Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 90

“Gbohiiashitee lɛ kɛ Wala Lɛ”

“Gbohiiashitee lɛ kɛ Wala Lɛ”

YOHANE 11:17-37

  • YESU BASHƐ SHI BE NI LAZARO EGBO SƐƐ

  • “GBOHIIASHITEE LƐ KƐ WALA LƐ”

Yesu jɛ Perea ni ebashɛ akrowa ko ni atsɛɔ lɛ Betania lɛ klotia. Betania kã Yerusalem boka, ni ekɛ lɛ teŋ jekɛmɔ aaafee kilomitai etɛ. Maria kɛ Marta, ni ji Lazaro nyɛmimɛi yei lɛ, miifo Lazaro ni gbo etsɛko lɛ. Mɛi babaoo eba koni amɛbashɛje amɛmii.

Kɛkɛ ni mɔ ko bakɛɛ Marta akɛ Yesu miiba, ni Marta he fee oya ni ekɛ lɛ yakpe. Marta kɛɛ Yesu nɔ ni ekɛ Maria fɛɛ susuɔ he yɛ gbii ejwɛ ni tsɔ hiɛ lɛ mli akɛ: “Nuŋtsɔ, eji oyɛ biɛ kulɛ, minyɛmi nuu lɛ náaa agbo.” Shi no etsɔɔɔ akɛ ebɛ hiɛnɔkamɔ. Marta kɛɛ akɛ: “Mile akɛ nɔ fɛɛ nɔ ni obaabi Nyɔŋmɔ lɛ, Nyɔŋmɔ kɛbaahã bo.” (Yohane 11:21, 22) Loloolo lɛ, Marta nuɔ he akɛ, Yesu baanyɛ aye abua enyɛmi nuu lɛ.

Yesu kɛɛ lɛ akɛ: “Onyɛmi nuu lɛ baate shi.” Marta nu shishi akɛ Yesu miiwie gbohiiashitee ni baaba wɔsɛɛ yɛ shikpɔŋ lɛ nɔ lɛ he, ni ji hiɛnɔkamɔ ni Abraham kɛ mɛi krokomɛi hu ná lɛ nɔŋŋ. Ni ewie wiemɔi ni nyiɛ sɛɛ nɛɛ kɛtsɔɔ akɛ eheɔ eyeɔ akɛ bɔ fɛɛ bɔ ni fee lɛ ebaaba mli nakai, ekɛɛ akɛ: “Mile akɛ ebaate shi yɛ gbohiiashitee lɛ mli yɛ naagbee gbi lɛ nɔ.”Yohane 11:23, 24.

Shi, ani Yesu baafee shihilɛ lɛ he nɔ ko amrɔ nɔŋŋ? Ekai Marta akɛ Nyɔŋmɔ ehã lɛ hewalɛ yɛ gbele nɔ, ekɛɛ akɛ: “Mɔ ni jieɔ hemɔkɛyeli kpo yɛ mimli lɛ, kɛ́ egbo po lɛ, ebaaba wala mli; ni mɔ fɛɛ mɔ ni hiɛ kã ni jieɔ hemɔkɛyeli kpo yɛ mimli lɛ gboŋ kɔkɔɔkɔ.”Yohane 11:25, 26.

Yesu etsɔɔɔ yɛ biɛ akɛ ekaselɔi ni yɔɔ yɛ nakai beiaŋ lɛ gboiŋ kɔkɔɔkɔ. Ejaakɛ taakɛ Yesu etsɔ hiɛ ekɛɛ ebɔfoi lɛ, lɛ po ebaagbo. (Mateo 16:21; 17:22, 23) Yesu miima nɔ mi akɛ mɛi ni jieɔ hemɔkɛyeli kpo yɛ emli lɛ baaná naanɔ wala. Mɛi babaoo baaná nakai wala lɛ kɛtsɔ gbohiiashitee nɔ. Ni kɛ̃lɛ, anɔkwafoi ni yɔɔ wala mli kɛyashi shihilɛ gbɛjianɔtoo nɛɛ naagbee lɛ gboiŋ kɔkɔɔkɔ. Enɛ hewɔ lɛ, mɔ fɛɛ mɔ ni jieɔ hemɔkɛyeli kpo yɛ Yesu mli lɛ baanyɛ aná nɔmimaa akɛ gbele yeŋ enɔ kɛyaŋ naanɔ.

Shi ani Yesu, mɔ ni wie etsɛko akɛ “Miji gbohiiashitee lɛ kɛ wala lɛ,” baanyɛ aye abua Lazaro ni gbo gbii ejwɛ nɛ lɛ? Yesu bi Marta akɛ: “Ani oheɔ enɛ oyeɔ?” Ehã lɛ hetoo akɛ: “Hɛɛ, Nuŋtsɔ, miheɔ miyeɔ akɛ bo ji Kristo lɛ, Nyɔŋmɔ Bi lɛ, mɔ ni baa je lɛ mli lɛ.” Akɛni Marta yɛ hemɔkɛyeli akɛ Yesu baanyɛ afee nɔ ko nakai gbi lɛ nɔŋŋ hewɔ lɛ, ewo foi kɛtee shĩa ni eyatsɛ Maria ni ekɛɛ lɛ akɛ: “Tsɔɔlɔ lɛ eba ni eetsɛ bo.” (Yohane 11:25-28) Kɛkɛ ni Maria shi shĩa lɛ, nɔŋŋ kɛkɛ ni mɛi krokomɛi lɛ hu yi esɛɛ ejaakɛ amɛsusu akɛ eeya Lazaro gbonyo bu lɛ he.

Yɛ no najiaŋ lɛ, Maria tee Yesu ŋɔɔ ni eho egbee Yesu naji anaa ni ebɔi yaafo, ni eti nɔ ni Marta ewie momo lɛ mli akɛ: “Nuŋtsɔ, eji oyɛ biɛ kulɛ, minyɛmi nuu lɛ náaa agbo.” Be ni Yesu na bɔ ni Maria kɛ mɛi ni fata ehe lɛ foɔ lɛ, ewerɛ ho ehe, ehao, ni ehiŋmɛiiaŋ kpala nu. Enɛ fee mɛi ni damɔ jɛmɛ lɛ naakpɛɛ waa. Shi amɛteŋ mɛi komɛi bi akɛ: ‘Kɛji Yesu nyɛ egbele shwilafo lɛ hiŋmɛii lɛ, ani enyɛŋ efee ni kulɛ mɔ nɛ akagbo?’Yohane 11:32, 37.