Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 86

Bi ni Laaje lɛ Ku Esɛɛ

Bi ni Laaje lɛ Ku Esɛɛ

LUKA 15:11-32

  • BI NI LAAJE LƐ HE NƆKWƐMƆNƆ LƐ

Yesu gba nɔkwɛmɔnii ni kɔɔ gwantɛŋ ni laaje kɛ drakma kapɛlɛ ni laaje lɛ he, ni no mli lɛ eeenyɛ efee akɛ eyɛ Perea ni kã Yordan Faa lɛ boka lɛ. Nɔ ni wɔkaseɔ kɛjɛɔ nɔkwɛmɔnii enyɔ nɛɛ fɛɛ mli ji, kɛ́ eshafeelɔ ko tsake etsui ni eku esɛɛ kɛba Nyɔŋmɔ ŋɔɔ lɛ, esa akɛ wɔnya. Farisifoi lɛ kɛ woloŋmalɔi lɛ wie amɛshi Yesu ejaakɛ ehereɔ mɛi ni tamɔ nɛkɛ. Shi ani Farisifoi lɛ kɛ woloŋmalɔi lɛ kase nɔ ko kɛjɛ nɔkwɛmɔnii ni Yesu gba nɛɛ amli? Ani amɛyɔse bɔ ni wɔ-Tsɛ ni yɔɔ ŋwɛi lɛ nuɔ he ehãa kɛ́ eshafeelɔ ko tsake etsui lɛ? Agbɛnɛ, Yesu gba nɔkwɛmɔnɔ kroko ni ekɛma nɔ mi ekoŋŋ akɛ, esa akɛ wɔnya kɛ́ eshafeelɔ ko tsake etsui.

Nɔkwɛmɔnɔ lɛ kɔɔ tsɛ ko ni yɔɔ bihii enyɔ he, ni egbalaa jwɛŋmɔ kɛyaa binuu fioo lɛ nɔ titri. Esa akɛ Farisifoi lɛ kɛ woloŋmalɔi lɛ, kɛ mɛi fɛɛ ni boɔ nɔ ni Yesu wieɔ lɛ toi lɛ akase nɔ ko kɛjɛ nɔ ni egba yɛ binuu fioo lɛ he lɛ mli. Kɛ̃lɛ, esaaa akɛ akuɔ hiɛ ashwieɔ nɔ ni ewie yɛ tsɛ lɛ kɛ binukpa lɛ he lɛ nɔ, ejaakɛ abaanyɛ akase nɔ ko hu kɛjɛ sui ni amɛjie lɛ kpo lɛ amli. No hewɔ lɛ, be ni oboɔ nɔkwɛmɔnɔ ni Yesu gba lɛ toi lɛ, hã hii etɛ nɛɛ fɛɛ ahi ojwɛŋmɔ mli:

Yesu je shishi akɛ: “Nuu ko yɛ bihii enyɔ. Amɛteŋ gbekɛ lɛ kɛɛ etsɛ akɛ, ‘Ataa, hã mi onii lɛ mli nɔ ni ji migbɛfaŋnɔ.’ No hewɔ lɛ, eja nibii ni eyɔɔ lɛ amli ehã amɛ.” (Luka 15:11, 12) Kadimɔ akɛ, jeee akɛ tsɛ lɛ egbo hewɔ binuu fioo lɛ taoɔ ni akɛ egbɛfaŋnɔ yɛ etsɛ gboshinii amli lɛ ahã lɛ lɛ. Etsɛ lɛ yɛ wala mli. Kɛ̃lɛ binuu nɛɛ miitao ni akɛ egbɛfaŋnɔ lɛ ahã lɛ amrɔ nɛɛ koni etse ehe ni ekɛ nibii lɛ ayafee nɔ ni esumɔɔ. Mɛɛ su ji no?

Yesu tsa nɔ akɛ: “No sɛɛ gbii fioo komɛi lɛ, gbekɛ lɛ bua enibii fɛɛ naa ni efã gbɛ kɛtee maŋsɛɛ shɔŋŋ he ko, ni eyaba ejeŋ basabasa kɛkpãtã enii lɛ fɛɛ hiɛ yɛ jɛmɛ.” (Luka 15:13) Gbekɛ nɛɛ tsɛ kwɛɔ lɛ kɛ enyɛmi nuu lɛ fɛɛ jogbaŋŋ ni ehãa amɛ hiamɔ nii, no hewɔ lɛ nɔ ko he ehiaaa amɛ, shi fɛɛ sɛɛ lɛ, gbekɛ nuu nɛɛ fã kɛtee maŋ kroko nɔ. Ekɛ ehe yawo bɔlɛnamɔ jeŋba sha mli kɛkpãtã enii lɛ fɛɛ hiɛ. Etsɛɛɛ ni nibii amli bawa hã lɛ, Yesu tsa nɔ akɛ:

“Be ni efite nɔ fɛɛ nɔ lɛ, hɔmɔ ni naa wa ko ba yɛ nakai maŋ lɛ nɔ fɛɛ, ni ehia lɛ. Etee po ekɛ ehe yakpɛtɛ nakai maŋ lɛ nɔ bii lɛ ateŋ mɔ kome he, ni mɔ lɛ hã etee eshikpɔŋ nɔ koni eyakwɛ kpolotoi. Ni eshwe waa akɛ ená niyenii ni kpolotoi lɛ yeɔ lɛ eko eye ni etɔ, shi mɔ ko mɔ ko hãaa lɛ nɔ ko.”Luka 15:14-16.

Nyɔŋmɔ Mla lɛ buɔ kpolotoi akɛ kooloi ni he tseee, fɛɛ sɛɛ lɛ, ehe bahia ni binuu nɛɛ atsu nii akɛ kpolotoi akwɛlɔ. Hɔmɔ ye lɛ aahu akɛ eshwe akɛ eye kpolotoi lɛ aniyenii lɛ eko. Haomɔ kɛ fimɔ ni binuu nɛɛ yaje mli lɛ hã “ehiɛ ba ehe nɔ.” Mɛni efee? Ekɛ ehe wie ekɛɛ: “Mitsɛ yɛ apaafoi babaoo ni yɔɔ aboloi babaoo ni eteke nɔ, ni mi lɛ, hɔmɔ gbeɔ mi yɛ biɛ nɛɛ! Mate shi maya mitsɛ ŋɔɔ ni mayakɛɛ lɛ akɛ: ‘Ataa, mifee esha mishi ŋwɛi kɛ bo hu. Misaaa mɔ ni atsɛɔ lɛ obi dɔŋŋ. Ŋɔɔ mi ofee tamɔ opaafoi lɛ ateŋ mɔ kome.’” Kɛkɛ ni ete shi ni eyiŋ etee etsɛ lɛ ŋɔɔ.Luka 15:17-20.

Te etsɛ baafee enii ehã tɛŋŋ? Ani emli baafu ebinuu lɛ ni ebaasopa lɛ yɛ shĩa ni eshi lɛ hewɔ? Aloo ekwɛŋ ehiɛ po? Kɛ́ bo ni lɛ, kulɛ te obaafee onii ohã tɛŋŋ? Ni kɛ́ obinuu loo obiyoo efee nakai lɛɛlɛŋ hu?

 ANA BI NI LAAJE LƐ

Yesu tsa nɔ ni etsɔɔ bɔ ni tsɛ lɛ nu he ehã kɛ bɔ ni efee enii ehã, ewie akɛ: “Be ni [binuu lɛ nyiɛ] shɔŋŋ kɛbaa lɛ, etsɛ hiŋmɛi gba enɔ ni emusuŋ tsɔ lɛ, ni esha foi ni eyafua lɛ atuu ni ekɛ suɔmɔ shɔ enaa.” (Luka 15:20) Kɛ́ tsɛ lɛ enu bɔ ni ebi lɛ yaba ejeŋ basabasa lɛ he po lɛ, ehere lɛ atuu kɛba shĩa ekoŋŋ. Ani nɔkwɛmɔnɔ nɛɛ baahã Yudafoi lɛ ajamɔŋ hiɛnyiɛlɔi ni kɛɔ akɛ amɛle Yehowa ni amɛjáa lɛ hu lɛ ayɔse bɔ ni wɔ-Tsɛ ni yɔɔ ŋwɛi lɛ nuɔ he ehãa kɛ́ eshafeelɔ ko tsake etsui lɛ? Ani amɛbaayɔse akɛ nakai nɔŋŋ ji bɔ ni Yesu feɔ enii ehãa yɛ eshafeelɔi ni etsake amɛtsui lɛ ahe?

Ŋwanejee ko bɛ he akɛ, tsɛ ni yoɔ nii asɛɛ nɛɛ yɔse akɛ ebinuu lɛ etsake etsui yɛ bɔ ni gbekɛ lɛ hiɛ efee mɔbɔmɔbɔ lɛ hewɔ. Fɛɛ sɛɛ lɛ, bɔ ni suɔmɔ tsirɛ tsɛ lɛ ni lɛ tsutsu etee eyaloo ebi lɛ atuu lɛ hã efee mlɛo kɛhã gbekɛ lɛ akɛ ebaajaje ehe eshai lɛ etsɔɔ lɛ. Yesu kɛshi sɛɛ akɛ: “Ni bi lɛ kɛɛ lɛ akɛ, ‘Ataa, mifee esha mishi ŋwɛi kɛ bo hu. Misaaa mɔ ni atsɛɔ lɛ obi dɔŋŋ.’”Luka 15:21.

Tsɛ lɛ fã enyɔji lɛ akɛ: “Nyɛhe afea oya! nyɛkɛ atade yuu ni fe fɛɛ lɛ abaa ni nyɛkɛbawoa lɛ, ni nyɛwoa enine ga, ni nyɛwoa enaji hu tokotai. Nyɛkɛ tsinabi ni eshwi lɛ hu abaa, nyɛgbea lɛ, ni nyɛhãa wɔyea nii ni wɔmii ashɛa wɔhe, ejaakɛ mibi nɛɛ gbo ni eba wala mli ekoŋŋ; elaaje ni ana lɛ.’ Ni amɛbɔi nyamɔ.”Luka 15:22-24.

Be ni enɛ yaa nɔ lɛ, no mli lɛ, tsɛ lɛ binukpa lɛ yɛ ŋmɔshi. Yesu wie akɛ: “Be ni eku esɛɛ ni ebɛŋkɛ shĩa lɛ, enu lalai kɛ joi ahe. No hewɔ lɛ, etsɛ tsuji lɛ ateŋ mɔ kome kɛba eŋɔɔ ni ebi lɛ nɔ ni yaa nɔ. Ekɛɛ lɛ akɛ, ‘Onyɛmi lɛ eba, ni otsɛ egbe tsinabi ni eshwi lɛ, ejaakɛ eku esɛɛ eba eŋɔɔ kɛ gbɔmɔtsoŋ hewalɛ kpakpa.’ Shi emli fu ni esumɔɔɔ ni eboteɔ shĩa lɛ mli. Ni etsɛ je kpo ni ebabɔi lɛ faikpamɔ. Ni ehere nɔ ekɛɛ etsɛ akɛ, ‘Naa! Afii abɔ sɔŋŋ nɛ ni misɔmɔ bo tamɔ nyɔŋ, ni mitɔ̃ko ofamɔ ko nɔ dã, ni kɛ̃lɛ ohãko mi abotia bi kome dã koni mikɛ minanemɛi aná wɔhe  miishɛɛ. Shi be ni obi nɛɛ ni kɛ ashawoi yakpãtã onibii ahiɛ lɛ bashɛ shi nɔŋŋ lɛ, ogbe tsinabi ni eshwi lɛ ohã lɛ.’”Luka 15:25-30.

Namɛi feɔ amɛnii tamɔ binukpa lɛ, ni amɛwieɔ amɛshiɔ mɔbɔ ni Yesu naa mɛi foji kɛ mɛi ni ji eshafeelɔi kɛ bɔ ni ekɛ amɛ yeɔ ehãa lɛ? Amɛ ji woloŋmalɔi kɛ Farisifoi lɛ. Wiemɔ ni amɛwieɔ amɛshiɔ Yesu akɛ ehereɔ eshafeelɔi hiɛmɛɛ lɛ hewɔ ni Yesu kɛ nɔkwɛmɔnɔ nɛɛ tsu nii lɛ. Esa akɛ mɔ fɛɛ mɔ ni wieɔ shiɔ mɔbɔ ni Nyɔŋmɔ naa eshafeelɔi lɛ akase nɔ ko kɛjɛ enɛ mli.

Be ni Yesu muɔ nɔkwɛmɔnɔ nɛɛ naa lɛ, etsɔɔ bɔ ni tsɛ lɛ wie etsɔɔ ebinukpa lɛ ehã, ni ekɛɛ: “Mibi, bo lɛ, okɛ mi yɔɔ daa nɛɛ, ni nɔ fɛɛ nɔ ni miyɔɔ lɛ onɔ ni. Shi esa akɛ wɔmii ashɛ wɔhe ni wɔmli afili wɔ, ejaakɛ onyɛmi nɛɛ gbo ni eba wala mli; elaaje ni ana lɛ.”Luka 15:31, 32.

Yesu etsɔɔɔ nɔ ni binukpa nɛɛ fee yɛ no sɛɛ. Shi be ni Yesu gbo ni atee lɛ shi sɛɛ lɛ, “osɔfoi lɛ ateŋ mɛi babaoo bɔi hemɔkɛyeli lɛ nɔkpɛlɛmɔ.” (Bɔfoi 6:7) Eeenyɛ efee akɛ amɛteŋ mɛi komɛi yɛ jɛmɛ be ni Yesu kɛ nɔkwɛmɔnɔ ni tsɔɔ mɔ nɔ ko ni he hiaa waa ni kɔɔ binuu ni laaje lɛ he lɛ tsu nii lɛ. Anɔkwa, no hã amɛhiɛ ba amɛhe nɔ, amɛtsake amɛtsui, ni amɛkpale kɛba Nyɔŋmɔ ŋɔɔ.

Kɛjɛ gbi ni Yesu gba nɔkwɛmɔnɔ nɛɛ sɛɛ kɛyaa lɛ, Yesu kaselɔi fɛɛ ni wɔ hu wɔfata he lɛ baanyɛ amɛkɛ nɔ ni amɛkase yɛ nɔkwɛmɔnɔ nɛɛ mli lɛ atsu nii, ni esa akɛ amɛfee nakai hu. Klɛŋklɛŋ nɔ ni wɔbaanyɛ wɔkase ji, nilee yɛ mli akɛ wɔɔya nɔ wɔhi Nyɔŋmɔ webii lɛ ateŋ, koni wɔ-Tsɛ ni sumɔɔ wɔ ni ehãa wɔ nibii ni he hiaa wɔ lɛ aya nɔ akwɛ wɔ fe ni wɔbaashi kɛyanyiɛ wɔ diɛŋtsɛ wɔkɔnɔi ni kaa wɔ lɛ asɛɛ tamɔ bɔ ni binuu fioo lɛ fã gbɛ kɛtee “maŋsɛɛ shɔŋŋ he ko” lɛ.

Nɔ kroko ni wɔkaseɔ yɛ mli ji akɛ, kɛ́ wɔteŋ mɔ ko kpalaŋ kɛje Nyɔŋmɔ gbɛ lɛ nɔ lɛ, esa akɛ ekɛ heshibaa aku esɛɛ kɛba wɔ-Tsɛ lɛ ŋɔɔ ekoŋŋ.

Wɔbaanyɛ wɔkase nɔ ko hu kɛjɛ bɔ ni tsɛ lɛ here ebinuu lɛ atuu, ni ekɛ ehe eshai fa lɛ lɛ, kɛ bɔ ni binukpa lɛ mli fu, ni ehereee enyɛmi fioo lɛ hiɛmɛɛ lɛ hu mli. Ekã shi faŋŋ akɛ, kɛ́ mɔ ko ni ekpalaŋ tsake etsui lɛɛlɛŋ ni eku esɛɛ kɛba Nyɔŋmɔ ŋɔɔ, ni tsɔɔ akɛ eba ‘e-Tsɛ we lɛ,’ esa akɛ wɔkɛ mɔ lɛ he afa lɛ, ni wɔhere lɛ atuu. Nyɛhãa wɔnyaa akɛ wɔnyɛmi lɛ “gbo ni eba wala mli ekoŋŋ; elaaje ni ana lɛ.”