Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu​—Gbɛ lɛ, Anɔkwale lɛ, Wala Lɛ

 YITSO 38

Yohane Miitao Enu Yesu Naa Wiemɔ Ko

Yohane Miitao Enu Yesu Naa Wiemɔ Ko

MATEO 11:2-15 LUKA 7:18-30

  • YOHANE BAPTISILƆ LƐ BI MƆ NI YESU JI LƐ HE SANE

  • YESU JIE YOHANE YI

Yohane Baptisilɔ lɛ ehi tsuŋwoo lɛ mli aaafee afi. Ekã he eenu naakpɛɛ nibii ni Yesu feɔ lɛ. Bo lɛ, susumɔ bɔ ni Yohane baanu he ehã be ni ekaselɔi lɛ kɛɛ lɛ akɛ Yesu tee yoo okulafo lɛ binuu lɛ shi yɛ Nain lɛ he okwɛ. Kɛ̃lɛ, Yohane miitao enu nɔ ni nibii nɛɛ fɛɛ tsɔɔ lɛ kɛjɛ Yesu diɛŋtsɛ naa. Yohane tsu ekaselɔi lɛ ateŋ mɛi enyɔ. Mɛni amɛyaafee? Amɛyaabi Yesu akɛ: “Ani bo ji Mɔ ni Baa lɛ, aloo wɔkpa mɔ kroko gbɛ?”​—Luka 7:19.

Ani sanebimɔ nɛɛ ehã ohiɛ miifee bo yaa? Yohane ji mɔ ko ni jáa Nyɔŋmɔ waa, ni be ni ebaptisiɔ Yesu aaafee afii enyɔ ni eho nɛ lɛ, ena Nyɔŋmɔ mumɔ lɛ miikpeleke shi kɛmiiba Yesu nɔ, ni enu ni Nyɔŋmɔ miiwie akɛ ekpɛlɛɔ Yesu nɔ. Nɔ ko bɛ ni wɔɔdamɔ nɔ wɔkɛɛ akɛ Yohane hemɔkɛyeli miitã. Nakai eji kulɛ, Yesu ewieŋ Yohane he ekpakpa taakɛ efee yɛ be nɛɛ mli lɛ. Shi kɛ́ Yohane yiŋ efeee lɛ kɔshikɔshi lɛ, mɛni hewɔ mɔ etsu ní ayabi Yesu sane nɛɛ?

Ekolɛ nɔ pɛ ni Yohane taoɔ ji, ní enu kɛjɛ Yesu diɛŋtsɛ naa akɛ lɛ ji Mesia lɛ. Enɛ baawo Yohane hewalɛ be ni epiŋɔ yɛ tsuŋwoohe lɛ. Ni eeenyɛ efee akɛ, Yohane sanebimɔ lɛ hiɛ shishinumɔ kroko. Ele Biblia mli gbalɛi ni tsɔɔ akɛ Mɔ ni Nyɔŋmɔ Efɔ lɛ Mu lɛ baaye maŋtsɛ, ni ebaakpɔ̃ mɛi hu. Kɛ̃lɛ, yɛ Yesu baptisimɔ lɛ sɛɛ nyɔji babaoo lɛ, Yohane kã he ehɔ tsuŋwoohe lɛ. No hewɔ lɛ, Yohane miibi kɛji mɔ kroko baaba, kɛ́ wɔɔkɛɛ lɛ, ní ebaye Yesu sɛɛ, koni egbe nibii fɛɛ ni agba akɛ Mesia lɛ baatsu lɛ naa.

Yɛ nɔ najiaŋ ni Yesu baakɛɛ Yohane kaselɔi lɛ kɛkɛ akɛ, ‘Hɛɛ, mi ji Mɔ ni Baa lɛ,’ ehã amɛ odaseyeli ni tsɔɔ akɛ Nyɔŋmɔ miifi esɛɛ, kɛtsɔ mɛi babaoo ní yeɔ helai srɔtoi fɛɛ ni etsa lɛ nɔ. Kɛkɛ ni ekɛɛ amɛ akɛ: “Nyɛyaa ni nyɛyagbaa Yohane nɔ ni nyɛnuɔ kɛ nɔ ni nyɛnaa nɛɛ akɛ: Shwilafoi miina nii amrɔ nɛɛ, ni akpakei miinyiɛ, ni aahã kpitiyelɔi ahe miitse ni toimulɔi miinu nii, ni aatee gbohii ashi, ni aajaje sane kpakpa lɛ aatsɔɔ ohiafoi.”​—Mateo 11:4, 5.

Eeenyɛ efee akɛ, Yohane sanebimɔ lɛ tsɔɔ akɛ, eekpa gbɛ akɛ Yesu baafee nibii ni fe nɔ ni efeɔ amrɔ nɛɛ, ní ekolɛ ejie lɛ kɛjɛ tsuŋwoohe lɛ. Shi, Yesu miikɛɛ Yohane akɛ ekakpa nɔ ko ni fe naakpɛɛ nii ni efeɔ lɛ gbɛ.

Be ni Yohane kaselɔi lɛ tee lɛ, Yesu ma nɔ mi ehã asafoku lɛ akɛ Yohane fe gbalɔ. Lɛ ji Yehowa ‘bɔfo lɛ’ ni agba ehe sane yɛ Maleaki 3:1 lɛ. Lɛ nɔŋŋ ji gbalɔ Elia, taakɛ agba yɛ Maleaki 3:23, 24 lɛ. Yesu wie akɛ: “Lɛɛlɛŋ, miikɛɛ nyɛ akɛ, mɛi ni yei fɔ amɛ lɛ ateŋ mɔ ko eteko shi ni fe Yohane Baptisilɔ lɛ, shi mɔ ni baa shi yɛ ŋwɛi Maŋtsɛyeli lɛ mli lɛ fe lɛ.”​—Mateo 11:11.

Wiemɔ ni Yesu wie akɛ mɔ ni baa shi yɛ ŋwɛi Maŋtsɛyeli lɛ mli lɛ fe Yohane lɛ tsɔɔ akɛ, Yohane eyaŋ ŋwɛi Maŋtsɛyeli lɛ mli. Yohane saa gbɛ lɛ eto Yesu, shi egbo dani Kristo gbele gbɛ kɛhã ŋwɛiyaa lɛ. (Hebribii 10:19, 20) Shi, Yohane ji Nyɔŋmɔ gbalɔ anɔkwafo, ni no hewɔ lɛ ebaahi shikpɔŋ lɛ nɔ akɛ Nyɔŋmɔ Maŋtsɛyeli lɛ shishi nyo.