Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu​—Gbɛ lɛ, Anɔkwale lɛ, Wala Lɛ

 YITSO 69

Namɔ Ji Amɛtsɛ​—Abraham Aloo Abonsam?

Namɔ Ji Amɛtsɛ​—Abraham Aloo Abonsam?

YOHANE 8:37-59

  • YUDAFOI LƐ KƐƐ AMƐTSƐ JI ABRAHAM

  • YESU YƐ DANI ABRAHAM BA SHIHILƐ MLI

Yesu yɛ Yerusalem lolo kɛhã Agbai (loo, Asesei) Agbi Jurɔ lɛ yeli, ni eetsɔɔ mɛi anɔkwalei ni he hiaa. Yudafoi ni yɔɔ gbijurɔyeli lɛ shishi lɛ ekomɛi kɛɛ lɛ akɛ: “Abraham seshibii ji wɔ, ni wɔtsɔmɔko mɔ ko nyɔji pɛŋ.” Yesu to he ehã amɛ akɛ: “Mile akɛ Abraham seshibii ji nyɛ. Shi nyɛmiitao nyɛgbe mi, ejaakɛ miwiemɔ shwereee yɛ nyɛteŋ. Nibii ni mina be mli ni mikɛ mi-Tsɛ yɔɔ lɛ, nomɛi miwieɔ, shi nyɛ hu, nibii ni nyɛnu yɛ nyɛtsɛ lɛ naa lɛ, nomɛi nyɛfeɔ.”​—Yohane 8:33, 37, 38.

Nɔ ni Yesu tsɔɔ lɛ yɛ faŋŋ: Esoro e-Tsɛ ni esoro amɛ hu amɛtsɛ. Akɛni Yudafoi lɛ nuuu nɔ ni Yesu tsɔɔ lɛ shishi hewɔ lɛ, amɛsaa amɛwie akɛ: “Wɔtsɛ ji Abraham.” (Yohane 8:39; Yesaia 41:8) Abraham seshibii diɛŋtsɛ ji amɛ. No hewɔ lɛ, amɛsusuɔ akɛ amɛ kɛ Abraham, ni ji Nyɔŋmɔ naanyo lɛ, fɛɛ hiɛ hemɔkɛyeli kome.

Shi Yesu wie nɔ ko ni baahã amɛnaa akpɛ amɛhe. Ekɛɛ: “Abraham bii ji nyɛ kulɛ, nyɛbaatsu Abraham nitsumɔi lɛ.” Yɛ anɔkwale mli lɛ, bi kaseɔ etsɛ. Yesu tsa nɔ akɛ: “Shi amrɔ nɛɛ nyɛmiitao nyɛgbe mi, mi mɔ ni mikɛɔ nyɛ anɔkwale ni minu yɛ Nyɔŋmɔ naa lɛ. Abraham efeee enɛ.” Kɛkɛ ni Yesu wie nɔ ko ni baahã amɛhiɛ afee amɛ yaa. Ewie akɛ: “Nyɛ lɛ, nyɛtsɛ nitsumɔi nyɛtsuɔ lɛ.”​—Yohane 8:39-41.

Loloolo lɛ, Yudafoi lɛ enaaa mɔ ni Yesu kɛɛ eji amɛtsɛ lɛ. Amɛtsɔɔ mli akɛ, jeee ajwamaŋ bii ji amɛ. Amɛkɛɛ: “Afɔɔɔ wɔ yɛ jeŋba sha mli; Tsɛ kome wɔyɔɔ, lɛ ji Nyɔŋmɔ.” Shi ani Nyɔŋmɔ ji amɛ-Tsɛ lɛɛlɛŋ? Yesu wie akɛ: “Eji Nyɔŋmɔ ji nyɛ-Tsɛ kulɛ, nyɛbaasumɔ mi, ejaakɛ Nyɔŋmɔ ŋɔɔ mijɛ kɛba ni miyɔɔ biɛ lɛ. Mi diɛŋtsɛ mitooo miyiŋ mibaaa, shi moŋ nakai mɔ lɛ tsu mi.” Yesu bi amɛ akɛ: “Mɛni hewɔ nyɛnuuu nɔ ni miwieɔ lɛ shishi lɛ?” Kɛkɛ ni lɛ diɛŋtsɛ ehã hetoo akɛ: “Ejaakɛ nyɛnyɛɛɛ miwiemɔ lɛ toi nyɛbo.”​—Yohane 8:41-43.

Yesu miibɔ mɔdɛŋ koni ehã amɛna nibii ni baajɛ kpoomɔ ni amɛkpoɔ lɛ lɛ mli kɛba. Shi amrɔ nɛɛ, ekɛma amɛhiɛ faŋŋ akɛ: “Nyɛ lɛ, nyɛjɛ nyɛtsɛ ni ji Abonsam lɛ mli, ni nyɛsumɔɔ akɛ nyɛfee nyɛtsɛ lɛ suɔmɔnaa nii.” Te amɛtsɛ lɛ tamɔ tɛŋŋ? Yesu tsɔɔ mɔ ni amɛtsɛ lɛ ji lɛ mli faŋŋ akɛ: “Nakai mɔ lɛ gbɔmɔgbelɔ ji lɛ be ni eje shishi lɛ, ni edamɔɔɔ shi shiŋŋ yɛ anɔkwale lɛ mli.” Yesu kɛfata he akɛ: “Mɔ ni jɛ Nyɔŋmɔ ŋɔɔ lɛ, eboɔ Nyɔŋmɔ wiemɔi atoi. No hewɔ ni nyɛbooo toi lɛ, ejaakɛ nyɛjɛɛɛ Nyɔŋmɔ ŋɔɔ.”​—Yohane 8:44, 47.

Bɔ ni Yesu bu Yudafoi lɛ fɔ lɛ wo amɛmli la, ni amɛhã lɛ hetoo akɛ: “Ani ejeee anɔkwale akɛ, wɔkɛɛ akɛ, ‘Samarianyo ji bo ni oyɛ daimonio’?” “Samarianyo” ni amɛtsɛ Yesu lɛ tsɔɔ akɛ amɛmiinyaŋe lɛ. Shi Yesu tswa amɛjɛmɔ lɛ efɔ̃, ni ekɛɛ amɛ akɛ: “Mibɛ daimonio, shi mikɛ woo hãa mi-Tsɛ, ni nyɛ lɛ nyɛgbeɔ mihe guɔ.” Yesu wo shi ko ni baahã mɔ naa akpɛ ehe. Ekɛɛ akɛ: “Kɛji mɔ ko ye miwiemɔ nɔ lɛ, enaŋ gbele kɔkɔɔkɔ,” ni no hãa wɔnaa akɛ ehe guɔ ni amɛgbeɔ lɛ yɛ hiɛdɔɔ waa. Etsɔɔɔ akɛ bɔfoi lɛ kɛ esɛɛnyiɛlɔi krokomɛi lɛ gboiŋ diɛŋtsɛ. Nɔ ni etsɔɔ moŋ ji akɛ, naanɔ hiɛkpatamɔ, ni ji “gbele ni ji enyɔ lɛ,” náŋ amɛnɔ hewalɛ. Kɛ́ mɔ ko gbo gbele nɛɛ, ateŋ lɛ shi dɔŋŋ.​—Yohane 8:48-51; Kpojiemɔ 21:8.

Shi Yudafoi lɛ nuuu nɔ ni Yesu tsɔɔ lɛ shishi diɛŋtsɛ. Amɛwie akɛ: “Agbɛnɛ wɔná wɔle akɛ oyɛ daimonio. Abraham gbo, ni gbalɔi lɛ hu gboi, shi bo lɛ okɛɛ, ‘Kɛji mɔ ko ye miwiemɔ nɔ lɛ, esaŋ enaa gbele kɔkɔɔkɔ.’ Ani ofe wɔtsɛ Abraham ni gbo lɛ? . . . Namɔ okɛɔ akɛ oji?”​—Yohane 8:52, 53.

Eyɛ faŋŋ akɛ, Yesu miitsɔɔ akɛ lɛ ji Mesia lɛ. Shi nɔ najiaŋ ni ebaahã amɛsanebimɔ lɛ hetoo tɛ̃ɛ kɛtsɔɔ amɛ mɔ ni eji lɛ, ewie akɛ: “Kɛji miwo mi diɛŋtsɛ mihiɛ nyam lɛ, minunyam lɛ jeee nɔ ko. Mi-Tsɛ ji mɔ ni woɔ mihiɛ nyam, mɔ ni nyɛkɛɔ akɛ lɛ ji nyɛ-Nyɔŋmɔ lɛ. Kɛ̃lɛ nyɛleko lɛ, shi mi lɛ  mile lɛ. Ni kɛ́ mikɛɛ mileee lɛ lɛ, matsɔ amalelɔ tamɔ nyɛ.”​—Yohane 8:54, 55.

Agbɛnɛ, Yesu saa etsɛ amɛtsɛ anɔkwafo Abraham sane lɛ yisɛɛ, ni ewie akɛ: “Nyɛtsɛ Abraham mii shɛ ehe naakpa yɛ hiɛnɔkamɔ ni ená akɛ ebaana migbi lɛ hewɔ, ni ena ni emii shɛ ehe.” Hɛɛ, akɛni Abraham he Nyɔŋmɔ shiwoo lɛ eye hewɔ lɛ, ekwɛ Mesia lɛ baa lɛ gbɛ. Nɔ ni ewie lɛ hã Yudafoi lɛ anaa kpɛ amɛhe ni amɛkɛɛ lɛ akɛ: “Oyeko afii nyɔŋmai enumɔ po, ni kɛ̃lɛ ona Abraham lo?” Yesu hã amɛ hetoo akɛ: “Lɛɛlɛŋ, lɛɛlɛŋ, miikɛɛ nyɛ akɛ, dani Abraham baaba shihilɛ mli lɛ, miyɛ.” Eetsɔɔ be ni eyɔɔ ŋwɛi akɛ mumɔŋ bɔɔ nɔ ni he wa dani eba shikpɔŋ lɛ nɔ lɛ.​—Yohane 8:56-58.

Yudafoi lɛ amli wo la waa akɛ Yesu kɛɛ eyɛ dani Abraham ba shihilɛ mli, no hewɔ lɛ amɛka akɛ amɛbaatswia lɛ tɛi. Shi Yesu shi jɛmɛ ní amɛyeee lɛ awui ko.

Ekrokromɛi Hu Nɛ

KASEMƆ AMƐHEMƆKƐYELI LƐ

Abraham—‘Mɛi Fɛɛ ni Yɔɔ Hemɔkɛyeli lɛ Atsɛ’

Mɛni Abraham fee kɛtsɔɔ akɛ eyɛ hemɔkɛyeli? Mɛɛ gbɛi anɔ obaasumɔ ni okase Abraham hemɔkɛyeli lɛ?