Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Yesu​—Gbɛ lɛ, Anɔkwale lɛ, Wala Lɛ

 YITSO 61

Yesu Tsa Gbekɛ Nuu ko ni Yɔɔ Daimonio

Yesu Tsa Gbekɛ Nuu ko ni Yɔɔ Daimonio

MATEO 17:14-20 MARKO 9:14-29 LUKA 9:37-43

  • JA ANÁ HEMƆKƐYELI NI MLI WA DANI ABAANYƐ ATSA GBEKƐ NUU KO NI YƆƆ DAIMONIO

Be ni Yesu, Petro, Yakobo, kɛ Yohane jɛ gɔŋ lɛ nɔ amɛkpeleke shi lɛ, amɛkɛ asafoku babaoo ko kpe. Nɔ ko etɔ̃tɔ. Woloŋmalɔi lɛ ebɔle kaselɔi lɛ ni amɛkɛ amɛ miije ŋwane. Be ni mɛi lɛ na Yesu lɛ, amɛnaa kpɛ amɛhe ni amɛjo foi amɛyanina lɛ, ni amɛŋa lɛ. Ebi amɛ akɛ: “Mɛni he ŋwane nyɛkɛ amɛ jeɔ lɛ?”​—Marko 9:16.

Nuu ko jɛ asafoku lɛ teŋ ebakula shi yɛ Yesu hiɛ ni ekɛɛ akɛ: “Tsɔɔlɔ, mikɛ mibinuu ba oŋɔɔ ejaakɛ eyɛ mumɔ ni hãa mɔ tsɔɔ mumui. He fɛɛ he ni ebaamɔ lɛ yɛ lɛ, etsiɔ lɛ etswaa shi, ni enaa kwɛ̃ɔ afui, ni ekpeɔ enyanyɔji ashishi, ni ehewalɛ tãa. Mibi okaselɔi lɛ koni amɛfã lɛ, shi amɛnyɛɛɛ.”​—Marko 9:17, 18.

Eeenyɛ efee akɛ, woloŋmalɔi lɛ miiwie amɛmiishi kaselɔi lɛ akɛni amɛnyɛɛɛ amɛtsa gbekɛ nuu lɛ hewɔ, ni ekolɛ amɛmiiye amɛhe fɛo po yɛ no hewɔ. Yɛ nɔ najiaŋ ni Yesu baahã tsɛ ni ehao lɛ hetoo lɛ, ekɛ asafoku lɛ wie ekɛɛ: “Oo yinɔbii ni bɛ hemɔkɛyeli ni bɛ amɛŋɛlɛ nɔ, be enyiɛ kwraa mikɛ nyɛ baahi shi kɛyashi? Be enyiɛ kwraa maná nyɛhe tsui kɛyashi?” Ewie wiemɔi ni wa nɛɛ eshi woloŋmalɔi lɛ ni hao ekaselɔi lɛ akɛni ebɛ amɛteŋ lɛ hewɔ lɛ. Agbɛnɛ Yesu kɛ tsɛ ni ehao lɛ wie, ekɛɛ akɛ: “Nyɛkɛ lɛ abaa miŋɔɔ yɛ biɛ.”​—Mateo 17:17.

Be ni akɛ gbekɛ nuu lɛ yaa Yesu ŋɔɔ lɛ, daimonio lɛ too lɛ tswa shi ni ehã ablami ni naa wa sha lɛ. Gbekɛ nuu lɛ tee nɔ ekokolo shi ni enaa kwɛ̃ afui. Yesu bi tsɛ lɛ akɛ: “Be enyiɛ nɛ ni enɛ bɔi lɛ feemɔ?” Ehã Yesu hetoo akɛ: “Kɛjɛ egbekɛbiiashi, ni eshɛɔ lɛ efɔ̃ɔ la mli kɛ nu mli kpitiokpitio koni ekpãtã ehiɛ.” Nuu lɛ kpa fai akɛ: “Kɛ́ obaanyɛ ofee he nɔ ko lɛ, omusuŋ atsɔ bo yɛ wɔhe ni oye obua wɔ.”​—Marko 9:21, 22.

 Tsɛ lɛ ehao waa, ejaakɛ Yesu kaselɔi lɛ po nyɛɛɛ aye abua lɛ. Yesu hã tsɛ ni ehao waa lɛ tsui, ekɛɛ akɛ: “Okɛɛ, ‘Kɛ́ obaanyɛ’? Mɔ ni yɔɔ hemɔkɛyeli lɛ, nibii fɛɛ baanyɛ aba mli ahã lɛ.” Amrɔ lɛ, tsɛ lɛ bolɔ ekɛɛ: “Miyɛ hemɔkɛyeli! He ni hemɔkɛyeli he hiaa mi yɛ lɛ, ye obua mi!”​—Marko 9:23, 24.

Yesu na akɛ asafoku lɛ miike kɛmiiba eŋɔɔ. Be ni mɛi nɛɛ fɛɛ miikwɛ Yesu lɛ, ekã daimonio lɛ hiɛ akɛ: “Bo mumɔ ni hãa mɔ tsɔɔ mumui kɛ toimulɔ, miifã bo akɛ jee emli, ni okabote emli dɔŋŋ!” Be ni daimonio lɛ shiɔ gbekɛ nuu lɛ, ehã ebolɔ, ni ehã ablami ni naa wa sha lɛ. Kɛkɛ ni gbekɛ nuu lɛ kã shi ni etsiii ehe. Be ni mɛi lɛ na enɛ lɛ, amɛteŋ mɛi pii kɛɛ akɛ: “Egbo!” (Marko 9:25, 26) Shi be ni Yesu mɔ gbekɛ nuu lɛ nineshi lɛ, ewó ehe nɔ, ni ‘ehe wa lɛ yɛ nakai ŋmɛlɛtswaa lɛ nɔ nɔŋŋ.’ (Mateo 17:18) Ebɛ naakpɛɛ akɛ, mɛi lɛ ahe jɔ̃ amɛhe yɛ nibii ni Yesu feɔ lɛ hewɔ.

Mra mli be ni Yesu tsu ekaselɔi lɛ koni amɛyashiɛ lɛ, amɛnyɛ amɛfãmɔ daimonioi. No hewɔ lɛ, be ni amɛ kɛ Yesu pɛ yɔɔ shĩa ko mli lɛ, amɛbi lɛ akɛ: “Mɛni hewɔ wɔnyɛɛɛ lɛ wɔfã lɛ?” Yesu gbala mli akɛ amɛhemɔkɛyeli ni faaa lɛ hewɔ amɛnyɛɛɛ amɛfã lɛ lɛ, ekɛɛ akɛ: “Nɛkɛ henɔ nɛɛ, ja sɔlemɔ pɛ nɔ abaanyɛ atsɔ afã lɛ.” (Marko 9:28, 29) Ebaabi ni mɔ aná hemɔkɛyeli ni mli wa, ni agbɛnɛ hu esɔle koni Nyɔŋmɔ awaje lɛ dani ebaanyɛ efã daimonio ni he wa nɛɛ.

Yesu mu sane lɛ naa akɛ: “Lɛɛlɛŋ, miikɛɛ nyɛ akɛ, kɛ́ nyɛyɛ hemɔkɛyeli ni dalɛ tamɔ sinapi wu lɛ, nyɛbaakɛɛ gɔŋ nɛɛ akɛ, ‘Fãa kɛjɛ biɛ kɛya jɛmɛ,’ ni ebaafã, ni nɔ ko nɔ ko bɛ ni nyɛnyɛŋ nyɛfee.” (Mateo 17:20) Lɛɛlɛŋ, kɛ́ mɔ ko yɛ hemɔkɛyeli lɛ eyɛ hewalɛ waa!

Naagbai kɛ gbɛtsiinii ni wɔkɛkpeɔ ní haŋ wɔya wɔhiɛ yɛ Yehowa sɔɔmɔ lɛ mli lɛ baanyɛ afee tamɔ gɔŋ ko ni anyɛŋ akwɔ loo ajie kɛje jɛmɛ. Fɛɛ sɛɛ lɛ, kɛ́ wɔná hemɔkɛyeli lɛ, wɔbaanyɛ wɔye naagbai kɛ gbɛtsiinii ni tamɔ gɔji lɛ anɔ.