsɛ hu nyɛfea tamɔ mɛi ni miimɛ koni amɛnuŋtsɔ ajɛ yookpeemɔ aba, koni kɛ́ eba ni eshi agbó lɛ, amɛgbele lɛ oya nɔŋŋ. Nakai nyɔji lɛ ni be ni nuŋtsɔ lɛ baaba lɛ, ebaabana akɛ amɛmiibu lɛ yɛ miishɛɛ!”Luka 12:35-37.

Ewaaa hãaa kaselɔi lɛ akɛ amɛbaana su ni Yesu wie he yɛ nɔkwɛmɔnɔ lɛ mli akɛ ajie lɛ kpo lɛ. Tsuji ni Yesu tsĩ amɛtã yɛ biɛ lɛ esaa amɛhe amɛto kɛmiimɛ be ni amɛnuŋtsɔ lɛ baaku esɛɛ eba lɛ. Yesu tsɔɔ mli akɛ: “Kɛ́ [nuŋtsɔ lɛ ba] yɛ buu be ni ji enyɔ lɛ nɔ [kɛjɛ aaafee gbɛkɛ ŋmɛlɛ 9 kɛyashi nyɔɔŋteŋ], loo nɔ ni ji etɛ lɛ nɔ [kɛjɛ nyɔɔŋteŋ kɛyashi aaafee maŋkɛ ŋmɛji 3] po, ni ebana amɛ akɛ amɛfee klalo lɛ, amɛyɛ miishɛɛ!”Luka 12:38.

Ŋaawoo nɛɛ kɔɔ nibii babaoo he fe ŋaa ni awoɔ shĩa nɔkwɛlɔi loo nitsulɔi ní amɛtsu nii jogbaŋŋ lɛ kɛkɛ. Wɔnaa enɛ faŋŋ yɛ bɔ ni Yesu, ni ji gbɔmɔ Bi lɛ hã nɔkwɛmɔnɔ lɛ kɔ lɛ hu ehe lɛ mli. Ekɛɛ ekaselɔi lɛ akɛ: “Nyɛ hu, nyɛsaa nyɛhe nyɛtoa, ejaakɛ nɔ ŋmɛlɛtswaa ni nyɛhiɛ kãaa nɔ lɛ, gbɔmɔ Bi lɛ baaba.” (Luka 12:40) Enɛ tsɔɔ akɛ, wɔsɛɛ ko lɛ, Yesu baaba. Eesumɔ ni esɛɛnyiɛlɔi lɛ—titri lɛ, “tooku bibioo” lɛ—asaa amɛhe amɛto.

Akɛni Petro miitao enu nɔ ni Yesu tsɔɔ lɛ shishi jogbaŋŋ hewɔ lɛ, ebi lɛ akɛ: “Nuŋtsɔ, oogba nɔkwɛmɔnɔ nɛɛ ootsɔɔ wɔ pɛ aloo oogba ootsɔɔ mɔ fɛɛ mɔ hu?” Yɛ nɔ najiaŋ ni Yesu baahã Petro hetoo tɛ̃ɛ lɛ, egba nɔkwɛmɔnɔ kroko ni tamɔ nɔ ni egba momo lɛ. Ewie akɛ: “Namɔ tuuntu ji shĩa nɔkwɛlɔ anɔkwafo lɛ, hiɛshikalɔ lɛ, mɔ ni enuŋtsɔ baaŋɔ lɛ eto esɔɔlɔi akuu lɛ nɔ koni eya nɔ ehã amɛ amɛniyenii bɔ ni sa yɛ be ni sa mli lɛ? Nakai nyɔŋ lɛ yɛ miishɛɛ kɛ́ enuŋtsɔ lɛ ba ni ebanina lɛ akɛ eefee nakai lɛ! Miikɛɛ nyɛ yɛ anɔkwale mli akɛ, ebaaŋɔ lɛ eto nibii fɛɛ ni eyɔɔ lɛ nɔ.”Luka 12:41-44.

Ekã shi faŋŋ akɛ, “nuŋtsɔ lɛ” ni awie ehe yɛ nɔkwɛmɔnɔ ni tsɔ hiɛ lɛ mli lɛ ji Yesu, gbɔmɔ Bi lɛ. Belɛ, “shĩa nɔkwɛlɔ anɔkwafo lɛ” kɔɔ “tooku bibioo” lɛ ní abaaŋɔ Maŋtsɛyeli lɛ ahã amɛ lɛ ateŋ hii komɛi ahe. (Luka 12:32) Nɔ ni Yesu tsɔɔ yɛ biɛ lɛ ji akɛ, mɛi komɛi fata kuu nɛɛ he ní baahã “esɔɔlɔi akuu lɛ” ŋmaa, ni ji “amɛniyenii bɔ ni sa yɛ be ni sa mli.” No hewɔ lɛ, Petro kɛ kaselɔi krokomɛi ni Yesu tsɔɔ amɛ nii, ní elɛɔ amɛ yɛ mumɔŋ lɛ baanyɛ amu sane naa akɛ, wɔsɛɛ ko lɛ gbɔmɔ Bi lɛ baaba. Ni yɛ nakai be lɛ mli lɛ, gbɛjianɔtoo ko baahi shi ni abaatsɔ nɔ alɛ Yesu sɛɛnyiɛlɔi, ni ji Nuŋtsɔ lɛ ‘sɔɔlɔi akuu lɛ.’

Yɛ gbɛ kroko nɔ lɛ, Yesu tsɔɔ akɛ ehe miihia waa ni ekaselɔi lɛ ahã amɛhiɛ ahi amɛhe nɔ, ní amɛkwɛ bɔ ni amɛfeɔ amɛnii amɛhãa lɛ jogbaŋŋ. Nɔ hewɔ ji akɛ, mɔ ko hiɛ baanyɛ aje ehe nɔ aahu po akɛ ebaate shi ewo enyɛmimɛi Kristofoi lɛ. Ewie akɛ: “Shi kɛ́ nakai nyɔŋ lɛ kɛɛ yɛ etsuiŋ akɛ, ‘Minuŋtsɔ lɛ miitsɛ kɛbaa,’ ni ebɔi tsuji hii kɛ yei lɛ yii, ni ebɔi niyeli kɛ ninumɔ kɛ dãatɔɔ lɛ, nakai nyɔŋ lɛ nuŋtsɔ lɛ baaba yɛ gbi nɔ ni ekwɛɛɛ lɛ gbɛ, kɛ ŋmɛlɛtswaa nɔ ni eleee, ni ebaagbala etoi waa, ni ebaahã lɛ gbɛfaŋnɔ yɛ mɛi ni yeee anɔkwa lɛ ateŋ.”Luka 12:45, 46.

Yesu kɛɛ eba koni ‘ebawo la yɛ shikpɔŋ lɛ nɔ.’ Ni efee nakai, ejaakɛ saji ni ewie lɛ hãa naataamɔi ni mli wa baa, ni no hãa akpaa amale tsɔɔmɔi kɛ kusumii ahe mama. Enɛ hãa mligbalamɔ baa mɛi ni akpaa gbɛ akɛ amɛfee ekome lɛ po lɛ ateŋ—ehãa ‘tsɛ teɔ shi woɔ binuu ni binuu teɔ shi woɔ tsɛ, nyɛ teɔ shi woɔ biyoo ni biyoo teɔ shi woɔ nyɛ, shaayoo teɔ shi woɔ ebi ŋa, ni ŋa teɔ shi woɔ eshaayoo.’Luka 12:49, 53.

Wiemɔi nɛɛ kɔɔ ekaselɔi lɛ ahe titri. Be ni Yesu wie enɛ sɛɛ lɛ, ekɛ asafoku lɛ hu wie. Amɛteŋ mɛi babaoo kɛ kuɛŋtimɔ ekpoo odaseyeli ni tsɔɔ akɛ lɛ ji Mesia lɛ. No hewɔ lɛ, ekɛɛ amɛ akɛ: “Kɛ́ nyɛna atatu miiwo yɛ anai lɛ, amrɔ lɛ nyɛkɛɔ akɛ, ‘Ahum baatswa kɛ nugbɔnɛmɔ,’ ni ebaa mli nakai. Ni kɛ́ nyɛna akɛ wuoyi kɔɔyɔɔ miitswa lɛ, nyɛkɛɔ akɛ, ‘Jeŋ baadɔ waa,’ ni ebaa mli. Osatofoi, nyɛle bɔ ni shikpɔŋ kɛ ŋwɛi yɔɔ hã lɛ mlipɛimɔ, shi mɛni hewɔ ni nyɛleee bɔ ni nyɛaafee nyɛpɛi be pɔtɛɛ nɛɛ mli lɛ?” (Luka 12:54-56) Eyɛ faŋŋ akɛ, amɛfeko klalo.

Ekrokromɛi Hu Nɛ

BUU-MƆƆ

Mɛɛ Yiŋtoo Hewɔ Kristo Baaku Esɛɛ Lɛ?

Mɛɛ yiŋtoo hewɔ Kristo baaku esɛɛ lɛ? Mɛɛ gbɛ nɔ ebaatsɔ kɛba, ni mɛni ebaafee agbɛnɛ?