Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu​—Gbɛ lɛ, Anɔkwale lɛ, Wala Lɛ

 YITSO 54

Yesu​—“Wala Aboloo Lɛ”

Yesu​—“Wala Aboloo Lɛ”

YOHANE 6:25-48

  • YESU JI ‘ABOLOO NI JƐ ŊWƐI’ LƐ

Yesu lɛ́ mɛi akpei abɔ yɛ naakpɛɛ gbɛ nɔ yɛ Galilea Ŋshɔ lɛ boka, shi be ni mɛi nɛɛ kpaŋ akɛ amɛbaamɔ lɛ ni amɛwó lɛ maŋtsɛ lɛ, egbala ehe shi. Nakai gbi lɛ nyɔɔŋ lɛ, enyiɛ ŋshɔ ni efee hamahama lɛ hiɛ, ni Petro hu nyiɛ ŋshɔ lɛ hiɛ, shi be ni Petro bɔi shiumɔ yɛ ehemɔkɛyeli ni gbugbaa lɛ hewɔ lɛ, Yesu mɔ enine mli ni esha lɛ. Yesu hã kɔɔyɔɔ ko ni kulɛ ebaanyɛ ehã ekaselɔi lɛ alɛlɛ lɛ ayasha shi lɛ fɔ̃ɔ tswaa ni ekɛhere amɛ.

Amrɔ nɛɛ, Yesu eba Galilea Ŋshɔ lɛ anai, yɛ Kapernaum kpokpaa lɛ nɔ. Mɛi ni elɛ́ yɛ naakpɛɛ gbɛ nɔ lɛ na lɛ, ni amɛbi lɛ akɛ: “Mɛɛ be oba biɛ?” Yesu kã amɛ hiɛ akɛ, niyenii ni amɛtaoɔ ni ehã amɛ ekoŋŋ lɛ hewɔ amɛtaoɔ lɛ lɛ. Ewo amɛ ŋaa akɛ amɛtsu “niyenii ni fiteee ni hãa naanɔ wala” lɛ moŋ he nii. No hewɔ lɛ, amɛbi lɛ akɛ: “Mɛni esa akɛ wɔfee koni wɔnyɛ wɔtsu Nyɔŋmɔ nitsumɔi lɛ?”​—Yohane 6:25-28.

Ekolɛ nitsumɔi ni yɔɔ Mose Mla lɛ mli lɛ ji nɔ ni ba amɛjwɛŋmɔŋ, shi no mli lɛ, Yesu miiwie nitsumɔ ni he yɔɔ sɛɛnamɔ fe fɛɛ lɛ he, ekɛɛ akɛ: “Nyɔŋmɔ nitsumɔ lɛ nɛ, akɛ nyɛjie hemɔkɛyeli kpo yɛ mɔ ni etsu lɛ lɛ mli.” Shi nibii ni Yesu fee lɛ fɛɛ sɛɛ lɛ, mɛi lɛ ejieee hemɔkɛyeli kpo yɛ emli. Amɛbi ni efee okadi ko koni amɛhe enɔ amɛye. Amɛbi lɛ akɛ: “Mɛɛ nitsumɔ obaatsu?” “Wɔtsɛmɛi lɛ ye mana lɛ yɛ ŋa lɛ nɔ, taakɛ aŋma lɛ, akɛ: ‘Ehã amɛ aboloo kɛjɛ ŋwɛi ni amɛye.’”​—Yohane 6:29-31; Lala 78:24.

Be ni amɛbi Yesu ni efee okadi ko lɛ, egbala amɛjwɛŋmɔ kɛtee mɔ ni hãa mɛi hewalɛ ni amɛkɛfeɔ naakpɛɛ nii lɛ nɔ ekɛɛ: “Miikɛɛ nyɛ akɛ, Mose hãaa nyɛ aboloo lɛ kɛjɛɛɛ ŋwɛi, shi moŋ mi-Tsɛ hãa nyɛ anɔkwa aboloo lɛ kɛjɛɔ ŋwɛi. Ejaakɛ Nyɔŋmɔ aboloo lɛ ji mɔ ni kpelekeɔ shi kɛjɛɔ ŋwɛi ni eŋɔɔ wala ehãa je lɛ lɛ.” Akɛni amɛkɔɔɔ nɔ ni ewieɔ lɛ sɛɛ hewɔ lɛ, amɛba lɛ nii akɛ: “Nuŋtsɔ, hã wɔ aboloo nɛɛ daa.” (Yohane 6:32-34) Shi mɛɛ “aboloo” he Yesu wieɔ lɛ?

Egbala mli akɛ: “Miji wala aboloo lɛ. Mɔ fɛɛ mɔ ni baa miŋɔɔ lɛ, hɔmɔ yeŋ lɛ kɔkɔɔkɔ, ni mɔ fɛɛ mɔ ni jieɔ hemɔkɛyeli kpo yɛ mimli lɛ, kumai yeŋ lɛ kɔkɔɔkɔ. Shi taakɛ mikɛɛ nyɛ lɛ, nyɛna mi moŋ, shi kɛ̃lɛ nyɛheee nyɛyeee. . . . Mikpeleke shi kɛjɛ ŋwɛi kɛba koni mibafee mɔ ni tsu mi lɛ suɔmɔnaa nii, shi jeee mi diɛŋtsɛ misuɔmɔnaa nii. Enɛ ji mɔ ni tsu mi lɛ suɔmɔnaa nii, akɛ mikahã mɛi ni eŋɔhã mi lɛ ateŋ mɔ ko kwraa ŋmɛɛ mi, shi moŋ mitee amɛ shi yɛ naagbee gbi lɛ nɔ. Ejaakɛ enɛ ji mi-Tsɛ suɔmɔnaa nii, akɛ mɔ fɛɛ mɔ ni yɔseɔ Bi lɛ, ni ejieɔ hemɔkɛyeli kpo yɛ emli lɛ aná naanɔ wala, ni matee lɛ shi yɛ naagbee gbi lɛ nɔ.”​—Yohane 6:35-40.

Enɛ hã Yudafoi lɛ amli wo la ni amɛbɔi huhuuhu wiemɔ yɛ ehewɔ. Te tɛŋŋ ni ekɛɔ akɛ lɛ ji “aboloo ni kpeleke shi kɛjɛ ŋwɛi lɛ”? (Yohane 6:41) Amɛ lɛ, amɛnaa lɛ akɛ mɔ ko ni gbɔmɛi adesai fɔ lɛ, ni efɔlɔi jɛ Nazaret maŋ ni yɔɔ Galilea lɛ. Mɛi lɛ bibii amɛhe akɛ: “Ani jeee Yesu, Yosef bi lɛ, ni wɔle etsɛ kɛ enyɛ lɛ nɛ?”​—Yohane 6:42.

Yesu kɛɛ amɛ akɛ: “Nyɛkpaa huhuuhu lɛ wiemɔ yɛ nyɛteŋ. Mɔ ko mɔ ko nyɛŋ aba miŋɔɔ, akɛ ja Tsɛ lɛ ni tsu mi lɛ gbala lɛ dã, ni matee lɛ shi yɛ naagbee gbi lɛ nɔ. Aŋma yɛ Gbalɔi lɛ amli akɛ: ‘Yehowa baatsɔɔ amɛ fɛɛ nii.’ Mɔ fɛɛ mɔ ni boɔ Tsɛ lɛ toi ni ekaseɔ nii lɛ baa miŋɔɔ. Jeee akɛ gbɔmɔ ko ena Tsɛ lɛ pɛŋ, ja mɔ ni jɛ Nyɔŋmɔ ŋɔɔ lɛ; mɔ nɛ ji mɔ ni ena Tsɛ lɛ. Lɛɛlɛŋ, lɛɛlɛŋ, miikɛɛ nyɛ akɛ, mɔ fɛɛ mɔ ni heɔ yeɔ lɛ yɛ naanɔ wala.”​—Yohane 6:43-47; Yesaia 54:13.

Mra mli be ni Yesu kɛ Nikodemo wieɔ lɛ, etsɔɔ akɛ já mɔ ko ehe Bi lɛ nɔ eye dani ebaaná naanɔ wala, ekɛɛ akɛ: “Mɔ fɛɛ mɔ ni jieɔ hemɔkɛyeli kpo yɛ [Nyɔŋmɔ Bi koome lɛ mli lɛ] hiɛ akakpãtã  shi moŋ ená naanɔ wala.” (Yohane 3:15, 16) Shi amrɔ nɛɛ mɛi babaoo ekɛwieɔ lɛ, ni eekɛɛ amɛ akɛ lɛ enɔ abaatsɔ ahã amɛná naanɔ wala, wala ko ni mana loo aboloo ni ahɔ̃ɔ yɛ Galilea lɛ eko nyɛŋ ahã amɛná. No hewɔ lɛ, te aaafee tɛŋŋ aná naanɔ wala lɛ? Yesu saa kɛɛ akɛ: “Miji wala aboloo lɛ.”​—Yohane 6:48.

Sanegbaa ni kɔɔ aboloo ni jɛ ŋwɛi nɛɛ he lɛ tee nɔ, ni eyagbe naa yɛ kpeehe ko ni yɔɔ Kapernaum be ni Yesu tsɔɔ nii yɛ jɛmɛ lɛ.