Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 84

Kristo Kaselɔ ni Mɔ Aaatsɔ—Mɛɛ Gbɛ Nɔ Eji Hiɛdɔɔ Sane?

Kristo Kaselɔ ni Mɔ Aaatsɔ—Mɛɛ Gbɛ Nɔ Eji Hiɛdɔɔ Sane?

LUKA 14:25-35

  • NƆ NI KASELƆ NI MƆ AAATSƆ LƐ BIƆ

Yesu tsɔɔ mɛi nibii ni he hiaa waa be ni eyeɔ nii yɛ Farisifoi lɛ ahiɛnyiɛlɔi lɛ ateŋ mɔ kome shĩa lɛ. Be ni Yesu nyiɛ gbɛ kɛmiiya Yerusalem lɛ, asafoku babaoo fata ehe. Mɛni hewɔ? Ani amɛmiitao ni amɛtsɔmɔ esɛɛnyiɛlɔi lɛɛlɛŋ, ní ekɔɔɔ he eko nɔ ni no feemɔ baabi kɛjɛ amɛdɛŋ?

Be ni amɛnyiɛ gbɛ lɛ nɔ kɛyaa lɛ, Yesu wie nɔ ko ni ekolɛ ebaahã amɛteŋ mɛi komɛi anaa akpɛ amɛhe. Ekɛɛ: “Kɛ́ mɔ ko ba miŋɔɔ ni enyɛɛɛ etsɛ kɛ enyɛ kɛ eŋa kɛ ebii kɛ enyɛmimɛi hii kɛ enyɛmimɛi yei, hɛɛ, kɛ lɛ diɛŋtsɛ ewala po lɛ, enyɛŋ etsɔ mikaselɔ.” (Luka 14:26) Shi mɛni nɔ ni ewie nɛɛ tsɔɔ?

Yesu etsɔɔɔ diɛŋtsɛ akɛ mɛi fɛɛ ni batsɔmɔɔ esɛɛnyiɛlɔi lɛ akasumɔ amɛwekumɛi. Moŋ lɛ, eetsɔɔ akɛ esa akɛ amɛsumɔ lɛ Yesu lɛ fe bɔ ni amɛsumɔɔ amɛwekumɛi lɛ. Esaaa akɛ amɛfeɔ amɛnii tamɔ nuu ni ewie ehe yɛ gbɛkɛ okpɔlɔŋmɛɛ lɛ he nɔkwɛmɔnɔ ni egba lɛ mli lɛ. Nuu lɛ kpoo ninefɔ̃ɔ ko ni he hiaa waa akɛni ekpee yoo etsɛko lɛ hewɔ.Luka 14:20.

Kadimɔ akɛ, Yesu kɛɛ esa akɛ kaselɔ lɛ anyɛ “lɛ diɛŋtsɛ ewala,” loo esusuma “po.” Enɛ tsɔɔ akɛ, esa akɛ mɔ ni ji Kristo anɔkwa kaselɔ lɛ asumɔ Yesu fe bɔ ni esumɔɔ lɛ diɛŋtsɛ ewala, ní ejɛ etsuiŋ ekɛ ewala aŋmɛ shi po, kɛ́ ehe bahia ni efee nakai. Enɛ tsɔɔ faŋŋ akɛ, eji hiɛdɔɔ sane diɛŋtsɛ akɛ mɔ aaatsɔ Kristo kaselɔ. Ejeee shwɛmɔ sane. Esa akɛ asusu he jogbaŋŋ dã.

Yesu kaselɔ ni mɔ ko baatsɔ lɛ baanyɛ ahã ekɛ shihilɛi ni mli wawai akpe, ni abaanyɛ awa lɛ yi hu, ejaakɛ Yesu wie akɛ: “Mɔ fɛɛ mɔ ni wóoo epiŋmɔ tso etere ní enyiɛ misɛɛ lɛ, enyɛŋ etsɔ mikaselɔ.” (Luka 14:27) Hɛɛ, esa akɛ Yesu anɔkwa kaselɔ lɛ ajɛ esuɔmɔ mli ekpee heguɔgbee ni tamɔ nɔ ni Yesu kɛkpe lɛ naa. Yesu ewie po akɛ ehenyɛlɔi lɛ baagbe lɛ.

No hewɔ lɛ, esa akɛ asafoku ni kɛ Yesu fãa gbɛ lɛ asusu nɔ ni Kristo kaselɔi ni amɛaatsɔmɔ lɛ biɔ yɛ amɛdɛŋ lɛ he jogbaŋŋ. Yesu kɛ nɔkwɛmɔnɔ ko tsu nii kɛtsɔɔ enɛ mli. Ekɛɛ: “Akɛ nɔkwɛmɔnɔ lɛ, nyɛteŋ namɔ ni kɛ́ eetao ema mɔɔ lɛ, klɛŋklɛŋ lɛ, etaŋ shi ni ebu naa ekwɛ kɛji eyɛ nii ni fa bɔ ni sa ni ekɛbaagbe naa lo? Kɛjeee nakai lɛ, eeetswa faneshi lɛ, shi enyɛŋ naa egbe.” (Luka 14:28, 29) No hewɔ lɛ, dani mɛi ni kɛ Yesu fãa gbɛ kɛyaa Yerusalem lɛ baatsɔmɔ ekaselɔi lɛ, esa akɛ amɛtsɔ hiɛ amɛkpɛ mli akɛ amɛbaatsu sɔ̃ ni no kɛbaafɔ̃ amɛnɔ lɛ he nii. Ekɛ nɔkwɛmɔnɔ kroko tsɔɔ enɛ mli. Ewie akɛ:

“Mɛɛ maŋtsɛ ni kɛ́ eeya ekɛ maŋtsɛ kroko ayawu ta lɛ, klɛŋklɛŋ lɛ, etaŋ shi ni eya ajina ekwɛ kɛji ebaanyɛ ekɛ asraafoi akpei nyɔŋma adamɔ mɔ ni hiɛ asraafoi akpei nyɔŋmai enyɔ kɛbaa enɔ lɛ naa lo? Anɔkwa, kɛ́ enyɛŋ efee nakai lɛ, no lɛ be ni nakai mɔ lɛ yɔɔ shɔŋŋ lolo lɛ, ebaatsu maŋ bɔfoi akuu ko koni amɛyakpa fai kɛhã toiŋjɔlɛ.” Bɔ ni afee ni Yesu ahã amɛna oti ni yɔɔ esane lɛ mli lɛ, ewie akɛ: “Nakai nɔŋŋ nyɛnáa nyɛlea akɛ, nyɛteŋ mɔ fɛɛ mɔ ni shiii nibii ni eyɔɔ lɛ fɛɛ lɛ, enyɛŋ etsɔ mikaselɔ.”Luka 14:31-33.

Anɔkwa, jeee asafoku ni nyiɛ Yesu sɛɛ kɛfãa gbɛ lɛ pɛ Yesu kɛwieɔ lɛ. Esa akɛ mɛi fɛɛ ni baakase Kristo he nii lɛ afee nɔ ni ewieɔ nɛɛ. Enɛ tsɔɔ akɛ, kɛ́ amɛmiitao amɛtsɔmɔ ekaselɔi lɛ, esa akɛ amɛfee klalo akɛ amɛkɛ amɛnibii fɛɛ—amɛheloonaa nibii, kɛ amɛwala po—baashã afɔle. Enɛ ji nɔ ko ni esa akɛ asusu he, ní asɔle yɛ he.

Agbɛnɛ, Yesu wie sane ko ni ewie he momo yɛ e-Gɔŋ nɔ Shiɛmɔ lɛ mli be ni ekɛɛ ekaselɔi lɛ ji “shikpɔŋ lɛ nɔ ŋoo” lɛ. (Mateo 5:13) Ekolɛ, nɔ ni etsɔɔ ji, taakɛ akɛ ŋoo diɛŋtsɛ baa nii ayi lɛ, ekaselɔi lɛ baanyɛ aye abua mɛi, ní abaa amɛyi, ni tsɔɔ akɛ amɛbaaye amɛbua amɛ koni amɛtsi amɛhe kɛje nibii ni fiteɔ mɔ yɛ mumɔŋ kɛ jeŋba mli lɛ he. Amrɔ nɛɛ ni esɔɔmɔ lɛ miihe aba naagbee lɛ, ekɛɛ: “Ŋwanejee ko bɛ he akɛ, ŋoo hi. Shi kɛ́ ŋoo lɛ mli hewalɛ lɛ tã lɛ, mɛni akɛbaawo lɛ ŋoo dɔŋŋ?” (Luka 14:34) Etoibolɔi lɛ le akɛ nakai beiaŋ lɛ, ŋoo ni yɔɔ lɛ ekomɛi jeee ekpakpa, ejaakɛ akɛ sũ mli nibii komɛi efutu, ni no hewɔ lɛ ehe bɛ sɛɛnamɔ tsɔ.

No hewɔ lɛ, Yesu miitsɔɔ akɛ esaaa akɛ mɛi ni ebatsɔmɔ ekaselɔi be kplaŋŋ nɛ lɛ po gbɔjɔɔ amɛfaishitswaa lɛ mli. Kɛ́ eba lɛ nakai lɛ, amɛhe baŋ sɛɛnamɔ, tamɔ ŋoo ni mli hewalɛ etã ji lɛ. No lɛ, je lɛ baaye amɛhe fɛo. Nɔ ni ehiii fe fɛɛ lɛ, amɛsaŋ Nyɔŋmɔ hiɛ, ni amɛbaahã agbe egbɛ́i lɛ he guɔ po. Yesu ma nɔ mi akɛ, ehe miihia waa ni amɛkwɛ koni nɔ ko nakai akaba. Ekɛɛ: “Mɔ ni yɔɔ toi ni ekɛaabo toi lɛ, hã ebo toi.”Luka 14:35.

Ekrokromɛi Hu Nɛ

Te Ooofee Tɛŋŋ Ona Anɔkwa Jamɔ Lɛ?

Ani anɔkwa jamɔ kome pɛ yɔɔ? Kanemɔ koni ona nibii 5 ni kadiɔ anɔkwa jamɔ.