Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu—Gbɛ lɛ, Anɔkwale lɛ, Wala Lɛ

 YITSO 39

Kpoo Hã Yinɔ ni Ekpiliŋ Etsui Lɛ

Kpoo Hã Yinɔ ni Ekpiliŋ Etsui Lɛ

MATEO 11:16-30 LUKA 7:31-35

  • YESU WIE MAJI KOMƐI AHIƐ

  • ESHƐJE MƐI AMII NI EHÃ AMƐHE JƆ AMƐ

Yesu buɔ Yohane Baptisilɔ lɛ waa, shi te mɛi pii naa Yohane amɛhãa tɛŋŋ? Yesu wie akɛ: “Yinɔ nɛɛ . . . [tamɔ] gbekɛbii bibii ni tara jaji anɔ, ni bolɔɔ amɛtsɛtsɛɔ gbekɛbii krokomɛi akɛ: ‘Wɔkpã bɛlɛ wɔhã nyɛ, shi nyɛjooo; wɔwo yara, shi nyɛgbalaaa nyɛhe mai kɛtsɔɔɔ akɛ nyɛmiiye awerɛho.’”Mateo 11:16, 17.

Mɛni Yesu tsɔɔ lɛ? Ehã sane lɛ fee faŋŋ akɛ: “Yohane ba, eyeee nii ni enuuu nɔ ko, ni kɛ̃lɛ mɛi kɛɔ akɛ, ‘Eyɛ daimonio.’ Gbɔmɔ Bi lɛ ba, ni eyeɔ nii ni enuɔ nɔ ko, fɛɛ sɛɛ lɛ mɛi kɛɔ akɛ, ‘Naa! Nuu fufeelɔ kɛ weinnulɔ, toohelɔi kɛ eshafeelɔi anaanyo.’” (Mateo 11:18, 19) Akɛ Nazirnyo lɛ, Yohane hã eshihilɛ fee mlɛo, ni enuuu wein po, kɛ̃lɛ yinɔ nɛɛ kɛɛ eyɛ daimonio. (4 Mose 6:2, 3; Luka 1:15) Nɔ ni tamɔɔɔ nakai lɛ, Yesu hi shi taakɛ mɛi fɛɛ feɔ lɛ. Eŋmɛɔ pɛpɛɛpɛ yɛ niyeli kɛ ninumɔ mli, shi akɛɛ fufeelɔ kɛ weinnulɔ ji lɛ. Etamɔ nɔ ni nɔ ko bɛ ni abaafee ni baasa mɛi nɛɛ ahiɛ.

Yesu kɛ yinɔ nɛɛ to gbekɛbii bibii ni tara jaji anɔ, ní gbekɛbii krokomɛi kpã bɛlɛ hã amɛ, shi amɛjooo, amɛwo yara hã amɛ, shi amɛyeee awerɛho lɛ he. Ekɛɛ akɛ: “Fɛɛ mli lɛ, abuɔ hiɛshikamɔ jalɔ yɛ enitsumɔi anaa.” (Mateo 11:16, 19) Hɛɛ, “nitsumɔi” lɛ—ni ji bɔ ni Yohane kɛ Yesu hi shi amɛhã lɛ—tsɔɔ akɛ saji ni akɛshwieɔ amɛnɔ lɛ bɛ mli.

Be ni Yesu ewie yinɔ nɛɛ he akɛ amɛkpiliŋ amɛtsui lɛ sɛɛ lɛ, ewie maji komɛi ni etsu hewalɛ nitsumɔi yɛ mli lɛ ahiɛ. Amɛji Korazin, Betsaida, kɛ Kapernaum. Yesu kɛɛ eji etsu nitsumɔi nɛɛ yɛ Tiro kɛ Sidon, ni ji Foinikebii amaji lɛ amli kulɛ, amɛbaatsake amɛtsui. Etsĩ Kapernaum, ni ji he ni ehi be saŋŋ lɛ hu tã. Jɛmɛ po lɛ, mɛi babaoo kpiliŋ amɛtsui. Yesu wie maŋ nɛɛ he akɛ: “Kojomɔ Gbi lɛ nɔ lɛ, ebaafee mlɛo ehã Sodom shikpɔŋ lɛ fe bo.”Mateo 11:24.

Kɛkɛ ni Yesu jie e-Tsɛ, mɔ ni ŋɔɔ anɔkwalei ni jara wala lɛ eteɔ “hiɛshikalɔi kɛ nilelɔi,” shi ejieɔ amɛ kpo etsɔɔ mɛi ni baa shi, tamɔ gbekɛbii bibii lɛ yi. (Mateo 11:25) Efɔ̃ mɛi nɛɛ nine akɛ: “Nyɛbaa miŋɔɔ, nyɛ mɛi fɛɛ ni eetɔ nyɛ, ní nyɛtere jatsui ni tsiitsii, ni mahã nyɛhe ajɔ nyɛ. Nyɛwóa mikɔɔŋtso lɛ nyɛfɔ̃a nyɛnɔ, ní nyɛkasea mi, ejaakɛ mihe jɔ, ni mibaa mihe shi yɛ mitsuiŋ, ni nyɛhe baajɔ nyɛ. Ejaakɛ mikɔɔŋtso lɛ teremɔ waaa, ni mijatsu lɛ etsiii.” Ninefɔ̃ɔ nɛɛ nɔ bɛ kwraa.Mateo 11:28-30.

Mɛɛ gbɛ nɔ Yesu hãa mɛi ahe jɔɔ amɛ? Jamɔŋ hiɛnyiɛlɔi lɛ ehã mɛi lɛ etsɔmɔ nyɔji yɛ kusumii ni tamɔ jatsu ni amɛkɛshwie amɛnɔ lɛ hewɔ, ni eko ji Hejɔɔmɔ Gbi lɛ he mlai ni yɔɔ kpɛŋŋ fe nine lɛ. Shi Yesu tsɔɔ amɛ anɔkwale ni jɛ Nyɔŋmɔ ŋɔɔ lɛ, ni no hãa amɛyeɔ amɛhe kɛjɛɔ kusumii nɛɛ ahe ni amɛhe jɔɔ amɛ. Kɛfata he lɛ, etsɔɔ mɛi ni tsuii ekumɔ yɛ bɔ ni maŋkwralɔi lɛ yeɔ amɛnɔ hãa hewɔ, kɛ mɛi ni esha ehã amɛhao waa lɛ nɔ ni amɛbaafee koni amɛhe ajɔ amɛ. Yesu tsɔɔ amɛ nɔ ni esa akɛ amɛfee koni akɛ amɛhe eshai afa amɛ kɛ nɔ ni amɛbaafee koni wekukpaa kpakpa ahi amɛ kɛ Nyɔŋmɔ teŋ.

Mɛi fɛɛ ni woɔ Yesu kɔɔŋtso ni etsiii lɛ amɛfɔ̃ɔ amɛnɔ lɛ baanyɛ ajɔɔ amɛhe nɔ amɛhã Nyɔŋmɔ, ní amɛja wɔ-Tsɛ ni yɔɔ ŋwɛi ni musuŋ tsɔɔ lɛ, ni naa mɔbɔ lɛ. Enɛ kɛ jatsu ni tsii efɔ̃ɔɔ mɔ nɔ, ejaakɛ Nyɔŋmɔ taomɔ nii lɛ jeee jatsu.1 Yohane 5:3.

Ekrokromɛi Hu Nɛ

Ani Esa akɛ Kristofoi Aye Hejɔɔmɔ Gbi Lɛ?

Kɛ́ jeee nakai lɛ, mɛni hewɔ Biblia lɛ tsɛɔ Hejɔɔmɔ gbi lɛ akɛ naanɔ kpaŋmɔ lɛ?

“Te Nɔ ni Ji Kitãi lɛ Ateŋ Klɛŋklɛŋ Nɔŋ?”

Abaanyɛ amua nibii fɛɛ ni Nyɔŋmɔ taoɔ yɛ wɔdɛŋ lɛ naa awo wiemɔ kome mli.