Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 77

Yesu Bɔ Kɔkɔ yɛ Ninámɔ He

Yesu Bɔ Kɔkɔ yɛ Ninámɔ He

LUKA 12:1-34

  • NUU NIIATSƐ LƐ HE NƆKWƐMƆNƆ LƐ

  • YESU WIE KWAAKWAALABITEI KƐ ABƐBIA FƆFƆII AHE

  • “TOOKU BIBIOO” BAAHI MAŊTSƐYELI LƐ MLI

Be ni Yesu yeɔ nii yɛ Farisifonyo lɛ shĩa lɛ, no mli lɛ mɛi akpei abɔ miimɛ lɛ yɛ agbó lɛ naa. Nakai nɔŋŋ hu be ni eyɔɔ Galilea lɛ, mɛi babaoo bua amɛhe naa kɛba eŋɔɔ. (Marko 1:33; 2:2; 3:9) Amrɔ nɛɛ eyɛ Yudea, ni mɛi babaoo miitao amɛna lɛ ní amɛbo lɛ toi. Esoro bɔ ni mɛi nɛɛ fee amɛnii amɛhã lɛ kwraa yɛ bɔ ni Farisifoi ni yɔɔ niyeli lɛ shishi lɛ fee amɛnii lɛ he.

Nɔ ni Yesu wie klɛŋklɛŋ lɛ ji nɔ ko ni esa akɛ ekaselɔi lɛ ajwɛŋ nɔ waa. Ewie akɛ: “Nyɛkwɛa jogbaŋŋ yɛ Farisifoi lɛ amasha, ni ji osatofeemɔ lɛ he.” Yesu kɛ kɔkɔbɔɔ nɛɛ ehã pɛŋ, shi nɔ ni ena yɛ niyeli lɛ shishi lɛ hãa anaa bɔ ni kɔkɔbɔɔ nɛɛ kɛnitsumɔ he hiaa waa. (Luka 12:1; Marko 8:15) Farisifoi lɛ feɔ amɛhe mɛi krɔŋkrɔŋi, ekolɛ koni amɛkɛtsimɔ nibii fɔji ni amɛfeɔ lɛ anɔ, shi esa akɛ akpa amɛnifeemɔi gbohii lɛ ahe mama. Yesu tsɔɔ mli akɛ: “Nɔ ko nɔ ko bɛ ni atsimɔ nɔ jogbaŋŋ ni ajieŋ lɛ kpo, ni teemɔŋ sane ko bɛ ni aleŋ.”Luka 12:2.

Ekolɛ mɛi ni bua amɛhe naa kɛba Yesu ŋɔɔ lɛ ateŋ mɛi babaoo ji Yudafoi ni nuko nibii ni etsɔɔ yɛ Galilea lɛ. No hewɔ lɛ, etĩ nibii ni etsɔɔ momo lɛ amli otii lɛ ekomɛi amli. Ewo mɛi fɛɛ ni boɔ lɛ toi lɛ hewalɛ akɛ: “Nyɛkashea mɛi ni gbeɔ gbɔmɔtso lɛ ni no sɛɛ lɛ amɛnyɛɛɛ nɔ ko amɛfee dɔŋŋ lɛ gbeyei.” (Luka 12:4) Taakɛ Yesu fee be ko lɛ, ema bɔ ni esa akɛ esɛɛnyiɛlɔi lɛ kɛ amɛhiɛ afɔ̃ Nyɔŋmɔ nɔ akɛ ebaakwɛ amɛ lɛ nɔ mi. Agbɛnɛ hu, esa akɛ esɛɛnyiɛlɔi lɛ ana lɛ akɛ lɛ ji gbɔmɔ Bi lɛ, ní amɛyɔse hu akɛ Nyɔŋmɔ baanyɛ aye abua amɛ.Mateo 10:19, 20, 26-33; 12:31, 32.

Kɛkɛ ni nuu ko jɛ asafoku lɛ mli ekɛ enaagba ko ní eetao atsu he nii oya nɔŋŋ lɛ bafɔ̃ Yesu hiɛ. Ekɛɛ akɛ: “Tsɔɔlɔ, kɛɛmɔ minyɛmi lɛ ni ekɛ mi aja gboshinii lɛ.” (Luka 12:13) Mla lɛ tsɔɔ akɛ, esa akɛ kɛ́ aja gboshinii amli lɛ, kromɔbi fɛɛ kromɔbi aná emli enyɔ, no hewɔ lɛ kulɛ esaaa akɛ enɛ kɛ ŋwanejee baa. (5 Mose 21:17) Shi etamɔ nɔ ni nuu nɛɛ miitao ená fe bɔ ni mla ŋmɛɔ gbɛ akɛ ená lɛ. Yesu jɛ hiɛshikamɔ mli ekpoo akɛ ebaafi mɛi enyɔ lɛ ateŋ mɔ ko sɛɛ. Ebi lɛ akɛ: “Nuu, namɔ wó mi kojolɔ loo sanebualɔ yɛ nyɛyi enyɔ lɛ teŋ?”Luka 12:14.

Kɛkɛ ni Yesu bɔ mɛi fɛɛ kɔkɔ akɛ: “Nyɛyaa nɔ nyɛgbɛa nyɛhiŋmɛiiaŋ, ni nyɛhiɛ ahia nyɛhe nɔ yɛ amimyeli srɔtoi fɛɛ he, ejaakɛ kɛji gbɔmɔ ená nii babaoo ni eteke nɔ po lɛ, jeee nibii ni eyɔɔ lɛ hãa lɛ wala.” (Luka 12:15) Kɛ́ mɔ ko yɛ nii babaoo po lɛ, ani be ko shɛŋ ni ebaagbo eshi nibii fɛɛ ni eyɔɔ lɛ yɛ sɛɛ? Yesu kɛ nɔkwɛmɔnɔ ko ni hiɛ kpaŋ nɔ tsu nii kɛma sane nɛɛ nɔ mi, ni ekɛtsɔɔ hu akɛ ehe miihia ni aná gbɛ́i kpakpa yɛ Nyɔŋmɔ hiɛ. Ekɛɛ:

“Nuu niiatsɛ ko shikpɔŋ ba nii babaoo. No hewɔ lɛ, ebɔi eyiŋ susumɔ ekɛɛ, ‘Amrɔ nɛɛ ni mibɛ he ko ni mabua minibaa nii lɛ anaa yɛ lɛ, mɛni esa akɛ mafee?’ Ni ekɛɛ, ‘Nɔ ni mafee nɛ: Mibakumɔ minitoohei lɛ mashwie shi ni mamamɔ ewuji, ni mabua miŋmaa lɛ fɛɛ kɛ minii lɛ fɛɛ naa yɛ jɛmɛ, ni makɛɛ mihe akɛ: “Oyɛ nibii kpakpai babaoo ni akɛto ahã bo afii pii; jɔɔmɔ ohe, ye ni onu, ni omii ashɛ ohe.”’ Shi Nyɔŋmɔ kɛɛ lɛ akɛ, ‘Kwashia, nyɔɔŋ nɛɛ mli nɔŋŋ lɛ abaabi owala shi yɛ odɛŋ. Belɛ, nibii ni obua naa oto lɛ, namɔ nɔ amɛbaatsɔ?’ Nakai nɔŋŋ eji yɛ mɔ ni buaa jwetrii anaa ehãa ehe shi ejeee niiatsɛ yɛ Nyɔŋmɔ hiɛ lɛ gbɛfaŋ.”Luka 12:16-21.

inámɔ sɛɛ ni atiuɔ loo heloonaa nibii babaoo anaa ni abuaa lɛ he tsɔne lɛ baanyɛ adu Yesu kaselɔi lɛ kɛ mɛi krokomɛi ni boɔ lɛ toi lɛ fɛɛ. Ni yeyeeye ni afeɔ yɛ shihilɛ he lɛ hu baanyɛ agbala amɛjwɛŋmɔ kɛje Yehowa sɔɔmɔ nɔ. No hewɔ lɛ, Yesu tĩ ŋaawoo kpakpa ni ekɛhã yɛ e-Gɔŋ nɔ Shiɛmɔ lɛ mli aaafee afi kome kɛ fã ni eho nɛ lɛ mli ekoŋŋ, akɛ:

“Nyɛkpaa yeyeeyefeemɔ yɛ nyɛwala he yɛ nɔ ni nyɛbaaye lɛ hewɔ, loo yɛ nyɛgbɔmɔtsei ahe yɛ nɔ ni nyɛbaawo lɛ hewɔ . . . Nyɛsusua kwaakwaalabitei ahe nyɛkwɛa: Amɛduuu nii, asaŋ amɛkpaaa nii; amɛbɛ aboŋo loo nitoohe; kɛ̃lɛ, Nyɔŋmɔ lɛɔ amɛ. Ani nyɛjara waaa kwraa fe loofɔji? . . . Nyɛsusua bɔ ni abɛbia fɔfɔii daraa lɛ he nyɛkwɛa: Amɛgbooo deŋme, asaŋ amɛtsɛ̃ɛɛ kpãa; shi miikɛɛ nyɛ akɛ, yɛ Solomon anunyam lɛ fɛɛ sɛɛ po lɛ, ewulaaa tamɔ enɛɛmɛi ateŋ ekome. . . . No hewɔ lɛ, nyɛkpaa nɔ ni nyɛbaaye kɛ nɔ ni nyɛbaanu lɛ taomɔ, ni nyɛkpaa yeyeeyefeemɔ tuutu . . . Nyɛ-Tsɛ lɛ le akɛ nibii nɛɛ ahe miihia nyɛ. . . . Nyɛyaa nɔ nyɛtaoa e-Maŋtsɛyeli lɛ, ni abaaŋɔ nibii nɛɛ fɛɛ afata he ahã nyɛ.”Luka 12:22-31; Mateo 6:25-33.

Namɛi baatao Nyɔŋmɔ Maŋtsɛyeli lɛ? Yesu hã ale akɛ anɔkwafoi fioo pɛ, ni ji “tooku bibioo” lɛ baafee nakai. Sɛɛ mli lɛ, abaatsɔɔ akɛ amɛyibɔ ji 144,000 pɛ. Mɛni asaa ato amɛ? Yesu ma nɔ mi ehã amɛ akɛ: “Nyɛ-Tsɛ lɛ ekpɛ mli akɛ ebaaŋɔ Maŋtsɛyeli lɛ ehã nyɛ.” Mɛi nɛɛ ebɔŋ jwetrii amɛhãŋ amɛhe yɛ shikpɔŋ lɛ nɔ, ejaakɛ julɔi baanyɛ abaju. Shi moŋ, amɛbaahã amɛtsui ahi “jwetri ni etãaa yɛ ŋwɛi,” he ni amɛkɛ Kristo baaye nɔ yɛ lɛ nɔ.Luka 12:32-34.